تعالى فجأه صوت صراخ امراءه شديدة الجمال في بداية الثلاثينات من عمرها تقول بغضب وذهول.. 

=إتجوز.. منصور إتجوز وخلف كمان.. طيب امتى وإزاي ولما هو عاوز يتجوز  مخترنيش انا ليه .. انا بنت عمه الي كنت بموت في التراب الي بيمشي عليه ..

ليه خلاني اتجوز من كلب ولا يسوى واخلف منه من كتر قهرتي على رفضه وصده ليا..

ثم تابعت بغل وكره شديد

= هي تفرق عني ايه... احسن مني في إيه.. انا هموت يا ماما هموت من قهره ليا حتى بعد موته

ليزداد نواحها وهي تقول بغل وغضب

=اه يا ناري لو لسه عايش أو أشوف الكلبه الي اتجوزها في السر كنت نهشت لحمه ولحمها بأسناني وقتلتهم وبردت النار إلي قايده جوايا

ليقاطعها صوت والدتها التي ترتدي فستان أسود محتشم أنيق وتلف طرحه سوداء تغطي بها معظم شعرها  

=إهدي يا قسمت وبلاش جنان خلينا نشوف حل 

قسمت بجنون.. 

= حل ..حل ايه الي بتتكلمي عنه يا ماما دا انا هفضحها في وسط عيلتها وفي وسط  البلد كلها..

لتتابع بجنون.. 

= انا قسمت هانم مندور يسيبني ويتجوز واحده تانيه ومين.. بنت اكبر عدو لينا ويخلف منها كمان وعوزاني اسكت 

لا دا مش هيحصل أبدآ وحتى الموت مش هيرحمه مني ومن الي هعمله فيه وفيها.. 

ضربت نازك هانم عصاها في الارض بقوه و غضب جعل قسمت تلتزم الصمت وهي تتراجع للخلف بتوتر في حين قالت السيده بقسوه.. 

= قسمت إوزني كلامك وإتحكمي في أعصابك و إعرفي ان الي انتي عاوزه تعمليه ده ممكن ينهينا ويخسرنا كل حاجه.. 

لتتابع بقسوه

=أنا بس هسامحك علشان عارفه انك مصدومه وعشان عارفه انك عاقله و تربية إيدي و إنك هتهدي وتسمعي الكلام

لتتابع بصرامه وقسوه 

=مش عاوزه اسمع منك تاني الكلام الفارغ الي انتي بتقوليه

منصور خلاص مات واي حاجه هتعمليها مش هتفيدك بالعكس هتضرك وهتخسرك.. هتخسرك كتير أوي وانتي اكيد فهماني.. فخلينا نشوف هنطلع من الورطه دي إزاي

قسمت باستنكار ..

=ورطة ايه الي نخرج منها انا خلاص خسرت كل حاجه منصور اتجوز من بنت الكيلاني وخلف منها بنت هتورث كل ثروته.. بنت الكيلاني ألد أعدائنا هتورث  فلوسنا وتتربى في قصورنا وانا وبنتي هنتطرد بره ومش هنلاقي ناكل..

لتتابع بغل وعنجهيه

= بنت الكيلانيه مستحيل تكسب مستحيل تورث فلوسنا وبنتها تتسمى بإسم عيلتنا..  مستحيل.. مستحيل اني اسمح ان ده يحصل او أقبل بيه

جلست نازك هانم بهدوء على احد المقاعد وقالت بصرامه وهي تتجاهل غضب ابنتها.. 

= اقعدي يا قسمت واسمعيني كويس.. وقبل اي كلام لازم تفهمي ان على جثتي انها تطول هي او امها قرش واحد من فلوسنا..

لتتابع بقسوه وتكبر ..

=بنت الاصول والحسب والنسب مستحيل تتساوى مع بنت إمها تبقى بنت ألد أعدائنا ..دي غلطه وغلطها منصور ابن اخويا الله يرحمه

ومفيش في ايدي حاجه اعملها غير اني احاول الم الفضيحه دي قبل ما تكبر وتبقى سيرتنا على كل لسان ..

ثم اعتدلت في جلستها وهي تقول بحسم

=وعشان كده عوزاكي تسمعيني وتنفذي الي هقولك عليه بالحرف الواحد..

ثم تابعت بصرامه اكبر وهي تشاهد علامات الرفض على وجه إبنتها

=اقعدي يا قسمت واسمعيني كويس

جلست قسمت بغضب ونفاذ صبر على مقعد امام والدتها  في حين تابعت نازك هانم تسألها باهتمام

=حد غيرك وغيري عرف ان منصور كان متجوز من بنت الكيلاني وخلف منها

قسمت بتبرم

=لا مفيش حد غيري يعرف بالمصيبه دي ..هي حاولت تتصل بيكي علشان خايفه ان حد من أهلها يعرف بجوازها في السر من منصور وبخلفتها منه بس معرفتش توصلك علشان كنتي مشغوله في ترتيبات العزا 

لتتابع بغضب

= فالهانم اتصلت بتليفون الفيلا الي هنا لما يئست انها تقابلك وانا الي رديت عليها بالصدفه

ولما لقيتها منهاره ومش عارفه تجمع كلمتين على بعض وكل كلامها انها عاوزه تقابلك في موضوع مهم وميتأجلش شكيت فيها وقلتلها ان انا نازك عمة منصور

لاقيتها انهارت في العياط وهي بتحكيلي على المصيبه دي وانها كانت عايشه مع خالتها في لندن وهناك اتعرفت على منصور لما كان بيأسس شركتنا هناك وحبوا بعض واتجوزوا وخلفت منه بنت وانه كان واعدها انه هيفاتح والدها في موضوع جوازهم بس موته طبعا دمرلها كل خططها واحلامها

ثم تابعت بغل.. 

= ربنا اراد انه يكشف ستره ويفضحه قدامي..

تجاهلت نازك  غضب إبنتها وغيرتها الغير طبيعيه وهي تضيق عينيها بتساؤل

= وانتي ايه الي مخليكي مصدقه كلامها ما يمكن بتكدب عليكي 

وقفت قسمت فجأه وهي تقول بغضب

=اكيد مش هتكدب وتقول مصيبه زي دي وهي عارفه ان 

لو حد من عيلتها عرف بإلي عملته هيقتلوها هي والبنت الي مخلفاها.. دا غير ان انا لقيت قسيمة جوازها من منصور متشاله في خزنته الخاصه في الشركه

تراجعت نازك هانم للخلف وهي تفكر وتقول بتوتر وقلق.. 

= الموضوع ده لو اتعرف عيلة الكيلاني مش هتكتفي انها يموتوا بنتهم ولا يموتوا المصيبه الي مخلفاها 

لا دول هينتقموا وهيحرقوا الكل بإنتقامهم ومش بعيد انتقامهم يطولني ويطولك انتي وبنتك وجوزك..

ثم تابعت بقلق اكبر 

= دول اكبر عيله في البلد ونابهم ازرق ومبيسبوش حقهم خصوصآ بعد المشاكل والعداوه الي مابينا ..هيفتكروا اننا الي خططنا اننا نوقع بنتهم عشان نفضحهم ونسوء سمعتهم .. يعني لو الموضوع اتعرف احنا كمان هنتضر ويمكن ينهونا خالص

قسمت بغضب وقد اعمت الغيره عينيها

=يعني عوزاني اسكت وكأن مفيش حاجه حصلت

ضربت نازك هانم عصاها في الارض بغضب..

= انتي مش بس هتسكتي لاااا.. انتي كمان هتساعديني ندفن الفضيحه دي قبل ماتتسبب في دفننا كلنا.. 

قسمت بتوتر.. 

=يعني عوزاني اعمل ايه ..

اغلقت نازك هانم عينيها بتفكيرثم إبتسمت وهي تقول بهدوء.. 

=اسمعي ..اتصلي بيها وحددي ميعاد معاها في مكان يكون امان والبنت تكون معاها علشان نستلمها..

انتفضت قسمت واقفه بغضب 

=انتي بتقولي ايه يا ماما بنت ايه الي نستلمها.. اظن هتقوليلي كمان ربيها مع بنتك.. 

وقفت نازك وهي تواجهها بغضب وجبروت ارتسمت ملامحه على وجهها.. 

=الي بقوله يتنفذ وبالحرف الواحد ومتقلقيش لا هتربيها مع بنتك ولا حتى هتورث من ابن اخويا مليم واحد..

ثم تابعت بقسوه

=احنا هنقابلها و نشرط عليها اننا قصاد ما هنداري على المصيبه دي.. انها تقطع علاقتها بالبنت خالص واحنا هنربيها بمعرفتنا ..

قسمت بغضب وتوجس.. 

=طيب والبنت هنعمل فيها إيه.. 

ضربت نازك عصاها في الارض وهي تقول بقسوه.. 

=هانديها لأي حد من الي شغالين عندنا نرميله قرشين ويربيها على اساس انها يتيمه وبنعطف عليها.. 

قسمت بغضب

=بس الي فهمته منها انها سجلتها فعلا باسم منصور وشهادة ميلادها اتوثقت في السفاره..

ضيقت نازك عينيها وهي تقول بقسوه شديده.. 

=جرى ايه يا قسمت شهادة ميلاد ايه الي بتتكلمي عنها دي شهاده متوثقه في لندن و مستحيل انها تظهرها قدام اي حد والا هيكون فيها موتها..

ثم تابعت بقسوه.. 

=نفذي انتي بس الي بقولك عليه وحددي معاها ميعاد بسرعه.. 

وقفت قسمت وهي تقول بغضب.. 

=حاضر يا ماما ..لما اشوف اخرتها ايه.. 

ابتسمت نازك هانم بثقه..

=اخرتها هيحصل كل الي احنا عاوزينه.. و الورث كله هيبقى لينا وبكره تشوفي.. 

عوده للوقت الحالي.. 

إستفاقت قسمت من زكرياتها على صوت حامد الغاضب

=بس طالما وصلت لكده يبقى ياروح مابعدك روح.. 

قسمت بتعب.. 

=يعني هتعمل ايه.. 

حامد بغضب.. 

=لا دا انا هعمل كتير.. وكتير اوي كمان .. البت دي لازم تموت بإدينا او بإدين رفعت او حتى بإدين بيجاد.. مش مهم المهم انها تموت.. 

قسمت بتوتر.. 

=وبيجاد.. 

حامد بغضب

لو وصلت اني اقتله واقتلها هعملها المهم اني مخصرش كل الي تعبت عشانه طول عمري

قسمت بتهكم غاضب.. 

=انت الي هتقدر على بيجاد الكيلاني.. 

نظر لها حامد وهو يجيب بغضب

انا عارف اني مقدرش عليه ..

= بس عندي الي لو حطيت ايدي في ايده نقدر ننهيه خالص.. بس ده هيبقى اخر حل قدامي

صمتت قسمت وهي تشعر لاول مره بالخوف يتملكها

بعد مرور يومين.. 

توقفت سيارة الاجره التي تقل 

بيجاد وشمس امام منزل قديم يقع في احدى الحارات الشعبيه القديمه .. 

فترجل بيجاد من السياره وهو يحمل شمس التي ابتسمت بسعاده وهي تتأمل المكان من حولها بحماس..

ثم قالت بحماس وترقب.. 

=هي شقتنا هنا.. 

تأملها بيجاد بصمت وهو يصعد بها الى الاعلى حتى وصل الى سطح المنزل الذي يقع به شقه صغيره وسطح كبير خالي وغير نظيف.. 

ثم فتح باب الشقه وانتظر قليلا وهو ينتظر ردة فعلها وهو يشاهدها تنظر للمكان بدقه 

وهي صامته..

ثم دخل الى الشقه الصغيره والمفروشه بفرش قديم شبه متهالك وهو مازال يحملها ويدخل بها من غرفه الى اخرى حتى انتهى.. 

ثم قال وهو يراقب ردود افعالها بدقه ..

=ايه رأيك في الشقه يا حبيبتي.. 

صرخت شمس فجأه وهي تحتضنه بحماس ..

=حلوه اوي.. روعه.. روعه.. تجنن.. 

بيجاد بصدمه.. 

=ايه.. 

فقالت وهي تتأمل المكان بفرحه.. 

=حلوه اوي يا بيجاد تجنن استنى بس لما رجليا تخف 

وانا هخليهالك جنه.. 

ابتسم بيجاد بتوتر وكل ما يحضره من حديث معها تبخر في الهواء خصوصا وهو كان متأكد من اعتراضها على المكان لتصدمه بحماسها وفرحتها الشديده

دخل بها بيجاد الى غرفة النوم 

ووضعها على الفراش.. 

وهي تقول بسعاده.. 

=مالك يا حبيبي ساكت ليه.. 

بيجاد بإرتباك.. 

=لا مفيش.. بس.. هي الشقه حقيقي عجباكي..

شمس وهي تبتسم برقه.. 

=حلوه اوي يا حبيبي والسطح الي، قدامنا ده كمان حلو اوي هنضفه وأملاه شجر وورد ونحط فيها كنبه او كرسيين ونسهر فيها هتبقى قعده حلوه اوي

تأملها بيجاد بصمت ثم جزبها فجأه من زراعيها ليحتضنها وهو يمرر يده في شعرها ويقول بحيره.. 

=انتي عاوزه مني ايه شمس انتي ناويه تجننيني..

نظرت شمس اليه بحيره ولكنه لم يمهلها وهو يقبلها بشوق جارف وحيره مابين ما فعلته به في السابق.. وتصرافاتها الحاليه التي تناقض كل ما فعلت به و.. يتبع.