بصيتله بتبريقة فرجع راسه لورا..

- خلاص بلاش قلبها.. ممكن عقلها!

ابتسمت.. الواد دا هيطلع دمه خفيف بجد ولا ايه!

- بقولك ايه!

رديت بزهق..

- ها؟

- أنا عايز اشم هوا!

- وايه المطلوب مني يعني ما تعلي التكييف!

- لا عايز هوا طبيعي.

- اجبلك مروحة!

- يستي عايز هوا رباني من صنع الخالق.

- أعملك ايه انا يعني متزهقنيش!

- انتي اللي دخلك طب ظلمك على فكرة. 

- هيا رحمة جات هنا ولا ايه!

- رحمة مين! 

- لا ولا حاجة، المهم انت عايز ايه دلوقتي!

- خديني الجونينة. 

بصيتله بقرف..

- الجونينة! حد قالك أني شغالة دادة بعد الضهر! 

- يعني زعلانة من جونينة ومش واخدة بالك من دادة اللي طرشتيها في وشي دي!

- طرشتها؟!! ما تحسن ملافظك يا جدع انت! 

- يستي ما انتي اللي بتجرجريني للساني الطويل وأنا عايز أكون محترم والله.

خدت نفس.. 

- خلاص يعم هاخدك الجونينة.

- ربنا يكرمك يا أميرة يا بنت الأُمرا.

- الله.. عليا النعمة احنا ما كنا عايشين!

كان بيشم الهوا كإن مشمّش هوا قبل كدا..

- انتي عارفة يا بت يا دكتورة.. أنا حاسس إني أول مرة أشم هوا.

ابتسمت كإنه قرأ أفكاري.. كان بيتكلم كتير، حكى عن ازاي دخل شرطة، وأنه كان نفسه يدخل آداب إسباني عشان بيحب اللغة دي وشايف أنها أروق لغة ممكن الواحد يسمعها بعد العربية، حكى أنه بيحب أمه وأخته وصاحبه جدًا وأنه ملوش صحاب وحد غيرهم، وأنه عمره ما استغل سلطته ولا نفوذه ويوم ما عمل كدا كان معايا ومستحملش 5 دقايق وخرجنا.. كنت بسمعه وأنا ببتسم..

- ساكتة ليه؟

- بسمعَك. 

- رغيت كتير صح!

- لا أبدًا.. اكتشفت فيك حاجات كويسة.

ابتسم..

- يعني أعجب!

ضميت حواجبي باستغراب..

- تعجب ايه؟ 

مط بوقه بملل..

- قولي تعجب الباشا انتي مسمعتيش جعفر العمدة ولا ايه!

ضحكت..

- تعجب الباشا يا سيدي.

غمز..

- وانت الباشا يا عم.

ضحكت بصوت عالي..

- طب ما تكتبيلي علاج بضحكتك دي يسطا! 

ابتسمت..

- وافرض طلعت مبتعالجش!

- لا بتعالج والله اسمعي مني، دا أنا حاسس إن رجلي بتتحرك في الجبس!