وقفت قسمت قدام هشام ماسكة صنية صغيرة 

: اتفضل دوق المحشي لحد ما اجهز للنزول 

: تجهزي اكتر من كده ايه انا خايف تتخطفي مننا من كتر حلاوتك 

صباح سمعت كده ومصمصت شفايفها واستغلت ان قسمت دخلت اوضتها تجيب شنطتها 

وميلت عليه 

: قولي يابني انت ايه اللي عجبك فيها قصدي يعني ايه لفت نظرك ؟ 

بصلها هشام باستغراب  وحط الشوكة مكانها وكلمها بحزم شوية 

: هو سؤال حضرتك غريب شوية تقريبا ... 

: ازاي يابني 

: أصل يا حاجة عادة يعني اهل البنت بيحبو يعززوها ويعلو من شأنها قدام اللي جاي انما طريقة حضرتك غير كده خالص 

شرقت صباح في بؤق الشاي اللي بقت لا عارفة تبلعه ولا تطلعه 

وحطت ايدها على قلبها وهى بتحاول تتهرب من نظرات هشام اللي كلها استغراب من اسلوبها الغريب 

هشام نادى على قسمت 

: تسلم ايديكي يا قسمت ده احلى واطعم محشي دوقته في حياتي انتي حقيقي كاملة الاوصاف  مش يلا بينا بقى بصراحة محتاج احلي بعد العظمة دي 

قامت صباح واتحركو كلهم  على تحت 

كان في عربية ليموزين محترمة منتظراهم  ووقف هشام يفتح باب العربية لقسمت وعمتها بأدب ويقول اتفضلو يا هوانم 

صباح مش عارفة تخبي الانبهار 

لقط ده هشام فقرر يغيظها بطريقته  

: طنط انا بصراحة علشان عايش برة ومعنديش اخوات بنات فمش عارف بيقدمو ايه في مناسبة زي دي فجبت حاجة بسيطة هدية لقسمت وفتح قدام وشها علبة قطيفة فيها طقم دهب اول ما صباح شافته شهقت غصب عنها 

: لما ده في الخطوبة امال في الشبكة هتجيب ايه 

: اجيبلها نجوم السما يا طنط وشوية عليها

 : اه وان شاء الله ناوي امتى حكم يعني زي مانت شايف احنا ستات وما ينفعش خطوبة تطول وتفضل طالع داخل 

ضحك هشام 

: لا ما تقلقيش مافيش طالع داخل ولا حاجة انا اجازتي شهر ونص عامل حسابي نخلص كل حاجة واسافر وابعتلها تيجي ورايا 

: وراك وراك فين يا حبيبي لا انا بنت اخويا ما تتغربش 

هنا قسمت زغرتلها 

: متهيألي يا عمتي ده رأيي انا واهو تستريحي من رعايتي وترجعي بيتك وتبقي براحتك 

: اه وماله يابنتي ماشي انا يعني قلبي عليكي 

وصلو مكان شيك من اختيار هشام  وتقريبا كان سايب خبر أو هو اكيد سايب خبر لان كان في ناس في استقبالهم  وترابيزة متوضبة عليها شمع وورد وإسم قسمت وشباب من المكان اتلفو حواليهم وسقفولهم 

صباح مقدرتش تخبي الغيظ فاستئذنت تروح الحمام  

قسمت ما صدقت صباح مشيت وقالتله 

: انت بتعمل ايه وايه ده كله 

: اسمعي انا كنت ناوي اخطبك خطوبة عادية وخلاص انما خوفك وقلة ثقتك اني جاي حسسوني ان عندك مشكلة كبيرة 

 : بس ااا 

: ولما شفت عمتك فهمت انك عايشة في جحيم الست مش بتعمل حاجة غير انها تقلل منك فحبيت اغيظها واجننها وبعدين انا مش عامل حاجة اوفر انا راجل اتربيت ان الست العروسة أميرة لازم الواحد يتعب وهو بيخطب ودها انتي مبتسمعيش حواديت ولا ايه ده كويس ان مطلبتوش الف ناقة حمر 

ضحكت قسمت بصوت عالي : يعني لو طلبتهم 

: اقسم بالله اجيبهم  بس ترضي 

: انا خايفة افرح قوي 

خبط جبينه بايده : يا لهواااي  افرحي يافقرية حتى لو انا وحش افرحي دلوقت وخلي النكد لوقته مش هيهرب يعني 

صباح في الحمام كانت واقفة تاكل في نفسها وبعدين فكرت في حاجة فطلعت موبايلها وطلبت شاكيرا 

: الو ايو يا شاكيرا اسمعي انا عايزاكي تجيبي بعضك وتيجي بيت خالك 

: ......  

: لا اوعي تجيبي معاكي بنتك سيبيها عند حماتك واعملي حسابك تقعدي يومين تلاتة 

: ........

: الموكوسة بنت خالك جالها عريس ايييييه  حاجة اوبهة خالص 

:........

: مبروك ايه انتي راخرة انتي تسمعي اللي بقولك عليه تيجي يعني تيجي 

: ....... 

: اه هستناكي 

قسمت قضت ليلة زي الحلم 

كل حاجة زي ما كانت بتحلم بالظبط عريس شيك ووسيم وهدايا كتير حلوة وكلام حلو ومهتم يدافع عنها وبيلمح نفسها في ايه ويعمله  

يااااه اول مرة في حياتها تحس انها اتنصفت قدام اهلها غمضت عنيها وهى بتكلم نفسها 

: كان نفسي بابا وماما يكونو هنا ويشوفو ويسمعو انا بيتقالي ايه ويتعمل علشاني ايه 

حتى لما راحت شغلها تاني يوم 

الكل اخد باله ان فيها شئ متغير 

يسرا زميلتها وصاحبتها الوحيدة في الشغل بصتلها بفرح : شكلك متغير صوتك بيرن وعنيكي بتلمع فرحيني معاكي ايه في قصة حب 

رفعت قسمت عينها بسعادة : في خطوبة وجواز 

نطت يسرا من الفرح : مبروووك بجد احكيلي احكيلي 

: اسفة اني مقولتش والله لحد اخر لحظة مكنتش واثقة انه جاي 

: اسفة ايه مافيش بينا كده جالك الفرح افرحي ومش مهم مين يعرف ومين يحضر  قولي بقى هو حد نعرفه

: فاكرة مشوار بورسعيد ؟؟ 

: اه اتعرفتي على حد هناك ؟؟ 

: لا يابنتي فاكرة لما قولتلك رايحة اعمل خدمة لصديق عالفيس 

: اها 

: اهو جه وطلب ايدي 

: بجد والله ؟؟

: طلع مهندس وابن ناس بجد شافني يوم الحد وجه خطبني امبارح 

: مبروك يا حبيبتي  بس لازم نسأل عليه 

اتقبضت قسمت من الجملة 

: نسأل عليه ازاي 

: يابنتي متبقيش عبيطة الاحتياط واجب نسأل عليه نشوف مهندس فعلا ولا لا نكشف على بطاقته نشوف عليه حاجة كده ولا كده 

حست قسمت بدوخة واترمت على الكرسي وهى بترتجف 

: لا لا ياربي لا انا عمري ما فرحت لا يارب لا 

طبطبت عليها يسرا 

: هو انا بقولك كده عشان تخافي ..!! احنا هنتطمن بس 

مجرد سؤال يسرا كان كفيل بزرع القلق في رأسها فضلت تفكر طول اليوم ياترى ممكن يكون وراه ايه ما اكيد كل ده مش عادي ان يحصل معايا 

رجعت من شغلها بدري محتاجة ترتاح بعد يوم طويل زي امبارح والصداع اللي سكن رأسها بعد كلام يسرا 

بمجرد ما فتحت المفتاح لقت شاكيرا في وشها 

: الف مبروك يا قسمت اخيرا فرحنا بيكي 

بصتلها قسمت بشك : انتي ايه اللي جابك 

دمعت شاكيرا : راجي منكد عليا عيشتي فقولت اسيبه يومين واجي اقعد مع ماما 

بصت لصباح بصة معناها واضح من غير كلام  صباح كان مكتوب على وشها هو انا معقول اسيبك تتنصفي  كده بالساهل 

شاكيرا : ها هتغدينا ايه يا قسوم 

قسمت : هو مين يغدي مين انا راجعة من الشغل تعبانة 

شاكيرا : اه بس احنا ضيوف في بيتك 

ابتسمت قسمت بسخرية وخبطت على كتفها : خلاص يا ضيوف سخنو من غدا امبارح وكلو 

شاكيرا : لا بقى انتي عارفة ان مبحبش ادخل المطبخ وجاية اريح يومين 

قسمت ضيقت عنيها قوي وقربت من وش شاكيرا 

: اظن يابنت عمتي بعد ما اتجوزتي تلت جوازات فاشلين وماشية في الرابعة ان الأوان ندخل المطبخ ونتشطر كده ونأكل نفسنا ولا خلي ماما توكلك  

شاكيرا  مستغربة قوي 

: اه هو انتي منهم يابنت خالي كنتي في جرة وطلعتي لبرة بقى اول ماتلاقي حد يعبرك تعيشي الدور علينا امال لو الموضوع مشي واتجوزتي هتعملي ايه على رأي ماما العفش لو عبروه يتنفش عاللي ربوه 

قسمت بعصبية : شاكيرا انا طول عمري اشيل بلاويكي  واداري عليكي ومسبقش غلطت فيكي  مش علشان مقدرش لكن علشان بفهم في الأصول اللي لو كنتي بتعرفي فيها كنتي جيتي باركتيلي وسألتيني هجهز ازاي وتقفي معايا زي ماياما وقفت معاكي لكن 

قاطعتها عمتها : والله صوتك علي يابنت محمود  ان شاءالله ربنا هينكس قبتك وتقعدي بوكستك وانا اهو وانتي اهو 

سابتهم قسمت ودخلت اوضتها تبكي وتبص لفوق 

: والنبي يارب تنصفني بس المرة دي انا طول عمري متحملة وحامداك وشاكراك وعارفة انك هتعوضني والنبي يارب انا عمر ما حد فرحني 

وغرقت في دموعها وهى واصلها صوت ضحك شاكيرا وامها من برة