-فاطمة اول ماتصحي اتصلي بيا عشان ممكن معرفش اصحي والامتحان يروح عليا

_يعني انتي متصله بيا الساعه 3الفجر عشان تقوليلي كدا انا فكرت فيه مصيبه

_ماانا لقيتك اون لاين عرفت انك صاحيه المهم بس متنسيش تتصلي بيا 

_خلاص ماشي انا هقفل دلوقتي علشان لو ماما سمعتني بتكلم في التلفون ولسه منمتش مش هتسكت 

_يابنتي مش مامتك سافرت عند بيت جدك 

_اتكلمت بضحك انا فكرت كدا ياستي وقولت هسهر براحتي جيت لقيتها في المطبخ دخلت علي الاوضه بسرعه انام بدل ماتقولي اتاخرتي ليه 

_تمام ياحبيبتي انا هنام دلوقتي علشان اقدر اصحي بكرا تصبحي علي خير 

_وانتي من اهله ياقمر

_قفلت معاها لقيت باب الاوضه بيفتح براحه غطيت وشي بسرعه وعملت نفسي نايمه 

لقيت ماما دخلت فضلت قاعده علي السرير جمبي بعدين قامت غطتني كويس و قامت قفلت الشبابيك اللي في الاوضه كلها وقفلت النور وخرجت

_فتحت التلفون وسجلت ريكورد وانا بضحك

بقولك اي يابت ياسارة متتصليش بيا دلوقتي عشان ماما شكلها سمعتني ودخلت قفلت النور والشبابيك عشان تشوفني صاحيه ولا لا متعرفش ان هنام حتي لو عملت اي المهم بكرا هتصل بيكي يلا سلام

_قفلت التلفون ونمت بسرعه صحيت الساعه 6الصبح علي صوت التلفون رديت من غير ما اعرف مين

_ايوا ياسارة

_سارة مين وبعدين ساعه علشان تردي قلقتيني عليكي 

_اي يا ماما روحتي فين بدري كدا 

_انتي يابت هبله انا مش قولتلك ان هروح عند بيت جدك امبارح وقولتلك بعد ماتخلصي تعاليلي وفضلت اتصل بيكي مش بتردي

_قومت بهدوء وانا ببص حواليا لقيت الشبابيك لسه مقفولة 

ماما انتي متاكده يعني مكنتيش موجودة هنا امبارح بليل انا جيت ولقيتك ودخلتي عليا الاوضه وقفلتي النور و الشبابيك كلها

_ لسه بتكلم لقيت التلفون فصل رميته جمبي وانا باصه حواليا ومرعوبه وخايفه اتحرك

_فضلت احاول افتح التلفون كذا مرة لحد مافتح لسه هتصل علي سارة اقولها تجيلي بسرعه سمعت الباب بيخبط جامد جدا التلفون وقع مني من الخضه

فضلت مكاني رافضه اتحرك والخبط بيزيد لحد ماسمعت باب الشقه بيفتح قومت بسرعه استخبيت ورا الستارة لحد ما لمحت بابا داخل الاوضه جريت عليه بسرعه وانا مرعوبه اتكلمت وانا بشده عشان نخرج

بابا كويس انك جيت يلا نمشي من هنا بسرعه البيت ده في حاجه غريبه

_فضل يهدي فيا وقعدت علي اول كرسي قابلنا فضلت احاول اقنعه ان شوفت واحده شبهه ماما وهو مكنش مصدقني

_بعدين هديت شويه وسالته وانا خايفه بابا هو انت لحقت تيجي من عند جدو ازاي بالسرعه دي انت مش كنت مع ماما 

_ياحبيبتي انا كنت راجع علشان نسيت ورق مهم تبع الارض بتاعت جدك ولقيت ولدتك بتتصل بيا وقلقانه عليكي وبتقول انها كانت بتكلمك بس تلفونك شكله فصل ف قلقت عليكي انا وكمان وجيت بسرعه المهم انتي عامله اى دلوقتي 

_اتكلمت بهدوء وانا باصه حواليا انا الحمدلله كويسه دلوقتي 

_مسك ايدي و قومني ودخلنا الاوضه تاني 

تعالي ياحبيبتي نامي ساعتين كدا عشان تلحقي الامتحان  وانا هظبط ورق الشغل جمبك هنا عشان متخافيش

_فضلت احاول انام وانا مش قادره افهم اي اللي بيحصل معايا ده انا متاكده ان ماما كانت موجودة امبارح روحت في النوم وانا بفكر صحيت علي صوت بابا وهو بيقولي ان المنبه بيرن 

قومت فضلت قاعدة على السرير بحاول استوعب دا حلم ولا حقيقه لحد ماسمعت جرس الشقه بيرن اتخضيت ومسكت في ايد بابا بسرعه لقيته بيهديني وبيقولي ان ماما اتصلت بيه وقلقانه عليا وصممت تيجي تشوفني بابا قام يفتح باب الشقه خفت جدا وفضلت قاعده مكاني متحركتش لحد مالقيت ماما جايه بتجري عليا حضنتني وفضلت تعيط ومنهارة

انا اسفه ياحبيبتي ان سيبتك لوحدك  حصلك حاجه احكيلي ربنا مايوريني فيكي اي حاجه وحشه يارب 

_بابا دخل علينا وهو بيضحك 

في اي يا فريدة ما البنت كويسه اهو محسساني انها كانت بتحارب ليه 

_ماما وهي لسه حضناني ومش راضيه تسيبني اسكت انت يا عبدالله انت قلبك حجر ياشيخ

_قعد جمبينا وهو مبتسم 

انتي اللي قلبك ضعيف ومش بيستحمل حاجه يلا بقي قومو حضرتلكم فطار ملوكي لا انتي ولا بنتك تعرفو تعمله زيه 

_مسحت دموعي ومسكت ايد ماما وبوستها وحضنت بابا وفضلت اعيط 

ربنا يخليكم ليا يارب وميحرمنيش منكم ابدا بجد والله انتو لو مكنتوش جيتو في الوقت المناسب انا حاسه اني كنت هموت 

_بابا مسحلي دموعي وهو بيضحك بعد الشر عليكي ياحبيبت قلبي ويلا قومي بقي عشان تلقحي الامتحان مش هقبل اقل من امتياز قومت وانا بضحك حاضر ياكبير اوعدك ان هجيب المادة في شوال بس متنساش الايفون اللي وعدتني بيه بقي لو جبتلك الامتياز

_بابا وهو بيضحك يعني لو قولتلك مش هجيلك الايفون اللي انتي عايزة مش هتنجحي خلاص مش هجيبه انتي الخسرانه في تلك الحالتين

_ماما وهي بتحضني 

ملكيش دعوة بيه انجحي انتي بس وانا هجبلك الدنيا كلها تحت رجليكي 

_لسه هرد سمعت جرس الباب بيرن 

استغربت مين اللي هيجيلنا دلوقتي 

_بابا قام مسك ايد ماما واتكلم  بهدوء وابتسامه قومي افتحي اكيد هتلاقيها هاجر اختك هي وعيالها  تيجي تفطر معانا بالمرة 

_قومت وخرجت افتح وانا بضحك اكيد والله يابابا وهتيجي هتصدعنا هي وعيالها 

فتحت باب الشقه لقيت هاجر واحمد 

_احمد ب استغراب مالك يا فاطمه بتكلمي مين وبتضحكي كدا ليه في حد معاكي

_ياعم ادخل وبعدين اسال 

بدل ماتلاقي ماما وبابا خلصو  علي الفطار تعالو تعالو دا ابوكو بيقول ان هو محضرلنا فكار ملوكي

_هاجر واحمد بصو لبعض ب استغراب ودخلو وانا قفلت الباب ودخلت وراهم 

استغربت من شكلهم وهما ساكتين ولابسين اسود

مالكم فيه اي حد حصله حاجه بناتك كويسين يا هاجر

_هاجر قربت مني واتكلمت والدموع في عينها انتي اللي مالك يافاطمة مالك ياحبيبتي فيكي اي

_اتكلمت ب استغراب انا كويسه يابنتي مفيش حاجه هيكون مالي بس

_احمد بهدوء مسك ايدي براحه احكيلي يافاطمة كنتي بتتكلمي مع مين 

_اتنرفزت منهم واتكلمت بعصبيه مالك يابني في اي انت كمان 

ماقولت كنت بتكلم مع ماما وبابا كانو معايا جوا اي الغريب في كدا 

_هاجر بعياط وعصبيه مش عارفه اي الغريب يافاطمة هقولك انا اي الغريب

الغريب ان ماما وبابا ماتو من خمس سنين وانتي لحد دلوقتي مش قادره تقتنعي ولا تصدقي حتي دا حرام عليكي بقي بجد اللي بتعملي في نفسك ده حرام.......