اجاني احساس كمت احس هم يشتغلون بجسمي 

وصوت الجهاز مال القلب ينبض .. فتحت عيني خفيف اضوية كلش قوية غمضت ما اكدر افتح .. وكلام وهوسة ديحجون ما افرزن شجيسولفون .. 

انشاليت من سديا .. لسديا ثانية ولفوني ببطانية 

جان الجو احسه بارد حيل اطرافي جامدة وما اكدر احرك شي ولا الي سيطرة على عقلي وتفكيره ولا الساني وشكاعد ينطق .. 

كاعد اججي بس مدا افتهم اني شكاعد احجي 

اجا واحد يمي كام يحجي ويايا اتذكر اني دا اجاوبه .. بس ما ادري شدا اجاوبه .. 

شوية شوية كام يرجعلي الشعور والادراك 

وكمت اسمع نفسي اصيح .. يمممه وينج ... حازم وين عفتني 

رجع الرجال كال : تتذكرين اسمج 

كمت بس اون واصيح : ااااخ يمه .. اخذوني لاميييييي 

حجه : بس كليلنا شسمج 

- اريد ميييييي حلكي اريد مييي 

- - ممنوع تشربين مي هسه نحطلج مغذي وترتاحين 

بس كليلنا اسمج 

كتله اسمي صبا .. وانطيته اسمي الكامل واني اون ..

سجله وطلعني للردهات .. كاموا يصيحون باسمي .. محد يجاوب 

رجعوا يصيحون ( المريضة صبا فوزي منو وياها ) محد ميجاوب 

بقوني بصالة الأنتظار نص ساعة تقريباً  لحد ما اجت سهى وعمي وياها .. استلموني .. احسهم يمشون والعامل يمشي السديا وصلوني للردهة ونقلوني من سديا لسديا ثانية .. الردهة بيها نسوان وناس .. وبين كل مريض ومريض بردة .. 

اني بس اون من الالم 

والدكتور يحجي ويا عمي .. وسهى تحاجيني : ها صباوي تسمعيني 

- حازم .. حازم 

- عزا العزاج ولج انت بيا حال كلوبنا شعوطت والعباس وانت بعدج تلهجين بسمه 

- وينه 

- يوجعج بطنج مأذيتج تحسين بالم 

- اي .. يوجعني ... حاززززم 

احس اكو الم قوي بجسمي خصوصا ببطني وجع كلش قوي كانما بطني مشككه كمت اصيح واون من الالم لحد ما حطولي المغذي بالكانونة سكن عندي الالم ونمت 

ليغاد كعدت على صوت عمتي وسهى 

فتحت عيني حبت راسي : ها ولج صبية 

خايبة من امداج وامدا قسمتج على هالحظ هاذ 

جا عمة وين ما تحطينها سودة مصخمة لا حاوية رجل لا اهل ولا صحة 

لا والحظ من حظج يمكرودة 

سهى : من ايدها الما يعرف تدابيره حنطته تاكل شعيره يعمي 

- شبيدها على حظها المكرودة تركض بديها ورجليها ومحد سابها بحالها .

سهى : بعد شتسوي .. عمي راح 

- اي والله خطية هم ابتلى الزلمة الوادم بالعشيرة كاعد يخابرونه على جعفر وحيدر ولهساه ما طاح بواحد بيهم وذولاك من ذاك الصوب شاعلين الدنيا ومتلايمة اعليه المكرود . 

- هم الله يساعده ابتلى بينا 

- لا جا هو هم ابوجن عمه .. العم والد 

- الله يطي العافية .. اكلج عمه انا رجلي تعارك وياي يردني ارد للبيت من امس واليوم اني هنا والجهال غاد واصبية منا وخابريت منى هم ما تكدر تجيلها .. شلون 

-عمه انا لو رجلي يعينني جا ضليت وياها بس هالتوفشيني لو كعدت مالي حيل اكومن بيه بعد 

- جا وشلون 

- والله ما ادري خليني اخابر اعلى يرسف هلبت الله يرضى يجيب ميلاد تجي وياها 

خابرت .. يوسف ما رضى جهاله عدهم امتحانات .. 

خابرت سهى على منى مرة ثانية .. كالتلها : اقلها بس نص يوم تعالي وضلي يمها .. بلكت اقنعه وارجع الها .. وبقن يتفقن ويحجن 

منى رجلها عده دوام وجهالها ما عدها احد تعرفهم يمها .. 

كالتلها حيبي جهالج يمي بالبيت 

ردتها : ما يرضى اجيج وحدي واذب جهالي .. الا هو ياخذني وهو بالدوام راح 

.. عاد راحت سوتلي خروجية من المستشفى على مسؤليتهم وطلعوني من المستشفى .. دخلتني للاستقبال كوا امشي مسوية عملية والبنج بعده بجسمي وراسي مسطور من العلاجات .. 

عمي كال : لا جا لا تنوموها هنا .. زلم راح تجينا بالطريق ..  اخذوها غاد .. 

حجت عمتي : يا جا وين نحط المرة صدك جذب مسوية عملية 

سهى : زين الصريفة مالتها كبل ما موجودة هسه افرشلها بيها 

- لا يا غير عمج خذاها سواها مخزن لغراض الدكان 

- خليها ابغرفة رسول على ما يروحون الزلم 

هدى حجت : لا جهالي بالكاع وبس يبجون وهي مريضة خطية ما تتحمل صعدوها لميلاد تخليها بالهول الهول مالهم واسع 

ميلاد: بس شلون تصعد درج و جرحها اخضر وتوها مسوية عملية 

سهى : شوية شوية نساعدها .. 

مريضة وحالي يصعب ع الكافر وكلها استثكلتني .. كلش اتضايقت 

ساعدني وكامن يصعدني ع الدرج .. لحد ما وصلني فوك سلمت عليه سهى وراحت .. 

فرشتلي ميلاد ونومني وغطني 

الهول بيه بس بنكة وصوت الجهال وصياح سويسو وداليا زرفوا راسي وهم يتعاركون وميلاد تصيح بيهم 

اريد انام اريد هدوء ما كدرت .. 

من كلهم ما مستعدين يتحملوني ومحد يريدني 

سوو كل هاي ووكفوا بقسمتي ليش 

جان هسه حازم واهله حايرين بيه ولا هذا حالي مستثگلني الكل .. 

بس وين حازم حتى حازم صابه حظي وانضام بيه .. 

اريد انام ارتاح جسمي احتر حيل .. وراسي اذاني والوجع كام يون عليه من كل مكان .. كمت اون .. 

ميلاد اجتني : هسه شسويلج يا داده شبيدي .. 

نزلت لعمتي عمتي تكللها خابري سهى شوفي وين حطت دواها .. 

جاي تخابر .. 

اجا خبر لعمي لكوا حازم .. كاتلينه جعفر و حيدر وذابينه يم السدة 

بس جبير عشيرتنا واكع بحيدر وكاضه الا يدليه بالزلمة .. 

عاد مخبر اهله وجبيرنا فازع وياهم وعمي ركض للمكان الذابين بيه حازم 

من سمعت كاتلينه وذابينه بالسدة .. 

الوجع البجسمي مو بس هاج 

كمت ابجي واصرخ من كل حيلي 

واصيح .. الله لا يطيكم اخووووتي .. الله لا يطيكمممممم

الله يحرك كلوبكم مثل ما حركتوووووو گلبي .. ااااااخ ولج يممممه 

كامت نادية تلزم بيه وتريد تكضني واني اشيل بروحي واذبها 

روحي فرفحت عليه .. اشفت منه .. ما عولت الله دزلي انسان يحبني ويخاف الله بيه ويراعيني .. كتلوه وكتلوني بكتله لييييش 

ليش ما كتلوني بداااااله ... ليش حركتوا كلبي بييييييه 

ميلاد : ولج خية بس اهدي دخيل بختج .. عمليتج خضرة اكعدي 

انحب وابجي واريد انزل وهي ما تخليني .. 

صليت اصرخ بمكاني لحد ما عمليتي كامت تنزف دم .. 

محد موجود ياخذني .. والالم ذبحني ورسول ويوسف ويا عمي راحو ع السدة .. نزلت من فوك ليجوا .. الدرج كوا حطيت روحي عليه .. 

اول ما وصلت باب الهول تخربطت ووكعت للكاع 

ابتلن بيه عمتي وميلاد يشيلن بيه .. تنخت عمتي الجيران اجوا شالوني وراحو بيه للمستشفى .. كالولها : ما جان لازم تطلع من المستشفى لحد ما الدكتور يسمحلكم انتم اتطلعونها ومن تتأذه تعال احنا نبتلي 

كامت الدكتوره تصيح وتعيط على عمتي 

واني ابجي وبنحيب .. ما افكر بروحي وجرحي كثر ما افكر حازم راح 

كتلوه انتهى .. كالها جعفر يكتله وكتلاه .. 

يا ويل حظي شعمل بحالي .. لو يحطون جعفر كدامي اكله بسنوني على نذالته وياي لا خلاني اعيش وياه ولا هو العيشاني .. هدماني دمرناني .. بحظه وابخته وما ابريه الذمة . 

اطوني مسكن ونمت بالمستشفى ما ادري شكد 

كعدت .. ملاد يمي .. وضايجة متعاركة ويا رجلها لان مخلينها بالمستشفى .. كتلها : روحي خية اني ادبر امري .. 

- يا شلون اهدج هنا واروح 

- لا تخافين علي ما اموت .. المثلي تتعلعل .. ما مكتوبلها الراحة حتى تموت . 

ترخصت مني ومشت .. 

ضليت كاعدة بالسديا بمكاني وابجي وانحب .. 

اجا الدكتور فحص كال : منو وياج 

- محد دكتور بس اني 

وكفت مرة جبيرة نايمة ويا بتها كالتله : دكتور وصيني وانا اداريها حالها حال بتي .. 

صدك وصاها وحطلي المغذي 

وكال لازم تاكل .. بس الاكل ممنوع بيه دهن وبهارات وسكريات 

ولازم امشي حتى البنج ينزل من جسمي .. ووصاها تراقب المغذي من يكمل تصيح واحد من الممرضين 

بقت على راسي ما عافتني .. 

مرة بيتها بالحبيبية .. بتها بيها سكر ونايمة بيها .. 

تشوفني اون تكلي : خالة لا تخافين اني يمج احسبيني امج 

من كالتلي هيج كمت ابجي بالزايد وانحب .. 

كامت تسألني عن اهلي .. وحجتلها ميتين واتزوجت صغيرة وهاي تاليتي .. واني اسولف ويا المرة ومنتهية .. ما احس الا نسوان الردهة كلهن ملتمات وواكفات يسمعن .. 

والمرية اسمها ام سامي تحجي وياهن وتحاجيني .. 

وتكلهن : شوف حظها شوف 

ما قصرن دارني .. وكلني .. وبقن وياي يدارن عني الوحشة 

وكلساع وحدة منهن محولة يمي وتكلي : عليج العباس شتحتاجين خية اني يمج لا تكولين وحيدة الناس للناس 

واشكرها بس من يشوفني ابجي حسبالهن محتاجة شي لو مقهورة محد وياي .. بس اني مكتلهن على سالفة زواجي بالسر من حازم .. وكتلته من عرفوا بيه متزوجني ...

الليل المر ما بطلن عيوني بچي عليه 

راح من وراي .. اجا ملهوف يركض بلا سلاح ولا اهل واخوة تحمي طاير كلبه من سمع حيدر تعرضلي .. وكتلوه 

شكثر ردت ازيح عن دربه واعوفه لجهاله وبيته 

بس لا عافني ولا خلاني اعوفه تعلكت روحه بيه جني مو غريبة 

جني وحدة بين اضلوعه ضايعة ولكاها وحطها بگلبه .. 

ارجع وانحب واني الوم بروحي ما جبرته يعوفني 

صار الصبح .. منتهية صحيا ونفسيا .. مكاعد اكدر اعين نفسي 

لان الرغبة البداخلي بالحياة انعدمت .. كمت اتمنى حالتي تسوء اكثر واموت لان ما اشوف داعي من عيشتي غير هم وقهر .."

صبح الصبح .. 

الدكتور كتبلي علاج و ابر ولستة توصيات .. واكتب خروج 

اخذت الراچيته مالته .. وطلعت من المستشفى وحدي بس ما جان عندي فلوس اركب ولا حتى ربع .. جاية بطرك روحي ومحد عافلي شي من راح .. اضطريت امشي من مستشفى القادسية .. لبيت عمي مسافة .. 

انكطع نفسي يلا وصلت 

بس هم زين لان الدكتور كالي بيج وما تمشين كلش زين الج 

هم تمشي بطنج وترتاحين ميصير عندج مغص او تشنج .. وهم الدورة الدموية بجسمج تشتغل صح وتطرد البنج من جسمج .. وترتاحين . 

جبت الدرب كله دموعي سچابة .. 

وصلت فرع بيت عمي وشفت محل حازم معزل 

يا ويل حالي .. كمت انحب انحيب الدرب كله لحد ماوصلت  .. بيت عمي 

لكيت سويسو بالدكان اخذت عباتي ومسحت وجهي وكتله : اطلع عاوني ولك راح اطيحن 

بسرعة طلع وهو يسندني .. 

كتله : جا عمي وين 

- راح للمستشفى 

- يا مستشفى 

- مدينة الطب 

- ليش ؟ 

- علمود حازم ابو الانشائية 

- شماله 

- بالمستشفى 

- يعني ما ميت 

- لا بس يكولون راح يموت 

باد حيلي من سمعت بيه بالمستشفى .. 

وكعدت للكاع بعد رجليه ما عانني واني انحب واشهك عليه 

كتله : بيا مستشفى كتلي 

- مدينة الطب 

طلعت عمتي كضتني : طبي طبي 

- خل اروحن عمه اشوفه .

- يا عمة دهر يا تشوفين وانت حالج هاذ اكعدي 

- عليج العباس كليلي زين هو لو لا بس طمنيني 

- والله يا عمة ما ادري عن شي .. كالوا بالمستشفى وعمج هالراحله عبن تبرى من جعفر وحيدر وعملتهم الشينة هاي عكب ما اطه حجاية لجبيرهم يزفج اله وكتلوه .

- خابري طمنيني عنه فدوة اروحلج عمه 

- بس استراحي وبعيني دكعدي هسه اكعدي 

اعذرينا ضليتي وحدج غاد بس عمه تعرفيني وعلي مالي حيل وذول ما رضوا نسوانهم تضل بالمستشفى .. وضليتي مت عيني 

- هينة الله ما ينسى بشر و سخرلي ناس هواي ساعدتني بس الاريده اطمن افادي على حازم خاطر ارتاح والله روحي جاي تشتعل من القهر 

احجي وعيوني مدمعة 

كعدتني وخابرت على عمي كالتله: ها ابو يوسف ابشر الزلمة شنهي 

جريت منها وفتحت سبيكر حتى اسمع وهو يكللها : شبشر يا صبيحة .. الزلمة لا من ايد ولا من رجل .. يكولون عده تمزق بالطحال وحالته صعبة من ورا ذول الغمان بله هسه كليلي لو مات شنطي فصل .. وشنفصل 

غير يزوعونا الاول والتالي من الله يلا ينطي حويدر وجعيفر 

- يعني هسه الدكاترة يكولون يعيش لو شني .. 

- ما ندري عده نزيف بالطحال لو ما وكف النزيف يموت . 

-دخيلك ربي الرحمن يحفظه 

-ادعي يصبيحه لو مات شيفكنا من الله لا يطي اصبية الورطتنا هالورطة هاي 

-جا انت ترد اعلى جليلة الذنوب ما تدعي جعيفر العرض بقسمتها نوبتين جا هسه البت زفيناها وانسدت السالفة 

-دروحي هسه خلني اردن بعد شني ضلتي سويسو كون طلع من الدكان 

-لا جويعد مت عيني عليه من طلعت ولهسا

سده منها كتلها : يعني ما نكدر نشوفه عمه 

- عمة انت بيا حال هالتشوفين روحج كوا تكضين وتكومين .. ارتاحي واكعدي ادعيلا هلبت الله يكوم لحيلا ويتمم سالفتكم بخير ول كام .. مدري حظج يعمة بعد السووه بيه اخوتج تضنين اتم سالفتج وياه .. 

ضليت كاعدة يوا عمتي .. لحد ما رد عمي 

شافني جاية كال : ها شلون صرتي 

- على الله عمي 

- والله اطاج عكل فرزني امرج شوفي شعملتي حالج وبحال اهلج .. اخوتج هسه شنهو مصيرهم من وراج .. زلمة ما رادوا اجوزن عنه رايحة ماخذته من ورا ظهورهم ما تستحين ما تخجلين .. حيا ما عدج .

- عمي كافي تلومون بيه .. هاي اني طحت وسويت عملية وانذبيت اوحدي اهوتي ويهم خواتي وينهم .. انتم وينكم .. طلعوني من العمليات ساعة يريدون احد يجي ياخذني ويصيحون باسمي مالي اهل التاخذني لحد ما اجيتكم تالي الونة 

ناسيني وذابيني وتلوموني لو اختاريتلي زلمة اكدر اميلن عليه لو طحت .. 

اطلكت ومحد عافني لو شما اصون روحي اني بعيون الناس مطلكة وتايهة للرايح والراد .. بيش غلطت من ردت استر نفسي واعيش بضل زلمة يتكفلني ويكف عني حجي ومصايب الناس كلها .. 

- لو رايدة ستر ورايدة رجل يصونج جا رضيتي بالقسم الجتج .. ما ضل غير هالزلمة هاذ التباطح ويا اخيج 

- يا قسم عمي عدنان البس صار بديه اطحين سربتني بالشارع وطلكاني ومن طكته الدنيا رادني حتى ارجع اكدن عليه .. لو حسن المتزوج ويحجي ويا وفاء بت الحجي .. وراد يغيضها وياخذني واهله ما يدرون واسمي عدي بيت واشتغل ما يحتار يكد عليه ومن سمع اخوتي ما يقبلون اكعد بالبيت لو تزوجت ولازم يطيني مهر ويحطلي بيت .. شفته بعد ؟ اجا اكبل لو شرد والشردة شردة. . عبنه مو زلمة 

حازم عمي هو الخلاني اشتري البيت وهو بلايا ما اطلب وادري كل شهر امشي لابو المولد الاكي دافع السحب لا فد يوم باوعلي بعين نكسه ولا يوم ساوماني ولا يوم ذماني شفته زلمة ينصح ويرشد ويخاف ويكد .. واني بلا اهل ولا عزوة ليش ما احتمي بيه جا لو هو موجود هسه اضلن هيج مذبوبه بالمستشفى وعملية ومحد بحالي .. اضلن بلا علاج .. اضل انوح وابجي ومحد يدري عني 

حتى كتلته هاي ليش شجابره يذب روحه بنص اخوتي وتعارك وياهم لو ما جاي لهفان ناسي روحه وذاكرني .. ياهو المنكم ذاكرني بكده ويعاركلي يهمه امري مثله ؟ 

- انت فكر عمي انت فكر ما اتعتبين رجلج عليه شي لا ما تكسحينه وهاي كرطتي راس الزلمة .. جوزي عنه كافي .. هسه زين اخوتج مطشرين واخوته يدورونهم .. 

حجت عمتي : وهسه جعيفر وينه 

- ما ادري عن جعيفر بس مودي اهل بيته لنسابته ومحد يدري عنه وينه وحويدر خابريته التحق بالوحدة مالته بتلعفر .. وما ندري شلون تنحل انا بريت ذمتي جدام اهله كتلهم عمي انا ذوله الولد ما اكدرلهم شبيدي عليهم هالاجيتكم وردت احلنها ونطي البت بس اخوتها ما يرضون وهالوصل لحال لهالمواصيل .. 

والحجي الشفته لا اهله ولا عمامه رايدين البت ولا رايدين هالزواجة 

عمه كاضني كضة ايد وكالي لو حازم كام لحيلا طالبه بطلاك البت ولا تطهيا اخوتها ما راح  يكفون وولدنا موش كليلين شر .. والبلاوي ما راح تنتهي طالما هالزواجة الكشرة مستمرة .

ما جاوبت عمي 

بس كرت بخاطري من يكلي انت فكر 

يمكن صدك اني وجهي نحس ويجيب المشاكل لك واحد اكرب منه .. 

لو ما داخله حياته ما جان هسه هو بين الحياة والموت .. واني رايد اعدل حياتي بيه هدمت حياته كلها واذيته . 

يمكن صدك وجهي نحس ومالي حظ .. وفكرته وياي .. 

دمعت عيوني والعبرة كضت ابلعومي خنكتني بس ما بجيت ... 

ضليت حابستها 

اجا زلم لعمي 

طلعت من الاستقبال كوة امي رحت كعدت بالمطبخ .. 

حار يكتل ما بيه مروحة .. 

شفت روحي كعدتي هنا زايدة .. 

شو لا عمي رايدني ولا جناينه ولا ولده

بعد انا كاعدة هنا ليش .. ومتعلعلة شو ذبوني بالمستشفى واني الاجيتهم ليجاي .. عمي غبش لحازم علمود العشيرة وعافني وراه لا مرني ولا كال ذاب البت بالمستشفى مسوية عمليه .. بعد كعدتي هنا وذابة روحي شني . 

كمت على حيلي كوا اتجي روحي .. 

واخذت فلوسي من عمتي .. ضاله عندي فد ٧٥ الف .. 

واطلب الدكتورة مال نص شهر بس كلت عود بعدين امرها .. 

سلمت على عمتي ما رضت اطلع بس اصريت .. بستها وطلعت خذيت تكسي من راس الشارع ذباني اباب البيت مالنا البشماعية .. 

طبيت البيت كمت اباوع المكان اللي اتماطل حازم وجعفر بيه وحيدر طكاه 

دمعت عيني فتت البيت هوسة حيل هوسة .. بس جسمي حيل تعبان .. 

ايد كاضة بطني بيها وايد جريتلي فراش وشغلت المروحة .. 

ما جانت عدي مبردة .. رغم حارة بس كدرت اتمدد براحة .. البيت يصوصي لا صوت لا هوسة صياح .. 

كامت دموعي تجري على كيفها .. 

اذكر وجود حازم من جنت مريضة وهو يمي 

شلون يحتويني ويحبني ويهتمل .. بلياه محد يدري بيه اني عايشة لو ميته بهالكوكب .. الكل ملتهي بروحه 

ضليت امدده بلا غطا .. نمت ونوعا ما ارتاحيت بنومتي جيف هدوء 

بس العصر الوطنية ماكو وابو المولد يطفي ب٤ احتريت وكعدت 

ما ادري اذا الماي والسبح ممنوع بس طبيت غسلت روحي جوا الماي من العرك كام الضماد مال العملية يريد يوكع .. رحت طلعت من خانتي علك جبير لابو فاضل .. كصيته وشديته على بطني وثبتت ضماد العملية بالعلگ وذبيت حمليه عليه الكفل زينب يكفلني .. 

كعدت بالكراج لوحدي .. 

لفيت نفسي وبقيت صافنة .. 

افكر اروح اشوف حازم بس ما دامه بهالحالة ما راح اكدر اشوفه اكيد اهله وناسه كلهم داير مدياره ومحد راح يخليني اشوفه بس اجيب مشاكل لروحي 

رغم هايمة على شوفته حيل 

ورايدة بس اشوفه واطمن كلبي عيله واطفي نار روحي المشتعلة بيه .. 

بدا الالم ابطني يزيد 

لازم اخذ علاجي عملتي تريد مسكن .. 

موبايلي مو عدي عد حيدر ما ادري وين مودي .. 

صحت على سارة طلعتلي : ها ولج هنا 

-اي والله 

-حسبالي بعد ما تجين احجيلي شصار صدك ماخذة واحد بالسر عود كتلهم ما اصدك جارتي وما فد يوم سمعت شي عنها بنية تنحط بالكلب 

-الله يسلمج ما اكدر اوديج اتجيبيلي العلاج 

- علاجيش 

-مسوية عملية وبطني حيل تاذيني 

- يا سودة عليه عمليتيش كون اذوج بس لا طكوج طلقة ولج 

-يمعودة المرارة طكت يا طلقة 

- يا عيني من القهر شتصيرين متكليلي شتصيرين 

بس كليلي هو انت صدك يعني متزوجة بدون علم اخوتج 

-هم اخوتي ياهو البيهم داري عني حتى يدرون تزوجت لو لا 

-يعني صدك 

-سارة اني وين احجي وانت وين بطني ذبحتني من الوجع 

-ما اكدر اطلع والله الصيدلية تعرفيها ليغاد بعيده رجلي لو دره واصله غاد يكص رجليه وعلي 

- زين اريد اخابر خواتي .. اطيني تليفونج 

- اي هسه اجيبلجياه 

ناوشتنياه .. 

وطلعت سجل عدي مال الخياط اسجل بيه طلبات والدين مال الخياط ومسجله بيه ارقام اخوتي وخواتي والمقربين اكول كلشي يصير حتى اراقامهم تضل تحت ايدي ضاع تليفون شي ..

خابرت لسهى كالت : شلون رجعتي للبيت ما تخافين لا واحد من اخوتي يرد ليجاي ويكتلج 

-ديلا هسه اني مريت بكل هذا وطاح حظي صل بس الموت ما مجربينه عليمن اخاف منه خل نموت بس لا اعيش بخوف 

- بكيفج بس اني رجلي ما موجود شيجيني الج 

سديته منها خابرت منى كالتلي : ما طول اجيتي للبيت اني راح اخلي يجيبني الج بالليل

سديته منها .. 

شوية غاد اجت الوطنية دخلت كعدت جوا  واجتني سارة جايبتلي صينة شوربة عدس وزلاطة 

شكرتها وكعدت اكل بس جرحي ثكيل حيل وهي تسولف وياي 

اندكت الباب وطبت اختها رقية .. 

بس كعدت بلا سلام 

استغربت شنو طبتها وشكو اجت 

جان تكلي : شتفاديتي من التخامة السويتيها 

ندستها سارة كالتلها : لا جا احجي الصدك 

عكدت حاجبي : صدكيش انت شكو بمشاكلنا 

-ما تهمني مشاكلكم  انت تتحملين الجرالج يطبج طرب بس حيدر راح يتأذى من وراج ومن ورا سواياتج 

- وانت شعندج ويا حيدر وخايفة عليه 

سارة كامت تندسها بس هي ملسونة ردت 

- اصلا هو حجه ويا امي على خطبتي وجنا ناوين بنزلته الاخيرة يخطبني بس سالفتج الخربت كلشي .. 

سارة : اس كافي كومي 

- وبس لان رايد يخطبج تجين هنا تلعلعين وتشمرين شنو من بنية انت 

- جا راح يصير رجلي ومن حقي اخافن عليه جا اخاف عليج 

سارة : يا عزا العزاج ولج كومي 

- سارة اخذيها من كدامي ترا وعلي بطني ما تحمل مصايب بعد .. اخذيها سارة

رقية : لا والله اقلها هو رايدني كدام الدنيا كلها ما اتختلت وياه بالسر واتزوجته .. واطلع وافرفر بالسيارة واجي اسوي روحي اني شريفة . 

-جا ما طوله رايدج كدام الدنيا كلها عليمن ما كاللنا احنا خواته نخطبج ليش راح بالسر تخطبج ؟ 

-ناوي عيني ناوي قابل خايف منج لو شني .. بس جان خايف من سالفة البيت وهسه نحلت وما ضل شي .. 

-سالفة البيت انحلت .. شنحلت قصدج نباع !؟ 

جرتها سارة وكامت بيها

وطلعت 

ضليت صافنة .. ديلا هو حظي بس ناقصته رقية حتى يكملها وياي . 

لهناك اجت منى ورجلها مشو جابولي علاج وضلت يمي .. باتت 

بس ماتو جهالها من الحر .. خصوصا الصبح من ٥ طفت الكهرباء لل٩ الصبح والوطنية ما جتي .. 

كتلها خابري رجلج وروحي 

كالت : لا واعوفج عادي 

كتلها : ما طول علاجي يمي اني اداري روحي اخذي جهالج تأذو خطية وروحي . 

صدك خابرته ودالها اخوه اجا خذاها واني ظليت وحدي .. 

استقريت بالبيت ... اسويلي جدر شوربة وابقى طول اليوم اتريك واتغدا واتعشا بيه .. بس ذبحني الجاي .. ما كاعد اكدر اشوب غير تلث مراتي وميا اخاف اكثر اكثر واتأذى ومحد وياي بالبيت .. 

مر يومين اجتني سهى .. 

ظلت يمي يوم وراحت .. ردت بس تليفوني اتدبره الي وخابرت حيدر ما كاللها التليفون وين حاطه . 

ردت بس اطمن على حازم محد كاعد يجيبلي اخبارة

واني بعدني ما فاتحة خياط عمليتي .. 

كل هالفترة اهل حازم يريدون يعثرون بواحد من من اخوتي 

جعفر مختفي وحيدر ملتحق .. كاموا رفعوا دعوة ..  واشتكوا على حيدر .. وعلى جعفر .. 

الامر اجا للوحدة مال حيدر بسرعة 

ساحبينه من مكانه ومحولينه ع المركز .. وانسجن على ذمة التحقيق 

رقية من درت بحيدر انسجن 

هدت عليه للبيت .. جنت كاعدة : واجتني طبتلي للبيت كالتلي : خليتي صاحبج يسجن اخوووج ماكو وحدة تسوي مثل ما سويتي اتسجنين اخوج بسبب صاااااحبج .. 

كتلها : امشي ولي منا اطلعي .. 

-عود حسبالج يصل بالحبس والله بس يطلع لا اخلي يصلبج صلب والحسين انت ام الزلم ينحبس من وراح بس حتى صاحبج يرضى 

- امشي لج زعطوطة طايحة الحظ ما بقالي غيرج تتصايح وتغلط ولي 

حجيتها وكمت اصيح على سارة .. 

وهي تكلي : والله يطلع ولو طلع الا اخلي يكتلج ويغسل عارججججج يا عار .. يا كح.... 

سطرتها سارة راشدي وكامت تغلط عليها ووهي تتعذر مني 

وذيج راحت تركض لبيت سارة عود تبجي ومتأثرة بالمسلسلات التركية حيل .. 

عفتها وضليت سادة بابي وكاعدة ما ادخلت بشي 

كضيت العشرة ايام مالتي وحدي بالبيت وكوة اكش الغرفة لو انظفلي حاجة .. 

احتاجيت افتح خياطي مال العملية 

واعرف حازم بمدينة الطب كلت اتعنى ليغاد افتح ازرار عمليتي واسأل بلكت اكدر اشوفه لو احاجي اذا جان صاحي لو زين . 

اتعنيت من الشماعية لمدينة الطب 

ونزلت بالمستشفى .. فتحت خياطاتي وضمدتها الدكتورة وكالتلي : الجرح ملتهب لا اتضغطين على جرحج ارتاحي 

اخذت الراچيته منها ومشيت اداور هو وين ما دريت 

كمت اسال اذا واحد عده تمزق بالطحال وين بيا مستشفى بمدينة الطب يخلونه كاموا يودوني منا وارجع منا 

تعبت حيل صارت ب١ الظهر واني ما لاكية مكان حازم 

لحد ما شفت واحد من ولد عمه وتبعته .. لحد ما وصلت .. لكيت محمد اخوه .. جاي ابن عمه يبدل وياه .. 

طلع محمد شافني كالي : خير شعدج جاية 

- ما جيتي اسوي مشكلة بس ردت اطمن عليه 

- انت بحد ذاتج مشكلة ما يحتاج تسويينها وين ما تجين تصير مشكلة وما خلاه هيج وعوقاه غيرج ساعة السودة الشافج بيه فكي ياخة عنج وبحيل الله بس يكوم لحيلا .. يطلكج وينعل والديج 

- خلف الله عليك خوش تحترم .. اني ما جاية اخذ اذن منك حتى اشوفه اني رايدة اتطمن عليه واروح 

- شوفي هنا باوعي لا حسبالج نسينا واخوتج عايفينهم والله بالله اذا ما مشيتي منا هسه وعفتي حازم بحاله .. لا اجرجرج وانعل سلفى سلفاج 

امشي منا يلااا 

- يكوم لحيلا وتشوف منهو اليطلكج 

- كاعدة اتهددين 

- اهددك شني زلمة اني واهدد بالطلاك بس ما يحقلك تمنعني منه واني مرته على سنة الله ورسوله وانت بنفسك شهدت على زواجنا 

- زواجج الجابج لبيته بالسر بدون محد من اخوتج يدري ومن دروه كتلوه .. امشي وعوفي بحاله بت الاودم شني انت ما اتوبين 

- كم مرة تبت وهو الما تاب مني .. وكتلك يكوم لحيلا واحجيلا حجيك هاذ . 

عفته ومشيت عنه هو ضل وراي يراقبني خاف ارجع واتقرب لحازم رحت للاستعلامات وسألت البنية سستر .. كالت : بعده ما اتعدا مرحلة الخطر ووضعة مو مستقر .. 

فعذرت اخوه محمد من صاح بيه 

مقهور على اخوه ومحملني الصار بيه .. من ورا اخواني . 

ما اتقربتلا .. والدر بالجاباني رداني .. 

ورجعت للبيت بجيت نحبت وما يغير البجي من واقعي شي .

ورا يومين ... 

ما احس الا سارة اجتني كالتلي : سهى ع التليفون تريدج 

اخذت الخط منها وكتلها : ها سهى خير ؟ 

- عزا العزاج صبا صخاااام الصخمااااج ولج جعفر رااااااااح .. كتلوه من ورا راسج ولج كتلوه 

فزيت : ادخيلك ربي .. شصاير احجيلي فهميني شكوو 

- ولج لكوا جعفر مكتول بسيارته ولج كتلوه الما يخافون من الله كتلوووووه .. ولج جهاله تيتموا من ورااااج صبااااااا .. ولج مرته ترتملت ولج انهجمت بيوووووتنا الله لاي نطيج . 

سديته منها كامت تدموعي تصب .. 

كالتلي : شنو 

- دا تكول كتلوا جعفر اخوي .. لازم اروح لبيت عمي .. 

- صخام يمه .. لا تروحين لا يذبون حركتهم بيج ولج .. 

- واضل هنا شلون بيه 

- وشتسوين .. قابل انت كاتلته الله يرحمه هو الجاباها لروحه .. يمكن هاي حوبتج بيه 

- ما اريدن حوبة ولا اريد ضيم يوكع على جهاله من وراي .. بس كلبي اسود عليه الشفته منه مو شوية دموعي تجربي واريد انطق كلمة المبري الذمة ما اكدر .. ما فد يوم شفت منه كلمة حلوة ولا يوم حسيته اخوي ويهمه امري . 

احجيها وابجي واني اجرن بعياتي اريد اطلع : صبا اكولن لو ما تروحين واتضلين كاعدة هنا احسلج والله ما راح تخلصين من حجي الناس 

- ميخالف خلي اروحن خواتي والدنيا كلها راح تلتم ولو ما اجيت راح يصير الحجي اكثر .. 

طلعت وياي وسديت الباب وتعنيت لبيت عمي لكيت بابهم مفتوح 

وسهى واصلة كبلي املخه الشعر وكاعد تلطم واتدك على راسها .. اجت مرته كامت تصرخ وتلطم .. 

احس ما جاي ابجي عليه كثر ما جاي ابجي من روحي وامر بذاكرتي اريدلي كلمة حلوة تجمعني وياه ما لكيت .. راح واني كلمة ها خوية شلونج ما سمعتها منه . 

كاعدة بالزاوية وحاطة حجابي على خشمي 

دخلت منى تصرخ وتلطم على راسها وتبجي .. هن مثلي ما شفان زين منه بس اقلها هن ما احتاجنه ولا طاح حملهن عليه مثلي بيوم التطلكت وانذبيت عده وطردني .. فيمكن ما شايلات بكلبهن عليه ومقهورات عليه . 

ساعة العشيرة كلها التمت ابيت عمي .. 

للوحدة الظهر جابوا التابوت فوك السيارة نزلوه بالحوش مال عمي خواتي ومرته كطعن روحهن عليه .. بس الكسرني جهاله ٣ .. بته كاعد تصرخ من كل كلبها وتبجي وتصيح بابا 

رحتلها وحضنتها حيل وكمت ابجي 

بس ما ذبيت روحي على تابوته ابد .. ابجي ع العافهم وراه مو عليه 

ابجي من اذيته وطغيانه وقسوته .. دمرني ودمر عائلته ودمر روحه بتكبره وانانيته . 

الانسان اثر وهو ما خلالي اثر طيب اذكره بيه . 

شالوه وشيعوه وراحو للدفنة .. 

ما رحت وياهم .. ضليت يم عمتي ..

الحجي و الطعن الصار بيه بفاتحته ما ينلبس عليه ثوب 

على ابو اخته انزوجت بالسر وراح كتل الماخذ اخته ب سما مات .. واهله ثارو واخذوا بثار ابنهم وكتلوا جعفر 

طلع هو الزين وهو الراد يصون عرضه 

واني الفالته الما كدرلي .. محد جاب شينه .. ومحد كال وكف بقسمتهز ومحد كال طغى ودمر حياتها وحياة الرادها .. ما طوله االله يرحمه جردوه من كل شيناته ومجدوا بكل افعاله . 

ضليت لحد الليل ما حملت الحجي والكلام الفضيع الاسمعه 

مشكلة الناس ما عاشت عيشتي تحجي بالعيب محمد منهم يكول عن الحرام السووه بيه محد يشكي حالي بس يطعني محد يكول شعاشت واشافت وشسوا بيه .. كلها تذم وتدعي علييه جيف طشرت اخوت واحد بالسجن والثاني بالنجف . 

واني لا كربت اخوتي ولا اذيتهم كل الردته اعيش بس بس ما خلوني .. ما ادري يمكن صدك الي حوبة يم الله وجازاهم بعمايلهم وياي ما ادري .. الله رايد يبليني ويزيد عليه بامتحانه 

عكب الصار بجعفر بعد شلون ارد لحازم .. 

شلون ابقى وياه .. وهو واهله كتلوا اخوي! 

حتى لو رضيتها محد من عمامي وعشيرتي راح يرضاها بعد ما كتلوا جعفر .. طلاكي من حازم صار اكيد وانتهت قصتي وياه كبل لا تبدي .

رجعت لبيت اللي بالشماعية .. 

وبقيت الليل كله انحب وابجي حتى لو شفت وجرعت الصيم منه 

بس هو اخوي وعشت ويا طفولتي ضحكت ولعبت وانجمعنا بفراش واحد واكلنا بماعون واحد .. العشرة ما تهون بكلبي .. 

ارد اذكر جهاله واشبع بجي 

لحد ما طلع الفجر يلا تعبت ونمت 

ثاني يوم الصبح مشيت لبيت عمي .. لكيت خواتي غاد 

ندستني سهى وهي صوتها مطبك : وين رحتي البارحة رجعنا من الدفنة ماكو 

لا رحتي ويانا دفنة ولا ظليتي هنا شجاج صبا 

- وشسوي اروح بدفنته وشعندي 

وحتى هنا مكان ماكو تشوفين واحد فوك اللاخ 

- شفتي النذل التحبينه شسوا باخيج شفتي شلون طفى شمعتنا 

وبجت .. يمه راح الحنين .. راح ابو الكلب الطيب يممممه 

والحجية كبالها تنعى وتكول : اي والله راح المعدل .. 

ويبجن 

ما تحملت كمت من عدهن رحت للمطبخ .. 

هدى جاي تغسل وابنها يبجي ، كتلها : عنج شيلي ابنج واني اوكف ع الجاي و صحونه 

- اي والله ان شل حالي 

بسمرت روحي بالمطبخ اصب جاي واغسل استكاين .. 

ما مشيت ولا كعدت وياهم بالدوانية .. مليت الحجي والكلام .. 

لليل كضينا عشا الناس والوادم كضت والجادر نزلوه .. 

وطبوا الزلم جوا .. واحنا فرشنا بالحوش مال عمي وكعدنا .. 

وضلينا نسمع للزلم 

عمي رافع دعوة بالحادث مال جعفر وكتلنه .. والشرطة مدخلة 

وبعدها تحقق بالقضية .. بس اهل حازم واخوه كلهم اتبروا ومن السالفة وكالوا: مو احنا التعرضنا لحازم ولا احنا الكتلناه 

ولد العشيرة تريد تهد على بيت عم حازم بس جبير العشيرة كاضهم وكاللهم : احنا حذرنا المرحوم من هالعراقب واتفقنا وهو هد وخالف اتفاقنا .. جتلته مو هينة بس ما طولهم نكروا هم التعرضوله .. من نهد يهدون والسالفة ما تكضي .. 

خلينا نمشي ورا تحقيق الجنائي بالقضية ول وكض احد منهم متورط بكتله ذاك الوكت نتنازل ... ونحول القضية فصل وناخذ بثاره .. 

وكامت الزلم تغلي وتتحلف بدمه . 

ثاني يوم اجا جبيرهم وعم حازم نزل عد عمي 

وتبرى من الحادث كله وكاللهم : ابنه ذاك وينه بالمستشفى بين الحيا والموت واحنا لو نريد نهد ما نرفع قضية و نسجن حيدر خوبن نندله ونتربصله ونكتله .. ما سويناها بحيدر نسويها بجعفر تهمتكم هاي مردودة عليكم 

جبيرنا كال : الحكم يضل للتحقيق شيكول التحقيق احنا ورا .. 

لو اتبين توريط واحد من ولدكم بالسالفة ناخذ ثارنا منه ولو ما تبين شي .. الحكم لله هو الياخذ حكه يوم الحساب . 

بس احنا النا وياكم حچي .. 

عدنا بت عاكر ابنكم عاكدر عليها عكد شرعي .. واحنا بعد الدم نشف بينا لا نطي بت ولا ناخذ منكم النريده طلاك بتنا منكم 

كاله جبيرهم : طلاك بتكم تاخذوه مني .. واحنا النسعى بيه كبلكم ..... يتبع