دخل  الوغد حسن من غير أي حياء يذكر  وهو بيضحك بخبث وحب يشعلل النار أكتر 

حسن : مش معقول يا عبد الرحيم بيه  أشوفك مرتين في يوم واحد دة كتير عليا والله 

وقف عبد الرحيم ادامه ند بند ومسكه من ياقه قميصه واعد يعنفه 

عبدالرحيم :بنتي فين يلا 

وهنا حسن اتأكد انه دة أحسن وقت علشان يكسب تعاطف سهام علشان تقف في صفه

حسن : دلوقتي بقت بنتك ..ماهي كانت أدامك من زمان..وبعدين مش  مكسوف لما إنت اللي تسألني عن مكان بنتك بدل ما يكون  العكس وأنا اللي أسألك  .

عبدالرحيم : إنت هتعملهم عليا يلا ..دا أنا اوديك المالح وأجيبك عطشان ...البت فين يلا بدل  ما أدفنك هنا 

وقفت سهام في وسطهم  وهما ماسكين في بعض  وصوتت فبدأت الجيران تفتح الشبابيك وتتسائل الصوت دة جاي  منين ...

سهام : إنت  جايب آلضيشك وجاي تتعاركوا   في بيتي يا  عبد الرحيم  ...و إنت  مين يا أستاذ  إنت وإزاي داخل بيتي كده من غير  إحم ولا دستور  لا وجاي تتخانق كمان ...أخرج بره وهو هيحصلك.واتعاركوا بره مش ناقصه تلاقيح جتت .

دفع حسن عبد الرحيم فوقع علي الارض وأعد هو يعدل في ملابسه .

حسن : إهدي يا ست انتي فضحتينا ولميتي  علينا الناس

سهام : هو إنت لسه شفت فضايح يا بوز الأخص أنت وهو  ..دا أنا هخلي اللي مايشتري يتفرج عليكم إنتوا الاتنين.

نفخ حسن  برهبه لأول مرة وبعد عنها  وصوته علي أكتر لما قربت منه وهي ماسكه فازة وكانت هتضربه بيها 

حين :أنا أبقي مدير بنتك في الشغل يا ست يا مجنونه إنتي  ...أصدي صاحب الكازينو اللي هي شغاله شيفه  فيه  اللي كلمتك إمبارح وحبيت أطمنك عليها .

وهنا إتغيرت  ملامح سهام للخوف.

سهام :ده إنت نهارك اسود ومنيل ولما إنت مدير بنتي ..جايلها البيت ليه ....فين بنتي يا جدع إنت...انطق بدل ما أجيب أجلك دلوقت .

شاور حسن علي صوت صفاره الاسعاف ...فبصتله بإستفهام فكلهم قاموا وقفوا بسرعه   لما سمعوا صوت عربيه الاسعاف من تحت البيت فضربت سهام علي صدرها بحركه بلدي عشوائيه 

سهام : ياستار يارب ...إسعاف هنا في الحارة .... من يومك وانت داخلتك عليا شوم يا عبد الرحيم إطلع برا إنت وهو   بدل ما  اروح فيكم إنتوا الاتنين   في ستين داهيه ...وقبل ما تمشي  يا أستاذ  إنت قلي بنتي فين ...واعتبرها مستقيله علشان مش هتشتغل عندك تاني 

مسح حسن علي وشه  بقله صبر 

حسن : ما تتهدي بقا يا ست إنتي وسيبيني أعرف أتكلم الكلمتين اللي جاي علشانهم

سهام : لا كلام ولا سلام ...إطلع بره من غير مطرود 

حسن : وإن قلتلك إن الاسعاف اللي تحت دي فيها ندي بنتك 

وهنا سهام مقدرتش تمسك نفسها وفتحت الشباك وأعدت تصوت ولمت عليها الجيران 

سهام : بنتاااااااي .

بصلها حسن بقرف وبقا بيعنف روحه علي اللي بيعمله في نفسه   ..وبقا بيلوم حاله  ويسألها هو إزاي هيقدر يتحمل كميه العشوائية اللي ندي  وأمها عايشين فيها دي ..وان الناس دي فعلا  مش من مقامه وخصوصا أمها ام لسان طويل ...دة بمجرد ما دخل الحارة وهو إتخنق من ريحه الزفاره والزباله  اللي في  كل مكان ده غير الناس اللي عماله بتبص له وعاوزين يعرفوا هو مين ..وكله كوم وإنه يقنع أم أربعه وأربعين أمها دي إنه يتجوز بنتها علشان يذل عبدالرحيم  كوم تاني .

دخل اتنين ممرضين شايلين ندي اللي نايمه بفعل المنوم اللي عطتهولها الممرضه فإنحنت عليها أمها وحضنتها بدموع وبعدين دخلتهم الاوضه الخاصه بندي علشان ينيموها علي السرير الخاص بيها 

إنهارت سهام وبصت لحسن وجريت عليه تسأله

سهام: بنتي حصلها إيه يا أستاذ إنت. 

حسن : بنتك باين كانت أعده علي البحر بالليل  والنوه كانت شديده حبتين إمبارح والموج  هاج علي سهوه   وطار علي الشط لولا بتاع نصبه الشاي اللي علي القمه اللي لحقها كانت راحت فيها .

سهام : موج أيه اللي علي علي  الشط  يا جدع إنت دة انا بنتي بتعدي المانش ولا تتبلش ...ده كلام ما يتصدقش أبدا..أنا بنتي تغرق علي الشط ..وهي بتعوم احسن من ابو هيف نفسه .

حسن : أهو ده اللي حصل وابقي إسألي بتاع نصبه الشاي

جريت عليه ومسكته من هدومه بغيظ 

سهام : كدااااب .قول عملت في بنتي إيه لحسن مش هتخرج من هنا حي.

حسن لقي نفسه مزنوق بين قوسين مالهمش تالت فقرر يقدم معاد الانتقام ويخليهم هما اللي يترجوه علشان يتجوزها.

حسن :  إنتي إتجننتي يا ست إنتي أنا هعمل في مراتي إيه يعني .

بلعت سهام لعابها بذهول وهي علي وشك إنها تقع من طولها 

سهام : مراتك  مين وإزاي ...أنا بنتي مش متجوزه .

حسن : لا... أنا وندي متجوزين عرفي  من ٦ شهور وبصراحه بقي هي حاولت تنتحر إمبارح علشان انا مارضيتش اكتب عليها رسمي .

كان البيت مليان ناس اللي كانوا جايين يتطمنوا علي ندي اول ما سمعوا كلام حسن بدأؤ يتهامسوا مع بعضهم بصوت واطي وكأنهم بيشمتوا فيها وفي بنتها .وكأنهم ما صدقوا يمسكوا عليها ذله .

جاره ¹ : بقا هي دي بنتك ياست سهام اللي مارضيتيش تجوزيها لابني علشان إبني مش أد المقام .