- بس انا هصلح غلطتي وهخليه يطلقك.

- يطلقني!

- ايوة ي نور ومتخافيش انا معاكي وهصرف عليكي انتي وابنك وهشيلكم ف عنيا وكده هبقى مطمن عليكم .

- بس الناس هتقول عليا اي وهيسموا ابني ابن المطلقه !

- ي نور كفايه خوف من المجتمع بقا ، المجتمع ده مش هيشيلك وقت تعبك سيبي الا يتكلم يتكلم ، اهم حاجه راحتك وتخلصي من الجحيم الا كنتي عايشه فيه.

بعد تفكير - إلا تشوفه مناسب اعمله ي علاء .

- حاضر ي حبيبتي. 

- السلام عليكم. 

بيمسح دموعه وبيقف - اتفضلي ي دكتوره .

- وقت الدوا .

- هاتي مُعاذ ي نور انا هشيله .

- ماشي بس حاسب لأحسن يصحى نيمته بالعافيه.

علاء أخد مُعاذ وشاله طلع قعد بيه بره .

بتحط ايدها ع كتفه - ي استاذ .

- هاا ايوة نور فيها حاجه ؟

- لا متتخضش نور بخير بس يظهر انك نمت ع نفسك وانت شايل مُعاذ .

بص لمُعاذ - انا هروح بيه البيت النهارده وهاجي بكره أطمن ع نور هي معاها كام يوم عقبال ما تروح؟

- للأسف مش هتقدر تطلع من هنا عُقبال ماتلاقي متبرع .

- العمليه دي تكلفتها كام ي دكتوره ؟

- كبيره ده لو المتبرع طلب فلوس .

- هتتحل بإذن الله عن إذنك. 

مُعاذ - انا عاوز ماما ي خالوو .

- ماما نايمه ي حبيبي مش هينفع نصحيها .

بدأ يبكي - لا انا عاوز ماما عاوز ماما .

- عندي ليك اقتراح.

- اي هو ؟

- انا عامله بيات النهارده ، ممكن تخلي مُعاذ معايا وهو منين ما يحتاج مامته هطلعه يشوفها ولما يشوفها هاخده مكتبي يبات معايا .

- الحقيقه كده كتير ومش هقدر اردهولك ي دكتوره ، وخايف اتقل عليكي .

- مش تقيل ولا حاجه ثم انا بردلك واجب زمان.

- واجب زمان اي هو احنا نعرف بعض ؟

- ايوة يا علاء انا ابقى عديله كنت زميلتك ف ابتدائي الصراحة انا مكنتش أعرفك لحد ما قريت اسم نور كامل ف الريسيبشن فتأكدت إنك نفسك علاء .

FLASHBACK

- الغبيه اهه الغبيه اهه .

بتعيط - انا مش غبيه ابعدوا عني .

واحد من الولاد لسه هيمد ايده عليها ولكن - عاوز منها اي محمد ؟

- ابعد انت ي علاء احنا بنأدب البنت الغبيه دي  ..

- مين قال انها غبيه ؟

- الميس النهارده ف الفصل عشان هي معرفتش تجاوب ع السؤال .

- وانت مالك هي غبيه ولا مش غبيه ؟ الا هيقرب منها هروقه فاهمين؟؟

رجعوا  بخوف - إحنا كنا بنهزر معاها بس .

- لا ي خفيف ماتهزرش معاها تاني ولا هي ولا اي بنت ف مدرستنا عشان مقلش أدبي عليكوا .

- أمرك ياسطى علاء .

- انتي كويسه ؟

هزت رأسها بمعنى أها .

- انتي ازاي تعيطي كده قدامهم ومتدافعيش عن نفسك ؟

ببراءه - اومال اعمل اي؟

- تعملي اي !! انتي منين ي حلوة ؟

- انا من اسكندريه بس نقلنا هنا قريب .

- مهو القمر ده أكيد ميبقاش من الشرابيه ، طيب بصي ي حلوة الولاد الا هنا صيع و..

ببراءه - يعني اي صيع ؟

- أحيييه .

BACK .

- ها افتكرت؟

- وازاي هنسى البت الحلوة كنتي ورور اوي .

بضيق - انا مكنتش ورور انا كنت صغيره وانت كنت اكبر مني بسنتين وقتها فعادي تبقى عارف أكتر مني .

ضحك - خلاص متضايقيش بس بجد ي عديله كنتي بتموتيني ضحك ع برائتك .

قعدت جنبه وابتسمت - وقتها علمتني حاجات كتير واولها إني مخافش ، عارف؟

بصلها بتركيز - اي؟

- انا هنا بسببك؟

- بسببي!

- متستغربش بس انا مكنش عندي القوه الا تخليني أحدد هدف وأسعى وراه ، بس انت كنت بتشجعني وتقولي لازم تبقي قوية لأن البشر الا احنا عايشين وسطيهم هينهشوا ف لحمك لو كنتي ضعيفه ، لما اتغلبت ع خوفي من البشر وكلامهم بقا عندي الشجاعه أحلم وأحقق حلمي ( وقفت امامه ) وها أنا دكتوره آدي تقف أمامك .

- يعني مش دكتوره عديله ؟

- تؤ تؤ آدي.

ابتسم - مبسوط اني شوفتك بعد السنين دي كلها.

- وانا ، احكيلي انت وصلت لفين كده ف حياتك؟

أخد تنهيده - انا مكملتش تعليم بعد اعدادي اشتغلت ف ورشة أبويا عشان أصرف ع نور اختي وتعليمها واهو قدامك زي مانتي شايفه الأسطى علاء .

- ربنا معاك .

- تسلمي.

غريبه أقابلها بعد كل الوقت ده ، وانا ف ابتدائي كنت معجب بعديلة بس مقولتلهاش لأنها بنت ناس وانا مجرد أسطى فاتح ورشه ، اتمنى الأيام الجايه مشاعري دي مترجعش تحن ليها لأننا شكلنا هنتقابل كتير ، بالمناسبه حسن جه ورمى اليمين ع نور وخليت المأذون مشى ف إجراءات الطلاق .

في الصباح: 

- آدي !

- بودي !

بيحضنها بخضه - انتي كويسه؟

كنت داخل المستشفى وجايب حاجات لنور ومعاذ من البيت وجايب شوكالاتات لعديلة هي كانت بتحبهم لما كنا صغيرين بس اتفاجأت بيها ف حضن واحد ، مهو انا غبي إني كنت فاكر إنها متجوزتش أو فيه حد ف حياتها ، وهو انا هضايق نفسي ليه أنا جاي لأختي !

بيبوس راسها - عامله اي دلوقتي ي حبيبي؟

- بخير طول مانت بخير ي حبيبي.

- امسكي ده أكل عديت ع مطعم جبتهولكم ، ودي غيارات لمُعاذ وشويه حاجات تتسلوا بيهم .

بتمسك ايده - علاء ، انت مضايق؟

- لا ي نور هضايق من اي بس!

- متخبيش عليا والله انت مضايق اهو حتى بص ع ملامحك !

بيحضنها وبيبكي - انا زعلان من نفسي ومن الدنيا كُلها  .

بتطبطب ع كتفه - بس ي حبيبي هون ع قلبك ، كل حاجه هتتحل .

- بتقفل من كل ناحيه ي نور .

- هو مش ربنا قال " وإن بعد العسر يُسر" ؟

هز رأسه بالموافقه .

ابتسمت - خلاص روق كده ومتشغلش بالك وهتلاقيها اتعدلت ، ماشي؟ 

- صباح الخير. 

- طب هطلع انا ي نور شويه بره هعمل تليفون أطمن عالورشه .

- ماشي ي حبيبي.

مش قادر أبص ف وشها وانا هبص ف وشها ليه أساسا وهي من نصيب حد تاني .

- عامل اي؟

- تمام. 

- شكلك مضايق؟

بعصبيه - هو انا كل ما حد يشوفني يقولي شكلك مضايق اي ف أي!!

بصيت حواليا لقيت كل الممرضين والدكاتره بصوا ناحيتنا لأن صوتي كان عالي وهي سابتني ومشيت .

بيخبط عالباب .

- ادخل.

- ازيك ي دكتوره. 

- اتفضل ي استاذ علاء.

- انا كنت جاي أعتذر منك .

- مفيش مشكله وانا أسفه لو كنت سألت سؤال مش من حقي بس مش هيتكرر .

- بتتكلمي ليه كده؟

- ده ملف أختك نور وفيه دكتور جديد هيمسك حالتها هو أشطر مني و...

- بس انتي الا كنتي ماسكه حالة نور اي غيّر رأيك؟

نظرت له بقوه ثم أردفت برسميه - ده شغل ي أستاذ علاء وانا زي ما بتجيلي تعليمات بنفذها والحاله هيمسكها دكتور جديد.

مسك الملف منها - شكرا لتعبك ي دكتوره .

ببرود - الشكر لله .

انا عارف إني غلطت لما اتعصبت عليها بس هي تدخل ليه اختي بينا وتقرر تسيب حالتها وهي عارفه ان حالتها حرجه ، يظهر إني غلطت لما وثقت فيها هي كمان .

- فين الدكتور الا هيمسك حالة نور مصطفى؟

- ثواني ، دكتور عبدالرحمن بعد اذنك؟

- ثواني وجاي.

ده نفسه الا كان مقرب من عديله و .. وحاضنها .

- السلآم عليكم. 

- وعليكم السلام ، ده ي دكتور أخو المريضه نور.

- تمام اهلا وسهلا بيك ، انا كنت لسه كنت جاي أشوف الحاله .

- مانا كنت جايلك عشان كده .

- تمام انا دكتوره آدي قالتلي ع آخر تشخيص ليها بس محتاج أشوف ملفها هيكون أفضل .

- تمام أتفضل.

لما سمعته بيقول دكتوره آدي كان هاين عليا أشوهله وشه وامسح بيه بلاط المستشفى ، وانا مضايق ليه ده الا هيجنني!!

- تمام ي مدام كل حاجه هتبقى كويسه بإذن الله ، معلش ي استاذ علاء ممكن لحظه؟

- ماشي ي دكتور.

في الخارج : 

- مكنتش حابب أقولك كده بس أختك حالتها متأخره جدا ولازم عمليه .

- والعمليه دي نعملهالها امتى؟

- مش أكتر من اسبوع لازم نلاقي متبرع غير كده ....

- طيب انا ممكن أتبرع لأختي بكليتي.

- متأكد؟

- ايوة ي دكتور بس اختي تكون بخير .

- تمام هبعت الدكتوره آدي تاخد عينة من دمك ونشوف فيه تطابق ولا لأ.

- ماشي ي دكتور. 

ماسكه دراعه وهو سارح ف الفراغ ليقطع هو الصمت : ليه؟

- ليه أي؟

- عشان أتعصبت عليكي شوية من الضغط الا انا فيه تسيبي اختي ف وقت زي ده و... وتسيبيني!

- انا لسه متابعه حالة نور بس من بعيد ولسه بدورلها ع متبرع وخايفه عليها زيي زيك .

- يبقى عشان تبعدي عني؟

بتوتر - انا كده خلصت !

مسك ايدها - عديلة!

لفت ليه  - ....

- انا مش هعترض طريقك تاني وزي مانتي حابه أعملي بس بالله عليكي تخلي بالك من أختى وابنها لو حصلّي حاجه انا معرفش غيرك وكل الا حواليا انا واختي بعدوا عننا .

- انت بتقول كده ليه؟

- مش مهم ليه بس ...

قاطعته - اسكت بقا من الصبح عمال تتكلم كلام فارغ ، انت ليه انهزامي كده ؟ هاا من امتى علاء الا اي حد يشوفه يستمد القوه منه ؟ قولتهالك ياخي وهقولهالك تاني انا هنا بسببك لأنك دعمتني زمان ، تفتكر لما الاقيك محتاج دعم أسيبك!

نزل راسه لتحت .

بترفع راسه وتمسح الدموع الا ع وشه - للدرجه انت شايل ف قلبك ! طب ليه محاولتش تفضفض؟

 - مكنش ينفع أبان ضعيف لأن زي مانتي قولتي الا حواليا بيستمدوا مني القوه .

- أنت من حقك تضعف وتعيط ي علاء الحزن المكبوت بيخليك هش من جوا لازم تخرجه .

- محدش هيسمعني ولا هيفهمني يبقى بلاها تعب من الأول. 

- هروح أسلم العينه دي للمعمل تكون جهزت عشان نخرج .

- نخرج!!

- اها أصل انا آدي هانم اتواضعت وقررت أسمعك .

ضحك - يسلااام .

- ي عبسلامم.

ضحك - فين البت الورور انا مني لله ع نصايحي !

بالفعل هي رجعت وانا روحت اتطمنت ع نور ومُعاذ وخرجنا اتمشينا شويه عالكورنيش .

- بتحبيه؟

- حمص الشام؟

- اها .

- الصراحه بحبه أوي .

ابتسم - خليكي هنا ثواني .

- رايح فين ؟

- مش هتأخر .

لقيته راح عند البياع واشترالنا اتنين ، حقيقي الأيام والشهور والسنين عدت بس هو لسه نفسه علاء الراجل الا بيشيل وبيساعد الكل ، يمكن هو مكملش تعليمه بس عنده حب وطيبه يغرقوا العالم ده كله .

- امسكي ي ستي .

- تسلم .

- عايشه مع مين هنا ؟

- مع أخويا .

- والله !

- أها ، المهم إحنا جايين نتكلم عنك النهارده .

- هتسمعي؟

ابتسمت - هسمعك !

- ولو مفهمتنيش ؟

- نحاول مره كمان .

ابتسم - هحكيلك .

لأول مره ف حياتي أحكي لحد حاجه تخصني كده حتى نور أختي مكنتش بحب أشيلها هم ع همها وكنت بكتم جوايا ، بس عديله سمعتني وكنت فاكر إنها مش هتفهمني ولا هتفهم مشاكلي خصوصا بسبب اختلاف الطبقات الا عيشنا فيها بس هي .. هي فهمتني !

- هاا نتايج التحاليل اي؟

- ....

- عديلة!

- اي!

- النتيجه؟

بخفوت - متطابقه !

بفرحه بيسجد عالارض - الحمدلله يارب الحمدلله. 

لما لقيت النتايج متطابقه ع قد ما هي حاجه كويسة بالنسبه لنور بس انا خوفت عليه  ، خوفت جسمه يتأثر بعد العمليه أو يتعب.

- كده بإذن الله العمليه هتبقى بكره لأن مفيش داعي نتأخر أكتر من كده .

- تمام ي دكتور .

- عديلة كنت حابب أتكلم معاكي شويه !

- ثواني هخلص الحاله الا ف ايدي وجاية. 

- مستنيكي بره !

- مبروك عليكي ي بنتي زين ما اختارتي لأنه باين عليه راجل يستاهلك وهيشيل المسئوليه .

- بس ي عمو ده مش ...

- حافظوا ع بعض ي بنتي من غدر الدنيا لأنها بتفرق الحبايب عن بعض بالمشاكل الا بتتزرع بينهم وسوء الظن .

- ي عمو ...

- لما تلاقي الا يحبك اتمسكي بيه وحافظي عليه وحطي ف بالك إننا ممكن نلاقي الحب المناسب مره واحده ف العمر ويا نكسبه ف صفنا ي نخسره.

- فهمت ي عمو تسلم.

في الجنينه :

- ها ي علاء!

- شكرا .

- على ؟

- ع وقفتك معايا الأيام الا فاتت ومع نور. 

- انا معملتش حاجه. 

- لا عملتي وبالنسبالي ده شئ كافي وهفضل طول عمري فاكرهولك وف أي وقت تحتاجيني هتلاقيني .

- نور عندها كام سنه ؟

- 27 ، بتسألي ليه؟

- لا دي حاجات لزوم الورق الا بنمليه للأستماره .

بعدم اقتناع - طيب انا هدخل اطمن ع مُعاذ ونور .

- تمام .

جه ميعاد العمليه والعمليه نجحت ونور بقت كويسه بس علاء الا لسه تعبان خصوصا إن جزء من جسمه مبقاش موجود عارفه أن التعب ده ف الأول وبعد كده جسمه 

هيتعود والكليه التانيه هتكبر عشان تقوم بعمل الكليتين ده طبعا مع وجود أكل معين مينفعش يتاكل بس الدنيا هتبقى تمام ، طب أنا بعيط ليه دلوقتي ؟

- ايوة مين؟

- خليك ي خالو هفتح أنا .

- ماشي ي حبيبي .

- آدي؟

بتحضنه - قلب آدي انت عامل اي ي حبيبي؟

- انا كويس .

- فين مامي وخالو؟

- جوا تعالوا اتفضلوا .

- مين ي مُعاذ ؟ دكتوره عديله ودكتور عبد الرحمن!

فرحت لأني شوفتها خصوصا لأن مشوفتهاش من وقت العمليه بس الحيوان الا جاي معاها ده جاي بتاع اي! اهدى ي علاء هو ضيف مينفعش أتعصب ..

- تعالوا اتفضلوا واقفين ليه ع الباب؟

- لا هنقعد اهو اتفضل بس دي حاجه بسيطه .

- تعبتوا نفسكوا ليه بس!

- ولا تعب ولا حاجه ، اومال فين مامي ي مُعاذ ؟

- جوا ، روح دخل دكتوره عديله لمامتك ي مُعاذ .

- حاضر ي خالو. 

دخلت سلمت ع نور وقعدت معاها شويه بعد كده ساعدتها تقوم وطلعتها بره تقعد معانا .

- طب هنسيبكم إحنا ي جماعه ، الوقت اتأخر هنبقى نجيلكم مره تانيه .

- ما لسه بدري ، ما تقولي حاجه ي آدي .

- معلش ي نور هنبقى نجيلكم مره تاني بإذن الله. 

- خلاص هنستناكم .

- اتفقنا .

- ثواني هنزل أوصلكم .

- لا خليك ي راجل متتعبش نفسك .

- انتوا جيتوا منطقتي ومينفعش مأقومش معاكم بالواجب. 

- كُلك ذوق يا علاء .

ابتسم - حبيبي ي عُبد والله .

بعد مرور 5 شهور .

- نور ! 

- تعالى ي علاء انا ف المطبخ.

- بتعمليلنا اي؟

- المحشي الا بتحبه !

- الله اكبر وانا أقول الريحه الحلوة دي جايه منين. 

- حبيبي تسلم .

- بقولك !

- امسك صُباع ورق العنب ده ، قول سامعاك!

بياكل - فيه عريس متقدملك .

بتسيب الا ف ايدها - عريس ! لا ي علاء انا خلاص هي مره ومش هعيدها تاني ، عاوزني اتجوز واحد يظلم ابني ولا يطلعه مريض نفسي من معاملته السيئه ، لا انا هربي ابني .

- اسمعيني بس هو حد نعرفه !

- مين؟

- دكتور عبد الرحمن .

- نعم !

- هحكيلك هو أصلا أتقدملك من وقت ما جه هنا هو وعديله .

FLASHBACK

- منورنا والله ي دكتور .

- ده نورك ي علاء بس بلاها دكتور دي احنا دلوقتي أهل. 

- أهل ازاي مش فاهم ممكن توضح؟

- هفهمك بص ي علاء انا راجل دُغري ومش بتاع لا لف ولا دوران ، وانا طالب ايد اختك نور.

- نعم ! نور اختي! 

- ايوه فيه مشكله ؟

- انا اختي لسه متطلقه وعدتها لسه مخلصتش وكمان عندها ابن انت واعي للي بتقوله ؟ ثم وعديلة هتسيبها ؟

- انا عارف كل الكلام ده ومالها عديلة ! عديلة تبقى اختي وأكيد مش هسيبها .

- اختك! قول والله !

ضحك - والله .

بفرحه- بالحضن ي غالي مش تقول كده من بدري .

- طب هاا قولت اي انا مستعد استناها تخلص عدتها.

- طب واي يجبر دكتور زيك لسه ف ريعان شبابه يتجوز واحده مطلقه ؟ يعني وكمان عندها ابن يعني مسئوليه. 

- انا كمان مطلق واتجوزت قبل كده ومحصلش نصيب بسبب اني مكنتش بخلف وانا دلوقتي عندي 29 سنه .

- فجاي تتجوز اختي واهو بالمره ابنها يبقى ابنك؟

- متفهمنيش كده ، الحقيقه ان أختك مش هقول حب من أول نظره لأن انت عارف احنا مش مراهقين بس انا لقيت عند اختك الا مش عند الا زيها ، يعني اخلاقها وحبها لابنها وخوفها عليك لما طلعت من العمليه عاوزه تتطمن عليك ، دي كلها أسباب تخليني أختارها من بين 100 واحده .

ابتسم - والله كلامك ده ع راسي بس مش هقدر أفتح معاها كلام الا بعد عدتها ما تخلص وأخد رايها بعد كده ورأي ابنها .

- وانا موافق .

BACK

- بس ي ستي و النهارده هو جالي وطلب ايدك تاني!

- القرار مش قراري ي علاء القرار قرار مُعاذ انا لو اتجوزت هيبقى عشانه وعشان ميتحرمش من حنان الأب حتى لو من جوز امه بس يكون هو مرتاحله .

- يعني اي؟

••يتابع••