كنت قاعدة عند مقبرة بابا بقرا قرآن ومستنبه سماح وبعد عشر دقايق سمعت صوت واحدة بتقولي..

" اتاخرت عليك معلش "  برفع عينى لقيت واحدة لابسه نقاب اسود وعباية سودا مش باين منها حاجة خالص .. "

بصتلها بتعجب وقولتلها ..مين

 قالتلي ..

"  انا سماح ...اتاخرت عليك  شوية... بصتلها اووى وانا مستغربة وقولتلها ..

" سماح مين ...."

قالتلي " ام سليم اللى جاين علشان نكلم التربي علشان العمل..."

 قولتلها بتعجب ..

" نعم  ولبست نقاب امتى ان شاء الله  دانا لسه شيفاك اول امبارح عادى ونصف شعرك كان باين ...

قالتلي "  ربنا يهدينا جميعا .." 

انا قعدت اضحك وعادتى اني مش بعرف امسك  نفسي من الضحك  لما بتوتر  ،  وبعدين قولتلها ببرود 

"  انت هتستهبلي ولا إيه ... "

وكنت متغاظة منها ومدايقة اووى..

بقى عاوزة تداري نفسها علشان التربي ميعرفهاش.. وتدبسنى انا يا ساتر يارب على الإنسان وشره..

 قولتلها بغيظ" يعنى ربنا هداكى انهاردة بالذات علشان تلبسي النقاب مشاء الله ربنا يثبتك يارب ...وبعدين سبتها ومشيت وخرجت من باب المقابر بسرعة ..

 لقتها جت ورايا بسرعة ..

وبتقولى " انت رايحة فين  الترابي هناك اهو انت خارجة ليه ...

بصتلها بقرف وقولتلها " روحى كلميه جاية ورايا ليه .."

قالتلي " احنا مش متفقين ولا إيه...."

بصتلها بلامبالاة وقولتلها " 

الحمد لله ربنا هدانى انا كمان وخلانى مدخلش في الحاجة اللي متخصنيش خالص..

ومشيت بسرعة وهى فضلت ماشية ورايا تنادي عليا بس مردتش ابصلها تاني ولقيت توكتوك ركبت علطول يطلعنى لأول الشارع علشان أخلص منها وانا كنت متغاظة  حاولت تمشي ورايا وتنادي عليا بس ما لحقتنيش كنت انا اتحركت بالتوك توك ومشيت بسرعه..

 ماكنتش عايزه اقف ولا عايزه اشوفها ولا عايزه اعرف عنها حاجه خالص بعد كدة  وقولت  كفاية بقى لغاية هنا ، و كل تفكري بيقولي انها ست مش كويسه وراها حاجه غلط والأفضل البعد عنها ...

 رجعت البيت وكان ورايا كام حاجه عملتها..

 وبالليل نزلت العياده وكان عندي اليوم ده شغل كتير واتاخرت فيه  شويه وقعدت لغايه الساعه 12:00 بالليل ..

والساعه 12:00 وخمس دقايق وانا بقفل لقيت في ست داخله العيادة  ومعاها عصفور ، الأول مكنتش اخده بالي منها لانى 

 كنت مديها ظهري، و كنت بقفل  الدنيا وبظبط المكان لان المساعدة مشيت بدرى و كنت هقفل المكان وامشي  ..

لما انتبهت لها اتصدمت ورجعت لورا خطوتين برعب دى كانت نفس الست اللى كانت قاعدة على الكرسي الاسود...

العفريت بسم الله الرحمن الرحيم .

نفس الشكل بالظبط معقول الشبه للدرجة دى حاجة غريبة جدا ..

كانت لابسة عباية سودا ودا خلانى اتأكد انها مش هي لان الشبح كان لابس عباية بنى لامع ...

رجعت لورا بصدمة وهى بتقرب من مكان الكشف وبتقولى ازيك يا دكتورة منى معلش شكلك بتقفلي بس العصفور تعبان اووى وخوفت بموت منى فنزلت اجري ...

حاولت اتمالك أعصابي واتكلم بهدوء 

وقلتلها "  لا مفيش حاجة اتفضلي معاك ايه ماله العصفور ...؟

قالتلي تعبان اووى مش عارفة مش عاوز ياكل وخايفة يموت ...ودا عزيز عليا اووى أختى سيبالى عصافيرها الله يرحمها .. وعيونها دمعت ..

قولتلها ربنا يرحمها يارب ..

قالتلي كانت بتحبك جدا  ..

قولتلها بتعحب انا هي كانت تعرفني  ..

قالتلي ايوة  

جاتلك مرتين من فترة كبيرة وعصافيرها كانت تعبانه وخفت وبقيت تدعيلك ديما ،انا مش فاكرة لان زبائن الطيور بيكون ترددهم على العيادة قليل جدا وانا مش بفتكر اشخاص بس بفتكر الحيوان لما اشوفه مع تقدم السن والزهايمر بقى ...

بس معرفش ليه جاتلي فكرة غريبة في دماغي وقولتلها 

" اختك مين ..فكريني كدة هى شكلها إيه...؟

بصتلي كدة بحزن وقالتلي.. 

"أختى التؤام يا دكتورة الله يرحمها يارب..

انا هنا الصدمة مش قادرة اتكلم...كدة انا فهمت ليه شوفت الست اللى على الكرسي الاسود دى تعرفنى وانا اتكلمت معاها قبل كدة كان في تواصل بينا حتى لو بسيط في رابط للي بيحصل معايا  ...

دى عاملة زى شبح عم اسماعيل اللى كان بيتواصل معايا لما كنت شغاله في معمل التحاليل وشبح مدام صفاء الله يرحمهم  وكانوا عاوزين منى طلبات ورسايل لاولادهم ...

كدة بدأت افهم والصورة توضح أكثر...اصلى كنت مستغربه ليه اشوف الست دى واشمعنا انا من اول ما القصة بدأت وانا مش قادرة استوعب حاجة...

قولتلها " انت اختك كانت شبهك بالظبط هى ماتت ازاى "

عيونها دمعت وسكتت شويه وهى بتبص للعصفور وقالتلي 

" محدش عارف تعبت مرة واحدة وماتت بالمستشفى.."

قولتلها مستشفى ...قالتلي ايوه ماتت هناك ربنا يرحمها يارب داخله على ٣ شهور اهي ...

قولتلها وانا بمسك العصفور اشوفه وكدة انا اتاكدت انها هي ..

قولتلها وبنتها ما اخدتش العصافير ليه ..

ابتسمت بحزن وقالت

" اختي  مكنش عندها غير ولدين  واحد شغال برا  مصر والتاني مراته مبتحبش الطيور والحيوانات ...

قولتلها بسرعة ..سماح 

قالتلي ايوة سماح انت تعرفيها دى مش ساكنه هنا...

قولتلها المرحومة كانت حكيتلي عليها افتكرت .. 

وانا بشوف العصفور لقيتها بتقولى..

" عارفه يا بنتى حلمت باختى امبارح وقالتلي خلى بالك من العصافير وروحى ودى التعبان للدكتورة منى هى هتعرف ماله ..

وصحيت الصبح لقيت العصفور تعبان شكلها كان قبلها حاسس بطيورها دى كانت روحها فيهم الله يرحمها  حتى الميت روحه بتحس باللي عايش وصاحي وترفرف حوليه امى كانت دايما تقول كدة ...

انا كان قلبي بيدق جامد...كدة الرسالة وصلت ...كدة فهمت القصة ..

مرات ابنها الكذابة هى اللى حطه العمل في بوق حماتها وهى ميته والست اتقابلنا قبل كدة من سنين وحست بطاقتى علشان كدة بتحاول تتواصل معايا علشان اساعدها...

ومن الامانه انى اساعدها بس ازاى اقول لاختها وأقول ايه مش عارفة .....

فعلا اقولها اللى حصل واللى عملته مرات ابنها في جثة أختها بس لو عملت كدة ممكن اعمل مشكلة كبيرة لسماح وممكن تطلق وحرام محبش اكون سبب خراب بيت حد بردوا كفاية مرض ابنها...

خلصت معاها وحسيت انها رساله من ربنا ومش هينفع انى مدخلتش واساعد الست دى...

بس مكنتش عارفة ازاى المهم أخدت رقم الست معايا احتياطي وخلصنا وروحت وانا عمالة افكر في الصدف الغريبة دى سبحان الله ...

ولقيت سماح بعتالي رسايل كتير جدا على الواتس وعمالة تتحايل عليا اساعدها وكلامها الكتير اللى كله كذب عن امها ...

ورغم الوقت المتأخر 

رنت عليها وانا لسه مروحتش..

ومن اول رنه ردت عليا وقالتلي ..

" عملتي ليه كدة حرام عليك امى بتتعب...

قولتلها..

" لطلي بقى كذب انا عرفت كل حاجة ودى مش امك دى حماتك اللى حطيتي فيها السحر...ومن غير لف ولا دوران قوليلي الحقيقة يا سماح علشان اقدر اساعدك...

سكتت شويه وبعدها لقيتها بتقولى ...

" مش هسالك عرفتى ازاى لأن واضح انك تعرفي حجات كتير  بس مش هقدر اقول هنا هبعتلك فويس بكل حاجة لانوالموضوع كبير شوي  وبعدها قفلت ...

وانا روحت البيت بسرعة الساعه داخله على واحدة...

مش عارفة شيء داخلى قالي اقفل النت خالص وانام بهدوء وبكرة الصبح افتح الرسالة واشوف الهانم هتقول ايه ...

وفعلا روحت نمت بعمق والغريب اليوم دا محلمتش باي حاجة غريبة ولما صحيت حسيت انى ماشة في الطريق الصحيح...افتح اشوف بقى سماح قالت ايه؟

لقيتها بعتالي ١٠ فويس ..فطرت وفنجان القهوة 

وقعدت اسمع القصة اللي خلاص انا بقيت جزء منها ...

عرفت منها القصة كاملة..

وانها عملت عمل وانها فعلا حطته في جسم حماتها لما ماتت علشان كانت عاوزة جوزها يقرب منها ولكن السحر اتقلب وجوزها قلب عليها ومبقاش طايقها ومرض ابنها  ولما رجعت للشيخ عرفت انها مكنش ينفع تحط العمل في جسم ام جوزها علشان صلة الدم بتبطل العمل ..

وكان لازم يتحط في جسم غريب عن جوزها وهى ارتكبت غلطة كبيرة وجوزها هيفضل مش طايقها لغاية ما تموت أو تخرج العمل وتدفنه في جسم تاني ...

بس هى بعد مرض ابنها تابت وحبت تخرج العمل وتستغفر ربنا وقررت تطلع العمل وتحرقه علشان تريح حماتها اللى بتتعذب وكل يوم تجلها بالاحلام وتهددها انها مش هتبقى كويسه ابدا..

ومعاملة جوزها اللى بقى يعذبها ويضربها بسبب ومن غير سبب والحياة معاه بقيت جحيم ولا تطاق من غير اي سبب ...

وانا هنا بدأت افهم هى كانت عاوزة تخلص نفسها من ورطه مش اكتر ميهماش الست الميته بتتعذب أو لا ..وكانت عاوزة تستغلنى وخلاص ...بس بردوا هي ليه اختارتنى انا..؟

المرحومة يمكن اتقابلنا معاها يوم وروحنا ارتاحت لبعض رغم انى مش فاكراها بس حصل معايا الموقف دا كتير على مدار حياتي فمش مستغربه 

لان الأرواح تتلاقى وتتالف مع من تحب وترتاح ..

ولكن سماح ...؟

اشمعنى انا اختارتني تدبسنى في القصة دى واستغلال...، قولت ممكن من يوم المستشفى لما شافتني بكلم مع شبح حماتها ...والصدقة اللي جمعتنى بيها في المستشفى ..مين عارف ؟

بس المهم اعدت افكر  هتعملي ايه يا منى ؟ 

قعدت افكر هو انا لازم اساعدها كل حاجة بتقول انى لازم اساعدها ...

مش علشانها  دى متستحقش بس علشان المرحومة بس ..

جاتلي فكرة وكنت أعرف حد من اللى بينظفوا المقابر من السحر والاعمال ،  صديق عندى على الفيس مفيش كلام مباشر بس بشوف صورة اللى بينزلها دوما  من المقابر وهما بيخرجوا الاعمال والسحر الاسود من الموتى والمقابر. الاعمال والنجاسات الكتير  اللى بيخرجوها والعرايس والصور ..

مش عارفة لو كلمته هيقول عليا ايه ...؟

بس  من الامانه انى اقول ...

بعتله رساله وقولتله ان في واحدة حكتلي قصتها و قالتلي انها حاطة عمل في جسم واحدة ميته وندمت وتابت لربنا وعاوزة تكفر عن ذنبها تقدر تساعد ..

.ومردتش اقول تفاصيل عن سماح خالص علشان ميحصلش لها مشاكل وقولتله دى قصة من القصص اللى بتجيلي والست حست بالندم ومرضة وحياتها كلها عكوسات ...

..

والحمد لله الرجل طلع متعاون جدا وبيحب عمل الخير  وكان فعلا بينظف القبور من اي اسحار ابتغاء رضاء الله ..

مش بيعمل كدة علشان المنظرة ولا حاجة غير انه معروف لحراس المقابر يعنى هيقدر يتعامل...

اتصلت بسماح قولتلها تقولى مقبرة حماتها فين وفي حد هيطلع العمل من جسم حماتها ...بس الغريب انها اعترضت وقالت لا 

انا عاوزة اروح بنفسي  علشان اتاكد ..

وانا قولتلها مينفعش لانى قولت للرجل ان واحدة معرفهاش قولتلها هتروخى انت على اي اساس هيشك فيا ...

بس هي أصرت بطريقة غريبة وقالتلي ..

انا عاوزة اطمن عاوزة اعرف انام خلينى اروح انا وانت ونخلي التربي يساعدنا بلاش الرجل دا احسن...

انا رفضت وقولتلها لا ياستى انا بخاف ايه اللى يخلينى اروح  انبش قبر واطلع عمل من جثه ...

وفي نفس اليوم حلمت تاني بالست الميته وهي قاعدة على الكرسي الاسود وانا قمت مفزوعة..

والصبح لقيت أختها بترن عليا وبتقولى ...

'الحقينى العصافير كلها ماتت مش عارفة ماتت ازاى  اختى زمانها زعلانه على عصفيرها اووى دى كانت روحها فيهم. ..واعدت تعيط كتير وفضلت تقولى أختى اكيد مش كويسة  ...

ادايقت جدا وزعلت على موت العصافير..وانا حسيت قلبي اتقبض أووى قولت دى شكلها إشارة...

قررت خلاص هكلم الهانم سماح واكلم الرجل وتروح براحتها .. انا مش قيلالها انى اعرف اخت حماتها اصلا ...

اتصلت به واتفقت معاه وكلمت سماح وقولتلها روحي انا كلمت الرجل ..

قالتلي وانت هتروحى...

  قولتلها لا روحى انت ملوش لازمة وجودى ...وفعلا كلمتلها الرجل واتفقوا على معاد وقولت خلاص بقى أنا كدة الموضوع خلص بالنسبة ليا  انتهى الحمد لله ..

وعملت اللى عليا وروحت عاملة بلوك لسماح وقولت اقفل بقى الصفحة دى للابد لانها مش مريحة خالص ..

كانوا متفقين إنهم رايحين بعد المغرب التربي اداهم المعاد دا اللى عرفته من صديقي...

روحت شغلى وانا معنديش شبكة خالص بالعيادة..

خلصت على ١١ ونصف بالليل وروحت واول ما خرجت لمكان في شبكة لقيت الصديق دا رانن عليا وأرقام غريبة رنه عليا ...

لقيت الساعه داخله على ١٢ بالليل فقولت لا الوقت غير مناسب للاتصال ..

 هو اكيد عاوز يحكيلي اللى حصل وطلعوا العمل من جسم الست الميته وخلاص  ...

وقفلت تليفوناتي وقولت الصبح ابقى ارن عليه اعرف اللي حصل ..

الليلة دى الحمد لله محلمتش اي كابوس خالص بالعكس حلمت بالست وكانت مبسوطة جدا وقاعدة تتكلم مع أختها التؤام وماسكة عصافيرها بتاكلهم بايديها الحبوب...كان شكلها مبسوط وبتضحك وشاورتلى بايدها باي ...

لما قومت من النوم كنت مبسوطة جدا وقولت الحمد لله قدرت اساعد حد من عالم آخر لا حول له ولا قوة ...

وكنت مبسوطة اووى وبعدها فتحت فوناتي ..وكانت الساعه ١٠ الصبح وكانت كمية رسايل رهيبة بتقولي ان صديقي دا اتصل بيا غير طبيعية وفتحت نت لقيته بعتلي على الماسنجر...

ردى بسرعة يا دكتورة منى ارجوك لازم تردى في مصيبة  ..

قلبي بدأ يتوغوش هو فيه ايه يا ترى ، دانا حلمت بالست وكانت زى الفل ايه اللى حصل ...

وقبل ما ارن عليه لقيته بيتصل بيا ...

قالى بتوتر كبير انت فين يا دكتورة من امبارح بحاول اتواصل معاك في مصيبة ..

قولتله خير ايه اللي حصل قلقتني . 

قالي  مين الست اللى بعتيها وراحت معانا امبارح لتنظيف المقبرة واستخراج العمل من الجثة ...مين دى ..

.قولتله برعب ...سماح مالها ..

قالى انا لازم اوصل لها باي طريقة..

قولتله ليه بس عملت ايه ...

قالى احنا امبارح فتحنا التربه وكانت معانا وصممت محدش يفتح جثة امها غيرها ، والجثة كانت اتحللت والورق واضح والمفاجأة كان جوة الجثة ٦ اعمال  و٦ صور مختلفة مش واحدة ...

اللى كان جوه الجثة كان مرعب وصعب يا دكتورة

انا من الصدمة مش قادرة افهم ولا مخى عاوز يستوعب فقولتله

مش فاهمه يعنى ايه ...

قالي 

كان جو جثة الست دى ٦ اعمال لست اشخاص مختلفة بصورهم ومن الطبيعي واللى صفحتنا بتعمله للناس 

 بناخد الصور ننشرها على الصفحة علشان الناس الماذية تعرف ان في حد عامل لها سحر وتتعالج ..

انت عارفة صفحتنا...

قولتله بشرود ايوة يا دكتور عارفة وعلشان كدة كلمتك..

قالي بفزع..

لكن اللى كان في الجثة دى مخيف دى كانت زى حافظة وحد متعمد يعمل كدة ومش لشخص واحد لا دا كان بياذي ٦ اشخاص مختلفة ..انت مستوعبه...يعنى مش نفس قصتك ...

قولتله انا معرفش هي قالتلي كدة 

قالي

 المشكلة انها طلعت الأعمال والصور واخدتهم ومرديتش حد يلمسهم وراحت طلعت واستغلت انشغلنا بتطهير التربه وخدت كل حاجة وهربت بسرعة من المقابر مستغلية الضلمة واختفت مرة واحدة  زى الشبح ...

قولته وانا مش مصدقة

"هربت ازاى واختفت  مش فاهمه ومخبيه ٦ اعمال

 لست اشخاص ازاى ...عقلي مش قادر يستوعب ...

انا عارفة انها كذابة بس كدة انا مش فاهمه بجد حاجة  

مش فاهمه ولا قادرة استوعب هو في ايه 

وايه اللي بيحصل ...؟