ركض طلع .. 

اني ضليت صافنة ! 

بالنسبة للبوسة والاجواء .. شنو الفلم ؟

شكلها الجداحة اليوم ما ناوية تجدح 

الف راسي وارجع انام اخيرلي من الجدح والردح 

وانعل ابو اليجدح بعد .. 

انداريت .. 

واسمع صريخ دنيا وعلي وحازم يكلهم : بس فهموني 

وعلي يصعد ع الدرج و يصيح ودنيا تبجي .. ونزلتلهم امل 

شلون مشاكل تسوى اسمعها ... 

جريت البطانية و على راسي .. بالربع ساعة يلا رجع 

اني سويت روحي نايمة .. اجا سركى الباب وشغل المكيف .. وفتح الغطا وانحشر بظهري .. 

كام يوخر بشعري من اذني ويبوسني .. 

تنهدت وسحبني لعنده .. وانجدحت مشاعري وياه 

ونمت بحضنه نايمة ما ادري عن الدنيا كلها . 

واني نايمة والكهرباء بهالليلة الله هداها واستمرت 

وصوت المكيف ومدفين ابعضنا ومتغطين بالديباج .. مطيت نفسي وكاعد اندار .. عقدت حاجبي واني نايمة فتحت عيوني بسرعة واشوف الضوا طالع ! 

يا يمه فزيت من فراشي فزة هي كعده هي وكفة وركضة 

كعد فز على فزتي صاح : خييييير شكو 

- الشمس طلعت واحنا نايمين لا مغسلين ولا متسحرين 

ركضت للحمام بساع تعليت وطلعت 

فات وراي بسرعة .. صفنت هسه افطار لو شنو 

اصوم اكمل لو اشرب مي ؟ 

دخلت الغرفة طفيت المكيف وصليت 

بعدها كعدت امشط شعري وانشفه بالفير 

طب هو عاقد حواجبه كتله : هسه احنا افطار لو نصوم 

- كملي صومج 

- ها هم زين ولو جوعانة ما اتسحرت شيصبرني للفطور 

وكف صلى ورد فتح الغطا وما حاجاني رجع نام 

عقدت حاجبي .. هذا بعده زعلان لو يتخايلي لو ما شبعان نوم 

كلت لا يمكن مشبعان نوم وضاج لان ما متسحر ووراه دوام هلرجع نام .. نمت بصفه كمت اتكلب يمنى يسرى لحد ما الله سهلها بساعتين يلا رجعت لنومتي .. 

كعدت ويا صلاة الظهر هو ماكو بالدوام 

بس كعدت راسي مسطور سطر لان بدون سحور وما شاربة جاي .. اريد اشيل ايد اكوم للبيت ما بيه حيل 

كمت من لا جارة هيج اخض بمواعين الباقية ع السنك .. 

طبت امل كالت : ليش ما كعدتينا ع السحور البارحة 

- هو احنا ما كاعدين راسي ذابحني جيف ما شاربة جاي 

- واني حسبالي بس اني متت عطش بالشغل شيخلص اليوم راح اروح انام ما اتحمل حلكي طبك من العطش 

صعدت واني رحت للغرفة كعدت ع التلفزيون بس احس عطشانة حيل وراسي يوجعني كلش .. بس متمددة .. فات هو للغرفة ابتسمت وتعدلت من كعدتي وكتله : ها حبيبي رجعت 

ما جاوبني ! 

ضليت اباوع عليه مشى بدل ملابسه 

واتمدد رجع راسه .. عقدت حاجبي بعده زعلان يعني ؟ 

جا والجدح البارحة !؟ شنو معناته 

ضجت .. شنو يلعب عليه خو لا تجي يمي اذا انت بعدك ما رايدني .. ولو هو اني صوجي اني لوكية هو لو رايدني جان اجا من غير ما اكعد اغريه واطخطخ بيه بس اني غبية .. هم مشيت بكلامهن وخذاني الواهس 

الا حرام ما يستاهل اطخطخله ولا اتقربله .. 

شسويتله وداير عني قابل اني ناشرة روحي راح يصير شهر ع السالفة وهو بعده حاقد عليه . 

مصخها كلش .. ولعبت روحي منه 

نترنت الغطا من اديه وكمت من الجرباية .. 

ورحت كعدت بالاستقبال .. ما كابلته ولا كعدت وياه .. 

علي متمدد يباوع على التلفزيون 

كتله : على شنو تعاركتو البارحة انت ودنيا 

كال : خل تولي 

-شبيها شسوتلك 

-ما سوتلي شي بس ادب سز 

-ليش ؟ 

-هيج 

بقيت اباوع .. معناه اكو شي وعلي ما يرضى يحجي 

اكيد شايف شي .. عفته . 

للعصر راسي موتني وعطش ذبحني صيف حارة وصوم وممتسحرين انغسلت غسل وانعصرت .. كوة على روحي كمت سلكت عندي نص دجاجة وفلستها وسويتها ويا تمن احمر مقلوبة .. وشوربة من البارحة مال العزيمة طلعته حميته .. وزلاطة ناعمة هم مال البارحة .. شكو اكل بالثلاجة طلعته ما بيه حيل اسوي ووحدي .. دنيا ما تشيللها وياي كشاية وامل ما تنشاف . 

صار وكت الفطور .. 

طبت دنيا كالت : شنو بس تمن مسوية اليوم 

كتلها : هاي خيرات الله كلها 

-خيرات الله هاي فضالة اهلج البارحة 

صاح حازم : دنيااااااا 

حجت امل : صدك الاكل بايت 

-هذا تمن جديد شنو بايت 

-بس الباقي كله بايت 

-وشلون نذب نعمة الله بالزبالة !؟ ما بيه شي 

حجه حازم : خلونا نفطر لا تجزعونا 

ضجت واحدهم ما مساعدني بكشاية وكاعد يتأمر براسي 

بس سكتت مالي خلك احجي .. هستوهم اكلوا 

التمن ما بيه ولا قطرة ملح 

حجت امل : شني وين عقلج التمن قطرة ملح ما بيه يلعب ستين نفس 

دنيا : ايييييع مينوووووووكل 

حازم : علي كوم جيب الملح 

كام علي راح جاب الملح ودنيا اصيح: اكل بايت وتمن ماصخ هسه الواحد شياكل وصاييييينين 

صحت : لا تصيحيييين افتهمتي لو لا مو صغيرة انت معاجبج الاكل كومي ذاك المطبخ واطبخي اللي يعجبج 

حجت امل : وانت شنو شغلتج هنا حتى تصخرين بتي 

صاح حازم : كافي احترموا نعمة الله 

امل : ونعمة الله تنوكل حتى نحترمها الاكل ماصخ ما ينوووكل 

انغثيت حيل چرختهت : - اي لا تاكلووون يطبكم مرض 

صاح حازم : منو ذوله اليطبهم مرض 

امل : ياهو اليطبه المرض ولج ؟ اني لو جهالي لو حازم 

 : والله كل واحد ما عاجبه يطبه مرض وفوك مرض همين مو خدامة احد هوا افتهمتوا لو لا .. صاحبك طيب لا تاكله كله صار عشرة ايام رمضان اطبخ واوكف ساعات بس الظاهر محد يستااااهل 

حازم : امشي طبي لغرفتج 

- مو خدامة مرتك اني ولا خدامة جهالك حتى كاعدات يصيحن عليه جني طفل نسيت الملح شنو كفرررررت 

صاح : كووووووومي طبي لغرفتج 

- ولا يحقلك اطردني  افتهمت لو لا اكعد وكت اليعجبني واكوم وكت اليعجبني . 

كام من السفرة : شلون ولج 

- ثق وحق هو العباس ابو فاضل مديت ايدك لو طخيتني والعباس دقيقة ما ابقالك بالبيت 

حجيتها وكمت على حيلي 

وهي تصيح : شوف شلون كبرت راسها وحاسبة روحها هي ام البيييييت 

- ام البيت وغصبا عن اليرضى والما يرضى افتهمتي

مو اني اللي اشتغل واكرب من الصبح والليل وانتم كلكممممممم اطبون تاكلون وتنامون وتجون تصيحون مو بيتي لا مو خدامة هنا وكل واحد خل يعرف حده 

صاح : هشششششش 

جرني كتله:  لا اطخني 

سحبني بقوة وهو يكلي : تعاي لججججج 

كض ايدي من المعصم قوي وجراني للغرفة : كتله شتريد مني ها ؟

-نصي صوتج لا امحي صوتج من ساسه والعباس 

-ما انصي ولا انصي واليوم عاجبني اعرس شعدك وياي 

بتك تغلط ومرتك تغلط وشايفات روحهن شوفة عليه وتجي عليه تكلي نصي صوتج لا والله شو ما انصي بعددددددددددد 

ضربني راشدي وصاح : بت الاوادمممممم صوتججججج 

-تضربني ! 

زين .. مشكور ورحم الله والديك 

انداريت للكنتور كال : بت الاوادم لو منصية حسج وساكتة جان اني الرزاتهن عنج تتصايحن كبالي واني كااااعد مالي احترااااام 

-لا يابه شلون مالك احترام 

اني اللي مالي احترام اني اللي خادمتهن واشيل بخيستهن وانظف ويغلطن عليه واسكت واعدي واكول مريض ما اسوي مشاكل بس الظاهر اني المالي احترام . 

-اكعدي

-وخر من عندي 

-لا تفكرين اخليج اطلعين والعباس رجليج اكسرهن وما اخليج تطلعين افتهمتييي 

-لا طبعا لو طلعت منو تخدمك قابل منو تخدم جهالك منو تنظف بيتك منو التصير جلبة تنهان وتسكت حتى ترتاح طبعا متقبل 

-كااااافي وكعدي مرضتينيييي 

- خلي امل اتطيبك اني لهنا حدي 

-طلعة ما تطلعين والعباس 

ما تريدين تشتغلين بالبيت محد جابرج ولا اني مخليج خدامة سدي باب غرفتج ومالج غرض باحد وانجبي بغرفتج واكعد 

- واذا ما انجبيت وكعدت شراح تسوي تضربني مرة ثانية 

-ضربتج حتى تسكتين لان صوتج واصل لسابع جار 

-الله بحفظلك سابع جار اتهنى 

جريت الجنطة اندار هو سحب المفاتيح من الباب .. وطلع وقفله من برا .. ذبيت الجنطة من ايدي نتر .. وكعدت ابجي .. 

سمعته يتصايح برا .. 

كمت من مكاني .. تقربت من الباب حتى اسمع كلامه 

يتعارك ويا امل ما افتهم من صياحه بس فرزنت كلمة وهو يكللها ياها : تروحين فدوة لنعالها اقلها كاعدة بالبيت وتسويلج زقنبوت وانت عايفة جهالج على كلبها واطرطريييين والج عين تتصايحين بت الكلب 

كامت تتصايح وياه .. 

تعاركوا ضربها راشدي كام ادك وتلطم شلون ضربها راشدي .. 

وضلت مصايح وياه وتسبه .. وهو يسب لحد ما كام وطردها من البيت .. 

صاح على دنيا رزلها وكاللها : اسمعي لج المرة الجوه لا هي خدامتج ولا هي خدامة امج غصبا ما عليج وعلى الخلفتج تحترمين الاكل ما عجبج تكومين تنثبرين تسوين لروحج اكل مو تتصايحين على الاكبر منججج 

كامت تبجي وتكله : والله بابا لان جوعانة وهي هم من تطلع تصيح عليه وتغلط بس كدامك تحترمني 

صتح بيها وكاللها : هالكلام بطلي وامشي كبالي هسه تعتذرين منها والا والله العب بيج فلقة واحبسج باب الحوش ما اخليج ويحرم عليج بيت خواااالج امشيي 

كامت تبجي .. 

واجتني للغرفة اني كاعدة ع الجرباية دموعي تجري 

فتح الباب مسحت دموعي من خدي ما باوعتلهم .. كالتلي : اسفة 

هزيت راسي ركضت هي للغرفة فوك 

سد الباب بس ما قفله .. وطلع .. راح تقريبا ساعة 

راسي كمت ما اشوف منه مشيت للمطبخ خدرت جاي .. طب هو حط العلاكة ع الكاونتر ومشى .. 

صاح : السفرة بعدها ممدودة محد شالها مو نعمة الله هاي

رد وكف كدام الدرج صاح : علييي .. ماكو جواب صاح 

سجااااد طلعتله دنيا كالتله : طالعين برا 

- انزلي جبتلج لفة اتعشي يلا بابا

نزلت باسها وكاللها : كافي عرك وهوسة كولوا بابا مريض يعني اذا يوكف كلبي واموت ترتاحون .. اكل ما عجبكم كلولي دزلنا شي لو تكوم تسلك روحك باي شي ترا كلها نعمة من نتكبر على نعمة الله ونكول ايييع يحرمنا منها وتكوم اللكمة تصير حسرة علينا .. عوفوا المشاكل كافيييي .. واحد يجي للبيت يرتاح لو يسمع هوسه وصياح 

- ماشي بابا 

اجت فتحت العلاكة وخذت لفة 

راح هو للغرفة بدل وكعد .. اني ما مديت ايدي ع العلاكة 

طلعت جبن وكعدت اكل ويا الجاي 

اتصلت سهى جاوبتها كالت : ها ام الجدح بشري حدحتو لو عطلانيييين هههههههه 

-جدحنا جدحة من هاي العجبج 

-لا عليج الله يعني تصالحتو 

-لا تعاركنا 

-صدك والله .. ليش 

كمت سولفت الها كالت وضليني من امداج اي والله ضلي خلي يدمغ على راسج ويهينج يضربج وتسكتين 

- شسوي تعارك ويا امل وطردها  ودنيا اعتذرت سكتت 

- طردها مو لخاطرج جيف تعاركت وياه واحسبيها باجر هي بالبيت . 

-شسويلها بعني 

-كليله يا تعزلي يا اطلكني 

-يا عزال رحمة لاهلج شو عوفيني 

-لا والله مهيونة وبلا كرامة بالعباس فوك ما طابختلهم تنكتلين وتضلين من امداج اي والله

-ووين اروح 

-شني مو عدج بيت 

-حاسبته بيت رحمة لاهلج بس يدير ظهره حازم عن البيت حيدر يبيعنياه ويلزمني الشوارع 

-لا والله حبيبتي كولي اني احب الاهانة ودور الخدامة وهو يدمغ على راسي 

-سهى رحمة لاهلج لا تكعدين تحاجيني هيج اني من غير شي طالعة روحي ومتضايقة 

-جا حابسج ومخليج خدامة ويدمغ عليييج 

جنتي عمي تشتغلين وخير من الله وبيتج عدج ترجعين مرتاحة 

-يا راحة هاي الجنت اشتغل اليوم كله حتى ارجع اخدم حيدر واني اصرف عليه وانكتل لو ما خدمته وسويتله اليويده وهو ربع ما دافع عليه .. ع الاقل هنا غرفتي مرتاحة بيها رجال اتعارك وياه صدك بس مقدرني وحاسبلي حساب عيشتي كبل جانت شنو 

- لا كلش التقدير واضح من الكتلة خايبة شبيج توهمين بروحج وتبرريله 

- لروحي خليني مسلكة نفسي اقلها محتمي تحت سكف ورجال اعرف محد راح يكدر ياذيني وهو موجود وكاعدة اكل واشرب والبس وانام بجاله ... وهاي كافي 

- يا جا غصبا ما عليه شني هم عوزها ما يصرف عليج 

- سهى شو يمي تشمرين ويم روحج اخس من حالي خية انت بثلث جهال وصارلج ١٦ سنة متزوجة وكاعدة ويا عيالج و جهالج ينامون وياج بالغرفة ويومية عركة وهوسة وعمتج تغلط وتصيح ورجلج صام حلكه ما يوم رد امه 

- عمت عينج جا تعايرني بحالي 

- لا مو اعايرج بحالج بس اذا تكليلي بالكرامة خية شجابرج على عيشتج ويا عيالج كل هالسنين 

- جهالي قابل انت عدج جهال 

- اني لا عدي جهال ولا عدي احد غير حازم بهالدنيا ساعة الطحت واتمرضت ضليت حالي حال الحايط لو ميته محد داري عني وجايتني تكليلي ما عدج كرامة 

- اني غير لمصلحتج قابل شعدي غير اريدلج الاحسن 

- الاحسن ما شفته غير عد حازم حتى لو مزاعلني وما يحجي وياي بس محترمني ومراعيني 

- اي بالعافية عليج عيني الله يثخن لبنكم .. روحي عيني روحي لحازم خاف اعتاز شغله اركضي خدمي 

حجتها وسدته بوجهي .. 

تنهدت .. كمت من مكاني رحت لميت السفرة وكعدت انظف .. 

وبالي يسولف . 

صح خواتي 

بس وحدتهن شايفة المر ويا عيالها 

ويجن يحجن مشاكلهن ما تنحمل ويا العيال عيشة فكور .. 

ومن يوصلن يمي يطلعني بلا كرامة وخدامة .. صح متضايقة منه واصيح اعوفه واريد اطلع ..  بس ما اتمنى اليكلي عوفي لان ادري من اعوفه اني الانضر مو غيري .. 

كملت البيت اتذكرت حتى حلقة باب الحارة راحت مني من ورا المشاكل .. تنعاد ب٢ كبل السحور لازم اكعد خلي انام من هسه واوقت الموبايل لل٢ اكعد اكمل باب الحارة واسوي سحور 

ولو اسوي سم .. ما اسوي لاحد شي .. اسوي لروحي طز بالكل . 

رحت للغرفة هو كاعد يباوع 

طفيت الضوا وانداريت انام .. واطيته ظهري ونمت

لشوي هناك اني غافية اجتي الوطنية ونايمة بلا غطا ع المروحة ورجلية طالعة ضرب هوى الميكف على رجلية كشيت باردة .. مد روحه وجر الغطا وغطاني وكام يوصله لجتفي ويغطيني زين .. باس راس ومسح على شعري ..

وبعدها كام طفى وهم نام بس وجهه عليه ..

ب٢ دك المنبه .. كوة شلعت روحي من الفراش خاف تفتوني حلقة باب الحارة 

كمت شغلت التلفزيون وصيته ودرته ع الام بي سي وان .. وكعدت اباوع الحلقة .. لحد ما خلصت .. باوعتله هو نايم غاط بنومته . 

صفنت جا هسه اني اكوم اسوي بس لروحي شني يهودية ؟

والرجال وجهاله يضلون بلا اكل !.. والله زعلانة حتى امل ما موجودة واكول شعليه هي تسويلهم .. يموتون جوع

هذا شهر رمضان دخلي اكوم واسويها لله مو لعبد . 

كمت سويت طاوتين وجبن وجاي 

دكيت باب غرفتي حتى يكعد وصحت : سحووور سحووور

وصعدت لغرفة الجهال طبيت بلا ما ادك الباب 

فزت دنيا والتليفون على اذنها ضمتها بسرعة جواها وهي تكلي : شبيييج غير اتدكين الباب 

-ويامن كاعد تحجين بهالليل 

-ويا بت خالي شعليج انت 

-واذا بت خالج ليش فزيتي 

-شعليج بابا ترا اني اعتذرت لخاطر ابوي لا تخليني والعباس نصين اسويج

هزيت ايدي ومشيت لغرفة امل .. علي و سجاد نايمين على فراش امهم .. كعدت علي يصوم كتله : اذا تتسحر كوم حبيبي كملت الاكل 

كعد خطية ونزل وراي لكيت حازم كاعد بالاستقبال

حطيت تسحرنا ومشينا نمنا كل واحد منطي ظهره للثاني .. 

الظهر ورا ما رد .. 

خابراه عمه .. كاله : هسه اجيك لا تنام 

صدك انتظره ما نام الظهر .. اجا عمه جايب امل وجاي وكاله : مو عيب صايرة دايرة تطرد مرتك ام جهالك لجلج وحدة ما صالك وياها شهرين ؟ 

حازم ما ترادد وياه 

كاله كل واحد بهالبيت يحترم روحه ويحترم البقية اخلي على راسي اما يهين ويغلط وحاسب روحه فد قندره حشى ما اكول بوجهك .. لا والله يابوي مو بس اطرده وانعل والد والديه 

وعمه كام يجرخله بالاسطوانة المعهودة 

مرتك وام جهال ومهما كان ومن هالسوالف .. 

سلم عمه وراح وامل صعدت فوك .. وهو اجاني للغرفة كاعدة اكلب بالتفزيون واباوع بدل واجا يمي .. انطيته ظهري ونمت .

كعدت العصر سويت شوربة بجدر صغير ومركة سمج وزلاطة .. قبل الفطور بخمس دقايق .. نزلت دنيا : شمسوين فطور ؟ 

ما جاوبتها بقت تفتح وتكول : شنو بس هذا ؟ 

نصبت صينية سويتها لحازم .. ومشيت حطيتها .. اذن 

امل جانت نايمة هستوها نزلت كعدت .. شافتني حطيت صينية صغيرة اله .. ضلت تباوع : ليش ما كلتي ما اسوي فطور جان سويت 

- ذاك المطبخ وكومي سوي 

- شلحك اطبخ هسه والمؤذن اذن 

حازم : لو حاسبة حساب جهالج وكاعدتلهم من وكت جان كعدتي هسه فاكة حلكج كدامي تتثاوبين وتكضكضين بعمي رجعني .. اهلج ما عدهم غرفة تنامين بيها تجين هنا تفكين حلكج وتنامين وتريدين من غيرج تخدمج وتخدم جهالج ؟ حسي على روحي كافي بزعت روحي والعباس 

كامت تخزرني ودنيا تكله : بابا شنو يعني ما نفطر ؟ 

- دزي اخوج ع الشارع يجيبلكم كيلو كباب ويجي 

علي : ما يفتح هسه ورا الفطور بنص ساعة .. ساعة يلا يفتح 

حازم : كومي شوفي شسوين لجهالج جا هسه اني اكوووم اطبخ كووومي . 

كامت وهي اتمتم .. وتصيح .. 

زقنوبت ان شالله .. سم وسرطان كون اذا ما ياخذج الاول اطيحين بالثاني .. 

صاح هو : ع الداعي كون بجاه هو العباس 

فعلت اذن الطرشة وكعدت افطر على راحتي .. 

صاح هو لعلي وانطاه السمج الكباله وكاله : تحب السمج اكله 

كمت من مكاني رحت جبت الجدر وصبيتله باقي بعد سهم بالجدر صغير .. وصبيته لحازم كاموا ياكلون وامل رجعت طلعت التمن الاحمر مال البارحة خبطت مي وملح وذبت فوكاه وحمته ووياه روبه .. رب السوت الهوسة البارحة كلها جيف ماصخ 

صبته وكعدت هي وسجاد ودنيا اكلوا 

محمد منهم كال بايت .. لو اني مسويته جان صاحن شنو توكلينه بايت . 

مرت ايام رمضان .. 

يوم يجيلي مزاج اطبخ واكثر وانصب سفرة 

ومرات يدوسون ببطني اسوي على كد حازم واعوفهم يدورون راسهم . 

اخر ايام رمضان .. 

لان لود عيد خجرت البيت كامت ما تجي ولا تطب للبيت 

الا ورا الفطور .. فتحملت الجهال وكمت احسب حسابهم بالفطور يومية .. لحد ما بقى يومين للعيد .. 

اني سويت حملة ع البيت كله .. 

الاستقبال المعرض كله غسلته وغسلت البطنه .. 

القنفات غسلتهن و غسلت الكاع والبردات وحتى الحيطان وهيج المطبخ وكلشي بي وغرفتي طلعت الكنتور كله ورتبته من جديد وغسلتها كلها .. 

يومين اني منگعة لحد راسي ..

اجتي امل اني هستوني سابحة وكاعد امدد ظهري احسه تيبس من التعب .. فتحت الباب حازم كاعد كالتله : رايده احاجيك 

- كولي 

- اريد اطلع اني و جهالي ويا بيت عباس اخوي لايران باجر 

- شتسوين 

- هم نزور وهم نتونس بالعيد 

- كم يوم 

- اسبوع اقل ٥ ايام بعد شوف شلون تصير 

- عوفيها هسه خليها بعدين 

- بعدين يمتى غير اريد ويا بيت عباس 

- كتلج عوفيها 

- عليمن غير اعرف السبب 

- ما عدي راتبي نصه كضى ملابس عيد 

- اي عود اصرف عليهم وتناوشني من يصير عدك 

- استغفر الله ربي واتوب اليييه 

- هسه اي لو لا .. عباس منتظر مني خبر .. 

- اديرين بالج ع الجهال شيصير بيهم مسؤليتج 

- خوش 

- روحي 

- مشكور 

سدت الباب .. باوع عليه .. ما باوعتله 

حجه : ملابس عيد اشتريتي ؟ 

- ما جاوبته . 

صارله شكد عايش ويايا صنم هسه جاي يسألني 

اصلا ما طايقته حتى اجاوبه . 

صاح:  احاجيج

كمت من مكاني ورحت للمطبخ 

استهضمت .. مو غيرة بس مو عدالة .. هي يرضالها تسافر لايران

واني محرم عليه بيت الشماعية .. شنو ذنبي ما ادري ...

انخصوا فوك دنيا تصيح على ملابسها وتلم وشتغل غسالة 

وامل تصيح على سجاد وعلي يطلعون بهدومهم .. 

حميت الجاي ووكفت اخوط بيه .. 

اجا للمطبخ .. حجه : اذا تريدين اخذج اشتريلج هسه كومي 

باوعتله : هلكد شايفني فضيحة وتستحي مني ورايد اتطلعني بهالليل ؟ 

- مو هيج بس مو تريدين ملابس عيد 

شلت الجاي ومشيت ورحت لغرفتي .. 

اجا هو اخذ فلوس من راتبه وصاح على امل انطاها .. 

ورجع ما حاجاني .. كعد يباوع بلا صوت .. 

.. خابرتني سهى كمت من يمه رحت للمطبخ .. 

رديت عليها كالت : ها شنو الاخبار 

- لا جديد بس غسل وتنظيف 

- اي بالعباس ظهورنا راحت من تنظيف العيد

- هو هذا الفالحين بيه 

- هو هالخابرتج ما تجين لبيت الشماعية باجر عاد نلتم 

خايبة اريد افتك من صباحية العيد راح يجن خواته كلهن وي طكة البريج وتعاي كضي يوم العيد طبخ ونفخ من صباحيات الله 

- والله اني هم طكت روحي .. اريد اطلع مليت منا شني 

جا كلت استقر واكعد بس مو هيج اتعقدت الشارع صالي شهرين ما شايفة شكله شلونه شكال الفطور شكال السحور 

- وزين لو راضين 

- عساهم لا رضوا 

- هسه تجين لو لا 

- غير اكله 

- اي كليله ولا تحجين برخاوة خليج شوية حدية ذوله ترا مو مال عين واغاتي من يشوفون وحدة حاكرتهم وتشمر عليهم يرجفون ومن يلاكونها مضعضعه بس تريد ترضي يكبر راسه 

- والله شكلج .. حجيج ما تلامين 

- والله جا سمعي مني ترا تلوعت لحد ما دركت 

- وشستفادتي .. المهم عود اساله 

- اشتريتي ملابس عيد 

- اطاني مية الف .. وجايني هسه بنصاص الليالي يكلي تريدين هسه تروحين 

- شني كليله دافنلك عجوز ماخذني بهالليل اشتري من جلاب الشارع ؟ 

- اني هم ما رضيت 

- هم زين جيبيهن منا نزرك اني وياج نروح نتسوك لحد ما نمل طالعة روحي ولج 

- ديلا خل اكله وارجعلج . 

- جا انتظرج عود رديلي خبر 

- خوش 

سديته ودخلتله للغرفة كتله : باجر تكدر توصلني لبيت الشماعية 

- شتسوي ؟ 

- العب شناو ! شسوي خواتي ملتمات واريد اشوفهن 

- تباتين عود للعيد لو ساعة وترجعين 

- لا ابات غير ليلة عيد 

- لا عوفيها .. 

- وليش بالله اعوفها 

اتخصرتله .. مرتك فوك راح تروح وتبات اسبوع برا ما كلت .. جاي براسي تكلي عوفيها 

- ها يعني بدت سوالف الغيرة 

- مو غيرة بس واحد يعدل 

- انت تصيحين اعدل وهي تصيح اعدل اني ويامن عادل ما ادري .. ظالمجن ومحد ظالم غيرجن 

- والله ترضى ما ترضى اني اروح 

- شوفي هالاسلوب انعاد اكثر من مرة ولو انعاد نوبت اللخ والعباس ما تلومين الا روحج .. فجوزي 

- وليش عليه ممنوع وعلى غيري مسموح 

- اني وين اروح 

- واني شني مرضعتك جبتني وحبستني هنا 

- نسيتي سالفتج ترا لليوم ما هلصان منها والحجي باذني واكول الله يشوف 

- ما طوله يشوف جا ما تخاف منه يشوفك ظالمني واني لا ناشرة ولا ادري ياهو الصور 

- لو محاذره وخايفة على روحج ما صار كل هذا 

- هسه شتريد !؟ 

- تكعدين وتسكتين 

- لا والله جزعت روحي ما اكعد 

- شنو معناتها ؟ 

- شلون ما تفهمها افهمها اني هذا الوضع ما اتحمله 

ضحك وهز راسه ودار وجهه تقربت وتخصرت : عود تستهزا بيه انت ؟ 

- اكعدي بابا كعدي 

- لا شو ما اكعد وتجاوبني يلا .. 

ما جاوبني .. كمت طفيت التلفزيون .. 

كام لبست بنطرونه .. واخذ جداحته جكايره وسويجه وطلع 

سمعته ضرب باب الحوش اختنكت منه .. وصلت وياه لهنا .. 

رجعت رمشتلي سهى خابرت 

كتلها .. ما قبل 

- صدك تحجين شني زواج هذا لو سجن 

- سهى راح اطك تعبت منه 

- وانت لهسه ما طكيتي من امداج .. وينه هو هسه 

- عافني احجي وطلع 

- سويها زعلة وتعاي شبيج 

- زعلت وبعدين واني الصوبين كاعديلي شمات اهلي واهله 

- وتحيرين بالشمات 

- سهى هي سهلة .. طنكر وما رجعني 

منين اجيب وياهو اليطني من زاده .. شو هي مرت اخوي الارملة هو الجاي يوصللها مسواكها و يدفع اقساط البيت .. دخليني ساترة على روحي وعليها 

- وهو مستغلج جيف ما تكدرين 

- هم حظي هذا بس خل يصطبرلي بالعباس لا ما سودنته .. سهلة 

- شنو الفايدة وباجر ما تجين 

- اجي شبيج انت .. غير اعرس عليه والكاظم 

- دروحي خل نشوف اذا صدك سويها وتعاي خوش 

- تشوفين 

كعدت اتنطر للوحدة وما طاب البيت 

يابة جمعتله السوالف مال شهر ليورا .. وكمت اداورهن وشفت بروحي مظلومة زايد واني ضاله غسالة طباخة 

البال كام يجرخ .. ويصفط حجي واحاجي روحي الحجي الاريد اگله اله . 

صارت ب٢ وما طب .. 

تسودنت .. مشيت من الغرفة بعد ما اتحمل احس اريد انفجر 

راسي كثر ما جمع حجي وعركات ومتحضره بيهن اله احس مو راس صار قنبلة موقوته .. بس تريد تنفجر . 

طلعت للحوش باوعت سيارته هاي 

جا هو وينه ؟ يسويها وصعد يم امل ينام !؟ 

طبيت الاستقبال ما هو 

رحت حمام .. ما هو .. صعدت فوك غرفة الجهال هم ماكو 

جا وين راح 

امل سادة الباب هسه شلون اعرف هو يمها لو لا .. 

الجهال ٣ تلاثتهم نايمين بغرفتهم لو هو ما موجود جان سجاد نام يم امه . 

بس يمكن قرر يقطع الهجر ويصالحها .. ويجي يمها خاف تروح وما يشبع منها .. اذا ما يشبع شكو خذاني !؟ اغسله وامسحله .. 

تطلع وانطب وتشتغل على كيفها وحتى جهالها ذابة حملهم عليه 

تالي يعوفني زعلانة ويروحها .. خب غير اسودنه 

شلون يربي اهجم عليه للغرفة واسحلنه ؟ 

ياربي شلون بالله .. اصيح واسوي روحي وكعت واطلع من الغرفة حتى يجي للغرفة وياي واكضه واعضه من اذانه ؟ 

شسوي هسه ؟ 

هجيت من البيت كله فتحت الباب للطابق الثاني وصعدت 

وما احس الا هو مادله حصيرة ودوشك ومتمدد بالسطح ! 

هذا عود صدك يحجي ؟ 

ماخذله نسوان اثنين وعده غرفتين وهاج للسطح ينام بهالوغرة ؟ 

.. بس عود شني شارد مني؟ 

وين يطير مني للسطح .. هم الكاه 

وكفت يم راسه وتخصرت 

كتله : عود شني نايم هنا 

فز فزة اتجمد بمكانه وهو يصيح ( سلام قولا من رب رحيم ) 

دخيلك ربي 

- شعدك نايم هنا 

- نعسان والعباس ما بيه حيل طاك طاك طاك نك وحجي خلني انام عمي راضي بالحر بس خل انام صاعدتلي شني مدورتني بابرة ونابشتني 

- باجر اريد اروح 

- يا طركاعة الما تفض 

- ياهي الطركاعة 

- اني والعباس اني بيوم الانطكيت على راسي وثنيت انيييييي 

- اي معناها اروح لاهلي اخلص منيييي 

ما عرفناك ساعة متندم جيف ثنيت ساعة ما ترضى اطلع 

من انت متندم ثنيت ما ضليت عليها شكو دكيت رجل وخبصت العشاير الا تتزوج !؟ 

- مهبول جا لو مو مهبول ما اسويها بس بعد ما عليه حرج 

- اي عادي صحح غلطك ورجعني 

- المباع لا يرجع 

- وياهو الباعني الك حتى المباع  لا يرجع .. اني المباع ؟

- ايهييييي .. اكومن انزل جوا احسنلي الظاهر طابتلج الكعدة بالسطح اشبعي 

كام من مكانه .. مشيت وراه نزل اني وراه 

كال : ها 

- شني اني اريد اروح لاهلي ؟

- يا اهل ذول ما اذكر خذيتج وعدج اهلج 

- انت عود شني تعايرني 

- لا اعايرج صدك حا غير ميتين وبيت ماكو بعد يا اهل التروحيلهم 

- خواتي 

- هو شمعمي عليج غير هالخوات 

- والله مكابل اهلك واخوتك وعمامك ومنين ما ملتي غرفتي وكلهم لامهم حواليك وجاي تحرمني من خواتي الاشوفهن بالسنة حسنة 

-لاب لاب لاب لاب 

طب لغرفتي وسد الباب كمت ادك الباب 

فتحها بسرعة فتت طلع .. وسركى الباب وراه .. 

كمت ادك .. صاح .. نامي اكعدج وكت السحور 

- تكعدني حتى اسويلك سحووور مو .. والله ما اسوي والعباس ما اسوي بعد واسوف بعد ياهي التخدمك وتكسر ظهرها .. روحو عسا البيت خاس مالي غرض ما اشيلن گشاية .. خوش لو لا .. 

كعدت اريد انام ما كدرت افور اجي منا واروح منا .. 

ب ٣ ونص بالليل فتح الباب .. اني كاعدة ع الجرباية ، كتله : ما اسوي سحور 

- اي لا تسوين 

عافني ومشى .. 

كمت من مكاني طلعت وتبعته ودخلت المطبخ واني كاعد اتخصر اريد احجي .. شفت الصينية جاهزة مسوي مخلمة بيض وجبن وجاي 

- منو سوا 

- تاكلين تعاي ما تاكلين روحي انخمدي 

- اريد اروح لبيت الشماعية 

- الله كريم 

- الله كريم هاي يعني ايس يكريّم .. 

- اني سامعها اعبيس اكريم هاذ ياهو 

- صاحبي .. هسه كلي اريد اروح لاهلي 

- اني هسه عرفت ليش طلكاج ذاك عمي طلعتي تموعين الاذان 

- اي وديني لاهلي 

نزلت دنيا .. وهو يكلي : مو كتلج الله كريم 

طنكرت عرفته كاعد يسلكني 

عفت الاكل ودخلت للغرفة .. دزالي لفة وكلاص جاي بيد سجاد .. 

اكلتهن وكمت غسلت وصليت ونمت .. هو دخل صلى واجا نام وراي .. حط ايده على خصري .. ادنيت .. ادنى وراي 

ادنيت صرت ع الحافة .. ادنى .. 

- صحت بعد وكعني .. وخر راح اوووكع 

- وصلت الموت مرتين لعيونج وانت ما مستعدة توكعين من الجرباية على مودي .. شكد نحيسة لعد 

- اي نحيسة وخر .. 

ضحك وادنى ليورا رجعت اتمددت ما اتقربتلا 

ونمت وحواجبي مطابكة حتى اتحلمت اني ادجة حيل بالسجينة وبعدين جبت الطبر وكصصته ووزعته بالعيد .. 

كعدت ثاني يوم الظهر .. 

امل و جهالها رايحين .. الطلعة مالتهم بعد الظهر .. 

كعدت وحدي بالبيت .. خابرني خواتي .. كالن : ورا الفطور نروح تجين 

كتلهن : ما يرضى .. 

- يا صدك يحجي عود وصابرتله 

- شسوي ما يقبل 

- اتعاركي 

- اتعاركت بس هو ما كاعد يتعارك 

- ما كاعد يتعارك شلون 

- يعني شحجي ماخذ الموضوع بضحك 

- هذا مستصغرج وربج عايفج هيج تهوبشين ويكلك طبها مرض تحجيلها كلمتين وتنجب وتسكت 

- وشسوي ما يرد 

- لا اتطبخين فطور سوي سم 

- هو ما راح اسوي شبية مخبلة 

- اي واتعاركي وياه من صدك ولو هم سواها ضحك بزي بكلمه خلي يشيط وطكيها وياه وتعاي اتضلين تترجين منه الطلعة 

- ما ادري اليوم ما اكعد والله شني جزعت من البيت جزعت والعباس 

- طبعا جايبج خدامة يطلعج ليش اذا طلعج ياهي التخدمه وتخدم فروخه 

- فروخه ومرته كلهم راحو سافروا لايران 

- صخام وانت كاعدة وساكتة !؟ وما تحجين 

خب اني منج غير اسويها ظليمة والعباس ادججه 

- والله يجي اليوم وصدك اخبصها .. بعد ما اتحمل اني 

انشحنت صرت فول ورجعت اجمع العركة من جديد بعد ما فشل الحجي مال العركة البارحة ما خلاني احجي .. لا حرام اليوم اسويها دمووووم 

خابرني .. ما جاوبته .. 

خابر تلث مرات ما جاوبته .. 

اجا ب٢ ونص .. اني واكفة بالمطبخ .. 

بدون سلام صاح : مو اخابرج ليش ما جاي اجاوبين ؟ 

- ما اجاوب بكيفي 

تقرب من عندي كلش وكف كبالي ليش ما اجاوبين 

- ما تعجبني 

- افا من تالي صرنا ما نعجب .. ليش ؟ 

- بكيفي 

- شبيج 

باوعتله غير اريد اكضلي كلمة من الصالي ساعات اعيد واصقل بيهن ابالي حتى اعاركه .. كلهن طارن واتجمعن دموع بعيوني 

- ليش تبجين غير اعرف شبيج 

- ما بيه شي وخر مني 

- براحتج 

مشى من عندي حجيت : توديني اليوم 

- وين 

- انت كلت 

- اني شكلت 

- لا تغشم روحك وين وشكلت تاخذني يعني تاخذني 

تقرب من عندي مرة ثانية : شعدج ؟ 

- شني شعدي امل ترضالها تروح لايران واني لبيت اهلي ما تخليني اروح معليه طكت روحي والعباس كافي ما اتحمل بعد ادج روحي وخطيتي بركبتك وخلي ابالك والله فطور ما اسوي بعد . 

- جا لو دجيتي روحج طبعا ما تسوين فطور 

- اي هذا الهامك المهم اسويلك فطور 

- هسه تريدين تروحين لاهلج ؟ 

- اي 

- بكيفج اني حسبالي اخذ السيارة ونروح لكربلاء  والليلة ليلة عيد نفطر ونعيد يابو عبد الله  ونبات ليلة بالفندق والصبح نطلع بوجهنا للنجف نزور الأمير .. بس بعد بكيفج ما طولج مفضلة غيري ورايدة خواتج .. روحي 

- وشوكت انرووووح عود 

- ما نروح بعد .. غير تروحين لاهلج روحيلهن وكعدي وياهن شوف اني ليلة العيد ويامن اكضيها .. يكولون الواحد يكضي ليلة العيد ويا اعزازة هم زين دريت بروحي من اللي التعزيهم 

عافني ومشى كتله :  انت بس تريد تغثني 

حجيتها وانفجرن عيوني دموع .. 

اندار رجع : اغثج ليش جا غير انت التريدين تروحين هالكتلج روحي بعد شسوي ؟ الكتلج لا ما رضيتي الكتلج روحي بجيتي الواحد شيسوي وياج بهالحالة 

- وخر مني .. 

يجر بايدي وامسح بعيوني واكله : وخر مني يلا ما اريد 

- ما تريدين شنو . . باوعيلي خبلة شنو الما تريدينه 

احجي بدون بجي 

- ما اريد وخر 

- يعني لو ما اتهميني وما اريدج واريد بس اخلص منج ويفضالي البيت ما كتلج روحي عسى مو لاهلج لا عساج لايران ورا امل بس فكيني .. بس الما يكدر بدونج شلون ؟ والعباس لو طبيت البيت وما لكيت طولج ادورج لحد ما الاكيج يلا ارتاح 

ما ادري ليش مصاحبتي كابوس كل مرة اطبن اكول ما راح الكاها وروحي اتدورج بلا كيف .. ما اكدر .. بس انت ما تفكرين تحسبين امنعج عبالج اكرهج لو عدي عداوة وياج 

- مو بس هاي انت ما جاي تخليني اوصل حتى للسوك شغلات الي احتاجهن ادزهن بيد الجيران وما يجيبولي مثل الاريدهن احس متفشل مني اطلع كدام الناس 

- لو متفشل منج اطلكج وما اسوي السويته كله خاطر احويج بس مو هذا السبب اعذريني صبا المنطقة كلها شافت الفيديو واتمعنوا بتفاصيلج ويعروفنج مرتي صعب اخليج اطلعين كدام عيونهم بعد الصار.. ردت بس شوي تعدي فترة الناس تنسى ويخف الموضوع من ما اشكي مو مرتاح بس الشكوى لله والله راسي شيب كثر الحجي الاسمعه بس اكول اصبر ما طولج يمي .. المصبرني عليج شنهو غير كلبي هاويج ولازك بيج ؟ 

- بس اني اختنكت من البيت تعبت 

- اي يابويه والله ما جابرج على شغل ولا امرج باكل انت من ذاتج شايلة الهم .. تعبانة عوينة ابو الشغل لابو البيت لابو اهله نامي .. وفني اذا ما اجيبلج عشاج يمج بس سالفة الطلعة صبا صعب خلي الوادم تنسى ملامحج ما اكدر اطلعج كبالهم ويمدون اديهم وياشرون عليج بالفضيحة صعب 

- وراح ابقى محبوسة 

- مو هالاريد اخذج كربله ونجف ازورج ونبات هناك وافرج منين ما يعجبج اشتري غاد . 

- شوكت 

- شو كمتي تسالين ع الموعد مو توج تعاركين تريدين خواتج شو سيسن ؟ 

- مو تكول تريديني 

- يعني بس اني الاريد انت ما تريديني 

- لا بس انت تعبتني 

- بيش تعبتج؟ امس كتيلي ما اسوي سحور كمت سويته بمكانج ابيش متعبج بغداي وعشاي عمي ما ايوديهن ارد اكل من الشارع اخيرلي 

- مو سالفة اكل 

- جا بيش متعبج 

- ما ادري 

- اني ادري .. متعبج بالفراغ .. ابتعدت عنج هواي هالفترة صح يمج بس بينا فراغ تعبتي منه .. يمكن مو ذنبج ولا ذنبي بس مثل ما انت تعبتي اني تعبت اكثر من الصار وحاولت ما احملج الصار ولا اذيج فاعتزلتج 

تعاي 

مد اديه واخذني بحضنه 

شو الله ذب عليه دموع .. تخبل : ليش تبجين 

-مشتاقتلك 

-وعلي مخبلة بالحسين 

ضحك وحضني وخذني للغرفة بدل واخذني بين اديه ونومني على صدره وهو يحضن بيه ويبوسني لحد ما نمت وغفيت .. 

كعدني العصر كال : خلي نسبح غسل الزيارة ونطلع هم يلا نوصل .. 

صدك غسلنا وبدلنا وطلعنا لكربلاء .. وصلن الكراج اذن المغرب صف السيارة ونزلنا نريدلنا مطعم فارغ نفطر انتظرنا نص ساعة يلا حصلنا وكربلاء تذب دخن يوكع على ناس من كد الازدحام 

اتفق ويا ابو المطعم يريدله غرفة بس الليلة يبات بيها

ابو المطعم خابر وشافله ودلاه العنوان .. فطرنا واكلنا على راحتنا ومشينا للعنوان حجزنا غرفة وصعدنا الها ذبينا غراضنا كلها حتى التليفون شمره .. اخذ بس محفظته ورحنا اول ما دخلنا الإمام العباس زرناه وبعدها رحنا ع الامام الحسين رادت تنشك عباتي من الزدحام واني اجر بروحي بنصهن . 

خلصت وطلعت للمكان كاعد كعدت يمه 

كرص خدي : مرتاحة ؟ 

-اي 

-كون تعبانة 

-لا بالعكس كلش مشتاقة للزايرة والله كتبها الي ليلة العيد 

-يعني بيج حيل نفتر لو نرجع للفندق 

-لا علوا نفتر هو اني مختنكة .. بس خاف انت تعبان 

-تعبي يروحلج فدوة 

كومي 

كمت وياه افترينا ما خلا شي بنفسي ملابس اكل حجابات 

ورغم منطيني فلوس لملابس العيد ١٠٠ بس ما خلاني اصرف منهن كال : خليهن الج مصرف لميهن 

ل١ونص يلا رجعنا للفندق 

رغم جنا تعبانين بس شكد جنا مشتاقين لبعضنا ومتلهفين لبعض 

باوعته نام 

فتحت موبايلي جني رسايل خواتي 

ها صبا 

تجين 

ننتظرج لو لا

امداج ما كدرتي تخلي يجيبج

نسيت اكلهن رايحة لكربلاء عفت كلت عود باجر اكللهن خاف هسه نايمات 

الفجر كعدنا سبحنا ونزلنا صلينا الفجر بضريح الامام العباس 

خلصنا وطلعنا للسيارة وتوجهتا للإمام علي .. وصلنا فجر وصباح عيد والمكبرات تكبر تكبير العيد وكبة الأمير صارت كبال عيني 

انشرح صدري وطابت كل همومي بهالصباح 

هم فجر 

وهم صباح عيد 

ويم الأمير

دخلنا زرنا الإمام علي ..

وطلعنا للنجف زار ابوه .. وكالي ما تندلين اهلج 

-هم بالفتحة الثالثة بس ما اندل وينهم كل مرة اجي ويا سهى هي تندلهم اكثر مني 

-خابريها ادليج 

صدك خابرتها ردت نايمة : ها صبا 

-اكلج امي وابوي وين ؟ 

-بالكبور جا وين 

-هو اني بالمكبرة واريد ازورهم 

-شخذاج بهالساعة شوصلاج

-من امس اني وحازم بكربلاء وجينا للنجف 

-ها كولي تصالحتو 

-اي الحمدلله 

- اي الله يثخن لبنكم عيوني 

دلتني على علامة رحت عليها ومشيت عنهم وصدك لكيت كبور اهلي .. وشفت جعفر بصف امي وابوي .. اختنكت 

بودي ابريلك الذمة بس شما اصفن وانذكر كلمتك من تكلي ( هيج شلة حال ) كلبي ما يبريك .. يم امي انت هسه واكيد عرفت السويته بيه وحياتي ما مشت وتعدلت الا من رحت منها . الله يرحمك ما اكدر اكلك غيرها. 

ذبيت على كبره مي 

وقريت يس يم كبر امي وابوي ..

ورجع حازم طلع بيه للكوفة 

زرت بيت الامام علي ومسلم بن عقيل .. ومسجد الكوفة 

الاجواء تجنن .. حيل اتونست 

وحازم جان وياي مثل الاب وبنته شريد يجيبلي ويتفقدني بلفة ببطل مي كبل اطلب خاف حوعانة لو عطشانة 

بعد الظهر توجهنا للبيت وصلنا وكت المغرب .. 

دخلنا بعد الاذان كوة صلينا وذبينا ارواحنا مثل الموتى من النعاس .. 

مرت هالاسبوع الامل مو بيه مثل شهر العسل بيني وبينه 

ما طلع لشغل ابد كابلني وكعد .. لدرجة اخذني لخواتي ساعتين وطكت روحي كتله رجعني اريد يمك ابقى .. صدك رجع خذاني وفتحنا تلفزيون وكعدنا نتابع فلم ومتونسين 

اجت امل 

وشكثر شافت روحها عليه جيف سافرت لايران واني ضالة 

واني اتمنيتها تبقى هناك مترجع ونبقى اني وحازم عايشين جونا لوحدنا بدون هوسة ونك وحجي 

مرت فترة .. شهر 

شهرين .. لنهاية السنة 

احنا امورنا توب تصير مرات مشكلات صغيرة 

واكثرها ويا دنيا وحازم يحلها بيناتنا 

الا ما بيوم .. اني صعدت اريد اغسل السطح 

وشفت تل مال هدوم بالمجاز شتوي وصيفي ما تعرفه شنو 

فردت افرزن الصيفي من الشتوي وعلي وسجاد كاعدين بالغرفة .. سجاد يكله اعرف 

وعلي يكله : والله ما تعرف دسكت لا اشك حلكم 

وسجاد يكله : والله اعرف بس خالو كال ممنوع تكولون 

- شنو يلا بالله 

-امي هي النشرت فيديو مال صبا 

-لا مو هاي .. غيرها مو كتلك ما تعرف 

اني سمعت ووكف شعر راسي طبيتلهم للغرفة بسرعة 

كتلهم : ماما نشرت الفيديو مالتي .. يا فيديو التحجون عنه ؟ 

سجاد سكت وعلي كام يلوفها : لا مو هيج اني كاعد احاجي على موضوع حسنين 

-ماما نشرته 

كاموا يرعدون من الخوف .. ويحاولن ينكرون

عفت من ايدي ونزلت 

لميت غراضي كلهن ولفيت حجابي وكعدت 

لحد ما صار وكت جية حازم طب للغرفة 

شافني بعباتي كال : ها خير شكو 

- ماكو خير بسالفة بيها امل .. ادري كل مرة تطردها وترجعها بحجة جهالي لو عمامي حجو حرجوني جبروني ومخليها .. بس ما طولها بهذا البيت يحرم عليه عتبة هذا البيت 

- شصاير غير افتهم 

- تروح لولدك وجهالك وهم يكلولك ويحجولك شلون امهم نشرت الفيديو مالتي بالمنطقة 

- يا فيديو ! 

- اللي راد كلبك يوكف الا شوية من دريت بيه منشور .. اعذرني لهنا وما اكدر اكمل وياك .. واكلها الك بصريح العبارة لو طلاكي لو طلاكها بدون رجعة 

مع السلامة

عفته كام يصيح وراي جراني 

جريت روحي منه .. وطلعت من البيت .... يتبع