نوال استنت اللي علي الفون يرد لكن مفيش رد فقالت بستغراب : الووو " برضو مفيش رد فقفلت الفون وكملت لبس غزل " امسكي الكم اللي تحت يلا 

غزل مسكت كمها وامها لبستها البجامه اللي فوق : ماما هو احنا مش هنرجع عند عمو امجد تاني 

نوال بصت لبنتها بصدمه وكذا حكايه اتصورت في عقلها لو صلاح عرف أنها كانت قاعده عند امجد في بيته وهي مصدقت أن علاقتها اتصلحت معاه وقالت : غزل سيرة عمو امجد دي متجيش هنا خالص علشان نفضل قاعدين عند بابا علطول ولا انتي عيزانا نمشي 

غزل برفض : لاء نفضل هنا منمشيش تاني 

نوال بابتسامه : يبقي متقولش أننا عرفنا عمو امجد ولا شوفناه ابدا تمام 

" غزل هزت راسها بموافقه وسكتت ونوال سرحتلها شعرها لكن دماغها مشغوله ولسه متعرفش امجد هيعمل ايه لما يعرف أنها مشيت بس الاكيد انها منتظره أي ردة فعل ، ولسه متعرفش ادهم ناوي يعمل معاها ايه او هيواجهها  ازاي " 

نوال باستها وقالت : الجميل بقا جميل وريحته قمر يلا العبي علي ما اجهز الغدا 

غزل بستغراب : فين الغدا هنا ولا تحت عند تيتا ؟ 

نوال ابتسمت علي استغراب بنتها : لاء هناكل هنا علطول مفيش اكل عند تيتا تاني 

" غزل هزت راسها و قعدت تلعب ونوال دخلت المطبخ تجهز الغدا وهي قلقانه من امجد وخايفه صلاح يعرف حاجه " 

.......................................

" ادهم رجع من المنصوره هو ومراته ووقف العربيه قدام البيت وبص لنوال علشان تنزل لكن هي بصاله بتركيز استغربه "

ادهم ضم بين حواجبه : مالك بتبصيلي كدا ليه انزلي يلا 

نهال : ادهم انت ممكن تطلقني بسبب خناقه من اللي احنا بنتخانقهم دي ؟ 

ادهم مسح وشه وقال بتعب : يالله... أنا ايه اللي عملته في نفسي دا بس جواز ايه اللي أنا كنت رايح اتجوزه ما أنا كنت عايش حياتي مبسوط ليه عكننت علي نفسي 

نهال طبطبت علي صدره بتأثير : معلش يا ادهم هو كدا المومن ديما مصاب....بس رد علي سؤالي وكمل عكننه 

ادهم بصلها كتير بغيظ وقال : أنا راجل مش بتاع طلاق " ومسك أيدها " ام الدبله دي انتي مش هتقلعيها مهما حصل هتفضلي علي ذمتي لحد يا اموت يا انتي تموتي يلااااا انزلي بقا 

نهال ابتسمت اوي وهي فرحانه بكلامه ونزلت من العربيه وقالت بهمس : ياااربي والله طلع كلامه شبهه الروايات " وطلعت علي البيت وهي فرحانه " 

ادهم قاعد في العربيه يبصلها بذهول : اقسم بالله العظيم متخلفه عقلياً " وقال بابتسامه " كان ايه هيحصل لو الواحد اتجوز واحده خرسه وطرشه يقول اللي يقوله وهي تبتسمله وبس ياااااه دا الواحد انبسط من مجرد التخيل " ونزل من عربيته " 

"سلوي كانت قاعده في الصاله ورابطه دماغها وواضح عليها انها معيطه ، نهال دخلت اتفجأت بشكلها "

نهال بستفسار : استر يارب مالك رابطه دماغك ليه كدا 

سلوي بصتلها من فوق لتحت وقالت : يلااااا جُري جوزك وراكي واطلعي شقتك واقفلي عليه بسبع ترابيس انتي كمان 

نهال قلعت شنطتها وراحت قعدت جنبها : صلِ على النبي في قلبك بس كدا وفهميني ايه اللي حصل عايزاني اجره ورايا واقفا عليه بترباس ليه 

سلوي بنواح : الواحده تحبل وتولد وتربي لحد ما حباية عينها تطلع برا علشان تقول أنا أم الرجاله اول ما يتجوز مراته تقويه علي أمه 

نهال طبطبت عليها وقالت بمرح : يشيخه قولي كلام غير دا انتي حد يعرف يستقوي عليكي انتييي 

سلوي بصتلها بغضب : قصدك ايه بكلام دا ليكون معلقلكم المشنقه يابت وانا مش واخده بالي 

نهال حاولت تبرر كلمتها فقالت : لاء اكيد مقصدش انك وليه قادره يعني انتي بس شديده شويه عايزه واحده تكون صحتها حلوه تحت ايدك طول النهار واحنا مفيناش صحه والله يعني انتو زمان كنتو بتفطرو فطير مشلتت بالسمنه البلدي ف الواحده فيكم كانت تهد جبل إنما احنا جيل الاندومي والانيميا الحاده......المهم يعني بتقولي الكلام دا ليه ايه اللي حصل ؟ 

سلوي بضيق : الحيه مرات صلاح طول الليل بتسمع الواد كلام من نحيتي لحد ما خليته مش شاهيني قدام عينه طلعت الصبح علشان اصحيهم يفطرو يقولي أنا ومراتي هنالك من هنا ورايح في شقتي قولت علي رأي المثل ربي يا خايبه للغايبه 

نهال بدهشه وابتسامه : بالله العظيم قالك كدا اقسم بالله راااجل 

سلوي بغضب : انتي عماله ترمي كلام من تحت لتحت كدا ليه يما انتي كمان مضايقه خدي بعضك واطلعي علي شقتك واتقسمي وانا أن كان علي سالم هأكله واشربه وهنعيش مبسوطين بلا وجع دماغ 

نهال بابتسامه : جدعه بلا وجع دماغ سيبي اللي ينام ينام واللي ياكل ياكل متتعبيش نفسك وانتي هتعوزي ايه غير سعادة عيالك يا ام ادهم 

ادهم دخل قعد جنب أمه بإرهاق وبصلهم الاتنين بستغراب : في ايه مالكم ؟

نهال قامت وقفت : طيب هسيبكم تحلو شوية المشاكل العائليه دي علي ما اطلع اخد شاور " وطلعت علي شقتها جري "

ادهم بزعيق : متجريش علي السلم يابت اللي في بطنك هينزل " وبص لأمه اللي لويت بوقها وهو ضحك وفضلت تشكيله " 

..........................................

" نهال طلعت شقتها قلعت الكوتش كل فرده في مكان وقلعت الجاكت بحماس وفتحت شنطتها طلعت كيس الميكب ودخلت علي اوضة النوم " 

نهال بحماس : انا جبت روج بطعم الفلفل الحرااااااااااق اديلووو ادي يابت يا نهووووول " وراحت وقفت قدام المرايا وفتحت الروج وبصتله بحماس وبدأت تحط علي شفايفها " 

" نهال حست بحرقان في شفايفها بسيط بس كل شويه بيزيد جابت منديل ومسحت شفايفها بسرعه لكن الحرقان زاد "

نهال غسلت شفايفها بس اول ما المايه جت علي شفايفها صوتت : لاااء مش المفروض أنا اللي اتوجع المفروض هوووو 

ادهم فتح باب الحمام وشاف شفايفها حمرا جدا : ايييه دا عملتي ايه في بوقك ؟ 

نهال دموعها نزلت وهي ماسكه شفايفها : الروووج اللي عمل فيها كدا بتحرقني يا ادهم 

ادهم جاب مايه وفضل يمسح فيها وقال بعدم فهم  : رووج ايه اللي عمل في شفايفك كدا ؟ 

نهال بوجع : اللي بالأطعمة اول ما حطيته علي شفايفي حرقني جدا " وخبطته في دراعه" كله بسببك انت اللي خليتني اجيبه 

ادهم مسك صباع الروج وقرء اللي عليه وقال بذهول : بالفلفل الحار ! انتي جايبه من دا ليه انا اقصد بطعم البطيخ الفراوله الحجات اللذيذه دي جايبه دا ليه ؟ 

نهال بصتله وايدها علي شفايفها : أنا ايه عرفني أنه بيحرق اوي كدا فكرته اسم علي الفاضي 

ادهم يصلها بغلب : اااه منك اااه ومن حركاتك إدهني اي كريم مرطب علي شفايفك دي علشان هتورم " وبص علي صباع الروج واتصدم من سعره " صباع الروج دا ب ٢١٠ ؟ 

نهال بصتله بخوف وقالت بهمس : فدايااااا...

ادهم بصلها بذهول : فداكي دا انا هطلع روحك في ايدي ما دي غلطتي ان مشيت وراكي أنا استاهل ضرب الجزمه 

نهال بصتله : انت مستخسر فيااا ٢٠٠ جنيه ؟ 

ادهم راح عندها ومسكها من شعرها بخفه : انتي جايا عليا بخساره اقسم بالله بتعملي ايه انتي في حياتي غير انك بترازي فيااا طبيخ ومبتعرفش تطبخي تنضيف وأبسط حاجه راميه الكوتش بتاعك فرده في مكان شكل فيكي ايييه مميز يخليني ميت فيكي كدا فهميني 

نهال رفعت عيونها لعيونه وايدها علي صدره وقالت بدلال : بعرف ادلعك يبيبي 

ادهم ضحك غصب عنه وقال : حتي نيله في دي لازم اقولك اعملي كذا وكذا.....

نهال حطت ايدها علي بوقها وقالت بصدمه وكسوف : انت بتقوووول ايه اتلم يا ادهم " وفونها رن وكانت تغريد فردت " الووو ايوا يا غروده 

تغريد : يعني لو أنا متصلتش متعبرناش يا استاذه ولا حبيب القلب اكل عقلك خلاص 

نهال ضحكت بمرقعه خلت ادهم يصلها بحده فقالت : والله ابدا انتي عارفه أن أنا ميشغلنيش عنكم غير الشديد القوي المهم انتي اخبارك ايه 

تغريد : احنا تمام بقولك ادهم سامعني ولا اتكلم عادي ؟ 

نهال بستغراب : لاء اتكلمي في حاجه ولا ايه 

تغريد بمغزي : دكتور مروان بعتلي النهارده قالي نهال مجتش الكليه ليه نهال انتي مقولتيش ليه انك متجوزه ؟ 

نهال بصت علي ادهم اللي كان في البلكونه بيشرب سيجاره وقالت بضيق : وانا هقوله فين ولا شوفته فين انا وبعدين مهزقتيش أهله ليه 

تغريد بجديه : ههزقه ازاي اناا معرفش هو قالي مجتش ليه قولتله معرفش يمكن راحت عليها نومه 

نهال غمضت عينها بضيق وقالت بهمس : بني ادم بارد أنا عمري ما عشمته بحاجه بالعكس كنت بتعامل معاه علي اساس دكتور ماده عندي في الكليه وخلاص معرفش بقا انه هيبرهن معملتي ليه أن بحبه 

تغريد : أنا عرفتك اللي حصل حاولي تروحي بكرا تعرفيه انك متجوزه بدل ما يعملك مشاكل مع ادهم 

نهال بتنهيده : تمام يا تغريد حاضر " وقفلت وبصت علي ادهم " كُل ما هو صادق يستمر فعلا طيب اعمل ايه في الورطه دي دلوقتي " وطلعت لأدهم البلكونه حضنته من ضهره وسكتت "

ادهم اخد اخر نفس من السيجاره ورماها ولفونهال ليه وحط ايده علي خدها بحنان : مالك ؟ 

نهال بصتله : هو لازم يكون في حاجه علشان احضنك  يعني 

ادهم رجع شعرها لورا وقال : اكيد لاء بس شكلك مخطوف في حاجه ولا ايه ؟ 

نهال هربت من عينه وضحكت بتوتر : مفيش حاجه ليه مُصر تخلي شكلي مخطوف وفي حاجه المهم انا جعانه عايز تاكل ايه النهارده 

ادهم ضحك بخفه : اللي انا عايز اكله انتي مبتعرفش تطبخين يا نهال 

نهال بغيظ : ليه يعني انت طلبت اي قبل كدا وانا معملتوش تحفه رغم انها بتكون اول مره اعمله 

ادهم : عايز اكل كباب حله وطحينه ورز بشعريه وسلطه لو عملتيلي الاكله دي اطلبي مني اي حاجه انتي نفسك فيها 

نهال بحماس : موافقه وهتتفاجئ مني هدخل اغير هدومي بس وهبدء علطول " ودخلت علي جوا " 

ادهم بقلق : اكيد المستشفيات هتقطع نفسها علينا النهارده....

                              "" انتظرو القادم ""

 والقلبُ لا يميلُ إلا لك ♥️✨