انصدمت وهي تكلي بسرعة شهكت وكتلها : حااااازم ؟ 

- اي حازم ليش ؟ 

ضليت اباوع بوجهه ، حجت : ليش اكو شي 

- لا يعني ما ادري .. حازم متزوج 

- جا واني شجاي احجي غير كتلج مرته وامه هن الخطبن 

-وهو يدري 

- ما كاعد افتهم سؤالج شنو هو يدري 

- اني السمعته هستوه رجع مرته جان مطلكها 

- اي يمعودة ما يريدها جزعانة روحه منها كلت اخذه واكسبه واعيش براسه وافتك من هالشغل و الوكفة الكسرت ظهري وما محصلة شي شحطيتلي بيت صخام كل شغلي بحلك اهلي ونسوان اخوتي .

- ما ادري شكلج 

انضربت براسي اريد اسيطر على روحي .. اريد اعدل نفسي نظراتي  .. ادية اليرجفن .. رجفت صوتي توتري الحرارة النزلت على راسي 

تالفيت وضعي واني اكلها : بعد بكيفج اني اروحن 

-يا تروحين شنو .. غير توج جيتي 

- لا حيدر منك لو طولت يكوم يحجي ومالي خلكه يمعودة 

- حيدر لو ضجتي 

 - اضوجن ليش خو انت صاحبتي وافرحلج 

- لا مو خاف عدج وياه شي 

- شعدي ويا دخيل بختك عرف ولف 

- مو ذيج المرة حجيتي يساعدج ويطيج حسبالي غرتي عليه 

- لا جا كل اليساعدني عده لو عدي شي وياي .. اروحن 

- ما ادري زين ما كتيلي شنو رايج .. ارضى لو اردهم 

- انت ناخذه قرارج ومقتنعة ما تحتاجين نصيحتي .. اودعناج 

خليت وطلعت بس الرجفة ابلعومي 

وارجف واشتعلت نار .. يرد مرت ويخطب واني اخر من يعلم ! 

كاعد يلعب علي لو شنهي سالفته 

وعاف نسوان العراق كلهن ما حلتله غير وفاء صاحبتي

امشي وعيوني مجلدات من القهر .. ما بجيت بس لو تطلع دمعتي وابجي وافرغ القهر البكلبي ارتاح .. احس صرخة بكلبي وبعيوني اريد اطلعها مني .. اتمنى اگل للعالم هذا كافي .. ما سويت شي يستحق كل هالأذية الجاي اعيشها .. 

طلعت فرع عمي .. وعبرت محل حازم وعبرت الشارع ركبت كية وطلعت  ، اول ما صعدت خابراني حازم ما جاوبته وقفلت التليفون كله من اساسه خاطر لا يلح وارد واسمعله واسمع تبريراته خليني اكرهه بلا ما يبرر ويكعد كلبي يقتنع بتربره ويقنع بعقلي ويبليني .. 

ما اريد غير اضم اذاني وعيوني عن الكل 

اريد ابتعد عن الكل .. الكل اذاني والكل اشترك بأذيتي 

محد شايل همي بهالدنيا .. اني الوحدي افكر بخواتي خاف ينضرن وابخوتي خاف ينفضحون و بامل وجهالها و حازم ووضعه .. 

اني الوحدي خطية محد غيري خطية 

اجتني تبجي وصدكتها وكلت تريد تعيد حساباتها وتلم بيتها 

حرام ادخل بينها وبين حازم واخرب خليني ابتعد وابتعدت والاسياء النا يرضى اسويهن سويتهن حتى يبتعد مني ويردها 

ويوم الردها تخطب صاحبتي 

وصاحبتي ما ادري عنها تدري لو بلا قصد 

صعبت عليا روحي حيل .. محد شايل همي اني لوحدي شايلة هم الكل . 

ضليت صافنة بالطريق والكية تمشي لحد ما نزل الكل والسايق صاح : خوية وين توصلين 

باوعت اني وين وشوصلني هنا 

كتله : اعتذر خوية دخت شوية .. بيش الساعة ؟ 

- دعش الا ربع ترديني اوصلج لمكان خاف تعبانة 

- لا الله يسلمك 

- عليج الله خوية خاف محتاجة شي 

-الله يكثر من امثالك .. مشكور 

جريت الباب ونزلت .. شيوصلني للبيت بعد 

انتظرت كية تمر ولا كية كاعد تعبر والشارع بده يفرغ 

تكسي اخافن اصعد ابد ما اصعد تكسي وحدي بس ال١٢ راح تصير ويدخل حظر التجوال ..وتفرغ الشوارع 

ضليت واكفة لحد ما وكفتلي سيارة 

اجرتها وصعدت للشماعية .. وصلاني اباب البيت عدل اطيته الكروة ومشى 

دخلت البيت جن كبر مو بيت .. ماكو شي يلمني بهالدنيا 

مالي مكان بيها .. لو ادري الغاية من عيشتي شنو 

ولو متت شراح يتأثر العالم وشينقصه ؟ 

كعدت مهمومة حيل مهمومة بس دموع ما هي 

ثكلت هدومي العليه وحيلي نهد .. 

لفيت راسي ومالي خلك اشوفن احد 

طب حيدر كال : شو نايمة 

ما رديت حجه : سويلي عشا 

-راسي يوجعني وخر مني 

-وراسج يوجعج شني اضل جوعان 

فزيت من فراشي :- وعيشتك عليييييه احسبني متت احسب الله خذه عمري وخلاصاني راح تموت جووووووع لو معتمد الخدامة تكووووم وتسويلك 

- بلا حجي زايد وكومي سويلي عشى 

لفيت راسي وعفته وراي .. 

كام يصيح ويغلط واجا دفرني بظهري فزيت واني اصرخ 

كطع نفسي بدفرته 

-كومي لا اسحلج والعباس 

-مسواك ما عدي ما اسوي روووح اتسوك واسويلك جاي اتصرب بيه وتريدني اصرف واتسوك واطبخ .. وانت صمون للبيت ما تجيب 

- غصبا ما عليج جا تفرين الشوارع وتخورين المممممممن 

- مخليني اخور حتى اجي اطبخلك .. 

الله ياخذني ويخلصني منكم .. الله يفكنيييي منكممممممم 

كام يصيح ولزم براسي 

وتولاني بوكيسات ضرب على راسي ويملخ بيه 

كمت اصيح وهو يدفعني للمطبخ الا تسويلي عشا .. 

دفعني ع الكاونتر اهتز وكعن منه اماعين اتكسرن .. كمت ابجي بقوة 

طلع هو من المطبخ و يصيح : خمس دقايق العشا يمي والقران ادفنج لو ما سويتي 

شغلت الطباخ عيوني تجري ذبيت  دهن وطكيت تلث بيضات ورحت حطيتهن كدامه صاح : الصموووون 

- ما عدي روح جيب 

-ياهو المفتح هسه واجيب طلعيييي 

-اطلع شني اكلك ما عدي 

-وشلووون اكل گفااار 

- كتلك تسوك 

- دبريلي شي شوفي 

- حيدر منين اجيبلك 

- وما كتي كبل لا اجي واجيبلي 

- واني شمدريني بيك تجي بدون عشا

- جا الواحد يضل جوعاااان 

ما رديت كام يصيح : مو عدج طحين تمن سوي سياح شوية 

- ما عدي 

- هسه كلشي ما ضل عدج 

مري على سارة خلي تجيبلج 

- الساعة راح تصير بالوحدة هي شني ادك بابها على خبز 

عفته وكعدت بالمطبخ .. 

بجيت على حالي لحد ما خويت .. 

سمعته طبك الباب .. كمت من مكاني شفته طب وبيده خبز مال بيت 

حجيت : منين جبت 

- دبرت 

- منين 

- مالج غرض ولو تموتين وعلي بحروثة ما انطيج طايحة الحظ 

عفته ورحت لفيت راسي ونمت 

كعدت الصبح .. هو نايم غميته وكمت .. 

فتحت الخط خابراني حازم ما رديت .. 

ردت اكوم للسوك بس راسي ثكيل كلش من كتلة حيدر طكني على راسي هواي .. الله يجازي بحوبتي ناخية الزهرة 

للظهر واني ما بيه حيل اشيل جسمي 

خابرت الدكتورة كتلها : حيل مريضة ما اكدر اجي 

- طنكرت تكلي : غير تبلغيني حتى ادبر وحدة تسد مكانج 

كتلها : واني ادري راح اتمرض 

كالت : ما اكدر لازم تداومين 

- بس دكتورة جسمي كلش متعبني 

- ادزلج تكسي وتعاي بس سجلي اسماء ودخلي المراجعين ع الرقم 

جبتها منا رديتها ما رضت .. 

كتلها : دزيلي لان ما اكدر امشي للشارع العام كلش تعبانة 

ساعة والسيارة يمي صعدت وصلني لباب العيادة 

صف حازم ورا السيارة درت وجهي منا .. وصعدت صعد وراي 

- اتصل بيج ليش ما تردين !؟ 

ما جاوبته طلعت المفاتيح وفتحت العيادة

فات وراي : صبا شصايبج رحمة لوالديج وعلي خبلتيني 

- ليش راكض وراي وانت خاطب غيري 

- يا غيرج مو انت الزنيتي براسي حتى ارجع امل من رجعتها زعلتي ترا راح اتسودن بالقران شسوي بعد ويرضيج ؟ 

- خاطب وفاء 

- اخت اسعد مو اني امي الخطبتها 

- وامك جبرتك وراح تتزوج وما تكدر تخالف حجي امك وطاعة الام واجبة واهم من كلشي صفطلي هالحجي وصفه اسمعك 

- شكاعد تخرطين بويه 

صبا شبيج اني تمشيني امي ؟ كل طولي الاحكج واركض وراج وانت دايرة عني ليش وشمغيرج علي

- تريد تقنعني ما عندك علم بخطبة وفاء 

- لا ادري بس بعد ما امي حجت ويا اهلها كالتلي وكتلها سدي الموضوع 

- وامك تروح تخطب بدون علمك 

- حتى تحرجني ويا اسعد واخوته لان صحباني .. بس ما اريد البنية اني ما بعازة مرة اني بعازتج الج .. دربي ما جاي اشوفه وانت دايرة عني ودايخ سبع دوخات اريد اعرف شبيج .. منو محاجيج من شنو متضايقة 

متضايقة من طبتي البيت عمي بعد ما اطب 

متضايقة جيف غصبتج على امور ما تودينها .. عمي متنازل بيها 

اليرضيج شنو والمزعلججججج شنهو صبا 

- المزعلني وضعنا 

- واني شبيدي على وضعنا .. عمي احسبيني مو رجلج خليني صاحبج وانسي العقد البينه اني حطيته عن الحرام بس انسيه خلينا هيج ليما الله يفرجها .. 

باوعت بوجهه : ما رايدة غير تعوفني بحالي وتروح 

صدك ما متحملة اشوف احد ولو ما الدكتورك الباب ما اطلعه 

- اذا مريضة امشي اخذج 

ولا تشتغلين مو خلص محرم وكتي شهر .. ارجعي اشتغلي بالبيت واني ادزلج مصرفج 

- ما اريد منك شي غير تبتعد 

تنهد وضاج وكال : من انعل ابو كلبي المخليني ساحل روحي وراح وانت اطردين بيه 

- عليمن يسحلك وفاء وامل موجودات يعوضن 

- صدك الدنيا بيها هواي وجوه ما توكف عليج 

محترك رايد راحتها وهي شايلة بخشمها السز .. دروووحي 

مشى من عندي .. 

ضليت كوا امشي المراجعين 

خابراني عمي .. رديت عليه ، كال : شلونج 

شو تمرين من الدكان لا تسلمين لا تكولين 

- عمي مو انت الطردتني وكتلي ما اريدج توصلين 

- اني ما اريدج لو مليت من مصايبكم 

- واني يا عمي المصايب تركض وراي ما تعرفني 

- خير شمالج 

دمعت عيوني : هواي المضموات تحت افادي عمي 

- مريلنا اليوم عدي وياج حجي 

- مخابرك حيدر شاكيلك عني 

- لا بالعباس ليش اشصاير بينج وبين حيدر 

- هيج سوالف حيدر ما تكضي 

- دمري مري خاطر نسولف 

- اكضي الشغل وامركم 

- ديلا متانيج 

سديته منه وكت ما كضيت مشيت كوا اجر اجدامي .. 

مشيت لبيت عمي اول ما دخلت جهال سهى تلكوني .. حضنتهم : جا انتم هنا امكم وين 

طلعت هي : هلا اصبية شلونج 

باوستني : شني شو هنا خير 

- عمي دز علي وكت رجلي اخذني بالليل اردن 

- صاير شي 

طلعت عمتي : ها اصبية هنا تعاي اطيني حبة 

- هلا عمة 

سلمت عليها ... وباوستها واجت هدى هم سلمت 

كالت : انتظرناج ما تعشينا 

صبوا العشا وطلع عمي جان قافل باب الدكان من جوا خاطر الجهال لا يطبوله .. سلمت عليه كال : جا حيدر شماله 

- جيف ما مسوية عشا كضاني وتولاني بوكسيات على راسي 

- جان سويتيله اعشي يا عمي 

- عمي مسواك ما متسوكة وصمون ما عدي منين 

من اكله اجيب ما يرضى ومن اكله ما عدي يكتلني 

- مو كاعد تشتغلين 

- شيصيرن هالفلوس عمي للقساط لو روحتي وجيتي يومية واكلي برا لو المن .. ما تكول عنه راتبه بالمليون وفوك يستحيفله يجيبله حاجة للبيت 

- واليخلصج من حيدر وشاكلته 

صفنت ، حجت سهى : والله اقتراح عمي ما بيه شي وترتاحين لا جعفر ولا ضيم حيدر مو تريدين تفتكين منهم 

- شنو هو ؟ 

كاعدين ع السفرة وملتمين وهو يسولف : عدنان خابراني وكالي شايفج بكيا صاعدة بالليل 

- اي ذاك اليوم طلع كدامي 

- هو ومرته خراب وعلى وجه طلاك 

- لا تكلي ارجعيلا عمي 

- دسمعي يا عمي هسه ليش تلبكين 

- بس كلشي ولا تكلي رديلا 

- وشنهو المانع ؟ جانت علته امه وتزن وما تنحمل .. 

وهاي راح تخلصين منها 

- وشلون اخلص منها ؟ 

- مو عدج بيت 

- وكل عقلك حيدر يعوف البيت شبيك عمي 

- هاي يمي اطلعلجياه من ياخته وانعلج سلفه سلفاه 

- عمي ارد العدنان الباعني علمود مرة 

- جا حقه عمي زلمة رايد ضنا وانت عاجر المفروض تفهمين وضعج وما تعتبين حكه يرد ولد 

- وصار عده الولد شله بيه بعد 

- هو يكول اني تندمت ومن عفتها الله ما وفقني وهي جانت لامتني 

- قصدك جنت معيشته ونايم ليله ونهاره فاك حلكه واني اعلف بيه وكل فايده ما منه بس صار بديه تراب ذبني للشارع 

- هسه غلط ولا تنكرين هو من البداية ما هاوي الطلاك بس لان ما عده مكان طلكاج .. وهيه تغير الحال مكان عدج وهو رايدج وانت متضايقة من جعفر وحيدر وسيطرتهم عليه وعدنان تعرفينه لا يمنعج من شغل ولا من طبه ولا من طلعة على راحتج تروحين وتردين محد يكل لبختج ولك 

سهى : ما بيهاش ي اقلها رجلها وابو بيتها 

خزرتها : شنو الما بيها شي انت تعرفين اني ما اكدر ارجع لعدنان

عمي : ليش ما تكدرين 

- ما اكدر عمي خليني هيج رحمة لوالديك 

- عمي مصايبكم طالت وصعبة يا عمي حيدر يروح ١٥ يوم اتضلين بالبيت وحيدج بلا رجل 

- احسبني متزوجة ورجلي منتسب ويجي ١٥ ويروح ١٥ شني اتطلك .. هذا الحال عمي 

سهى : اذا عدنان رايدج ومستعد .. 

قاطعت : شمسسسستعد رحمة لوالديج سهى الا انت لا تضغطين عليه 

- لا لان اعرفج اضغط عليج وما عدج كل مبرر ترفضين 

- تعرفين كل الزين عدنان ما اريده 

- لا غصبا ما عليج ترجعين كافي صبا تعبنا من المشاكل اقلها اسمه رجال فوك راسج وانت مدبرة عيشتج وسباعية ما بحاجة احد 

- وما طولني ما بحاجة احد اجيب عدنان واحطه فوك راسي لييييش 

شنو نسيتو شكر توسلت بيه من جعفر ذباني بالشارع وضليت كاعدة عد عمي لفو واكله مالي مكان فدوة ابوس ايدك رجعين لا يرد ولا يشوف رسايلي اتزوج ونسى وكفاتي وياه وذباني وهسه من ذبته الدنيا لا مرة تحمله ولا شغل عده تعاي صبا رديله شني زايدة عدكم صبا كاعدة اعلى كلبوكم ماخذة من جيوبكم معيشيني شايلين همي تجون وتفرضون وتحجون وانتم واحدكم بفلس ما شايل عني بس رايدن تخلصون منييي 

حجه عمي : وتضلين عزززززبة 

- اظلن عزبة ولا احط هم زايد فوك افادي 

- وضالة انت الاهم على افاد الوادم 

- وليش هم عمي بيش موازيتكم اني جاية بدرب احد كاربتكم 

- الوادم كلت وجوهنا يا المطلكة ويا العاجر وطبت ويا هاذ ومشت ويا هاذ وصاريحج كثر وما اريد اكلج باخر سالفة عملتيها وخليتي اخوتج وذر 

-والله عمي ما مسويتلي سالفة رحت اخدم وغيري هو التاهمني واخوتي ما عولوا سالفة تذمني صفكولها الا الزلمة اجا وراد يسد السالفة التكول عنها عيب ما وافقتوا عمي 

- عمي احجيلنا الصراحة عدج شي ويا حويزم ؟ 

- يعني اذا ما اريد عدنان تتهمني بحازم 

- الزلمة مو خالي نوبتين خطب والثالثة اجا وما جنت موجود ونهرت وما خليته يكرب 

- شنهو السبب عمي 

- هاااه بحازم ادورين اسباب وبعدنان تصيحين ما اريدن رجل 

- عمي لا اريدن حازم ولا اريدن عدنان بس فكرني رحمة لوالديكم وعلي جزعت والحسين حيل ما ضلي كافي عوفوني 

سهى : هو شنو النعوفج ترا مرجعج علينا والكلمة التجيج تصيبنا وانت تعرفين الحجي الصاير لا تضلين تنعثلين وعوفوني وفكوني شنهي جاية من الشارع لو تايهة .. 

شبي عدنا زلمة وغلط وسبحان الما يغلط .. وجاي يصحح غلطه 

ووضعج اليوم مو مثل امس بعد نعثلتج هاي شيسموونها 

-سفرة دايمة اني لازم اروحن اذا تأخرت ما الكى كيات توصلني 

- رجلي راح يجي ونوصلج بدربنا 

- لا خية اخذي راحتج ما اريد اكلفج بهمي اني احيرن بروحي

- عود شنية كاعد تشردين علمود تعوفينا وراج 

- اعرفكم وراي ليش كتلولي عدنان طالبج ترضين كتلكم لا وانتهت بعد الجر والعر لييييش ساعتين و ينفرض الحظر وما اكدر اوصل 

عمي : وعدنان شكله 

- كله ما تريدك فك منها 

سهى : لا ترد عليه عمي اطي صبر 

كومو خل نروح وياها عود اخابره يجينا ليغاد 

لبست عبايتي وهي لبست جهالها جراكزهم .. 

سلمنا على عمي وطلعنا، انت شني ما اتوبين ولج ما تجوووزين 

- سهى عدنا ما اريده ترا جزعتوني يوم حسن يوم عدنا ادري كاااااعدة اعلى كلوبكم 

- لا ما كاعدة على كلوبنا كاعدتلنا على قنبلة بكد راسج لو تفجرت نروح بيها كلنا .. وهل جاي ازيحج عنها 

- عوفيني بحالي رحمة لاهلج 

- ما اعوفج صبا كافي اخلصي وخلصي روحج ولج عدنان دثو وعدج بيت وعدج شغل تروحين وتجين وتاكلين وتشربين لا يحاسبج ولا يكلج وامه افتكيتي منها بعد اسبابج شنو 

- اسبابي اني متزوووووجة تعرفين شنو يعني متزوجة 

- وانت يمكصوفة الركبة حاسبته زواااح ولج هذا زواج متعة 

- مو متعة احنا متزوجين بعقد وشهود وناس تدري بزواجنا بس اهلي ما يدرون 

- يعني زواج بالسر بالختلة يتداحس وياج حتى يحصلج ولج هالكثر انت رخيصة 

- اتفقت وياه اليوم لا يكربني ولا يوصل البيت 

- وصدكتي بيه رضى اليوم حتى يسكتج باجر يكلج طالبج وغصبا ما عليج تروحين ولج كافي جوزي من حازم 

- ما اكدر سهى والله ما اكدر تفتهميين 

- لا ما افتهم وتعوفينه غصبا ما عليج والا والله اوصل الحجاية لاخوتي يتصرفون وياج كبل لا ننشهر وتصير حجايتنا على كل السان 

- تهدديني ؟ اريدج عون تصبحيلي فرعون 

- ما فرعون غيرج الصايرة كابوس على عيونه يمتى ما ردنا ننام نجر حسبات من وراج لو انفضحتي شنحجي وشنكوووول 

- سهى والله تعبانة احد منكم يفهمني .. اني حتى حازم باعدته مني 

بس 

- بس تطلكين ما طولج وياه تلولحين لا انت لسما ولا انت الكاع راح تضلين معلكة ولج وهمج على كلبج 

عبرنا الشارع واني كضيت جهالها وياها .. صعدنا كيا فارغة بس احنا والجهال كتلها : من غير هيج اني مقهورة امه ومرته امس خاطباتله 

- خاطبات المن 

- لحازم 

- مرته خاطبتله !؟ عزا العزاها كون شنو من مرة وتخطب لرجلها 

- اجتني تتوسلني حتى اقنعه يرجعها وابتعد من رجلها حتى ترجع العالقة منه وتبطل من الشغل تالي من اتعاركت وياه وخليته يرجعها تروح تخطب صاحبتي واقرب وحدة اليه 

- وصاحبتج شلون رضت 

- ما تدري 

- ما حاجيتله 

- كايلتلها تهموني بحازم بس ما تدري هيج الوضع بيناتنا 

- ومبقية روحج معلكة بهالخيسة ليش 

ولج اكسبي راحة بالج وارضي عدنان وعيشي لا جعفر يكدر يحاسبج ولحد يكلج وين رحتي ووين اجيتي الاطاج مشكور الما اطاج خيرج بجيبج وعايشة براحة 

سكتت : هالفترة ما اريد غير اعيش براحة 

تعبت احسب وافكر واوهوس واشيل هم كلش تعبت 

بس ما اريد ارجع لعدنان .. كش كلبي منه وبكل الاحوال 

حازم ما راح يطلك ادري راح يبقى مصر وما يفك 

- تعوفينها علي 

- شتسوين ؟ 

- اني اروحلا 

- راح يرد عليه 

- قفلي كل البوب بوجهه ولا تستقبليه 

- وشگل لكلبي ؟ 

- دفني وبطم حجار وتراب طميه 

شمتأملة صبا ؟ 

جعفر يغير قراره ويرضى لو تضلين معلكة بالسر 

سكتت .. وضلت هي تحجي 

وتسرد براسي وتقنعين بس كلبي شيقنعه ابتعد وانسى 

تورطت كلبي بيه ما اكدر ما احس بالراحة بس وكت الاشوفه 

روحي وياه غير عيشتي غير شعوري غير .. اني يمه غير احس بروحي انسان .. احد مهتملها وشايل همها ومسؤليتها 

محد بهالعالم حسيت بيه يحبني ويهتملي مثل حازم 

شلون اخسره وارد اعيش من غيره 

ونصبح غرب لا يهتملي ولا اركضله لو ضاكت بيه الدنيا 

وصلنا للبيت وهي صوت جاي وكعدت اشرب وياها من غير خلگ 

اخذت رقمه من تليفوني وحذفته من تليفوني وكالت : لا تردين ابد ولو عرضلج انهري ولا تحجين وياه خليني اخلصج واخلص ارواحنا من هالمصيبة 

شوية واجاها رجلها راحت وياه .. 

كعدت اكلب بالتلفزيون .. حطيته على قناة اغانينا 

جانت هالقناة تعيد وتصقل باغنية اوراس ستار ( سويتها وحبيت ) ولا احبها وشكد اضوج من اطلعها .. واحس اغنية ولا بيها معنى 

بس واني بعز صفنتي اذني شكلت ويا الاغنية 

كاامت تجري دموعي واني اسمع 

شبيه مالي خلگ و موحش عليه البيت 

يا گلبي بس لا صدگ سويتها وحبيت 

... لافة روحي وحاطة راسي بين رجليه 

واحس الدنيا كاعد تخنكني شلون ادبرها واعبر حازم و انسى 

شلون واني ما شفت منه شي يأذيني 

شلون اقنع روحي تكرهه 

وهي ما لگت الامان الا بحضنه 

لفيت راسي وسويت روحي نايمة من اجا حيدر ما كمتلا 

ثاني يوم بالعيادة خابراني حازم 

بس لح ٩ مكالمات وما رديت .. 

لل٩ لما نزلت لگيته واكف بسيارته كبال العيادة 

بس شافني نزل من السيارة .. اشرلي وكال : امشي كدامي 

- حازم لا اتعب روحك واتعبني .. انهي الموضوع هاذ وطلك 

- امشي جااااي اكلج 

صعدت وياه .. حجه : اختج خابرتني تكلي صبا رضت ترجع لعدنان 

صحيح هذا الحجي صبا 

سكتت ، صررررخ : جاوبي 

- بودي ارجع بس انت العثرة والواكفة بدربي 

- اني صرت عثرة صبا !؟ ولج بيش قصرت وياج وتجازيني هيج 

ولج تطين كلمة تردين للقديم وانت على ذمتي جا شكثر هاينتني وما حاطتلي قدر ولج 

ولج قصوووووري وياااااج شنهووووو 

مر اسبوع ما حطيتلج مسواكج اباببببج لو مصرفج بيدج 

كتلج عوفي الشغل وارتاحي اني اشيل عنج 

كلتي ما اريد اجي لبيتك وكتلج امررررج 

كلتي ما اريدك تجي لبيتي وكتلج امرررج 

وكلتي ما احمل جهالك رجع مرتك وكتلج امرررج 

كلتي ابعد وخليني ارتاح واني الاجي المتلهف اشوفج 

وكتلجججححح امرررج تالي اطلع عثرة وتردين لزلمة وانت على ذمتي ولج !؟ 

كامت تجري دموعي 

صرخ : احجييييييي 

- طلكني وبس ما اريد احجي اي شي 

انهي البديته بيناتنا 

- هيج اني صرت ثكل عليج واني محد شال ثكلج وهمج غيري 

هيج المجازاة يا طايحة الحظ يا جاحدة يا جلببببببببببه 

يصرخ واني ابعد بروحي من صوته ولامة نفسي .. ودموعي بعدها ترجع 

وكف السيارة قريب من شارعنا وكال : هاي امرج .. والج التريدينه . 

انزلي ولا تشوفيني وجهج بعد . 

نزلت من السيارة 

ابجي ابجي من كل كلبي 

دخلت البيت كأنما ناصبتلي عزا .. 

ولكم يا ناس مو بيدي اريده بس ما اكدر اضل وياه 

مالي درب اليجمعني بيه .. ودربي وياه صعب علي وعليه 

روحي مثل الجرح الجويته بنار خاطر يطيب .. وهاي النار جاي تاكل بروحي وتطفي شكو راحة وروح بداخلي . 

مرت ٤ ايام جانت الدقيقة تمر بيهن بالف يا علي 

امشي مثل الميت اشتاقله اريده وما بيدي اردله .. هاهية خليني احترك واصبح رماد وانطفي 

الاربعاء خابرتني وفاء 

رديت عليها واني بالعيادة كالتلي : صبا محتاجتلج 

- خير ؟ كولي عيوني الج حبيبتي 

- خطبتي الجمعة واحتاجج وياي 

- خطبتج 

- اي مو كتلج لحازم ابو الأنشائية ردينا الكلمة موافقين وكبل امس خابرونا علمود الحاضر والغايب 

هي تحجي واني كلبي انحصر مثل واحد وداس بيه حيل 

كمت افرك بصدري بس اريد اتنفس اختنكت حيل 

كالت : الو 

- وياج 

- تجيني اليوم 

- ما اكدر .. يعني شوية 

لحظة امشي المريضة 

سديته منها وطلعت للبلكونة مال العيادة اريد اجر الهوى مثل واحد يعالج روحه جاي تطلع .. كمت اشهك وابجي بقوة 

اجني المريضات وراي جابلي مي .. ووكفن يفركن بظهري 

وهن يكللي : ياهو المات .. شصاير وياج احبيبية احجي 

- واحد كرابتنا عزيز مات .. حيل عزيز حيل 

حضنت المرة وكمت ابجي من كل گلبي 

وصلن للدكتورة طلعت كاللها البنات واحد مات عدهم 

كالت الدكتورة : البقاء لله اذا تريدين اخذي راحتج .. وروحي ما بقى هواية امشيهن واني اقفل العيادة 

عفت البنية واني ابجي من كل حيلي 

وامسح بوجهي وترد الدموع تهمل .. 

عبرت الشارع .. وركب للبيت اول ما خابرت خواتي جمعتهن باتصال واحد كتلهن : ولجن راح اموت تعاللي والله راح امووووت 

فزن:  شبييييج ولج شصايرلج  

- ولجن كالي ما يريدها وطلع ناوي عليها وعكب باجر خطبتهم واني هذا حااااالي 

- منووو 

- حااازم 

سهى : نذل شتترجين منه خل يولي الله خلصج منه 

- ولكم شلون اقنع رووووحي شلون ولجن اريدن اموووووووت 

راح اطك تعبت اريد اموووت 

كامن يهدن بيه واني مثل النار مشتعلة ما كدرن يجن 

و حيدر ملتحق وبس اني بالبيت نصبتلي عزا ابيتي كد ما بجيت ولطمت ودكيت على راسي 

خابرني ثاني يوم الصبح اني رماد .. 

لا بيه اشيلن ايد ولا رجل .. كاللي : اتحججي ولا تروحين للخطبة 

- لا وفاء محتاجتني لازم امشيلها فد شوية 

- وعليمن تقهرين بروحج 

- محتاجة موقف احطه لروحي واقنعها تتركه وتنساه 

ماله موقف وياي مو زين غير هاذ محتاجة روحي تنفره وتكرهه 

اريده يطلع من كلبي اريد اخلي روحي منه .. خليني اشبع بشوفته ويا غيري لحد ما اكرهه 

كامن يقنعني : ولج تاذين روحج ولج خافي على نفسج على يا ساعة يطك بيج شي من القهر لو يشكل وياج سكر لو ضغط لو مرض ياهو اليفيدج يحضن نسوانه وانت تضلين عالة اعلى غيرج 

ما قنعت ولا رضيت للضهر خابرت وفاء كالتلي : اريدج نروح اني وياج للسوك نختار البدلة مال المهر ونروح نشوف صالون 

- ساعة واني يمج 

- اي والله حبيبتي ولو اتعبج بس تعرفيني شكد احبج وما اريد غيرج تساعدني 

- بعيني 

لبست وطلعت الها وصلت الهم جان اسعد بالباب 

كال : ها شو مريضة 

- هلا اسعد اي والله انفلاونزا متعبتني 

- اتريدين اخذج دكتور 

- لا يطيك العافية وفاء محتاجتني هي موجودة 

- اي منتظرتج خاطر تروح للسوك اوصلجن بطريقي 

- ما ادري اطب اشوفها 

دخلت هي اتلكتني : ها شبيج 

- ولج مريضة 

- لعد ابقي اني ومرت اخوي نروح 

- لا يمعودة ماكو شي دمشي 

- عليج العباس مريضة لو هكو شي 

- اي وفاء دمشي والله ما بيه حيل امشي 

مشت واسعد كال : اصعدن اوصلجن السوك 

كام وخذانا لسوك الكيارة مشيتا واني كوا اجرن خطواتي وكاتمة دموعي 

بس مبينة مثل وحدة ميتلها واحد حيلي مهدد 

اجرنا بدلة سمائية واخذنا احتياجاتها وطلعنا لصالون عشتار 

اتفقنا باجر من الصبح احنه يمها حتى ع الساعة ١ مكملين .. وانطينا عربون وطلعنا .. 

ورجعنا للبيت ورا المغرب .. 

تعشينا وطلبت مني احفلها واشيرلها 

كمت نظفتها واشتغللتلها جسمها .. واهلها مخبوصين بتنظيف البيت والمسواك للناس التجي باجر 

كالتلي امها : خالة اريدنج وياها فدوة لا تعرفيها نسوان اخوتها راح يظلن هنا ع الطبخ والبيت واني ما افتهم مثلجن بهالامور 

- ابطن عيني خالة اروح وياها 

طفينا من وكت حتى نكعد من الصبح ... 

بس حرام لو شافت عيوني النوم .. بس البجي صفالها بهالليل 

وابجي بسكوت حتى لا يسمع احد .. 

لما كعدنا الصبح غسلت وسبحت وراها .. 

وطلعنا كبل للـ صالون عفتها و طلعت لسوك الكيارة جبتلها البدلة واني اجرتلي فستان ب١٥  .. لونه اسود كحلي مخصر ع الجسم ويجي طويل بس جوا الركبة بشبر .. وبيه جاكة من ورا .. لان ما عدي ملابس البسهن بالخطبة .. خوما اطلع مجرودة . 

رجعت للصالون .. 

هي كاعدة ع الشعر كاعد يشسورون شعرها 

كتلها : وفاء امكيج فد مرة هنا شو مالي خلك امكيج روحي 

- مكياجهن غالي يمعودة وشعدج انت حمرة وكحلة والحك ربعك 

- مالي خلك ولج مريضة وكوا امشي 

- الله يعينج عيني الله يعينج 

عفتها ومشيت لام المكياج كتلها اويد مكياج خفيف ونازك بيش 

كالتلي ٥٠ تسريحة و مكياج 

- لا هواي 

ضليت اتعامل وياها حلبتها رضت تسويلي التسريحة والمكياج ب٣٥ بس تسريحة ومكياج بسيط حيل 

كتلها : رضن ب٣٥ 

- وشعدج مكياج و تسريحة شبيج قابل عرسج 

- جا اطلع كدام الناس مبهذلة 

- والله ما ادري بعد اذا مقتنعة ونفسيتج راضية راجعلج 

تركتها وكعدت ع الكرسي سشورتلي شعري .. 

وانتقلت للمكياج صاحت وفاء : هذا الفستان مالمن الويا بدلتي صبا 

- فستاني 

اجت يمي : وليش جايبة فستان 

- جا ما عدي شي البسه 

- انت شو حاسبة روحج حالج حالي فستان ومكياج و تسريحة 

- غير وصيفة العروسة

- وصيفتيش شو احس غير شي 

- غير شي مثل شنو 

- بعد ما ادري انت اعرف 

عافتني ومشت باوعت وراها : شبيها هاي غارت لان كاعد اترتب وياها !؟ 

هذا هم حظي 

نعمتلي شعري وسحبته كله ليورا  ورفعته رفعة خفيفة من يم اذني 

ونزلتلي زلفين رفيعين منا ومنا .. ومكيجتلي مكياج خفيف وردي .. 

كامت وفاء تصيح : جا جايبتج تحتارين بيه وتساعديني لو تحيرين بروحج 

- خلصت 

- هي شني الخلصتي الساعة وحدة ونص واني لحد هسه بدلة ما لابسة ولا داهنة جسمي 

خلصت بسرعة وكمتلها .. باوعت وجهي ضاجت حيل 

مكياجها عود لان عروس مطوخاته الها حيل مخلياتلها ظل اسود وسمائي وحمرة لونها فوشي طوخ .. وهي وجهه ما متعود للمكياج ما حبته 

كالتلي : مكياجي طوخ مو مثل مكياجج 

- غير انت العروس ولازم تبرزين 

- بس مو حلو ما حبيته 

- وهسه لون 

راحت حجت ويا ام الصالون كالتلها : اني ما ردته طوخ هيج 

وام الصالون كالتلها : احنا كنالج تريدينه هيج لو خفيف وانت ردتي بارز 

- اي بارز  بس مو هيج 

كامن يتحاجن كلمة منها كلمة من ام الصالون تعاركن 

سحبتها وكمت اساعدها تلبس البدلة .. لبستها واجر القيطان واشد 

وروحي مهمومة ومهدومة 

كمت ادهنلها جسمها ببوطرة جوليا

ورتبتها ولبستها الذهب مال امها .. ورادت تكتب حازم على صدرها ، كتلها : زحمة ما ترهم لان هاي خطبة مو حنة بالحنة تنقشين اسمه 

جان تكلي : اني رايدة اخطن اسمه انت شحارك حمامج 

وسوتها بضحكة وتكلي لو لان شفتيني راح اعرس وانت ظلين عزبة 

- يا اغار ليش  على بختج بالعافية 

- لا مو حركاتج مو طبيعية فستان وتسريحة ومكياج وحاطة روحج 

-اذا مضايقتج امسح كلشي والبس جراويدي واروح وياج 

- لا عليمن بعد .. قابل شنو اني اغارن منج 

- لا والله جديات اذا اتضايقتي امسح كلشي 

-عوفي بعد شتسويلا 

كملتها وخابرت اسعد .. 

اني لفيت حجابي ولبست العباية على اجتافي حتى ما تضغط ع التسريحة وساعدتها تلبس الكاب وتطلع ... صعدتها ورا واساعدها تلم بدلتها ورجعت جبت الفستان وعلاكة غراضنا 

لكيت اسعد بوجهي .. صفن كال : ولو تزعلين مني بس اشتعلوا اهلج على هالحسن الشايلته 

ابتسمت بمجاملة ورحت صعدت وياها هي مطنكرة حيل 

وصلن للبيت .. تلكنها الحبايب يصفكن ويركصن وياها واني دخلت جوا ويا مرت اخوها جاي تمكيج جكيت الفستان وساعدتني بالسحابة .. باوعت روحي بالمرايا صرت غير وحدة .. اصلا مو اني 

صبا المجرودة التركض والعشا خباز هاي اني 

حجت مرت اخو وفاء : شطالعة تخبلين شكد ظالمة روحج ولج 

ابتسمت بقهرة :- حبيبتي 

شفايدة هالحسن وهالترتيب واليوم انذبح كدامهم وهم يعقدون كبال عيني 

ساعدتني ودهنتلي جسمي .. ورتبت شعري واطتني كعب منها 

اتكلكل بيه ما اعرف البسه .. 

لحد ما صاحو اجوووو 

انقبضت روحي وانفاسي وصلت لبلعومي 

دخلوا ناسهم مو هواي خواته ومرته وبته واثنين نسوان كبار وامه .. 

كعدن ربعن بالكاع لا صفكة لا هلهولة ووفاء كاعدة 

امل ما عرفتني ولا ميزتني من. المكياج والتسريحة والفستان 

مشيت ويا جناينهم كمت احضر العصير والكيك ودينا للزم وكاعد احضر للنسوان بس بالي وروحي كلها مو وياي 

اتعجبت بروحي شكد قوية وواكفة بحيلي اخدم وامشي 

اخذت صينية بيبسي ورحت اوزع ع النسوان من قدمت لامل عرفتني كالت : صبا هنا 

-اي غير خطبة صاحبتي 

- صاحبتج !؟ تعرفين صحبة انت 

- اعرف الصحبة احسن ما اعرف المكر والبجي الحذب 

-يا وتشمرين بسامير 

حجت امه : شمالج ياهي هاي 

-شبيج صبا 

فزت امه واخته : صدك هي وشعدها جاية 

-عود صاحبتها 

قدمت ووفاء صاحتلي : ابقي بالمطبخ لا ادخلين لا يصير حجي 

باوعت بوجهه مطنكرة ومعكدة حاجبها سكتت وانسحبت للمطبخ 

قروا الفاتحة وطلعن النسوان من الهول للمطبخ حتى الشيخ يطب يعقد 

دخلوا وعقدوا وخلصوا .. 

وطلعوا وام وفاء صاحت ع الكيكة مال العرسان والعصير 

خذتها مرت اخوها ما ردت اطلع بس احس اختنكت حيل 

وكلهم موجودين لو بجيت افضح روحي 

احس ورطت روحي بهالجية 

بس محتاجة اكرهه خليني اشوفه شلون خطب صاحبتي حتى يغثني ويكسرني .. اريده يأذيني واخذلي موقف موزين منه اكرهه بيه 

جريت شال وذبيته على راسي ودخلت هو كاعد وعاقد حاجبه وهي مطنكره 

وخواته يصفكن والبنات الصغار 

انجمعت الدموع بعيني من شفته 

مدنك هو جيف كلها نسوان واخته تطي الحلقة حتى يلبسها 

رفع راسه شافني كدامه 

ضليت اباوع بوجهه 

بقى ثواني يحاول يستوعب هاي اني 

وواكفة كدامه .. ما اتحملت نزلت دموعي 

شافتني وفاء .. انسحبت بسرعة وطلعت ..... يتبع