( اللهم صل وسلم وبارك على سيدنا محمد... عليه افضل الصلاة والسلام ) 

بعد ساعات طويله.. وبعد ماقرب النهار والشمس على الظهور.. 

نزل بيجاد من الطياره.. في مطار القاهره الدولي وقرر يروح لهمس على طول.. 

بس تفاجئ بعمران واقف قدام المطار بيجاد بأستغراب. 

ايه اللي جابك يا عمران انت عرفت ازاي اني جاي اصلا. 

رد عمران بثقه.

عيب عليك ماتسالش الاسئله دي..... ده انا عمران الدمنهوري يعني اي حد مايقدرش ياخد نفسه في البلد دي الا واكون عندي علم بيه.

رد عليه بيجاد بسخريه وهو بيقول. 

طب جاي ليه يا عمران باشا..

ابتسم عمران وهو بيقول. 

جاي عشان امنعك من اللي هتعمله يا انصح اخواتك انت بتستظرف عايز تروح تقول له ايه جاي اخلي مراتك تطلق منك ولا جايه انقذها.. 

بصراحه انا شايف اللي بتعمله حاجه في منتهى السخافه.

رد عليه بيجاد بغضب وهو مش قادر يتملك نفسه اكتر من كده.

طب عايزني اعمل ايه اسيبها معاه... ده راح خدها من بيت هدير بالعافيه ويا عالم عمل فيها ايه انا مستحيل اسيبها في الوضع ده.. 

عمران.. 

بجد انا فاهم وعارف انت عايز ايه بالظبط وحاسس بيك.. 

بس اللي انت عايزه مش هيحصل بين اللحظه والتانيه اللي انت عايزه عايز تخطيط عايزها تطلق تمام وانا هساعدك بس مش بالطريقه دي ابدا.. 

قال كلامه وسكت و بعد كده بص  لـ بيجاد وقال..

هااا قررت ايه هتيجي معايا ونشوف هنعمل ايه بعد كده ولا هتروح تتخانق معاه وتتهجم عليه في بيته وتقول له انك عايز تطلق مراته منه.. 

وهو بكل سهوله هيقول عليك عاشقها ولا حاجه وتحصل نصيبه وفضيحه لعيله الدمنهوري.. 

والدنيا تقوم ماتقعدش وده كله ليه عشان بيجاد باشا كان رايح ينقذ حبيبته.. 

بص له بيجاد بغضب وراكب العربيه معاه..

ركب عمران وهو لابس النظاره بتاعته وهو بيقول.

ماتقلقش كل حاجه تحت السيطره انا موصي ناس تجيب لي كل اخبار اللي اسمه عمر ده وهنشوف هنعمل ايه بعد كده.. 

بيجاد.

طيب اطلع على بيت همس.

عمران.

انا قلت من شويه  ايه.. هو انا كنت بكلم نفسي. 

بيجاد..

مش هعمل حاجه هنقف تحت البيت شويه بس.

هز عمران راسه و مشي بالعربيه.. 

❈-❈-❈

في بيت عيله الدمنهوري كان قاعد زياد على السفره ومن الجانب التاني كانت قاعده عشق بصت بابتسامه للنور اللي كانت قاعده بتبص في طبقها بحزن وقالت. 

كويس انك جيتي تقعدي معانا يا نور انا مبسوطه قوي صدقيني انك معانا هنا احسن بكتير من انك تقعدي عند عمران. 

ردت نور بتبرير.

انا كنت قاعده عند عمران عشان ماما اسماء. 

ردت عشق بابتسامه وقالت..

اه ما انا عارفه بس القعده هنا غير.... هنا هتلاقي بنات من سنك هتتكلمي وتحكي معاهم....

اما هناك مافيش غير ماما اسماء وعمران واكيد مابيبقاش في البيت على طول فهتتكلمي مع مين. 

ابتسمت نور وقالت.

ايوه يا عشق عندك حق ما انا عشان كده جيت اقعد معاكم شويه. 

عشق بابتسامه وهي بتسقف بايديها. 

ايوه كده جهزي نفسك بقى عشان هنخرج بعد الفطار عندي ليك شويه مشاوير هيعجبوكي قوي قوي.. 

رفع زياد عيونه وبص لعشق اللي كانت بتتكلم بسعاده واول عيونها جت على زياد بلعت ريقها بخوف وهي بتقول.

يعني بعد اذن ابيه زياد لو ينفع نخرج. 

بصلها زياد بغيظ ردت عشق.

ايه مش هينفع يعني.

قام زياد وهو بيقول.

خمس دقائق ياعشق والاقيك في المكتب.

قال كلامه وقام من على السفره وحاطط ايديه في جابه ودخل اوضه المكتب. 

عشق بحزن وصدمه..

يا ليلتك السوداء يا عشق يا اللي صغيره على الموت يا عشق..

انا عارفه ان ايامي في البيت ده معدوده ومش هيحصل كويس..

انا عارفه لساني مابيبطلش كلام وكله كلام فاضي بس والله طيبه وخساره فيا اللي هيحصل.. 

بصت لها نور وهي بتقول باستغراب. 

مالك يا عشق. 

قامت عشق من على السفره وهي بتقول.

مافيش هروح اشوف ابيه زياد عايز ايه.. 

قامت عشق ودخلت اوضه المكتب.. 

اما نور فقالت بسخريه... 

كلهم زي بعض زياد زي عمران زي بيجاد مافيش حد كويس في العيله دي مافيش حد بيحس بالتاني.

❈-❈-❈

اما عند همس اللي كانت نايمه.. 

اتفاجات بالباب بيخبط بدري قامت باستغراب وقام عمر اللي فتح الباب وكانت صدمه كبيره..

همس عمر بصدمه.

هايدي. 

دخلت هايدي وهي بتقول. 

مالك يا عمر وحشتني قلت اجي اشوفك وخصوصا السنيوره بقت عارفه ان احنا مع بعض يعني مش هتفرق.. 

اتعرفت عليها همس وحست بالغضب الشديد دخلت بسرعه اوضتها وقفلت الباب قرب عمر من هايدي وهو بيمسك ايديها بغضب وقال.

مش قلت لك همس مالكيش دعوه بيها خالص انتي شكلك كده ناويه على موتك اليومين دول. 

شدت هايدي ايديها من عمر وهي بتقول. 

الحق عليا اني حبيت اجي اشوفك اديلي كتير ماشفتكش من ساعه ما السنيوره سابت البيت واديها رجعت وهي عارفه بعلاقتنا ايه المانع اني اجي اشوفك. 

رد عليها عمر بغضب...

المانع انها مراتي يا ست هانم اما انتي واحده رخيصه ماينفعش تيجي عندي البيت يلا اخرجي مش عايزه اشوف وشك انتي فاهمه.. 

قال كلامه وفتح الباب بصيت له هايدي وهي بتقول.. 

طيب لعلمك بقى انا حامل ولو ما اتجوزتنيش مش هسكت يا عمر بيه هستناك تيجي لي النهارده الساعه 10 انت فاهم.. 

قالت كلامها ومشيت دخل عمر بعد مده الاوضه كانت همس بتلم هدومها قرب منها وهو بيقول. 

جرى ايه كل ما يحصل حاجه الاقيك بتلم هدومك وتمشي هو انتي فاكره انك بسهوله كده هسيبك تخرجي من البيت يا هانم. 

ردت همس بغضب. 

وخلاص مش قادره اقعد معاك اكتر من كده يا اخي اعمل اللي تعمله بس مش هقعد معك..

ابتسم عمر بسخريه وقعد على الكرسي وهو بيقول.

وبرده هعمل اللي هعمله ومش هتمشي يا همس وريني هتعملي ايه..... هتجيبي اخوكي الحلاوه يقف قصادي مثلا.. اللي بقرشين هيقول ما اعرفهاش

ردت عليه همس بغضب رغم دموعها اللي اتكونت في عينيها.. 

لا يا عمر بيه مش كل الناس بتشتريها بفلوسك همشي وهبلغ عنك لو قربت مني ولا من ابني وانت فاهم.. 

قالت كلامها واخدت شنطتها وكانت رايحه ناحيه باب الاوضه عشان تروح تجيب ابنها من الاوضه التانيه..

اتفاجئت بعمر اللي قام وشدها من ذراعها زقها وقعت همس على الارض و اتخبط جايبينها في حرف السرير

عمر بغضب.

قلت لك مش هتمشي انتي ليه مش بتفهمي ليه بتحاولي دايما تبعدي عني..

قال كلامه وقرب وهو بيقول...

ردي عليا يا هانم..

مالقيش منها رد قرب منها... ماسكها من كتفها اتفاجئ براسها اللي بينزل منها دم كتير اتصدم وهو بيهمس.. 

همس همس فوقي ايه اللي حصل... 

في الوقت ده دخل زين على اصواتهم اتفاجئ بامه على الارض والدم في كل مكان زين ببكاء..

ماما ايه اللي حصل يا بابا. 

شد عمر زين وهو لسه في حاله صدمه وقال.

مش عايز ولا كلمه تخرس خالص هقوم اشيل ماما ونروح بالعربيه المستشفى يلا تعالى معايا.. 

قال كلامه وشال همس و زين  نزل معاه ركبوا العربيه في خلال دقائق كانت مشيت بيهم... 

في نفس الوقت عربيه عمران بيجاد كانت واقفه تحت بيت همس واتفاجئوا باللي حصل.. 

بيجاد بقلق ورعب عليها.. 

اطلع بسرعه يا عمران وراهم اطلع...