فتح الباب .. 

الكراج مال البيت اظلم هندس .. فات وفتح الكلوب وبقى يباوع ويتفقد الواجهية مال بيته كلها اتزرفت .. والجام مال الاستقبال .. وجامة من شباك المطبخ هم مكسورة .. 

- خرب بيتك مو ؟ 

اندار عليه يباوعلي بباتسامة : اذا ع الهيكل فجان الهيكل عامر و البيت خربان .. واذا ع الروح فداج البيت هو وصاحبه ما طولج بيه .

ضحكت : الله يسلمك 

- فوتي وديري بالج الكزاز لا يجرحج 

- خلي المنه 

- هسه 

- جا يضل لباجر هيج ما اطول .. اكشه بساع واغسل البيت 

- ادري امج ذابة صرتج بمطبخ رحمة لوالديج 

- شمدريني اني هيج  من انظف واجلف ارتاح نفسيا المكان من وصخ الواحد ما يرتاح 

- جا ما طول ترتاحين هيج انت لمي واني راح اصعد اجيبن هدوم واطبن اسبح 

- خوش 

هو مشى مني واني رحت اخذت السطل من الحمام حطيته برا .. 

وبالفرچة كشيت الكزاز كله وكمت المن بيه بالمكرافة .. واخذت سطلة مي خليت بيها زاهي وتايت ومعطر ما لكيت .. دكيت عليه الباب بالحمام كتله ( بس انطيني الشامبو ) وشمرت شامبو بالمي ورشيت المي بالبيت .. ولزم العودة وجلف بالفرجة .. رجعت رشكته مي ومسحته ورجعت وراه بالوصلة .. حسيت البيت اتنفس ... بس اني صرت مي .. هو طلع من الحمام الخاولي على راسي كالي : هسه عليمن تعبتي روحج يا يابه جان عفتيها لباجر ؟ 

- لا تتقرب مني عركانة 

- واكش منج شبيج تعاي 

- لا لا ما احب خل اركض اسبح 

خذيت هدوم من علاكتي البالدوانية وركضت سبحت بالحمام وطلعت للمطبخ كبل خضيت القوري وترسته مي وجاي وخليته يتهدر ورحت لكيت حازم بالاستقبال كاعد وصافن مبين باله يسولف .. حجيت : عدكم مشط ؟ 

اندارلي بأبتسامة : شنو هذا المشط ما اعرفه ؟ 

حجاها وهو يجره من يم ايده ويمدلياه .. تقربتله .. اخذ نفس وهو يباوعلي 

: عيونج لوحة بيها رسمة بغدادية .. 

ابتسمت : يعني حلوات لو شنو ؟ 

- لا كلمة حلوات شوية عليهن ما ادري من اباوعهن شيصيبني .. 

هيج من تطيح عيني بعينج كلبي لوحده يجر حسرة ويتنهد براحة .. جنهن رشكة مطر على كاع شحيحة 

من اشوف عيونج كبالي  تخطر ابالي ابيات لعنتر بن شداد غناها واحد لبناني يكول :

آه على قلب هواهُ محكم

فاض الجوى منه فظلما يكتم

ويحي أنا بحت لها بسره

أشكو لهـا قلباً بنارها مغرم

ولمحت من عينيها ناري وحرقتي

قالت على قلبي هواها محرم

كانت حياتي فلمـا بانت بنأيها

صار الردى آه علي أرحـم

عقدت حاجبي : ما فهمت شي من الشعر علاقتي ويا الفصيح مو زينة 

كهكه وهو يضحك واني مديت ايدي حتى اخذ المشط جراه وكال : اكعدي امشط هالليل بيدي واشرحلج الما فهمتي 

ما ترددت كعدت بالكاع كدامه ونزعت قراصتي وهو يحجيلي ويمد المشط براسي 

قبل الإسلام جانت الاحكام والاعراف جاهلية 

وعنتر بن شداد انولد من اب عربي من اصل وفصل بس امه جارية يعني عبدة  سوده وعنتره طلع لونه اسود على لون امه .. فابوه عقليته جاهلية ما ضم ابنه عنتره لنسبه لإن ابن عبده مو ابن سليلة اشراف من نساء العرب .. فجان دائما ما يهينه ويعاقبه ويقسو على عنتره .. ويعامله معاملة العبيد ما كآنه ابنه 

بس بسبب عيشته الصعبة والظروف اللي تربى بيها طلع عنتره زلمة حوك من اشجع شجعان العرب .. بس رغم شجاعته الا ان الناس تشوفه ابن عبده ما تحترمه غير بوكت الحروب تعال عنتره وسوو الطريق لعنتره .. ومن تخلص الحرب صاحوله امشي ابن زبيبة العبدة 

ضحكت : ههههههه خطية يعني مستغلينه 

- شعبالج ربعنا نواقيص من ذاك الزمن من عدهم مصلحة يم واحد صبغوه سووه هو والانبياء ولو خلصت حاجتهم منه صار كخة .. سالفتنا مكيسة من زمااان من ذاك الوكت

- اي كمل 

- اي .. بيوم من الايام حظ عنتره المگير طيحه بعشك وحدة من بنات الاشراف من العرب اسمها عبلة .. رادها كالوله كلش لا تفكر بيها محد ينطي عبلة بنت الاشراف لواحد ابن عبدة اسود مثلك . 

فمن قهره صار شاعر بحبها فشعر وكال 

اه على قلب .. هواه محكم 

وهنا كاعد يشكي من وجع كلبه اللي ابتلى بحب تحكمه العادات والتقاليد .. 

فاض الجوى منه فضلما يكتم 

الجوى وهي شدة عذاب المحبوب .. الانسان اللي يحب شخص ويوصل مرحلة من العذاب ..  العرب يوصفون هذه الحالة بالجوى .. فهو يكتم عذاب هاي المحبة بگلبه من من ظلم العادات والتقاليد .. 

ويرجع يكول ( ويحي انا بحت لها بسره اشكو لها قلبا بنارها مغرم ) شافها مرة والتقاها وما كدر يضم المضموم بكلبه راح كتهن الها واعترف بحبه اله من قهره بس هالشي بالعرب وعاداتهم يعتبر عيب وهو رجل غريب ويحب مرة غريبة فكاعد يوصف عملته بالمصيبة من يكول ( ويحي انا ) 

من اعترف الها انصدم وهو يكول ( فلمحت من عينيها ناري وحرقتي ) يعني طلعت هي هم تحبه ولمح بعيونها نفس النار والحركة اللي يحس بيها من عشكها 

بس كالتله ( على قلبي هواها محرم ) حتى لو علشكتك بس الجاي نعيشة محرم على كلوبنا لان عاداتنا وتقاليدنا تحرمه وما ترضاه . 

يوصف وجوها وهي واكفة يمه بالحياة فيكون ( كانت حياتي ) 

(فلما بانت بنائيها ) عافته ومشت .. ابتعدت 

صار الردى اه عليا ارحم ... والردى هنا هو البرد الهالك اللي يوصل الإنسان للموت من شدة البرودة فهو يوصف لما حس بطعم الحياة بوجودها من ابتعدت حياته بردت لدرجة صار الردى وشدة البرود اللي يحسها بصحاري العرب .. ارحم عليه من فراكها .

- يا عيني واتزوجها بعدين لو لا ؟ 

- لا ما اتزوجها بس هي زوجوها غصب من تحد اشراف العرب وهو بقى على حبها اعزب لحد شيب ومات 

-يااا وااله خطية 

-ااااخ اااخ مع ان الرسول بعث من بعدها حتى يقضي ع العادات والتقاليد ويشرع سنن وحلال الله بس لحد هذا يومنا يحرمون حلال الله بحجة العيب ويستعظمون العادات والتقاليد ويكلك هذا الصحيح .. والا على يا دين مكاوميني اهلج ومنتفضين وكل هالهوسة والرمي و الدك  لو ما جانوا على دين الجاهلية مو على دين الله ورسوله !؟  

- الدين ما تشوفه غير بالساناتهم اما بالفعل كل دين ما تشوف عند الناس .. 

حجيتها واني اجر المشط من ايده واكوم على حيلي واجر شعري بسرعة بالمشط كال: زين شعرج ناعم حلو 

- لا والله هم يچبن بس لان حاطتله مكيف لكيت بالحمام وغسلت بيه 

ابتسم وكال : افرشيلي بويه باجر وراي دوام هم يلا اشبع نوم 

رحت افرشله صاح : صبا ريحة حرك حاطة شي ع الطباخ لو من برا الريحة 

صرخت : ياااااا الجاي 

رحت اركض طفيته وذبيته بالسنك انلسعت اصابعي .. صاح : هسه الا تشيلي انت مو الدكتور منعح من الجاي بعد يا جاي هذا الحاطته بهالليل 

- اذا ما اشرب اكعد راسي هالكبره يوجعني 

- مدمنة خوما مدمنة رحمة للعباس 

غسلته وخدرت من جديد كال : صدك عود ما اتوبين راح تخدرين 

- اي والله ما اكدر اذا ما اشرب 

هز ايده وبقى يدور بالجرارة حجه : مقراضة هنا وين راحت .. 

دورها وكام يحاول يسوي بيها اجيته : هي شنو 

- شحفورة هاي بس كلت كلبي 

اخذت من ايده وكاعد اكرضها 

دنك راسه وباسني بركبتي .. كصيتها وابتعدت 

كاعد اصب حضني من ورا وهمس : عوفي الجاي وانداريلي 

- حازم 

- شضل بحازم ولج كوام وكاومت وهد وهديت ورمي ورميت شسوي بعد واحويج والله يهديج . 

- مو .. 

- عوفي المو ... 

سحب القوري ذباه من ايدي وسحبني لغرفة جهاله فرشتله بيها .. 

اخذني بحضنه للصبح .. نمت ولا كأني بنص هوسة وناس تهددني وتتوعد بكتلي .. يمه روحي تأمن وما يحلالها غير النوم والراحة . 

الصبح جانت السحب طافية .. يطفيها ابو المولد ب٥ الصبح 

والوطنية ماكو .. صارت حارة حيل .. كعدت محترة اباوعه هو نايم بالحر وذاب عن جسمه الغطا .. 

حسيت اكو صوت مشي بالبيت .. 

تسحبت على كيفي وكمت من مكاني .. شفت باب المطبخ مفتوح على حيله ..  استغربت منو طاب !؟ 

باوعت الاستقبال ماكو احد .. 

رحت للحمام هم ماكو .. كلت يمكن الهوى ولو الجو واكف حتى هوى ماكو 

بداية الشهر السادس .. الجو جاف كلش .. 

رجعت اخذت غير ملابس ودخلت للحمام اذب على روحي مي واتعلى وارتاح احس روحي يبست من الحر .. هستوني كاعد اذب طوس مي على راسي كانما سمعت باب البيت انطبكت ! 

سديت بوري المي .. ولبست بسرعة 

ماكو احد .. مشيت لحازم اول ما حس عليه فتح عيونه : نعيما حبيبي 

- حازم انت سديت باب الشارع !؟ 

- لا سمعته انطبك وحركة بالبيت يعني مو انت الطبكتي 

- لا اني بالحمام 

- جا ياهو هاذ !؟ 

فز من حيله وطلع برا ماكو احد 

صعد فوك دور .. كلشي ماكو 

كال : خاف بزونة 

- والبزونة تفتح باب مطبخ لو باب حوش وانت سادهم بيدك 

- ما ادري بس ماكو شي .. خل اروح اسبح الحك على شغلي 

راح واني كمت اضرب صفنات بعدين عفت وكمت فتحت الثلاجة وطلعت بيض و سويتله بيض وطماطة نزل كال : ها سويتي ريوك .. جا اروح اجيب صمون 

- خاف ما تلحك 

- الحك .. بس سدي الباب وراي .. 

سديته ومشى جاب صمون وهستوني دا احط الصينية اجت الكهرباء واشتغلت البنكة طكني الهوى وراسي مبلل كلت : يا رحمتك ربي متنا 

- بلكت الله يصيرلي مجال اصلح المولدة مال البيت عاطلة وكل ما اكول اصفالها ما الكى وكت .. 

- صدك لو كالو باب النجار مكسور هسه انت كهربائي ومولدتك عاطلة 

- اي بالحسين 

كعد ياكل .. بس هو سريع بأكله الربع صمونة تجي بيده لكمة .. اكل بسرعة وكام غسل واجا باسني وكال : لو كل يوم اصبح هيج على مرة حلوة ناصبتلي ريوك ومكابلتني وتلاشيني من الصبح .. جا لا انا بالجنة 

- الله يخلصها على خير وجنك على ريوك وادلل . 

- البسي خل اوديج لبيت محمد يلا 

- خاف نايمين راح اسدن الباب واكعد جوا 

- ما امن عليج اخاف لا يصير شي 

- ما عليه شي شو هم اهلك ذوله عنك ما اعتقد جعفر يتجرأ بعد ويجي ما طولهها السالفة صارت بيها عشاير وكبار ادخلت .. وامك ما تكض السانها واني تعبانة وخلكي من ورا الهوسة صاير هلكده اخاف ازلك بكلمة وياها وتصير هوسه واحنا ما ناقصين 

- اني وصيتهم محد يحاجيج مالج غرض 

- كلها تسكت وتنرد وتخاف الا امك ما تعرفها .. ما كاعد تسكت عني .. فهسه اذا اروحلها والله ماكو كلمة تسمم البدن ما تكولها وتعايرني بيها 

- جا بس سدي الباب زين و خلي التليفون قريب منج .. مو تنسيين 

ودعته وطلع وقفلت وراه ونظفت الكدامي بسرعة وطبيت للغرفة الجوا سركيت الباب وتمددت اباوع ع التلفزيون مال الجهال حاطة روتانا سينما واباوع فلم بادي نصه . 

لهناك حسيت الباب مال البرة جاي تندك .. 

ما حجيت ابد .. سمعت صوت وحدة تدخل للبيت 

كاعد اتعرف عليه .. عرفتها صوت سهى اختي .. كامت تصيح : صبا وين انت .. صبا 

وصوت امل تكللها : بغرفة جهالي اضن 

اجن للغرفة اني مسركة الباب .. دكت الباب صاحت سهى : صبا انت هنا 

مجاوبتها حجت : ادري انت هنا .. جعفر دزاني عليج يكول خل تجي وما اسويلها شي 

- ما اجي وارجعي لبيتج سهى ولا ادخلين ابسالفتي اتبري مني كدام الكل حتى لا تنضرين مني .

- الاتبرى منج شني طايحة الحظ من امس واليوم اشتهرنا واختزينا واني عايشة بنص العسل وبايعة اهلج على نومة 

طفت الكهرباء الغرفة صارت ظلمة .. واني بالغرفة اردها : - سهى ما راح اطلع وراح اخابر على حازم يجي هسه والله لو درى بيج 

- اشكج انت وحازم بربوووو* كومي امشي وياي لا هسه اكسر الباب واجرج جر من شعرج امششششي 

- ما اطلع كتلج 

من التوتر والخوف جسمي كاعد يرعش كمت ادور التليفون مالتي بالفراش واتلمس لحد ما كضيته خابرت على حازم .. 

رد عليه بسرعة كتله : امل جايبة سهى للبيت وجاية .. ويريدوني اطلع جعفر طالبني يكلهن ما اذيها لو اجت 

- هشششش هذا رايدين يجرجرونج ديري بالج تروحين هسه ادزلج محمد بس لا تروحين وياها كلش صباااا ديري باااالج اختج هاي عدو موووو اخت تعرف اخوج راح يكتلج خلاص وجاية اتجرجرج لموتج 

- بس استعجل فدوة اني بالغرفة ومسركة الباب 

سداه مني وسهى ادك بالباب قوي وتصيح : فتحي الباب ولج لا تفضحينا اكثر صبببببا امشي وياي ما اخلي احد منهم يجيسج امشي ويااااي 

- سهى لا اتعبين روحج ما ارووووح امشي 

- هي شني عود عسبالج يكضج عنا باب وعلي اشلعه واجرجرج 

كامن يدفعن بالباب هي وامل 

الباب حديد .. ويمدن اديهن من جوا ويحاولن يشيلنا من الرزة مالته 

شفت اصابيعهن مدنها من جوا تبين لان من يمهن ضوا ومن يمي ظلمة .. كمت اضرب باصابيعهن حتى ميمدنها ويشيلن الباب 

كامت سهى تصيح وتغلط عليييه 

اختنكت احتريت حيل كمت اهفي بدشداشتي وابجي وبس اريد احد يجي ويخلصني منهن 

بالربع ساعة هن يتصايحن 

لحد ما اجا محمد فات للبيت وهو يكلهن : بنات الخر* بكيفجن تخورن وتاخذن طلعن منا يلا 

كامت ترده سهى : ماكو غيركم ولد الخر* ناهبين بت من بيت اهلها .. وضاميننا عدكم مكرنين ما تستحون كواوي* 

- امشي لج بت الجلب ياهم ذوله المكرنين انت مالج رداد اريد اعرف رجلج ياهو لا ما ارده بامه الملفي هيج وحدة ساقطة مثلج 

- اني السااااااقطة والله اليوم لا ما اخلي اخوتي ورجلي يحركون البيت عليكم ما اتسمى باسمي تطعن بعرض يا نكسسس اني تغلططط عليه 

كام يصرخ عليها .. 

وطلعها من البيت .. فتحت الباب كتله : امل هي الجابتها 

- امل طلعت من البيت بس شافتني .. حسابها بعدين خل اخذج منا وابعدج واندارلها لبسي عباتج خوية وخليني اخذج يلا ما طول حمزة برا 

جريت عباتي وطلعت وياه 

هو يتجى ع العكازة ويمشي صعد بالصدر واني ورا واخذني وهو وابن عمه ودوني لبيت اخت حازم اللي شهدت زواجنا .. هم ماخذه واحد اسمه صادق يصير ابن عمهم. 

رحبت بيه اخته وكامت تلوم بيه : اي يا حبيبة جان ما ضليتي بالبيت ما تعرفين الوضع حرج 

- شسوي والله الكلام يجرح خليج بمكاني وحك هذا الله الفوكاي اني ما ردت الصار كله .. ردت عقد يحلل اتصالاتنا وسوالفنا لان هو يستحرم ما ردت عقد زواج بالسر ويبات يمي وهيج بس حازم وتعرفي ..  بس صار اللي صار والحجي الكاعد ينحجي ما ينحمل .

- اوف امي اكو احد خلصان من سوالف امي .. لو تبطل هي كلبها طيب و خوش مرة والله بس السانها مصيبة 

- لا مو بس قضية السان .. هي دا تطعن بشرفي وهي تعرف كل الزين احنا متزوجين مزانين ولو مو زينة ابنها ما ياخذني 

- مرة جبيرة اتحمليها شتسوين بلكت الله وتنحل سالفتكم وتكعدون ابيتكم وتسكتووون 

بقيت كاعدة ويا اخته للظهر بس احس بروحي غريبة ببيوتهم استحي .. اتضايق اختنك يدخل الجنة اليفتحلي الباب ويكلي طلعي .. ما ادري ليش هالشعور 

حازم من حل من دوامه نزل على بيت اخته 

اني كاعدة يمها بالمطبخ وهي بالغرفة الجوا كاعد ترضع بتها 

فتح الباب فزيتلا كانما شفت اهلي .. كال : شتريد منج هاي 

- ما ادري تكلي جعفر يكول بس خل تجي ما اذيها والله انهد نص حيلي 

-ديري بالج تقنعج وتخليج تروحين وياه افتهمتييييي 

اجت اخته كالتله : هلا بيك خوية شلونك 

-الساقطة هاي خلت بيه لون چل كلبي منها ما عاد كلبي يحمل منها ولج تصل بيها تتفق ويا اهلها يجووون ياخذوووونها من البيت 

- ما رحت حاجيتها 

-مريت ع المحل كلت بلكت الله والكاها لا ما اكسر محلها وابرد كلبي بيها يس ماكو معزلة تلكينها ابيت الخلفها مال اروح وعلي الف راسها بيدي وامسح بيها الكاع بالعباس 

- مدري شجاها امل والله حتى كبل شوية حجيت ويا امي .. 

- محد شاد راسها ومكويها غير امج كتلتني امج 

- دهدا هسه اهدا وكلشي ينحل .. اصبلك اغدي جوعان 

- لا رحم الله والديج اروحن صادق وين 

- بعده بالشغل غير 

- دكومي صبا يلا خل اروحن .. 

-وين دكعد 

- لا هلي اطلع لبيت محمد لازم نحل هالسالفة باسرع وكت مو مال اضل مهجول وكلساع من بيت لبيت مثل ام البزازين ... امشي 

اخذت عباتي وكمت وياه وهو محتر وتعبان حيل 

اخذنا بالسيارة وصف كدام بيت محمد ونزلنا .. لكينا مرته هستوها جاي تصب الغدا .. صاحله محمد : ابن حلال اكعد 

- حلاليش يمعود روحي طالعة 

- دكعد اتغدا 

كعد على صفحة ومحمد باوعلي : اتفضلي خوية 

حجه حازم : امل منين تعرف اني و صبا بالبيت واحنا ب١٢ رحنا ؟ 

- شمدرينا يا خوية شو هي من صباحيات الله هجمت هي واختها اريد اكضنها مو مرة غصب 

-مني امل 

-لا اختها فد وحدة حشاك كلش 

-لو امل سهى منين تندل البيت ومنين اتطبه موتنني هالمرة هاي اجيبنها منا تطلعلي منا اطلكها تنامون براسي يا مرتك يا جهااااالك ولكم تعبت منها تعببببت مرة ما تنجرع ما تنحمل 

طبت امه وهي تكله : جا حقها شني تريد رجلها يحط عليها ضرة مثل هاي وتسكت 

-محد مكوي راسها غيرج والعباس اطك عدي العب بيكم لعب وحك هو دم الحسين 

-وعليمن تلعب بينا علمود هااااي الكح* 

دفر دولكة المي الكباله وهو يصيح : خرب انه اذا صدك 

ومحمد صاح : يمه شني سالفتج اسكتي انت تهدينه لو تحركين اعصابه 

-يمه جوزي مني لا وهو علي البيت هذا اكلبببببه فوكاج 

-كلابهم تكلبه فوكاي علموووود هاي 

-اي علموووود هاي انت ياهو مالتج اني رايدها انييييي جايبها الي انت شلججججج غرض اخذ منو واتزووووج منو 

-لا تعلي حسك حازم 

-وكت التجوزييين مني وما تدخلين بيه ساعتها اجوووز منج لو تشوفيني احتررررك لا تطفيني 

اندارت عليه : عساها بحظج وابختج ما كفاج كلبتي على مرته وجهاله انوب على امه بربوووو* 

كام حازم يصيح ويتعارك وياها ومحمد يصيح بنوال تجرها من كدام حازم .

اني ما نطقت ولا حجيت من هالهوسة غير لما راحت واخذتها نوال كتله : خلي نروح للبيت 

جان ينهد بيه : انت اسكتي وحلكج ما تفكييييييينه افتهمتيييي

كمت من مكاني صاح : ما عجبها .. هو ويامن حظي كعد حتى يكعد ويااااها . 

وكفت باوعتله 

تنهد وانداريت عنه مشيت لنوال بالمطبخ : اساعدج 

باوعتلي : لا لا 

حسيتها اتضايقت من كمت وتمشيت ابيتها ودخلت مطبخها .. ما عبالها راح اكوم اجي للمطبخ حدي للاستقبال .. بقيت واكفة بس بحرج .. لحد ما حجت : شعندج واكفة هنا مو كاعد اصب بالسفرة روحي 

- خاف تحتاجين مساعدة 

- لا لا روحي يمعودة 

مشيت وكفت اباب الاستقبال ام حازم كاعد تصلي بغرفة جهال محمد .. محمد كاله : يلا كوم خوية .. تقدم 

- لا والله تسلم كلش محتر رايد اروحن للبيت اغسل متت 

تبقين هنا اروح وارجعلج ؟ 

- لا نروح سوه 

- خاف اطلع لعمي رايد احجي وياااه 

سكتت نتر مني وبقى بمكانه حجت امه من وراي : هدي الزلمة شني ماخذه عليه طابو .. مجلبه بذياله هذي عده شغل ومصايبج لفوك راسج 

حجيت :- تغسل هنا ؟  

ما جاوبتي 

انداريت لنوال : عندج هدوم نظيفة لمحمد يلبسهن حازم 

- جا وهدومنا وصخة حتى عدي هدوم نظيفة 

- لا مو هيج  قصدي 

عافتني ومشت جابت هدوم وخلتها بيدي .. وكعدت هي و رجلها وجهالها يتغدون حجيت : تتغدا لو تسبح 

باوع الهدوم بيدي كام .. 

اخذن من ايدي وراح للحمام .. كلهم كعدوا بس بالجذب محد كالي اكعدي اروح اكعد من حالي .. لحد ما انتبه محمد كال : ها شني يلا شو ما تكعدين 

- لا مشكور ما مشتهية 

- هي شني الما مشتهية تكربي 

حجت امه : تكلك ما مشتهية تلكى اختك مغديتها تعرف اختك اطلع خطار بلا غده اكل 

سكتت شوية وطلع حازم كال : نوال بقى اكل 

محمد حجى : شني السالفة خير من الله يمعود 

حجت نوال : هسه اكمل ابني واكوم اصبلك 

التفتلي : روحي صبيلي 

- ما اعرف 

- هي شني الما تعرفين ماعونين تحطين بيها تمن ومركة 

حجت امه : هم عاجر وهم خبكة يول حظك المكير كون .. 

حجت نوال : لا لا اني كايمة 

كاعد اتبعها حتى اساعدها 

دارت : لا لا رجعي اني اصبلكم 

كعد حازم اني تقربت وكعدت يمه 

جابت صينية وحطتها كباله .. وحاطة خاشوكة وحدة وخبزة

هو سمى باسم الله واكل .. اني كمت اخذ حواف الخبزة واغمس بالمركة .. حجه : كومي جيبلج خاشوكة واكلي وياي 

من كالها خنكتني العبرة .. 

عدلت كعدتي كتله : ما اريد 

- شبيج 

- ما بيه شي 

- جا شمالج دلغميتي 

نزيته ونترت بحركة وجي وانداريت عنه .. 

حجه : هاج خاشوكتي اكلي بيها اني ما اكل تمن 

حجه محمد : كوم بابا جيب لعمتك خاشوكة 

حجت امه : جا مو كالت ما اشتهي 

حجيت : لا ما اريد ما مشتهية 

كام يباوع بوجهي اختنكت عيوني صارن حمر تتلامع بس ما بجيت 

همس : تريدين نروح للبيت ؟ 

هزيت راسي بمعنى اي 

اكل بالعجل ودفع الصينية وهو يكول دايمة .. وراد يكوم 

امه ومحمد ما رضوا وابقى واكعد .. ومحمد كاله : مو تريد نروح لعمي بعد موديها للبيت ليش شني تروح ساعة وترد دعوفها 

اندار عليه : اتحملي شوية لليل نرجع 

اخاف اردج واطلع وهم يصير وياج شي ما امن .. 

ما رديت لان ما لي حجي احجي صعبت عليه روحي حيل 

كعدت هو جر مخدة تجاها على رجلي ونام ع المدة .. ضليت اباوع بيه 

ما ادري ساعة احس روحي اني بالجنة وياه .. ساعة احس اني بنص جهنم من ورا اهله وكرابته .. ما ادري متفقات بيناتهم بحيث كلهن وجوهن ثكيلة عليه يعني ما معقول كلهن مو زينات ما بيهن اللي تهلي وتضحك الا اذا متفقات كلهن يكشن بوجهي .. 

رفع وجهه من المخدة حجه : متضايقة مو 

- شوكت يخلص هالوضع 

- بحيل الله بس هاليومين يحلون السالفة بالعشاير وتفض 

- ولو ما فضت وما رضوا بالزواج 

_ ماكو هي احتمال احنا غير متزوجين قابل كاعد نلعب .. 

- ولو انفض شراح يصير حازم اهلك كلهم ما رايديني 

- وانت ماخذتني لو ماخذة اهلي قابل راح اكعدج وياهم .. وعساهم لا رضوا نسد بابنا ونكعد . 

سكتت .. 

هو غفى  اني كاعدة صافنة بالتلفزيون منصى ... ومحمد هم نايم ليغاد ... صافنة بس ما مركزة بالتلفزيون بكثر ما بالي يسولف .. 

شورطت روحي ليش خليت نفسي بهالموقف 

شحصلت .. خواتي يمكن كلامهن صح 

بيتي وشغلي ومرتاحة حتى لو شوية مشاكل ويا حيدر بس اقلها ابيتي ما مذلولة هيج والناس تباوعلي بعين الموزينة 

لهناك كعد على صوت الاتصال .. 

ونده محمد حتى يرحون .. كتله : اخذني لاختك 

- شاخذج لاختي الرجال منتظرنا 

- زين اروحلها اني 

- تروحين انت شنو اكعدي واسكتي اتحملي لحد ما ارجع 

- لعد رجعني للبيت اقفل الغرفة واكعد اتحمل بيها 

- صبا لا تصعبينها رحمة لوالديج الزلمة منتظر . 

درت عنه بس ما راضية .. محمد كاله : ها 

حازم كاله : شسوي طنكرت خل ناخذها 

- شناهذها يمعود الرجال منتظرنا شيودينا للفلاح هسه 

- اكعدي اصبريلج بس كم ساعة اشوف الرجال وارجعلج 

حجه محمد : بوياي شلون وجعت راسك وجبتلك وحدة قنقينة خوية دكعدي رحمة لوالديج دكعدي هسه احنا علموديش رايحين غير حتى نحل سالفتج 

- تعرفني وتحل سالفتي انت رايح لخاطر اخوك ما رايح تحل سالفتي 

- هاه جا واخوي ابيمن متورط مو بيج 

- لو جنت ورطة ودوني لاخوتي وخلي انجاز بيهن 

حازم : امشي اخذج للبيت اسكتي 

- شتاخذها للبيت يمعود مو الصبح هدت اختها وامل .. دعوفها تتحمل شوية 

- لا ما نطول شوية 

حجت امه : شني العيارة هاي يمه هم احد حاجاج احد كربج .. شو شايفة روحج يبت *** (وكفرت ) 

صاح حازم : يمه رحمممممه لوالديج بس عوفيني احل اموري لا تحطيييين روحج بيها 

- ما احطن روحي شني جا انا غرييييبة غير امك 

- يمه انا وياها كافي بس ترا راسي راح ينفجر منكمممممم 

محمد : هسه شلون نظل نكابل النسوان وكركتهن والزلمة غاد منتظرنا 

باوعلي بعصبية وكال : انتظري اروح واجي ما اتأخر 

عافني وراح وامه بدعت بالحجي ما خلت حجاية تسم البدن ما ذبتها .. 

اذا الحايط رد اني رديت بس احس كلش اختنكت وصلت حدها 

وجعت حيل .. ودخت ما شاربة جاي 

انلعب بحالي لعب .. 

شوية ورجعلي حازم يمكن ساعة ونص كال : كومي 

لبست وطلعت بس ساكتة لان احس بركان جوا الساني بس ينفتح ينفجر .. 

اخذني للبيت ودخلنا اثنينه .. 

بسرعة رحت حطيتلي طاوة طماطة وخدرت جاي 

كال : راح اروح اجيبلج معلاك عوفي الطماطة 

حجيت بشدة : ما اريد 

- شبيج 

- ما بيه شي 

- امي ضايقتج ادري امي ما تجوز شسويلها امي قابل اكض السانها واحشه هم انحسب عد الله عاق .. كليلي شسوي 

- طالبة منك تسوي شي ؟ 

- مو اشوفج مقهورة عصبية 

- سهمك الراحة لا تفكر بيه بس فكني 

-صبا شبيج 

-ما بيه شي بس اتركني وحدي .. رايدة اكل يصير لو هم ممنوع 

-وياهو المانعج شبيج 

-حازم عوفني وروح 

-وين اروح 

كاعد يحجي دك تليفوني باوعته منى 

حجت : ها صبا 

-ها منى 

-شلونج 

-بنص الخير 

حجيتها وبجيت 

كالت : شورطتي روحج متكليلي هس اني يم بيت عمي والله عمتي ممرودة مرد عليج تكول حكها لو شما سوت حكها اخوتها جلاب ومحد بيهم فادها سباعية من حوتلها زلمة زين مثل حازم وحطت ايدها بيده طبهم طوب خلي انفتهم وخشمهم العالي يفيدهم ثلث مرات خطب ما رضوا لحد ما تصخمت وجوهم من عساها احتركت مو بس اتصخمت 

-محد تصخم واحترك غيري 

-شكو ليش 

-ماكو شي 

-متأذية هناك 

-شوية 

-والله يا صبا غلطتي يعني ما صار فترة من عقدتوا لو منتظرين شهور سنة وراحع خاطب يمكن الله يهدي عمي اخوتي هسه حطيتي روحج هالحطة هاي ليش 

-منى كأنما امري بيدي فدوة لعينج اسكتي 

سكتت وبقت اسمع كالت : يلا جبير عمامنا جاي على عمي بالطريق خلي اشوف شنو حجيهم واكلج 

سدته مني .. 

وهو يمي كال : شكو 

-جبير عمامنا جاي على عمي 

-مو رايحله عمي اليوم 

-اي هو جاي على عمي 

-تكدر تفتح اتصال وتسمعج كعدتهم 

-خاف ما تكدر 

-كليلها اريد اعرف حجيهم حتى اعرف اتصرف منا  

هي هاي اختج الثانية مو ذيج ام حگلگ 

-اي 

خابرتها كالتلي بس رصيدي ما يكفي 

كالي حازم : خل ادز واحد على ابو الاسواق اللي براس الشارع اسمه ابو منتظر تاخذ منه كارتين ابو العشرة ويسجلهن على حسابي هسه اخابره 

كتلها صدك ودت وهو وصاه واجت فتحت اتصال من اجا وتقربت من الدوانية .. كام جبيرنا يحجي ويا عمي كاله : انت بس فهمني هي البت جانت كاعدة عدك لو عد اخوه 

- لا يا خوية جانت عدي وراحت كعدت عد اخوها بالشماعية 

- شو عمه يكول البيت بيتها اشترته هي وانت شاهد بيعتها 

- اي صحيح بس اخوها كاعد وياها 

- فهمني رحمة لوالديك هسه هي كاعد ابيت ليوحدها لو كاعدة عد اخوها 

- لا كاعدة ابيتها بس اخوها وياها 

- كبلها جانت عدك 

- اي 

- جا ليش عدك ليش مو عد اخوها الجبير جعفر 

- ما رادها مطلكة ووضع انسابته ومرته ما تحمل تعارك وياها واجت عدي 

- يعني طاردها من بيته 

- اي 

- جا ما طولك انت مطلعها واخوها مطلعها من جايها الزلمة وخاطبها ثلث مرات ما اطيتوها وسترتوها 

- خوية جعفر ما رضى شد راسه ما اطيها 

- جا جعفر لا حواها ولا اطاها شيريدها خوية تكو* 

- لا بس عاند ويا حازم جيف تعارك وياه 

- راضي هاي انت الزلمة البخيت وابو العكل صدك جذب موهدينه بسالفة عرض وشرف والبت ذابينها من بيوتكم وما مطينها يوم الخطبتوا جا هسه لو كاعدونا وحاجونا وكاللولنا ذابين لحمكم شنكلهم احنا عاجبنه نكو* بنسوانا بس ما نزوجهن 

- لا يا خوية جثير قسم اجتها وما رضت 

- ليش ما رضت 

- ثاريها جانت هاوية الزلمة هاي 

- ومن شفتوها وافقت من خطبها توكفون بقسمتها عليش 

- خوية غير جعفر 

- وانت تمش ورا جعفر يا راضي .. جان جيت علي وكتلي البت هاذ حالها وجعيفر طاردها من بيته ومعاند ما يطيها القسمة جا ذبيته من العشيرة واطيت البت .. بت راضي بت تذب ابيت ليوحدها انا اجا عمهم وكلالي كلت حرام بالحرم هالفعل ما يطلع من حجي راضي 

- شسوي يا عمي انا هم عدي ولد ونسوانهم يغارن خاف لا اشيلها واطيها لواحد من ولدي وتشوف بالعباس مبتلين يومية عركة ويومية اطلابة 

- جا من كونها يومية عركة وطلابة ما اطيتوووو البت 

- خوية كم قسمة بقسمة جتها ما ترضى 

- راضي راضي هسه الحجي هاذ لو نكعد نكصص اصابيعنا ونحرك افتدنا ما يفيد الفاس طاح بالراس والسالفة ينرادلها حل .. شنهي خوية نفصل نكتل لو شنهي التريدونه .. 

- الشور شورك جبيرنا بس امس جو علينا وهادين على بيت جعفر داكينه 

- والله خوية تريد شورتي اكلك نحج وياهم وناخذ البت منهم ونافق يجون ياخذون البنية عروس من بيتك ونحلها ونصير اهل لا افصلك ولا تفصلني لا اضيرك ولا تضيرني .. ما طول المرة و الزلمة مترايدين واخوتها ذابينها اطي البت هل تنستر بعد نعارك ونهد عليش على صخام وجوهنا غير يدكولما طبل بكل شارع  .. اقلها خل تطلع من بيوتنا عروس 

- ودكتهم امس 

- وجعفر ما مقصر هو الداكهم .. لا راجع لجبير لا كايللما من كيفة فازع وهاد 

- ونسكت هيج ما نعمل شي 

- البت معرس عليها من نريد نكاوم ونحجي شنكول .. ردولنا بتنا غير البت رايحة وياه برضاتها يعني لازم اذا رديناها وما نريد نطيها نعسل عارها لو نزوجها ونستر عليها ما بيها غير هالحلين .. والبت مطرودة ومضيومة اعلى يا مال تغسلون عارها .. اتزوجت حتى بشرع الله ما زنت خاطر نعيبها ونكول نغسل عار .. طم السالفة راضي ولمها ترا بو طالت وشانت تضرك وتضر خواتها وتضر الكل .. لمها وسويلها زفة من بيتك 

ضلوا يحجون وحازم يستمع الهم 

كالي : جبيركم خير ..  

- اذا حلاها هيج تنحل 

سدي 

سديته ، حجه : اذا حلوها بالتراضي خو هذا احسن حل ول رادوها فصول وعرك ما نقصر بيهم 

- بس جعفر يرضى حرام والله ما يرضى 

- حجي عشاير هاذ لو تجرا عليهم هم يجيرون عليه 

- بلكي الله وتنحل ونخلص من هاي كلها .. 

ثاني يوم .. جبيرنا خابر على عم حازم حتى يحضر عنده 

راح حازم ومحمد وعمه واثنين من ولد عمه ... كاللهم : السالفة سالفة عرض وشرف مو مالت نكبرهم وينضر الكل محد منا ينتفع انا اكولن وهذا عمها وحاجيته لو نلم السالفة بينا ونكف عن المعارك والطاك والطيك وفضايحنا بين الناس مو هينة وهاي سمعة بت ينضر بيها اخوتها والياخذها صحيح لو مو صحيح 

كاله عمه : لا صحيح واحنا ما ردنا الطك بس ابنكم الهد اعلى بيت ابنه ودكاه وهاي مو هينة 

- طلعته من راسه يشهد الله لا عمه ولا جبير يدري عنه والصدك ما ينلام يضل زلمة والسالفة مو هينة عليه اخته ماخذة بالسر .. وانتم ما دامكم رديتوها اله كصه بكصه .. نلمها بوية ونستر السالفة ونحطها حدر الفراش . 

اتفقوا على هالامر بس بدون ما يرجعون لجعفر 

لان عمي من مخابر جعفر ما راضي بزفة وستر رايد يكتلني 

وما ينطيني لحازم وضال يهدد ويتوعد . 

من رايد يطلع حازم كايله : شيضمنلي لو انطيت البت جعفر ما ياذيها 

عمي متكفلني وكايله : تجي عدي وهالاسبوع تاخذها من بيتي ... 

كايله : هاي يمك وبكفالتك شيصير عليها هاي كدام الزلم المرة على ذمتي وبمسؤليني شيصير عليها لو تأذت شعره من عدها .. اعتبرها شينة بحقي واني وياكم والعشيرة 

حجه جبير : لا لا بتنا بتنا ما يصير الا الخير .. هالسبوع هذا اتفقوا وزفوا البت وسوولكم هوسة وهلهولة وخلي الوادم تعرف راح لرجلها عروس من بيت عمها .. وهو ان شاءالله بدور ابوها 

ومن هالحجي اتفقوا .. 

ورجع حجالي اني كمت ارجف كتله : يعين اذا رجعت هسه عمي ما راح يطيني لجعفر ولا ياذيني 

- لا تعاهدت وياهم هالاسبوع هاذ عرسنا ونفض السالفة 

تضل بس سالفة الزلمة الحريشاوي الدك بيتي ويا جعفر هذا تضل كوامتنا وياه على فصل . 

خذاني ووصلاتي راس الشارع مال بيت عمي .. 

وهو كالي : اني راح اكعد بالمحل اي شي يصير وياج بس دكيلي تلكيني حاضر يمج . 

صدك مشيت لبيت عمي طبيت 

تلكاني عمي بالرزايل والعلط والاهاين 

سكتت ما نطقت ولا حجيت ولا كلمة 

خذتني ميلاد وصعدتني فوك يمها ... 

بس الصدك رزالة عمي وهوسة ولا ذلة اهل حازم وبيوتهم 

اقلها عمي يرزلني يغلط عليه متعودة واعرفه يغلط عليه منا صاني يوم يحاجيني ناسي هو رزلني .. بس كعدتي عد بيت اهل حازم رادت تجيبلي جلطة من وجوه نسوانهم .. 

هذا الحجي جعفر ما راضي بيه كله ضال يهدد وينعثل 

عمي ما مهتملة .. كالي بس هالاسبوع تمشين عروس لبيت رجلج وافتك منج ارتاح طول عمي بعد لا صبا ولا مشاكل صبا وعوينة ابو جعفر لابو طلايبه الما جابتلي غير الفضايح والعراك . 

صاني يوم الصبح 

عمي بالدكان قافله عليه من جوا واني كاعدة فوك يم ميلاد .. 

دك عليه جعفر .. خفت ارد .. رجع دك مرة ثانية ما رديت 

دز رسالة ( اذا ما تردين راح تندمين كل عمرج وراح تعيشين عمرج كله دمعتج على خدج ) 

دك رديت حجه : تتزوجين وتنزفين بدون رضاي ولج 

اني اخوج الجبير تنزفين غصبا عنيييي 

جعفر : عمي 

- انعل ابوج لابو عمج 

شوفي الكوا* الكرن الماخذته اني متربصله وكاعدله كدام باب الدائرة اليشتغل بيها 

- جعفرشناوي تسوي عمي تعاهدله ولو سويت شي العشيرة .... قاطعني 

وعفط وهوي كلي : عمي والعشيرة كلها جوا قندرتي وعلي طلقة براسه هواي بيه 

- عليك الله لا لا تأذي شتريد منه 

- لو ما كمتي هسه اجيتي ورحتي لبيتي وخابريتيني مناك 

وحق هو العباس الطلقة انومنها براسه بعد 

- والله اجيك اجيك بس لا تاذي هو صاحب جهال وعائلة حرام 

- هسة تكومين تجين ولو حجيتي وخابرتي وجبتي طاري تعرفيني مسودن انت وياه حصتي والله لو مو عمي لو ملايكة تنزل .. افتهمتي 

- عليك الله لا تأذي 

- هسه تكومين تجين ولو خابرتي وبلغتي .. ما اتردد اكتله والله 

- اجيك والله اجيك بس لا تسوي شي عليك الله 

سديته منه وكمت كضيت عباتي ولفيت حجابي وطلعت من بيت عمي .... يتبع