عمرو : عايزني اعمل ايه لما اسمع انها حامل ومستحيل يكون مني ... أخدها بالحضن مثلا 

حامد : بس تصرفك كان غلط ... يعني ايه تاخدها تخلي الدكتوره تكشف عليها

عمرو : ده الطبيعي لما اعرف انها حامل وبعدين عجبك اللي عملته ... أنا عايز أخرج من هنا

حامد : هيا مش راضيه تيجي 

عمرو : قسيمة الجواز معاك 

حامد : اه بس لازم هيا اللي تيجي بنفسها 

عمرو : أنا هخرج بيها أو من غيرها 

حامد : هما مش هيسبوك تمشي غير لما هيا تقول انك جوزها 

الباب خبط وهيا دخلت 

عمرو : شرفت اهي 

عائشه : أنا مش جايه عشانك ... أنا جايه عشان ماما وطنط كوثر قعدوا يزنوا عليا بس اطلعك 

عمرو : لاء تكرمتي اوي 

حامد : كويس انك جيتي ي عائشه ... الظابط جاي كمان شويه والناس اللي كانوا موجودين الصبح بره هيتعرفوا عليكي 

عائشه : هما شافوني اساسا 

دخل الظابط والأمن أكدوا أنها نفس البنت وجايين يمشوا الظابط وقفهم

حامد : في حاجه تانيه ي حضرة الظابط

الظابط : المدام مقبوض عليها 

عائشه : نعممم ... ليه ؟ 

الظابط : بلاغ كاذب 

عمرو : هه كما تدين 

عائشه : بس انا مكذبتش هو فعلا واخدني غصب عني 

الظابط : بس ده جوزك ومفيش واحد بيخطف مراته 

عمرو : قولّها 

حامد : طب والعمل هيا مكانتش تقصد بلاغ كاذب دي 

الظابط : أنا هقفل المحضر بس ياريت متتكررش عشان مش هقدر افيدكوا بحاجه تانيه 

حامد : كتر خيرك يا حضرة الظابط 

مشيوا ووصلوا البيت وعائشه اول م وصلت طلعت اوضتها القديمه من غير م تكلم حد 

صباح : مالها دي في ايه 

عمرو : فكك منها ... أنا جعان 

صباح : تعالي كل ي حبيبي محضرالك الاكل بتاعك 

ساره : بس في ضيفه مستنياك 

عمرو : مين ؟ 

ساره : بسنت ... لما رنت عليك ومردتش رنت ع البيت 

بصت لناريمان وقالت : والست ناريمان قالتلها انك محبوس 

عمرو : هيا فين ؟ 

ساره : في اوضة الضيوف 

دخلها وهيا اول م شافته جريت عليه حضنته 

عمرو : انتي ايه اللي جابك ؟ 

بسنت : قلقت عليك جدا ولما قالولي انك محبوس مقدرتش امسك نفسي ومجيش 

عمرو : مكانش في داعي 

بسنت : مكنتش هعرف ارتاح ... حمد الله على سلامتك 

عمرو : الله يسلمك 

بسنت : انت عملت ايه عشان يدخلوك السجن ؟

عمرو : حوار تافه متشغليش بالك بيه 

كانت صباح وكوثر وناديه في المطبخ وناريمان وسلمى وساره بره في الصاله 

ناريمان : هيا هتفضل قاعدالنا كده زي العمل الرزي 

سلمى : عايزه ايه تاني 

ناريمان : كنت عايزه اولعها شويه 

سلمى : م تتهدي بقا 

عائشه نزلت وسألت ساره : فين عمو ؟ 

ساره : في مكتبه مع مالك 

دخلت المكتب وقالت : عايزه انهي كل حاجه 

حامد : في حاجه حصلت تاني ولا ايه 

عائشه : لاء بس انا تعبت ... وهو مش حاسس بحد وانا خلاص عملت اللي عليا واظن أنه ممكن ميشوفش بسنت دي تاني 

مالك : بسنت دي اللي معاه دلوقتي 

عائشه : معاه دلوقتي ؟ 

مالك : اه بره 

عائشه : شكله مبيتعظش ... عملنا كل حاجه ممكن تلمحله وهو ولا هنا ... بس انا منسحبه 

حامد : مينفعش في نص الطريق نقول منسحبين ... انتي وافقتي من الأول وخلاص 

مالك : هو في ايه ؟ 

حامد : متشغلش بالك انت ... وانتي اعقلي 

عائشه : طب أنا فشلت ... ومن ساعة م اتجوزته وانا متمرمطه ... واخر مره من شويه 

حامد : كنتي مفكره ايه ... هتعيشوا في تبات ونبات 

عائشه : لاء بس مكنتش متخيله كده برضو 

حامد : اسبوع يعدي ونشوف الحوار ده وانا هتكلم معاه ... خليه ييجي

عائشه : تمام لما نشوف اخرتها 

عند عمرو 

بسنت : هيا سنه زي م كنا متفقين ... علشان بابا ... انت عارف أنه لوحده ومش هقدر اسيبه

مردش عليها وقام وقف عند الشباك 

قامت وراه وحضنته من ضهره وقالت : انت عارف انا بحبك قد ايه وعارف اني مقدرش ازعلك صح ؟ 

دخلت عائشه وشافتهم ... لف لقاها واقفه 

عائشه : ا....كلم عمو عايزك 

قالت كلامها ومشيت 

عمرو : عاجبك كده 

سابها وخرج 

عمرو : فين عائشه يا ساره ؟

ساره : في اوضتها 

طلع عمرو وفتح اوضتهم بس ملاقهاش ... دور عليها في الحمام بس مكانتش موجوده ... لقا نور اوضتها القديمه شغال فراح وخبط ودخل ... كانت واقفه في البلكونه ومسمعتش الباب ... دخل وقف جنبها 

عمرو : هو انتي بتعيطي!؟ 

بصتله ومسحت عينيها وقالت : لاء واعيط ليه ... كنت سرحانه بس 

عمرو : سيبتي اوضتك ليه ؟

عائشه : عشان زهقت من المشاكل ... عايزه هدوء على م الشهر يخلص 

عمرو : ارجعي وانا مش هضايقك

عائشه : أنا مرتاحه هنا 

عمرو : أنا آسف 

عائشه : ليه ؟ 

عمرو : على كل حاجه 

عائشه : ياريت الاسف كان بيصلح كل حاجه ... ياريت 

عمرو : كل مره بنتخانق فيها ببقى عايز نصفي الخلافات دي 

عائشه : كلها اسبوعين وهتنتهي ... لما نتطلق 

عمرو : انتي عايزاني اطلقك ؟

عائشه : هتفرق مثلا ... احنا متجوزين كأننا مش متجوزين ... معتقدش هتفرق 

عمرو : معاكي حق 

عائشه : اصلا انت بتحب واحده تانيه ... فهتكون معايا أنا ليه 

عمرو : وانتي مبتحبيش 

عائشه : بحب ... بحب احلى واحد في الدنيا دي كلها ... بس هو بيحب واحده تانيه 

عمرو : مين ده ؟ 

عائشه : قولتلك احلى واحد في الدنيا 

عمرو : اعرفه ؟ 

عائشه : معرفش ... أنا نفسي ساعات بحس اني معرفهوش 

عمرو : بتتكلمي الغاز كده ليه 

عائشه : مش الغاز لاء ... كلام أنا بس اللي فاهماه ... فكك ... عمو كان عايزك 

عمرو : تمام هنزل اشوفه 

عدى اسبوع 

شادي : أنا سايبك تفكري بقالك اسبوع ... قولتي لباباكي؟ 

بسنت : انت عارف اني موافقه بس بابا معترض على اني اسيبه ... فلسه بحاول اقنعه 

شادي : هتردي عليا امتى ؟

بسنت : اول م بابا يوافق 

شادي : طب سيبيني أكلمه أنا وأقنعه 

بسنت : لاء ... قصدي يعني عشان ميحسش بضغط وكده ... أنا هفهمه واحده واحده 

شادي : مش لابسه الخاتم ليه ؟

بسنت : هلبسه بس مش بلبسه قدام بابا ... علشان ميسألنيش عليه 

شادي : ماشي ي بسنت 

في كلية عائشه 

خلصت محاضرتها وكالعاده قاعده مع اصحابها 

عائشه : المحاضره الجايه لمين ؟

مريم : دكتور ساجد 

عائشه : أنا مش هكمل اليوم ... حاسه اني تعبانه 

ملك : طب استأذني 

عائشه : لازم ؟ 

ملك : عشان يكون عارف وكمان عشان مينقصكيش كتير 

عائشه : طيب ... يلا باي هتوحشوني 

راحت مكتب دكتور ساجد وخبطت ودخلت لما سمعته بيقول اتفضل 

ساجد : في حاجه يا عائشه 

عائشه : كنت بس عايزه استأذن من محاضرة حضرتك م هقدر أحضرها 

ساجد : ليه ؟ 

عائشه : حاسه اني تعبانه شويه وعايزه اروح 

ساجد : الف سلامه بس المحاضره مهمه 

عائشه : هخلي حد من صحابي يبعتها 

ساجد : تمام براحتك 

عائشه : عن اذنك 

ساجد : عائشه 

عائشه : نعم 

ساجد : كنت حابب اتكلم معاكي في موضوع 

عائشه : اتفضل 

ساجد : انتي مخطوبه 

عائشه : لاء بس متجوزه ليه؟

ساجد : متجوزه!!!! 

عائشه : اه 

ساجد : تمام ربنا يوفقك 

عائشه : عن اذنك 

مشيت وروحت البيت لقت حامد مع عمرو وطالبها

حامد : اهي عائشه جت 

عائشه : في ايه ؟ 

عمرو : في اني فهمت كل حاجه 

عائشه : كل حاجه ايه 

حامد : ليه اتجوزتيه 

عمرو : اخدت منك اكبر درس 

حامد : احنا كنا بنعرفك حقيقة اللي عايز تضيع نفسك عشانها 

عمرو : بانكوا تضحكوا عليا ... مثلت تعبك وخلتني اطلب منها تتجوزني وتمثل عليا ... كل شويه خناقات بينا ... دي كمان تمثيل منها 

عائشه : أنا ممثلتش ... أنا عملت اللي عمو طلبوا مني ... لما بعتلها شادي واستجابت معاه ... وقتها عرفت انها بتضحك عليك 

عمرو : هو شادي من ضمن اللعبه كمان ؟ يعني ده فخ منكوا ليها 

حامد : مش فخ ... هيا اللي طماعه 

عمرو : انتوا لا يمكن تكونوا اهلي ... مش عارف ازاي لعبتوها كده ... مش قادر اصدق ان كل ده تمثيل ... كل ده عشان تخلوني ابعد عنها ... وهل أنا دلوقتي مبسوط؟؟؟ أنا أتعس واحد في الدنيا دي ... أنا مش هبعد عنها أنا هتجوزها ... عندًا فيكوا ... انت اكيد مش ابويا ... بتعاملني ليه على اني واحد صغير ... بتتفق عليا ... وانتي ... للدرجادي أنا مش فارق معاكي ... بتمثلي عليا ... وحطالي شروط ... وسترونج اندبندبنت وومن ومطلعاني وحش ... وقولي بتحبك ... كل ده تمثيل ... وياترى بقا اسلام ده كمان تمثيل ... وحوار حملك كمان 

عائشه : كل حاجه صدفه ... ممثلتش عليك حاجه ... فاكر لما قولتلك بحب احلى واحد في الدنيا وهو بيحب واحده تانيه ... مكنتش بمثل ... انت اللي انا حبيته من زمان ... وافقت اتجوزك عشان بحبك ... ومكنتش عايزه اشوف واحده بتضحك عليك واقف ساكته 

عمرو : انتي انانيه ... مش بتفكري الا في نفسك وبس ... مهمكيش إذا كنت هكون مبسوط معاكي ولا لاء ... طول عمرك حاطه مناخيرك في السما وبس ... ودايما بتطلعيني غلطان ... واللي يدوسلك على طرف تدوسي عليه بالجزمه ... انتي وحشه اوي ... ولو فاكره أن في حد هيحبك بالمنظر ده تبقي غلطانه أنا بجد بكرهك ... انتي طالق 

سابهم وخرج وهيا قالت : هو ... هو طلقني

حامد : أنا السبب أنا آسف ... أنا عشمتك 

عائشه : أنا ... أنا فكرت أنه ... ممكن يحبني ... ونكون حلوين مع بعض ... هو أنا عملت ايه ... أنا معملتلهوش حاجه 

حامد : هتتصلح والله بس اهدي 

عائشه : متتضحكش عليا اكتر من كده ... قولي اني بغبائي ضيعته ... قولي أنه محبنيش ... قولي أنه بيكرهني 

خرج وكلم شادي قابله 

عمرو : هتكلم بسنت دلوقتي تقولها انك هتخرج من حياتها 

شادي : ليه ؟ 

عمرو : انا عرفت اللعبه الو'سخه اللي دخلتها مع ابويا 

شادي : أنا عملت اللي اتطلب مني بس 

عمرو : العيب مش عليك ... المهم تخرج من حياة بسنت 

شادي : متأكد 

عمرو : اه ... هتكلمها حالا وتقولها انك مش عايزها في حياتك تاني وانك مسافر ومش راجع 

شادي : تمام براحتك 

رن عليها وخلع بشياكه ... كان الحوار بالنسبالها عادي ومتأثرتش وعمرو طلب يقابلها 

بسنت : في حاجه مهمه ؟ 

عمرو : عملتي ايه مع ابوكي 

بسنت : قولتله ووافق بس مش دلوقتي

عمرو : حلو كتب الكتاب يوم الخميس 

بسنت : الخميس اللي بعد ٣ أيام ده 

عمرو : اه عندك مشكله 

بسنت : مش شايف أنه بسرعه وبابا كمان... وبعدين عائشه

عمرو : طلقتها ... ومش بسرعه لاء ... قولتي ايه ؟

بسنت : معنديش مشكله هحاول تاني مع بابا وإن شاء الله يوافق 

روح البيت عرفهم أنه هيتجوز ومشي ... مرجعش طول ال ٣ أيام ومكانش بيكلم حد خالص 

دخلت ساره لعائشه اوضتها 

ساره : انتي كويسه ؟ 

عائشه : خسرت يا ساره ... خسرت اهم حاجه ... أنا ... أنا تقبلت الأمر الواقع ... أنا بس عايزه اطلب منك طلب 

ساره : اطلبي 

عند عمرو كان سرحان وفاق على جملة " بارك الله لكما وبارك عليكما وجمع بينكما في خير " 

بسنت : مبروك يا حبيبي 

عمرو : كنت عايز اقولك مبروك بس للأسف ... محضرلك مفاجاه 

بسنت : هو في ايه ؟ 

عمرو : انتي طالق 

والد بسنت : ايه يبني اللي انت عملتوا ده ... انتوا لسه مكتوب كتابكو 

عمرو : ابقى اسأل بنتك المحترمه 

بسنت : انت ... انت عملت ايه ؟ 

عمرو : خلي شادي ينفعك 

بسنت : شادي ؟ 

عمرو : فكراني مش عارفه ... مش عارف ازاي مكنتش فاهمك ... كل الناس فاهماكي الا أنا ... بس متقلقيش مش هتخرجي مني بمصلحه 

طلع الوصل من جيبه 

عمرو : اصل ده وصل بمبلغ كبير اوي .... تمن كل حاجه خدتيها مني ... عشان لو فكرتي تلعبي بديلك 

بسنت : انت مين ؟

عمرو : أنا المغفل اللي حبيتك ... بس بعد م فوقت ... أنا مش عايز منك حاجه ... أنا بس خدت العربيه اللي جبتهالك ... والمؤخر والمهر ... يعني هتخرجي منها فاضيه ... ومطلقه 

سابها ومشي وهيا عيطت 

عند عائشه 

عائشه : اخر طلب هطلبه منك والله ... بس عايزه اتكلم معاه 

ساره : مش هييجي 

عائشه : خلي مالك يكلمه وييجي بأي طريقه ... بس عايزه اتكلم معاه 

ساره : طيب هقول لمالك 

دخلت عائشه اوضة عمرو ... استنته فيها لحد م ييجي ... استنته كتير لحد م سمعت خطوات رجله ... شربت كوباية المايه اللي ع الكومودينو ... دخل وشافها قاعده على سريره 

عمرو : انتي بتعملي ايه هنا ؟

عائشه : مستنياك ... كنت عايزه اشوفك عريس ... وانت راضي عن اللي هتتجوزها 

عمرو : البركه فيكوا ... مبقتش احب حد ولا عايز اتجوز حد 

عائشه : أنا ... مش وحشه ي عمرو ... أنا ... أنا بس حبيتك ... سألتني اذا كنت بحبك ولا لاء ... أنا محبتش في حياتي قدك ... انت ... اول واحد انا فتحت عيني عليه ... و ... حبيته من أول مره ... محدش لمس قلبي ... زيك ... حسيت معاك ... بحاجات كتير اوي ... حلوه ... معاك أنت بس ... بحب حنيتك اوي ... وبحب وجودك ... بس مش متقبله فكرة ... انك مش ممكن تحبني ... ربع م بحبك ... قولتلي اني انانيه ... أنا ... مش انانيه 

كانت بتنهج وهيا بتتكلم وكملت : أنا ... كنت عايزه ابقى قويه ... مش ضعيفه يتضحك عليها ... وعمري م كنت مهتميه غير بيك ... وعايزاك ... دايما مبسوط 

كانت بتتكلم وهيا بتقطع في الكلام ووقعت ع الأرض 

عمرو : عائشه ... عائشه مالك في ايه ؟

عائشه : مش حاطه مناخيري ... في ... السما ... بس ... مم..مش عايزه اسمح .. لحد ي... يضايقني ... أنا ... عارفه ... إن محدش هيحبني ... بس ... بس انا بحبهم ... كلهم ... أنا ضعيفه ... اوي ... بس عامله ... اني قويه ... أضعف واحده 

عمرو : اهدي متتكلميش انتي تعبانه 

عائشه : حتى في الجامعه ... كل ... الدكاتره ... بيقولوا عليا دبش ... بس ... مره ... دكتور حاول يتح'رش ... بيا ... عشان كده ... بقيت ناشفه معاهم في الكلام ... محدش ... محدش منكوا يعرف ... عني ... حاجات كتير ... عارف ... أنا

كانت بتنهج جامد ومش قادره تتكلم : أنا ... فرحانه اوي ... دلوقتي 

عمرو : انتي فيكي ايه ؟

عائشه : أن انت اخر ... اخر حد ... هشوفه ... انا عمري ... م اعتذرت لحد ... بس انا أنا اسفه ليك ... سامحني 

عمرو : قصدك ايه ... عائشه في ايه ؟

عائشه : بحبك أوي يا احلى حاجه حصلتلي 

قفلت عينيها بين أحضانه 

عمرو : عائشه ... عائشه فوقي فيه ايه ... عائشه أنا بحبك والله ... والله العظيم بحبك ... أنا رديتك والله في نفس اليوم اللي طلقتك فيه ... أنا  اللي اسف ... فوقي بالله ... عاااااااااااائشه .......💔

تمت ......