بعد شويه كان سليم اخذ كريم في الجنينه وفهمه انه بيضايق مراته بس مش اكثر وطبعا لانه زميله واعلى منو كمان ماتخذش اي اجراء ومشي هو والظباط اللي معاه واخذوا ليندا معاهم 

فرح كانت بتزعق وتقول... انا هبلغ على الكوسه اللي بتحصل في البلد دي وهحاسبكم كلكم عشان المفروض تاخدوه معاكم و 

بس قطعت جملتها لما سليم قفل الباب وبص لها بنظرات ترعب 

فرح خافت منو جدا وجريت بسرعه على اوضتها ولسه هتقفل الباب حط رجله بسرعه ودخل ومسكها من دراعها بقوه وقال... ايه اللي هببتيه ده فضحتيني قدام زمايلي 

فرح قالت بخوف منه ....امال تجيبلي واحده لحد بيتي واسكت...ايه استناك لما تخلف منها 

سليم قال بغضب...ده مش بيتك ...وانا  مش جوزك احنا اللي بينا انتهى من وقت ما شوفت الفيديو والوسخ بتاعك 

فرح قالت بغضب ....مفيش حاجه في الفيديو تثبت ان انا وحشه افرض روحت هناك وكنت سكرانه يعني ما انت راجع البيت سكران ومعاك واحده كمان 

سليم  بصلها بغضب ودهشه وقال... انت بتشبهي دي بدي 

فرح بصت له بدموع وقربت عليه قوي وقالت برقه... سليم انا طول عمري بحلم بجوازي منك ..ونفسي قوي نتجوز ونعيش سوا مش دي الحياه اللي اتمنيتها ولا رسمتها ..بلاش تهد حياتنا على حاجه تافهه ..والله ما حد لمسني ابدا ..ولا حد يقدر انا بحبك يا سليم وانت كمان بتحبني... بس كفايه كده ابوس ايدك سامحني وخلينا نبدا من جديد 

سليم  حط ايده ورا رقبتها وقربها منه جامد  وسند جبينه على جبينها وقال بهمس عند شفايفها.... لو قادر مكنتش استنيتك تقوليلي...انا بحبك بدمنك.... كنت مستني اليوم ده اكتر منك وميت على قربك وملهوف على اقل لمسه منك..بس...بس في نار في قلبي وضغط على شعرها بغضب وقال.... نار يا فرح كل ما افتكر المنظر ...كل ما افتكر دخلتو عملتوا ايه جوه ..ولما بفتكر انك كنتي مقرطساني وبتروحي مشاوير من ورايا كل ما افتكر انك كنتي بين ايدين واحد غيري وبتضحكي معاه بالشكل ده... مش قادر اعديها..مش قادر اقبلها على نفسي ودفعها وراح يغير هدومه ... ولبس بنطلون قطني خفيف 

فرح نزلت دموعها وحست ان مفيش فايده وقالت بدموع.... يبقى نتطلق بقى يا سليم..طالما مفيش فايده خلينا نطلق احسن ما نأذي بعض اكتر من كده 

سليم اتسعت عنيه بذهول وبصلها بدهشه