باوعلي : انا ياهو ماتي 

حجاها وكأنما ديضيع بسرعة ردف كلامه : دخلصي خلصي الريوك من امس ما ماكل وعلاج ما ماخذ 

ضليت اباوع عليه :- حازم عليك الله كلي انت مالك غرض بالصار 

- اهووو شبيج صبا دعوفي السالفة هاي شجلبتي 

-يا يمة تكلي دعوفي .. يعني الك ايد بيها 

- يا ايد بت الاوادم من انكتل اني مو بالمستشفى وحالتي حالة 

صفنت اتذكرت صدك من انكتل جعفر هو جان بالمستشفى واهله حلفوا .. ما الهم ايد بكتلة جعفر .. 

كمت اكمل الريوك واحط بالصينية وهو منتجي يمي واباوعله .. كلبي ما اطمن .. حطيتله الصينية وكتله : عليك العباس ما داز احد ولا الك ايد بسالفة جعفر 

- صبا كافي 

- هسه بس احلف 

- واحلف ليش خلي ناكل براحة لا تزقنبينا 

- لو بري منها جا حلفت بسرعة عليك الله حازم لا تاكل كلبي هيج 

- صبا انت ياهو مالتج الكتلته والبقيته 

- يعني انت 

- ياهوووو اكلي ولا تدخلين بامور ما تخصج 

- ما تخصني شلووووووون حازم المكتول اخوووي 

- واخوج كتلني وذباني بالسدة لو ما خوف حيدر شوية وفتن بمكاني لجبيركم جا هسه انه الجلاب ماكلة لحمي 

- بس ما متت وانت كمت بخييييير 

- بس هو موتاني 

- وكتلته ! صح 

- اكلي 

- حازم يا برود كلبك كاتلك بشر وما مهتممممم حازم عائلته تيتمت وصفت بالشارع وانت ما مهتمممم 

- هو عنده عايلة واني شعدي حصوووو ؟ ما عدي بت وولد لو متت ياهو اليلفيهم ويدري عنهم امهمممممم

- وحللت كتله ! 

- اكلي صبا 

- حازم اللي كاتله اخووووي 

- ما كتلته

- بعدك تنكر انت اعترفت وكلت لو ما كاتلة كاتلني 

- حياج يعني حقي .. هذا الزلمة هدد حياتي ومنين ما جبته عاركته هددته بالعشائر بعدته ما انرد وموتني لو ما رحمة الله تريدين اتركه خاطر لو كعدت يا كاتل يا مكتول ! 

- وليش ما اشتكيت عليه حاله حال حيدر وسجنته كتلته لييييش 

- ما سويت شي جان طلعتيه مثل ما جاية تساوميني وتطلعينه ويا بو زيد جنك ما غزيت 

كمت من مكاني : ما اصدك يا برود دمك كاتل بشر و هادم بيت .. وما مهتم ولك جهاله ضاعو تفتهم شنو ضاعوووو 

- هو الضيعاهممم انا ياهو مالتييي 

- انت كتاااااله حازم 

- لا تصيحين صبا .. واكعدي 

- اكعد ، انت تريدين اكعد وكاتل اخوي 

- خوتيش بالله عليج تسمي اخو 

- ابن امي وابووو حازم لو شما جرى عليه ما هانت عليه يوم اذيته شلوووون ارضى بدمه 

- الله بقرانه يكول وقاتلوا الذين يقاتلونكم وهذا الرجل سعيت لحد ما مليت خاطر ابعده عني وعنج وما انرد .. هو اللي ما هدنا بحالنا .. هو الغلط بينا اني ما غلطت بيه .. وباسم الدفاع عني وعن عائلتي تخلصت منه لان اخوج نذل لا صاحب دين ولا صاحب موقف ولا هو عشائري خاطر اكضه .. ما امن عليه لو ما كدرلي يكتلج لو يتعرض لولدي لو لبتي لو لاهلي .. هذا الزلمة هو الما حفظ روحه .. وتعدى حرمتي وحرمة بيتي واخذج من نص بيت عمج حتى يكتلج بيا طريقة اخلص منه ! 

- وهيج الكتل سهل وتخلص منه 

- ما كتلته 

- ياربي حازم لا تخبلنييييي انت جاي تكول بنفسك كتلته .. تنكر ما كتلته شلون 

- هذا اللي صار تصدكين تصدكين ما تصدكين بكيفج .. وهذا الموضوع بالذات ما ارضى ينفتح لو ينجاب طاريه كدام كائن من يكون .. ولو انفتح .. معناها كتبتي نهايتنا اني وياج بيدج . 

حجاها وكام يحاول يكض حتى يكوم 

عفته ومشيت منه رحت للهول .. دموعي كامت تجري .. اديه ترجف 

كاتل جعفر وحتى ما مأنبه ضميره ! ولا حتى مهتم .. شلون الواحد يكدر يقسي كلبه هيج اني ويا كل السواه جعفر لو احد كايلي شخطي ما ينطيني كلبي .. انطاه كلبه يكتل شلوون 

كاتل بشر ودمه بارد ما كأنه كاتل .. 

سمعته يخابر اخو يدرله علاجه بيد ابنه علي .. 

بقى شوية واجاني حتى يكسر موضوع : تبقين هنا مو 

- حازم اني مكاعد اعرفك 

- اهووووو هسه لا تعرفيني بس كليلي تروحين لو تبقين ما عدج شي

- اني الكاتلني شلون عايش بهالبرود ما كأن مسوي شي

كاعد تخوفني حاااازم انت ولا كأنما كاتل بشررررر 

حجيتها وعلي ابنه طب خزرني .. ولزمني من زندي ندسني حيل عصره ... ضل علي يباوع كاله : تعال وليدي .. 

اخذ العلاج وكاله : جيبلي مي بابا خل اشرب علاجي 

راح وهو اندارلي وكضني من زندي : اسمعي هالموضوع لو انفتح ولو انجاب طرايه كدام كائن من يكون حتى لو كدامي ما تلوووومين الا نفسج 

- شتسوي تكتلني مثل ما سويت 

عصر حيل على زندي وهو يشد على كلمته بعصبية : صببااااااا 

طب علي جايبله مي .. غير ملامحه وعاف ايدي واخذ من ايده مي 

وكعد يضحك ويا ابنه ويساله على بيت عمه وعلي يسولفله .. ويكله : جوعان باباتي اذا حوعان هذا الاكل بعده موجود اكل 

كعد ياكل علي .. وهو دنك ويا ابنه ياخذ كم لكمة من الصينية 

كمت اسأل روحي اني اعرفه لو لا 

معقولة اني ما اعرفه .. الادري حازم طيب ما يكدر يأذي نملة 

يكتل بشر ويسولف ويضحك ما كأنه مسوي شي 

حتى ما عنده تأنيب ضمير ولا حتى سألني عن عائلته لو شصار بيهم .. الكاتلني ما مهتم 

واليكتل وما يهتم 

هذا شنو من بشر وشمسوي حتى واصل لهالمرحلة 

الإنسان العادي ما يكدر يأذيله حيوان .. هذا شلون كاتل بشر وهاجم بيته وما مبين عليه ولا مهتم .. 

اني دا اكبر الموضوع لو هو جبير 

معقوله اني ما اعرفه ! 

اسمع عمي يخاف منه 

وجان كل ما يحجي يكلهم لا تورطونا ويا حويزم 

بس حازم شمسوي ... حتى هيج يخوف ! 

اندارلي مبتسم : شلون راح تكضيها صفنات يا بويه دتعاي تريكي دم ما ضال بجسمج 

- ما مشتهية 

- لا مو على كيفج تشتهين .. كومي 

حجاها واندار لـ علي كمل بابا وروح جيب اختك واخوك من بيت جدك .. كافي اركدوا بالبيت 

كاله : وامي ؟ 

- عوف هالموضوع بابا وكمل ريوك ابني .. يلا حبيبي 

اندار ... كووومي احاجيج 

- حازم كافي 

حجيتها واني الوي براسي 

صاح : هششش بلا كلام .. كومي تريگي . 

عفته وكمت للمطبخ .. حطيت زاهي واريد الهي روحي .. 

طب هو : احاجيج تتجاهليني وتمشين ؟ 

- حازم الله يخليك اتركني 

- شلون هاي الطريقة الاتركج بيها ؟ اطلكج لو شنو 

- اني ما جبت طاري الطلاك بس... 

صاح : بس ما طولج على ذمتي وبمسؤليتي كلامي ما يصير اثنييييين مفهووووم 

انداريتله : عليك الله كاتل احد بحياتك كبل 

- شايفتني مجرم !؟ 

- مجاي اعرفك حتى اشوفك 

برودك وحالة عدم الاهتمام وانت .... 

- اني شنو 

حجاها وهو يخزرني ، انداريت للماعين وكتله : ولا شي 

- اني ولا شي 

- قصدي ما عندي شي احجي . 

- عوفي المواعين امشي اكلي 

- ما ....... قاطعني 

كلمة الما اريد ما احب اسمعها كبالي تغسلين اديج وتروحين تاكلين كدامي .. يلا 

غسلت ادية ومشيت كباله .. 

صاح : تعاي كضيني 

كمتله ساعدته يكعد ، لزمني .. وكال : احاجيج 

واشرلي براسه اتقرب منه يشاورني .. قربت اذني من يمه باسني بخدي وكال : لا تفكرين عيشي ونامي رغد واني احتار بالباقي 

ما احب اشوف الحيرة والقهرة بعيونج 

كعدي يلا 

حجاها وهو يجرني يكعدني يم رجليه وهو كاعد ع القنفة 

والصينية بالكاع وعلي دياكل .. كعدت كسرت خبزة واكلت بس حتى ما يحجي .. 

مد ايده يمسح على راسي و حجه ويا ابنه : ليش ما رحت ويا حبش للمحل 

-كبل شوي كعدت 

- هاي مالت الكبل شوي كعدت والاهمال ابني ما اريده ما طولك خلصت امتحاناتك ومدرستك تكعد يومية الصبح وتطلع للمحل صير زلمة بابا النوم والكعدة للنسوان 

اني ابوك مريض المفروض انت ابدالي حتى لو ابن عمك .. عينك على مالك دوا اريدك تفتح عيونك هناك وتصير زلمة اعتمد عليك بعد ابوك النوم والتختل ما اريده 

مفهوووم 

- تأمر يابه 

-الله يبارك بيك ابني كمل وجيب اخوتك وتعال 

- ولو ما رضت امي 

- وامك ياهو مالته 

-مو دنيا تريد يم امي ما تريد تجي ليجاي 

-بكيفك امك لو بكيف دنيا .. كمل وروح جيبهم والما يرضى اطيني اسمه

اخذ اخر لكمة من الطاوة وكام كاله : كمل ريوكك وليدي 

- الحمدلله والشكر بويه شبعت خل اروح اصيحلهم واجي 

- ديلا بعد ابوك استعجل 

لبس نعاله وراح يركض 

وحازم حط ايده على راسي يمسح على شعري حجه : تليفونج عد اختج 

باوعتله - يا اختي 

- هاي ام السانين 

- سهى 

- اي 

- شمدريك ؟ 

- هذا السانها واسلوبها اني ليش شكيت الاسلوب متشابه شكيت انت عصبية وكاعدة فاتحة السانج رشاش عليه وتغلطين وتفشرين  لان حتى وكت الخابرت وردت بالغلط ما حسبت مو انت لان صوتج وصوتها متشابه حسبتها انت .. وشلت عليج . 

- هو اصلا اني وياها ما نتحاجة من نهد فاتحة جعفر 

- ليش ؟ 

- كالتلي حاللي وواهبي جعفر وابريلع الذمة .. كتلها الله اليحالل ويوهب اني ما عدي شي اوهبه .. يم الله هناك نتحاسب والاله حق ياخذه بساحة رب العالمين .. شلون ما بريته الذمة زعلت علي من ذاك اليوم لهاليوم . 

- اختج هاي لو جعفر او واحد منكم متكرب من عيالها لو رجلها ومأثر عليها جا لعبت فلك بس براسج مشتغل عدها الشرف يمنى 

- شسويلها الله يسعدها ويبعدها 

- اذا انت ما تسويلها اني اسويلها حل لا اجويها جوي والله بالله اخليها عمرها كلة تخاف تكربج بحجاية . 

- وشتسويلها يمعود عوف المرة كاعدة على جهالها 

- وهي عايفتنا بحالنا خاطر نعوفها !؟ 

لج بابا الوادم هاي الما يرفع ايده محد يدنك راسه ويخاف .. كلها تتكوى براسج وادوس عليج .. حطي حد للكل حتى الكل يعرف حدوده وياج هسه انت كاربتها جاية يمها مأثرة عليها بالعكس بدال ما هي اختج تعاونج تشيلج شو اتدمغ عليج خاااااااف تسمعلها حجاية من عيالها تغثها . 

- تكول يطلكوني لو دروا بيج متزوجة بالسر 

- دخل تكوم ياهو اليطلكله مرة ويبتلي بكومة جهال علمود والله اختها ماخذة بالسر شلون بطة تلعب شناو .. كل اليسوي اذا صدك ضاج يكلها اكطعي علاقتج باختج ويجر مرته ويكعدها محد يطلكله مرة بذنب اختها .. هاي تحاجيج هيج حتى تنردعين والا هاج مو انفضحت سالفتنا و الوادم كلها درت .. يلا احجيلي هي وين !؟ 

ما نايمة بحضين رجلها والدك والدمغ فوك راسج 

جتج شالت عنج كالتلج هااج .. 

- لا والله عملية عافتني ومشت جيف رجلها ما يرضى تبقى 

- رحم الله والديج .. حجيتي كلتي تعاركتي وياها لو فوك شينها هي التغلط وتفرق بيني وبينج وتتزعل 

- شسويلها حازم خليها عد رجلها كاعدة على جهالها اذا الانسان ضميره ما يرده اني ارده 

- وياهو العده ضمير حتى يكضه خايبة انت شبيج غمة .. لا والله شو اردها وما طولها غلطت علي واندكت وياي لا اتويها توي بالعباس واعلمها شلون تندك وياج بحجاية . 

- وشتسويلها تتشاعف وياها 

- اتشاعف وياها شنو مرة اني انت شو ما تعرفين تحجين !؟ 

- عوفها ختولي يمعود 

- عوفيها انت اني بالنسبة اليه اليندك بيه ارده لبطن امه واعيد تربيته ولو ما تربى .... 

قاطعته وكملتها : تكتله 

باوعتله : موووو 

- ما استبعدها .. انا ما جاي يم احد خاطر احد يجي علي ياذيني ويريدني اسكتله . 

- وما استبعد فد يوم تكتلني مو ...

- لا تضلين تخرطين 

- لا ليش اليكتل بدم بارد كلشي يسوي .. ويمكن لو فد يوم غلطت وياك لو اذيتك ما استبعدها لا وتسويلي فاتحة وتاكل بفاتحتي ولا من شافني ولا من دره عني .. هيج انت لو مو هيج 

تنهد : شيلي الصينية اذا كملتي البيت صار كله زفر من ريحة البيض . 

شلت الصينية وكمت انظف بالبيت وهو بالاستقبال .. جوي جهاله طبوا كعدوا يمه .. واني بعدني اعسل وانظف .. اجا محمد شايل سرير ابو النفر .. دفع القنفة اللي ع الحايط على جهة الشباك .. 

حازم صاحلي اجيت كالي ؛ بس اذا تكدرين نظفي هذا المكان حتى محمد ينصبلي السرير 

جريت بالماسحة ورجعت وراه بالسطل والوصلة نظفت المكان كله .. وانداريت على دنيا كتلها : امج وين تحط الجراجف والغراض .. 

- وانت شعليج حاسبة روحج ام البيت 

- اريد افرش جرجف لسرير ابوج امشي جيبيلا 

- كاتلة روحج على ابوي .. كرامة ما عدج عمامي يطردون بيج وانت لازكة بينا 

ضليت اباوع عليها : كلامج هذا اوصله لابوج اخلي يتصرف وياج بعدج صغيرة شتفتهمين وتحجين هالحجي 

- فدوة موتيني من الخوف عبالها من راح تفتن علي يم ابوي راح ارجف .. اكبر واحد ما يخوفني افتهمتي لو لا .. 

- دروحي جيبي جرجف روحي 

عفتها ومشيت لغرفة الجهال .. اخذت دوشك جبته حجه محمد : عنج دزيته دوشكه هناك اسفنج عالي احسنله .. وخري 

عفتهم ورحت اكمل الشغل .. 

اجا محمد كال : ما جزتي من عنده وبدل ما تطلكين منه رديت اتوسطتي بيته مو !؟ 

- من اكعد ابيتك احجي ، اطلك منه اتصالح وياه الموضوع ما يخص احد غيرنا 

- ما يخص احد غيركم  واحنا تكاتلنا وطاح حظنا من وراج 

- اذا عندك كلمة لوم ذاك اخوك وروح لومة ما اعرف ليش تحجي وياي !؟ 

- تعتقدين راح نسمحلج تضلين عكب الصار كله 

- ما طالبة اذن من احد حتى اعتقد .. وارجع واكلك موضوعي اني وحازم يخصنا لوحدنا ولو صار شي فانتم اهله وتفزعوله ما نخيتك يوم لو طلبت منك شي حتى جاي تتحاجيني 

صاح حازم : صباااااا 

مشيت له ، كال : بس عدلي هذا الدوشك شوية وكعديني 

عدلته واني اكله : كملت الغدا والبيت راح اروح لبيتي هناك 

- العصر اني اوديج اشوف منو يكدر ياخذنا بالسيارة 

- ليش اتعب روحك اني..... قاطعني 

- سمعتي شحجيت ! ؟ 

اطيني دواي وجيبلي مي 

مشيت جبتلا مي بارد ورجعت اخذ دواه ومحمد يحجي يواه ويكله : هسه شنو البراسك شناوي 

حازم : ناوي اكوم على حيلي 

- ومن بعدها ! 

- الله كريم 

- حازم بروح ابوي احجي خلينا نعرف راسنا من رجلينا وصلت لحلك الموت وبطلاع الروح تلاحكناك ورديناك عدك جهال وعايلة شلون التالي شنو 

- الله كريم سهلة 

- اهووو حازم ما جاي حتى اسمع الـ الله كريم والسهلة يا خوية مرة ردت تموت وتخسر حياتك من وراها بس اجتك عصرية رجعتها لذمتك وكأن شيئا لم يكن .. يصير 

- والمرة بيش غلطت وياي حتى احاسبها بذنب اهلها ؟ محمد المرة مرتي 

- مرتك ذيج ابيت اهلها حازم 

- دربي ويا امل جزت رجلي منه تضل على ذمتي من العيب والاهل لو ما بت عمي بالعباس اطلكنها ويوم واحد ما اخليها على ذمتي 

- وتخلي صبا ! 

- محمدددددد هاذ الحجي ما ارضاه اخوي الجبير على عيني وعلى راسي بس مالت تحط روحك بيني وبين مرتي ما اقبل 

- هاي ... تأمر بس لا تجي تكول ابتليت وانهجم بيتي فزعولي

- اذا متعبتك فزعتي خوية لا تفزع اتنخى الغرب اخذ راحتك 

- حازم اني مال منك بس المرة هاي .... قاطعه بصياح 

- المرررررة هاي مرتي محمد حط هالكلام براسك 

- اي بالعافية .. اني ياهو مالتي

ماطولك كمت بخير وعافية هاهية الحمدلله على سلامتك واعذرنا من التقصير 

كام وحازم صاح وراه : محمد 

عافه ومشى .. 

دخلت للاستقبال هو كاعد ومنتجي وعاكد حواجبه 

حجيت: اهلك وحتى بزرك ما رايديني 

صاح بصوت عالي : ولا حتى اهلج رايديني ، شرايج كل واحد يتبع اهله ويتصخم وينداااار ؟ 

- ليش تصيح اني كاعد احجي وياك عادي 

تنهد وهز راسه  

عفته ومشيت اخذت ملابس .. ودت اطب اسبح 

انداريت ورحتله : سابح لو تريد اسبحك ؟ 

- شسابح عدي مرة وتسبحني .. الله يطي امي كبل ايام سبحتني وضال هاي ضلتي 

عفته وصعدت لكيت دنيا بالغرفة كتلها : كومي انطيني ملابس لابوج 

ما باوعتلي 

عرفت البنية محجي عليه كدامها هواي فكارهتني خصوصا ابوها رجعاهم غصبا عنهم من خوالهم 

فعفتها وفتحت الكنتور جانت تصيح : هي هيييي منو سمحلج تفتحين كنتور اميييي 

- ومنو فاتح كنتور امج اني دا افتح كنتور ابوج اطلعله ملابس 

- من تمدين ايدج ع الكنتور اكسر ايدج افتهمتي .. 

- احترمي نفسج لا تخليني اكل لابوج والله مو بكدج اني وتتجاوزين 

- ما احترمج وغصبا ما عليج افتهمتي وتروحين فدوة لامي 

- اي زين .. انطيني ملابس لابوج يلا 

- ما انطيج شتريدين 

- اكلج شو دوخري منيييي 

فتحت كنتوره جريت ملابسه دفعتني .. دفعتها مني حيل واخذت الاريده كامت تصيح وتبجي .. ونزلت كبله تكله : بابا دفعتني وتغلط على اميييي 

ردت احجي حط ايده على حلكه وكال : اصعدي بابا اكعدي بغرفتج واني اتصرف يلا بنتي وبطلي العرك هذا عيب 

- بابا والله مو اني هي.... قطعها

- بدون كلام دنيا صعدي لغرفتج بتي وما اريد مشاكل .. اتحركي 

مشت صعدت كتله : وانت تسكتني وتخليها هي تحجي 

- واني خليتها تحجي اعرف كاعد امها موصيتها واعرف شسوتلج بس ما رايد ازيد الطين بله واعاقبها كبالج وتكول ابوي صاح بيه لو عاركني على مود مرته .. اني اعرف شلون اعلمها غلطها ما يحتاج تحجين اعرفها واعرفج واعرف الدار بيناتكم بدون ما اسمعه . 

- دطيني ايدك كوم 

عاونته ووكفته اخذته للحمام ورحت جبت كرسي وعلاكة جبيره وتيب شفاف .. جيست عمليته وتيبتها حتى ما يفوتلها مي .. كالي :عاشت ايدج 

كعدته وكمت اليفله جسمه واذب المي عليه بطاسة خفيف حتى ما تتأذى عملية بطنه .. فركتله راسه غسلته ونشفته وطلعت طفيت المكيف والمروحة ورجعت وكفته ونزعت العلاكة من عملية رجله .. وذبيته وبدلتله وانطيته العكازة يتجى عليها .. واخذته كعدته بالغرفة 

صاح على سجاد كاله : جيبلي المعطر الفر بابا

- العطر خاف ياذي عمليتك

- لا خفيف 

جابله معطر مال جسم لونه بنفسجي ليزر ابو الدعبله .. عطرتله جسمه بيه ووخرته منه ولبسته ملابسه .. وعفته 

رحت صبيتله غدا .. 

كالي : شو حاسبتني لوحدي جا ما تاكلين 

- من اطبخ اكل وتجز روحي 

- بالعافية لا تنسين تصبين للجهال الله يرضى عليج 

رحت صبيت صينية ومشيت للحمام غسلت وطلعت لكيته حاط الصينية ع السرير يمه ويباوع ع التلزيون بس شافني كالي : شغلي المروحة والمكيف

- سابح اذا تستبرد تلتهب عمليتك .. شغلتله بس المروحة

وشلت الصينية منه ومن جهاله غسلتهم ورحت ادور ع المشط .. ما لكيته دورته ماكو .. صحت على دنيا تكلي : مشط امي ما انطيجياه 

صاح حازم من مكانه على علي : بابا امشي جيب مشط من الدكان بسرعة كبل لا يحترك البيت علمود مشط .. 

عقدت حاجبي وكتله : بدال متحاجيها تصف وياها 

- شوية شوية مو بس هي الكل راح يتقبل وجودج بحياتهم صغيرة وخوالها ما مقصرين باذنها اي حجاية تكوم تشيل عليه وعليج ويزيد الطين بله .. الكل ردي والكل لا تسمحيلا يتمادى وياج بس بزري اتحملي خصوصا دنيا بنية وعاطفية وتسمع لامها شكد ما تحبيني اتحمليها . 

جاب علي المشط كالي : بحيل الله بس اكومن على حيلي غرفة الجهال اصبغها واشتري غرفة نوم ارتبها الج 

- والجهال 

- يكعدون بغرفة امهم لبين ما اكمل الهم الغرفة الفوك البخها واسويها الهم . 

- خاف انوب يحسبوني ماخذة غرفتهم 

- ماخذة شنو اني رايدة الغرفة الجوا وهم وامهم الهم الفوك قابل اعيش على كيف احد 

- يعني راح تقسم البيت اثنين !؟ لو ما افتهم 

- ما عدي هسه اقسم وابني .. كل العندي ضامه اشتريلج بيه ذهب ومهر وغرفة نوم .. شوية شوية بس يصير عندي اسوي طابق ارضي وطابق ثاني .. وكل وحدة الها طابق لوحدها حتى اريح بالي 

- ولو ما رضت تنطيني الطابق الجوا 

- تنزل هي وجهالها وانت الفوك يصير الج مو صعبة يعني .. لو عندج اشكال 

- لا شعندي لو غرفة كافي عليه بس اكول خاف تصير مشاكل 

- المشاكل اني احيرن بيها .. حطي المشاكل على كلبي وانت سدي بابج ونام رغد .. كلشي ما اريد منج 

- هاي شوكت !؟ 

- لو بيدي من عين باجر بس شفتي عمج كال بعد الاربعين مال جعفر .. واني شفت كلامه صحيح لازم نسوي زفة اكسر بيها عيون الناس وادخلج البيت معززة مكرمة ببدلة عرس ما يضل الوضع هيج بس لان محتاجلج مخليج يمي هسه العيشة ابيت محمد وامي وكركتها ويا مرته ما تنحمل . 

يحجي واني امشط كملت تمشيطي وهو يكمل .. فتحلي اديه .. رحت كعدت بحضنه باسني بخدي : لا تشغلين فكرج باي سالفة وحق هو علي كل غايتي راحتج لا تزيدين همي وتعوجين وجهج من اباوعلج مقهورة لو ضايجة من يمي يضيك صدري وما ارتاح 

- وشسوي 

- لا تفكرين باحد والله محد شال همج ولا احتار بيج محد يستاهل تشيلين همه .. ارتاحي ذبي الحمل والذنب عليه واخذي نفس وارتاحي من اشوفج مرتاحة من يمي ارتاح 

- ما ارتاح ولا يكضي همي لحد ما نستقر واصير اني وياك حدر سكف واحد واكدر انام مأمنه لا احد وراي ولا افكر بروحه ولا بمسؤلية 

- قريب اكضيهن عنج كلهن بس خلي الله يوفقنا واكوم على حيلي بحيل الله كلهن اسويهن واكلج عيشي اليوم المالج خلك تشتغلين نعلة ابو البيت لابو هله سدي بابج ونامي ويوم التكدرين على كيفج .. رايد اشوفج مرتاحة وخدودج ذني ينشنش يابسات تكول دفان حتى الدفان اسمن منج ضالة جلد وعظم حتى دم ما بيج فالحة تچرفعين بهالجاي 

ابتسمت وخليت راسي على صدره تنهد وكالي : اروح فدوة لهالضحكة الحلوة ولج مو موتة وحدة يموتوني ويذبوني ورة السدة وعلي لو سبع موتات ما احوزن منج وافديج بحيلي بس كون تضل هالضحكة على عيونج ومرتاحة . 

دمعت عيوني وكتله : لا تكول هيج 

باوعلي : طي* جا اني اكلج اكتل روحي بس تبقين تضحكين تروحين تبجين خاب انت ليش غمة 

ضحكت : محد كايلي حجيك هذا .. محد مسمعني كلمة حلوة .. جبت عمري اكد واشتغل ومانين عليه ان هم ساكتين وراضين عني .. محد كالي فد يوم عنج لو شال حملي وياي 

- ما اشيله وياج .. اشيله عنج واشيلج وياه .. روحي انت 

حضني بين اديه غمضت عيوني هلكد ما حسيت بشعور حلو وهو يلمني ويحتويني 

طبت دنيا للغرفة : بابا 

وخرت راسي من صدره وتعدلت كاللها : عيون ابوج وكلبه .. 

ضلت تباوع علينا تخزرنا وهو يكللها : كولي بابا 

- شوكت ترجع ماما 

- خابريها وخليها ترجع اذا رايدتها 

- انت مو متعارك وياها لازم اتروحلها اتجيبها 

- واني وين اكدر امشي يا بويه خابريها كليليها بابا يكول رجعي .. مالي غرض بيها 

- يعني شنو مالك غرض بيها تعوف امنا 

- هالسوالف هاي لا تدخلين بيها بعد ابوج انت بنية حليوة وحبابة لا تضوجيني بويه اني اذا ارجع امكم فلخاطركم انت واخوتج ولعيونكم .. انتم تهموني واتحمل امكم لخاطركم 

- وهي ماما شسوت 

- عافتني واني مسوي عمليتين المرة الما توكف لرجلها وكت اليوكع وتفضل روحه بابا لا خير البيها .. المرة الزينة التخلي مصلحة عائلتها قبل الكل .. 

- غير عدها شغل شتسوي 

- بابا دنيا كتلج هالمواضيع بابا مو الج تريدين امج خابريها تجي ما تريديها عوفيها 

- لا طبعا اريدها بس ماما ما تقبل تجي  الا انت تجيبها 

- ما تقبل تجي بكيفها 

رادت تحجي صاح : كافي بابا خليني انام تعبان سدي الضوا .. صبا ناوشيني الجرجف غطيني 

غطيته وهي طفت الضوا ردت اطلع صاح : وين رايحة 

- غير تنام 

- دتعاي ام راس تعاي .. جا انام غير انت يمي حاسبة روحج على جهالي . 

- مو اخاف اضايقك بالسرير 

- انت تضايقيني .. الا ينرادلي بخت تعاي واحشري روحج بيه هو انا عليمن كاتل روحي 

ابتسمت وكعدت يمه وحصرته بالسرير تمددت وياه : انت الردها الحصرة 

- اي والله اني رايدها 

خليت راسي على صدره تنهد واني حاطة راسي .. 

حضني بيده وكام يغفي .. اني هم ما قصرت خذتلي غفوة الظهر . 

ننما ساعتين للاربعة .. واحنا الضوا مطفي مال الاستقبال والبردة مردودة ووطنية مشتغلة ومكيف معلوك .. ضربناها نومة مدرينا بالدنيا طشت رشت 

ما نحس الا الباب نفتح هو حس 

اني حسيت بس ما فتحت عيني اجاني صوت امل كايلتله : شني صاير تحضن وتنام بنص البيت .. ما تكول عدي ولد ما تكول عدي بنية مراهقة 

ما فتحت عيني بقيت على وضعي ، وهو يكللها : بت الاوادم هو هيج اليطب  جاية هدادة 

اجت يمي وندستني حيل يمكن طبت ايدها بضلعي وهي تكلي : كعدييييي

فزيت كتلها : اااااي شبيج 

سحبني اله وهو يردها : تكومين تمشين منا لا امسح الكاع بيج 

- ما اريدها بالبيت تعرف شنو يعني ما اريدها ابيتي ما اريد .. رايد تتزوج سبع حصوات اتزوج .. هاي ما تحطها ابيتي 

- من يصير بيتج نتفاهم امشي ولي من وجهي . 

- تطردني حازم ! تطردني لخاطرها 

- جاية تريديلج مشكلة وحجاية حتى تروحين تتبجبجين بيها وتحجي كدام العمام .. انكلعي منا 

- اني تطردني لخاطر هاي 

اتجى وكضني وهو يكعد ويجاوبها : وانعل سلفى سلفاج اقلها كابلتني ودارتني .. بت الكلب صالي شكثر مذبوب ما جيتي وسألتي عني شلونك .. من اجتي اداريني اتندرتي وذكرتي تصيحين بيتج .

- بيتي ويضل بيتي وما انطي للكحا* 

_ مرتاح وهستوني كاعد لا تضوجيني رايدة بيتج انكلعي اخذي بيتج طول بعرض وكابلي جهالج 

- اي طبعا مرتااااااااح .. رد هالسايبة وعود عباله اهتمممم ، ما اكعد بهالبيت ولا ارجعله اذا ما اطلع هاي من بيتي مو تريد تتزوج مو تريد حق الله روح ما تحركلي جفن  .. تطلعها بيت وحدها واني وحدي 

- ما عندي غير هالبيت عاجبج تجين تنجبين وتكعدين هلا .. ما عاجبج تسوين فضل لو انكلعتي . 

- اطرد بيه حازم تتذكر ايام الجنت لو ردت اطلع تكلي راضي بكلشي بس اكعدي ابيتج .. مو انت السميته بيتي هسه جبت هاي وكمت اطرد بيه خلتك تنسى ام جهااااالك حازم 

- ذولاك جهالج امل .. رايدة تكابليهم ذولاك همه .. دربي ودربج مو واحد وخلي يكون بعلمج ما مطلكج لهسه والله مو حبا بيج انما لخاطرهم ما رايد اكسر كلوبهم ويكولون بابا طلك امنا .. اكعدي يم جهالج وفكيني من السانج لا اني الي غرض بيج ولا انت الج غرض بيه . 

- بعيني بعيني حازم 

عافتنه وطلعت اندارلي اني كاعدة مستمع كرصني من خدي باوعتله غمزلي : شبيج حبيبي

- راح تبقى هيج هداده ومشاكل كل ما شافتني 

- مصير الكل ينلصم بس هاي محاولات ما قبل وقوع الجريمة .. دزوا محمد انوب دنيا من شافوا ماكو امل اجت امل بنفسها 

ضحكت ابتسم : اروح فدوة لهالضحكة 

كومي يلا بدلي حتى اوصلج 

- وراح تبقى وحدك اليوم شلون 

- وربج راح تبقى اليوم تتبسمر كدامي .. تعلميني بيها 

- يعني ما تحتاج 

- والله علوا تبقين خو اني الارتاح 

- لا خلي لا ابقى اجيك كل يومية وارجع لحد ما نتزوج خاف صدك يسوولنا مشكلة 

- انعل والديهم يسوولنا شنو 

- هم لو علكوها بيني وبينك نتشاعف من الراس .. شتنعل 

ضحك : ديلا بدلي لعد 

كمت لبست ولفيت حجابي وعباتي وهو كام يتجى بابنه وخلا سجاد يصيحله واحد من ولد ابن عمه 

اجاه حسنين كاله : اصعد وياي 

صعدنا وطلع بينا .. كالي بيت اختج وين صاير تندلينه 

- اي بالجوادر 

- هاي عني قريب علينا 

- اي 

- وين صاير 

- شتريد منها 

- رايد اروح اشرب جاي يمهم .. عدج رقم رجلها 

- اي عدي ليش 

- اطيني 

- شتسوي بيه ؟ 

- هسه دطيني واني اكلج شسوي 

طلعت واطيته التليفون سجل وخابراه كاله : العزيز شلونك يابه .. انت ما تعرفني بس اني اعرفك وعدي وياك سويلفه ورايد امرك انت موجود ابيتك وياي العائلة 

دايم فضلك مسافة الدرب واحنا يمك الله يحفظك 

سداه واندارلي : منين 

دليته لحد ما وصل بيتها 

كتله : اني ما احجي وياها شعدك جايبني الها 

- دنزلي واني اعلمج ليش جايبج 

نزلنا واني دكيت الباب طلع عمها رجال جبير .. 

سلم عليه حازم .. وكاله : اني اعرفك مو غريب 

جابها منا رده انطاه اسم جان عمه يكله اها غير جبيرنا هاذ .. وعرفوا بعض بالعشيرة 

استقبلاه وكالي : فوتي جوا بويه 

حازم كاله : لا والله رايدها وياي عدي سالفة تخصها 

- هاه على راسي .. هي اخت ام حسين لو انا مشبه بيها 

- لا هي وهالجاي على هالكربة 

- كل الهلا بيكم 

طلع رجلها سلم عليه ودخلوه للاستقبال .. 

كعدته ع التخم وكعدت بصفه ع التخم المنفصل وهم كدامه كاللهم : الله بالخير 

- الله بالخير والرحمة.. جاي ابني لعمك 

- اي والله عامرة الدار ان شاءالله 

- الله يسلمك .. صيح جدتك وامك 

واندارله يحاجي على العشيرة ويسولفون بهالامور 

لحد ما طبت الحجية ام قاسم رجل سهى بالعباية .. كمتلها سلمت عليه وكعدت .. طبت سهى بالعباية .. كأنما ما بيناتنا شي صاحت : هلا ، هلا بيكم 

بس الوجه صفصف من شافتني وحازم وياي 

اجتني حضنتني وهي تكلي : شكو .. شني رجعتو شصاير 

ما جاوبتها 

كاللها : ام حسين شلونج !؟ 

كالتله : كل الهلا بيك خوية 

اجيبلكم الجاي 

كاللها : عدي سالفة كبل لا اشرب الجاي 

حجه عمها : تشرب جايك وسالفتك مكضية ان شاءالله 

- الله يسلمك .. الله يحفظك 

راحت جابت الجاي و عمتها تسألني عن وضعي واخباري واني اجاوبها عمومي على الله .. الحمدلله

طبت رجلها اخذ الصينية منها وقدم وهي كعدت يم عمتها نزلت العباية على اجتافها ولفت نفسها . حازم شال استكانة الجاي شرب منها وكاللهم : الله بالخير 

- الله بالخير والرحمة  

- اسألكم سؤال .. 

- جواب 

- مرة يتيمة بت اخو واحد جيرانه اطلكت واخوها ذباها على عمها وعمها ذباها بالشارع والراس يجري دماية وشلتها للمستشفى عالجتها وعرفت حالها وتبين مالها اهل واهلها ما يريدونها ومستثكلينها .. بيها شي لو خذيتها واتزوجتها وسترت ع البت من الشارع ؟ 

حجه عمه : لا من الزينات وفضلك يم الله اشكبره 

- الله يديمك .. من يدرون بزواجها وهم ذابينها الهم حق يهدون ويتصايحون وهم جبيرهم كحد داري عنهم ولاي درون بت حمرة خضرة وين تروح وين تجي شغل تشتغل براس الشارع مالهم ما يندلون بيا عيادة بالضبط تشتغل .. الهم حق يحجون 

- لا والله مالهم حق 

حجت سهى : لا جا اختي محد ذابها وحيدر كاعد وياها بالبيت 

ابتسم وكاللها : جايج بالحجي خوية خو انت ما ناسيج الج الحصة الجبيرة .. بس اسألج حيدر اخوج اليكول كاعد وياها يدري عنها يوم الانا اشتريتلها البيت ؟ يدري يوم الاني اثثته ؟ يدري يوم الاني دفعت كهربائها وجبتلها علاكتها وهو جاب هدومه وكعد خاطر لا يدفع ويا اخوه ايجار ويكتلها لو ما لكاها مسوية اكل .. وهو ربع ما ينطي للبيت اني احط مسواكها ابيتها .. تسمين هاي كعدة لو استغلال .. 

ووينه حيدر ما باع البيت انا اشتريته الها وطافر بفلوسه وهسه ابو البيت رايد يطردها من البيت هي وارملة اخوج دريتو تحركتو حجيتو شسويتو ما طولكم ما ذابينها 

حجه عمه : اها جا حجي ابو يوسف وين عنها 

- ابو يوسف دزاها علي تقنعني وتراضيني خاطر اساعدها .. هذا الحال 

سهى : اني هذا الحجي ما تدري بيه وحتى سالفة ابو البيت يريد البيت ما ادري بيها

- محد رايد منج حل ولا رايدين منج شي انت هم مرة وابيت رجلج وحقج بس اني جاي اعتب الزلم .. وان شالله البيت عامر بزلمة 

حجه عمها : ابشر 

- مو عيب من ادزلي رسايل تفشر علي وعود هي صبا وتفشر فشار ما اكدر احجي نسوان كاعدة .. وربك ما ينلبس عليه ثوب .. ليش ؟ 

شهكت : ياااا اني حرام لو مراسلتك لو دازتلك علي العباس 

- خوية اني ما شاك ولا كاعد اتهمج اني ما جيت لا ما متأكد 

حجه رجلها : حسابها وياي بس غير اعرف رسايلها شنهو 

حازم : واني جايبلك رسايلها 

طلعله الرسايل شافهن كاله : بس هذا مو رقمها 

- رقم اختها صبا انطاه اله حيدر وهي تراسلني منه وتغلط عليه عود هي صبا خاطر اطلك اختها .. وهي مرتك وتكدر تتأكد وتلكى تليفون المرة عدها .. بس انا اريد اعرف ياهو مالتها خوية وتدخل بيني وبين مرتك 

اليوم تجيك صبا وتدخل بينك وبين مرتك وتفشر عليك وتغلط وتخلق مشاكل بينكم ترضاها خوية ؟ 

- لا والله واني راح اتأكد من التليفون عدها ولو طلع صح .. اني ما اقصر 

- اسمع خوية انا مو طلاب مشاكل بس البيته من اكزاز لا يشامر بيوت الناس حجار .. وانا كل الرايدة ما تدخل بسالفتي ويا مرتي وتشيل ايدها .. يصير 

حجه عمها : تاخذها مني لو ادخلت بينكم ولو سوت مشاكل الكم حسابها وياي افنيها فني وعلي على راسي 

- سالم راسك اني ما رايد مشاكل وهي تضل سوالف نسوان بس اني الرايدة منكم وانرجاه تكف مشاكل من عدنا لان حدنا احنا مشاكلنا معرة ما عايزنا زوادة .. وبعد يمكم 

- لا تدلل وما يصير خاطرك الله طيب 

- الله يسلمك الله يحفظك .. نرفع الزحمة 

- ما تطلعون تتعشون 

- دايمة بالعباس ماكلين وشبعانين .. وبحيل الله ان شاءالله معزومين رايد اسوي عرس خفيف ولو هو اخوها ميت الله يرحمه بس بعد تعرفون الناس الها الظاهر .. وان شاءالله موجودين 

- اي نحضر وشايفين الف خير ان شاءالله 

- يبارك بيك وباهل بيتك ويحفظك الهم يا طيب 

يلا بويه 

كمت وياه وطلعنا وسهى اجت تسلم عليه نسدتني وتكلي : صبا جايبته لعيالي تشكيني اني الج سهلة ان شاءالله 

عفتها وسلمت على عمتها وطلعت وراه صعدت وياه وهم طلعوا يودعونا .. ومشينا وصلنا للشماعية اطه عشرة لحسنين كاله : انزل وليدي جيبلهم نص كيلو كباب وصمون بالف ، وجيبلي علج اذا زاد عندك 

نزل واني كتله : حازم مراح تصيرلها مشاكل هيج خاف رجلها يأذيها 

- تخاف من المشاكل وتخلق مشاكل بيناتنا من سوايتها اني صدكت وردت اطلكج والله بس كلبي ما اطاني وترددت الا حرام ع الحجي الحجته اني مطلك 

- ميخالف بس رجلها صعب 

- واحنا يمها احذاها لو هي الحاطة روحها بنصنا شلون بالله نضل شادين روسنا من وراها ختولي . 

- حازم اريد ابقى يمك 

حجيتها واني احط راسي ع الكشن الكاعد عليه 

- بحيل الله ايام واحطج يمي وحرام بالحرم يوم ما اخليج تبعدين عني لو تباتين بغير بيتي ..

حطيت ايدي على جتفه واني مرجع راسي .. كض ايدي وهو يكلي : ناس منا بويه اتعدلي 

كعدت عدل صعد واطاني الاكل كتلها : المن هذا لبيتك لو الي 

- لا الكم طبعا 

- يا عليمن يمعود خو عدي 

- دكعدي ام راس .. عدها هي 

ضحكت .. واخذنا للبيت وصف كبال البيت ونزل وكال : سويلي طريق 

- المرة كاضة عدة 

- اي يمها قبال اكعدلي وياج  شوية بالحديقة واروح 

سويتله مجال وكتلها .. ورجعتله كعدت : عود ليش 

- شغلة ابالك 

- بالك يخوف 

ابتسم : لا تخافين منه 

- ما راح تشغله علي فد يوم 

- والله هو الباب مشغول بيج ما يوم اشتغل عليج . 

هزيت راسي وامنت 

ما ادري الدنيا شضامتلي بس روحي امنت بيه 

 ضل شوية اني كمت للمطبخ بسرعة سويتله صينية كباب و طرشي وزلاطة وجبتهن اله كال : جبته الكم 

- نص كيلو يمعود يومين ما نخلصه .. اتعشى خاطر لا ترد وبطنك فارغة وتعال تحتار 

كام ياكل حطيت راسي على زنده وحجيت : من انت موجود احس اني بخير ومحد يكدر يحاجيني ولا يحتاج اسيلن هم لو افكر بشي .. بدونك حالي يكسر الخاطر 

طخ راسه براسي وهو يكلي : انعل ابيه اليكسرلج خاطر بس كون تخلينها وراي وهيج اريدج تمشين وراي خرسة وطرشة وعمية واني احلنها كلها 

بسته بزنده : عسى ربي لا يحرمني منك 

-اروحلج فدوة حبيبي ، خل اغسل بعد 

-مكانك اني اجيبلك 

-زيدي المي خاطر اتوضى واصلي فد مرة ما طول اذن المغرب

جبتلا غسل وتوضى وسلم عليه وراح 

واني كعدت احجي لمرت جعفر كالتلي : ولو رحتي اني وين يصفى بيا الدهر 

-والله يا خيتي شكلج بس تدبر ان شاءالله نشوف شلون نحلها . 

من صارت ب١٢ خابرته فتحت خط وياه نسولف وكتله : اكلك لو اتزوجت مرت جعفر شنو .. وين تروح 

- البيت مالج تضل بيه هي وجهالها 

- يا بيت مو المشتري يريد البيت 

- ومن كل عقلج ابيعه .. البيت بيتي .. واني حاط ناس عليه ما ينباع بصم ما بصم  هو تجاوز يولي يروح يتكاوم ويا حيدر واهله انت راجعتلي ما راجعة لحيدر 

- يعني ما نشيل منانه 

- انت حاسبة روحج عليمن حتى ما تشيلين .. ولج غمة ترا عليتي كلبيها كلها ايام اخيج تطلع اربعينه وراه باسبوع ازفج واجيبج يمي بعد مهوسه ويا اليهوسون شلج 

- ههههه مو ما متعودة ومكسور خاطر هاي هم حالها من حالي .. لو رحت تضل بالضيم 

- اسعالها بحيل الله براتب رعاية الها تعيش بيه والبيت الها محد يشيلها منه . ونناوشها هلنكدر عليه شنسوي بعد 

- الله كريم ، اي ما كتلي شوكت نتزوج 

- مريتي طالبة تزواج عمت عيني لو كايلتلي جان رهمناها شلون ما چان 

- عزا بعينك اني نيتي صافية بس انت فاسد فاسد 

- والعباس لو ما فاسدة فلا تفتهمني بس ما طولج افتهمتي شقصد افيسده بت افيسد 

ضحكت هو كال : عسى الله لا يحرمني هالضحكة 

- ولا يحرمني منك 

ثاني يوم نايمة .. ما انحس الا الباب نردمت .. 

فزيت من النوم وشهلاء ركضت للمطبخ واني ادور على حجابي والباب تندك دك كلت راح تنشلع …. يتبع