ضحكت شهد : ربنا يخليك ليا يا روحي ، يلا بقي روح لعروستك وزي ما قولتلك انسي اني موجودة هنا خالص ، انا دلوقتي هنام ، وبكره الصبح هجيبلكم الفطار لحد باب اوضتكم !! ثم ضحكت وقالت : متخافش مش هدخل طبعا ، واعمل حسابك دي المرة الوحيدة اللي هجيبلكم الفطار فيها علشان العروسة متاخدش علي كده ومتنساش نفسها !!

امسك سلطان بيديها وضمها بلطف اليه  ثم قال لها : هتوحشيني اوي لحد الصبح .

ابتسمت شهد وقالت : يلا بقي روح لعروستك .

خرج سلطان من الغرفة فوجد جميلة تجلس في حيرة وارتباك !!

امسك سلطان بيد جميلة ثم وضعها في يده وسار نحو غرفتها وقبل ان يصل قالت له : معلش يا بيه ممكن اطلب منك طلب غالي شوية ؟

سلطان : مفيش حاجة تغلا عليكي يا جميلة ، اطلبي اللي نفسك فيه .

جميلة : انا طول عمري بشوف في الافلام العريس بيشيل عروسته علي دراعه في ليلة فرحهم و دي ليلة فرحي وكان نفسي اعيش الحاجات اللي كنت بشوفها في الافلام دي وبتمناها .

ضحك سلطان وقال : بس كده ؟

جميلة : معلش يا بيه هو طلب غالي شوية بس سامحني محدش هيقدر ينفذهولي غيرك .

سلطان : اوامرك يا عروسة .

جميلة : العفو يا سعادة البيه .

ثم حمل سلطان جميله وسار بها بعض الخطوات حتي دخل غرفتها ثم اغلق الباب بقدمه وضحك قائلا : وكمان قفلت الباب برجلي زي الافلام .

ضحكت جميلة وهي بين ذراعيه .

ثم دار بها سلطان عدة مرات ثم وقف وانزلها علي الفراش وسألها : انتي قفلة النور ليه ؟ افتحي النور انا مش شايف حاجة ومش عارف مكان المفتاح فين !!

قالت : معلش يا بيه ممكن حاجة كمان ؟؟؟

قاطعها سلطان : استني استني قبل ما تكملي كلامك ثم اقترب من اذنها هامسا : قولتلك لما نكون لوحدنا قوليلي يا سلطان ، فاهمة ؟؟

جميلة : معلش علي ما اتعود .

سلطان : طيب كملي كلامك ، كنتي هتقولي ايه ؟

جميلة : ممكن بلاش تنور النور ؟

سلطان : ليه بقي ؟؟؟ 

جميلة : انا بنكسف يا بيه ، ولو عايز النور ضروري انا معايا اضاءة خفيفة رومانسية كده .

سلطان : رومانسية !! انتي باين عليكي رومانسية اوي يا جميلة .

للكاتب عادل عبد الله

جميلة " بخجل ": انا بنت زي اي بنت يا بيه كانت بتحلم باليوم ده ونفسي احقق اللي كنت بحلم به .

سلطان : وانا الليلادي بقولك شبيكي  لبيكي سلطان جوزك ملك ايديكي نفسك في ايه ؟؟

جميلة : نفسي ، نفسي ، نفسي ارقص معاك سلو زي ما بشوف في الافراح في التليفزيون وعلي التليفون .

سلطان : انتي معاكي موسيقي سلو ؟؟

تضحك جميلة : ايوه .

سلطان : ومستنية ايه ؟ يلا شغليها بس بصوت علي قدنا علشان شهد  متسمعش .

ابتسمت جميلة وفتحت اغنية هادئة علي تليفونها بصوت محدود ثم وقفت امام سلطان ورفعت ذراعيها وعلقتهما في رقبته ثم رقصوا سويا رقصة هادئة شعر بعدها سلطان بكم الرومانسية التي تتمتع بها جميلة تلك الفتاة البسيطة التي تخفي احلامها و ها هي تحاول ان تعيشها واقع !!

ظلا يرقصان حتي انتهت الموسيقي فضمها سلطان ضمة حانية ثم اخذها الي الفراش....

اغمضت واستسلمت في هيام الي زوجها وهي تشعر وكأنها في حلم جميل لا تريد ان ينتهي ابدا .

في غرفة شهد ....

تكاد الغيرة أن تفتك بها !! 

شهد داخل غرفتها تقف وتلف وتدور داخل غرفتها ، تفرك اصابعها بعصبية شديدة ، ثم تخاطب نفسها : مالك يا شهد !! زعلانة ليه بالشكل ده ؟! ما انتي اللي مجوزاها له بمزاجك وارادتك محدش غصبك علي حاجة !! وكمان عارفة انه بيحبك انتي وهي بالنسبة له مش اكتر من وسيلة انه يخلف !! اهدي بقي وانسي اي حاجة ونامي .

ثم ترد علي نفسها : ازاي ؟؟ ازاي انام وارتاح وانا عارفة انه دلوقتي في ح.ضن واحدة تانية !! ده انا حتي شوفت في عيونه نظرة اعجاب لها ، لا ده كانت عينيه هتطلع عليها !! اكيد عجبته وفرحان بيها دلوقتي !! لاااا انا لازم اخرج وانهي المهز.لة دي فورا !!!!!

خرجت شهد من غرفتها مسرعة و سارت نحو غرفة جميلة وما انا اقتربت حتي هدأت خطاها ووقفت امام الباب المغلق ثم وضعت اذنها علي الباب تحاول ان تستمع لأي صوت !! ولكنها لم تسمع شئ !!

ثم عادت الي غرفتها واغلقت بابها وقالت لنفسها : انتي اتجننتي ولا ايه يا شهد !! انتي ازاي تتصنتي عليهم كده !! وبتفكري في ايه دلوقتي ، خلاص الفاس وقعت في الراس مش هينفع تعملي اللي في تفكيرك .

في منتصف الليل ...

سلطان : بصراحة انتي تجنني يا جميلة ، انتي اسم علي مسمي ، اسمك جميلة و كل حاجة فيكي جميلة .

جميلة : انا يا بيه ؟

سلطان : قولنا من دلوقتي مفيش كلمة بيه دي زي ما اتفقنا مادام لوحدنا ، قولي يا سلطان وبس .

تصمت جميلة......

سلطان : ها ، يلا قولي .

جميلة : يا سلطان .

سلطان " يضحك " : يا روح قلب سلطان .

#للكاتب_عادل_عبد_الله

صباح اليوم التالي

لم تتذوق عين شهد مذاق النوم طيلة الليل ، دخلت الي المطبخ صباحا  واعدت الطعام لسلطان وعروسته كما وعدته ثم دقت باب غرفة جميلة عدة مرات ويكاد الارتباك والتوتر ان يقت.لها !!!

سمع سلطان صوت دقات الباب فتح عينيه وتيقظت حواسه سريعا واعتدل جالسا علي الفراش بينما كانت جميلة مازالت نائمة بجواره . ثم قام سريعا  ليرتدي بعض ملابسه .

انتظرت شهد في ضجر حتي فتح سلطان باب الغرفة مبتسما وقال : صباح الخير يا حبيبتي .

ابتسمت شهد " بتصنع " : صباحية مباركة يا عريس .

سلطان : احم ... الله يبارك فيكي يا حبيبتي ، وحشتيني قوي .

شهد : العروسة نايمة ولا ايه ؟

سلطان : ايوه .

شهد : انا جيبتلكم الفطار بنفسي النهاردة زي ما وعدتك ، بعد كده هي اللي هتجهز الفطار ، وبالنسبة لشغل البيت هي عندها اجازة اسبوع زي ما اتفقنا بعده هترجع لشغلها الطبيعي وتنسي الدلع ده .

سلطان : تسلم ايديكي يا حبيبتي ، اكيد ده اجمل فطار علشان انتي اللي مجهزاه بايديكي الحلوين .

ضحكت شهد : طيب يلا يا اونطجي ادخل لعروستك .

جذبت شهد باب الغرفة وهي تبتسم في وجه سلطان لتغلقه  .

عادت الي غرفتها بعدما قلت حدة توترها بعد سماع كلمات الغزل منه وعرفت ان مكانتها في قلبه لم تهتز .

اخذ سلطان الطعام ووضعه جانبا ثم استلقي بجوار جميلة وبدأ يداعب شعرها بأنامله وخدودها بانفاسه حتي فتحت جميلة عيونها وابتسمت : صباح الخير .

#ألف_قصة_و_قصة

سلطان : اجمل صباح لأجمل عروسة في الدنيا .

جميلة : معقووول !! انا مش في حلم !! انا في حقيقة !!

سلطان : الذ حلم واجمل حقيقة يا حبيبتي ، يلا بقي قومي علشان نفطر .

اعتدلت جميلة ثم قالت : حاضر انا هقوم بسرعة اجهز الفطار .

سلطان : لا يا قلبي ، شهد جهزلتنا الفطار وجابته لحد باب الاوضة .

جميلة " بذهول " : ايييه !! شهد هانم بنفسها اللي جهزتلنا الفطار ؟!!

سلطان : ايوه ، وقالتلي انها النهارده جهزت لنا الفطار و بعد كده انتي اللي هتجهزيه ، وكمان قالتلي انك في اجازة من شغل البيت لمدة اسبوع كامل .

جميلة : ياااه !! شهد هانم دي ست طيبة اوي وقلبها كبير ، ربنا يسعد قلبها ويجبر بخاطرها يارب .

سلطان " يضحك " : يلا بقي يا حبيبتي نفطر بسرعة بسرعة علشان عايزك في موضوع مهم قوي .

جميلة : موضوع !! موضوع ايه ؟؟

يضحك سلطان : نفس موضوع ليلة البارح .

ضحكت جميلة واحمر وجهها خجلا ثم قالت : لا استني اوعي تمد  ايدك علي الاكل .

سلطان " بتعجب " : ليه ؟!!

جميلة : انا اللي هاكلك بايديا .

سلطان : ماشي يا قلبي ، تسلملي ايدك يا قمر .

مرت ساعات النهار بطيئة مملة كئيبة في غرفة شهد .

بينما كانت ساعات النهار حارة ساخنة ملتهبة في غرفة جميلة وسلطان .

وقبل نهاية اليوم دخلت شهد الي المطبخ وظلت به تعد اصناف من الطعام حتي بعد منتصف الليل !!!

خرج سلطان من غرفته فتعجب من انشغال شهد في المطبخ حتي هذا الوقت المتأخر !!!

سلطان : وحشتيني اوي يا حبيبتي ، بتعملي ايه ؟

شهد : زي ما انت شايف بعمل اكل .

سلطان : وليه سهرانه لحد دلوقتي في المطبخ ؟! كده تعب عليكي !!

شهد : قولت اخلص كل حاجة النهاردة لأني بكره الصبح رايحة عند شيماء اختي في اسكندرية .

سلطان : هتسافري فجأة كده ؟؟

شهد : وفيها ايه ؟ شيماء وحشتني وعايزة اشوفها واغير جو عندها .

سلطان : هتقعدي هناك كام يوم ؟

شهد : يومين تلاتة بالكتير . 

سلطان : طيب صحيني قبل ما تنزلي الصبح علشان اروح اوصلك .

شهد : لا لا ، انا هسافر لوحدي .

سلطان : مينفعش ، لازم ....

شهد " تبتسم بألم " : لازم تفضل جنب عروستك يا عريس .

سلطان :يا شهد انااا....

شهد : هسسسسس ، انت مش هتخرج من البيت وانا هسافر لوحدي ، و بطبخلكم اكل وهسيبه في التلاجة يكفيكم لأخر الاسبوع .

صباح اليوم التالي

فتح سلطان عينيه ليجد جميلة بين ذراعيه فتداعب انامله خصلات شعرها المبعثرة ويهمس في أذنها صباح الخير يا قمر .#للكاتب_عادل_عبد_الله

تتيقظ جميلة علي همساته لتبتسم : صباح الخير يا حبيبي .

سلطان : احلي كلمة حبيبي سمعتها في حياتي .

تضحك جميلة وتعتدل : هقوم اجهزلك الفطار حالا .

سلطان : لأ خليكي جنبي شوية .

جميلة : انا جعانة قوي ، هقوم اجهز الفطار ونفطر وبعدين هكون جنبك علطول .

سلطان : ماشي يا حبيبتي .

خرجت جميلة من الغرفة فلم تجد شهد !!

فعادت الي الغرفة : غريبة !!! شهد هانم مش موجودة في البيت !!

سلطان : ايوه ، قالتلي انها هتسافر عند اختها في اسكندرية تقعد يومين هناك ، اكيد سافرت الصبح قبل ما نصحي .

جميلة : انا قلقت عليها لما مش لقيتها في البيت ، هروح اجهز الفطار .

سلطان : استني ، فرصة وهي مش موجودة نجهز الفطار مع بعض .

في الاسكندرية 

تصل شهد الي منزل اختها لتستقبلها بالترحاب ...

شيماء : اهلا حبيبتي شهودة ، حمد لله علي السلامة نورتي اسكندرية .

شهد : الله يسلمك يا شيمو ، اسكندرية منورة بأهلها .

شيماء : انا زعلانة منك ، كل ده متجيش تشوفي اختك حبيبتك !!

شهد : معلش يا شيمو اتأخرت شوية المرة دي ،واديني جيتلك اهو .

شيماء : مالك يا شهد ؟ شكلك متغير اوي زي ما تكوني زعلانة من حاجة !!

شهد : لا ابدا .

شيماء : هتخبي علي اختك حبيبتك ،  اتكلمي يا قلبي فيه حاجة مزعلاكي ؟؟

تفلت دموع شهد بين جفون عينيها لتنساب علي خدودها .

شيماء : ايه ده !! معقول !! شهد اختي بتعيط ؟؟ انا اول مرة اشوف دموعك يا شهد !! فيه ايه ؟؟#للكاتب_عادل_عبد_الله

تنهمر دموع شهد بغزارة : سلطان اتجوز يا شيماء .

شيماء : اييييه ؟؟ سلطان اتجوز !! ازاي ؟؟ ده بيحبك وبيمو.ت فيكي !!!

شهد : هو ده اللي حصل .

شيماء : ازاي ؟؟ ازاي يجيله قلب يتجوز عليكي ويكسر قلبك ؟؟

شهد : لأ هو مش اتجوز من نفسه ، انا اللي طلبت منه وصممت لغاية ما وافق واتجوز .

شيماء : انتي ات.جننتي يا شهد ؟!! انتي بنفسك اللي طلبتي منه يتجوز ؟!!