فزيت واني اكله : حازم جعفر هذا الكاعد يدك 

- خلي يولي 

- يا خلي يولي معناها عرف كلشي وجاي يخابررررك 

- واني المن جبتج ليجاي غير عرفت راح يوصله خبر .. اهدي وفكينا من خوفج وتوترج 

اخذ التليفون ورد على جعفر : يا هلا بالنسيب 

- نسيب مو بعلي اليوم انت وياها اكتلكم ... اليوم احركممم حرك 

تاخذ اختي ابن***** اليوم وين تروحوووون مني تطيرووووووووون الزمكم الزمكم 

- انطير ليش اني ابيتي ولو رايد تجي مكاوم هلا بيك الباب مفتوح .

كام جعفر يصيح ويهدد و حازم كاله : لا تهوبز لك افعل 

وسده بوجهه 

وخابر على اخوه الجبير وكاله : اخوة البنية دروا بزواجنا واخوها خابر يهدد بلغ عمامي لو صار اي شي .. 

اني واكفة اطكطك باصابيعي و هو كاعد وامل واكفة تكله : لو اجو هدو علينا شلون بينا كلي 

- سويتي غدا ؟ 

- الناس جايتنا هداده وانت تكلي غدا لو راح واحد من جهالي ربحي بيمن بييييك لو بهااااي ام المتتتتتتتتتعة 

- لو كاعدة ومنچبة ابيتج وصاينة روحج جا ما جبتيلي كل هالمشاكل طايحة الحظ ليش تخليني اهينج كدام المرة والجهال احفظي ماي وجهج وانكلعي من هالبيت وحطي لرووووحج كراااامة 

- فدوة واعوف بيتي للعكبن من تااااالي لا يا عيني البيت بيتي والجهال جهالي انت الاخذها واخذ مشاكلها وشفلكم ديرررررة بعيد عنا 

- ثقي والحسين ساعة ودم الحسين صاعدة عدي ليجاي وبالكوة كاض روحي ساعة لو ما جهزتي الغدا ما ابقيج على ذمتي والبيت هذا التصيحين بيتي باحلامج تشوفي خليني رجعتج بعد ما زنيتي وجذبتي يم ام عقلين وضحكتي على راسها .. يمي فاهمج وفاهم ملاعبج .. امشييييييي 

-واني ليش ما اريدنها اطب بيتي اعرفنها ادير راسك علي وعلى الجهال وتحطنا بالباب حتى البيت يصفاااااالها الفكر العااااجر 

من حچتها كام من مكانه ركضت من كدامه بسرعة واني لزمته : حازم جعفر جاي بالطريق وانت حاير بامل عليك الله شوف حل لو اجا لهنا شلوون 

- انت اكعدي وصمي حلكج والج الصاااافي لا تدخلين ولا تفكرييين بس اكعدي ما وترني وطيح حظي غير خوفج ورجفتج هااااي 

كعدت وهو يصيح : دنيييييييا .. دنيااااا 

اجت تركض : ها بابا 

-اصعدي جيبيلي ملابس بسرعة خلي اخلص من ذني المتكمط بيهن من امس واليوم اصعدددددي 

ركضت وعلي وسجاد كدامه كام يحجي وياهم بتحذير : ممنوع منعا باتا تطلعون باب البيت تكعدون جوا لو شفت واحد منكم واصل عتبة الباب اوذركم افتهمتوووو 

هزوا روسهم ما حجوا من الخوف .. 

اطته دنيا الملابس وهو يمشي للمطبخ .. امل لازمة التليفون وتحجي ويا اهلها ع الجاي يصير .. فات كض التليفون وركعة بالكاع ورجع شاله وركعة بالكاع وصرخ : الكلمة اللخ اركعج مثله .. كملي الاكل يلاااااا 

ما حجت ابد .. 

اني اجي منا واروح منا ما اعرف شسوي هو عصبي حيل ما يتحاجى .. وعمي ما بطل يخابرني .. وخواتي ينكطع الاتصال من وحدة ادك الثانية .. 

خفت ارد وحازم ينهد بيه 

شسوي هسه يربي .. سهى ما بطلت فوك ال١٤ مكالمة صارت .. 

وحازم طب للحمام وامل بالمطبخ .. رديت على سهى .. اول ما رديت انهدت بيه : صبا وين انتتتت صبببا 

- اني ابيت حازم 

- ولج الله لا ينطيج ان شاءالله يا طايحة الحظ ولج بعتينا ورخصيتينا كلنا علموووووود زلمة مو اتزوج وخانج ويا صديقتج وبعدج متلزكة بيه يا ما عندج كراااامة يا طياااايحة الحظ شلون نسد فضيحتج هسه كليليييييلي بيش نرگعها 

- سهى هذا الصار والصار مو بيدي ابد اتمرض البارحة وحازم ما رضى يعوفني مريضة 

- ريتج متي ريتج فطستي وافتكينا منج على هالفضيييييحة 

ولج حتى تفوخين روحج بليتنا وسودتي وجووووهنا ولج شنگل للناس هررررررمت عنبلت الا تعرررررس 

رادج عدنان وكفتي سيف ما اريدنه 

ما تريدين الستر تريدين المحكح****  والسرسرة 

فختي ولج ارتاحيييييتي بيتي عدج وشهرتينا كدام الوادم والناس درت تبيتين زلم عدددددج بالبيت 

- سهى حرام عليج ليش تحجين وياي هيج اني ما سويت شي حرااام 

- جا الحراااااام شلون يصير لووووونه ولج صخمتي وجوهنا وتكولين مو حرام 

- اني اتزوجت بشرع الله ما زنيت ولا سويت شي غلط انت اختي المفروض تسنديني تصيرين وياي اني بيمن اسند روحي بغيرجن .. اذا انت كاعد اتعنين بيه وتدعين عليه جا شترجى من الباقييين 

- ما عاجبج وانت سودتي وجهييييي شكل لرجلي وشلج شكل لعيالي هرررررمت اختي دكت على رجل وخذته 

- كليلهم اخوتي ذبوها بالشارع ومحد منهم لفاها قررت تتزوج وتستر نفسها كليلهم ظلموها كليلهم كتلوها كليلهم استغلوها ورادو يبيعون كلشي ومحد وكفلها تستحين تكولين عفتوني بالشارع وتستحين تكولين رادت تستر نفسها وتتزوج بس ما تستحين وانت تطعنين بيه قبل الكل . 

- اني الما استحي صبييييه مو اني المااااا استحي 

مو عدج بيت ... مو عدج شغللللل شتسوييييين بالزلمة هاااا لو دوتيتي 

لا تكولين ذبوني ولا تعيشين دور المظلومة كولي دودت وردتلي رجل يا طاااااايحة الحظ 

- البيت والشغل منين جبتهن اخوتي جابولياهن لو انتن لو منو 

ياهو المنكم كالي هاج عيني نفسج لو ما حازم اني لهسه بعدني تحت ايد عمي يدمغ عليه 

- ولج لو ضالة بالمدمغة ولا فضيحتج هاااي ولج صبا راح يكتلوووونج انت وهذا الجلب الكوا* الخذيتي طلقتين هواي عليكم ويخلصون منكم بس شيخلصنا من عاااااركم 

تحجي هي واني ابچي .. 

جر حازم التليفون من ورا وحطه على اذنه وهو يكلي : ويا منو كاعد تحجين 

صرخت سهى : عساها بحظك وابختك يا كوا* فضحتنا وشهرتنا .. يابو النسوااان عساها تطلع بعرضك وتنفضح واشوف وجهك اسود كداااام الناس .. 

- اذا انت اختها وهيج بربو* جا لا عتب على اخوتج 

اسمعي ولج مرة وما ارد عليج بس مرة اللخ لو خابرتي وحجيتي بيتج هذا الترجفين وتخافين لا رجلج وعيالج يحجون وعلي لا اكاومنهم واخليهم بالجلاليق يطلعونج من البيت ويتبرون منج ويذبونج بالشارع وحتى صريفة ما تلكين تلفيج ساعتها فشري واحجي زين .... ولي . 

سده بوجهه وهو يكلي : ليش ترديييين 

مو كلت مممنوع تردون على اي بشررررررر حجيت لو ما حجييييييت 

انزويت وكعدت ليغاد .. وهو اخذ التليفون وحطه بجيبه 

وصاح بعلي : شوف امك كلها الغدا .. 

كام علي بسرعة .. 

وهو كعد ع التخم تنهد سجاد اجاه : بابا يعني راح يكتلونا !؟ 

- لا تدخل بابا اكعد غاد ولا تحجي بسوالف اكبااار امشي 

دنيا : بابا وشلون روح بعد للمدرسة 

- امشي لغرفتج 

- بس حتى تجيب هاي احنا نموووت مو البارحة خطبت هاي شتسوي بيها 

رفع وجهه : امشي لج منا بت الكلببببب امشيييي 

مشت للمطبخ يم امها .. 

شوية واجت امل حطت صينية الغدا كباله .. كالتله : اريد اخذ الجهال واروحن لاهلي 

- روحي انت الجهال ممنوع 

- ليش يمه اخلي الجهال هنا اجاهم احد طكهم لو اذاهم اني ربحي بيمن 

باوعلها تنهد وكلالها : اصبري وكعدي بغرفتج هسه امل  واني اخذكم بس شوية 

- زين شصار واهلها كاعدين يهدون انت وياها مو تعاوفتوا وامس خطبت ومقررين على وفاء هيج بين ليلة ويوم يتغير كلشي 

- جنتي تعرفين وفاء رايدة حسن وكعدتي تقنعين بامي وامي تزن وترن براسي لحد ما كتلكم توكلوا ليش ما كلتيلي المرة علشكة وهواها يم واحد ثاني 

- يا علي العباس ان جان اعرف 

- العباس سطرج ان شاءالله امل جوزي مني رحمة للعباس التحلفين بي كافي خليني متحملج لخاطر هالكوم البيناتنا صمي حلكج مني ولا تدخليييين باموري 

- واني شمسوية فوك اتخطبتلك وفضلت على نفسي كلشي ما ترضى بيه 

- لو مفضلتي على نفسج ومنجبة وكاعدة بالبيت جا كل هذااااا ما صار .. بس انت وحدة سز وطايحة حظ وكلهن بيج وامشي عني لا تزقنبيني بغداي

ما مشت كعدت ع التخم ليغاد 

وهو دنك ياكل .. باوعلي : كومي صبيلج شي اكل لا تطيحين اروح احتار بيج لو بهالهوسة كووومي 

- ما مشتهية 

- اجبري روحج كووومي .. اتحررركي 

دك تليفونه و وكام يحجي ويا واحد من جبيرهم 

وكاله ... السالفة بويه 

بت حجي راضي لكيتها تريد تطيح بالشارع عمها طاكها شاك راسها وخذيتها للمستشفى داويتها طلع عمها طاردها واخوتها طاردينها البت خياطة ساعدتها تستلف فلوس وتاخذليها غريفة بالتجاوز تكعد بيها اخير من الشارع ويومية طاردها وحشمت اهل الحسينية عليها و حشمت جماعتناب المكتب شو ذولة اخوتها من دروا خذتلها بيت كوموا واكعدو بالبيت واعرضوا للبيت ورادو يطردونها .. اني خبرت جماعة المكتب عليهم وردت اخذ المرة الي على سنة الله ورسولة خاطر استر عليها .. خطبتها ما رضوا يطونها ..وهي  تنام بالعيادة التشغل بيها طاردينها من البيت كمت عقدت عليها بت هاي وخفت لا احد يتعرضلها يسويلها شي والبنية صغيرة بس البنية خافت من اخوتها لان ما راضين بالزواج .. الا الزواج محمد و صادق واهلي كلهم يدرون بالزواج مو سر بس هي خافت من اخوتها ما بلغتهم .. وهم ما دروا عن الزواج لان اصلا ما يدرون عنها متيهينها بس وكت الطلايب يهدون يوصيرون زلم 

مالي علاقة شنو 

اني هم ما اكلك نبي روحي اتكفلت هالبت وبعد طحت بامرها ما كدرت انهر روحي واكول مالي غرض بيها هسه الله دازني الها لو بختي ما ادري الصار صار 

لا يا عمي البت اهلها ميتين واخوتها مطردينها جيف مطلكة 

ذبوها عد عمها عمها هم كل يوم والثاني طاردها .. 

من يطردونها ما يفكرون شراح يصير بيها بالشارع ياهو اليغريها شيجرى عليها من تتزوج يصعد عدهم الشرف ويصيرون زلم والله بالنعال اهينهم حتى مو بالقندرة خاف غالية حشى ما اكول بوجهك 

- ديلا انتظركم .. خوش سهلة 

سد الخط واني كمت كعدت يمه : يعني تنحل عليك الله 

- وليش ما تنحل بويه انت بس اهدي ولا تخافين وكومي اكليلج شي رحمة لعلي ابن ابي طالب لا تطيحين واني مبتلي 

حجاها ودك على صاحبه بالمكتب 

بلغه ووصاه : اريدك شاهد على يوم الخذيتكم بالليل لبيتها ولكيتوها كاعدة ابيت ترجف ما عدها لا فراش ولا غطا وكاتلها البرد .. لا وياها اخو ولا جاها احد من اهلها لو عمامها . 

 كاله : فوت واحنا شهودك وشيصير احنا وياك .. ما دوروها من كتلها البرد وكاعدة بهيمة اشتد الغيض بصدورهم من انزوجت وانسترت جا شكد كواويـ * .. ذولة كاعد يكلون لبتهم  هرمي بس ممنوع تتزوجين وتنسترين . 

- جا هي بلوة الكوا* من يلبس ثوب الشرف .. بيا لغة تجاريه

كاعد يحجي حس بصوت السيارات صفت برا بسرعة انتبه وشمر التليفون وصرخ علينا : ابعدوا من الجام بسرررررعة 

تعالوا ليجاي 

فزينا كلنا فد فزة ما عرفنا شكو وليش صاح بينا 

اول ما فزت امل كضت بالباب واني ركضت يمه 

وجهالها ركضوا ورا امهم .. بلا ما يدري اندفع الاكل وكع واتكسرت المواعين وصارت هوسة وهوي صرخ ... اطلعوا من الاستقباااااال ادخلوا الغرفة الصغييييرة بسرررعة 

حجاها وهو يدفع بيه الهم وهم يتعثرون من الخوف محد بينا شاف دربه 

واشتعل الرمي ع البيت كامت امل تصرخ : انهجمت بيوووووتنا يما الله لا يطيج هجمتييييي البيت 

وهو يصرخ : كوووموااا لغرفة الجووووووا اتحررررركو 

يشيل بدنيا تكوم وتتعثر وتصيح 

واني اجر بيه واكله : راح يكتلونا راح يطبووون علينااااااا 

- بس طبوووو جوا انعل والديييييكم طبووووووو 

طلق اجا بجام الاستقبال تكسر كله 

فزينا كلنا تراكضنا للغرفة الصغيرة كعدت امل وجهالها كلهم التموا حوالها وحازم يريد يسد الباب علينا واني لازمه بادية : ويييين ترووووح تريدهم يكتلوووونك 

- دووووخري طبييييي جوا 

- ما تروووووح حازم امسلحيييين يكتلووونك لا تروووح 

- خل اجيب اسلاحي وخرررري مني 

- ما اعوووفك واالله اني اطلعلهم واذب روحي كدامهم بس انت لا تطلع 

- دطبييييي لج تطلعيلهم شنو طبيييي 

فوتني غصب ودفعني وسد الباب .. واني كمت الطم اريد اجر بالباب ما ينجر هو ساده علينا .. وامل تصيح : ارتاااااحيتي تيتموا جهاليييي يمه راح بيها من ورا النسوووووان الله يلا ينطيج ان شاءلله الله يفكنا منج 

- افتحي الباب هلي اطلعله افتحييييي 

كمت اضرب ع الباب حيل .. 

خفت حس الرمي وكمنا نسمع صياح بالشارع .. 

كامت امل من جهالها تجر بالباب تريد تفتحه ما ينفتح حجت وهي تدفعني : ارتاحيتي هسه من خليتي البيت ينرش برصااااص ارتااااحيتي كح**** 

- لو ما انت الرايحة لاخوي ومسوية كل السويتي جان كل هذا ما صار انت الدخلتي جعفر بهالموضوع والا جعفر عمره ما درى عنييي 

- تتمسكن ام الزلم وهي يومية ويا واحد 

- الله يجازيج ما اكول غيرها طعن الشرف اسهل شي على السااانكم 

دنيا : بابا اذا صار بيه شي كله من وراح والله اكلج بسنوني والله 

وامل ادك بالباب وتريد احد يفتحلنا 

كمنا نسمع صوت  الزلم برا عالي منفتهم شيكولون

اجا ابن محمد فتح الباب كالتله امل : عمك وين 

- راح ويا ابوووي ابوي دعموووه 

طلعت بسرعة وجرت عباتها 

واحنا طلعنا للحوش .. بيت محمد قريب من بيت حازم 

هم وعمامهم وكرايبهم كلهم بمنطقة وحدة .. فبدقايق طاش الخبر زلم ونسوان هدت على حس الرمي واول من حضر محمد اخوه

جعفر من جاي وجايب جماعته 

جماعته مغطين وجوهم ما مبينين منو ومنين .. زلم المنطقة كلها طلعت والتمت على حس الرمي  وصارت هوسة 

من صايرة هوسة جعفر راد ينسحب كبل لا يلتمون عليييه منسحب هو وجماعته من المنطقة تعرضلهم محمد  وذب روحه كدام السيارة من راس الشارع 

وولد منطقته وعمامه ذبو روحهم على بيبان السيارة يجروهن ويفتحون بيهن 

جروا واحد من السيارة نزلوه للكاع وهي تمشي وجعفر داس بالسيارة  داعم محمد وشارد 

تراكضوا اهل المنطقة وحازم لمحمد شايلنه وراكضين بيه للمستشفى .. 

وعمامهم وكفوا اباب البيت .. عم حازم بالباب وهم كاضين بواحد من الدك بيت حازم 

وابن عم حازم دخل اللنا للبيت النسوان التمن لامل يتفقدنها 

هوسة ما تسمع شينكال شيحجي كلها تصيح كلها تستفسر 

منو يغلط منو يدعي منو يجرك .. كأنما دوامة وواكف بيها بس تريد تفتهم شكاعد يصير 

بلحظة وبظهرية الناس منين طلعت والتمت هيج كانما دود ما تدري 

وامل ما خلت كلمه ما حجتها عليه كام ابن عم حازم يصيح : كومن امشن ويانا لا تظلن للبيت 

وامل تكله : كله من حدر راسها هاي الكح*** الجابها عليييينه يممممه كله من ورااااها هجمت بيووووتنا ماخذها متعة واخوتها ما يدررررررون ولكم مااااخذته متعة 

كتلها : خافي ربج ليش تشيعين عليه هيج اتزوجنا بعقد مو متعة انت ليش ما تخافين الله

- ام الزلم يمه ام الرجوووووله هجمممممت بيتي 

كام يصيح بيها ابن عم حازم كاللها : ما تستحين كااافي مرة صارت على ذمته وعرضه لا تشيعين بعرررررضه امشي 

جراها ودفعها للشارع وهي ما بطلت صياح ام المتعة وام الرجولة 

حجه وكالي : جيبي عباتج وامشي ويانا بسرعة 

-وين راح تاخذوني والله لو رجعتوني لاخوتي يكتلوني مراح يعوفوني 

- ما نرجعج خوية امشي ويانا نأمنج لا واحد منهم يهد ع البيت وزلمته ماكو ونبتلي امشي كووومي 

ركضت جبت عباتي وطلعت 

شفت رجال منهم ماخذ امل والجهال ويصيح عليها تصم حلكها وتسكت 

واني مشيت ورا ابن عمه لحد ما طلعنا الفرع دخلني لبيت ما ادري مالمن بس نسوان واكفات بالباب كاللهن : دخلنها جوا ولا تخلن احد يدري بيها هنا بسررررعة 

فتت .. والنسوان يباوعن عليه : شصار يبنية صدك ماخذته متعة 

- لا والله متزوجين زواج بس امل هي اللي دا تشيع وتكول متعة 

- هو مو امس خطبج لو غيرج 

ردت عليها الثانية : خية ذيج ثانية الخطبها حازم هذا النكول عليه خير وزلمة اثاري مصفطهن جوا ايده ومحد يدري 

- يا والخطبها هسه شنو حالها .. اكيد سمعتي بيه خطب وشهرتي السالفة 

- ما شهرت ولا كربت هو اللي اجاني للبيت وهو الراد الصار .

- هو انت صدك يعني اتزوجتي من ورا اهلج 

- اهلي ميتين واخوتي طارديني من بيوتهم وخواتي متزوجات

- يا جا بعد ياهو مالتهم اذا اتزوجتي اذا طاردينج وامج وابوج ميتين شني بخيرهم ما خيروني بشرهم عموا عليه .. 

ردت الثانية : شني مالهم غرض احنا وين كاعدين حتى لو ما بيهم خير غير يضلون اخوتها ما لازم تتزوج الا برضاهم .. 

- جا مو تكول طاردينها اذا طاردينها رضاتيش هم اعتبرهم اخوة واردلهم لا والله حا لكيتلي رجل حالي من حالها اتزوج واستر على روحي وافتك من حجي الوادم 

- خية كل الينحجي تصدكي اني سمعت من امل مشتريلها بيت ومكعديها واخوها كاعد وياها وبس يريدون يكضوها ويسيطرون عليها ما تكعد لا تزعلين علي مو جايج زلمة ورايدين يطونج وما راضية وحتى مطلكة و الطلكاج مرجعج وما راده .. عاشكة حازم وحازم متعارك ويا اخوها وما راضين سوتهم طاردينها و محد داري عنهم 

- اني اشتغل واخذت البيت اقساط مو اخوتي اشتروه .. واخوي الكاعد وياي رايد يبيع البيت وياخذ فلوسه ما رايد الكعدة لا اتظلمين بختج وتسمعين من هذا وذاك وتحجين .. 

- شني خية شفتينا سود حسبالج هنود بيت بالقساط ساهو الياخذ بيت بالقساط 

- تجاوز بمليونين ونص اتسلفتهن وكاعد ادفع اقساطهن لليوم عليمن اجذب عليج 

حجت المرة الجبيرة : صحيح التجاوزات ذني الجوا اسعارهن رخيصة بس يكولون مسكونات ومو زينات مو حميد اخذله قطعة بالشماعية بهيج سعر 

رديت : هي بالشماعية 

ردت عليه : طبي جوا خالة لبين ما يجي الحجي ونشوف وين تجري الامور ربج يحلها 

مشيت خطوتين وانداريت وراي البيت غريب ما اندل منين ادخل 

دخلت المرة كدامي وكعدت بالدوانية بالكاع والمخدة وراي .. عافتي وحدي والنسوان كلهن راحن جوا .. ونص منهن بعدهن بالحوش يحجن 

كمت اطك اصبع باصبع وبالي يم حازم وشصار وشراح يصير وشلون راح تخلص هالمشكلة هاي وتفض على خير لو لا .. 

شوية وفات زلمة جبير للبيت صاح : خطار فوتن جوا 

احتاريت منين اروح 

طلعت من الغرفة وكفت برا 

صاح : طبي جوا راح يفوووتون زلم فوتي 

- وين اطب ما اعرف احد هنا اريد اروح لحازم وينه

- هو انت مرت حازم الجديدة 

- اي اني 

صاح : نجااااااة نجااااة 

- ها بوية 

- اخذي البت داخل .. بسرعة 

- اي تعاي فوتي 

مشيت وياها كعدت بالعول الحجية كاعدة و جنبنها اثنين وبناتها وحدة متزوجة جاية هي وجهالها والثانية ما معرسة هذا الافتهمته من شوالفهن وهن حجن ويا بعض 

واني كاعدة بصفحة 

شوية ودخلت ام حازم كالت : وينها هاي اطنيااااها يونها خلي ابردد كلبي بيهااااا وينهاااااا 

فزيت اني وبنية جرتني للدرج والحجية وكفت كدامها : ام محمد كولي يا الله شمالج خية شجاج 

- ولج خية واحد من ويلادي اندعم والثاني طالبينه دم من حدر راس هاي الكح**** اليوم اشرب من دمها وعلييييي اطنيااااها 

- هي ياهو مالتها شنااالج حا موش ابنج الرادها وتعناها ما تلومين ابنج تلومين المرة وانت العاكلة يا ام محمد 

- ابني زلمممممة من ظهر زلمة ما تخوططططططه النسوان ورد من دربها وامس جانت خطبته بس هاي الما خلته بحاله ودكت الا تحضر خطبته وتخربها لينا هجمت بيووووتنا وراحو ويلادي يمااااااااا 

طب الحجي وهو يصيح بيها : حسسسسج منا زلم شنهي نسيتوا المستحى  لو انهبلتوووو 

- انهبلت يمه اتسودنت ويلادي راحو وتريدني ما اتسووووودن .. ولدي وينهم كلي عنهم 

- ما بيهم شي وجاييين بالدرب كضي حسج ام محمد ولا تزيدينها ولو ما كدرتي ردي البيتج عدي وادم بالدوانية لا تفشلني ويااااهم .. يلااا 

زمخ وفات .. والحجية جرت ام حازم 

والبنية تكلي : فوتي جوا احسلج 

اشرتلها تعرفني وكعدت ع الدرج 

: لو تفوتين جوا ومحد يشوفج والله احسلج احسن ما تصير مشاكل 

- اذا تعرفين رقم حازم ياريت تخابرينه 

- يا وين تلكين حازم هسه ما تشوفينها الزلم ملتمة والهوسة كابة 

- بس خابري خل يجي اني لازم اطلع 

- يا اتطلعيييين وين لو كضوج هسه غير يكتلونج صدك تحجييين 

- انكتل ولا انذل وانهان هيج كافي لو تخابرينه لو تخلوني اطلع 

صاحت امها اجتني كالت : خالة شنهي التطلعين زلم حوك وعليها العتب تكاتلت و تماطلت من وراج ورايدة تعوفينهم واتطلعييين 

- خابري حازم لعد 

- وين اخابره اخوه مدعوم والعشاير مكاووومته اركدي 

سكتت بس عيوني جبدن 

لا اكدر ابقى وحدتهن نظراتها تباوعلي جنها شايفة كح*** كدامها 

غير حجيهن وماصيحهم و مزامخهم ما جاي اكدر اتحمل الوضع عدهم كلش .. 

اتحملت على اعصابي .. 

الدرج يصير كبال الباب مال الهول .. حديد وبيه جام ما رضيت اكوم من عده ضليت مكابلته بلكت اشوف حازم واصيحه يخلصني من هالوضع اللي حطني 

ساعتين واني بمكاني 

لحد ما شفت حازم فات وهو كاض محمد اخوه وزلم هواي فاتت وراه 

كمت من مكاني ردت اطلع فات للدوانية .. دزيت عليه طفل ما اجا .. كمت احوس بمكاني اريده يجي .. بس ما اجا ولا اهتم ولا كأن اني متأذية ولا حاس بيه 

انفتح باب الاستقبال .. لمحته اشرتله بمعنى راح اطلع 

خزرني اوخر من الباب سحبت عباتي من جتفي ولبستها واشرتله ( رايحة) 

كام من مكانه بسرعة واجا : ما تشوفيييين الدوانية مترووووسة زلم طبييييي جوا 

- لا تصيح عليه انت ترا وصلت لهنا وياي افتهمت اطلع وعساهم يكتلوووني كافي شبعت هم وقهر واهايين شنو اللذة من عيشتي اطيني لاخوتي وخليهم يكتلوووني 

- لا تخلين اعصاااابي تطلع طبيييي جوا 

- ما اطب لو ترجعني لبيت لو ما اخذني لبيت عمي 

- ولج يا بيت عمج عمامج دزو كوام والزلم تكاتلت يا عماممممج 

- مالي علاقة بكل هذا كتلك حازم استرني حازم لا تحطني بهالموقف كتلي ارتاحي عوفي كلي علي والج الصافي ما شفت صاااغي بس سب وشتم وغلط وكلام ماي نلبس عليه ثوب من اهلك ونااااسك كافي عوووفني .. انت السبب بكل الجاي يصير بينا .. بذمتك ان شالله حاطة العباس وياااااك 

- سمعي لج واصلة وياي ليجاي وروحي طالعة اكعدي بمكااانج اخلص منهم واجيييج اجي  .. تدعي علي

- ما اطب ووالله ما اطب بعد ما ابقى 

- صبا لا تسودنيني وتشمتين كل اهلي وناسي بيه كلها جاي تصيح شعدك اخذت وشعدك بليت روحك .. اكعدي خليني احلها 

- والله ما بليت غيري .. انت كدام ربعك واهلك سبع ماخذ المرة الرايده غصب عن العاندوك وانيييي الساقطة بعيونهم واسمع كل الفشار والشتايييم منهم حجيتها واختكت 

- كافي اهدي لا تصيحين اني شجاي اسوي غير كل هذا لخاطرج 

- ما اريد لخاطري رجعين 

- ولج ارجعج وييين ما تشوفين الديوان متروس 

- مو مشكلتي ابيت عمك هنا ما ابقى ما اتحمل 

- صبا .. بريه ابوس راسج بس اتحملي شوية لخاطري وعلي ساعة ساعتين اخذج وامشي مو اكثر بس خلي اخلص ويا الزلم ونطلع 

يحجي ويريد يلزم بيدي واحنا بالمطبخ 

واني اجر باديا وابجي : ما اريد وخر مني 

كل الصار منك هذا الخفت منه طيحتني بيه 

فضحتني بين الناس وهسه اني بعيونهم كح** 

- اكص السانه اليجيبج بشين والله شحدهم 

- كافي تصفط عليه ما كطعت غير الساني مرتك بالشارع تصيح ام المتعة وامك ما هلت حجاية ما حجتها 

- حجي نسوااان هن النسوان ينكضن حتى تكض الساناتهن خلي يولن من الزلم ياهو الحاب سيرتج 

- واني كاعدة ويا الزلم حتى اسمع زلم ما جاي اسنع غير حجي نسوانكم المثل السجاجين 

- وحتى دن راح اخلصج منهن بس اهدي وعلي تعبان .. من الصبح ليجاي ما حطيت ولا ارتاحيت فرد هوسة .. عليمن غير رايد احويج 

- تحويني بفضيحة ؟ انت فضحتني 

- اكو احد يفضح عرضة انت مرتي صبا محد يفضح مرته واني راح احلن كل هالامور بس مو بليلة وضحها هالجمعت الزلم و العكل والناس وراح نطلع على بيت عمج 

- وراح اتدكون بيت عمي مو 

- لا ما راح ندك بيت عمج .. راح ندك جعفر وننزل عد عمج طلابة ثار الزلمة الكسروه منا 

- واني 

مد اديه وكض راسي : انت اهدي وصلي على محمد واني راح ارجعلج والله 

- زين رجعني لبيتك مو قريب منا 

- اخاف عليج والله 

- ما اريد ابقى هنا .. 

- تريدين اوصي عليج 

- لا تحجي اسكت 

- تعاي قابل شمسوييين تعاي 

دخل امه والحجية كاعدات .. فوتني وهو كاض بيدي كاللها : يمه شنهو معناتها تهدين ع البنية 

رادت تحجي انهد بيها : اني التعنيت البيتها واني الما رضيت اطلكها واني الردت هذا الصار كله هي ما رايدته فرحمة لوالديج يمه لو ما رايدة تفيديني وتخافين علي كلمة ما تسمعينها 

كالتلها : عمت عيني كون ولك حويزم انت الزلمة الاتباها بيك تاليتك تهد على امك لجل مرة ولك غسلت راسك وسبيت اهلك من ورا مررررره 

- اي والله يمه من ورا مرة عدج وياي شيييي اذا رايدة اطبكج ويا الوادم العارضتلي ما عدي مانع .. مو جاهل اني وتخافين علي لو تهدين على مرتي واتعنين بيها كلمة اللخ اسمعها وحق هو دم الحسين اخربها وتعرفيني من اتسودن . 

كامت تحجي وياه عمته : على كيفك عمة جا امك خايفة عليك وتشوفكم انت واخيك انسبيتو وهي كلب والدك شتريدها تسوي 

- تدعي تخاف علينا ما تنهد بوحدة اني جايبها وجاري عليها كل الصار من وراي من تلوم خلي تلووومني لا ترد على غيري هي امي وتعرفني محد يسيرني وكل هوسة اطبنها اتونس بيها مو احد يطيحني بيها . 

حجاها واندار على عمته كاللها : عمة احاسبنج الج لو احد اجا يمها اعرفج انت مرة ادمية وتعرفين الحق البت اني ماخذها على سنة الله ورسوله وبعقد وشهود اليمسها بحجاية من بناتج وجناينج انت وعمي الاحظكم كدامي 

- يا عمة احطها بيعيوني صدك جذب محد جاسها وعلي بس هن يستفسرن ما حجن شي الشاهد الله 

- اني رايح والبت يمج ارجعلها بس اخلص .. وعلى حجايتي وياج 

راد يمشي كضيت بيه : بس تليفوني 

- عوفي تليفونج هسه 

- حازم 

امه واكفة حجت : الزلم متلايمة وحايرة بمصيبتها وهي تتنعوص عليه هدي الولد يروح يحل بلااااويج هدييي 

- يمه رحمة الوالديج مالج غرض البت غريبة لا تعرفج ولا متعودة على طبعج بسج المن اصيرن انا 

عافني ومشى .. 

وهي ما بطلت تباوعلي وتعض على اصبعها : اااااخ لو بيدي اشرمنج شرم ولج انت وجه اليابس تتعارك الزلم من وراج وابني يندعم والثاني داك صدره وذاب روحه .. خايبة بصخلتين ما اسرحنج بس بعد حظ الكبايح بالسما لايح هاجر وكاتل روحه مدري شصايبه 

حجت الحجية : ام محمد دخيل بختج هسه يرد ويسبينا سباية وعلي دبسج روحي يمه للبنيات اكعدي يمهن .. امشي لا تكابليها 

- خايبة خية انطحن افادي ولج حازم زززززلمة زلمة من جان مراهق ما تمعشك ودور نسوان ولا يوم جاب طاري النسوان على السانه وهسه صاير محبس لهاي ويوكف كبالي يزمخ لجلها .. اكص اديه من العچس لو ما طلعت ساحرتله .. وعليييي ساحرتله ابني موش خالي ..

تعلميني ببني 

عفتها ومشيت طلعت 

لكيت وحدة كاعد تنظف بالهول وتلملم .. 

شافتني : اكعدي بالمطبخ احبيبة خليني امسح الهول 

- امسح عنج 

- لا يا بعد كلبي بيا حال انت 

- يا حال بدال ما اكل اظافير اديه اقلها اشغل اديه بحاجة من اضوجن ما اعرف اصفن لا ما الهي اديه بشغلة 

ضحكت : خية خاف اطيج شغل وعمتي تكوم عليه 

- عدج شي طبخ اسوي 

- تثرمين المسواك للعشا 

- بكيفج 

اجت طلعتلي بصل كالتلي : رايدة اسوي كبة جريش تساعديني 

- اطيني احسن ما اظلن هيج اتسودن لو ضليت اصفن 

اطتني تختة وسجينة وطلعتلي البرغل نكعته وكعدت اثرم وراسي جرخ 

احسن ما اكابل امه لو واصفن واكعد .. طلعتلي طاوة حمست اللحم والبصل وقرمت عليه كرفست من طفيت النار ذبيت الكرفس عليه خاطر لا ينطبخ ويروح طعمه . 

حطت جدر وحمست بصل وبهارات ومعجون  وفورت مي واني كمت الف كبة واذب الها .. وهي راحت تسويلها غير شغلة نزلت الجنة الثانية كامت تشغل 

وهم داخل .. وملتمين و الزلم كل ما جالها تزيد 

الدوانية ما كامت تكفيهم .. الحوش اتعبى فتحوا الباب وجابوا كراسي بالباب وكلهم شباب يتحلفون بهالد والدك ولافين شاماغات على وجوهم 

تحس مو عركة انما فد فعالية وفرحانين بيها ومتحمسين كل شوية يكولون : شوكت نهد 

اني وكفت اشتغل ويا نسوانهم اللي الجاي والماي ما وكف كام يجر .. 

واحنا نحضر بالعشا .. ودوا السفرة وصبوا تمن  وفوكاه حشو ودجاج مكلي ومرك كبة جريش حمرة .. وزلاطة ولبن وخبز وخضرة .. ونصبوا سفرة شطولها 

طلع حازم من الديوان وكت العشا .. اني واكفة اجلف ع السنك وصافنة بالي مو يمهم .. حجه من وراي 

-كل هالزلم جاي تريد تهد من وراج وانت كاعدة تجلفين امواعين 

انداريتله : ولو هدو شراح يصير 

-اخذلج حقج من كل واحد اذاج وحك هو ربج 

وبهالزلم ذول الجبتهم ورايح بيهم اسد حلك شكو واحد يجيب سيرتج بشين 

- بس ما راح يبطلون حجي .. محمد شلونه متأذي شفته مجبسينه ؟ 

- لا يمعودة كلاوات شلنا للمستشفى رضوض بسيطة عاد والله خابرتلج واحد كرابتنا يشتغل بالسماشفى كتله رايدك .. سوالنا اشعة باسمه تثبت رجله مكسورة .. وجبسوا رجله 

- وراح تضل مجبسه 

- لحد ما تفض الطلابه يحلها كوا* ركصلها بجفية راح ياخذ شهر اجازة من الدوام بهالاشعة .. يشبع نوم براسي 

ابتسمت : فوكاها فوك ما اندعم لخاطرك 

- فوكاها شني جا غير اخوي اذا هو ما يهدلي ياهو اليهد عني 

- البيت تكسر كله 

- ماطولج انت عدي ويمي ومأمن عليج كلشي يتعوض وربج لا اعيشج عيشة ذني الحيايا العابنج كلهن يندقن منها 

- اخاف احلم وابنيلي بيت احلام ويتهدم فوك راسي 

- ما عاش اليهدملج حلم واني موجود بس اطمني وخفي عليه بالاعصاب واني خادمج وعلي شتريدين مني يجرالج 

- حشاك .. الاريدنه تضل سالم ونعيش بخير ما اريد اكثر 

- نعيش لا تخافين نعيش .. 

حجاها ووكف يفتح الجدور باقي حواف 

كام يدور خاشوكة غسلتله من السنك وانطيته 

وكتله : من راح ترجع بالليل راح نضل هنا لو شلون 

- لا نروح لبيت محمد 

- وامك هناك 

- وياهو مالتج بيها كلها فترة و تفض .. 

يحجي وياكل .. 

صاح عليه ابن عمه ، كاله : جاااايك 

كضني من زندي وندسني : لا تضلين بدون اكل اكلي ودواج ضل بالبيت اجيبه من اجي بالليل خاطر مرت محمد تضربج ابرة تعرف 

حجاها ومشى ... 

طلع اله وابن عمه دخل السلاح للدوانية .. 

حطوهن بالكاع وانطوهن لاكثر زلم منهم يثقون بيهم يعرفون للسلاح بحيث يضربون البيت ما يرمون بالجو ولا على الجيران .. 

عشر زلم اتسلحوا من بينهم حازم 

كاللهم عمهم اطلعوا لبيت جعفر دكوهم واحنا طالعين لبيت عمها نبلغة ونكله حول .. خاطر ياخذ عطوة اعلى كسرة ابنه 

ونروح على الولد صاحبه حريشاوي مو من اهلها هم نبليهم بهالسالفة خاطر نخلي عمام الولد ذرل يلحون على جعفر وعمه جيفن ورطوهم بهالدكة .. ونحلها بحيل الله 

اتوكلوا .. 

كلهم لبسوا دشاديش وركبوا سيارات بيكم وجيب وداسولها وطلعوا ببيت جعفر نخروه نخر من الرصاص لحد ما التمت الشرطة داسولها وطلعوا .. 

وعم حازم راح على عمي كاله : تحول عدنا ابنكم هاد على بيوتنا وداك وزلمة من عدنا مكسور .. 

عمي كايللهم : النكم ناهب ابنا 

كايله : البت اخوها طاردها واهلها ميتين ومالها والي ومتزوجاه بارادتها وهي ماهي بت بيت خاطر نكول خذاها لو كسر عينها هم اثنينهم متراضين بهالزواج .. 

عمي كايله : لا ما طاردينها واخوتها كاعدين وياها بالبيت وحازم دايس عتبة كاعنا وفايت البيت له صاحب ومتزوج اخته بيه 

كايله : حازم وغيره يشهد البيت اشتراه من ابن عمه للبنية وهو تكفل اقساطها بعد ما انت طردتها بشتوية زركة وانت شاهد بالبيعة لو نكرت غيرك يشهد 

كاله: اي بس اخوتها كاعدين وياها 

كاله : اخوتها ما كعدوا وياها اخوتها اجوها بعد ما حازم اشترالها البيت ورادوا يبيعونه وياخذون فلوسه لو ما مخبر المكتب مخابرين على اخوها يمنعون البيعه ..

- لا اخوها راد يبيع البيت برضاها 

- المكتب كاله ما ينباع البيت الا برضى صاحبته ... انشدنك البيت انباع ؟ 

- هاي امور تخصنا واسرار عايلة حازم ياهو ماته يدخل بوسطها 

- تحولون عدنا نحج والعايل ياخذ حكه 

كايله عمي : لا والله ما نحول والحك النا واني خابرت على جبير عشيرتنا والنا كعدة وياكم وجعفر حكه بالسواه عبن ناهبين اخته 

- الاخو الما حوى اخته وخل الزلم تحواها وتلم بيته ماله احترام وتقدير عدنا 

- لا غصبا عن اليرضى والما يرضى اله كل الحك اعلى اخته وحكه ياخذه بحيل الله 

- احنا وياكم كوام والاله حك لا يكصر بيه . 

خالين ورايحين على صاحب جعفر وطالبيت جبيرهم 

وابوه يحلف ويتكفر ما يدري بابنه طالع يدك وهو ما راضي بطلعته 

كاله : تخلف وتسيب بالشوارع وتصيح ما ادري تحضر جبيرك ولو ما حضر ذب بابنك سند واحنا نتصرف وياه 

رجعوا حازم وربعة ووكفوا بالباب لحد ما رجعوا كبار عمامهم  

تلكوهم الزلم والشباب دبجت للكبار 

احنا الينهدنا اعلى طلابة 

نطلگ السيف من كرابه 

ونفزع لابن ام عصابة 

نشيله يا راس الينهدنا ...  نشيله 

ودبچوا 

وطبوا للبيت يتضاحكون ويتشاقون وكأنما عدهم عرس واحدهم ضحكته شاكة حلكة .. واحنه النسوان من طلعوا لحد ما رجعوا نكرضم وندعي ووحدتنا يبس كلبها من الخوف عليهم 

الزين بالموضوع سكتن عني ما كامن يسمعني حجي 

رغم منادس حجي من جوا لجوا بس لان حازم طالب الحجية وكاللها اي حجاية الومكم بيها .. كل نسوانهم سكتن مني ما حاجني بعد 

لحد ما خلصوا وطبوا جوا عمهم يحجي الصار 

اني واكفة ليغاد ومحمد امدد رجله المجبسة طلعله حازم من الدوانية طكه جلاق ، صرخ محمد : لا لا شني حازم عليك العباس شني هو هيج 

- كم خايس راح تحصل اجازة شهر براسي وعايش دور المكسورة رجله ماطلها بنصنا 

- جا اكدر المها خاطر تحجي كوا* غير مجبسه 

- اسكت لك شهرررر شهر  لو تموت محد يطيك اجازة شهر واني خليتهم يكتبونها الك راح تشبع نوم براسي عود اخابرك وكلي تعبااان الا اشكك شك والعباس 

- فوك ما اندعمت من وراك ابو الخر* 

- اندعمت شني اني ابو السالفة باجر مداوم من الصبح وانت اللا بالسالفة ولا عليها خذيتلك شهر اجازة ويمكن تمددها كلشي يطلع منك 

حجون والكاعدين يضحكون وعمه يكله : هسه عوفنا من الحجي هاذ وكلي .. صدك اداوم باجر 

- جا جذب اجايزي مخلصهن الا يكطعون راتبي واني دوامي للوحدة خو اروحن اداوم وارد عليمن يكطعون راتبي 

- بس الوكت مو مناسب حازم الزلم متقصدينك واحتمال يعترضونك 

- ياهو اليعترضني ؟ شبيك عمي غير حضاين

- خوفك من الما بيخر يا عمي الحجارة الما تعجبك تفشخك وحريمة هالحضاين ياذونك اني عمك واخافن عليك 

- الله يسلمك عمي بس لا تخاف اغير دربي وما اديرن بالي 

- ولو تعكبوك 

- ما يصير اله الكاتبة الله ما منه مهرب الخوف ما ينجي احد 

- بس ربك هم كال ولا ترموا بانفسكم الى التهلكة 

- والنعم وانا رايح لشغلي وعلى باب الله لا رايح طلاب ولا رايح كوام لوحدي خاطر اذبن روحي بتهلكة 

- وان جان عمي ولو .. انا ويامن احجي ويا حازم 

عمي ما ايودن غير ادير بالك على نفسك لا تفجع امك وعايلتك بيك فكر بيهم 

- الله كريم 

حجاها وهو يندار عليه : يلا البسي عباتج خاطر نروح 

محمد اليوم يمك 

محمد : كل الهلا عين غطا وعين فراش 

حجت امه : وامل وجهالك 

- غير عد ابوها .. 

- ويضلون جهالك غاد 

- ابيت عمي فوزي امن عليهم احسن من البيت بس وصيها لا تطلع شغل باجر خلي تكعد هالفترة او تخلي واحد بمكانها بالمحل ليما تفض السالفة خلي تكعد فوك جهالها لحد ما احلن السالفة البلتني بيها 

- بلتك بيها شسوتلك زلمتها وتخاف عليك 

- خليني ساكت يمه انت وامل الي وياجن حجي ما يخلص بس مو وكته والا فعلتجن ذيج ما تنحجي 

حجه عمه :  حكه صدك البت العقدت عليها امس وخطبتها ليش صبحت مطلكها 

- اعراض الناس تعثر عمي ما اجيبن طاريها الا اذا اهلها حجوا ذاك الوكت الي غير حجي 

- ليش هكو شي 

- الحجي هواي بس عوفه 

يلا بويه امشي حيل تعبان خل اروح ارتاح 

كوم محمد وراك شهر تلحك ترتاح كوووم 

محمد - يهالطلابة الما راح افكن منها بعد .. ساعدني 

- اكلك شو عايش الدور صدك 

حجه عمه :- محلك سديته 

- اي سديته 

- كون احد كاربه 

- لا لا محد كاربه وربعي وجماعتي كلهم غاد شحد الكربه غير يشكونه بالنص . 

- زين جا تصبحون على خير انا اروحن انامن 

كام الحجي واني طلعت ورا حازم وهو كاض بمحمد يمشيه 

محمد واحزم اليشوفهم يكول نفس العمر بس محمد اكبر من حازم ب١١ شهر .. فتكول نفس الكصة حتى يتشابهون من تباوعلهم تعرف اخوان تحس مصنوعين بنفس المصنع . 

صعده بالسيارة يمه بالصدر واني وامه .. وعلي ابنه كعدنا ليورا 

بيت محمد قريب بالفرع الثاني .. بس اتحركت السيارة شوية وصلنا وصفها ونزلنا كلنا .. 

تلكتنا مرت محمد وهي طاير كلبها على رجلها كاللها حازم : لا تخافين عليه حريشي ما يطكه راح ينام على افادج شهر تكومين ادعين علي الله لا يطيك حازم من جبسته وخليته يكابلني 

ضحكت وهي تاخذ رجلها 

وامه تكله : كرت عين امك فرحان مجبس اخيك ومدعون من حدر سوالفك بطل جوز ما جنت خفيف شجاك ع الخفة 

- ما راهقت واتندمت كل خل اعيش المراهقة .. الج وياي شي حجية ؟ 

سكتت وهي تهز ايدها وتطب للدوانية 

حجه محمد لمرتى : نوال جيبي فراش لحازم ومرته لهنا خلي يرتاحون 

حجه حازم : وتريد تنومني انا ومرتي يم امي شني شمالني تسودنت طكني شرجي لا خوية لا 

حجت امه : لا شلون يريد يمصمص يريد يكمش وين يكدر يمي .. جا هو المن جايبها لسواد عيونها لو عيوني 

حجاها : احسن ما بيج يمه تفهمين ولدج .. صدك جا المن ماخذه غير مرتي ارتاح بيها وترتاح بيه .. لو غرتي جيف عزبة وما عدج رجل 

محمد : هسه الا تهيج المواجع يا حازم دخلي المرة ساترة علينا لا تعرس وادك الا رجل منين نجيبلها بهالليل يا خوية 

- حكها خوية حكها صارلها سنين الحجي مودع المرة هم تحن جا شني حجاررررة 

امه : ابو النسواااان جوز مني وحير بروحك جنت تصيح ما اريدن مرة وانا رايد اعدل بيتي ليما هجمت بيتك من ورا نزواتك ورغباتك 

- هجمت بيتي ليش شنهي ذبيت عايلتي بالشارع لو موتيتهم جوع .. مرة ما مراعيتني وجبت التراعيني واراعيها وتاخذ مكانها بعد حجيج هاذ يم احميد شنهو لو بس لوك لوك ومحد يفك من السانج 

- لا ما ذبيت روحك بهبية يحويزم وكول امي كالت عبن كلبي لاچمني وكلش ما مستراحة لاخوت هاي .. مخانيث يطكوني ويضمون روسهم ويا خوفي يتعرضولك . 

محمد : اهوووو يمه جا لا تفاولينه 

نوال افرشيلهم بغرفتنا عمي احنا انام يم امي .. كوم روح لغرفتي 

- ما ايردن غرفتك حول جهالك وانامن بيها 

- غرفة جهالي ما بيها امبردة جاي ينامون بغرفتنا يمعود .. نام بغرفتنا هسه واحنا انام هنا هم نزل وهم ادبج فوك روسنا وما راضي 

- كوم لك ما انامن بغرفتك .. خلي اخذ المرة وامشي لبيتي 

- شتمشي البيتك هدوا عليك بنص الليل وكتلوكم اثنينكم واحنا ما ندري دكعد واستر علينا يمعود 

- وانام بغرفة متزوجين شبيك خوية مسودن انت ما ارضاها ما اويد لا 

- نام يم امي 

- حرام انام بالشارع وما انام يمي امي 

- يمه نامي يمنا بالغرفة وخلي الدوانية لحازم ومرته 

-يا كلابهم يولون 

محمد : عمي خلي تدخل تنام يم المرة والجهال وانا وياك انام يم امي 

- لا والله خوية خل اروحن للبيت هم اذب احلل اسبح احس بروحي جفت من العرك .. اخذوا راحتكم انتم 

- حازم اكعد عليك العباس عديها هالليلة 

- لا تخاف اعلى اخيك .. وارتاح 

- حازم بروح ابوي اكعد هي مال تطلع يا خوية الساعة راح تصير ١٢ 

- ما علينا شي وعلي دارتاح يا خوية انت مكسر ورجلك مصبوبة وكسرك بالعظم عمت عيني عليك شهر راح تصيح وتستريح من الالم دارتاااح 

حجاها وهو يطلع وما يستمع الهم وامه تصيح وراه : تعال اخذ الغرفة اني اطبن بغرفة اخيك 

- اودعنااااج 

حط ايده وراي وهو يمشيني ويطلع 

كتله : حجيهم صدك .. خاف يهدون علينا بالليل واحنا بالبيت لوحدنا لو كتلونا محد يدري بينا 

- لا تخافين امشي 

عاف السيارة اباب بيت اخوه 

واخذني مشي للبيت ..... يتبع 

________