بصيت علي الكارت بتاعها اللي أدتهولي وقدرت أوصل لعنوان الشركة عن طريقه ، كانت شركة كبيرة زي مارسمتها في مُخيلتي ، سألت الموظفين علي مكتبها وخبطت علي الباب

- أستاذ زين !! اي المفاجأة الحلوة دي ؟

قولتلها بعصبية - حلوة اي ؟ انتي إزاي تدفعي مصاريف المستشفى وتجبيلي علاج انا مش محتاج منك حاجه علي فكرة 

بلعت ريقها بصعوبة وقد تكون خافت بسبب نبرة صوتي - انا..انا عارفه أنك مش محتاج بس أنا اللي خبطتك ووصلتلك للحاله اللي كنت فيها كنت عاوزة أردلك جزء بسيط انا بجد معملتش حاجه ومش قصدي أحسسك بشعور وحش 

-تمام يبقي تاخدي فلوسك محدش يدفعلي حاجه ومتشكر جدا

-طيب ..طيب هو انت ليه متعصب عليا او حاسه أنك مش طايقني أنا أسفه والله

في اللحظة دي تماماً حسيت إني كنت متحول لوحش معاها لأن بعد ماعاليا سابتني بقيت شايف كل البنات شبهها ، كل غضبي وعصبيتي طلع علي ندي لمجرد شعوري بإن زيها زي عاليا أنا متعافتش من اللي حصل وجايز ده اللي مخليني شايفها بالطريقة دي ، بس مهما كان هي ملهاش ذنب ،يعني شركة وموظفين بيعملولها الف حساب وبيحترموها أجي أنا مكتبها أقلل منها عشان عملت معايا موقف كويس ؟

-انتِ عندك حق انا أسف إني أتكلمت بالطريقة دي ، بس انا حابب أردلك اللي دفعتيه 

إبتسمتلي- ولا يهمك ، طيب ممكن أقترح أقتراح وانتَ براحتك ارفض أو أقبل بس أتمني والله تقبل

-اتفضلي

-أشتغل معايا في الشركة هنا ، انت قولتلي أنه مجالك ف ليه لأ؟ وكل شهر تسدد المبلغ اللي حابب تسدده عادي مع اني مش عوزة حاجه بس عشان تكون مرتاح

-أشتغل معاكي ؟ طب إزاي 

-بما أننا ف المجال ف أنتَ هتضيفلي خبرتك وانا معاك برأس المال وبرضو نتشارك الأراء ونعمل شغل كويس

-مش خايفه أوقعلك الشركة او أخسرها 

-تؤ ، واثقة من نجاحك من دلوقتي من قبل ماتبتدي انا واثقه ان الشركة دي كمان كام شهر هتكون ف حته تانية اكتر

إستغربت من ثقتها فيا واتبسطت ف نفس الوقت، أستقلت من الشغل اللي كنت شغال فيه ، وبدأنا شغل ،بدأنا نتشارك الأفكار انا والتيم بتاعها ونعمل خطط وندرسها ، كذا شركة جت تتعاقد معانا والعملاء بتوعنا زادو ومبقناش ملاحقين علي التعاقدات، وقتها حسيت بشعور جميل اني نجحت في مجال انا بحبه ومبسوط فيه لما بصحي الصبح مش ببقي رايح شغل ، لأ رايح لمكان بحبه برتاح فيه ، أتغيرت كتير واكتر حاجه مبسوط منها إن عاليا مابقتش تيجي في بالي نهائي ولا حتي بالصدفة مابقتش شايف الكل زيها لأن الحقيقة ان مش كلهم وحشين انا بكره الظلم ف مش هظلم كل البنات عشانها ، أكبر درس أتعلمته إن السعي و النجاح بيخليك تتغير "للأفضل " للشخص أنت حابه وقتها بتبقي عاوز تشكر الشخص اللي أذاك أنه أذاك عشان حولك لشخص مع الأيام بقيت حابه ، جبت عربيه صغيرة دفعت منها أول قسط وان شاء الله ربنا يكرم وأقسط الباقي، أما ندي 

-مش قولتلك هتخلي الشركة في حته التانيه بعد كام شهر،

شوفت قد إيه أنتَ شاطر؟

اكتشفت إن الإنسان بيوصل أسرع لما بيكون معاه شخص مؤمن بنجاحه وواثق أنه هيوصل وهي كانت الشخص ده

قولتلها وانا مبتسم بحُب- أنا ببقي شاطر وناجح وانتِ هنا 

وشها أحمر - أنا ؟ 

-عارفه إن شكلك حلو وانتِ مكسوفه؟ 

-هه !! 

-أيوووواا هو ده

ضحكت وسابتني ومشيت وهي مرتبكة ، وهنا كنت أول مرة أشوف ندي بعين تانية غير اللي كنت شايفها بيها قبل كدة 

"أني أخيراً بقيت أحس بسعادة وانا بجوار أحدهم أحدهم يبقي هي " 

بقيت عايز أعمل عشانها ، إي اللي يبسطها وأعمله لأنها تستاهل أمشي عشانها بلاد مش خطوة بس ..

جاتلي مسدچ من رقم مش غريب عليا، حاسس زي ما أكون شوفته قبل كدة فتحت المسدچ لقيتها من أكتر حد مستبعد إنها تبعتلي "عاليا " بتقولي " ازيك يا زين انا عاليا أكيد مالحقتش تنساني  وانا كمان معرفتش أنساك حتي بعد ماتجوزت عمران انا والله ندمانه ندم عمري إني أتخليت عنك عمران كان بيضربني من بعد ما اتجوزنا وبيقلل مني ويهيني انا ف كل يوم كان ببعاملني وحش بعرف قيمتك فيه ، بس انا دلوقتي إتطلقت منه خلاص ،انا واثقة انك لسه بتحبني اتمني تكون موافق ندي فرصة لعلاقتنا مرة تانية ممكن؟ أول ماتوصلك المسدچ كلمني أنتَ وحشتني أوي.