اصابو زهول شديد لما لقاها قدامو واقفه على رجليها بتبصلو بتحدي وقوه متخيلهاش.. افتكر انو كسرها جاب مناخيرها الارض ومش هتقدر تنزل الشارع تاني وهترجع تترجاه علشان ترجع بنتها حاول يتكلم من شده صدمته وقال...انتي احم...انتي غيرتي اليافطه ليه يا احكام...ابوكي الله يرحمه راجع من الموت وبتفضيلو المكان

احكام ابتسمت بسخريه وقالت..اللي خلف مماتش يا معلم جوده...انا عايزه المحل وانت تشكر قوي لحد كده اتفضل بقى انقل حاجتك

جوده بصلها بدهشه وابتسم باعجاب زي العاده وبص للناس اللي متجمعه وقال..كل واحد على شغله يا رجاله..دي امور عائليه وهنحلها

احكام بصتلو بسخريه وقالت بسرعه..لا عائليه دي في التقليه اللي بتعملهالك نوال مراتك بنت..بنت الاصول مش هنقول حاجه تانيه..انما احنا مفيش بنا لا عائليه ولا ملوخيه اتفضل وريني عرض كتافك 

قالت كده ودخلت المحل 

جوده اتحرج وسط الناس اللي واقفه وقال بزعيق....ايه...ما قولنا كل واحد يشوف حاله....ولا راشين الغله هنا للكتاكيت

وبالفعل كل واحد مشي على شغله وهو دخل وراها المحل ولقاها بتشيل حاجتو وبضاعتو في كراتين بغضب

قال بهدوء....ده محل عطاره ونص العلب قزاز براحه شويه

احكام مبصتلوش وقالت بغضب...والله انا قولتلك شيل حاجتك بمعرفتك واقفلي متنح خلاص يبقى اللي يتكسر فدايا

جوده قرب منها ومسك ايدها وقال...انا عمري كلو فداكي يا ست الستات كلها وانتي عارفه

احكام سحبت ايدها بغضب وقالت...لا بقولك ايه..اوعى شيطانك يوزلك ان اللي عملتو فيا هيغيرني... انا لسه احكام بنت الحج عبد السميع واللي يقل أدبو معايا ملوش عندي غير الجز*مه

جوده اتنهد بخنقه وقال...لسانك طويل يا احكام...وده عيبك الوحيد ..وعلى فكره لسانك ده وهو اللي وصلك لهنا 

بصتلو بقرف وقالت...انا عارفه كويس ايه اللي وصلني لهنا يا معلم تشكر على التوجيه

جوده ابتسم بخبث وقال...لا ولسه ياما هتشكريني يا احكام...لما تعرفي قد ايه يهمني مصلحتك ..قوليلي منفسكيش تشوفي حنان ولا ايه

وهنا ضعفت ملامحها واختفت القوه والغل من عيونها واحتلت الدموع مكانهم 

جوده ابتسم اول ما شاف حالتها وقال..المدرسه فتحت ودخلت اولى حضانه لو شوفتيها بلبس المدرسه والشنطه حاجه قمر قوي

احكام ابتسمت وسط دموعها 

وجوده قرب منها جامد وقال...بقت حته من امها وجامده زيها

اختفت ابتسامتها وحاولت تقوى لما قال كده وقالت بغضب...بنتي ليها رب يا معلم جوده ...وانا مش هسيبها وهرفع قضية... هيه صغيره وهاخد حضانتها من عنيكم

جوده ضحك بسخريه وقال....وتفتكري بعد اللي الناس عرفته عنك فيه محكمه هتحكملك..اوزنيها بالعقل يا احكام علشان القضيه دي هتبقى فضايح ليكي على الفاضي انا عارفك عاقله وراسيه احسبيها كويس واعرفي ان مش المحكمه اللي تقدر تاخدلك حقك..انتي عارفه كويس مين اللي يعرف يجبلك حقك 

وقرب منها قوي وقال...عارفه مين اللي ممكن يقويكي على  الدنيا دي كلها ومحدش يقدر يقولو تلت التلاته كام 

احكام بصتلو بدهشه وضحكت بسخريه وقالت...وياترى بقى مين ده يا معلم جوده مش واخده بالي

جوده قرب قوي وقال...انا يا احكام...محدش هيعرف يخليكي ست الحاره دي كلها ورجلك فوق دماغ اتخن تخين فيها غيري وانتي عارفه انا الوحيد اللي اعرف اجبلك حقك

احكام ابتسمت بسخريه وقالت...وياترى هتجيبو من مين....من نفسك ولا كدبت الكدبه وصدقتها ...ما انت عارف وانا عارفه وكل رجالة البلد اللي اتخرسو عارفين مين اللي عمل فيا كده

جوده اتنهد وقال....ممكن يكونو عارفين بس محدش هيفيدك حتى لو مصدقك يا احكام..وبنتك مش هترجع لحضنك وانتي هتقضي عمرك كده لوحدك ومحدش هيدق بابك بعد اللي داير عنك في البلد...ده غير بقى ان انا سمعت طراطيش كلام ان معلمين البلد رافضين وجودك انتي وامك هنا بعد اللي سمعوه

أحكام بقلم ....زهرة الربيع

احكام اتسعت عنيها بصدمه وبصتلو وقالت...اه..معلمين البلد..والمعلمين دول اللي هما مين بقى..طبعا انت 

جوده قرب منها اكتر وقال وهو بيبصلها باعجاب...اي حاجه ليها علاقه بيكي لازم هتلاقيني اول حد فيها يا احكام

احكام الغضب اتمكن منها وقالت..انت عايز مني ايه بالظبط عايز ايه..قولتلك بدل المره مليون اني مكانش عندي علم انك كنت عايز تتجوزني قبل خالد...اخوك مقالش حاجه مجابليش سيره انك كنت عايزني مقالش حاجه بتفهم منين انا لحد الفرح مكنتش اعرف اي حاجه

جوده قال بزعيق وغضب..بس انا جتلك وقولتلك يا احكام قولتلك كل حاجه

احكام قالت بزهول...انت عايز تجنني قولتلي امتى...يوم فرحي...بعد ما لبست فستان فرحي وجهزت والناس كلها كانت بره ...كنت متخيل ايه هقولك خلاص انا ههرب معاك وأوطي راس ابويا واقهر امي واخلي اخوك لبانه في بق الخلق كلها...ازاي قدرت تطلب كده اصلا

جوده قال بغضب..لانه يستاهل يا احكام هو كان عارف اني بحبك عارف انك ليا بس خلاني مسافر ولاف عليكي وخطبك لو كان اي حد غيره كنت دبحتو انتي حقي انتي الشخص الوحيد اللي بفضله على نفسي يا احكام

احكام اتنهدت وشافت ان مفيش فايده من النقاش معاه قالت بخنقه..انت عايز ايه دلوقت..انت مش خربتلنا جوازنا اللي كان مزعلك ..مش انتقمت مني خلاص عايز ايه تاني

جوده قال بسرعه وبدون تفكير..بس انا عمري ما كنت عايز انتقم منك يا احكام...انا معملتش كده علشان انتقم انا عملت كده علشان ترجعيلي

احكام اتسعت عنيها بصدمه رهيبه وهيه مش مصدقه اللي سمعته منو  وقالت...نعم...انت...انت قولت ايه

جوده قال بسرعه...زي ما سمعتي عايزك يا احكام..و هتفضلي مرادي العمر كلو...انتي خلاص اتطلقتي وبقيتي حره وانا اقدر اتجوز تاني بشرع ربنا...ولو على نوال وحياة عيونك ما هتحسي بيها هتكوني انتي الأولى والاخيره ولو عيزاني اطلقها هطلقها بالتلاته

احكام كانت بتسمعه بصدمه وقالت ...انت..انت مجنون..مستحيل تكون طبيعي مستحيل

جوده قال وهو بيبص لعيونها... انا مش مجنون انا عاشق يا احكام ورب العز عاشق..كوني ليا وهتشوفي ازاي هخليكي ست البلد دي كلها ومفيش زيك وبنتك هترجع لحضنك قولتي ايه

احكام قالت بغضب وانفعال ..قولت بره يا حيوان..بره مش عايزه اشوف وشك..ده انت لو لحست التراب كده مش هتطول ضفري يا نجس

جوده بصلها بحده وغضب يخوف وقال...يبقى افتكري ان انتي اللي اختارتي يا احكام...انتي اللي عايزه كده..ولازم تعرفي انك يا هتكوني ليا يا اما هتجني على نفسك انتي وبنتك وهتعيشو مشردين ..وهتطردي من البلد انتي وامك..وبنتك دي مش هخليكي تلمحيها...ومش بس كده هتجني عليها هيه كمان لاني مش هخلي دكر يجيلو نفس يتقدملها ...وبشوقك يا بنت عيد السميع

قال كده ومشي بغضب ولسه هيطلع من الباب شاف اخوه رايح يودي بنتو المدرسه 

حنان بصت ناحية المحل واتفاجأت بامها من بعيد شدت ايدها من ايد ابوها وجريت على المحل وهيه بتقول  بصراخ....ماااامااااا

احكام التفتت وشافتها جايه جري عليها لمعت عيونها بالدموع وسعاده متتوصفش وجريت بلهفه شالتها في حضنها وهيه بتبوسها بلهفه وبتبكي بقوه ومش مصدقه انها شافتها بعد اكتر من ٥ شهور

حنان كانت بتبكي وبتحضنها وبتقول...ماما وحشتيني وحشتيني خديني معاكي متسبنيش تاني وانبي 

احكام بقت تبكي اكتر ومش قادره ترد وبتحضنها جامد

خالد اتنهد بحزن عليهم ودخل المحل وقال ...احم...ازيك يا احكام...الف بركه انك قومتي بالسلامه ..انا كنت بسال عليكي ديما

احكام بصتلو بضيق ونزلت بنتها على المكتب وبقت تربطلها رباط الكوتش لانو مفكوك وقالت بدموع..حلوه اوي يا اميرتي...عسوله بلبس الحضانه عقبال الجامعه يا روح قلبي

حنان قالت بدموع... انا مش عايزه اروح الجمعيه دي عايزه اجي معاكي

احكام ضحكت بدموع وقالت..اسمها جامعه...مش جمعيه...وبعدين ما انا  معاكي اهوه يا قلبي ..انا كل يوم هكون هنا في المحل تقدري تيجي تشوفيني ونقعد نتكلم و

بس قاطعها خالد لما شال البنت بسرعه وقال..لا...هيه معاها دراسه ومذاكره ومش هتبقى فاضيه...وبعدين اتأخرت على مدرستها ...عن اذنك

ومشي بيها بسرعه وهيه بتبص لطيفهم بدموع والبنت بتبكي عايزه امها

خالد وقف ثواني قدام اخوه وهو بيبصلو بغضب وعتاب ومشي قوام

جوده ابتسم بسخريه ولسه هيطلع من المحل احكام قالت بغضب وسرعه..انا لو وافقت على طلبك ...هتنفذ شروطي...هتبقى قد قولك وطلباتي تبقى اومر

جوده اتسعت عنيه بزهول ورجعلها بسرعه وقال...جربيني

احكام حاولت تخبي دموع عنيها وقالت بقوه مصتنعه..عايزه فرح كبير..تحضره كل البلد..واولهم نوال مراتك و..وخالد اخوك

جوده قال بدون تردد ...موافق..تحت امرك

احكام بصت لعيونه وقالت بتحدي ....والطلب التاني والاهم ..انت هتبرأني قدام كل الناس اللي هتحضر وهتقول ان كل اللي اتقال عني محصلش

جوده فكر شويه وقال بتردد..ماشي... هحاول الاقيلها حل...يعني ممكن نقول اني كنت فاهم غلط وكبرت الموضوع واننا لما اتأكدنا من الحقيقه وعرفنا موضوع التعبان وانك بريئه  كان خالد طلقك وانتي اللي رفضتي ترجعيلو... ايه رايك حلو كده

احكام ضحكت وهيه بتصقفلو وقعدت على الكرسي بتاعو وقالت بسخريه...فنان في التأليف والاخراج...بس للاسف السيناريو مش على هوايا...لو عايزني اتجوزك وابقى مراتك وملكك يا معلم يبقى هتقول قدام كل الناس ان انت الي عملت الفيلم ده بنفسك علشان تطلقني من اخوك وتتجوزني ..ده شرطي قولت ايه

جوده اتسعت عيونه بزهول شديد  وووو