فضلت قسمت ماشية بضهرها وعينها على هشام من بعيد شايفاه واقف يتلفت حواليه وينادي عليها  

حست انها مش شايفة الناس مش حاسة بالزحمة  الدموع نازلة غصب عنها 

بتقاوم نفسها هى عايزة تروحله وفي نفس الوقت مش متحملة تتوجع تاني 

فضلت واقفة مكانها تايهة مش عارفة تقرر تعمل ايه 

موبايلها بيرن 

رقم مش مسجلاه بس هى متأكدة انه هو 

واقفة ماسكة الموبايل تبصله وتبكي 

محستش غير وايد بتطبطب على كتفها 

: طب بتعملي كده ليه لما انتي هتعيطي 

بصتله بصة مبهورة زي الاطفال 

: أناااا انت يعني ..  

: انا ايه وانتي ايه مالك يا قسمت اتكلمي فرصة شخص مش عايش معاكي في نفس البلد مش هيلومك او يبصلك بصة وحشة على حاجة هتقوليها او تحكيها سيبي روحك 

فتحت في العياط اكتر  سحبها من ايدها بالراحة  ومشي ناحية الاوبر اللي كان واقف مستني  

فتحلها الباب وهو مبتسم وبيقولها : اتفضلي ياهانم 

: انا ..... انت بتتريق عليا 

: بالعكس انتي هانم وست الهوانم 

وبص لكابتن الاوبر وسأله ولا ايه رأي حضرتك 

سواق الاوبر بص في المراية وقال بأدب : لا مش هانم دي برنسيسة واميرة كمان 

ابتسمت قسمت بمرارة وهى باصة عند رجليها 

سألها هشام : ها نروح ناكل فين بقى 

: انا بصراحة مش عارفة اصلي مبخرجش والاكل بشتري ديليفري واكله في البيت 

: طيب ناخد رأي الكابتن من فضلك والله ودينا مطعم يكون حاجة كده وصاية 

رد الكابتن : حضرتك مزاجك ايه أسماك ولا لحوم اقولك هوديك عند درويش 

لما قسمت سمعت درويش ابتسمت فسألها هشام 

: تعرفيه ..؟ 

هزت راسها ان ايوة 

فبص للسواق وقاله : تمام درويش 

لما وصلو المطعم 

شدلها الكرسي وهو بيقولها اتفضلي 

للحظة وهى بتقعد خطر في بالها ان ممكن يشد الكرسي يوقعها عشان يضحك 

طول عمرها يحصلها حاجات زي دي من اللي حواليها وبيضحكو ويزعلو منها لو مضحكتش معاهم وبنهزر وكده 

: مالك سرحتي في ايه 

ردت عليه وهى لسة عنيها شاردة 

: ابدا ولا حاجة 

: طيب هتطلبيلنا ايه 

لتاني مرة جه في بالها خاطرة حاجة غريبة ياترى عاوزني انا اللي ادفع   كل المرات اللي خرجت فيهم مع واحد كنت انا اللي بدفع  كأني بشتري الكام دقيقة  اللي بحس فيهم اني بنت وقاعدة مع راجل 

: يا أمي بتروحي فين 

انتبهت مخضوضة : هه ايوا ايوا 

: ممم بتسرحي كتير انتي 

: اه مش عارفة مالي النهاردة 

: طب اقولك فكرة اللي يجي في بالك قوليه علطول مهما كان 

ابتسمت بكسوف : هو يعني اصل بتجيلي افكار عبيطة 

قرب منها وبص في عنيها : افكار زي ايه 

: يعني مثلا وانت بتشدلي الكرسي اتهيألي انك هتسحبه تاني عشان أقع وتضحك عليا وانت بتقولي هتأكلينا ايه فكرت ياترى مين فينا اللي هيدفع 

مسح وشه وبان عليه الزعل قوي وقالها : انتي دايما كده ؟ 

: كده يعني ايه 

: كده يعني خايفة ومهزوزة ومش واثقة من نفسك ؟ 

ارتبكت من سؤاله وردت بسرعة 

: لا خايفة ايه لا مش خايفة ولا حاجة بس يعني 

سحب سيجارة ولعها 

: بس اتعودتي على المعاملة دي 

بصت في الارض وسكتت فكمل كلامه 

: افرضي ياستي اني حيوان وسحبت الكرسي فعلا وقعتك كنتي هتعملي ايه 

: كنت هتحرج وامشي بسرعة 

رفع حواجبه ورد بدهشة : بس ....:؟؟؟

: يعني اعمل ايه 

: تعملي ايه ازاي ياماما اللي يعمل معاكي حركة زي دي أمسحي بيه البلاط حتى لو انا 

حاولت ترد ردت بدالها الدموع 

دموع نازلة كل دمعة كلمة قاسية سمعتها من امها من عمتها من ابوها  

:هتاخدو ايه يا فندم ..؟

بص هشام للجرسون وقاله متأسف كنت جاي اكل بس مش هقدر  لو تسمح ناخد شاي 

الجرسون قاله أوامر: يافندم شاي 

مسحت دموعها : متأسفة انا عطلتك وجوعتك  

: انتي كنتي قولتيلي واحنا بندردش ماسنجر انك عايشة مع عمتك صحيح ؟ 

: ايوة 

: طيب قوليلها اني عايز اقابلها 

: تقابلها ....

: ايوة وبجد مش مقلب قبل ما يجي في بالك ان همشي زي ما فكرتي في المطار ولو مش متطمنة خدي باسبوري وشنطتي خليهم معاكي لحد ما اقابل عمتك واطلبك منها 

: لا انت بتقول كده دلوقتي وبعد شوية هتشوفني زيهم وتمشي 

بصلها قوي وقالها بحزم وصوت عالي شوية : قومي اقفي 

اتخضت من صوته وقامت وقفت فعلا 

: لفي 

لفت 

: ها شايفة ايه 

: ولا حاجة 

: اهى دي بقى مصيبتك شايفة نفسك ولا حاجة لكن انا شايفة شابة جميلة سمرا سمار ساحر عنيها تجنن طولك وعودك زي ما بيقول الكتاب  متعلمة مهذبة ولطيفة وفوق كده عندك نبل وجدعنة مشفتهمش في رجالة كتير 

ابتسمت لاول مرة من ساعة ما شافها وهى بتقول 

: انا ده كله 

: ايوة وعلى فكرة انا مقرر اطلب ايدك من مدة طويلة من ساعة مشوار بورسعيد 

: بس انا معملتش حاجة 

:متهيألك  انتي يومها عملتي حاجة كبيرة قوي خلتني اعرف ان الدنيا لسة بخير  من وقتها وانتي بالنسبالي مش مجرد صديقة شات او فيس لا الموضوع اكبر من كده 

وهما قاعدين هشام دور عالموبايل على أوتيل مناسب ولقى  

وسألها قبل ما يطلب أوبر : بيتك فين ؟ 

: بيتي ...؟ ليه 

: ايه هو اللي ليه لازم اوصلك وفرصة اعرف بيتك علشان لما اجي لعمتك  تبقي انتي قاعدة هانم كده وانا احي حسب الميعاد 

: مش مصدقاك بجد 

: معلش الوقت هيخليكي تصدقي يلا العربية جات 

لما وصلت البيت قالت بصوت عالي : انا جيت ياعمتي 

ودخلت جري على اوضتها رمت نفسها على سريرها وهى بتكرر جمل من كلامه 

قولتلك جايلك مخصوص 

سمرا سمار ساحر طولك وعودك زي ما بيقول الكتاب 

دخلت عليها عمتها : بسم الله الرحمن الرحيم قسمت أنتي بتكلمي نفسك 

: عمتي هو انتي ليه عمرك ما قولتيلي اني حلوة 

هزت عمتها رأسها وضحكت : يعني اكدب يابنتي