وكفة العبرة ببلعومي ... خنكتني خنك 

: بس لإني غريبة ! 

- ما عدج فعل واحد يشفعلج عدي 

هزيت راسي وتنهدت بحسرة 

كوة نطقت ( شكرا انتظر طلاكي ) 

انداريت اريد اطلع .. حجه : صبا 

رديت اباوعله .. 

ما حجه .. باوعت بعيونه .. ما يحطهن بعيني .. تنهدت

حجيت : لا تطلعين .. لا تعوفيني .. خليج يمي .. كولهن كلش محتاجتهن والله بلياك يتيمة والحسين .. 

تقربت منه اكثر وكتله : كلي لا تعوفيني مشتاقلج سمعني كلمة حلوة تعوضني عن كل الحجي والطعن السمعته الايام هاي كلها .. 

كمت احجي والدموع يطافرن من عيوني بحركة وبسرعة 

والحلك والايد ترجف كامن من القهر والحسرة البكلبي 

- ياهو الاذاج 

- اذا ع الطك والجسد محد كاضاني واذاني 

بس بالحجي حيل اذوني .. حيل 

احفر بالحجر حتى اعيش بشرف 

تالي يجي الما عاش من ايامي يوم يعلج بيه بحلكه ويكول عني اليعجبه 

اني مو زينة .. مو راحة .. ام الزلم .. 

من وراي تكاومت العشاير .. ومن وراي اخوي انسجن .. ومن وراي جعفر انكتل .. وذنبي اني بيهم كلهم بس محد يحجي ذنوبهم بيه محد ينطق كلمة حق ويكول شسووا بيه !؟ 

تعبت من ظلمهم ومن اكول تعبت يكلولي الج عين تحجين 

- ديري بالج على نفسج .. وفكري زين قبل كل تصرف .. نص مصايبج من تسرعج و قلة ادراكج .. واتمنى ترتاحين ويا عدنان ما طوله احسن مني . 

استغربت - يا عدنان !؟

- بسرعة نكرتي العايشة وياه سنين 

حجاها وهو يتجى ع العكازة ويكعد 

- واني ياهو ماتي بعدنان وشجابه بنصنا

ضل يباوع عليه : لا احجي ليش ساكت .. عدنان شنو 

- تليفونج وين !؟ 

- هذا عندي .. ليش !؟ 

- الله كريم 

- شوف اني غبية جديات صدك والله غبية تدري ليش ؟ لان بمجرد ما كتلي صبا انداريتلك .. اتوسل الحجي منك ليش .. وانت ياهووو كلك خلك واحد مو بكد كلمته ... شهرتني وفضحتني بين اهلي وناسي من انت مو كدها تورطني وياهممممم ليييش جان عفتني 

- اجيتي ليجاي رايدة طلعت حيدر لو تعاتبيني ، اذا على طلعت حيدر اطيتج كلمة اتنازل عنه واذا بالعتب مالج حجاية وياي 

- ولا اريد احجي .. انت بكبرك ما تهمني حتى احاجيك .. اصلا اني طكت روحي اكبر بناس ما تسوى .. كل واحد بيكم كبرت راسه ما طك غير عليه . 

روح خليهم يفيدونك 

بالعافية عليك وعليهم 

بس تدري جان المفروض من رحنا للشيخ ووكفنا ابابه للطلاك يوم عقدك من وفاء .. نطب ونطلك وكلمن يروح بدربه .. اني الغبية التراجعت وانخدعت بيك ... مو كدها .. 

مووو كدها 

يحجيتها ودفعته بحركه

كض ايدي : احترمي نفسج 

- محترمه وعلى اخر احترام .. بس هسه اريد تودي وتجيب شيخ يعقد طلاكي .. ما اريد اروح وهم تعوفني معلعلة وتلعب عليه . طلكني هسه يلا . 

- اي اريد تليفونج 

- اني وين احجي وانت وين تحجي .. شلك بتليفوني .. احاجي اللي ايرده واحجي ويا اليعجبني .. اطلكني هسه 

- اي انطيني تليفونج وراح اسويلج كلشي تريدين لا تلبكين .. انطيني 

جريت ايدي بجيبي وكتله : هاك يلا .. اشوف شتريد بالله 

باوعه : مو هذا مالتج القديم التخابريني منه 

- ما عدي غيره 

- ذاك وينه 

- حيدر خذاه ... ليش بالله وشتريد بيه ؟ 

ضل يباوع بوجهي : شوكت خذاه حيدر 

- من ساعة الحاجاك وخذاني للبيت بعد ما اطانياه 

- ومنيلج هذا التليفون 

- مال منى بس سيمكارتي القديم جددته بعد اكو تحقيق ثاني ؟ 

- يمتى جددتي 

- . ما ادري شوكت بس من ورا السبعة مالت جعفر .. ليش 

- عد منو حيدر عايف تليفونج 

- اكلك انت شبييييك اني لو ادري عنه اخذ هذا الطابوكه 

- رسايل جانت توصلني منج ومستمرة انكطعت من فترة 

عقدت حاجبي : تليفوني ضايع 

-جا من اكلج تليفونج وين تكليلي هذا .. هذا مو تليفونج 

- اكلك انت لا تصيح هذا تليفوني الجديد شني مو تليفوني 

-جا اليراسلني ياهووو 

- واشم ايدي خو لو اعرف اروح اخذه منه اخير من هذا الطابوكة بس حيدر خذاه .. ولو هي ضلت ع الموبايل ما خلا شي ما خذاها مني .. ابشرك البيت باعه وقبض فلوسه وابو البيت اطانا مهلة اسبوع اذا ما نفرغ يشمرنا برا 

- وجاية تطلعينه ليش !؟ 

ولج انت شنو من دماغ عدج .. ماخذ الكدامج والوراج وجاي السانج هالطولة  علي تريدين تطلعينه 

- جا يذبونا بالشارع !؟ 

- هو بالسجن الفلوس وين 

- شفتك ما شفتهن اليوم جنا عده بالسجن يكلي اذا ما تروحين وتقنعينه يتنازل فلس احمر ما ادلي .. الا اطلع 

- خاطر هم يطلع وهم يلغف الفلوس وانت شوفيلج صريفة اكعدي بيها مو .. انت بعقلج جاية وتتنخيني اتطلعينه 

- جا الزلمة راح يذبني اني والجهال بالشارع وين اروح !؟ 

- يا جهال ذول 

- جهال جعفر ومرته كاعدين عدي 

- عدج وانت شني بويه ؟ 

- حجيت ما يرضون يكلولي الج عين تحجين 

- وياهو الكالج هيج 

- عمي اكو غيره 

- وعمج جان وياج من رحتي احيدر للسجن وكالج روحي لحازم قنعي يطلعني 

- وعمي صاف وياه يكلي روحي قنعي كتله جا ما تفضها وياهم بالعشاير اني شني اروح الهم وهم بس يطردون بيه 

يكلي ياهو العده يطي فصل هو مو بعده وجلج وما طلكاج وعاقد عليج .. روحي قنعي 

- وما تعرفين تكليله من تكول رجلي وعاقد عليه بيش تاهمني .. لو بمصلحتهم روحيلا قنعي .. وتسقط المستحى والكرامه بس من اطلبج تشتغل كرامتهم وبتنا وكرامتنا . 

- اكلك دوختني .. هو اني لو حجيت ياهو اليسمعلي غير احصل دمغة ويسكتني .. هسه شني ؟ 

- ارجعي وعوفي السالفة يمي 

- سالفة حيدر ! 

- اني احلها 

- ولو طردونا من البيت 

- بيتج موجود 

- وينه موجود اكله باعه يكلي موجود 

- هو دماغج هذا سبب مشاكلج بالقران . 

- اكلك جا لا تغلط 

- دمشي .. واني اكضيها 

- شلون 

- يمي مالج غرض من اكلج شلون تنعلين جد السالفة 

- اي عاد انت ابو عقلين شوف وين وصلتنا 

-من وراااي ! ؟ 

-هسه اكلك عوفنا من هاي كبل لا اروح ..  انت صحيح تريد تطلك بس كبلها شوفلي سالفة اسعد هم اتفق وياه خلصني منه

عقد حاجبه : شماله ؟ كون حاجاج 

-يكلي اريدن فلوسي كاش واني مبتليه والله ما عدي من وراك الدكتورة بطلت منها منين اجيب ؟ 

- ابن القندرة هاذ مو يعرفج مرتي شلون يحاجيج واني جاي اوفي كل شهر بشهره فلوس اقساطج 

- يريدهن كلهن فد دور ما يريد قسط 

- اطي نعل اني متفق وياه اقساط كلهن شنو .. يروح ياكل خ* 

ولو عليمن اني اروحله واوكله بيدي 

- ما ادري .. بعد اروحن لا تغرب الدنيا .. اكلك 

يعني سالفة حيدر شراح تسوي !؟ 

- مو كتلج يمي 

- راح تضل ابيت محمد !؟ 

- ليش شرايده 

- لا هيج بس اسأل يلا اروح 

- اوكفي 

انطيني المحفظة ذيج من يمج 

اطيتهياه شال خمسين واطاني : هاج والسحب اني اخلي شرف ياهو اليكدر يروح هناك على ما اكدر اوكف على رجليه 

- مو تريد تطلكني ليش جاي تنطيني مصرف 

- امشي لج ام السان من كتلج روحي وطلاكج يجي وراج كمتي تغردين وتلعلعين كله حتى ما تكولين لا تطلكني بقيني 

تقربت من عنده هو كاعد خذيت وجهه بيدي وكتله : لان ما اعرف امشي خطوتين بدونك لا يغرك طولي وكبري اني شما تجرى عليه الدنيا لا اتعلم ولا اخذ درس منها ، انت الوحيد من كل الناس الداير ما دايري يفكر عني ويعرف يوجهني صح كلها تستغلني 

- من تعرفيني بس اني الوحيد الكاتل روحي على مصلحتج ليش ما تسمعين الكلام ؟ 

- اني خفت عليك وطلعت ومن طلعت عود اتذكرت اخابرك وخابرت ما ادري هو هاي طريقة تفكيري شلون اعصره واطلع بغير تفكير .. اتسرع وما اعرف ادير امري .. ليش اكلك لا يغرك شكلي اني جاهلة ... وانت مو رجال .. لا 

دفعني : جا مرة بتل بتل 

طكيته على راسه : لا تقاطعني 

ورجعت راسه لحضني : قصدي انت بالنسبة الي مو مجرد رجال .. اني اشوف بيك اهلي كلهم  الحنية الما لكيتها باهلي .. لكيتها بيك ... رزلني صيح عارك بس الله يخليك لا تعوفني اني من بعد الله مالي غيرك 

احجي واني حاضنه راسه لصدري  ومدنكه عليه .. متجي راسي 

سحبني وكعدني على رجله الثانية : اسايرج من اكول اطلكج لو رايدها ما يمنعني عنها شي من وكت العمام والعشيرة كلها كالتلي عوفها .. انت مو حبيبتي انت روحي البين اضلوعي .. ما تنشلعين ولا تنزاحين 

- ليش لعد تركتني الفترة الفاتت كلها 

- والله بسبب الرسايل تعرفين كمية الفشار والغلط الاجاني من ساعة الفتحت عيني من العملية 

- اني افشر تعرفني ما افشر 

- هذا السودني .. تغلطين وتفشرين وتكليلي عدنان اشرف منك واحسن منك 

- يا والله ما كايلة 

- شكيت مو انت بس هم شكيت انت لان انت السانج وياي رشاش رغم غمة ويا غيري بس مشكلتي احبه حتى لو ما بيه خير 

- بس لا حازم والله اني ما دازة رسالة .. اصلا ما جان عدي تليفون ومسوية عملية ما اكدر اجيك واتعنى من اجيت افتح خياط العملية ردت اشوفك .. طردني محمد 

- عمليتيش 

- ضربت عندي المرارة 

- عمت عيني صدك تحجين 

- اي والله شالوا الي ولو تشوف حالي حازم ابو العمليات يصيح باسمي يرد احد يستلمني محد اكو .. وذبوني بالمستشفى محد درى عني لحد ما طلعت ورجعت كعدت بالبيت اداري روحي بروحي 

- شوكت هاي 

- من شفت اخوتي طكوك كمت ابجي واصرخ وفحطت حيل من القهر ما اتحملت مرارتي طكت 

ضل يباوع بوجهي 

اخذ راسي باسني وهو سمتغرب وهو يكلي : انهدم حيلي اي والله .. مسوية عملية واني ما ادري !؟ 

حطيت راسي على جتفه بدون كلام رجع باوع عليه : كل هذا صاير وياج 

- ما همني هذا بكثر ماي طردوني منك اني من قهري عليك مو بس صحتي روحي كلها انهدمت .. بس محد خلاني اشوفك وابرد كلبي بشوفتك 

كاعدة على رجله احجي .. 

طبت امل .. تعدلت ووكفت وهو كمل ما كأنها دخلت : لا تروحين للبيت غاد يولون 

رجعي لبيتي 

-يا بيت

حجت امل : يوم الكلت راح اطلك وما اريد واني اطلك .. اشوفك بس اجت يمك لفلفيتها بعبايتك 

- بيتنا يا بيت 

- مو مرت جعفر والجهال مناك 

-وانت ياهو ماتج بيهم 

فاتت امه على صوت امل .. كتله : غير اجو يمي 

حجت امه : شني تطلكها لو لا 

اندارلها : ها يمه 

-شها ؟ يوم العلم دخلوا خل اطيح حظها 

ابتسم : لا هيج سوء فهم اني جنت فهمان غلط 

-شنو الفهمانه غلط كسرتك لو حالتك هاي 

-هسه اوكفي يمه ، صبا مرت جعفر شعدها يمج بالبيت 

-شدا اكولك وكت الحجي اني كخة وبالمسؤلية ماكو غيري 

- وليش اتقبلتيها 

-قابل اطردها 

-وما عدها اهل خل تحسب بعدج بالصريفة الذباج بيها رجلها وين تكعد ؟ 

- ما اكدر اقيس الامور هيج اهلها ذبوها .. ويضلون الجهال خطية مالهم ذنب ما يطيني گلبي 

-اي عاشت ايدج لفيتيهم هاهية عوفيهم بالبيت وتعاليلي .. اني خو محتاج اكثر بدال ما ضال على كلب محمد خو انت اداريني 

وما طولهم كالولج روحي قنعي .. 

تكلين لعمج اقتنع بس كالي تجين اداريني وتبقين يمي .محتاج احد يداريني 

- خابره لعمي انت ما تكدر 

باوعلي : سهلة دروحي للبيت وجيبي هدومج وغراضج 

حجت امه : جا شتفقنا احنا حازم احاجيك يمه انت تحجي صدك يو اتغشمر 

- شني يمه 

- شني صالحتها ورديتها لذمتك 

-واني مطلكها حتى اردها ؟ 

- وحجيك ويانا وويا عمك 

قاطعتها وكتله : بعد انت خابر وشوف اني اروح 

محتاج شي 

حجيتها واني اكض وجهه وادنك ابوسه بخده اسلم عليه 

اندارلي وهو يكلي : محتاجج رجعي حتى ارجع للبيت متكسف هنا 

- خدامتك يگلبي 

ابتسم و هو يكرص خدي 

امل طبت جوا ضاجت .. وامه كامت تحجي 

عمت عين الدنيا الخلت الغبرات يديرنك ويغيرنك ولك صالك شكثر تهوس وما اريد وراح انهي موضوعها تاليتها مرتك عصرية فرتك فر وتختخيت الها — يهنيالي

عدلت عباتي واني احاول اخفي ضحكتي منها 

وهو كض بيدي متبسم من حجي امه وكال : عينيني اطلع طكت روحي هنا خنكة 

- بعد حيلي 

كضيته وساعدته يوكف لحيله وحصطيت العكاز بيده .. 

وكام يمشي وياي ويتجى عليه للكراج .. وكفت بالكراج .. ترا حقهم 

حجيتها واني اعدل بياخاته : سالفتي سالفة الراحت تجيب حق اختها ردت حبلانة 

كهكه يضحك وهو يباوعلي : روحي ورديلي بسرعة 

كضيت وجهه اعت بيه واشاقي واني اكله : اتطلكني مو .. تكدر 

- حركاتج يمعودة ترا جوا هن .. 

رجعت لزمت وجهه اقوى : تخاف منهن ؟ 

- من عيونهن بعلي يطكنه عين يخلنج للصبح الدمع والخني* وصياحج واصل لذاك الصوب طلكنيييي اكلك طلكنييي 

ضحكت .. وتنهدت

 تثق بالله لو كلتلك الضحكة ما مرت وجهي من يوم الاجيت منك وليجاي .. الدنيا بدونك ما تسوى اضحكلها .. ما تنجرع مرة 

- شوفي اذا بقيتي بعد دقيقة وحق هو علي ابن ابي طالب ما اخليج تروحين واخذج للبيت واقفل عليييج والله

ضحكت : لا لا اروح

حجيتها واني ارفع رجليه لطوله حتى ابوسه بخده 

- عوفي البيت نعلت ابيهم امشي لبيتنا 

-لا لا هههه والله اجي بس خل اروحن وارجعلك 

طلعت وهو ساند عليه كالي : اصبري

صاح : يووووونس 

-ها عمي 

-ابوك وين 

-جوا 

-صيح احمد اخوك كله عمك يريدك 

واشر لواحد من جهال محمد كاله : جيب السويج كل لامك من جوا 

-شنو انت توصلني !!! 

-لا اخلي واحد يوصلج بسيارتي  شيوديج وحدج تتعبين 

ابتسمت واني اعدل عباتي 

شكد حلو شعور المرة التلكى رجال يحبها ويهتم لامرها ويشيل حملها عنها فجأة من حمل عجوز تصير مثل الطفلة وياه . 

اجا ابن ابن عمه .. كاله : ها عمي 

- هاك السويج وصل شسمه 

باوعلي .. لا ساعدني اركب وياك نوصلها ونرد 

- يلا 

- بس على كيفك سوق 

ساعدته وهو يمشي صعد بالصدر 

كعد واني ورا حجيت : انت وامل زعلانين

- ويا يوم تصالحنا خاطر نتزاعل .. سالفتي ويا امل انتهت .. والا اني لو عدي مرة برأيج اضل ابيت اخوي لو اروح ارتاح واحلل ابيتي 

- جان خابرتني حازم .. اني كل ما اجيك يطردون بيه وحسبت انت راضيلهم هالكطعت بس لو ادري بحالك هيج لو مو اهلي وعمامي واخوتي والله لو يصيرون دم اجيك واكعدلك جوا رجليك 

- الله يبارك بيج بويه .. بعد شسوي اني والله العلاج الاخذه والوجع الامرن بيه والرسايل والغلط الوصلني من رقمج .. خلاني انسطر وانعل الساعة الشفتج بيها 

- تشوف الف شيطان يدخل بيناتنا بس نندار واحد عن اللاخ !؟ والله انت هذا حالك واني اردى واصعب ..

- تنحل ان شاءالله احلها 

حجاها وجر التليفون من جيبه خابر على عمي 

كاله : الله بالخير ابو يوسف 

شلونك يابه 

الله يسلمك ولو متأخرة .. مرينا من الموت وما كلتها 

عوف صبا وعوف كلشي حجي انا وياك بالذات جورة وعشرة عمر ابوي جان يحطك كبل خوانه 

.. اي والله .. الله كريم تنحل 

اي .. ان شاءلله 

حجي جتني صبا .. اي رايدتني اتنازل عن قضية حيدر 

اي .. سكت شوية رجع كمل ... لا احنا اهل ان شاءالله بس حجي حيدر ما اتنازل عنه لا ما ينطيني فلوس البيت مال صبا بيدي .. يكول ما اطي والا تطلعوني ويحاول يتلاعب وياي .. احط ايدي ع البيت ما اطلع مرتي .. والبيت بيتي واخلي الزلمة يكاومكم على بيعة البيت .. لان انتم جبرتم مرتي تبيع واني ما موجود .. والبيعة باطلة .. واخليهم ياخذون فلوسهم من عيونه .. 

يكول لا احلها بالتراضي ويرجعلي حق صبا ويطيني فلوسها 

يا دار ما دخلج شر من عين باجر اني اتنازل و اخلي بحال سبيله يضل اخو المرة وصار اهل هم ما ارضى اخذ البنية واني ساجن اخوها 

اي اخذها واني متفق وياك والصار ما يغير من اتفاقنا غير تنلغي سالفة الزفة والبت ترجع للبيتي .. ما اثق تبقى عد احد بعد عكب الصار 

لا اني ما حاجي بالطلاك ولا جايب سيرة الطلاك 

و لو واحد من العمام حجاها يحجي من كيفه المرة مرتي واني رايدها وما طولك دازها عليه تقنعني خاطر اطلع اخوها .. اني حجي ما اشغلها مرسال ولا احط مرتي بسوالف زلم وتسمحلي ما ارضى تطب سجون وتحجي ويا اخوها لهذا اني متوجه اجيب غراضها وتتحول يمي 

اي .. اي 

كام يحجي ويكول اي يستمع 

كاله : ما نختلف .. اكمل شغلي وامرلك 

سلامي للولد والاهل مع السلامة 

سده من عده 

وحجه : علاجي يمكن نسيته رجلي هاجت علي 

- تعرفه حتى نشتري 

- لا والله 

- شكالك عمي 

- خليته يحجي حتى يكول .. بس سالفة انتقالج اليوم كالي نتفق عليها .. 

- شلون يعني نتفق ؟

ضل يباوع كدام ما جاوبني، حچه: - احمد ديرلنا السيارة وخلينا نطلع ليه نكضيها ونعرف شنهو اتفاقه . 

اندار احمد وتوجه للداخل .. 

وصلنا لبيت عمي .. نزلت اني وهو فتح الباب كضيت ايده 

عمي من شافه من الدكان اندار وطلعله .. كاله : هلا ومرحبا .. هلا بابو علي 

- هلا بيك حجي 

سلم عليه وعمي يكله : الحمد لله على سلامتك والله يا عمي ما ردنا الصار كله بس بعد .. 

- الحمدلله على كل حال 

- تفضل تفضل 

- زاد فضلك 

احمد وليدي اركن السيارة وابقى بيها ما اطول 

رفض احمد يكعد بكعدته حتى ما يوصل الحجي لهناك ويختلط عليه .. كضيته واني ادخله وهو مرتجي عليه .. وعمي يسوي مجال 

كال : فوت فوت 

فات وهو يكلي : اصبية بويه ماي للزلمة 

- اي عمي 

رحت جبتله مي وعمتي تكله : شني شصاير ولج امس يحجي بطلاكج 

- من شافو طلاكي ما يفيدهم ومالهم نفع بيه .. حطوه ورا ظهورهم .. بس اكولن بلكت الله ترهم يا عمه وافتك من ضيمهم 

- يا الله خايبة هيج والله يندارلج سبع فدوات اغديله

خذيت المي ورحت لعمي كاعد وياه .. حجه : كعدي بنيتي 

فتحت حلكي ياهي هاي بنيته ؟ 

مساعة يدمغ على راسي ويكلي روحي قنعي خل يطلع اخوج وذاب حمل الدنيا فوك راسي .. شو فجأة صرت بنيته ! 

صبيت مي لحازم اخذ من ايدي وباوع بعيني .. 

ابتسمت .. شرب المي وكال : سلام الله عليك يابو عبد الله 

مشكورة بوية 

اخذت منه وكعدت على صفحة وهو اندار لعمي كاله : كتلي نتفق .. واني اكول خير البر عاجله لهسبب اجيتك. 

كام يحجي وياه بسالفة حيدر وساومه ما يتنازل عن القضية الا يرجعلي الفلوس كلهن .. لو يحول القضية عشائرية ويطرد الشراي ويكله روح اخذ افلوسك من اهله . 

عمي جر بوش من سوالف حازم 

هو ما يريد يدخل بسالفة حيدر حتى لا تصير عشائري ويطي فصل يروح يتورط بسالفة ال٦ ملايين 

وبقى يحاجي اني صافنة بيه تنهدت 

شكد حلو شعور الواحد عنده سند بالحياة ويدافعلك وتهمه مصلحتك ويكاوم ويحجي ويطالب كأنما حقه مو حقك .. 

اني لو ضيعت حازم وين الكى مثله !؟ 

رد على سالفة انتقل يمه عمي كاله : صعب والله ابو علي 

ما تعرف الحجي شكثر صار اصبر علينا خلها بس تطلع اربعين اخوها فد شهرين على وفاته عود بعدها سويلها زفة واخذها من بيتي مكبعة .. الحجي السمعنا والنام اعلى افادنا ثكيل من ورا هالسالفة ولازم تصم حلوك الوادم بزفة يسمع بيها الجبير والصغير 

بس انت لا محتاجها خو هي مريتك وانت عاقد عليها تروحلك اتداريك وترد لبيتها كلها فترة وتكضي 

- هاي هيه الك .. كلامك صحيح لازم نسد حلوك الناس عنا ونطوي هالصفحة .. بس مثل ما كتلك انا بوضعي هاذ محتاجها محد الي وتعبتني الكعدة ابيت اخوي . 

- خير ان شاءالله 

اشرلي اكومه فزيت كضيت ايده وعاونته 

كام وياي كالي : ظلي هنا بس امر على اسعد اشوفه خاطر احاجي 

- ماشي 

راح بالنص ساعة ورجعلي .. خابرني كالي : اطلعي يلا بالباب 

طلعت .. واخذني للشماعية ، كتله : هسه شني بس توصلني لو اجيب غراضي واجي وياك لو شلون 

- لا جيبيلج بس ملبس يوم واحد وتعاي وياي اليوم .. لليل شوف اخلي منو يوصلج 

- هو شضل الدنيا مغرب !؟ 

- ما جاوبني 

عرفته يريدني اجي للبيت .. 

والصدك اني هم رايدة كلش مشتاقتله ومشتاقة اكعد وياه عودين كم ساعة وارد للبيت 

دخلت البيت شهلاء كاعد تغسل بهدوم ابنها .. 

كتلها : محتاجة شي اني راح ارجع بالليل 

- جا شني جيتج وشنهي روحتج 

- من ارد احجيلج الصار كله .. هسه خليني اروح محتاجة شي 

- حفاظات اذا تكدرين بطريقج 

- هسه اجيبلجياهن وبعد 

- هاهية مشكورة 

طلعت حازم كاعد ينتظر كتله : بس اروح الاسواق 

مشيت ليغاد .. 

دار السيارة واجا صف كبال الاسواق اني خذت الحفاظات حازم نزل ووكف بكازته كال : المن ذني 

- لابن جعفر 

حجيتها وحطيت كال : ادفعين لو احسبه ع الدين 

- لا لا ادفع 

حجه حازم : شكثر عليها دين افتح سجلها 

حجيت : لا هو اني رايده اصفي ما اطول اطيتني 

- مصرفج هذا 

حجاها وباوع للولد .. ويا الحفاظات ذني يصير عليها ٢٣ الف 

اطاه خمسة وعشرين وكاله : سد حسابها واطيني باكيت جكاير وعلج ابو السهم يرحم اهلك 

ابتسمت باوعلي وكال : استعجلي وصليهن وتعاي يلا 

رحت ركض اطيت الحفاظات وطلعت لكيته كاعد يركب وكوة يتجى على عكازته .. ساعدته وصعدت 

خذاني للبيت ماله ودخلنا اني وياه 

كالي حطيني ع التخم .. كعدته ورحت جبت مخدة وجرجف كال : عوفيهن وتعاليلي 

اخذني بين رجليه وكعدني على رجله الثانية الزينة 

كتله : شسويلك عشا 

- عوفي العشا خليج يمي مشتاقلج حيل والله 

- حضنت راسه : واني هم والله 

باوعلي : احجيلي بالتفصيل شصار وياج بالعملية 

ردت احجي كال : لا بس جيبي دوشك خلي امدد 

رحت جبتله واجيت وساعدته وكعدته ورجع ضهره وفتحلي ايده ... نمت فرد فراش وخليت راسي على صدره .. افيششش من شميت ريحته حسيت بريحة الجنة .. شكثر ارتاحيت 

باس كصتي ورجعني على صدره وهو داعب شعري ويسألني ع العمليه واسولفله .. كلشي بما انزل .. 

وجريناها سوالف يابو سوالف لحد ما سكتت وبس ضليت صافنة وراسي على جتفه .. احس محتاجة هالشعور اشبع منه واعوض ايام التعبت بيهن كلهن 

كمت ابوس بجتفه بزنده بصدره 

ابتسم .. ضحكت : بس مشتاقتلك 

- ايام وتجين ليجاي واصير انا والبيت وكلي تحت امرج 

- اروحلك فدوة .. بس امل شنو سالفتها 

- بيوم الطلعت من المستشفى هي جانت  تدري بطلعتي ورايحة للسوك تكول كلت اكضي كم شغلة وردت ب١ تعاركنا ومثل كل مرة شحتتها وضليت عد محمد 

- جان خابرت عليه .. جان اجيتك ركض 

ما جاوبني بقى يغمض عيونه ، حجيت : متأذي ؟ 

هز راسه ( اي ) 

خل يجيبولك علاجك 

حجيتها واني اكوم 

كضاني : لا تكومين ، بس خليج يمي 

رجعت راسي على جتفه وغمضت .. شو بس غمضت مثل الجوعانة نوم بسرعة غفيت .. 

نمنا اثنين غير على تليفون اخوه .. رد كاله : شني وين انت 

- نايم يمعود كول 

- نايم ! وين نايم ؟

- ابيتي 

- وياهو اليمك 

- الاهل 

- صدك تحجي حازم انت لو تجذب 

- محمد هسه مفززني من نومي حتى اجذب عليك .. دكممم 

سداه وطفاه وذباه 

كتله : دهر الساعة ١٢ بعد شياخذني للبيت 

- طفي الضوا وغطينا بردت .. 

كمت .. طكيت الباب قفل مال الدوانية و المطبخ .. 

ورجعت عدلت البردة ع الشباك لان مكيف معلوك و الجام صفحة منه مكسر .. وجبت غطا شمرته ورجعت للفراش ما كلت باطل جريتها نومة للصبح جني صالي شهور ما نايمة . 

كعدت الصبح هو نايم .. والكهرباء طافية 

دخلت سبحت وخليت الجاي ع النار وسويت ريوك .. 

صاح : ريحة چايچ  تجيب التايه وتفزز الميت من گبره 

رحتله مبتسمة وهو يمدلي ايده : جايكم زين 

- صارلي عمر اجيبن منه ما طلعت ريحته هيج 

- مو غير هيل حطيت 

كومته انتجى ع القنفه وخذاني بحضني : شكثر مشتاقلج ولج 

-مو بكدي والله الود ودي اصفطك واحطك بكلبي 

ياااا الطماااطة 

ركضت للمطبخ كض عكازته وكام يمشي للمطبخ وراي 

: اخ شكثر مشتاك لهاي الاجواء وياج 

خفت اموت واني ما شابع منج

- اسم الله حازم لتجيب الموت 

- ما راح اموت وراح تعيشين وياي لحد ما اشيب واتقاعد وانام على كلبي 

- هههه عساك دوم نايم على كلبي اكو احلى منها 

هيج وافتك من اهلي وضيمهم وبلاويهم ينرادلي بخت 

- خلصتج من واحد والباقين سهلين كلهم اكص السانهم عنج 

عقدت حاجبتي : خلصتني من واحد ! 

منو هذا الواحد 

ابتسم : الجاي لا يحترك 

باوعت طفيته .. وانداريتله : الك ايد بكتلة جعفر .. حازم !؟ ... يتبع