صحيت علي صوت تليفوني، كانت دُعاء، رديت بصوت متأثر من النوم وقالت:

- والله يا ست هند، أنا قولت أن أنتِ هتكوني أول واحده هتكوني معايّ

بصيت علي الساعه وكانت الساعه ١٢ الضُهر وقولت:

- يا شيخه حرام عليكي لسه بدري، أجهزي وعرفيني هجي لك علي الميكب علي طول

قفلت معاها وقومت، دخلت المطبخ وعملت لي فنجان قهوه يخليني فايقه اليوم كُله.

خدت بُق من الفنجان علي صوت دندنة الست وهي بتقول في خالراديو

"كان لك معايا أجمل حكايه في العمر كله"

ابتسمت وأنا بفتكر كلامه وهو بيملس علي القُطه.

بصيت علي الساعه وقررت أقوم أجهز نفسي، خدت دُش دافي، طلعت وفضلت واقفه قُدام الدولاب محتاره ألبس أيه، لحد ما أستقريت علي دريس كُحلي درعاته طويله بسيط ومُناسب لليوم.

حطيت ميكب بسيط، كُنت واقفه قُدام المرايّ بتأمل في الدريس وفي شكلي.

عيوني أجت علي الساعه، حطيت أكسسوارات هاديه وجريت علي بيت عمي، فتحت لي مرات عمي ودخلت بسُرعه علي الأوضه.

كانت قاعده بالدريس مستنياني، رفعت حاجبها لما شافتني وقالت:

- ما لسه بدري!!

ابتسمت وقولت:

- معانا وقت لا تقلقي

قامت بحماس وقعدت علي الكُرسي وقالت:

- طب يلا بسُرعه

قربت وبدأت أعملها ميكب هادي ومُناسب، خلصت والجرس رن، قامت بخضه وحماس وقالت:

- وصل وصل

ضحكت وقولت:

- أتمني تبقي عاقله قُدامه

مرات عمي دخلت وقالت:

- هند يا بنتي معلش تعالي ساعديني

هزيت راسي وطلعت معاها، كانت ماما وصلت وبابا وعمي مع الضيوف برا، خدت الصينيه وطلعت عشان أقدم للضيوف.

وأنا بقدم سمعت أبو العريس بيقول:

- عروستك حلوه، عرفت تنقي

ابتسم وقال:

- بس مش هي دي العروسه يا حاج

ابتسمت وعيوني فضلت علي الأرض وكُنت همشي بس سمعت صوته وهو بيقول:

- هي هتبقي عروستي أنا