لفيت نفسي وبصيت في أتجاه الصوت، ابتسم وغمز لي، عيوني وسعت وكأن كوباية مايه متلجه نزلت عليّ في عز البرد، بعدت عيوني ودخلت بسُرعه.

دخلت الأوضه عند دُعاء، اتكلمت بتوتُر وقالت:

- ها قوليلي، شكله عامل أزاي، حلو!! طب اسلوبه!! مبترُديش عليّ ليه!!

كُنت سرحانه لحد ما سألتني عن عدم ردي، هزيت راسي في محاولة طلوعي من أفكاري.

ابتسمت وقولت:

- حلو

مرات عمي دخلت ونادت لدُعاء تطلع، طلعت وراها وفضلت واقفه بعيد وقروا الفاتحه، خرجت مني زغروطه تعبر عن فرحتي بيها.

حمحم ولقيته بيقول:

- طب بعد أذنكم أنا محتاج أطلُب طلب

بابا وعمي بصوا عليه وقال:

- يعني لو تسمح لي أطلُب أيد بنتك 

شاور عليَ وبابا قاله:

- بنتي أنا!!

بأسف قال:

- أنا أسف مكُنتش أعرف أنها بنت حضرتك، أنا الحقيقه معرفش أي حاجه عنها، ولما حاولت أعرف حقيقي كانت هتلم عليَ الناس

بابا بص لي بفخر ورجع بص له وقال:

- بس أنا لازم أعرف رأيها أيه

- مش موافقه

بص لي وسكت وبص في الأرض، فضلت واقفه متابعه اليوم بعيد عن عيونه، كُنت بحاول علي قد مقدر مبُصش ناحيته.

- ليه رفضتي!!

مددت علي سريري بعد يوم طويل وقولت وأنا بفتح الأسبيكر:

- رفضت أيه بالظبط!!

- هند متستعبطيش هو مش ده نفسه الشخص اللي بتكلعي علشانه البلكونه

- آه

بتزمُر قالت:

- ولما هو آه يا بارده، رفضتي ليه!!

اتنهدت وبدأت أحكي لها اللي حصل منه وبعدين قولت:

- بس كده ومن ساعتها وأنا بجد مش طيقاه

- أيوه بس هو كان عايزك في الحلال يا هند، أتقدم لك علي فكره، وأنتِ أحرجتيه برفضك قُدامنا كُلنا، يعني لو كُنتي قولتي هتفكري مش كان أحسن

- هو السبب علي فكره، أستفزني

- بس أنتِ مُعجبه بيه، بتبادليه نفس المشاعر، يعني لو مبتحبيهوش كُنت قولت ماشي رفضتيه وخلاص راح لحاله، أنما أنتِ رفضتي وأنتِ من جواكي فيه حاجه من ناحيته

سكت وأنا حاسه بزعل وجوايّ أفكار كتيره متطمنش نهائي ولنفسي بقول:

- يعني خلاص كده!! مش هطلع البلكونه وأشوف عيونه اللي قدرت تخطفني من نظره واحده!! 

فجأه سمعت صوت كاست عربيه وسمعته بيغني ويقول:

- عذابي في البعاد والقُرب، وطالب السماح والقُرب، متشمتش فيّ الغُرب يا حنين وقلبك طيب

شهقت وطلعت أجري علي البلكونه، فتحت البلكونة لقيته قاعد فوق العربيه وبيغني

- يا زعلان وعندك حق، بحبك وكلمة حق، مينفعش أقولك لاء، اوامرك وحاضر وطيب