رواية النصيب الفصل السادس والعشرون 26 بقلم رحاب القاضي
رواية النصيب الفصل السادس والعشرون 26 هى رواية من كتابة رحاب القاضي رواية النصيب الفصل السادس والعشرون 26 صدر لاول مرة على موقع التواصل الاجتماعى فيسبوك رواية النصيب الفصل السادس والعشرون 26 حقق تفاعل كبير على الفيسبوك لذلك سنعرض لكم رواية النصيب الفصل السادس والعشرون 26
رواية النصيب الفصل السادس والعشرون 26
أتذكُر العهد الذي لي قُلتهُ؟
الغدرُ بين قلوبِنا لا يُقبَلُ..
ها أنتَ أهملتَ الفؤادَ وخُنتهُ
للهِ ذنبُكَ أمثلُ قلبي يُهملُ؟!!
ــــــــــــــــــــــــــــــــــــــــــــــــــــــــــــــــــــــــــ
_ في شقة نسمه وسعيد كانت لابسه حجابها وطالعه من البيت وقبل ما تفتح الباب دخل سعيد وكله غضب وهي اول ما شافته بالشكل ده خافت ورجعت كام خطوه لورا وقالت..
نسمه
سعيد.. انت ايه اللي جابك بدري كده؟
سعيد بحده
رايحه فين ريحاله عشان اتأخر عليكي ما هو الخروف جوزك مش هياخد باله يا بنت ال&*&*&*..
_قال كلامه العنيف ليها وضربها بالقلم بكل قوته لدرجة انها وقعت علي الارض وهي حاطه ايدها علي وشها وبتبصله بصدمه وخوف..
نسمه
والله العظيم انا مظلومه وانت فاهم غلط انا هقولك كل حااجه..
سعيد بحده وغضب
هو انا لسه هسمعك ده انا هقتلك واشرب من دمك...
_وفضل يضرب فيها ويشتمها باشبع الكلام وهي بتصرخ بكل قوتها عشان حد ينقذها وفي الوقت ده طلعت ام محمد من شقتها وبصت لفووق بشماااته وقالت بحقد..
ام محمد
الحمد لله والبت نعمه في بيت اهلها وما فيش حد يدافع عنك يا ست هانم نسمه، اديها يا واد يا سعيد برد ناري منها اللي اخدتك مني دي وفاكره اني مش هقدر اخليها تمشي من هنا وما تفكرش ترجع تاني، بس احسن الواد يعمل فيها حاجه ولا تموت في ايده..
ودخلت شقتها بسرعه واتصلت بمحمد اللي رد عليها وقال
ايوه يا اما في ايه؟
ام محمد
الحق اخوك ما اعرفش ماله ماسك في مرااته وعادمها العافيه واختها مش هنا..
محمد بقلق
ليه عملتي ايه يا اما يخلي سعيد يعمل كده في مراته؟..
ام محمد
يقطعني يا ابني ان كنت عملت حاااجه انا اهو قاااعده في شقتي كافيه خيري شري، والحق عليا اني بكلمك واقولك عشان تيجي تلحق البنت...
محمد
طيب اقفلي يا اما انا خلاص داخل علي البيت اهو وربنا يستر منك ومن ابنك..
_وقفلت معاه ومحمد اول ما وصل طلع لفوووق علي طول وفضل يخبط علي الباب بتاع شقة سعيد جامد ومعاه امه اللي طلعت وهي بتتصنع الخوف والقلق وكان صوت نسمه اختفي خااالص..
محمد
افتح. يا سعيد ما ينفعش اللي انت بتعمله ده؟
ام محمد
افتح يا حبيبي والكلام بالعقل ونشوف هي عملت ايه واللي انكسر يتصلح..
_بصلها محمد بغيظ بس قبل ما يرد. عليها بأي حاجه الباب اتفتح وكان سعيد واقف وعيونه كلها غضب ودموع..
محمد
نسمه فين عملت ايه في البت؟..
_ما ردش عليه سعيد فزقه محمد ودخل ودخلت ورااه امه واتصدمو اول ما لقيو نسمه واقعه علي الارض ووشها كله كدمات ودم وفاقده الوعي....
ــــــــــ #بقلم_الكاتبه_رحاب_القاضي ــــــــ
_وفي بيت فتحي ابو نسمه كانت نعمه قااعده هناااك مع امها اللي قالتلها بقلق...
ناديه
ما تكلمي اختك تشوفيها اتأخرت كده ليه، مش قالتلك جايه من بدري..
نعمه
قالت هتنزل الاول تقول لجوزها انها جايه عشان واخد منها الموبيل ومش هتعرف تكلمه ولا انا حتي اكلمها...
ناديه
انا مش فاهمه موضوع زي ده اختك تسكت ليه عليه لحد جوزها ما يشك فيها، مالهاش اهل كانت جاات واتكلمت واحنا كنا هنصدقها وجوزها اكيد كان هيصدقها ويجيبلها حقها..
نعمه
يا ماما نسمه غلبااانه مش زي البنات اللي بتلف وتدور، وكانت خايفه من تهديد اللي ما يتسمي ده ليها..
ناديه بقلق
تيجي بس ونكلم ابوكي ونجيب سعيد ونخلص الموضوع ده، هات العواقب سليمه يااارب...
رن موبيل نعمه في الوقت ده فقالت لابنها اللي معاه الموبيل
واد يا كريم هات الموبيل..
كريم
لا بلعب..
نعمه بحده
ياد هات الموبيل لو كان ابوك وما ردتش عليه هيطين عيشتي..
كريم بغيظ
يووووه خدي اهوو ده انتي زهقتيني..
ناديه بسخريه
الله علي التربيه يا روح امك..
نعمه بغيظ
الحق مش عليه هو بيتكلم زي ما ابوه بيكلمني..
وردت علي محمد وقالت
ايه يا محمد..
محمد
انتي فين؟
نعمه
ما انا قولتلك هاخد العيال ورايحه عند امي..
محمد
ابوكي عندك؟
نعمه
لا في شغله، ليه بس بتسأل عليه في حاااجه ولا ايه؟..
محمد رد عليها بنبره حزينه وقال
طيب عدي علي امي سيبي معاها العيال وهاتي امك وكلمي ابوكي وتعالي علي المستشفي اللي في أخر الحي..
نعمه بخوف
مستشفي ليه انت كويس؟
محمد
اختك تعبت شويه وفي المستشفي..
نعمه بخوف
نسمه مالها نسمه يا محمد اخوك عمل فيها ايه؟.
ناديه بدموع
مالها اختك. يا نعمه، بنتي مالها عمل فيها ايه سعيد؟..
محمد بجمود
اخلصي يا نعمه واعملي اللي قولتلك عليه وتعالو يلااا وهنا هتعرفو كل حاجه..
قال كلامه وقفل معاها وناديه سألتها بخوف وقلق
مالها اختك يا نعمه ردي عليا اختك. فيها ايه؟..
نعمه بدموع
مش عارفه والله يا ماما محمد بيقولي اودي العيال عند امه ونروح انا وانتي المستشفي ونقول لابويا يجي ورانا هو بيقول انها تعبااانه..
ناديه بخوف
ودي العيال عند. سميره جارتنا ويلا بينا بسرعه نشوف اختك وكلمي ابوكي يلااا...
ــــــــــ #بقلم_الكاتبه_رحاب_القاضي ــــــــ
_وقدام بيت كارم اللي فيه شهد ونتالي كان واقف أسر مستني خروج نتالي، وبعيد عنه بشويه كان واقف اكرم ورحمه عند عربيته، وفعلا بعد كام دقيقه طلعت نتالي مع واحد من رجالة كارم واول ما شااافت أسر واقف قدااامها ابتسمت بدموع ولهفه واشتياااق وجريت عليه بسرعه وحضنته وقالت ببكاء..
نتالي
انا ما كنتش متخيله اني هشووفك تاني..
بادلها أسر الحضن وابتسم بدموع وقال
انا مش عارف اصدق انك لسه عايشه اصلا وفي حضني ومعايا دلوقتي..
بعدت عنه شويه وقالت
بس انا من يوم الحادثه لحد. النهارده وانا مصدقه ومتأكده انك هتنقذني منه..
أسر بص لرجالة كارم وسألها
كان معاكي حد. جوه؟..
_بصتله بضيق وهي عارفه انه بيسأل علي شهد وردت عليه بخبث وحقد وقالت..
نتالي
حد. زي مين؟
أسر
بنت. اسمها شهد؟
نتالي
لا ما كانش حد غيري جوه مين دي يا أسر؟..
اتنهد أسر بضيق وقال
خلاص تعالي هنمشي يلااا..
_وعند رحمه واكرم في الوقت ده كانت واقفه رحمه وهي بتبص لأسر ونتالي بغيظ واكرم قالها بقلق..
اكرم
شهد ما طلعتش..
رحمه بدموع
هتطلع ازاي وهو ما اختار انها تفضل عندهم وينقذ البت دي..
اكرم
اكيد هو هيعرف يتصرف يا رحمه..
جه أسر ومعاه نتالي وقال
يلا بينا هنوصلكم وانتي يا رحمه روحي بيتكم وانا هشوف موضوع الفلوس ده عشان شهد..
رحمه بحده
شهد هو انت لسه فااكر شهد ده انا افتكرتك نسيتها..
أسر بحده
اقسم. بالله انا اللي فيغ مكفيني يعني مش ناقص كلامك ده خالص..
رحمه بعصبيه
لا انا اتكلم برااحتي انت اللي مالكش دعوه بشهد تاني وانا بقي هعرف اخلص صاحبتي من الورطه اللي هي فيها بسببك، عشان لو انت راااجل بجد ما كنتش تتخلي عن مراتك يا عرة الرجاله...
قالت كلامها ومشيت واكرم قال لأسر
انا هروح مع رحمه مش هينفع اسيبها لوحدها..
أسر
ماشي يا اكرم وما تخليهاش تعمل اي حركه غبيه انا هعرف ارجع مراتي كويس..
اكرم بضيق
ان شاء الله بعد اذنك...
_مشي أكرم وركب أسر عربيته ومعاه نتالي اللي كانت مدايقه من اهتمام أسر بشهد وكلامه عنها انها مرااته، وقالتله بحزن..
نتالي
انت اتجوزت يا أسر؟
أسر بضيق
بعدين يا نتالي هفهمك كل حاجه..
نتالي بدموع
عايزه اعرف بس انت اتجوزت بجد حبيت واحده غيري يعني؟
أسر بنفاذ صبر
والله ما وقته يا نتالي بعدين هنتكلم وهفهمك كل حااجه، هوديكي عند هاله اختي تقعدي معاها لحد ما اخلص الموضوع بتاع فايز ده خالص..
_قال كلامه واخد عربيته ومشي وعند اكرم ورحمه كانت واقفه عند العياااده بتاعت ادهم وقالها أكرم بحده..
اكرم
استني يا رحمه ماله الراااجل ده بشهد؟
رحمه بدموع
هو ده اللي هيسااعدها لانه بيحبها بجد الراجل ده لحد النهارده بيكلمني عشان يطمن عليها، هو ليه معارف وهيسااعدها..
_ودخلو فعلا عند ادهم اللي استقبلهم كويس وقال بهدوء..
ادهم
خير في حاجه يعني جاين فجأه كده والعياده وسط. ما انا بشتغل قلقتوني بصراااحه؟
بص أكرم لرحمه باحراج وهي قالت بخوف
شهد اتخطفت..
ادهم بصدمه
نعممم ازاي يعني اتخطفت ومين خطفها، اهلها صح؟
رحمه
لا مشاكل مع جوزها وهو اتخلي عنها وسابها..
اكرم
لا لا بلاش ظلم هو قال هيتصرف والموضوع غصب عنه..
أدهم
هو ايه اللي غصب عنه يعرض حياتها للخطر وكمان يتخلي عنها، انتو تعرفو مين اللي خطفها؟..
بصت رحمه لاكرم وقالت
ايوه نعرف واكرم يعرف شوية تفاصيل عنهم كمان..
ادهم
تمام انا اعرف حد في الدخليه قريبي ومهم جدا، هعتذر بس للمرضي بره وهروح معاكم علي طول ومش هسكت غير لما شهد تبقي في امان..
رحمه بدموع
ياريت يا دكتور ادهم، بجد شهد مالهاش حد قولت لباباها قالي جوزها يتصرف ما حدش راضي يقف جنبيها ولا يساعدها..
ادهم
لو الدنيا كلها سابتها انا معاها ومش هتخلي عنها تاني ولا هخلي حاجه. تحصلها...
ــــــــــ #بقلم_الكاتبه_رحاب_القاضي ــــــــ
_وفي المستشفي وصل فتحي ابو نسمه وكانت نعمه وناديه قاعدين. جنب محمد. مستنين حد. يطمنهم علي نسمه..
فتحي
في ايه. مالها. نسمه حصلها ايه؟..
بص محمد للارض بأحرااج وضيق وناديه قالت ببكاء
ضيعو البت يا فتحي جوزها كان هيموتها ظلم...
فتحي
انا مش فاهم حاجه عملت ايه. بنتي يا محمد عشان اخوك يعمل فيها كده..
ناديه بغضب
انت. لسه بتسأله دلوقتي حالا تبلغ عنه ده. كان. هيموتها وبنتي ما عملتش حااااجه والله العظيم ما عملت حاجه يا فتحي دي اغلب من الغلب طول عمرها..
محمد
طيب خلينا الاول نطمن علي نسمه ونشوف بعدين الموضوع ده..
زعق فيه فتحي وقال بحده
اسمع يا محمد انا حذرت اخوك وقولتله بنتي لو غلطت يجبهالي اربيها انما يعمل فيها كده وفاكرني اسكت ده وغلاوتها هي واختها عندي لاسففه تراب الارض سواء بنتي غلطاانه او مش غلطااانه..
وبص لنعمه وكمل كلامه وقال
وانتي تقعدي ببنتك عندي وولاده خليهم ليه لما نشوف اخرتها مع العيله دي ايه..
جات نعمه تتكلم بس محمد شاورلها تسكت وقال
اللي تشوفه يا عم فتحي وحق بنتك هيرجع عشان نسمه برضو اختي وما ارضلهاااش بالظلم..
فتحي بغضب
اتكل علي الله من هنا يا محمد وكتر الف خيركم لحد كده انت واخوك عرفتو فعلا تصونو الامانه..
نعمه
يا بابا هو محمد ماله بس؟
فتحي بحده
ولا كلمه يا بت انتي اخرسي خالص ما هي دي كانت مشاورتك من الاول...
محمد
خلاص يا نعمه خليكي معاهم هنا...
وقرب من نعمه وقال بصوت واطي
انا همشي وهاجي تاني يكون ابوكي بقي هادي شويه ولو احتاجتو اي حاجه كلميني..
نعمه
حاضر يا محمد..
_مشي محمد وبعد شويه طلع الدكتور من عند نسمه وقاله فتحي بخوف..
فتحي
طمني يا دكتور بنتي اللي جوه دي نسمه مالها ايه اللي حصلها؟
الدكتور
يا حج بنتك ربنا كتبلها عمر جديد مين اللي عمل فيها كده؟..
ناديه ببكاء
جوزها اللهي ربنا ينتقم منه..
فتحي بدموع
يعني حصلها ايه برضو انا مش فاهم حاجه عملو فيها ايه؟..
الدكتور بهدوء
هو حج ضاربها بشكل عنيف اووي لدرجة ان جالها نزيف في دماغها والحمد. لله وقفناه وايدها اتكسرت ده غير كسر في جسمها تاني وكدمات كتير انا من رأيي تبلغ عنه ده كان هيقتلها...
فتحي بدموع
ان شاء الله خير يا دكتور اطمن علي بنتي واللي فيه الخير يقدمه ربنا..
ــــــــــ #بقلم_الكاتبه_رحاب_القاضي ــــــــ
_وفي الوقت ده في بيت صابر ابو شهد كان قااعد بيتغدي وقعدت جنبيه فاطمه وقالتله..
فاطمه
ليك نفس تاكل هي مش البت رحمه قالت ان بنتنا مخطوفه..
صابر
واعمل ايه انا جوزها معاها يتصرف هو انا هشيل همها وهي في وشي وبعد ما تمشي ما كفايه باقي اخواتها اللي مطلعين عيني..
فاطمه
يا صابر البت مالهاش غيرنا لو جوزها ما اهتمش بيها طيب تروح مننا البت..
صابر
ما انا كلمت جوزها ما ردش عليا، اصبري وهو هيتصرف احنا هنوصله يعني ولا هنعمل اللي هو ما يقدرش يعمله...
فاطمه بدموع
استغفر الله العظيم يارب طيب نروح نطمن عليها..
صابر
بعدين تبقي هي تيجي حلي بقي عن نفوخي مش ناقص نكد انا...
فاطمه
طيب هات تلفونك انا هكلم جوزها ولا البت رحمه اطمن علي البت..
صابر
يوووه بقي ما تخرسي خالص يا وليه انا مش ناقص قرف..
فاطمه ببكاء
روح يا شيخ منك لله يعني لا راضي تجيبلي موبيل ولا مخليني اخد. موبيلك، تدوق من اللي في قلبي يا صابر...
_قالت كلامها وسابته وقامت وما كانتش عارفه هتتصرف ازاي وتطمن علي بنتها
ــــــــــ #بقلم_الكاتبه_رحاب_القاضي ــــــــ
_وفي الوقت ده في بيت الفيومي كان قاااعد أسر في اوضته وبيحاول يتواصل مع كارم بس مش عارف، ودخلت عنده هاله في الوقت ده زهي متعصبه جدا وقالت..
هاله
انت ايه اللي عملته ده، اتخليت عن شهد سيبتلهم مراتك يا أسر وعشان مين عشان واحده كانت علاقتك.بيها كلها حرام وبتعصيك علي اهلك..
أسر بجمود
هعرف ارجعها هدفع الفلوس لكارم وهترجع..
هاله بحده
وليه تعمل كده من الاول مين نتالي دي، اقسم بالله انت شهد خساره فيك ولما هترجع انا اول واحده. هساعدها تبعد عنك وعن القرف اللي انت عايش فيه ده..
أسر بحده
خلصتي كلامك اطلعي بره بقي ومالكيش دعوه بنتالي..
هاله بحده
وانا مش عايزه البنت دي تقعد في بيتي مش عايزه شهد لما ترجع وتقعد معايا هنا تشوفها..
أسر بحده
وده بيتي انا كمان وليا فيه اكتر منك وانا اللي اقرر مين يقعد ومين يمشي....
_رن موبيل أسر في الوقت ده برقم كارم فرد عليه بسرعه وقال...
أسر
ايوه يا كارم مراتي فين؟
كارم
مالكش حق يا حبيبي تسأل عليها فايز كسب الجايزه واخد كل حاجه خلاص وانت اخدت حبيبتك القديمه وهو في مقابل انه يفوز هياخد شهد..
أسر بغضب
يعنييي ايه انت ليك عندي تاخد فلوسك وترجعلي مراااتي..
كارم
لا لا انا مش همشي علي مزاجك يا حبيبي، اللعبه دي لعبتي انا وهتمشي لمصلحتي انا، فايز مش بس كسب السبااق ده كمان كسب قلبي وهيخلصلي شغل مهم جدا وانت اكيد عارف شغلي كويس وفي المقابل هياخد شهد ويساافر وانا وافقت..
أسر بحده
اقسم بالله اقتلك واشرب من دمك انت وهو لو فكرت بس يا كارم تخلي فايز يشوفها حتي..
كارم
اممم مش حلو الكلام ده انا ما بتهددش واعلي ما فخيلك اركبه باي باي..
_قال كلامه وقفل الموبيل في وش أسر اللي كان هيتجنن وهاله سألته بخوف وقالت..
هاله
في ايه وشهد فين؟..
_ما ردش عليها أسر وكلم ياسر اللي كان بيراقب فايز بره مصر واول ما رد عليه قاله..
أسر
ايوه يا ياسر اسمعني كويس عايزك تعرفلي فين مكان فايز وتجهز شوية رجاله حلوين الراجل ده مش هيصبح عليه صبح النهارده..
ياسر
انا ما اقدرش افيدك المره دي لان فايز عند كارم سلطان وانت عارف يعني ايه كارم سلطان..
أسر
عنده فين بالظبط؟
ياسر
في الفيلا اللي انت كنت عندها النهارده بعد السباااق..
أسر
طيب قولي انت تعرف شغل كارم مع مين؟
ياسر
اعرف كل حاجه عنه..
أسر بخبث
حلو اووي اسمع بقي الكلام اللي هقولهولك وتنفذه بالحرف الواحد...
ــــــــــ #بقلم_الكاتبه_رحاب_القاضي ــــــــ
_وفي الوقت ده عند. شهد كانت قااعده في العربيه جنب كارم وعيونها كلها دموع وخوف بعد ما سمعت اللي قاله لأسر، وكارم بصلها بحزن وقال..
كارم
انا ماليش ذنب في اللي انتي فيه ده، جوزك. السبب بس خلاص انا هخلصك منه..
بصتله شهد بخوف وقالت
انت هتعمل ايه؟
كارم
هخليكي معايا لحد ما اخلص شغلي وهسيبك ما تقلقيش مش هخلي فايز ياخدك بس انا لازم اخده علي قد عقله عشان يخلصلي شغلي..
شهد بحده
هو انت ليه كده ضحكت علي أسر ودلوقتي علي الراجل التاني ده، اكيد طبعا انا مش هصدقك دلوقتي..
كارم
بس انا هساعدك..
شهد
وانا ليه اصدقك وانت كداب، الله واعلم بتقولي كده دلوقتي وبتخطط لايه من ورايا..
كارم ابتسم وقال
ايه الجراءه دي انا ما حدش يقدر يغلط فيا في وشي كده، مع ان شكلك كيوت ما يقولش انك جريئه..
شهد بسخريه
انا مش بغلط فيك انا بوصفك وبقولك اللي حاسه بيه..
كارم
طيب انتي عايزه ايه دلوقتي اسيبك تمشي ولا اكلم أسر يجي ياخدك؟
شهد بحزن
لا ولو هتخليني امشي سيبني امشي لوحدي انا مش عايزااه..
كارم
هو اصلا ما يستهلكيش..
شهد. بدموع
معاك. حق انا من الاول كنت عارفه انه بيضحك عليا وانا اللي استاهل انا اللي غبيه وصدقته وفكرت ان واحد زيه ممكن. يحبني ونعيش حياه زوجيه سعيده..
كارم بسخريه
ما فيش. حاجه اسمها حيااه سعيده، كنتي بتسأليني ليه بكدب وبضحك علي كل اللي حواليا الاجابه اللي لازم تبقي مصدقاها ديما لو عايزه تبقي سعيده هي انك لو ما خنتيش هتتخاني ما حدش يستاهل نديله الامان، هل انتي حسيتي بالامان مع أسر ولا كنتي خايفه؟..
شهد بدموع
حسيت بالامان معاه بس كنت برضو خايفه وقلقانه ومش مصدقااه، بس كنت بكدب نفسي..
كارم
انا هسيبك تمشي ومش هأذيكي ما تستاهليش تتأذي.
شهد ببكاء
قولهم بقي كده اللي مش بيعملو حاجه غير انهم يأذوني..
كارم
لازم انتي اللي تقولي وانتي قويه مش ضعيفه، تعرفي اني بخااف اووي كمان..
شهد بصتله بعدم فهم وقالت
انت بتخااف وبتخاف من مين؟
كارم
من اعدائي ما انا عندي اعدااء كتير وببقي مرعوب منهم بس عمري ما بينت خوفي لحد ديما ببان قدامهم مش فارق معايا حاجه ومش هخسر حاجه واللي بيبقي كده بيتخاف منه، بلاش تحسسي حد. انك. ضعيفه وانك. محتاجه وجوده عشان تبقي بامان امانك دماغك وبس لو فضلتي غبيه زي ما بتقولي يبقي عمرك ما هتلاقي السعاده وهتفضلي تتأذي، يمكن. صدفة اننا نتاقبل دي عشان اديكي درس مهم. في الحيااه تبقي بسببه قويه وتتخلي عن ضعفك..
بصتله شهد بأهتمام وقالت
وانا هاخد الدرس ده. من مجرم. زيك؟
كارم بصلها بأهتمام وقال
تفتكري برضو انا اتولدت مجرم ؟؟..
شهد بجديه
اكيد. لا؟
كارم بنبره حزينه.
كنت برئ زيك. كده واكتر بس الدنيا والقسوه بيغيرو..
شهد
مش مبرر انك. تبقي مجرم..
كارم ابتسم. بسخريه وقال
صدقيني مش فارقه يبقي لحالي ده. تبرير ولا لا، بس انا بقيت فيه ومش هينفع اسيبه لحد ما اموت...
شهد
انت هتوديني فين؟
كارم
مكان. تاني بعيد عن عيون فايز مش عايزه ياذيكي بجد..
شهد بهدوء
شكرا انك هتعمل كده، ولا شكرا ايه انت اصلا خاطفني..
_ابتسم كارم بهدوء واخدها لشقه بسيطه في مكان شبه شعبي وكانت فيه ست كبيره قااعده هنااك وقالها...
كارم
دي ام واحد كان شغال عندي قتلته من غير ما اقصد وو..
شهد بصدمه
عملتله ايه؟..
كارم بصوت واطي
بقول قتلته وما تقوليش قدام الست دي عشان انا بكفر عن ذنبي..
شهد
انت عايز تجنني ولا انت مجنون اصلا؟
كارم
اقعدي معاها وانا هبقي متابعك ما تخافيش لما الموضوع بتاعي يخلص هوصلك لحد بيت اهلك..
شهد بقلق
طيب ما تضحك علي فايز ده وقوله اني معاك وخليني امشي والنبي...
كارم
انتي هتاخدي عليا اقعدي هنا بقي وما تخلنيش ازعل..
شهد
اللهي يارب تتفلق..
كارم
عيب تغلطي في واحد قد. ابوكي عييييب يا بيبي..
_قال كلامه وسابهم وطلع بره الشقه وكان في واحد من رجالته واقف بره الباب، وقامت الست من علي الكنبه وقالت..
نعيمه
كارم بيه بيقولي انك غاليه عنده واخد بالي منك، وانا عايشه من خيره..
شهد
اممم ما انتي ما تعرفيش اللي فيها..
نعيمه
طيب يلا يا حلوه غيري الهدوم الغاليه النضيفه دي والبسي عبايه من بتوعي اللي جوه وامسحيلي الارض دي.
شهد بخوف
نعم اعمل ايه؟
نعيمه
اخلصي يا بت ده انا ما صدقت حد. يجي يساعدني اليومين دول وادخلي برضو اغسلي الهدوم اللي جوه دي وانشريها يلاا اوام ما تبقيش لخمه كده..
شهد بخوف
حاضر.. ومنك لله يا أسر علي البهدله اللي انا فيها دي..
ــــــــــ #بقلم_الكاتبه_رحاب_القاضي ــــــــ
_وفي بيت قديم في مكان مقطوع كان هاني قااعد علي الارض ومتكتف ومحمد واقف قداامه ومعاه تلات شباب شكلهم يخوف..
محمد
بقولكم ايه يا شباب قبل ما تكسرو عضمه انا عايزكم تروحو تولعو في المحل بتاعه..
هاني بخوف
لا يا محمد ابوووس ايدك. ده اكل عيشي انا واهلي مالناش حاجه غيره المحل ده..
محمد
طيب اتكلم وقول الحقيقه وانا بقول الحقيقه اهو عشان ورحمة ابويا لو قولت حاجه غيرها مش هديك فرصه تانيه وهخليك تندم علي اللحظه اللي فكرت فيها تلعب بأخويا وتوقع بينه وبين مراااته..
هاني بدموع وخوف
هقولك كل حاااجه امك. هي السبب هي اللي جات عندي المحل وطلبت مني اعمل كده..
محمد بصدمه
نعمم؟؟ ازاي يعني امي السبب وامي تعمل حاجه زي دي ليه، انت هتستهبل يا روح امك...
هاني
والله العظيم هو ده اللي حصل هي كانت عايزه اخووك. يطلق مرااته وخلتني انا اقرب من نسمه واهددها وفي نفس الوقت هي بطريقتها هتخلي سعيد يشك فينا ان نسمه بتخونه معايا يعني..
محمد
يعني كلام نسمه صح بقي انت كنت بتهددها، بس امي هتعمل كده ليه يلا ده شرف ابنها..
هاني
افتح موبيلي واسمع كل المكالمات اللي بيني وبين امك وانت هتعرف الحقيقه انا مسجل كل حااجه..
بص محمد بأحرااج للشباب اللي واقفين وقال
مدام دي الحقيقه يبقي ما تقولهاش ليا انا، تروح تقولها في القسم وتقول انك انت السبب ان كان في واحد هيموت مراته بسببك.. بسببك انت وامي..
هاني بخوف
ابوس ايدك القسم لا انا كده مستقبلي هيضيع..
محمد بغضب
وانت ما خوفتش ليه وانت بتضيع في سمعة واحده مالهااش اي ذنب ان بيتها يتخرب وحياتها تدمر بسببك، ما خوفتش ليه وانت بتسمع كلام امي..
هاني بدموع
عشان عايز فلوس ما تبص لحالي انا عامل ازاي كل الشباب اللي في سني واصغر مني اتجوزو وفاتحين بيوت وانا يدوب مكفي مصاريفي ومصاريف اهلي بالعافيه، ولما جات المصلحه دي من ناحية امك الشيطان لعب في دماغي وقولت القرشين اللي هاخدهم منها هوسع بيهم المحل واكبر شغلي شويه..
محمد بحده
انت دمرت سمعت البت، خربت حياتها وحياة اخويا وانت واي حد كان السبب في اللي حصل ده هيتحاسب وهتروح تعترف باللي عملته في القسم وابو نسمه هيعمل محضر فيك وفي امي وفي اخويا واللي ليه حق يااخده..
ــــــــــ #بقلم_الكاتبه_رحاب_القاضي ــــــــ
_وفي بيت أسر الفيومي كان هناااك ادهم واكرم ومعاهم رحمه اللي موبيلها بيرن برقم امها وعماله تقفل في وشها..
اسر
انا مش فاهم برضو انتو جايين عايزين ايه، والدكتور جاي هنا ليه الموضوع ده يخصك في ايه اصلا..
ادهم بحده
اللي يخصني اطمن علي شهد وانها تبقي كويسه
أسر بحده
شهد دي تبقي مراااتي وانا هعرف احميها كويس..
رحمه بسخريه
لا ما هو واضح يا أسر انك هتعرف تحميها بدليل انها لسه مخطوفه وانت اختارت تنقذ البت بتاعتك وما فرقش معاك شهد فين ولا بيحصل فيها ايه..
اكرم
يا جماعه لو سمحتو الموضوع مش خنااقه ومش بنعلي علي بعض مين الاحسن دلوقتي، يا أسر احنا اهم حااجه عندنا نلاقي شهد ونساعدها ودكتور ادهم جابلنا ناس مهمه تساعدنا فاضل بس نعرف كام معلومه عن كارم ده عشان نعرف نوصله...
ادهم
مش عايزين منك غير رقم موبيله الشخصي مثلا اماكن بيكون فيها بحيث نراقبه ونشوف سجلات مكالماته ونعرف شهد فين..
رحمه بدموع
حرام عليك يا أسر شهد مش ناقصه بهدله عشان يحصل فيها كل ده..
ادهم
لو انت خايف عليها بجد ساعدني..
هاله
قولهم هو مش كارم ده بيكلمك وانت اكيد عارفله نمرة موبيل شخصيه..
أسر
تمام هديكم رقم موبيله الشخصي والاماكن اللي بيكون موجود فيها وكمان اعرف تفاصيل عن المهمه اللي هيعملها في مصر هنا وانه هيدخل كمية ممنوعات كبيره مصر...
رحمه بحده
انا قولت من الاول انت شكلك شمال وهتمرمط البت ما حدش صدقني..
أدهم
رحمه انتي مش هينفع تيجي معانا ممكن تستنينا هنا وانا هكلمك اطمنك..
اكرم بص لادهم بغيظ وقال
روحي بيتكم يا رحمه عشان مامتك اللي بتكلمك وانا اللي هبقي اطمنك وابلغك بكل حاجه علي طول
رحمه
ماشي يا اكرم حاضر..
قال ادهم بجمود لأسر
اتفضل حضرتك معانا عشان نشوف هنتصرف ازاي..
_مشي معاهم أسر وفضلت رحمه قااعده مع هاله اللي قالتلها...
هاله
انتي هتمشي علي طول..
رحمه.
ايوه وربنا يطمني علي شهد انا اليوم كله بره ولولا اني هروح اتنفخ من ماما ما كنتش همشي غير لما اطمن عليها، قوليلي بس البت اللي اخوكي انقذها وساب شهد مكانها قااعده فين؟
اتنهدت هاله بضيق وقالت
مرزوعه فووق زمان البنت دي كانت سبب بعده عن ماما وبابا وان أسر اتغير علينا وبقي شخص مستهتر ومهمل، ودلوقتي بسببها اخويا متورط مع مجرمين وبعد عن مراته اللي مالهاش غيره..
_في الوقت ده دخلت عندهم فااطمه ام شهد وقالت وهي بتبصلهم بتوتر وخوف..
فاطمه
مساء الخير..
رحمه
طنط فاطمه؟..
هاله
مين دي؟
رحمه
ازاي مش عرفاها دي ام شهد..
هاله
اه ما اتقبلنااش للاسف قبل كده اهلا وسهلا تعالي اتفضلي..
فاطمه بدموع
بنتي فين هي كويسه صح؟
هاله بحزن
ايوه أسر رااح يجيبها ان شاء الله هيرجع وهي معاه، وانا اسفه علي اللي بيحصل ده بس هي ظروف غصب عننا..
رحمه
طيب انا همشي بقي وما تقلقيش يا طنط فاطمه والله شهد هترجع بس هو عم صابر ما بلغش ليه؟
فاطمه بسخريه
عمك صابر مش فارق معاه بيقول جوزها يتصرف، يعني انتي لسه هتعرفيه يا رحمه..
رحمه بحزن
معاكي حق وشهد معاها ربنا اللي احسن من الكل، بعد اذنكم..
مشيت رحمه وهاله مسكت ايد. فاطمه وقالت
تعالي اتفضلي يا ام شهد معلش الظروف ما خلتنااش نتقابل في ظروف كويسه، انا هاله أخت أسر..
فاطمه مسحت دموعها وقالت
عرفاكي شهد حكتلي عليكي كتير انتي والاستاذ فؤاد جوزك بتحبكم اووي والله..
هاله ابتسمت بحزن وقالت
واحنا كمان بنحبها اووي شهد مش مرات اخويا وبس دي اختي الصغيره واحنا كلنا اهل، وما تقلقيش هترجع والله وهتبقي زي الفل..
فاطمه
هي ايه الحكايه طيب يا اختي وايه اللي حصل في البت؟
هاله بتوتر
مم مشاكل في الشغل مع جوزها فبيهددوه بمرااته..
فاطمه
استغفر الله العظيم يارب، هي البت شهد من يومها كده فرحتها مش كامله حسبي الله ونعم الوكيل فيهم..
هاله
خير ان شاء الله يا ام شهد خير..
ــــــــــ #بقلم_الكاتبه_رحاب_القاضي ــــــــ
_وفي شقة ام محمد كانت قاعده جنب سعيد وقدامهم اكل كتير وقالتله بسعاده وفرحه كبيره..
ام محمد
في داهيه اوعي تزعل نفسك عشانها وكويس وعملت كده راجل يا حبيب امك..
سعيد بنبره حزينه
انتي كان معاكي حق ياريتني سمعت كلامك يا اما من الاول..
دخل محمد عندهم في الوقت ده وقال بحده
كنت سمعت كلامها في ايه يا سعيد، وكنت عايز تعمل ايه اكتر من كده كنت عايز تقتل مرااتك..
سعيد بغضب
تستاهل دي خانتني العروسه الشريفه اللي انت قولتلي ما فيش منها اللي امنتها علي بيتي وعلي شرفي داست علي كل ده بالجزمه وطلع سبب رفضها ليا من الاول انها بتحبه هو..
محمد
كمل قول كمان كل اللي في نفسك وانتي يا ست الكل لو عندك. حاجه قوليها يلا..
ام محمد
جرا ايه يا واد هي مراتك لحقت تدافع عن اختها وتغيرك علينا، ما الحكايه باينه اهي زي عين الشمس البت كان بتغفلنا ومقرطسه اخوك، انا بنفسي شوفته وهو طالع عندها كتير وكنت بسكت واقول اما يعرف بنفسه عشان لو كنت اتكلمت ما كانش حد هيصدقني
محمد
ولا عمري هصدقك ولا هديكي الامان ياما، عارفين هاني فين دلوقتي.
اتوترت ام محمد وقالت
واحنا مالنا بيه ده خلاص سعيد هيطلق البت دي ونقفل الموضوع ده من غير فضايح..
محمد بخبث
لا لا مش هيتقغكفل غير لما الحقيقه تظهر واللي ليه حق ياخده، وهاني رااح القسم مع ابو نسمه وهيعترف بكل حاجه..
_اتحولت ملامح ام محمد من السعاده للخوف وسعيد سأله وقال بعدم. فهم..
سعيد
حقيقة ايه وهاني راح ليه القسم مع حمايا؟
محمد
الحقيقه اللي هي ان امك وهاني اتفقو يفرقو بينك وبين مراتك ويخلوك تشك فيها وفي نفس الوقت كان هاني بيهددها وبيبتزها عشان يااخد منها فلوس..
سعيد بصدمه
ايه اللي انت بتقوله ده يا محمد، ازاي يعني كان بيهددها ومتفق مع امي ازاي انا مش فاهم حاجه
محمد بحزن
والله ولا انا فاهم حاجه، ما هي ما توصلش لكده يا اما تشوهي سمعة البت وتخلينا نشك في اخلاقها وشرفها.
سعيد بصدمه وغضب
ده انا سمعتي انا دي، نسمه مراتي ةامي راحت سلمت شرفها لواحد واطي زي ده وتغفلني عشان تخليني اصدق انها بتخوني، انتي مبسوطه وانا بتعذب بسبب اللي خلتيني اصدقه علي مراتي، ليه بتعملي كده ليه، قولي انه غلط انا عندي اصدق ان مراتي خانتني ولا اصدق ان امي تأذيني كده..
ام محمد
انا ما كنتش بأذيك انا كنت بخلصك من الجوازه دي
زعق فيها سعيد وقال بحده
مالها الجوازه دي، ومالها نسمه عملتلك ايه عشان تعملي فيها. كده، كل ده عشان انا اختارتها من غير ما انتي تبقي موافقه بيها؟
محمد
بقولك ايه يالا مش وقت كلامك ده انت تبقي راااجل لو لمره واحده في حياتك وتقول اللي حصل كله عشان حق نسمه يرجع..
ام محمد بقلق
هتحبسو امكم ولا ايه؟
محمد
لا لسمح الله مش احنا اللي هنعمل كده يا اما دي الحكومه..
سابهم سعيد ومشي وام محمد قالت بصوت عالي
يا سعيد استني يا ابني انا عملت كده لمصلحتك..
_ما ردش عليها سعيد ومشي وهي بصت لمحمد بعصبيه وقالت...
ام محمد
انت ليه بتعمل فيا كده، ما تخليك في حالك وتسيبني انا واخوك في حالنا مدام مش عاجبك كلامي وحالي..
محمد
هو انا يبقي ماشي معاكي علي مزاجك وماليش شخصيه يا اسيبك وما ابقاش ابنك، انا اسف في اللي هقوله ده بس انتي ست مريضه يا اما ومش معقول تبقي في ام زيك كده بتدمر في حياة عيالها، نسمه دي مرات ابنك يعني كل اللي عملتيه ده هيعيب ابنك قبل ما يعيب حد تاني ومش هيطلقها بس اللي حصل ده هيبعده عنك حتي انا كمان مش هستأمن اقعد معاكي في بيت واحد، واستني بقي عقاب اللي عملتيه لما تيجي الحكومه تقبض عليكي...
مشي محمد هو كمان وهي قالت بخوف
الله يلعنك يا شيخ بوظتلي كل حاجه يا محمد، بس انا هتصرف ايوه لازم اتصرف..
ــــــــــ #بقلم_الكاتبه_رحاب_القاضي ــــــــ
ـ وبالليل عند شهد كانت طالعه من البلكونه بعد ما نشرت الغسيل وهي لابسه عبايه قديمه من بتوع نعيمه وقالت..
شهد
خلصت اهو كل اللي انتي قولتيلي عليه ممكن بقي ارتاح شويه
نعيمه
لا تسلم ايدك ست بيت شاطره لو السيد ابني كان عايش كنت هجوزهولك يا بت بس الله يرحمه قولي يا بت الله يرحمه
شهد
الله يرحمه
نعيمه
تعالي اقعدي كلي معايا انا عامله سمك مشوي اهو ورز، بتحبي السمك ولا لا؟..
قعدت شهد معاها لانها كانت جعانه اووي وقالت
مدام جعاامه يبقي هاكل اي حاجه حتي لو ما بحبهاش، ابويا زمان لما كنت اقول علي الاكل مش عاجبني كان يزعقلي وسعات ما يخلنيش اكل واقعد جعانه لحد ما اتعودت ارضي بأي حاجه تتحط قدامي حتي لو ما بحبهاش..
نعيمه
شكلك غلبااانه يا بت ايه اللي وقعك انتي في سكة كارم بيه ده راجل قادر..
شهد بسخريه
النصيب..
نعيمه
بس النصيب ده احنا نبقي سبب فيه، يعني كارم بيه ما جاش جابك. من بيتكم وحطك في طريقه مثلا..
شهد
لو كنت فضلت في بيت اهلي ورضيت باللي هما كانو عايزينه كنت شوفت الاوحش من كةرم ام. سعيد..
نعيمه
مين ام سعيد دي؟
شهد وهي بتاكل
دي حكايه طويله بس الست دي هي وابنها السبب في كل اللي بيحصلي ده وقبلهم ابويا اللي اسهل حاجه عنده يرميني لاي حد عشان يخلص مني..
طبطبت عليها نعيمه وقالت
طيب كملي اكلك وما تحطيش في بالك لسه عندك غسيل مواعين اد كده..
ابتسمت شهد بهدوء وقالتلها
حاضر هبقي اغسلهم..
_وبعد شويه كانت واقفه بتعسل الاطباق في المطبخ وسمعت صوت كارم بره مع نعيمه، غسلت ايديها بسرعه من الصابون وخرجت من المطبخ وسألته بخوف..
شهد
هتخليني امشي من هنا ولا انت جاي ليه؟
نعيمه
اخص عليكي يا شيماء عايزه تسبيني وتمشي طيب حتي كملي باقي شغل البيت دت انا ست كبيره..
كارم
شيماء مين؟
شهد
هي مسمياني شيماء قولي هتمشيني امتي؟
كارم
جوزك بوظلي شغلي يا شهد ومعاه واحد كده اسمه..
شهد
اكرم ولا فؤاد؟
كارم بخبث
لا اسمه ادهم الشيمي..
شهد بصدمه
دكتور ادهم مع أسر ازاي؟
كارم
برغم ان أسر اغني منه بكتير الا ان ادهم ليه معارف اكتر وعرف يخلي الشرطه تقبض علي فايز وبصراحه انا ما كانش ينفع اظهر فخليت الليله كلها يشيلها فايز وهو يستاهل اصلا يتحبس وجوده بره مؤذي..
شهد
وانا هتعملو فيا ايه؟
كارم
هخليهم ياخدوكي ومش مهم اللي خسرته كفايه انك هتبقي كويسه..
شهد بعدم فهم
انت بتتكلم جد. ولا بتضحك عليا وبتاخدني علي قد. عقلي..
وقف كارم قدامها وقال بهدوء
انا زمان كنت زيك كده وكنت بتمني حد يديني فرصه زي اللي بديهالك عشان ابقي كويس واكمل حياتي في سلام بس ما حدش هان عليه يساعدني فغصب عني اتحطيت في الطريق اللي انا فيه ده، وانا اهو بديكي فرصه عشان تبقي حره وتبقي كويسه من غير ما تتفرض عليكي حياه انتي مش عايزاها، هتبقي غبيه لو خليتي حد يتحكم فيكي ويختارلك حياه انتي مش عايزاها..
شهد
هو انت ليه بتعمل معايا كده، انا كنت فاكراك شرير..
كارم ابتسم وقال
ما هو انا كده فعلا يا بيبي، بس في الاخر برضو انا انسان وعندي شوية رحمه...
_ في الوقت ده قدام بيت نعيمه وقفت عربية أسر وكام معاه ادهم واكرم وأسر قال لادهم بنبره غاضبه..
أسر
اظن كده كتر خيرك وزياده انا بقي هعرف اجيب مراتي وهمشي..
ادهم بجديه
وانا قولتلك مش همشي غير لما اشووف شهد زاطمن عليها، وبلاش الثقه الزياده دي انا لولا وقفتي معاك الله واعلم كان هيحصل ايه في شهد ده انت حتي ما هانش عليك ربنا تقول اي كلمه تدين بيها الرااجل اللي خطفها..
اكرم بضيق
الدكتور معاه حق يا أسر انت فعلا حطيت كل التهم. في وش اللي اسمه فايز ده وما جيبتش سيرة كارم اللي هو اصلا خاطف شهد
اسر
ما كانش ينفع اقول حاجه عليه لاني ما عنديش دليل وهو اصلا جايب فايز عشان لو الخطه باظت يبقي بعيد. عن. الصوره، ولو كنت جيبت سيرة كارم. كنت انا كان هروح في داهيه لكن لما قولت فايز بان الموضوع طبيعي عشان المنافسه اللي كانت بينا في السبااق
ادهم
طيب ما انت برضو بوظت شغل كارم برضو ليه يكلمك ويقولك علي مكان شهد كده بسهوله؟
أسر
مش عارف اديني رايح اهو وهشوف..
ادهم
رجلي علي رجلك لحد ما اطمن عليها..
اكرم
وانا كمان هروح معاكم...
أسر بنفاذ صبر
طيب اتفضلو اصلها رحله..
_نزلو من العربيه وطلعو فووق وكان واقفين رجالة كارم عند. الباب وأسر قالهم..
أسر
كارم فين؟
الحارس
جوه في انتظاركم..
_دخل أسر ولقي كارم قااعد بياكل ولما شافهم. قال ببرود..
كارم
اهلا اهلا تعالو الست نعيمه عامله شوية سمك انما ايه جامدين..
أسر
فين شهد؟
كارم
جوه دقيقه وجايه، تعالو بس خلينا نتكلم اعمليلنا شاي يا ست نعيمه..
نعيمه
عينيا يا كارم بيه حاضر..
_بص أسر وادهم. لبعض بقلق من هدوء كارم وراحو قعدو وأكرم بدأ ياكل معاه وأسر قاله بغيظ...
أسر
انت بتهبب ايه؟
اكرم
انا بحب السمك. اووي وجعان..
كارم
طيب خلي بالك من الشوك، قولي يا أسر انت ايه اللي خلااك تثق فيا وتيجي لحد هنا مش خايف مني؟
أسر بجمود
لا مش بخااف منك ولا من. غيرك انا الحاجه الوحيده اللي خايف عليها مراتي..
كارم
ومدام خايف عليها اووي كده سيبتها ليه واختارت حبيبتك القديمه، هي كانت شايفه كل حاجه علي فكره وعارفه الموضوع كله، وحرفيا مش طايقه تشوف وشك..
أسر ببرود
حاجه. ما تخصكش..
كارم
فؤاد ابن. عمك. دفعلي الفلوس النهارده كده. احنا خالصين، وهعديلك اللي عملته وانك. بوظتلي شغلي عشان خاطر شهد..
بصله أسر بحده وكارم. كمل ببرود
عشان هي مالهاااش ذنب في حاجه. وانا اذيتها من. غير ما اقصد فأتنازلت عن شغلي اللي باظ عشانها..
أسر بحده
شهد فين؟
_طلعت في الوقت ده شهد. من. اوضة نعيمه وهي لابسه هدومها اللي كانت مخطوفه بيهم واول كد عيونها جات عليه هو أسر اللي قام بسرعه وحضنها قدامهم كلهم وقال بنبره صادقه..
أسر
انا اسف حقك عليا انا أسف..
_اتملت عيونها دموع وذقته بكل قوتها وراحت وقفت جنب ادهم. وقالتله بجديه..
شهد
انا عايزه امشي من هنا معاك انت..
_ابتسم ادهم بهدوء علي عكس أسر اللي اتحولت. ملامحه للغضب ومسكها من دراعها جامد وقال بحده..
أسر
انتي اتجننتي تمشي. مع. مين.؟..
مسك. ادهم. ايده وقال بحده
مالكش دعوه بيها ونزل ايدك. عنها..
أسر بعصبيه
وانت مال اهلك. انت كمان..
كارم. بهدوء
عيب يا ولاد. احنا هنا في بيوت ناااس ما يصحش كده..
اكرم
معلش يا أسر سيبها دلوقتي وانا هبقي معاهم..
_قام. كارم ووقف قدام. شهد وطلع من. جيبه موبيلها اللي كان واخده منها وقال بهدوء
كارم
موبيلك اهو وسجلتلك رقمي. عندك. لو احتاجتي حاجه في اي وقت كلميني وهتلاقيني جنبك..
زاد غضب أسر اكتر وقال بحده
اااه ما هي كانت ناقصه اهلك. انت كمان..
تجاهلته شهد وردت علي كارم بهدوء وقالت
بجد شكرا اووي علي اللي عملته ده علي الاقل عرفت ناس كتير علي حقيقتها واكيد لو احتاجت حاجه هكلمك...
_ومشيت مع ادهم واكرم وكارم بص لأسر اللي كان واقف متعصب وقال ببرود..
كارم
معلش. مش كل حاجه بتبقي علي مزاجنا انت اختارت تكسب حاجه واحده حبيبتك. القديمه اتقبل بقي خسارة مراتك..
أسر بغيظ
فرصه. منيله بستين نيله يا كارم. اني. شوفتك واتعاملت معاك وكده. خالصين. ياريت ما اشوفش وشك. تاني..
كارم
من عينيا كانت لعبه حلوه بجد اتسليت فيها اووي يا حبيبي..
_اتنهد أسر بغيظ ومشي وفي الوقت ده كان ادهم بيطلب اوبر وشهد واكرم واقفين جنبيه، فقرب منهم أسر ومسك ايد. شهد. بقوه وتملك وقال..
أسر
كفايه بقي لعب عيال وفي بيتنا نعمل اللي عايزينه..
شهد بحده
انت ما بتفهمش انا مش عايزه اروح معاك...
أسر بعصبيه
ما تستهبليش يا شهد اومال عايزه تمشي مع. دول يعني...
ادهم بهدوء
هي عايزه تروح بيت اهلها ومش عايزه تبقي معاك لوحدها فانا هاجي معاكم...
أسر بحده
وانت مال اهلك انا بتكلم مع مرااتي انت دخلك. ايه في الموضوع ده ولا انت عايزني اعلم عليك تاني..
ادهم بغضب
المره اللي عدت سكتلك. عشان بنتي كانت معايا انما لو عايزها خناقه. بجد. انا جاهزلك. اهو يلاا..
_في الوقت ده وقفت شهد تاكسي كان معدي وقالت لـ اكرم بعصبيه..
شهد
تعالي حاسبلي التاكسي وسيبهم. يتخانقو براحتهم
اكرم
حاضر وعلي فكره يعني انتو لو عيال صغيره مش هتعملو كده..
_وركبت فعلا شهد التاكسي واكرم حاسبلها عليه ومشيت، وأسر سابهم. واخد. عربيته ومشي...
اكرم
انا هاخد تاكسي يا دكتور هتيجي معايا..
ادهم
ماشي يلا بينا..
ــــــــــ #بقلم_الكاتبه_رحاب_القاضي ــــــــ
_وفي بيت الفيومي كانت لسه قاعده. فاطمه مع هاله مستنيه تطمن علي شهد ونزلت عندهم نتالي وقالت...
نتالي
هو أسر فين. يا هاله؟
هاله بضيق
ما اعرفش..
_نتالي بصت لفاطمه واخدت بالها من الشبه الكبير اللي بينها وبين شهد وقالت..
نتالي
انتي مين؟
هاله بخبث
دي حمات أسر مامت شهد. مرااته..
نتالي بغيظ
امم اهلا وسهلا هما لسه ما لقيوش شهد،عشان كده أسر حبيبي سايبني لوحدي؟
فاطمه بغيظ
مين دي اختك. ولا قريبتكم. دي ولا مين؟
هاله بتوتر
دد دي تبقي اا..
نتالي
انا نتالي حبيبة أسر وقريب اووي هيطلق بنتك وهيرجعلي انا..
هاله بحده
انتي ازاي تتكلمي كده ايه قلة الذووق دي..
نتالي
انا اتكلم. براحتي وياريت تكلمي أسر انا عايزااه دلوقتي حالا خليه يجي..
فاطمه بحده
وانا كمان عايزااه وعايزه اعرف بنتي فين..
_دخل في الوقت ده أسر وكان شكله متعصب جدا وقال..
أسر
في ايه؟
فاطمه بحده
كويس انك. جيت بنتي فين. ولا انت مشغول هنا بحبيبة القلب دي وسايب بنتي الله واعلم فينها
أسر بجمود
شهد بخير وزمانها في بيتكم دلوقتي..
فاطمه
انت بتتكلم جد والنبي؟
هاله
بجد يا أسر شهد. كويسه؟
أسر
جوزك دفع الفلوس لكارم وهو سابها ودلوقتي هي في بيت اهلها ما رضيتش تيجي معايا..
فاطمه
طيب انا همشي اروح اطمن. عليها..
أسر
استني هخلي السواق يوصلك، وقولي لشهد اني هجيلها لما تهدي ومش هسيبها خالص..
اتنهدت نتالي بغيظ وهاله قالت بابتسامه واسعه
وانا كمان بكره ان شاء الله هجيلها واطمن عليها..
فاطمه
تنورو في اي وقت بعد. اذنكم...
_قالت كلامها ومشيت وطلع معاها أسر عشان يخلي السواق يوصلها، ولما رجع نتالي قالتله بدموع..
نتالي
ايه اللي بيحصل ده يا أسر انا مش فاهمه حاجه؟
مسك أسر ايدها وقال
انا هفهمك كل حاجه بس مش دلوقتي عشان هموت وانام وبعد كده هقعد معاكي وهفهمك كل حاجه، عشان بعيد. عن كل ده. انتي وحشااني اووي..
هاله بغيظ
انا طالعه اوضتي الجو هنا بقي تقيل اووي علي قلبي..
وسابتهم. هاله ومشيت ونتالي قالت بحزن
اختك مش طيقاني وبعدين انت ازاي يعني اتجوزت هو انت نسيتني يعني..
أسر
عمري ما نسيتك وسبب جوازي اصلا في البدايه كان عشانك وعشان اجيبلك حقك، علي. فكره فايز اتقبض عليه هيقضي باقي عمره في السجن..
نتالي ابتسمت. بعدم. تصديق وقالت
بجد والله يعني خلاص. انا خلصت منه..
حضنها أسر بهدوء وقال
ما تخفيش مش. هيقدر يعملك حاجه تاني ومن النهارده انتي معايا وكل حاجه. هتتغير.
نتالي مسحت دموعها وبعدت عنه شويه وقالت
طيب وخالتو هي لسه في امريكا..
أسر
مش. انتي عارفه عنوانها ساهل اوي نجيبها هنا وانا هتصرف..
نتالي
انا بجد. مش مصدقه اني رجعتلك. تاني وانك دلوقتي معايا، انا النهارده مش. هسيبك هفضل الليل كله معاك ومش هبعد عنك لحظه، انا هقعد في اوضتك فوق علي فكره وو..
أسر بضيق
لا لا مش هينفع دي اوضة شهد واللي بتتكلمي فيه ده مش وقته..
نتالي بحزن
هو انت مش بتقول انك اتجوزتها عشااني، في ايه بقي؟
أسر بجديه
قولتلك بعدين هفهمك. كل حاجه وانا مش هسيبك تمام انتي هتفضلي معايا علي طول وما حدش ليه دعوه بينا بس سبيني ارتاح دلوقتي وبعدين هفهمك. كل حاجه..
نتالي بضيق
زي ما تحب كفايه انك معايا وبس..
ــــــــــ #بقلم_الكاتبه_رحاب_القاضي ــــــــ
_وفي الحاره عند شهد كانت لسه نازله من التاكسي وقبل ما تدخل بيتهم قعدت في الشارع قدام البيت وافتكرت اللي حصل كله من. اول ما اتخطفت لحد ما أسر اختار نتالي واتخلي عنها وفضلت تعيط وما كانتش عارفه هتقول لاهلها ايه اصلا، في الوقت ده قعد. جنبيها سعيد اللي كان لسه رااجع الحاره هو كمان وقالها..
سعيد
انتي كويسه يا شهد؟
بصتله بدموع وقالت
وانت مالك..
جات تقوم بس هو قال بسرعه
هو الغلط كان من امي ولا مني انا، يعني لو كنتي وافقتي ترجعيلي انا كنت هعرف احميكي منها..
شهد
السؤال ده اسأله لنفسك. انت كنت هتعرف ما تخليش امك تأذيني، انا لو كنت شايفه انك هتقدر تحميني. ما كنتش هربت من اهلي بسببك..
ونزلت دموعها وقالت بحزن
ما كانش كل ده. حصلي لو كنت من الاول اتجوزت رااجل بجد ما كانش كل ده. حصلي كان زماني مرتاحه بس انت السبب انت اللي ما كنتش راجل بجد معايا يا سعيد وما كناش تستاهل انك تتجوز يا ابن امك. اصلا..
_قالت كلامها وسابته وطلعت بيتهم، ورجع لبيتهم هو كمان وخبط علي شقة امه وفتحله محمد وقال..
محمد
انت كنت فين الشرطه كانت هنا وقبضت علي امك وابقي روح سلم نفسك..
سعيد
حاضر..
محمد
انت رايح فين؟
سعيد
هروح اسلم نفسي..
محمد
بس محامي كلمته وقال ان اللي ممكن تتعاقب امك والواد هاني انت الموضوع ممكن يعدي..
سعيد
ما بقتش فارقه يا محمد انا ما عرفتش احمي نسمه وظلمتها واستاهل اللي يجرالي...
محمد
في ايدك الفرصه لسه نسمه بتحبك وهتبدأ. معاك من جديد. بس ابعد عن هنا وانا بعد. امك ما تطلع انا كمان هسيب البيت ده...
سعيد بنبره ساخره
والله حتي الفرصه اللي انت بتتكلم عليها دي انا ما استهلهاش...
_قال كلامه وطلع بره البيت ومحمد بصله بحزن وقال..
محمد
منك. لله يا اما عاي اللي عملتيه في سعيد. ده..
ــــــــــ #بقلم_الكاتبه_رحاب_القاضي ــــــــ
_وفي بيت شهد اول ما خبطت علي الباب فتحلها ابوها اللي كان. شكله نايم واول ما شافها قال بحده..
صابر
انتي رجعتي يا بت ادخلي..
دخلت شهد. وقالت بقلق
امي فين؟
صابر
راحت تسأل عليكي في بيت جوزك بيقولو كنتي مخطوفه، عارفه يا بت لو طلعتي كنتي طفشانه زي المره اللي فاتت والله لاولع فيكي..
شهد بدموع
لا انا كنت مخطوفه بجد والله، بس هو انت ليه ما دورتش عليا مش انا بنتك واهمك. برضو..
صابر
وانا كنت هدور عليكي فين جوزك. يتصرف..
شهد
وجوزي اتخلي عني وسابني ليهم..
صابر
يا سلام اومال سابوكي عشان سواد عيونك..
شهد ببكاء
لا صعبت عليهم انا بقيت بتحامي في نااس غريبه عشان تجيبلي حقي لا انت ولا جوزي عرفتو تساعدوني..
صابر
بطلي الكلام الفاضي ده وجايه هنا ليه ما رجعتيش لبيت جوزك ليه؟
شهد بدموع
انا هطلق خلاص مش هروح هناك تاني..
مسكها صابر من شعرها وقال بحده
هتعملي ايه يا روح امك، انا ما عنديش بنات تطلق..
شهد بخوف وبكاء
هو مش عايزني اصلا..
صابر بحده
تتصرفي وترجعيله دي تاني جوازه ليكي وجوزك راجل ما يتعايبش عايزه تطلقي تاني ليه عايزه تعملي فيا ايه تاني اكتر من اللي عملتيه..
دخلت في الوقت ده فاطمه وجريت عليه وبعدته عن. شهد واخدتها في حضنها وقالتله بحده..
فاطمه
حرام عليك عملتلك ايه عشان. تمد ايدك عليها..
صابر
عايزه تطلق بت الكلب..
فاطمه بحده
ما تطلق. حياتها وهي حره فيها..
صابر
انتي بتخرفي تقولي ايه يا وليه، النااس تقول علينا ايه وبلاش النااس هنلاقي عريس زيه تاني فين ما تبصو احنا كنا فين وبقينا فين بسببه بقينا احسن واغني ناس في الحته بعد ما كنا اقل نااس..
شهد ببكاء
وانا تعبت دفعت تمن كل اللي انت فرحان بيه ده بس مش هدفع تمن حاجه تاني..
صابر
اقسم بالله يا شهد لو ما اتلميتي وشيلتي الكلام ده من دماغك ورجعتي لجوزك وبقيتي خدامه كمان تحت رجليه لادفنك وانتي عايشه، طلاق مش هيحصل، تدخلي ترتاحي النهارده هنا وبكره ترجعي لبيت جوزك مفهوم..
فاطمه بصتله بعصبيه وقالت
مش وقته لما يجي ياخدها تبقي ترجعله، انما بنتي هتفضل معايا دلوقتي..
_واخدتها فاطمه ودخلتها اوضتها هي واخواتها، وفكتلها الحجاب بتاعها وباستلها علي راسها وقالت ببكاء..
فاطمه
حقك عليا يا حبيبتي بس انا مش هقلا منك تاني واللي عايزااه هعمله ليكي وسيبك من ابوكي ده خالص حتي لو حكمت اني اطلق من ابوكي واخدك انتي واخواتك ونقعد في اي حته..
شهد ببكاء
انا عايزه انام يا ماما معلش..
فاطمه
ماشي يا حبيبتي نامي وما تخافيش من حاجه ربنا معانا..
_قلعت شهد الكوتشي بتاعها ونامت جنب نور اختها الصغيره وحضنتها بهدوء ومن تعبها وحزنها راحت في النوم علي طول..
ـ تفتكرو بقي النصيب مخبي ايه لشهد؟
للانضمام لجروب الواتساب اضغط هنا