= انتي بتعملي اي بالسجارة في ايدك دي !!!!!! 

رديت ببرود: هكون بعمل اي؟ وطي صوتك

- ماتدري عليا يا جميلة ! هو انتي مخك لسع !!!!! 

= بشربها في حاجه ؟ 

- المفروض اني اصدق انك بتشربي سجاير زي بقا عشان تستفزيني صح

= اها بشرب و مخي لسع زيك!

- فكراني عيل؟ طيب هصدق انك بتشربي حاضر.

" فضلت اكح من ريحتها قدامه و جيت اجبها ناحيه بوقي لما استفزني بالكلام ملحقتش احطها على شفايفي اصلا شدها جامد و رماها رد فعله خضني بس فضلت ثابته قدامه "

- انت عبىىىط  كنت هتلسع ! 

بزعيق: باعته كريم يجبهالك و عايزه تشربيها كمان قدامي ايييييه مش هامك 

بخوف: الله يخربيتك وطي صوتك ده !!!!!! 

زعق فوشي اكتر: مش هوطي صوتي يا جميلة ! بطلي هبل متفكريش اني كده هصدق انك ممكن تشربيها

" يخربيت تافهتي وعبطي الى عارفهم و فاهم كل حاجه بعملها مني لله الخطه بتبوظ مني بسبب هيافتي المكشوفه!! "

- طب اي رأيك هعمل بقا! زي زيك و هشربها عادي واقلدك هو انت احسن مني

" كان مصدوم كليا من ردودي عليه و كنت حساه هيفرتك وشي وعايزة اعيط  بعدت عنه شوية بخوف "

جز على سنانه جامد و شد مني العلبة فرتكها قدام عيني ورماها: اقسم بالله انا لو شوفتك مسكاها بس عارفه يعني اي مسكاها بس؟ مش هقولك هعرف طنط و الشغل ده عشان انا وقتها الي همسك دماغك ادغدغها بنفسي انتي سامعه يابت؟ 

= بت كمان ؟  لا بقا يا حبيبي ملكش دعوه بيا و لا نسيت قولتلي اي؟ محدش لي دعوه بالتاني وانا بقا ها 

" مكملتش كلامي فجأه وقعدت اكح جامد حسيت اني نفسي بيروح "

- جميلة ! جميلة ! في ايه؟! جميلة 

" كان لسه هيروح ينادي على ماما مسكته"

=  لاء لاء هبقي كويسة  متقلش لماما 

مكنش عارف يتصرف فضل يبصلي بقلق:  طب اهدي اتنفسي اهدي وخدي نفسك براحه 

" فضلت اكح جامد المره دي كان بجد كنت حاسه اني هموت و روحي بتطلع وعيوني بدمع" 

اياد بخضه: طب اعمل اي جميلة انتي كويسة انا لازم اكلم حد انا هنادي طنط 

فضلت ضاغطه على ايده وماسكه فيها وانا بكح و ثواني وبدأت اهدي رفع وشي ناحيته: انتي عملتي اي ردي عليا  عملتي اي خلاكي مش قادرة تتنفسي كده السجاير صح ؟ جميلة هو انتي شربيتها بجد شربتي منها قبل ما اطلع؟؟ قوليلي

" هزيت راسي بالنفي "

بصلي بنفاذ صبر و عصبيه: امال في اي مالك! 

رديت عليه بصوت رايح:  الدخان بتاعها.. وانا حساسه ناحيه الحاجات دي

زعق: وبتعملي رْفت كده ليه لما انتي تعبانه  منهم انتي متحْلفْة !!!!! كل ده عشان اي قولتلك مش بشربها كتير مش همو& ت نفسي انا متبقيش مجنو_ نه 

بدأت اخد نفسي: وانا بقا لو قولتلك نفس كلامك هتقبل ؟ لو قولتلك مش هشربها كتير بس هشربها يا اياد ؟؟  

مسح على وشه بنرفزه:  استغفرالله العظيم يارب ملكيش دعوه بيا انا بتعملي زي ليه ! هو اي هبل وخلاص

= عشان انا.. مش عاوزاك تعمل كده ومش عارفه اخليك تبطل ازاي!! احنا صحاب و انا بخاف عليك و كمان لأن ده غلط و حرام انت بضر نفسك مستهون بصحتك!! انت متعرفش الصحه دي غالية ازاي !!! وفي ناس قد اي بتمو**ت و تتعذب و بتتمني بس لو تقدر تاخد نفسها بسلام بس تتنفس كويس!!

- طب يا جميلة انا هبطلها خلاص و انتي تبطلي تحْلف ! فاهمه ؟ متعمليش زي فأي حاجه كده وخلاص انتي الى لو امك عرفت بجد هتد**بحك علي الى حصلك ده انتي كنتي هتموتي وانتي بتكحي! 

= انت بتضحك عليا وبتهاودني و هتشربها

- انا بقول اي وهي بتقول اي! يابنتي ارحميني و بعدين قولتلك خلاص! مش هتزفت تاني مش بهاودك

غمض عينه و اتنهد بتعب: مش هتعمليها تاني دي اول واخر مره فاهمه يا جميلة؟ 

- مش هنعملها متنساش نون الجماعه يا اياد

بصلي بسكوت و برم شفايفه وهو كاتم غضبه وابتسم: تمام يا جميلة ماشي مش هنعملها محدش فينا هيعملها حلو كده ؟ 

= اها حلو انا عايزه انزل عشان ماما وسع

" اتحركت وهو فضل مقرب ومستعد يسندني وفاكرني هقع كتمت ضحكتي بسبب شكله و هو خايف عليا وقلقان عمري ما شوفته كده " 

- انتي بقيتي كويسة ولا اجي اسندك لحد تحت لحسن تخشي ف كومه كحه

رفعت حواجبي وبصتله: اسند نفسك ياولا!

" ضحك بغلب على طريقتها و فضل واقف شوية واطمن انها نزلت خلاص "

بص للسما واتكلم بندم:  اها يارب مكنتش متخيل اني ممكز اشيل ذنب حد غيري معايا هو انا قادر اشيل ذنوبي لوحدي يارب اهديني ...اهديني انا و يوسف ليك هو بيغلط و بيفطر ساعات بسبب السجاير لكن هو مش وحش! ولا انا.! 

" بسم الله الرحمن الرحيم "

( وَاللَّهُ يُرِيدُ أَن يَتُوبَ عَلَيْكُمْ وَيُرِيدُ الَّذِينَ يَتَّبِعُونَ الشَّهَوَاتِ أَن تَمِيلُوا مَيْلًا عَظِيمًا )

صدق الله العظيم  سورة: النساء

***********************************

بقلمي / Salspil A Mahmoud 

" نزلت بسرعه قبل ما ماما تلاحظ حاجه و كنت تعبانه جدا وكمان لأني مختش العلاج الصبح "

" فضلت افكر ف موضوع اياد وقد اي مش مقدر صحته! لكن هو لو يعرف بعاني ازاي عمره ما هيعمل كده !!"

(  اللهم صلي وسلم وبارك على سيدنا محمد )

|| 5 رمضان | 2021 || 

-  قومي يا جميلة... قومي يلا معاد الدوا و عندنا معاد فالمستشفي بدري قومي!! 

" قومت بضيق وانا مش قادره اتحرك اصلا " 

= قومت اهو خلاص

- يلا اجهزي عشان ننزل

***********************************

بقلمي / سلسبيل احمد محمود 

|| في بيت ملك و مليكه || 

فاتن: اي يا ملك يا حببتي مالك

ملك: مفرهده ومش قادره اكمل ترويق

فاتن: مليكة كملي انتي عشان اختك مش قادره

ملكية: مانا صايمه زي زيها!!

فاتن: معلش خليها عليكي

ملك: لا خلاص يا ماما انا هكمل

فاتن: لاء ! انا قولت ليها خلاص !

" مشيت وسابتهم و ملك بصت لمليكة بأسف "

***********************************

( استغفروا )

|| في بيت ليلي و يوسف || 

- يوسف يوسف يوسف

= ايييييييه انا مفرهد  و مش طايقك يا ليلي

= الجاكيت بتاعك اخي ف الله عندي درس حالا

- لاء

= شكرا جدا تسلم 

- ليلي انا قولت لاء!!

= ميغلاش عليا؟ الله يخليك

- يابنتال

قاطعته: هاا صايم صيامك هيروح بص اعتبره زكاة 

" مشيت بسرعه وهي اصلا كانت مسكاه ف ايدها لبسته و نزلت وشافت جميلة و هدي " 

- اي ده جوجو رايحه فين بدري كده ؟

بصيت لماما بتوتر فا ردت هي: ازيك يا ليلي رايحين مشوار كده انتي رايحه فين

ليلي بفقدان شغف: الدرس ربنا يتوب عليا

جميلة ابتسمت: ربنا معاكي يا لولي

" كملنا مشي انا وماما " 

- انا مش حابه حد يعرف حاجه بالذات هما

= انا مسألتش يا جميلة براحتك.

**********************************

" وَأَقِيمُوا الصَّلاَةَ وَآتُوا الزَّكَاةَ وَارْكَعُوا مَعَ الرَّاكِعِينَ "

(سورة البقرة: الآية 43) 

- اياد 

= خير يا تيته؟! 

- شوفت جدة كريم لو محتاجه حاجه

= ايوه حصل جبتلها الى عاوزاه

- ربنا يديك الصحه يا حبيبي و يجزيك خير

= ويخليكي ليا يا فطومة.. بقولك يا تيته انا عايزك تقولي لطنط هدي تسيب جميلة تنزل معانا شوية ونصلي الفجر و كده 

- انت عارف ان هي مش بتحب بنتها تنزل هنعمل اي

= مانا عارف يا فطوم الاه! انال بصدرك ليه! خشي عليها بالحنين بقا و ليني قلبها 

ضحكت: اما نشوف ان شاء الله 

- ماشي انا نازل اشوف الواد يوسف كده عاوزة حاجه

= سلامتك 

************************************

|| في عيادة في إحدي المستشفيات ||

- التحاليل كويسة ولا انتي اي رأيك يا جميلة 

= انا حاسه اني تمام يا دكتور

- طيب مفيش اي حْطر الحمدلله

هدي: بجد؟! يعني هي ماشية مظبوط

- ايوه جدا متقلقوش

" خلصنا معاد الدكتور و كنا مروحين وانا مرتاحه ان محصلش حاجه بسبب عملتي امبارح قابلت مليكة على اول الشارع وبعدين ماما سابتنا نروح سوا وراحت تشتري حاجات " 

- امال فين ملك؟

= قاعده فوق يختي مفرهده

- الاه ومالك مدايقه كده ليه؟! 

= عشان ماما نزلتي بدالها 

ضحكت: خلاص متزعلش رايحه تجيبي اي واجي معاكي 

- رز من عند عم حسن الى هاروح اللقيه مفرهد هو كمان

"فضلت اضحك جامد عليها وهي كمان ضحكت وسمعنا صوت ورانا واحنا ماشيين " 

- ده اي العسل ده ؟ هوا القمر بيطلع بالنهار 

ملكية بصوت واطي: اي ده احنا الكلام ده لينا؟! 

- اكيد لا 

"بصينا ورانا كانوا تلت شباب و شكلهم مش من منطقتنا بعدين بصيت حواليا و ملقتش حد فا خوفت"

- بصي يلا نمشي احسن وكأن مسمعناش

"جينا نتحرك وقفوا قصادنا و احنا كنا شوية و هنعي...

لا دي ملكية بتعيط اصلا ماشي بدات ازعق فيهم لما لقتها خافت لأني خوفت عشانها"

- امشي انت وهو من هنا و بلاش قلة ادب ! 

= اية ده ؟ دي طلعت قطه و بتخربش يا عيال 

- اي ياض السماجه دي !! 

"قرب علينا شوية و انا لمحت جرجس واحمد من بعيد فا ناديت عليهم بصوت عالي وجم عندنا بسرعه"

جرجس وقف قصادهم: انتوا مين وفي اي  ؟؟؟! 

احمد بص لمليكة ومسك واحد فيهم بسرعه لما لاقاها بعيط: في اي عملوا ليكوا حاجه ؟؟ 

جميلة: قلوا ادبهم علينا و 

" مكملتش كلامي لقيت جرجس واحمد نزلوا فيهم عجن جامد الناس بدأت تتلم " 

جرجس بزعيق: بتعاكس و ف نهار رمضان يابن الجرْمه 

" اياد و يوسف لاحظوا التجمع من بعيد "

- اي ده يا يوسف خناقة دي ولا اي 

= انت اهبل ماهم بيعجنوا بعض اهو ده باين جرجس؟ تعالي بسرعه

" اياد و يوسف راحوا جري يسلكوا مع الناس يوسف مسك احمد و اياد مسك جرجس "

- جرا اي انت وهو حد يتخانق ف نهار رمضان كدا !!! ما تهدوا في اي !!! اهدوا كده 

جرجس بعصبيه: امسكوا ياعم انت متسبوش ده كان بيعاكس جميلة و ملكية 

اياد بصله و لمح جميلة واقفة هي ومليكة: بيعاكس مين ؟؟ 

جرجس: جميلة و ملكية! 

__

"احمد و جرجس بقوا يسلكوا اياد و يوسف"

- خلاص ياعم اياد العيال هتموت ف ايدكم ! 

الخناقة اتفضت بالعافيه و التلت الشباب كل واحد خارج هدومه مقطعه و متعو////رين 

************************************

" إِنَّ الَّذِينَ آمَنُوا وَعَمِلُوا الصَّالِحَاتِ وَأَقَامُوا الصَّلاَةَ وَآتَوْا الزَّكَاةَ لَهُمْ أَجْرُهُمْ عِنْدَ رَبِّهِمْ وَلاَ خَوْفٌ عَلَيْهِمْ وَلاَ هُمْ يَحْزَنُونَ " (سورة البقرة: الآية 277).

احمد بضحك جامد: و جرجس يعمل للواد ازاي وهو بيعجنه  بتعاكس ف نهار رمضان يا ابن الجرْمة ؟؟

"كلهم ضحكوا عليه طريقته وهو بيقلده"

جرجس: وانت يعني مسكت فيا وسبت اياد لما بقوله جميلة و مليكه بدل ما كان جي يسلك كمل عجن فالعيال 

يوسف: اها هموت اياد طلع عصب

اياد: كنتوا عاوزني اعمل اي ماهم يستاهلوا

احمد: بصراحه أها و اصلا مش من هنا فا جايين يقلوا ادبهم عندنا لا أحسن انهم كلوا علقه

اياد: بالظبط كده ، انا مروح بقي يا شباب المغرب قرب يأذن

" قبل ما اروح البيت قولت اطلع اشوفها الأول " 

"روحت وخبطت على الباب فتحت طنط هدي"

- اياد اتفضل يا حبيبي تعالي

دخلت لقيت جميلة قاعده: اي انتي كويسة؟

هدي: انت الى عامل اي فيك حاجه؟! 

- لا عيب عليكي يا طنط

ضحكت بخفه: ماشي يا جامد

ابتسم: انا بس جيت اطمن عليها و مليكة عامله اي؟!

- لسه كنت بكلمها اهو ملك ردت وقالتلي كويسة

= احنا عدمناهم العافيه مش هيجوا هنا تاني

هدي: جدع انا عارفه انك بتخاف علي جميلة زي اختك

اياد ف نفسه " اختي ؟ طب ماشي " 

- اها اكيد يا طنط هنزل بقي 

= خليك افطر معانا

- عشان تيته لوحدها بقا

= ماشي يا حبيبي خلي بالك من نفسك

***********************************

سبحان الله و بحمده سبحان الله العظيم

" فطرت انا و ماما و بعدين دخلنا نصلي و اتفاجئت انها بتديني الاذن اصلي الفجر مع صحابي! " 

- الو يا جميلة

=  ملك!! عدوا عليا استنوني انا هنزل اصلي الفجر معاكم

- بتهزري

= بكلم جد

- هيييييييييييييه 

" قفلت معاها وهي فرحانه وانا اكتر منها زمان واحنا صغيرين كنا دايما نروح الجامع ونصلي سوا لأنه قريب للبيت ف ضهر شارعنا علطول "

" وفعلا اتجمعنا كلنا و روحنا يوسف و ايااد و احمد وانا و ليلي و ملك و مليكة "

" بعد الصلاة وقفوا يستنوا قدام  الجامع " 

احمد: تصدق ناقصنا جرجس

اياد بضحك: اهي دي الوحيده الى ناقص يعملها 

يوسف: اها والله ، البنات اتأخروا ليه؟ 

اياد: انت فاكرهم زينا يابا دول ناس تقيه بيصلوا بالراحه

يوسف: تلاقيهم بيسمعوا درس دين جوه نلف لفة ونجلهم طب ولا اي

احمد: انا عايز أروح عشان ده معاد صحيان البوبيهات

"كلهم ضحكوا"

يوسف:  احمد فوييا 

" وفعلا كان مشي اتحرك خطوتين و بص قدامه لمح شوية عيال جايين عليهم "

يوسف: اي يابو حميد متمشي ولا خايف ؟

 نيجي نوصلك؟؟

احمد: مش دول العيال الى عجناهم الصبح! 

اياد بص قدامه: احمس لاء مكنوش كل دول! 

يوسف: هو انا ينفع اجري! 

اياد: اقف يجبان هنسيب البنات جوه واختك

احمد: اديك قولت هما جوا احنا برا! 

"العيال قربت عليهم خالص واتكلم واحد"

- هما دول يا اوشا الى علموا علينا 

يتبع..

*******************************