الدنيا دي، وأنا النهاردة إتأكدت ان انا وانتي مينفعش نفضل في مكان مش مرغوبين فيه، هحققلك رغبتك يا نور عيني

تنهد يونس بعد أن أغلقت حماته الخط وأدار سيارته عائدا للمشفى وعقله يبحث في إتجاهات متعددة عله يتخلص من القلق الذي يسيطر عليه

عودة للحاضر

تنهد والحيرة تغلف عقله فإقتربت منه ولاء وربتت على يده : أنا عارفة إنك بتحبها

نظر لها يونس بصدمة : عارفة ؟عارفة ايه ؟ اكيد مراتي و

ولاء بهدوء : مش محتاج تبررلي يا يونس، أنا ملاحظة تصرفاتك، ملاحظة حسين تاني في العيلة دي، عمك عملها قبلك

نظر لها لم تجمعه معها مواقف كثيرة وبحكم قواعد وقوانين لم تكن له خلطة كثيرة بها وكأنهم  أغراب إلا بحكم المواقف هي التي تجمع بينهم، مواقف قليلة وكان هذا من ضمنهم، لكنه لم يرى فيه كلام والدته عنها

يرى سيدة هادئة جميلة، وطيبة فأين هذا الكلام الذي دائما يسمعه عنها من والدته فإبتسم ساخرا وقد فهم أنها غيرة نسائية أو مواقف سيئة بينهم لم يهمه الأمر

يونس : لما إنتي عارفة إني بحبها، ليه عايزاني أطلقها؟ ليه عايزة تاخديها وتمشي

ولاء بحزن  : لان إنتوا عيلة في بعض، إنما إحنا أغراب عنكم مش منكم

نظر لها يونس بتعجب : أغراب إزاي ؟إنتم أكيد من العيلة؛ إنتي مرات عمي وهي بنت عمي وشايلة لقب العيلة وغير كذا هي مراتي وشايلة إسمي ولقبي، يبقى فين الغربة في كدا؟

تنهدت ولاء : صدقني يا يونس، من زمان  وانا حياتي كلها كانت في ألمانيا وعيلتي نزلت مصر ودخلت الجامعة هنا، واتعرفت على عمك والمفروض إن عمك الوحيد اللي متنفذش عليه حكم العيلة لانه كان قرر يتمرد ويدخل جامعة بعيد عن بلده ويعيش ورفض يتجوز او انه يعترف بجواز العيال الصغيرين ده، حبني وحبيته وواجه عيلته كلها واتحداهم واتجوزني ، عارف انا عشت أسوأ ايام حياتي في البيت ده، معاملة زفت وكلام يسم ومقالب إستغفر الله العظيم مفيش بعد كدا، بس كنت بستحمل عشان عمك وبنت عمك جدك قرر وضغط على عمك في موضوع كتب كتاب طفل وطفلة وخاف يغضب عليه فوافق وقال إن لما تكبروا يحلها ربنا المهم باباه ميغضبش عليه لأنه اغضبه كام مرة قبل كدا  عديناها بس اللي حصل بعدها في يوم كنت حامل مكنتش أعرف إني حامل لاني كنت لسه في الأسبوع الأول وبسبب مقلب ممكن يكون صغير في نظر الكل أنا مش بس أجهضت أنا خسرت الرحم بتاعي، أنا خسرت أنوثتي، خسرت أمومتي، ما هو رحم الست ايه غير كدا ؟ من بعدها، عمك صمم مش بس هيسيب البيت دا هيسيب البلد كلها وياخدني ونمشي ورغم ان العيلة كلها انقلبت وابوك الله يرحمه حاول انه يثني عمك ويرجعه عن قراره لكن بسبب اللي حصل اخدني انا وشغف وسافرنا في ظلمة الليل عشان يوقف الدراما اللي بتحصل لان لو استني تاني كان ممكن يخسرني

من ساعتها واحنا بعيد لحد ما جدك كلم عمك بعد ١١ سنة وطلب انه يرجع

كان يونس يستمع لحديثها بذهول تام :معقول كل دا العيلة تعمله؟

ولاء : شغف، مهما كبرت لسه مش ناضجة يا يونس

يونس بعدم فهم : يعني ايه؟

ولاء : يعني عند شغف وإصرارها وصريخها وحيرتها دول نابعين من بنت لسه بعقل متوتر، يعني مراهقة، دي يدوب لسه تامة ١٨ سنة من كام شهر

يونس :١٨ دي في عرفنا يعني

قاطعته : عارفه يا يونس، عارفة ان البنت في السن ده في الأرياف بتكون متجوزة ومخلفة كمان ويمكن قليل اوي لو لقيت بنات عدت السن ده من غير جواز بس في ألمانيا لا في أوروبا لا في أوروبا هي لسه طفلة، وشغف أيا كانت أصولها هي إتربت في أوروبا وعلى أفكار أوروبا

صمت يونس قليلا قبل أن يسألها : طيب إنتي تقوليلي كل دا دلوقتي ليه؟

وقفت ولاء : عشان ابررلك انا ليه عايزاك تطلق شغف، وليه عايزاها تسيب البلد؟ يارب تكون فهمتني

تركته ودلفت لغرفة شغف وتستلقي على الكنبة المجاورة لسريرها وسمحت لدموعها أن تهبط وهي ترى حالة إبنتها وتتذكر نفسها قبلها وتفكر أن إبنتها من الممكن أن تكون مثلها او أسوأ

تنهدت وهي تفكر وتعرف ما الذي يجب عليها ان تفعل وما الذي ستواجهه وهي متأكدة أنها ستستطيع

أما يونس فبقي مكانه وهو يفكر ويعيد ما قالته ولاء في ذهنه وقد حسم قراره أخيرا

يتبع