سحبت عباتي حجت مرت اخو وفاء : وين رايحة 

-خابرني اخوي الا هسه اطلع 

-يااا صدك تحجين اقلها خل يطلعون وروحي 

-لا تصيرلي مشكلة خل اروحن فدوة لعينج 

- شو تبجين صبا عليج العباس صاير شي محتاجة شي 

- لا بس كام يخربط بالحجي واني تعبانة وتدرين بيه مريضة 

- اي سودة عليه والله ما قصرتي من امس واليوم تركضين 

- اودعناج احبيبة 

لبست العباية وطلعت بالفستان .. 

لكيت امل كاعدة برا وبيدها الجكارة مرجعة ايدها ليورا  تضم بيها عن المارة ، صاحت : اشوفج ما تحملتي جا مو قوية ويا حبل ما يهزك ريح وجاية لخطبته 

انداريت الها : اني بعمري ما شفت انسان مثلج .. الكاعد يتزوج جوا رجلج كبل ليكون الج وانت الجاي تعرسيلا بيدج 

-واللي براسي 

-شفرق واوله وتاليه يعوفج ويكابل عروسته الجديدة 

- من تفكرين بذكاء مثلي راح تفتهمين 

- الحمدلله الخلاني غبية وما خلاني مثلج 

- جا ما تشوفين هذا حالج الا عليني علي رجلي عدي وبيتي وشغلي وفلوسي وكلهن حاويتهن 

- يا رجل هذا الكاعد يم وحدة غيرج وعقد عليها 

- حازم ما يريد وفاء يريد غيرها ووفاء ما تريد حازم تريد غيره واني هذا الاريده !  

- الرادو والما رادوا .. اتزوجوا 

- ولو اتزوجوا !؟ ماضيها واسوالفها كلها عدي كلمة ما تكدر تفك حلكها وياي خادمة الي ولبزري ولو عاندت وياي تصبح مطلكة حالها من حالچ . 

- الله يعينج على نفسيتج والحمدلله الخلصني من بؤرتكم لان كافي عليه الجلاب الداير ما دايري غيرهم مثلج ما اضن احمل .. 

عفتها وطلعت من البيت بس طلعت وكلبي محروك من هيج بشر 

واراجع بروحي واسألها .. معقولة امل ما كايلة الوفاء على علاقتي بحازم 

معقولة وفاء تعرف بوضعي ورضت تنخطب 

كمت امشي واربط امور واحداث .. 

غيرتها من شافتني كشخت .. واصرارها الا اني اجي لخطبتها وامشي وياها .. ومن رادوا يدخلون تكلي طبي بالمطبخ حتى لا يصير حجي 

شتعرف حتى كالتلي هيج 

معناها تعرف من البداية واني الغشيمة وعبالي على نيتها وما تدري 

ذاكرتي كامت تتوسع وتاخذ مساحة اكبر بتفكيرها ورجعت لسالفتي من الاول .. امل منين عرفتني ؟ 

من وفاء .. 

اذا تريد تعرف عني شي المن تروح ؟ لوفاء 

معناها هي اللي منطيتها رقم جعفر وعنوانه 

والا امنين تعرف جعفر جان راحت على عمي وشكتله .. بس اكيد عرفت من وفاء عمي راح يسدها وزلمة مو راعي مشاكل واخوتي راح يكسروني ..

تفكيري صحيح لو اني كاعد ابتعد واظلمها 

بس لا .. مالها غير وفاء محد يعرفني غير وفاء 

حتى مكان شغلي والعيادة امل منين تندل العيادة الاشتغل بيها وتهجم عليه وتفضحني 

اني صدك كل ذني مرن عليه وما انتبهتلهن

لو كاعد اتخيل لو شنو الموضوع .. زين وفاء صديقتي شنو مصلحتها بأذيتي .. امل اكول رجلها رايدني وفاء شبيها 

طخت براسي حسن ! 

بس لا حسبالها اني مجرجرة حسن وابالها تردلياها بالمثل 

معقولة !؟ 

اريد احد يندهني ويكلي الكاعد افكر بيه وهم مو حقيقة 

كام راسي يشبچ شي بشي .. 

امل لو رايدة وفاء لحازم جا من البداية خطبتها اله ما تخطبني 

اكيد اتفقن بيناتهن عليه .. وحطن هالخطبة 

دخلت للبيت راسي راح ينفجر من التفكير 

حطيت راسي بين رجليه وكمت ابجي بهضيمة

اريد اعرف شنهو ذنبي ويا البشر وتسعى باذيتي 

ما اطاني كلبي اذي احد منهم حتى اخوتي .. بس كلهم انطو بيه واذوني 

حتى حازم اللي اختلف عن الكل 

صار من الكل وما فرق عنهم وراح وافقهن وقبل الهن بهالخطبة وخطب اقرب انسانة اليه .. 

شسويت وشنو ذبني وليش هيج البشر 

اباوع بالبيت يصوصي وابجي لوحدي .. 

ليش همي اعيشه لوحدي وبقهري وكسرتي كلهم يصفون 

وينهم من احتاجهم .. وينهم من اطيح 

خواتي اللي هن خواتي خابرتهن اصرخ مثل المذبوح من قهري 

لا اجن ولا وصلن .. لوحدي الم بروحي واطبطبلها واواسيها 

كمت من حيلي وكفت كدام المراية الملزوكة بالحايط 

الكحل رالمسكارة مصخمات وجهي .. مو ذيج الشفتها كبل شوية 

اني كدام الناس غير اني بوحدتي .. من انزوي ينبعن همومي ويتبدن على ملامحي وحيلي ويهدني هد .. 

نزعت الفستان ولبست دشداشة وضليت كاعدة لوحدي 

حاطة المخدة بظهري ومتجية ولامة رجليه لصدري وصافنة واحس راسي راح ينفجر من قهري 

بكل غباء رحتلها اوكفلها بالخطوة وتالي جانت كل الرايدته تقهرني 

ما اريد الوم الروح اعاتبها لو ابجي عليها لو اواسيها 

حرت وين انطي روحي 

مثل طير مذبوح محد بحاله 

جريت المخدة من ورا ظهري .. شمرتها ليغاد وتمددت واطيت وجهي للحايط راسي احسه راح ينفجر وكلبي ما يبطل قهر ودموعي ما نشفن .. 

اذيتي هاي هم الها حوبة يم الله 

كسرتي يشوفها 

يشوف الناس شسويتلهم وشسوولي 

الله يطلع حوبتي من الكل .. 

من الكل اريدن

انطبكت الباب .. عقدت حاجبي وظليت على نومتي .. حيدر مو وكت نزوله هسه ما صاله كم يوم من التحق .. مسحت الدموع من عيني واني اسمع خطوات الرجلين بالبيت و ع الحصير .. 

لو خواتي جان سمعت حس فروخهن .. 

ولو حيدر جان صاح ... صباااا نايمة 

انداريت وراي حتى اتأكد ياهو الفات .. 

شفته حازم واكف وراي وقريب مني .. فزيت من كعدتي بسرعة 

- خير ؟ 

- خاف تكولين ظالمج .. اني لا رايد ظليمتج ولا سعيتلها .. انت الوعدتيني ما تهدين ايدج من ايدي وفلتيها ورحتي وافقتي ترجعين لزلمة وانت على ذمتي ... وهالاجيت خاطر لا اوكف بطريقج اذا تشوفين بالقديم خير وتنسعدين وياه .. اني احررج من هالزواج وروحي سوي اليحلالج 

- طلك واطلع برا 

- البسي وكومي نطلع للشيخ نطلك .. ويا دار ما دخلج شر 

- شر !؟ 

رفعت راسي .. جنت حاسبتك غير احساب بس طلعت اساس الشر 

- وشسويت 

- وخر مني 

حجيتها واختنكت وكضتني العبرة ودرت وجهي 

دنك وجر وجهي : لا شو تنوعيلي شسويت 

نزلن دموعي بس رفعت عيني بوجهه 

وخرت ايده وكتله .. لا تمد ايدك عليه روح للسيد طلك وعوفني يلا . 

- اذا رايدة الطلاك البجي ليش والعيون وهالحال ليييش 

- ما يحقلك تسأل ليش وانت الرحت خطبت اقرب صديقة اليه 

- جا مو ما تريديني وتريدين بس تفتكين مني ياهو ماتج ياهي الارضى بيها 

- من سألتك كتلي ما وافقت بس انت وافقت 

بجيت 

- ما جنت موافق وشفت مالها داعي ارفض خليني اجيبلي مرة تخدمني تكعدلي اداريني اخير ما ضال ورا امل الما تدري عني لو وراج اللي وين ما اصدلج اتنهرين واطردين وما عدج كل احترام 

- هاهية .. تريد نطلك هسه تاهذني وننهي البديناه كله 

حجيتها واني انهض .. انداريتله وكملت : وما اريد اشوف وجهك بحياتي 

حجيتها واريد اندار شو افترت الدنيا براسي 

كضيت بالحايط .. كضاني : ها بويه شمالج 

- لضيت ساكتة بس اريد الكاع جواي تهيد احسها تروج بيه .. 

بس وكفت لحيلي وخرت ايده مني واخذت العباية والحجاب 

حجه : اذا مالج حيل عوفيها غير مرة 

- بس افتك منك اني ارتااااح 

وخر مني 

- جا خوش لو صارت الفكة مني راحة .. 

لبستهن ولفيتهن كال : وجهج غسلي مزوكته صايرة جنج فتون بمسلسل الحيالة 

التفتت عليه بخزرة : ما اريدن اسمعك لا تحجي 

- دمشي غسلي جا نروح للشيخ بوجهج هاذ دروحي 

- اروح هيج وما اعسل ومالك غرض بيه افتهمت 

وامشي كوم اطلع كدامي واني اطلع وراك .. مسوي البيت خري مري اخر ما يهمك سمعتي وشينكال عني المهم التريده انت تسوي .. 

- كلجن على هالنك هذا .. وحدتجن الغلط راكبها من فوكها لجواها وتنك والسانها يلفك سبع مرات 

- وانتم معصومين عمت عيني عليكم فقرة كل اذية ما بيكم 

- لا عمي كل الصوج منا صدك جذب .. بس امشي 

- كتلك اطلع كدامي وابعد السيارة من الباب شني تصفها ابابي بكيفك 

- صافها بعيد لا تصيحين افتهمتي 

- لا اصيح 

- الخج والعباس 

- اذا كدها سويها لا اخلي ايدك بركبتك 

- ياهو التخلين ايده بركبته ؟ 

حجاها وبطرف السبابة مال اصبعه دفع راسي 

رجعت ليورا .. 

- اااااخ لا تطيحيني 

- جا مو تكولين لو كدها سويها شني لا اطيحني 

- اكلك امشي اني دايخخخخخة 

دفعته .. طلع كدامي واني خذيت جيزداني ولبست جورايبي .. ومشيت 

لكيته ليغاد عفت السيارة ومشيت كبالها وصلتها غاد عن المنطقة 

طكلي هورن .. فتحت الباب الورا وصعدت 

صاح : وشني سايق عدج وتكعدين ورا 

- امشي لا وحق هو علي انزل 

- لا شو انزلي .. وحتى طلاك ما اطلك 

- بكيفك ما انطلك مرجع مرة وعاقد ع الثانية ويريدني ابقاله .. امشي لا هسه اسويها جبيرة 

- هسه انت من تهددين وتهوبزين غير كون تفعلين 

- ما افعل اني امشي ..  

درت واحجي اكمل دردمة وهو ساق : خليت الفعل الك ابو النسوان 

- ياهو هذا ابو النسوان 

اختنكت وديارة دموعي رارت بعيني 

حجه : انا ابو النسوان 

- حازم امشي ولا تحجين 

- انت شو تظلمين وتعيشين دور المظلوووومة 

- ظالمتك اي .. حطيت السيف اعلى نحرك وظلمتك 

-جا ياهي الرضت ترد للقديم وهي اعلى ذمتي شني مالي احترام مالي تقدير ضايجة مني جيف رضيت بالخاطباتها الي .. ما تحسبين شيناتج الخضرن بكلبي خليتيني امشي واحجي ويا روحي من القهر بت الدثو  شسويتلج وتهينيني هيج ؟ 

-تحجي وكأنما امري بيدي لو اني مالكة شاني 

احجي ودايرة ودموعي مجبدة بعيني 

- لا تلوفيهن بلسانج كتيلي لو بيدي ارجعله بس انت الواكف عثرة بدربي حجيج هاااذ لو لا ليش تنسين شيناتج الخشنات وتحسبين بس فعايل الناس وياج 

- لا احس ولا تحسب راح اتطلكني وكل واحد يروح بدربه 

- هالطلاك رايتج وغايتج ما جان يوم غايتي 

- طبعا حسبالك ارضى تخليني بعد ما خطبت اعز صديقاتي

بس النذل يسوي سوايتك 

- اني نذل وسافل وكلب ابن كلب جيف ذبيت روحي بدرب وحدة مثلج شما حطيت ما جرى بعينها 

ضليت ابجي الطريق كله 

دموعي ما نشفن .. راسي وافكاره بودي هسه اهد اكله بسنوني 

بس كلبي ينزف ما يريد يكمل الدرب و ينتهي كلشي .. 

رايدة وما اريد .. اريد اخلص من هم وخوفي وحسرتي وتفكيري 

بس ما اريد اخلص منه ..  لا يمكن رايدة وجازة روحي بس احس بروحي روحي تتنازع وحدة تصيح الغوث منه وروح مذبوحة عليه 

صف السيارة كدام باب الشيخ 

ادموعي زادن .. جر التليفون واتصال : حبيبي مولاي السلام عليكم 

شلونك اغاتي .. الله يسلمك الله يسلمك .. موجود ان شاءالله 

ها بيها الخير .. جايك اني جا ؟ ها اي ان شاءالله 

هلا بيك سيد 

سده وباوع عليه بالمرايا دموعي ما وكفن 

حجه : السيد جوا موجود 

فركت عيوني ومسحتهن حيل وجريت نفس : ما اريد اطبن 

طب انت طلك واطلع .. او طلك بدوني اني خليني امشي 

ردت افتح السيارة صاح : اوكفي شاردة وين 

- ما شاردة من احد بس طلك هاهية وفكني 

- اذا تريدين الفكة الدموع هاي شني ؟ 

- ما افتهم غبية حيل روحي تهوى اليأذيها 

بس تعبت منكم كلكم .. طلك وعوفني 

حجيت ونزلت .. صاح : اوكفي صبا

نزل وراي بسرعة 

كمت ابجي واشهك مثل الطفل واريد ابتعد صاح : تعاي احاجيج 

- وخر مني الله يخليك عوفني بحالي 

- حاجيني وصارحيني رايدة الطلاك لو لا 

- راسي كلش اذاني وخر مني 

- راح اوخر بس كليلي رايدة لو لا 

- طلك ولا تسأل عرفني وروح للختاريتها 

- بت الاوادم هي ياهي الاختاريتها انت ليش تغشمين روحج 

- الغشمت والما غشمت ما يغير من الصار شي 

- اصعدي للسيارة 

- وخر من عندي 

- صعدي للسيارة اكلج 

- ما تأمرني وخر مني 

- لا امرج اصعد 

- حازم عليك العباس عوفني والعباس انهد حيلي كافي مني والله ما سويتلكم شي اليخليكم تأذوني هيج عوووفوني فكوووني 

- وياهو المأذيج غير روحج صبا 

امشي كافي منا الناس عيب 

-راسي ديأذيني وخر 

-اي صعدي اخذج للمضمد 

- ما اريد 

- يا بويه كافي عناد رحمة للعباس الناس منا دصعديييي 

جراني وصعدني بالسيارة وسد الباب وراي 

واندار صعد وداس بالسيارة عيوني ما بطلت بچي .. 

ما حجه بس عكد حاجبه وعيونه صارن حمر من القهر 

صف كدام مضمد .. واندارلي : كومي انزلي 

نزلت كوا من السيارة سكتت من البجي بس عيوني مورمة وخشمي احمر والمكياج مخربط بوجهي و الشهكة بصدري ترجف .. 

كعدني جوا دخل المضمد اول ما شافني كالي : عدج فقر دم 

- لا 

رفعي وجهج ..

زوجتك 

- اي بويه 

- سويتلها فحص دم 

- لا والله بس تصيح راسي وجبتها 

- شماكله 

- ما ماكله شي من الصبح او يمكن من البارحة 

بس جاي شربت هواي 

-ايدج 

لف عليه مال الصغط .. وكام ينفخ بيها 

رجعت راسي ذبحني .. فش الجهاز بيدي ، باوعتله .. 

حجه : ضغطها كلش نازل لازم تاكل وافضل تطلع بيها للمستشفى لان حسب ما كاعد اشوف وجهه اصفر حيل ومتأكد عدها فقر دم 

-حجي مو هي حاطة من ذن الزواكات مال النسوان 

- مالي غرض بالزواكات شوف عينها الجفن الداخلي ابيض كاغد 

تنهد بحسرة : مشكور حجي 

طلع من جيبه وانطاه 

وكالي كومي 

كمت وياه بس راسي احسه حيل ثكيل  وصلاني للسيارة وكعدني بالصدر وطلع بيه للمستشفى .. رجعت راسي والشهكة بعدها بصدري 

كض ايدي وهو يكلي : ريت الضيم لا جاسج 

جريت ايدي منه : ضيمي منك 

- مو مني وعلي منج .. انت الكتيلي ابعد واني رايدة عدنان وانت اعلى ذمتي جا شني اني حجر .. وامي وامل كاعدات براسي كل وكت يقنعن ساعت الرديت كلتلهن الجن شما تريدن عملن .. كثر ما طكت روحي من ضيمج .. تردين للقديم وانت على ذمتي صبا 

ما جاوبت 

صف السيارة ونزل كاضني 

كتله : اكدر امشي وخر عني لا احد يشوفنا بالمستشفى 

مشينا اخذلي باص ورحنا فحص دم .. 

كال : نص ساعة ويطلع 

كعداني ع الكرسي وكعد يمي جر سبحته من جيبه وكام يشد عليها وهو مدنك وباله سارح .. حجيت : ليش اللي يمشي بنية صافية ويا الناس تاكله ؟ 

باوعلي .. بقى منتبهلي

كملت : تتذكر من كتلي مستغرب امل منين عرفت بيت اخوج ورقمه واتعنتله ؟ 

- منين 

- اليوم امك و خواتك من عرفني وفاء ضاجت كالتلي طبي للمطبخ ولا تجيبين حجي ما فرزنت الكلمة وكتها لحد ما طلعت .. وفاء شمدريها اهلك يعرفوني ورادتني اطبن ليش ضاجت من اتكشخت بحفلتها .. وهواي امور اجابتها وفاء تعرف باللي بيني وبينك 

- ولو عرفت ليش وافقت ع الخطبة !؟ وليش حتى تسسوي هيج بيج ما فهمت 

- لان حسن خطبني 

- وهي ياهو مالتها بحسن 

باوعتله ، حجيت : متفقة هيج وامل على كلشي 

كبل لا ترجع امل .. امل جانت تجيني للعيادة 

اني حيل غبية ... حيل 

كمت اكره روحي كثر ما غبية وما افتهم بالتلميح 

لحد ما يطيح حظي واوكع بمصيبتي يلا استوعب امري .. 

- لا لحظة حسن ووفاء شنو فهميني هاي الشغلة 

تنهدت : يمكن ما يحفلي احجي ما ادري بس السوته بيه صعب 

- شني هي حزورة هي وحسن شبينهم .. جا طلعت راسها وعفتي ذيلها ذبيها 

- وفاء وحسن علاقة من جانت صغيرة يمكن ١٧ او ١٨ .. وعاشت عمرها كله تنتظر حسن يكون نفسه ويخطبها بس حسن اتزوج غيرها بحجة امي ما رضت اخذ وحدة جبيرة مثلج .. ورغم هاي ما عافته ضلت وياه .. وهو طلبها بالسر و بدون ما يدرون اهله بس اهلها ما رضو .. الظاهر من كام يخابر و يتودد وانوب خطبتي ذبت حركتها بيه واتفقت ويا امل عليه 

- امل تعرف بهالخريط !؟ 

باوعتله : امل شيطان بجسم انسان لازمة هالامور على وفاء ممسك حتى من تتزوجها تهددها ما توكف بوجهه لو تسويلها مشاكل حتى ما تكلك الحقيقة .. تكلي اعرف بحازم ما يريد وفاء ووفاء ما تريد حازم بس هذا الاني اريده ما اريده يرتاح 

ضل صافن بوجهي : الحجي هذا منج لو تأليف لو شني عليج العباس لا تخبليني 

- اني اليوم يلا عرفته واستوعبته 

كل هالفترة مدمغة ومصدكة وفاء ومصدكة امل لحد ما تاليتي هنا .. بالمستشفى وهن متشفيات بيه وفرحانات بالسونه ويعتبرنك مشيت مثل ما يريدن لان وافقتلهن بالخطبة 

- اسعد صاحبي واخوته واهله يعني بتهم عاشكة زلمة سنين ويطونياها شني لعب هيتة !؟ 

صاحو اسمي .. 

وهو صافن باسمي ردت اكوم حط ايده على ركبة رجلي واتنهد بحسرة وكام اخذ النتيجة كاله : عدها فقر دم حاد وتحتاج نحوللها دم .. ولازم تلتزم بالعلاج .. وتكطع الكهوة والجاي نهائيا 

- شكطع الحاي رحمة لابيك غير تكول جارة صوندة من الطباخ 

ما يلحكلها قوري كمنا نخدر بكيتلي 

- كلش مو زين يموتها .. الجاي يمنع اكتساب الحديد من الاكل التاكله فيسببلها هبوط حاد بالدم ويأثر ع القلب وحالات توقف القلب المفاجئ كثر بهالمواقف 

- سمعتي 

- يحجي بكيفه اعرف امي وابوي وما اعرف الجاي

هز ايده وهو يكله : مصيبة 

والطبيب يكله : كل انسان عقله براسه ويعرف خلاصه اكو هو اليجيب المرض لروحه واكو اليعرف يعالجها ويرتاح 

- زين لو بس عالصحة يا دكتور هي مفينتهن بكلهن 

امشي 

اخذني وهو يباوع بالراجيته الكتبها الدكتور 

ومشى لمصرف الدم .. كعدوه وسحبوا من دمه واني واكفة 

لحد ما خلص .. راد يكوم داخ .. كضني وكعد لزمته 

- جا انت دايخ وتطيني دمك يمكن يدوخني بالزايد 

- اكلج شو سكتي رحمة للعباس 

- جا كاض بيدي وترزلني 

وبعدين احنا مو قررنا نتطلك شني تطبرع بدم شنو اخذ دمك 

رفع حاجبه وباوعلي وابتسم : وعلي دوختيني بالسالفتج هاي بنات الجلاب متفقات من وراي ..

-وشتسويلهن يعني 

- صدك تحجين انت 

- ويذبنها ابلوتي وتالي هم تروح لاخوي وهم نرد للضيم 

-صبا كافي رحمة للحسين وانت بهالحال وجسمج ما بيه دم 

خواتج وينهن ما نايمات بحضن رجولتهن ويجن يصفطن براسج 

كافي مصختيها والعباس 

- اني مو لشي خواتي ينضرن 

- انعل ابو خواتج .. وينهن خابرنج شافنج سألن عنج 

-الصدك شايلة بخاطري منهن لان من خابرتني وفاء وكالتلي على خطبتك انت وياها تاذيت حيل وخابرتهن كتلهن ابوس اديجن بس تعالن لمني واسني بس ما اجن ومرتين خابرت سهى ومنى مرة وبعد ما رجعن خابرني ولا كالن شصار ما صار .. 

- وما فالحات غير باللبك خو اختج هاي الخابرتني ريتها زلمة وعلي لا جا مشيتلها لا ادير فجهـا  وفج الخلفوها تكلي خوية شمالك لزكة ما تحس على روحك وتطلكها كتلها وانت ياهو ماتج امر يخصنا تكلي جا اختي ما تريدك وتريد بس الفكة منك شني ما تحس خلتني افورن والحسين 

اجا الممرض سكت حازم وكام وياه واني تبعته 

تممدت ع السديا و تغطيت بعباتي والمضمد شكلي الكانونة.. 

بس تمددت ثكل راسي وتعب امس واليوم كله طلع بيه .. بسرعة غمضت وكمت اغفي 

هو واكف فوك راسي .. 

فتحت صافن بالدم وباله مشغول حجيت : شراح تسوي 

- الليلة ما اكدر اهدج وانت بهالحال .. يصبح الصبح واعرف شسوي بيهم 

- بمنو 

- لا تشغلين بالح بهالامر ارتاحي 

- وراح نضل هيج 

- اكلج شو نامي وانجبي 

- ماشي 

تنهدت وانداريت غمضت 

غفيت ونمت لحد ما حسيت ع الممرض وهو يسحب الكانونه من ايدي 

كضاني وكعدت .. عدل هدومي وعباتي وكوماني .. 

حجه : لازم تاكلين 

- ما اشتهي الزاد 

- مو بالكيف دمج وضغطج نازل تاذين روحج 

اخذني بالسيارة واشترالي لفة كباب ولبن .. اكلت لكمتين وما اشتهيت .. 

فر السيارة وطلع للشماعية .. جانت ب١٠ ونص تقريباً 

صف السيارة بعيد عن البيت ونزلت اني اول ما نزلت رقية اخت سارة واخوها صاروا بوجهي .. ضلت تباوعلي .. وحازم ينزل وياي 

سويت روحي مريضة حيل ما سلمت ولا ركزت بيها 

بس الخوف كض گلبي : حازم هاي اخت جارتي ووحدة سمانية فد لا تسويلي مشكلة 

- عوينة ابيها ختولي 

- ولو فضحتني وحجت

- اهتمي بروحج وصحتج وعوفي كلام الناس اني اتولاهم 

-حازم اخاف لا 

-امشي للبيت كبالي خل اروحن اجيبن علاجح واجي 

رحت للبيت بس الرجيف كضني وراسي من التعب كضاني .. فرشت فراشي وشديت الشال على راسي من كد وجع راسي 

انطبك الباب واتسركى 

ضليت اباوع ومفتحة تك عين طب حازم 

كتله : شني سركيت الباب 

-جا شسوي 

-حازم لا يشوفنا احد عليك العباس 

-خاب انت شمالج رعنة دمج كاضي ومحد بحالج ويا ساعة يوكف كلبج وتموتين ومحد داري عنج ولا احد حاطج اباله وتخافين من هذا وذاك خاف يدرون ودروا يطبهم طوب متزوجج على سنة الله ورسولة لا انت بت باكر وناهبج ولا انت زغيرة  ولا الج ابو وعايفه وراي خياس محد بحالج ربحي بيمن لو صار بيج شي وانت بالبيت وحدج بهالحال ؟ 

ضليت اباوع عليه وعاكده حاجبي بين السكتني وبين الخايفة 

مشى للمطبخ جابلي مي واطاني العلاج شربته .. وهو اجا يم راسي .. تمددت وحطيت راسي يمه .. دنك وباسني بكصتي 

تنهدت واخذت نفس كأنما اجرن حيل من حيلي الفقدته بهالايام 

كام طفى الضوا .. وسد البردات و التلفزيون 

وحجه : ينرادلج مبردات احتر الجو بعد مو مال بنكة 

-اكو ارضية صغير بالمطبخ جيبها اذا تريد 

مشى جاباها وشكلها كدامنا وتمدد بفراشي وشال راسي ومد ايده كتله : وخر اليوم عاقد وفرحان ابو النسوان 

-يروحلج فدوة 

-اكرهك 

-كام يحضن براسي لصدره وهو يكلي : احبج بكثر ما تكرهيني 

شلت راسي بسع : يعني جذاب ما تحبني 

ضحك : هو ياهو المنا جذاب صدك !؟ 

-انت 

حجيتها واني احشر راسي بصدره 

همس : اني اني شتكولين صح وشترضين بأمرج 

اخ كلبي الصبح جان يبجي دم 

بس صرت بحضنه طاب وخضر ورد ؟ 

حسيت مثل جنت بصحراء وكاتلني الحر والعطش ومحد بحالي 

وبجيتة انكلبت الصحراء واحة وخضرت شجر واعناب احتضنتني واحتوتني ورفعتني لفوك .. وارتويت بنص خيراتها . 

همس : اكو وحدة جانت كبل جم ساعة تصيح طلكني ومن وصلت للصدك نزلت خني*** من البجي 

ضربته : اسكت لا تحجي 

ضحك بهمس وهو يبوس راسي : فداج حيلي واحوالي 

حشرت روحي ويا وكأنما اريد اندمج بيه 

وهو يحضن بيه حيل .. اتطمن وارتاحيت وذليت روحي مثل الميت بحظنه 

هو جان المفروض اخاف واحسب واخطر 

بس وجوده يحسسني بأمان لدرجة احس محد يكدر يطخني وهو موجود 

ميحتاج اشيل هم وهو موجود ارتاح وهو يتولى عني همومي . 

صبح الصبح اني وياه ما حاسين لل١٠ الصبح وما كاعدين 

فزيت على صوت الباب .. كمزت من فراشي كال : يا علي شمالج 

-منو ديدك الباب 

- اهدي وامشي افتحي 

-وانت موجووود حازم عليك العباس لا 

-واجهي مخاوفج صبا ولا تخافين وروحي افتحي وشوفي منو 

اني موجود ووراج لو صار اي شي 

جريت حجابي ورحت اركض للباب واني اصيح : منوور 

صوت وفاء وهي تكلي : اني افتحي عيني انيييي 

فتحت الباب : هلا وفاء خير اكو شي 

- خير هو انت خليتي بيها خيييير 

- لا تصيحين بالباب فوتي 

دفعتني وفاتت واندارت عليه : -اطبين كدام حااازم بفستانج مدلع وتبجين 

شعدج ويا حازم صبا شعدددج ويااااه

حازم : مرتي 

تجمدت بمكانها من سمعت صوتها 

اندارت ولكته واكف بالبنطرون و الفانيلة الداخلية وجاي يلبس القميص 

نطقت : انت هنا 

شكاعد يصير 

- ما سمعتي صبا مرتي 

- ومن هي مرتي خطبتني ليش 

-ويامن اجيتي 

- كاعد تلعب علي وانت مافي هااااي 

- احترمي نفسجججج واحجي وياااامن اجيتي 

- لا تحسبني مثلها فالتة وساقطة ومالي رداد اني عد اهل وبت ناس واخوي الجاباني 

- دام اخوج الجابج حجيي ويا اخيج .. امشي صيحي 

كاعد يحجي اندكت الباب 

اني كلبي من الخوف كام يدبچ چوبي 

همت وفاء تريد تطلع واني مشيت حتى ادخل وما اصير بوجهه هالحجي .. طلع اسعد حجه حازم : تعال اسعد فوت .. 

اندار : ادخلي للمطبخ 

ركضت للمطبخ بسرعة واسعد يكله : حازم هنا 

شتسوي ابيت صبا 

- عوفك من سالفة صبا وكلي خوية اشفتني شادلي كرون وتطيني اختك العاشكة من سنين ؟ 

- ياهي هاي العاشكة احترم نفسك 

- محترم نفسي كلش زين اسعد وتعرفني محترم بس العيب ع اليدري باخته عاشكة ويمشيها علي واني صاحبك 

تلازم وياه : انت تحجي على اختي ابن **** 

دخله حازم وكاله : اني ما احجي على اختك حلف اختك ما عدها شي ويا حسن ولا عاشكته من سنين وانكر كلي ما عدها وخليني اجيبن شهووود 

- جاي ترتكب على اختي وووولك 

- لا تصيح اكدر اتصايح واعلي حسي والجيران تسمع اني رايد حقيقة اختك تضمنها خوية ما عدها شي ويا حسن 

- الحجتلك صبا المدخلتك ابيتها 

- صبا مرتي اسعدددد لا تجيبها على السااااانك ووووولك 

تلازموا من الملابس .. ووفاء هدت عليه للمطبخ وتصيح : وترتكبين عليه ام الزلم ام المتعععععععععة هذا مستواج تتختلين بالزلم وتنامين بحضنهم فتحي الباب اراويج شلون ترتكبيييين عليييه 

حازم دفع اسعد منه وهو يكله : اذا عقدت على اختك امس اخذها مطلكة مني بالثلاث 

- والي وياك كواااام .. 

- وانا كوامتي وياك لهاااامتي اعلى اختك العاشكة التمشيها بروووسنا امشييي 

اخذ وفاء التفشر وتغلط وكامت تصيح وتشهر بالمنطقة 

كمت الطم على خدي : انفضحت حازم عزا بعيني يا يمة الجيران درت 

شيخلصني يمممممه عزا العزاااني 

- لمي هدومج وغراضج وامشي وياي بساع 

- يااااا امشي ويااااك وين حازم استر عليه دخيلتك اني 

- مالج غرض لمي هدوووومج وغراضج وامممممشي 

ركضت عبيت هدومي وفلوسي وحاجياتي الاحتاجهن بعلاكة ولفيت عباتي وهو جر السركي وقفل باب البيت الداخلي والخارجي وطلع واني ارجف من فوك ليجوا 

صعدني وياه بالسيارة ومشى 

: وين راح تروح 

- لبيتي 

- عزا وابيتك شلووون 

- صبا .. صبا بس لا تسودنيني واسكتي رحمة للعباس 

اهدي واني اتصدالها كلها 

- ولو كتلونا 

- خايبة ياهو اليكتلنا شني جهاااال 

- حازم عليك العباس لا 

- هي شني اللا اكثر من فضيحة اسعد السواها بالبيت اكيد هسه راح يخبر عمج واخوتج بالسالفة بعد بيها لا 

- حازم جنينا على نفسنا 

- صبا منين تخافين ياهو يالجني علينا شبيييج بس سكتي ؟ 

- صخام الصخمني دهر الدهرني على هالمصيبة 

وخواتي يربي هسه لو درن يزعلن عليه 

- هسه ليش تخليني اجيبن خواتج من امس واليوم ما ذكرنج ولا سالن بحالج وانت شايلة همهن الزعلن والما زعلن موكلاتج مشربااااتج 

كمت اباوعله واداور للشارع والخوف كاتلني 

وصلاني للبيت .. الساعة تقريبا ١٢ هيج .. فتنا بيته 

لكينا دنيا هستوها اجت من المدرسة ، فتت كبله وهو يكللها : جا امج ما اجت بعدها 

وهي تباوع عليه : لا 

شنو بابا خير 

- ماكو شي بابا روحي لغرفة امج اكعدي .. 

- ماما تدري بهاي 

- هاي شنو اصعدي لغرفتج امج بالعجل 

مشت وهو يكلي : كعدي 

- حازم 

- راح تخليني انعل ابو حازم من ورا خوفج وتفكيرج بس اطيني مجال اوچد دربي رحمة للعبااااااااس 

كمت اكل باظافيري من الخوف 

فاتت امل .. انصدمت من شافتني كبالها .. 

حجت : خير 

حازم : ما طولج اجيتي اتحركي سويلنا شي ناكله بسرعة 

امل : اسوي المن 

- لصبا مريضة 

- اني اخدم هاي 

- لو ما خدمتيها وكمتي سويتيلها الريوك هسسسسسه اطلعين من هذا البيت ولو عتبتي الباب احسبي روحج مطلكة مني بالثلاث 

- كلاااابهم اني اخدم هالشكووووول 

- معناتها اطلعي برا 

- اطردني انيييي ام جهالك لجل هاااااي 

- امشي اطلعي برا طاااايحة حظ جايبتلي وحدة تتمعشك ومقنعة امي بيها خاطر اتخدمج بت الاواااادم ولج اني اتلعبيييين علييييه امل 

- حجتلك فتنتلك 

- امشي اطلعييييي منا لا هسه احرك البيت فوووووكاج والله 

كاعد تحجي عمي كام يخابرني 

وبنفس الوكت دك تليفون حازم .. جعفر خابراه ..... يتبع