في اليوم ده قسمت مخدتش بالها انها وهى بتتكلم مع مجدي كان بيعيد كل كلمة بتقولها بس بصوت أعلى شوية كأنه قاصد يسمع حد اللي هى بتقوله 

:كلهم سافرو . البيت فاضي وختم بجملة وساكتة من الصبح مش تقولي يلا بينا بقى 

كان قاعد جنبهم عالرصيف شلة بنات من اللي معاها في المدرج وطبعا سمعو الكلام ده 

اكيد في طريقة او حاجة بتخلي الشخص المحطوط عليه في بيته محطوط عليه في الدنيا كلها 

هو ازاي الناس بيعرفو ان البني آدم ده مظلوم ومتداس عليه فيقومو مكملين عليه اكتر واكتر ؟ 

الأسئلة دي كلها قسمت سألتها لنفسها كتير وموصلتش لإجابة شافية 

يومها مجدي يادوب وصلها لمحطة الاتوبيس 

لكن اللي هى متعرفوش انه مرجعش عالجامعة واختفى شوية ولما رجع تاني يوم حكى لأصحابه انه روح معاها البيت وقضو ليلة جامدة 

فجأة الجامعة المكان الوحيد اللي كانت بتتنفس فيه شوية وبدأت تحس بنفسها بقت جحيم 

الكل بيبعد عنها وهمز ولمز لدرجة انها كانت واقفة مع زميلة من البنات المخطوبين فجه خطيبها زعقلها وقالها متقفيش معاها لتوسخك زيها 

قسمت مش فاهمة حاجة بتسأل مجدي قالها : معرفش شوفي انتي بتعملي ايه 

حتى هو نفسه من كتر ما سبك الكدبة حواليها صدقها وبدأ يعاملها معاملة سيئة جدا هى مش فاهمة سببها 

تخيل نفسك واقف عريان في دايرة نار وحواليك ناس بتتفرج وتضحك وانت مش فاهم ايه اللي بيحصل 

رن موبايلها خرجها من الذكرى المرعبة دي 

مسحت دموعها وردت 

: الو 

: ها انتي كويسة دلوقتي ؟ 

: انا اه كويسة 

: طيب قولتي لعمتك ان عايز اقابلها 

: هشام لو سمحت انا مش حمل اي مقالب وملصمة حياتي بالعافية 

: ليه بتقولي كده 

: عشان احنا يادوب معرفة فيسبوك وانت لسة شايفني من كام ساعة 

:لكن عرفت احكم كويس وشفت انك بنت ممتازة وان هبقى خسران لو سيبتك 

: انت متعرفش عني حاجة 

: اعرف اعرف كتير قوي انتي اللي مش عارفة نفسك 

البنت اللي تسافر مخصوص من القاهرة لبورسعيد علشان تخلصلي مشكلة  وهى ما تعرفنيش لمجرد اني صديق فيس وطلبت مساعدتها .

 البنت اللي تعرف ان والدي تعبان في آخر الدنيا وان مش عارف اتطمن عليه فتسافرله مخصوص عشان تكلمني من هناك واتطمن دي بنت نبيلة وجميلة من جواها زي ماهى جميلة من برة .

وقفتك لما والدي اتوفى ومكنتش عارف انزل كل دي حاجات بتقول انك عملة نادرة 

مسحت دموعها:  بس دي حاجات عادية اي حد ممكن يعملها 

: متهيألك ياماما انا طلبت الحاجات دي من رجالة بشنبات واتحججو واعتذرو  

: لا ده مش سبب والدنيا لسة بخير 

: يا قسمت اكبر دليل ان الدنيا لسة بخير هو انك فيها لو١١ سمحتي بلغي عمتك اني هاجي اتقدملك بكرة بعد الساعة خمسة 

زي عادتها من كتر ماشافت مرار من الدنيا دايما تقول عالسكر سم 

لكن في حاجة جواها كانت مصدقاه فغسلت وشها وخرجت من اوضتها 

للصالة 

عمتها قاعدة قدام التلفزيون حاطة قدامها طبق لب وفاردة رجليها على كرسي صغير متعودة تحطه قدامها 

:عمتي 

: نعم 

: في واحد عاوز يجي يتقدملي 

: والنبي صحيح ...!! 

: ايوة 

هزت عمتها كتافها وقالت 

: ياخوفي لا يكون نقاش ولا صرماتي 

وقفت قدامها بكل ثبات وهى بتجاهد عشان تفضل متماسكة 

: لا يا عمتي لا نقاش ولا صرماتي ده راجل محترم وبيشتغل في النمسا 

:إيه إيه وعرفتيه منين ده ياختي 

: مش مهم يا عمتي المهم انه جاي بكرة 

: طيب وماله اهلا وسهلا بيه 

ورجعت عمتها للتلفزيون كأنها مسمعتش حاجة قسمت اتغاظت فرجعت لها تاني 

: هو احنا مش هنقوم نروق البيت ونفكر هنغديه إيه 

ضحكت عمتها ضحكة سخيفة 

: اه طيب ما تشغليش بالك انتي بس 

: يا عمتي انا عندي شغل الصبح  وانتي لوحدك هتوضبي وتطبخي 

رمت صباح طبق اللب على جنب واتعدلت ناحية قسمت 

: لهو انتي فاكراه جاي بصحيح مسم مكانش يتعز يابنت اخويا هيجيلك على ايه 

ده كان آخر حاجة فاضلة في سبات قسمت صرخت في وش عمتها 

: ما بزيادة بقى انتي ايه ما بتحسيش هو انا عشان محترماكي وبتصعبي عليا خلاص هتعمليني تسليتك قوليلي فيا ايه ناقصني ايه عن كل البنات يعني لو كنت حلوة وبيضا وبهرب من بيت جوزي وبطفش محدش يعرف طريقي كنتي هتحبيني؟؟؟

وقفت صباح ترد 

: انتي بتعايريني ببنتي ده جزاتي ان سايبة بيتي وقاعدة بيكي 

: قاعدة بيا ليه مكسحة ولا بريل انتي قاعدة هنا عشان شاكيرا طردتك انتي فاكرة اني معرفش 

قاعدة في بيت ابويا تأكلي وتشربي واخدمك وبرضه مافيش فايدة عاملاني تسليتك ولا بتعوضي خيبة املك في ست الحسن 

: قسمت ...!  

: ياغريب كون اديب يا عمتي  انتي ضيفة في بيتي واحب تحترميني  بكرة هيجي الضيف ده يطلب ايدي وهتردي عليه بالاصول وانا موافقة 

عمتها لآخر لحظة مش قادرة تمسك لسانها فقالت لها 

: حاضر بس ادي دقني ان جه 

ليلة عدت عليها طويلة قوي بتعد الساعات عشان يجي ميعاد هشام مش عشان منتظراه تحديدا لكن عشان تعرف هيجي ولا لا 

عشان تقتل الوقت سهرت توضب وتلمع في البيت لدرجة انها فكت الستاير وغسلتها وركبتها  

ولما خلصت كل حاجة افتكرت مرة كانت بتحكي معاه على الشات وقالها إنه بيتعشى مكرونة حزينة وانه نفسه في محاشي مصر 

فتحت الفريزر طلعت كيس لحمة وطلعت برطمان ورق عنب 

ووقفت تجهز الخلطة 

الفجر قرب يأذن وهى قاعدة تلف صوابع المحشي ومع كل صباع تسأل : هيجي؟  مش هيجي  

النهار طلع عمتها قامت تصلي الفجر بصت لقتها قاعدة عالكنبة وقدامها حلة المحشي  

وقفت تتلفت في البيت وشهقت 

: إيه ده كله ده شيلتي الكساوي  ومسحتي البلاط وفرشتي السجاد ده زي ما يكون بجد 

مردتش عليها  ودخلت الحمام خدت دش وطلعت لبست ونزلت على شغلها استئذنت تمشي بدري وخرجت من الشغل على الكوافير  عملت شعرها مع صوت ضحك الكوافيرة 

: برضه مش هتعملي حواجبك 

: لا ياستي بحبهم كده 

خلصت ورجعت البيت دخلت اوضتها رمت نفسها عالسرير وظبطت المنبه على الساعة أربعة وراحت في النوم 

الساعة أربعة المنبه رن 

نطت من السرير ومسكت الموبايل تطلبه 

.............

......

الهاتف الذي طلبته ربما يكون مغلقا او خارج نطاق الخدمة 

قعدت تضحك وتقول كنت متأكدة