مشيت لبيت الشماعية 

دخلت فايرة فور رغم الدنيا باردة جانت .. شهر ١٢ نهايته

اتكتني نونة ركضتلي وهي تحضني : اجت عمة صباااا 

طلعت امها : هلا شوكت اجيتي 

سلمت عليه شافتني متضايقة 

: خير شكو ؟ 

- تعبانة 

- صاير شي ؟ 

- والله ما ادري شگلج اني عقلي يبس معقول انسانة يطلع من عدها كل هالسم والحقد !

-شكو

-الواحد يفعل ما يفعل ويجوز يغلط 

بس توصل بيه للفضيحة والشهيرة وطعن اعراض ؟ ما تخاف لو كاتليني دمي يصير برگبتها ؟ 

-يا اسم الله كتل شنو شصاير غير تحجين ؟

خذيتي گلبي 

-تذكرين سالفة الفيديو مال عرسي اللي انشر وحيدر اجالي طكني وحازم وصل الموت 

- اييييي ؟ 

- مرته هي الناشرته 

-صخااام .. صدك تحجين 

-اي والله 

-شلون عرفتي !؟ 

-جهالها الحجو 

كاعد احجي اتصل حازم 

طول الطريق ما رديت عليه ، هسه شلت التليفون ورديت 

صاح : ويييين رحتي 

-اني ابيت الشماعية 

-صبا اطلعين بلا رضاااااي ادوسيييين على كلمتي واطلعين 

-حازم انت وكلمتك فوك راسي ومو قصدي اقلل منك بس اني وهاي المرة ما راح نبقى سوية على ذمتك واختار اني لو هي 

-ولج شني الحجي هاذ رايح اني هسه وانعل سلفا سلفاها لابو الجابها لابو 

-تنعل وتفعل الحجي هذا ما ينفع ويا امل 

روح اتعارك هوس صيح وحتى اكتلها مراح يغير منها شي .. حازم هذه الإنسانة سواااااد 

وهي تريد ضرتي وكتلي وبلكي يغسلون عاري 

ردت انت تموت .. كلبك راد يوكف 

الفضيحة الجابتها اليه بأسمك 

مرت حاززززززم .. 

-هاي الامور اني اتصرف بيها وراح ارضيج 

-لا .. ما يرضيني غير طلاكها .. او طلاكي 

اثنينا ما نرهم 

-منو كال هي صح صالي ساعة احجي ويا علي وسجاد ما يحجون احجاية الحك منين اخذها اذا هم الجهال ناكرينها هددتهم صيحت ما يحجون 

-خالهم يدري وكايللهم ممنوع تحجي 

حط العباس بيناتهم واخذهم حلف للعباس واتبين السالفة انت اللي اتحلها الجهال ميجذبون وامل هي ورا السالفة متأكدة 

- راح اتخبل بالعباس .. امل تسويها وتشهرني صبا مهما يصير بيناتكم وضرتج وتكرهج بس ما توصل تضرني ما ادري تسويها وتوصل هالمواصيل وياي .. عقلي راح يوكف 

عفتيني وفكرتي بروحج ومشيتي 

لو وكعت وطحت ووكف كلبي لا تجين لفاتحتي 

لان لو اهمج جا ضليتي وياي 

- حازم اني مو بس اضل وياك اني اشتريك بروحي بس اذا ما يرجعلي حقي بيتك ما اطبه .. اني اريد حقي . 

سداه ما رد عليييه 

ضليت اصفصف وشهلاء تباوعلي : ها 

- يكلي شلون عفتيني 

- وصدك شلون عفتي البيت وطلعتي 

- واضل بعد الصار كله 

شهلاء اني صالي ٦ محبوسة بالبيت من ورا تشويه سمعتي عمامة كلهم طعنوا بيه .. 

- بس هو ماله ذنب 

- اعرف ماله ذنب بس من اني يمه يتهاون كم مرة يطردها وترجع وما يحجي .. هم تكضي بعركة وهوسة ويومين حب خالك حب عمك ويتصالحوووون ؟ هاي سمعتي الطعنوا بيها حازم لو شما يكون يضل زلمة الزلم كلها تشهدله شكثر كلف واخو خيته .. اني اللي اهله وعمامه وجيرانه والكل تاهميني اذا ما اطلع وتصير هوسة .. وتنذاع السالفة حقي ما يرجعلي 

- هم حقج .. الله لا يطيها كون فوك ما ذابة بزرها على كلبج وانت تشيلين وتتحملين وهيج اتسوي وياج 

- مريضة كلبها مريض  بالحقد والانانية ما تفكر بالله ولا تشيل هم حلال وحرام .. نفسها وبس بس ادعي الله واهل البيت اليطلعون حقي منها ويشفون كلبي 

عبن والله اني ما اذيتها 

والعباس ما فد يوم دورت وراها لو حشيت براسه عليها لو شكيت وكتله شني اني اتعب للبيت وللجهال اكول لله مو لعبد واني بطرك روحي .. اتضرني ليش 

- زين مو هي الكالتله روح اتزوج من انزوج تسوي هيج 

- حظي بعد جا هو ويامن كعد حتى يكعد وياها 

- لا اظلين اتندبين حظج يمعودة حازم ذهب 

- ذهب ومسمماتني بيه .. شتهنيت بزواجي وياه . 

ضليت على نار فكري يودي ويجيب 

ساعة اكول عفت حازم وطلعت وساعة اكولن احسن حتى يكوم على حيله ويفض هالسالفة. 

لشوية غاد ... خابرته 

رد عليه وهو عصبي كلش صاح : هاااااا 

- شبيك 

- بيه مرض .. سرطاااان 

- صاير شي عرفت شي 

- صبا روحي هسه 

- حازم اني طلعت بس بالي يمك وما ادري كلبي واجعني عليك 

- دروحي هسه بعدين اخابرج 

سديته منه .. 

خابرت على سهى ردت عليه : ها ام العلوم 

- ها سهى شلونج 

- زينة .. اكلج ما طول اليوم خميس ما تروحين للشماعية ونلتم 

- هو اني ابيت الشماعية 

- عليج العباس ؟ شوكت اجيتي 

- كبل ساعتين

- خير اكو شي 

سولفتلها  كالت : وام البنين عرفت شني جا الله شافوه بالعين .. ياهو اليعرفج غاد ؟ حتى يكولون مرت حازم .. معروفة السالفة وراها نواغيص 

- ما ادري كلش كاشة منها وكاشة من البيت وحتى من بزرها .. 

- بزر الشوم امداج وامدا كصتج تركضين الليل والنهار واتحطين بحلوكهم وتصيحييين لـ لله خطية امهم هاملتهم .. دهاج يدرون بسوالف امهم ويدسترولها وانت طيحي بيها يغمة 

- اي والله غمة .. ولج حتى الجاهل يعرف وضامين بيناتهم .. بس ولو جهال شمدريهم السوس من امهم 

- دضلي برري وصيحي جهال خطية .. لحد ما وصل هذا حالج وما اوصيج كضي عباتج واركضي وصيحي حازم خطية .. وحازم يهوبزله يومين يكاونها والثالث يصم حلكه ويسكت ويعوفها تصول وتجول . 

- خابرته كبل شوية نار 

- عساه وابو زايد 

- لا سهى شبيج ادعين عليه ليش شجاج غير رجلي 

- جا رجلج ما هجرج بالشهرين والله كاشة روحي منج تاليتها كل الدود من مرته واكص ايدي اذا مو هاي بته ام الدود هم وياها 

- وهو شمدري بيهن 

- ومن راح يدري راح يكحل العين شعده غير يعارك ويصيح وتروح لاهلها 

- لا خيرته هالمرة لو طلاكي لو طلاكها 

- هاي اني وهاي انت اذا ما قشمراج بكلمتين يخليج اتسحين وتسلمينها اله يمنه ويسرى ما اطلع اني .. 

- جا شسوي هم ما يطيني كلبي عليه سهى هذا حازم مو ياهو الجان لو مهما صار بس ما يطيني كلبي عليه .. بس هالطلعت شسوي اكثر 

- التسويته تشرطين يسلمج ورقة طلاكها بيدج وشرط جهالها لا الج غرض بيهم ولا تجين يمهم عسى ما يخيسون ويگملون عدهم ام يولون يمها وهي اداريهم .. غير هيجي لا تقبلين 

- يا ولو طلكاها يطيها جهاله حازم واعرفه يخليهم يمه 

- اي خليهم خل يكعد من شغله يكابلهم .. دشوفي شلون اذا مو بيومين يشمرهم على كلب امهم ويصفالج البيت بس الج 

- اني الجهال حتى لو كاشة منهم بس ما احط عقلي وياهم خصوصا علي اني احبنه وامهم هاملتهم جا اذا الام ماخذها شغلها واني اخذ ابوهم .. يعيشون يتامة ومجربة عيشة اليتامة ما شبعنا ضيم هاي واحنا كبار جا شلون وهم صغار 

- اي اي ضلي عفية خل يطيح حظج زايد ضلي .. اروح اخابرنه واجي حتى اغسلج غسل وعلي . 

سدته مني 

واني ضليت كاعدة واصفن 

ساعتين اجتي هي وجهالها .. وضلت بس تلوم بيه وتحذر بيه ارجع اذا مو طلاكها بيدي .. 

ما جاوبتها .. 

ما ادري اني طلبت الطلاك من حازم وضلت يمه .. يطلكها 

بس اذا ما طلكاها وبس تعارك وياها شراح اسوي هم ارجع 

يعني واذا ما رجعت شراح يصير 

اني اهوبز واهمبل بالواقع ادري بروحي ما اكدر على فراك حازم يوم لو مو امل لو اعيش بنص حيايا وعكارب .. رجلي احبنه مو بيدي .. بس اكول عسى ولعل يسوي حل 

لليل خابراني 

رديت عليه الـ الو اجتي بتعب وحيل مهدود 

بسرعة جاوبته : ها يبعد حيلي 

- يا حيل ولج بالعباس ما اصدك .. مرتي الخلفت منها ولد وبنات وبيني وبينها زاد وعشرة عمر .. هيج تسوي وياي ؟ بس حتى تخليني اطلكج تنكس راسي كدام الوادم 

- شصار كلشي يعني عرفت 

- ما عرفت كلشي بس العرفته هي 

- شلون 

- طلبت من عمي الحبير ياخذ عباس وامل ونروح للامام العباس ويشدور الراية ويحلفون ان شاءالله العباس يطكهم اذا هم ورا سالفة النشر .. لما راح عمي الحبير عباس تعذر ما رضى يروح وابوها ما رضى امل تمشي 

رحت عليهم للبيت ردتلي زلمة يطلع فشرت وغلطت على بيت عمي حتى عمي ما طلع .. طلعوا عمامي المنا ومنا جروني من البيت .. ومن عين باجر اجيب سيد واطلكها وانعل والد والديها . 

- وجهالك ؟ 

- ابيت محمد حتى دنيا ممنوع منعا باتا تشوفهم لو توصلهم بالعباس افصمها فصم .. على سوايتها هاي يحرمون عليها جهالها وخلي سوالفها النكسة تفيدها .. ولج ردت  اموت وصلت الموت من ورا سالفة الفيديو واني بالمستشفى وهي تروح للسوك والله محد عدي يلزم المحل .. تالي تطلع هي سبب وكعتي ! 

المثلها ابقيها على ذمتي ليييييش 

- لا تقهر روحك هاي كافي خلي تولي .. 

- صبا تعبان كلش رايدج يمي 

- عادي تعالي هسه خل ارجع وياك 

كاعد احجي سهى هنا .. صاحت سهى 

: هااا يا تعال جا اني المن جاية 

وبعدين هيج فالتو اطلعين زعلانة وتردين بسهولة هيج 

عمامة الوكفوله الا اطلكها وينهم ؟ خل يرجعونج .. خل يردلج هيبتج مو معدون يدكولج بكل بيت طبل ويطعنون ابختج 

- سهى كافي .. اشششش 

كمت منها 

هو سمع كلامها كال : عوفيها حجيها هم صح حقها 

لازم اروح لعمي يجي وياي ارجعج من عمج .. ما طولها موجودة اخذي راحتج بويه .. اني باجر امر العمج ومناك اخذنج افترهي ويا اخياتج 

- وانت شلون 

- راح اروحن يم امي ابيت محمد 

- اي لا تبقى بالبيت عليك العباس 

- والله ما اوعدج اني اتعودت ما انام الا بفراشج من اغيرنه ما ارتاح 

- سودة عليه يبعد عمري .. جا من تروح للبيت خابرني 

- ان شاءالله دروحي هسه اخذي راحتج 

سديته وسهى تصيح وتقلد  : من ترووووح للبيت خابرني 

امدااااج بعد بعد اضعضي وارجفيله وغمي كصتي لو احترمج 

ولج ذوله الزلم ما يحبون التخضعلهم وترجف عليهم .. يحبون التشلع كلبهم 

- وانت مجربة كل الزلم وتعرفينهم يا سهى .. هاي امل شلعت كلبه شسوالها ؟ وكفه جهال عشرة .. هالهجره وخذاني وكابلاني وباعها 

- وهي المستفادة كاعدة ابيتها تاكل ع الحاضر وتطلع واطب وتنام بكيفها وبمزاجها 

- ولو مستفادة اتسوي السوته بيا وبيه ؟ هي الدنيا كلها فلوس لو كلها اني ونفسي وانانيتي .. اني الدنيا عدي حازم لو راح تصير دنياي جهنم هو الطلعت بيه بعد كل اسنين المرار العكبتها 

- دخلي حازم يفيدج لعد 

سكتت عنها 

هي تحجي من باب متلوعة من رجلها ولعبانة نفسها من الزلم كلها من اكله احبه تستهزأ .. ما عايشة شعور المحبة الرجلها اللي اني اشعر بيه لحازم .. شعورها يشبه شعوري من جنت ويا عدنان متحملته بس اسمه زلمة بس مو ذيج المشاعر اللي كلبي يوجعني لو اتأذى وما اتحمل اعوفه بلا عشا واني زعلانة ويا كلبي ما ينطيني اعوفه  احسه ابن كلبي بينما من جنت ويا عدنان وازعل .. اكول عساه يتسمم ان شاءالله وافتك منه ابد ولا افكر واكو خطية خاف ينام جوعان واشيل همه واني زعلانة منه . 

لليل ب١ ونص خابراني 

كالي : ها نمتو 

-اي فرشنا 

-البيت ما ينحمل بدونج .. ثقي بالله يمكن تمر ايام احنا متزاعلين وواحد داير عن الثاني بس والعباس من تكومين مني وتروحين للحمام اضوج .. اريدج يمي حتى لو زعلان منج .. شلون وهسه انت بايته بعيد عني 

-جا كتلك تعال 

-باجر بحيل الله اجي 

ضليت اسولف وياه لحد ما كام يغفي ونعس كلش يلا سديته من عنده ... 

ثاني يوم خابراني عمي كالي : تعاي ليجاي خابرني حازم رايد يجي هو وعمه عدهم سالفة فهميني شنهي السالفة 

لبست اني وسهى ورحنا لبيت عمي .. 

سولفتله الصار كله كال : ما طول طلكاها ارجعي ويا رجلج وسدي السالفة لا اظلين اتنعثلين بيها 

حجت سهى : يمتى طلكاها والله من ورا كفا السانة طالك طالك وبعدين يكولون هااا ما محسوبة مو جانت بحالة عصبية لا والله عمي السوت هيج باجر تسوي اكثر .. تشرط عليه ما ترجع اذا مو ورقة طلاك امل بيد صبا 

- جا اكل للزلمة جيب ورقة طلاك يالة ترد 

- اي .. ما بيها شي ما ترجع مو هجرها شهرين 

خل يهجرها مرة لخ لحد ما ينطيها ورقة طلاك امل تعويض ع الصار 

شوية واجا حازم وامه و عمه ومرت عمه 

طبوا سلموا .. واني اتلكيتهم سلمت عليهم كلهم 

وعمه اتعذر من عمي على الصار وكام يذم بامل والمرة طك مخها من رجلها خذا عليها وغيرة النسوان مصيبة ومن هالحجي 

اني رحت جبت الجاي واجيت .. 

كاعد افر انطي .. كض ايدي حازم وكال عنج 

وعمي صاح : ولك سويسوووو 

صاحله من الدكان .. واني جرني حازم اشرلي اكعد 

ردت اكعد يمه امه صاح : صبا 

انداريتله : ها يعيني 

ابتسم واطاني علاكة 

اتقربت وخذيتها منه فتحتها لكيت بيها بتوت .. ووصل سعر البتوت مليون ونص : شنو ذني 

حجه كدام اهله واهلي : هدية الزعلانة 

ضحكوا هم واني خجلت وابتسمت 

وامه تكلي : جا بعد شتريدين هالجابلج ابتوت ذهب يراضيج بيهن 

- راضيه وياه من غير ذهب ... العده ذهب ما ينغري بذهب ثاني

ابتسم هو وهز راسه ودنك 

وعمي كال : الله يديم المحبة عمي احنا شنريد ما طول هي ورجلها متصافين 

حجت سهى : ما كلنا باطل هم متصافين عمي بس منو ابيضمنلهم ما يخرب صفاتهم وحياتهم بمشكلة اخرى مثل ما سوت بالفيديو 

حجه عمه : طلك البت بعد شيسويلها 

-طلاك حبايب جم يوم بوس عمك بوس خالك 

واذا تكول صدك طلكاها اطينا ورقة طلاكها 

- وتريدينه يطلكها بالمحكمة 

- اي ليش ما يطلكها بالمحكمة جا بس طلاك السان حتى اختنا المصروب راسها ترضى وترجع بسيت بتوت وتالي بعد يومين هم تدهرب وتذبلها مصيبة هاكداتها وتعالوا يا عمي شيلوني وهم ترجعون تكضون روسكم لو اطلكها لو تغسل عارها

-وان جانت امل الها ايد بنشر الفيديو بس بتنا هم مو بريئة والا وحدة لابسة مصلخ وتركص للكامرا يصير فعل بنات بيوت هذا 

-جا شني فعل بنات ملاهي شني بناتك ما يركصن باعراسكم لو اسم الله عليهن وحدتهن فاطمة الزهرة معصومات لا يهزن ولا يدكن .. رايد تبري ذنب بت اخوك وتذنب اختي هاي وهي بعدها هنا جا شلون لو رجعت و مرت ايام .. هم اتسرسح عليها ذيج السعلوة مثل التفلة المالها درب ؟ 

كام عمه يتحاجى ويا سهى 

حتى عمي ما رضى بحجيها سكتاها عمي كالتله : يصير خير 

رجعت وجان هذا اليوم عمه عازمنا اني وحازم على عشى ابيته .. استقبلتني مرت عمه وجناينهم .. وكضيت ساعتين عدهم وكمنا رحنا لبيت محمد .. كعدنا شوية واخذنا الجهال ورجعنا للبيت 

كالي : اريد عينج واذنج عليهم وحسج عينج اسمع امل جايتهم لو رايحلها .. لا اخليها تزوع دم من القهر والعباس بس خل تصبرلي . 

لا تقصرين وياهم .. اذا اتحبيني راعيهم 

- اخليهم بعيني لا تفكر. 

صح هو يوصيني بيهم بس الجهال مقهوين جيف طلك امهم وجبرهم يرجعون للبيت ومنعهم يشوفون امهم .. ذنب الكبار طاحوا بيها الصغار .. 

ثاني يوم طلع حازم ودنيا وياه وصلاهم للمدرسه بطريقه 

وعلي ظهري نايم بغرفة امه .. 

خابرتني سهى .. 

رديت عليها كالتلي : ها شسويتي 

سولفتلها 

كالت : وما ناوي يطلكها ورق 

- ما ادري ما كلتله 

- زين انت شوكت تعقدين محكمة ؟ 

- ما ادري ناسية هالموضوع اصلا 

- يمها ما رايد يطلكها ورق ويمج ماخذج بس سيد بدون عقد محكمة 

- ما ادري اكله 

- هو انت شنو الحجيته وياج وكتيلي ادري خليج كلشي ما تدرين وذيج مرته وام جهاله وانت خلك وحدة ماخذها بعقد تخدمه وتخدم جهاله وتنام جواه 

- ليش تحجين هيج 

- جا فكي حلكج طالبي كليله اريد اعقد سيد .. هسه يكلج ما يصير عقد زواج ثاني الا بموافقة الزوجة الاولى .. كله اطيني طلاك امل وعقد زواجي .. لو امل احسن منج متزوجة محكمة وانت بس عقد . 

- اگله من يجي 

- مو تنسين .. لا تباتين على حقج ولج اذا ما تحطين طلاكها بيدج وعقد زواجج بالياد الثانية ما يتسمى طلاك ولا تتسمين خذيتي حقج منها 

خلتها ابالي ضليت افكر 

صدك جا اني بس عقد سيد و امل عقد محكمة .. 

لازم اكله يعقدلي محكمة ويطلك امل 

رجع الظهر .. هو يبدل ويسولف 

يكلي : متغدي لا تصبيلي غدا بس خل انام ساعة خابراني واحد يريدني اسويله كهربائيات بيته كلها مشتغلهن مهندس ومسكطهن ومنطينه رقمي كالي اطيك مليون بس انت تسويلي خريطة الكهرباء مالتي . 

هو يحجي واني افكر بالسالفة كتله : اي ان شاءلله دكعد حتى اصبلك غدا 

صفن بوجهي : ها صبا 

- ها 

- بالج وين 

- وياك 

ضل يباوع عليه : اكو شي يابه احد ضوجاج 

- لا ليش 

- اشوفج مشوشة وتفكرين 

- لا مو كاعد افكر بعقد 

- عقد شنو 

- هسه دكعد خل اصبلك غدا وعود احجي 

- مو كتلج متغدا ويا ولد صاحبي 

- يا جا غير تكلي 

- اها !! 

- هه شبيك 

دنك اخذ وجهي بيده وباس خدي 

: احجيلي الشاغل بالج شنو 

حجاها وهو يفتح غطاه 

: حازم احنا ما عاقدين عقد محكمة بس سيد صحيح 

عقد حاجبه : ايييه 

- خل نعقد 

- وشذكرج بهالسالفة 

- هيج اتذكرتها 

- اتذكرتيها لو احد ذكراج بيها 

- وشنو الفرق 

- سهى 

- صح كالتلي 

- صبا يمتى اتجوزين من اختج 

- اختي هاي وبعدين شفت حجيها صح 

- سهى اذا ما خربت بيني وبينج فلا اني اتسمى باسمي 

-وهي رايده خرابنا لو رايدة مصلحتنا 

- هاي اخطر عليج من امل والله .. هاي كاعد اتمشيج بكيفها شتكلج تجرين وراها 

- افتهم من كلامك هذا ما تريد تعقدلي 

- يمعودة لفة مخاكم ومعاملات وهوسة 

- وشنو يعني غير عقد زواج 

- اي ولازم موافقة امل من كل عقلج اني اروح لامل اكللها تعاي وافقيلي بزواجي لو تعال حط محامي وجيب وودي 

- لا ليش توافقلك .. انت مو طلكتها !؟ 

- بس بالمحكمة ما مطلك 

- وشنو معناتها مبقيها على ذمتك بالقانون ؟ 

- مو كتلج سهى راح ادير عقلج وتشوشج 

- عوف سهى ليش ما اتطلك امل بالمحكمة 

- الج مني طلكتها وطردتها وحتى من جهالها حرمتها بعد شتريدين اكثر من هيج 

- اريد ورقة طلاكها 

- مو انت تريدين سهى تريد والما سوته بكعدت امس حجته براسج اليوم ودفعتج 

- وليش ما تطلكها وتعقدلي مفضلها عليه 

- مفضلها عليج شنو ما عدي وكت اروح محاكم وهوسة ومعاملات فكيني 

- هذا مو سبب انت ماعد تتحجج 

- صبا تعبان ووراي شغل رايد اطلع 

- معناها كاعد تتهرب 

- الله كريم عود احلها بعدين 

يحجيها ويسحب الغطا فوك راسه 

جريت الغطا ..

: لا ما تفض بالله كريم اريد عقد زواج 

- كومي يلا خل نروح نعقد هسه ونجي امشيي 

- كاعد تستهزأ بيه 

- صبا كاعد اكلج تعبان والله 

- اي اعقدلي محكمة وطلك امل 

- ان شاءالله 

- معناها صدك لو كالت ماخذج بعقد خدامه اله ولجهاله 

- انت خدااااامة اني مخليج خداااامة .. ولج شايلج بعيوني وتكليلي اني خداااامة .. خداااامتيش 

- جا شيسمونها من ما تعقدلي محكمة 

- والعقدنا والما عقدنا شراح يصير يعني 

- ما اني هيج اريد 

- مو انت سهى هيج تريد 

- حقي لو مو حقي 

- الله كريم وسالفة اني خدامة ما اريد تنعاد افتهمتي لو لا مو تحجيها براسج ذيج وتجين جنج ببغاء تسطريهن يمي .

-لا من ما تعقدلي معناها صدك اني خدامة والا ليش ما تعقدلي محكمة 

- بهالمناسبة فركيلي ظهري 

-دكوم حازم كاعد احجي وياك صدك 

-اي والله بس حكيلي منا 

-حاااازم 

-عليج العباس بس حكيلي 

-اهووو اني وين وانت وين 

حجيتها واني امد ايدي لظهره 

وهو يكلي .. لا انزلي شوية .. بعد شوية يسره يسره 

اي اي شوية جوا ... ايييييي حيل حيل 

-حكيتها يلا اريد اعقد 

نايم على بطنه شال راسه اندار باوعلي 

ضحك 

- شبيك 

- تعالي يمي 

- حازم لا تسوي هالسوالف اريد تعقدلي 

- هسه مو كتلج الله كريم 

- مو اني اعرفها الـ الله كريم يعني آيس 

- لا استغفر الله تعاي .. 

اخذني بحضنه حجيته : اطلك امل وتعقدلي غير هالحجي ميصير 

- خادم 

- لا تكول هيج 

- جا شكول انت مو تستعرين من خدمتي وتصيحين شنو اني خدامتك يا عمي اميرتي واني خادمج بعد . 

ابتسمت : بس ما تضيع الموضوع الاصلي 

- عوينة ابو سهى وعوينة ابو افكارها التخليهن وتكلب حالج بيهن 

- لا تحجي عليها غير اختي اخوك شلونه عاد لو خواتك يطيقني امس كوا عليه مستقبلنا 

- على كيفج عمي شسوالج 

-معليه هسه اريد طلاك امل وعقد زواجي 

حجيتها وهو يحط وجهه بركبتي ويغمض 

سكتت .. تنهدت .. رفعت ظهري شوية عنه ذب ثكله عليه وحضني باثنين اديه .. كمت امسد على راسه واحاول انومه .. 

لحد ما نمت وياه 

للعصر كعد هو واني احضرله وانطي هدوم وغراض وارتب وياه وهو يبدل واحجي بهالسالفة وهو ما على السانه غير الله كريم 

مر ثاني يوم .. 

ما سوا شي 

عاد رجع لكاني مطنكرة 

اطيته الغدا ما كعدت كباله كام يصيح : وين .. اكعدي 

- ما اريد 

- صبا لا تعقدينها 

- انت الجاي تعقدها .. وما طول مكتفي بامل خليك الها 

- يا مكتفي رحمة لربج .. غير طلكتها 

- اي ورقة طلاكها وين 

- اطلعلجياها وعلي بس اصبريلي والله هاليومين عدي شغل 

- شغل اهم مني 

- مو اهم منج هسه اني كايل اكو شي اهم منج بس انجل هالموضوع شوية بس اكمل الشغل والعباس اكمله 

- شوكت يكمل 

- هالاسبوع بس 

- نشوف 

- هو اصلا هيج هيج هالاسبوع جرد وماكو محاكم تعقد لحد ما ندخل السنة الجديدة . 

.. مر اسبوع وهو التهى بشغله واني لهيت عن السالفة 

وطاري امل ابد ما ينجاب بالبيت ومرتاحة كلش الرجال صار دهن ودبس وياي .. حتى سهل ابد مو صعب اطنكر اضوج انك ميتعارك .. يحط ايده على خده وينتجي ع التخم ويكعد يستمع لطناكري وخبالي من اكمل يكوم يبوسني ويكلي : شتريدين اني خادم تأمريني امر 

وتنتهي المشكلة . 

فد يوم من الايام جان ظهر وحازم بعده مجاي 

واسمع دنيا تسولف فوك .. تبسبس 

فكمت صعدت حتى اشوف ويامن تسولف لان اخوتها مموجودين علي بالمدرسه وسجاد بالاستقبال ع التلفزيون 

صعدت والكاها حاطة التليفون على اذنها ومندمجة تسولف 

حجيت : ويامن دا تسولفين 

فزت وحطت التليفون وراها 

: مو ويا احد 

- تليفون منو هذا 

- معليج وخري لا تدخلين 

- ما ادخل شلون وابوج موصيني عليكم 

انفتح صوت وهي كاعدت ستد بالمكالمة صوت ولد 

بسرعة سدته وتكلي : لا امي ولا الج علاقة بيه افتهمتي لو لا يلا ولي .. 

- راح اولي بس راح ابلغ ابوج بالتليفون اني ما اتحمل مسؤليتج بعدج صغيرة وتليفون سري وشباب .. ابوج يتفاهم وياج 

- لا عليج الله والله ما عندي شي هذا ابن خالي والعباس ابن خالي 

- اطيني التليفون 

- والله ابن خالي 

- اي انطيني التليفون 

انطتني وهي تكلي : عليج الله لا تحجين لابوي والله يكتلني 

- ما اكوله بس حبيبتي هالسوالف عيب ومتفيدج والله شحصلت اني من الزواج واني اصغيرة خو العمر كدامج ادرسي واجتهدي ودخلي كليه وعود ذاك الوكت فكري برجال وزواج هسه وينج ووين الزواج 

- مو زواج والله هو بس ابن خالي 

-ميخالف حتى لو ابن خالج ميصير عيب افتحي كتبج واقري بلا وعوفي هالسوالف مو مال عمرج 

خذيت التليفون منها .. 

ومشيت ضميته فوك الكنتور مالي جوا البطانيات الناضدتهن 

خابرتني سهى  وبقينا نسولف وذكرتلي سالفة العقد 

اتذكرتها صدك شو هو كالي اسبوع وهاي مرن اسبوعين ودخلنا سنة جديدة و هو كلشي ما سوا 

من رجع جان تعبان .. 

بي فتحت الموضوع وياه كام يصيح 

اني بيا حالي ميت تعب وانت تكليلي عقد .. 

عوفيني هسه

عاد هنا كضيتها طنكرة 

ما كعدت يمه ثانية عفته وضليت ساكنة بالاستقبال 

يوم الثاني واني دايرة عنه وما احجي .. 

هو اتخبل .. من زاعلته وكمت ما احاجي 

ثاني يوم ماخذ اجازة من الدوام ومتعني للمحكمة .. طلك امل غيابيا وكتب ورقة طلاكها وجابلياها وكالي : هاج هاي ورقة طلاكها بعدددد امني وعقد زواجج لازم طلب وادز علينا المحكمة يلا نعقد يحتاجلها صبر وركضة محاكم . 

فرحت .. طرت بالورقة من نفذلي الاريده وجابلي ورقة الطلاق وراح يقدماي عقد زواج .. 

من طلع خابرت سهى بشرتها كالت : عفية هيج اريدج 

هسه اريدج ادزين الورقة برقية لبيت اهلها 

-لا خاف حازم يضوج 

-يضوج ليش هو غير مطلكها !؟ 

-لا مالي علاقة اذا يريد هو ينطي 

-لعد روحي وانطيها لعمتج 

صدك مرت عمتي انطيتها ورقة طلاك امل 

وكتلها تسلمها الها

ما حجت عمتي خذتها وهي تلوم وتغلط على امل وعمايلها 

دخلت للبيت فارغ بس اني ودنيا .. 

سحبت التليفون من فوك وردت اشوفه شنو محتواه 

جان التليفون ملون ابو الكاميرا 

ومصوره وهي بكيمونة ومصورة جسمها وهي نايمة على بطنها وصدرها محصور .. صور مو مال عمرها ابد 

خو الرسايل متنقري 

نصها دارميات سخيفة

واشكال الوان الارقام 

دخيلك يا ربي بنية بهيج عمر ينراد الها ام اتراقب وتحاسب بالله هاي اذا غلطت احد يلومها لو يلوم امها التفكر بس بشغلها وفلوسها 

شلت التليفون رجعت ضميته وطبيت سبحت 

واني اسبح والكهرباء طافية سمعت باب غرفتي انقفل .... يتبع