صحي حسن الصبح وقلبه  مليان شوق وترقب، اغتسل ولبس هدومه وفطر وهو ما شلش عينه من علي الباب 

بعد الفطار وقف قدام الشباك في مكتبه، عينيه مثبتة على الطريق. الوقت بيعدي ببطء، وكل ثانية تحس كأنها سنة. ماسك كوب شاي بين إيديه، بس مش بيشرب منه، أفكاره كلها عند ندى.

حسن : يا ترى هترجع؟" الكلمة دي بتدور في دماغه، وقلبه مليان مشاعر متضاربة بين ندم وخوف وشوق. 

حسن لأول مرة يحس إن حياته فيها شغف ومش قادر يحدد الخطوه التاليه ، بس كل اللي متأكد منه إنه مستعد يعمل أي حاجة عشان يصلح اللي كسره.

كل مرة يسمع صوت عربية معدية أو حد بيخبط على الباب، يتحرك بسرعة وكأنه منتظرها تدخل عليه. يرجع يبص للطريق يلاقيه فاضي، والبيت ساكت، وهو لسه مستني، عيونه بتدور على أمل يشوفها مش عارف ليه ، وليه قلبه بيدق أسرع كل ما يفكر في لحظة رجوعها.

حسن كان واقف في نفس المكان اللي مستني فيه في الشباك ، عينه على الباب، ولما وحيد رجع لوحده ، حس بيأس ولما استأذن ودخل عليه المكتب صرخ فيه يغضب وقال بصوت مليان توتر:

حسن: هي  فين؟ ماجبتهاش ليه؟

وحيد وقف قدامه، عينيه في الأرض، ووشه كله خوف

وحيد :للأسف يا باشا ... المرة دي ما عرفناش نتدخل .

حسن بص له بصدمة، وقال بغضب

حسن : إزاي يعني ..إيه اللي حصل تاني ..إنت فقدت حسك الأمني ومابقاش ليك لازمه  ولا إيه يا وحيد .

وحيد بلع ريقه وقال بتردد

وحيد : عبد الرحيم الوهابي ..  أبوها .. سبقنا يا ياباشا  وخرجها من القسم والمحامي بتاعه اقنع وليد إنه يتنازل بعد ما عكمه هبره محترمه .

صمت لحظة، ثم أضاف بسرعة كأنه بيحاول يدافع عن نفسه .

وحيد : معرفتش أعمل حاجة ولا قدرت أبين نفسي انا والمحامي ... رجالة عبد الرحيم كانوا كتير ومتنتورين حولين القسم ، وكل حاجة خلصت بسرعة كأنه كان بيراقبها هو كمان وعارف كل خطواتها .

حسن حس كأن الأرض بتنهار تحته، ضرب بيده على مكتبه  وقال بغضب مكبوت.

حسن : عبد الرحيم! طول عمره ناسيها وجاي يبين  نفسه  دلوقتي ويتدخل في اللي مالوش فيه! بس ورحمه أختي مانا سيبها له لأنها  خلاص بقت  روحه فيها  ...هجيبها و هتفضل هنا  أدام عيني  ،وزي ماتحرق قلبه علي إبنه الوحيد هحرق قلبه عليها هي كمان وهو شايفها معايا هنا ... إنت فاهم يا بأف أنت ؟

وحيد، وهو مرتبك، قال

وحيد :  إحنا تحت أمرك يا ياباشا .. إنت تؤمر، وإحنا هنعمل اللي تقول عليه.

حسن مشي ناحية الشباك، عينه مليانة إحباط وندم، وقال بصوت واطي لكنه مليان حدة

لو عبد الرحيم فاكر إنه هيبعدها عني ومش هعرف اوصلها لما تكون في قلب بيته ، يبقى مش عارف مين هو حسن النشار .

                            

                             ❈-❈-❈

ندى خرجت من القسم مع محامي عبد الرحيم  وهي مكسورة ومش عارفه هو مين وهي خرجت إزاي وإزاي وليد النجس ده إتنازل بكل السهوله دي ،  كانت  بتحاول تستوعب كل اللي حصلها، وأملها الوحيد إنها تلاقي أمان بعد اللي عانته. 

اتفآجأت بالمحامي بيفتح لها باب العربيه وبيكلمها بإحترام 

المحامي : عبد الرحيم باشا الوهابي والد حضرتك مستنيكي يا آنسه ندي  ..إتفضلي 

ندي كان نفسها ترفض بس لقت الدنيا كلها عليها وماينفعش إنها ترفض إيد أبوها اللي ممدودالها وخصوصا في الوقت ده  وهي حتي ماعندهاش مكان تنام فيه وأكيد هتخاف ترجع الفندق تاني علشان ممكن  تلاقي وليد مستنيها هناك.

عبد الرحيم كان قاعد علي كرسي متحرك ومستنيها في الجنينه واستقبلها بحنية وخصوصا لما لقاها موطيه رأسها ونفسها مكسورة كان نفسه يقوم ياخدها في حضنه بس دي كانت أول مرة يحس بالعجز أدام  بنته الوحيده فقال لها

عبد الرحيم:  نورتي بيتك با بنتي ..اعتبري البيت ده بيتك، وأي حاجة تحتاجيها أنا موجود يا ندي ..إنسي اللي فات وإبدئي معايا من جديد .

ندى، بابتسامة ضعيفة وتوسل 

ندي : شكراً، بس أنا مش عايزة حاجة منك .. أنا بس عايزة أعيش في هدوء ، وأنت بس لو تقدر تساعدني اني أبيع شقه أمي واشتري شقه في حته تانيه تبقي عملت الصح معايا وإعتبر إنك كده بترد الدين اللي عليك لأمي فيا .

اتنهد عبدالرحيم ونادي علي الخدامه علشان تآخدها لاوضتها وقبل ما تمشي قالها

عبد الرحيم :حاضر يا ندي هعملك كل اللي انتي عايزاه.

دخلت ندي لداخل الفيلا لكن أول ما زوجة عبد الرحيم شافتها  ،بصتلها بحقد و نظراتها كانت مليانة رفض وكره ، وكأنها بتلوم القدر علي ، إن إزاي بنت سهام اللي عاشت طول عمرها تكرهها واللي اتولدت في الضل من غير ما حد يعرف هي مين  هي اللي تعيش ،  وإبنها ابن الحسب والنسب اللي كانت بتتباهي بيه أدام الدنيا بحالها  هو اللي يموت الموته الشنعاء دي ، اقتربت منها واخدت تتأمل جمالها اللي واخداه طبعا من مامتها سهام بس ندي النسخه الأجمل  منها وإتكلمت بصوت بارد وهي بتحاول تقلل منها ومن وجودها 

زوجة عبد الرحيم: إيه ده يا عبد الرحيم؟ إنت جايب خدامه  جديده  تشتغل عندنا  في البيت هو إحنا ناقصين خادمات؟