_انسه سوزي حضرتك عندك كانسر

أنا وأدهم بصينا لبعض بصدمة 

الدكتور كمل كلامه_ في المرحلة التانية يعني يعتبر في البداية شوية وان شاء الله يتلحق 

كنت ساكته تماماً مدتش أي ريأكشن خالص 

أتكلمت بهدوء رهيب_هبدأ علاج أمتي 

بصلي بأستغراب من هدوئي بس رد_محتاج بس نعمل شوية تحاليل واشعه قبل ما نبدأ العلاج 

بالفعل كان عمال يتكلم ويقولي اللي هيحصل الفترة الجاية وكنت برد عليه بهدوء وكل ده أدهم ساكت 

خرجنا برا المستشفى كنت ماشية عادي ولا أكن في حاجه فجأة أدهم وقف قدامي وبصلي_أنتِ كويسة 

أبتسمت_الحمدلله

بصلي بقلق_متأكده

اتنهدت_عارفه ايه اللي بيدور في مخك دلوقتي بس صدقني راضية الحمدلله 

مسكته من ايده وسندت علي دراعه راسي_تعالى نتمشي 

_عارفه أنه ممكن يكون الوضع صعب ومش عارفه هنقول الخبر لأهلي إزاي بس أنا مش فارق معايا كل ده عارف ايه اللي فارق معايا 

اتنهد_ايه

خدت نفس عميق_تعرف أن كان أمنيتي أن يجيلي المرض ده

وقف وبصلي بصدمه_نعم

أبتسمت وسحبته عشان نكمل مشي_كان في كل صلاة ودعاء أدعي بيه أن المرض ده لو هيتشال من أي طفل صغير ويجي فيا كنت بدعي ربنا يحصل كده  والحمدلله حصل فبشكر ربنا 

اتنهدت بحزن_عارفه أن دي حكمة ربنا بس بحزن 

بحزن لما بشوف الأطفال بدل ما بيلعبوا زي صحابهم بيتعالجو من مرض صعب 

بس يلا الحمدلله علي كل شئ

 وصلنا عند البحر فوقف فوقفت معاه وبصتله لقيته باصصلي وعيونه بتلمع بدموع أتصدمت وأتكلمت بخضه_مالك في ايه

فجأة بدون مقدمات لقيت نفسي في حضنه وحسيت بحاجة سخنه علي كتفي

دموعه!

_أنتِ جميلة أوي يا سوزي حقيقي جميلة وقلبك جميل جداً 

أتصدمت من الحضن فضلت واقفه مصدومه متحركتش ولا حتي بادلته الحضن!

بعدني عنه وأتكلم بلهفه_أنا هفضل جنبك مش هسيبك صدقيني كل خطوة مش هتخطيها غير معايا مش هسيبك لوحدك في الرحلة دي

أبتسمت وحقيقي كان جوايا مشاعر مش عارفه انبساط 

فرح

حب!

روحني البيت وكنا في الشارع 

_مش عارفه هقول الخبر إزاي 

اتنهد_لو حابه أطلع معاكي تمام معنديش مشكله 

سكت شوية_خلاص روح أنتَ علي مهلك وأنا هتصرف وهبقي أكلمك 

ودعته وطلعت أول ما دخلت لقيت بابا وماما قاعدين في الصاله مع بعض 

بابا قرب مني وحضني_وحشتيني

=حبيبي وأنتَ كمان 

ماما قربت مني وبصتلي بأستغراب_مالك فيكي ايه

مش معقول يا أمي ده أنا حتي مقعدتش وعرفتي إن في حاجة 

حقيقي الأم دي أعظم نعمة في حياتنا

اتنهدت بتعب وقعدت_أقعدو عايزة أقولكم علي حاجه 

قعدو وبصولي بأستغراب 

خدت نفس عميق_أنا عندي كانسر 

أمي شهقت ولطمت في نفس الوقت وبابا لقيته برق

أتكلمت ماما بخوف_اكيد بتهزري وده هزار بايخ صح صح

بصيتلها وأتكلمت بهدوء_لا مش هزار أنا بقالي كام يوم تعبانة وادهم خدني وروحنا كشفنا وبعد تحاليل وأشعه طلع عندي كانسر في المرحلة التانية 

أمي في اللحظة دي انهارت_ليه يارب ليه انشاله كان جالي وأنتِ لاء يا نور عيني

حضنتها بسرعه_بعد الشر عليكي يا روحي أنا مقدرش أعيش من غيرك 

كل ده كان بابا قاعد في صدمة متحركش وكان بيبص للفراغ وماما جنبه منهارة وأنا مش عارفه أعمل ايه 

جريت علي فوني كلمت أدهم بسرعه_أدهم تعلالي بسرعه 

بالفعل دقايق ولقيته عندي لأنه مكنش مشي لسه 

حاولنا نهدي ماما واطمنها أنه لسه في البداية وهيتعالج بس بابا كان قاعد ساكت تماماً مبيتحركش خوفت عليه قربت منه وسيبت ماما كان أدهم بيهديها

مسكت ايده_بابا حبيبي أنتَ كويس

وهنا لقيته بصلي ودموعه نزلت!

أول مرة أشوف دموع بابا 

دموعي نزلت تلقائيا_حبيبي متخافش هبقي كويسه أنا لسه في البداية 

حضني جامد_واثق في ربنا يا حبيبتي أنك هتبقي كويسه 

اليوم كان إلي حدما صعب علي كل الأطراف 

بعد ما ماما هديت شوية طلبت من بابا ياخدها عشان ترتاح ووصلت أدهم لغاية الباب

_حقك عليا إني رجعتك تاني بس مكنتش عارفه أتصرف حقيقي آسفه بس شكراً يا أدهم حقيقي أنتَ أكتر من أخويا 

أبتسم_متعتذريش يا سوزي ومتخافيش هما بس عشان الصدمة ولكن بعد كده هيتقبلو الموضوع 

وأتكلم بخبث_وبعدين أنا مش أخوكي ابوكي اسمه حسن وأنا أبويا اسمه حسين 

نهي كلامه ومشي من قدامي بصيت لأثره وأنا مش فاهمة يقصد ايه بس دخلت وقفلت الباب ونمت بهدومي مقدرتش اغيرها حتي

"أول يوم علاج"

_متخافيش يا ماما أدهم معايا ولو حصل حاجه هتبقي أكلمك 

ودعت ماما ونزلت تحت لقيت أدهم واقف قدام العربية 

_صباح الفل

بصلي وغمز_صباح الجمال

أتكسفت_أوعي عايزة أركب 

ضحك وفتحلي الباب 

ركبت وهو ركب وساق العربية 

كنت ماسكه الفون بقلب في الفيس وفجأة لقيته شغل أغنيه في العربية 

وقابلتك 

أنتَ

لقيتك

بتغير 

كل حياتي

معرفش 

إزاي 

أنا 

حبيتك

كان بيدندن مع الاغنيه بصوت واضح وكان كل شوية يبصلي 

أتوترت_أحم قدامنا كتير

بصلي وابتسم_لاء

بالفعل عشر دقايق ووصلنا نزلت وفضلت واقفه قدام الباب وأنا بدأت اتوترت وحاسه نفسي بدأ يضيق 

قرب مني_خايفه

_متوترة

_بصي الموضوع ممكن يبقي صعب ومتعب وهيبقي متعب جسدي ونفسي 

مسك ايدي فجأة وباسها وبعدين بصلي_بس أنا جنبك ومش هسيبك تتألمي لوحدك هبقي معاكِ 

بصيت بصدمه للي عمله يخربيت الجرأة 

سحبت ايدي منه بسرعه وجريت قدامي_يا مراري يا مراري 

سمعت صوت ضحكته أبتسمت غصب عني

وبعدين بقي!!!!!

كان أول جلسة صعبه كان العلاج وجعني جدا كنت بتألم وحاسه بنار في جسمي بس اللي كان مهون عليا وجوده!

كنت ملاحظه أنه كل ما أتألم أو أتلوي بجسمي ملامح وشه تتغير للخوف والحزن والألم 

كنت من كتر الوجع بمسك في الكرسي جامد بس هو كان بيشيل ايدي من علي الكرسي وكنت بمسك ايده 

خلصت الجلسه وكنت خلاص جبت أخري 

أدهم قرب مني بلهفه_أنتِ كويسه 

رديت بتعب_الحمدلله 

قرب مني وخلاني اسند عليه بالعافية 

طلعنا وركبني العربية براحه وركب هو وبدأ يسوق

استمر العلاج وكنت بتعب شوية بس أدهم كان مهون عليا 

في الفترة دي قربنا من بعض جداً 

أتكلمت بنرفزة_وأنتَ بتضحكلها ليه يا أدهم

كان بيحاول يكتم ضحكته_يا بنتي مضحكتش ده أنا أبتسمت نص ابتسامه مجامله لكلامها بس

بصيتله بضيق_عجباك أخطبهالك يعني

بصلي وغمز_لا أنا ميملاش عيني غير حد كده 

اتوترت ومشيت من قدامه 

بعد مرور سنة كاملة الحمدلله اتعافيت 

أتكلمت بدموع_أنا مش مصدقه يا أدهم يعني خلاص بجد الحمدلله 

بصلي بحب_الحمدلله يا سوزي 

اليوم ده روحت وأنا فرحانه جداً وكانت فرحة أهلي غير

أدهم روحني البيت 

_رايح فين

=طالع عايز خالي في كلمتين

_عايز ايه

ضربني علي راسي بخفه_أنتِ حشريه ليه وسعي

وطلع قدامي المشمحترم خد هناا

طلعنا وسلم علي بابا وماما وروحت عملت عصير وجيت وزعته

_خالي أنا طالب ايد سوزي

كنت بشرب العصير شرقت وقعدت أكح جامد 

الله يخربيتك يا أدهم ايه الصدمة دي

قرب مني بلهفه_أنتِ كويسه

بصتله وأتكلمت بهمس_أنتَ ايه اللي قولته ده

بصلي وابتسم ورجع مكانه تاني_ها ايه رأيك يا خالي

*والله يا ابني أنتَ محترم ومتربي 

بس في الأول والأخر الرأي لسوزي 

بصلي وابتسم فبابا كلمني_ايه رأيك يا سوزي

أبتسمت بكسوف_اللي حضرتك شايفه يا بابا

بابا ضحك بعلو صوته_أموت في أحترامك ده

ضحكنا كلنا وفي الآخر وافقت اتخطبنا بس هنتجوز بعد التخرج 

"يوم الفرح"

_يلا بقي لفي

=هلف بس عارف لو معيطتش يا أدهم هنكد عليك

_هحاول

لفيت له وكان سكر جدا وه ده مسرح

_ولا يا أدهم أول مرة أشوفك مسرح شعرك مش منكوش

بصلي بصدمه_منكوش بقي ده كلام يتقال في يوم زي ده

ضحكت عليه وبعدين لفيت حوالين نفسي_ايه رأيك

أبتسم وقرب مني باس راسي_قمر ما شوفتش في جمالك يا بت

_حبيبي أنتَ

"في القاعه"

وتحديداً وقت رقص السلو

_ولا هما بيقولو ايه وقت الرقص السلو

=صدقيني ياختي منا عارف المهم أنتِ عامله ايه 

_الحمدلله يا أخويا 

أنا جعانه

=تصدقي وأنا مجوعني من الصبح مكلتش

شهقت_يا حبيبي خلاص نروح بيتنا وناكل أمي عاملة حلة محشي ايه رهيبة

ضحك_أيوة كده دلعنيي

الفرح خلص علي خير واليوم عدي والحمدلله اتجوزت الواد أدهم وعيشنا في تبات ونبات وخلفنا بنات بس

تمت♥️