- صدك تحجين !؟ سهى اني بالكوة خليته يقبل بنونة تبقى عندي خوما اثنينهم 

- خية اذا انت قنعتيه اني ما كدرت ولا قنع الجاهل الليل كله ينط ما كدرت اسكته والزلمة عيونة صارن بكصته واحد بزره كوه يتحمله مو ادور بزر اخوه 

- جا اني شلون اتحملهم اثنينهم 

- ما بيها شي  انت عاجر وما عدج ضنا شصار عليه لو عاف الجهال يمه 

- يا وانت يم رجلج اتصيحين الزلمة صارن عيونه بكصته ويمي تصيحين شصار عليه 

- اكلج صبا هسه اني وانت ياهو مالتنا شو حيدر متجفي و امهم متجفيه واني وياج طايحين بيها على يا مال 

- جا نذبهم بالشارع اذا امهم وحيدر عمهم ما بكلبهم رحمة 

- اي جا خلي الرحمة بكلبج واحويهم وصيري احسن منهم ما طولج هيج اني خية ما اكدر رجلي ما يرضى امري مو بيدي 

تحجي واني صافنة وكف حازم كبالي .. 

كتله :دروحي خية روحي الله ينطيج 

وسديته منها .. 

حجه : هسه شني 

- تكلي رجلي ما يرضى الجاهل الليل كله يون وما مخليهم ينامون 

- لو كايلتلها رجلي ما يرضى هالسهى جا طلعت السانها سبع امتار ليجدام وتمشيج وراها بس يمها تطلع مسكينة محكومة بزلمة

- هسه شسوي 

تنهد وسحب تليفونه وخابر على عمي كاله : الله بالخير ابو يوسف .. 

.. خابرتك على مود الجهال 

اني ابيت الشماعية وحامد جاب الجاهل ذباه على صبا يكللها انت دارية والبنية عدها كاعدتلها من الليل 

زين شنو  الحل يا ابو يوسف مو وضعية هاي 

ان شاءالله ان شاءالله 

زين .. خير ان شاءالله 

سداه وباوعلي : كومي خل نروح لعمج 

- شنسوي ؟ 

- ناخذ الجهال نذبهم على امهم هي تحير بيهم جا احنا المخلفينهم لو هي ؟ 

- ولو ذبتهم بالشارع 

- عود ذاك الوكت نشوف شلون تصرف .. امشي 

- بنونة ما انطيها خليها يمي 

- هسه دكومي والله كريم 

كمت بدلت للجهال اثنيناتهم ورحنا على بيت عمي صعد عمي بالصدر واني والجهال ورا .. ووصل بينا لبيت اهل شهلاء .. استقبلوا عمي 

وطبينا كلنا بالاستقبال ابوهم كاعد 

حجه عمي وكاللهم : ذوله جهال بتكم بوية احنا شعدنا ونلفيهم واحد عسكري ما متواجد والباقيات كلهن بنات ومحكومات ببيوت رجولتهن وين نخلي الفروخ .. خلوهم عدكم همه هم بزركم شوفوا شلون ادبرون امركم هاي بعد ضلت يمكم 

ابوها كام يحجي 

لحمكم وبزركم 

كاله عمي : والله يا ابو احمد احنا لا كلنا لبتك خلفي ولا كلنالها بزري خاطر نبتلي وليدنا البزر ميت وبتكم هاي وينها كبالكم جنا مطينها بيت ونحط بيدها هالنكدر عليه بس ما طولها ما تريد تاخذ فروخها وتمش جا هي تخلف واحنا نبتلي .. مالنا غرض 

كاموا يتحاجون والبت تريد تتزوج والياخذها ما يريد بزر 

كام حازم يرفع وعمي يكبس وعافوا الجهال عدهم واشرلي نطلع 

بس اني اشتاط كلبي عليهم 

ويلاخ بعدهم جهال وناس تذبهم لناس 

اني جبيرة وما تحملت من واحد يذبني للاخر 

شلون وهم صغار .. كمت ابجي بدموع عليهم .. 

كام حازم يباوعلي ويكلي : جا شبيدج عليهم هسه لو بس البنية اكولن خوش بس اثنينهم شتكدريلهم 

عمي : والله يا عمي بلوة مرة تشمر ظناها خاطر تعرس الله يساعد امهاتنا الكسرن اركابهن علينا محد منهن كالت اريد رجل اليموت رجلها تكسر ظهرها اعلى فروخها .. هالزمن الاغبر هاذ سنة رجلها بعد ما طلع ذبت جهالها وتريد رجل 

حجيت : ما اظن هي اهلها كاعد يغصبونها اهلها مو اوادم 

- المرة لو رادت تلزم بسهم باديها ورجليها مو تشيل وتذب وتمشي هي مقتنعة بحجي اهلها لا تحجي 

حازم : شيصير لو حيدر يعقد عليها عمي هي هم مرت اخوه وذوله جهال اخوه 

- حاجيته والله عمي كال مشتحيل ما اكدر 

- ع الورق اسمها مرته وخلي يذبها ابيت الشماعية وتكعد مثل اول بس خل يلم لحم اخيه 

- والله يا عمي ما ادري شكلك . 

وصل عمي للبيت كاله : اتفضل 

حازم : دايمه الله يسلمك مستعجل والله تعبان اريد ارجع 

- دتغدوا وروحوا 

- الف عافية مشكور ، كومي حولي يابه 

في امانلله ...مع السلامة  

حولت يمه وحجيت : وين راح نروح 

-للبيت 

-بيتك 

-شبيج صبا رين تريدين 

-للشماعية 

-وشعدنا غاد 

-منا لما تعزلي البيت .. اجي 

- صبا يحتاج ابني واسس مطبخ فوك واسوي قاطع بشهر وشهرين ما يكمل .. 

- وتريد ارجع اكابل امل .. لا والله ما اريد 

- المرة حلفت وكالت بعد ما اتقربلها ولا اذيها 

- كالوا للحرامي احلف كال اجا الفرج .. بعد الصار اني ما اكابلها 

- وشلوووون ارد اطلكها وجهالي يضيعووون 

- اني مالي علاقة ترجعها تطلكها هاي انت وياها .. اني بعد الصار والسوته بيه شلون نشرتني وحرضت عليه كل عمامك حتى يطلكوني وخلتني شهرين وتلاثة مهانة بالبيت ومحبوسة وهي تكوم وتعير بيه شلون مشهورة وطلعت هي الشاهرتني وتريدني اكابلها لا والله 

- ابيت الشماعية ما تكعدين 

- وابيتك ما اكعد وهي بيه ... وعاد انت حلها 

باوعلي : صبا لا تكبرينها 

- لا هي مو صغيرة حتى اكبرها هالمرة شهرتني ونشرتني واني مصلخة وجسمي طالع خوف من الله ما عدها 

- وما دامج هيج شكو تصورين وانت مصلخة 

- ما مصورة اني ولمة بنات حتى لو صورنا .. ما واكفة كدام زلمة ومطلعة روحي لا تكعد اتذب الصوج بيه 

- وراح نضل نتعارك وما تخلص 

- هاي بعد يمك اني بكل هدوء وبساطة جاي اكلك ما اريد اكابلها وبسس لا حاسبتك ولا كتلك شلون شكيت بيه ولا كتلك ليش ما تثق بيه ولا تعاركت ولا سويتها هوسة بلعتها وصميت حلكي وطلبي الوحيد ما اكابل لا بتك ولا مرتك وبسس 

- لا اله لا الله .. شلون تخلص ياربي شلووون  استغفر الله ربي واتوب اليه . 

ما حجيت .. فر السيارة 

سكتت وارتخيت ورجعت ظهري للكشن ورحت اصفن وافكر 

كلت راح يطلع للشماعية .. 

بس من وكف فزيت من صفنتي 

اباوع !! صاف السيارة كبال بيته 

حجيت : اني شكتلك ؟ 

- انزلي وبلا حجي 

- عود شني جاي تغصبني والله ما انغصب وما انزل 

- سمعي صبا تعبان وطالعة روحي لا تخلييييييني والله ... قاطعته 

- تعبان ما جاب تك عليه عوفني ابيت الشماعية وروح ارتاح لا تكعد تغصبني بحجة تعبان ما انزل 

- لا اتطلعين صوتنا بنص المنطقة تصير سالفتنا على كل السان 

- جان من الاول حسبت هالحساب ما انزل 

- صبا لا تعانديين 

- محد معاند غيرك جاي اكلك ما اريد اكابل امل .. روح انت كابلها بس مو من حقك تغصبني 

- مو من حقي شنو صاحبج اني .. رجلج وغصبا ما عليج تنزلين واتصمين حلكج امشي كومي يلاااا 

- ما انزل 

طفى السيارة .. ونزل 

مشى للبيت فتح الباب اندار لكاني بعدني كاعدة 

رجعلي فتح الباب اليمي : انزلي 

- اي كللها تطلع وانزل 

- ما تطلع وغصبا ما علييييج اطبين 

- اغصبني معناها بس ما راح انزل 

سحب ايدي نزلني من السيارة .. وضرب الباب 

واني اجر بأيدي منه .. كام يسحب بيه بقوة دفعني للبيت دخلني للكراج كتله : ما اطب افتهمت ما ابقى هنا .. 

- بالقران لو تعديتي عتبة الباب ما تلومين الا روحج 

- راح اطلع وخلي يكون بعلمك خاف تكول ما كتيلي 

- دسويها وشوفي 

عافني وفات للبيت 

اني انداريت فتحت الباب وطلعت .. ومشيت للشارع العام صفت سيارة كال : وين توصلين 

ما جاوبته 

صاح : مو مرت حازم انت ؟ 

انداريت عليه : منو انت ؟ 

- ابن حجي نعمة 

باوعتله يصير ابن عم حازم .. بس ما ادري وين شايفته 

كتله : هلا بيك خوية مشكور رايحة للشارع 

- اصعدي اوصلج 

اجا حازم من وراي : انت شنو تتعاندين وياييييي ولج 

جر ايدي ولواها .. كمت اوخر بيه واكله : ما متعاندة وياي انت المتعاند ووووخر 

- امشي كدامي 

- ما امشي وخر 

ابن عمه نزل وركض جراه وخلاني وراه وحازم يخزر : امشي للبيت لا تفضحينا 

- انت الردتها كتلك ما ارجع واكابل امل تريد طلكني بس كعدة ويا امل ما اقبل . 

كام ابنه عمه يكول : يمعودين بس كولوا يا الله ابو علي صلي على محمد شبيك .. اهدا 

- خلي تمشي للبيت 

- هسه بس اهدا واذكر الله 

- امشي للبيت 

- ما اروح والله ما اروح كتلك اخذني لبيت الشماعية انت المعاند لا تسويني اني المعاندة 

- ما تروحييين 

ابن عمه : تروح وياي للبيت والحجي يحلها بس اهدو

- ما تمشين يعني وتتعاندين وياييييي .. بسيطة بعيني بت **** امشي اخذها البيتكم ساعة واني يمكم بس ابدل اخذهااا . 

حجه ابن عمه : اصعدي وفتحلي الباب الورا .. 

صعدت بالسيارة ورا .. وهو طبك الباب وراي 

وحازم مشى من عدنا عصبي وهو يكله : اخذها للبيت 

صعد ابن عمه بالسيارة وهو يكله : بعيني هسة اوديها بس اهدوا 

استهضمت حيل عيوني جمرن بدموعي 

ما ردت غير انو يعزلني من امل وما اكابلها يريد يغصبني على كعدتها كوة يعني .. 

كمت امسح بدموعي واسولف ويا روحي واشهك ما بيني وبين نفسي .. بس انتبهت الولد ما كاعد يمشي لبيت الحجي ابوه 

كتله : خوية وين رايح 

- وين تريدين اخذج 

- شمدريني غير لبيت الحجي 

- انت وين جنتي رايدة تروحين مو عندج بيت 

- بالشماعية اي 

- اتريدين اخذج اله !؟ 

- بس شسمه 

- مالج علاقة باحد تريدين اوديج اله وانت هناك اتفاهمي وياه ليش بعد تخلون مشاكلكم كدام الكل والكل يتفرج عليكم ويحجي .. حازم صحيح خوش ولد بس عكرة وما ينحمل ماكو مرة تحملة مرته لو ما جهاله حرام يوم ما تجرعة المرة التعاشرة يرديها خدامة كون شيريد تكله امرك ولا جنها بشر 

- اني ما ردت منه شي بس ما ردت اكابل امل انت اكيد عرفت شسوت بيه 

- طبعا نعرف على سالفة الفيديو غير 

- اي 

- لا الحق الج من السما للكاع .. ونصيحة لا ترضين ترجعين اذا ما يطلكها .. شمدريج بعد يومين وانت نايمة ما تصورج وهم تنشرج التسويها مرة ما تسويها مرتين 

- واني ليش طلبت اعزل 

- من كل عقلج يعزلج شبيج حازم اعرفه يساير ما يسويها لو هسه تطلع نخلة براسج .. تعلمينه بيه نعرفه 

سكتت .. كمل : هسه تريدين للشماعية 

: والله ما ادري 

- تريدين ارجعج لبيته 

- لا البيته ما اريد ارجع .. 

- جا راح اطلع للشماعية . 

مشى .. اني سكتت .. ليغاد كتله : ولو انت ابن عمه بس انتم هواي ما كاعد احفظ اساميكم شسمك خوية 

- اسمي بشار . 

- هاا الله يحفظك لاهلك .. ابن حجي نعمة مو 

- اي 

- الله يحفظكم 

- ويحفظج ان شاءالله 

وصل للشماعية كمت ادلي 

فوت منا تعال منا .. لحد ما وصلاني لبيتي .. دخلت للبيت ردت اسد الباب بعده ما راح .. حجيت : يطيك العافية خوية تسلم ع التوصيلة 

- خادم اني 

- لا حشاك خادم ربك 

- محتاجة شي 

- الله يسلمك تسلم ان شاءالله 

ابتسم بوجهي 

ابتسمت باستغرب مجاملة وسديت الباب وفتت للبيت .. 

ذبيت العباية من راسي ونزعت الحجاب .. ودخلت للغرفة وكعدت بالكاع افكر بموقف حازم .. 

ساعة يصير وياي انعم من الدخن وشتريدين امريني 

وساعة غصبا ما عليج ويغصبني ويجرجر بيه .. ما كاعد افتهمه طكت روحي منه .

بته ذبت عليه تهمه هاكبرها .. والله ادبتها وجايني ايد ورا وايد كدام ولازم هاهية تنتهي ما من حقي ازعل شك بيه وما صدكني وصدك طفلة جاهلة وصدك السالفة كلها وما صدكاني 

اذا يشوفني جذابة شكو مبقيني خو عوفني .. 

كاعد افكر .. اندكت الباب 

جريت الربطة مالتي ومشيت للباب صحت منو 

اجا صوت بشار : اني 

لبست الربطة ولفيتها منا ومن بلا ما ادنبسها وفتحت الباب 

لكيته شايل علاكة : شني هاي 

- غداج شي بسيط اخذي 

- يا خوية صدك جذب ترا اكو مسواك بالبيت 

- ميخالف بس مرة وحدج خو نا تضلين بلا اكل انت هم مرت اخوي .. 

- يطيك العافية بجاه الحسين الشهيد مشكور 

- دسدي الباب يلا .. وديري بالج على نفسج . 

- ان شالله مع السلامة 

سديته من عنده واخذت الاكل ريحة كباب تفوح من العلاكة 

وديتها للمطبخ جايب نص كيلو كباب و بيبسي وخبز .. عفته ع الكاونتر ومشيت كعدت .. 

ضليت صافنة وافكر 

اكول كبرتها ؟ لو داخله للبيت ومتزاعلة وياه يمكن احسن 

بس لا خو ما كلها اني اتنازل واسكت .. اني ما ردت شي هو الراد يغصبني اني بس كتله ما اريد امل وهذا حقي 

ضليت افكر منا واجيبها منا .. 

جريت المخدة ووحدي صافنة كمت شغلت التلفزيون .. وطفيت الضوا وتمددت .. شغلت روتانا سينما .. وضليت صافنة بالفلم بدون انتبه على الصوت غفيت ونمت 

لهناك من طفت الكهرباء حسيت من نومي 

هدوووووء .. صوت ماكو بس اسمع صوت الجيران من بعيد 

شلت ظهري اتفقدت تليفوني 

الساعة ب٤ ونص العصر 

حازم لا خابر .. لا اتصل ولا حتى داز رسالة 

معقولة ما درى اني اجيت ليجاي 

زين اخابره اكله لو اعوفه 

لا اعوفه احسن .. كمت من مكان .. لملمت الغرفة كنستها مسحت الكنتور الغراض وغلت المطبخ والكراج وشغلت بخور علكته بنقطة الكهرباء وفتت للحمام ..سبحت وكملت وطلعت ريح البخور تفوح بالبيت تريح الكلب 

اخذت الكباب وكعدت وفتحت باب الغرفة 

بيها خيط برودة والدنيا بدت تغرب كفكفت وكمت اكل واباوع بالكراج .. اجت الكهرباء سديت الباب وفتحت التلفزيون . 

لليل حازم ما خابر .. ولا حتى دز رسالة 

تعجبت ! مو طبعة ابد 

يمكن ضاج مني حيل هالمرة 

وضوجتهم هو اني المفروض اضوج جاي يغصبني ع العيشة وياها بعد كل الصار .. ضليت مكابلة التلفزيون والبيت خاوي ماكو احد غيري راسي وراس الحايط 

استفقدت نونة اتذكرت دموعها وجرحها وبجيها 

اخذت التليفون وخابرت على شهلاء .. ردت 

سالتها على الجهال كالت : زينين عدي 

كتلها : جان خليت نونة يمي بس اثنينهم ما اكدر خصوصاً ذاك تعرفينه صغير ما اكدرله 

كالت : الله كريم 

كتلها : اذا تعبتج دزيلياها اني اريدها 

-ان شاءالله 

شفتها تعبانة كوا تحجي ما طولت وياها سديته 

هستوني سديت الخط منها دك التليفون رقم غريب 

ما جاوبته .. رجع دك رفضته 

دز رسالة ( اني بشار ) 

وخابر رديت عليه : هلا بيك خوية اعذرني حسبالي رقم غريب 

-لا والله ردت استفسر عنج خوما صار شي 

-لا ماكو شي 

-كون اتعاركتي انت وحازم 

-لا الحمدلله 

-رجعتي للبيت ماله 

-ليش 

-هيج جاي اسالج 

-لا اتفقنا ان شاءالله يعزل 

-استلمي من دبش 

-ليش

-هاي اني وهاي انت اذا عزلج شتريدين انطيج 

- لا هو كال اعزل بس اتطول بناء وهاي 

-هسه اني كتلج وشوفي 

-اي 

-اسف خاف ضايقتج امانة الله ورسوله شتحتاجين شتريدين تخابريني اجيج

-عساك سالم الله يحفظك ويخليك 

-ديلا اخذي راحتج خاف ضايقتج 

-لا صدك جذب ..كل الهلا 

-هلا بيج 

سديته من عنده وكمت افكر بكلامه .. 

خاف صدك حازم يسايرني وما يعزلي ويخرب بيته ويسوي طابقين ! بس هو كالي اسوي .. يمكن يطلع صدك يسايرني هالغصبني حتى ارجع كم يوم اتقلم وانسى السالفة 

نمت الليل وحدي ويا افكاري 

ثاني يوم كعدت من غبشة هم لوحدي بس بالصفنات الهي روحي .. 

ورا اذان الظهر خابراني عمي 

كالي : شصاير عمي ليش متعاركة ويا رجلج مو امس تصالحتوا ورديتو انت يا عمي ما تستجنين 

-خابراك ؟ 

-اي خابراني كالي عاندتني ورجعت لوحده للشماعية وفشلتني كدام عمامي ما قابلة تطبلهم 

-ما مفشلته عمي رادتي اروح لبيته واطب غصب ما ردت كتله اريد تعزلي حقي لو مو حقي 

-جا حقج تهدين الزلمة شني انت الزلمة يو هو غير هو الرجال 

-اي عمي اني ما كايلة شي هو الرجال بس كعدة ويا مرته ما اتحمل 

-وشلون بالله يگسم روحه الزلمة خاطر انتن ترضن بت الاوادم زلمة محترمج وصاينج ومداريج جا الا تخلينه يهينج 

-هو من يغصبني ع الرجعة ما هايني 

عمي شك بيه وما اعتذر ما يثق بيه وما برر ما كال غلطت بحقج اسف اعتذر عرف بته السبب والله ها   ادبتها .. اي واني شستفاديت ادبتها بعد ما ذبت عليه تهمه هاكدها غير تهمة امها اني شلون اكابلهن بعد 

-غصبا ما عليج تتحملين ها بعد شيسوي يذب بته بالشارع خاطر ترضين 

-واني طالبة منه يذبها اني بس ردت يعزلي 

-يريد يريد ما يريد غصبا ما عليج و ع الخلفج اترجعيلا 

-لا والله ما ارجع شنو

-اسمعي ولج لا اتخليني وحك هو العباس اجيج الوفنج لوف وانعل والد والديج بت الجلب خابري رجلج وارجعيله لو ما رجعتي انا اتفاهم وياج الا اتويج 

سده مني 

نترت وذبيت التليفون ما اريد ارجع كوة خو ما كوا .. 

ما خابرت حازم ولا اتنازلت ولا وصلت له .. 

للعصر خابر بشار مجاوبته 

انفصل وبعد ربع ساعة هم خابر 

جاوبته حتى بلكت صاير شي او سامع خبر عن حازم ورايد يكلي بيه 

-ها شلونج 

-هلا بيك خوية 

-شني ما شني 

-سلامتك 

-رجعتي لا 

-لا بعدني كول محتاج شي 

-اني الجاي اسئلج محتاجة شي 

-لا تسلم يطيك العافية .. هو حازم موجود 

-لا 

-جا وين 

-سمعت ماخذ عايلته ورايحين لكربلاء يزورهم 

-ها اي بالعافية ان شاءالله توصل 

-لجامع ام الطبول ما توصل 

ابتسمت : هه الله يتقبل شسوي 

-محتاجة شي عليج الله 

- لا والله عساك سالم 

-عليج الله اذا تحتاجين شي خابريني 

-يظيك العافية ان شاءالله 

سديته منه .. هذا جنه لح 

هسه افتهمت ابن عمه بس مو هيج كلساع يخابر 

بعد فلا ارد عليه 

لليل خابر ما جاوبت .. 

ولا حتى راسلت حازم وخلصت يومين لا مجاوبة احد ولا مراسلة احد .. راسي وراس الحايط 

بس شو بالليل تقريبا الساعة ٨ ونص بعد صلاة العشا 

اندكت الباب توقعته حازم والا منو يجينا بهالليل غيره 

اتذكرني واجاني 

كمت للباب بهمة فتحته وما احس الا بشار كبالي 

انصدمت : هلا بيك خوية 

-هلا رغم اني ماخذ بخاطري عليج ما تجاوبين بس كلت مرة وحدها يمكن محتاجة شي ما اطاني كلبي اتسوكت واجيت 

-ما ادري ذابته التليفون والله ما ادري عنه حتى عليمن كلفت نفسك 

-لا سهلة .. خادم اني 

-مشكور 

-ااا ولو ازاحمج بس حمام شوية 

-اي جوا 

-سويلي مجال 

ضليت اباوع 

شلون بالله اطرده لو افوته 

مشيت كباله فتحت باب الغرفة كتله : بس فوت بذاك الباب للمطبخ بنهايته تلكى الحمام 

-سويلي مجال 

-فوت ماكو احد 

فات للبيت خفت 

هو طويل وضخم .. واني وحدي بالبيت 

صح ابن عمه ما معقول يسوي شي بس مو مال افوت البيت واني وحدي رجعت وكفت بالحديقة لحد ما كمل وطلع كال : محتاجة شي 

- لا تسلم ولا اتعب نفسك ترا اني عدي اخو وعمام اذا احتاجيت شي ما يقصرون 

-اخوج نفسه اللي اجاج وكت الحازم جان بالمستشفى وكتلج لو غيره ؟ 

-اي تصير هاي المواقف لان صعب يتحملها اخته وناشرينها بس الاخو يضل اخو واللحم ما يطلع من الظفر 

-الله يديمهم الج سند اذا صدك بيهم خير 

اني ما رايد شي بس اني مكسور خاطري عليج حيل 

بنية مستورة وحبابة وما بيج اذيه ومحد عايفج بحالج 

وكلها مستغلتج حتى حازم جيف ما عدج احد ومامن محد يطلعلج يغصبج ويجبرج ويذبح ويهملج بكيفه .. لو عدج زلم جان حسبلج الف حساب مثل ما محسب لامل 

تنهدت وهزيت راسي : الله موجود 

-شتحتاجين عليج العباس لا تترددين 

-خوية صح انت مسويها لله وخايف عليه بس اني هم مرة واخاف على روحي حتى لو ابن عمه من تتردد مرة ومرتين مو حلوة بحقي مو اطردك حشى انت خوش زلمة بس تعرف الناس ما ترحم ياريت يعني 

ابتسم : اصيلة وبت اوادم هنيال حازم بيج 

ما مقدر نعمته 

المهم ديري بالج على نفسج 

عافني ومشى ضليت اباوع وراه .. ومشيت للباب 

اندارلي ابتسم ورفع ايده .. سديت الباب ودخلت .. 

هم نعم الله عليه الغريب احسن من القريب يفكر يتفكد يجي .. 

اخذت علاليك المسواك 

ما مخلي شي ما جايبه 

ومخلي ويا جيس فتحته بيه ٢٥ الف مصرف 

رجعت خابرته كتله : خوية المسواك جبته وافتهمنا ما ينرد بس فلوس اني ما ارضى وعدي خير من الله 

كال : اسف اذا حسبتيها بغير قصد مالي بيها نية 

وعادي من تحين ليجاي رجعيلياها واني كلش اعتذر منج خاف ضوجتج بدون قصد 

- لا يس مو مالت فلوس اني ما محتاجة 

- اني لان باقية وحدج كلت مرة تحتاج شي شيات 

- جا مرة عدي زلمة ويصرف عليه والشاهد الله حازم ما مقصر وياي بمصرف حتى احتاج 

- هو وينه يا خوية جاج اتفكدج شو كلشي ماكو .. 

ع العموم حسبيها دين ومن تجين لهنا رجعيها 

متفقين 

- هاهية 

- يلا اودعناج 

سداه واني خذيت الفلوس بجيزداني حطيتها على صفحة كلت حتى من اشوفه نوبة اللخ كبل اطيها .. عزلت المسواك .. وكمت الهي روحي بالطبخ .. سويت كبة تمن وكعدت كبال التلفزيون الف 

حسبتهن ب٥٠ كباية صارت 

ضميتهن ونمت .. ثاني يوم الصبح 

اندكت الباب .. فزيت على دكته رحت اركض ادور حجابي حتى اطلع 

انفتح واجا حيدر فات للغرفة 

- مو ادكن ما تفتحين 

- شبيك هو هيج اليجي غير كاعد ادور حجابي 

- صار ساعة ادك 

- نايمة 

- نومة اهل الكهف شعدج كاعدة بوحدج 

- شني كاعدة بوحدي 

- رجلج وينه 

- ابيته غير 

- زعلانة هنا مو 

- لا لحد ما يكمل بناء البيت ويعزلي ارجع 

- اسمعي لج تلمين هدومج هسه وتروحين وياي اوصلج لبيت رجلج لا وحق هو العباس هنا ادفنج دفن افتهمتي 

- ترا اني وياه متفقين 

- اكلي خـ *** هو مخابر عمي ما راضي بكعدتج بكفيج متفقييين امشي لبشي بسررررعة يلا 

- حيدر عوفني اني وياه نتصافه مالك غرض انت 

-اسمعي ولج اني مو حازم واكعد اسمعلج واطبطبلج واخاف ما ترضين والعباس هنا امدح واكعطع نفسج 

يحجيها وهو يجرني من راسي 

ااااخ دوخر 

- بدلي منتظرج برا 

- ما اروح ما اريد 

رجعلي : عود شني متعلمة العنادة وجاية اتطبقينها براسي خب لا تخليني اهينج والله 

حجاها وهو يدمغني 

- حيدر مالك علاقة اني وياه نتصافى 

- دقيقتين وعلي لو ما جيتي وراي لا اجيج اسحلج سحل 

حجاها وطلع .. 

خابرت على حازم ما جاوبني .. 

رجعت كتبتله : من ما كدرتلي دزيت عليه حيدر حتى يرجعني غصب عني ما اريد كوه ما اريد ارجعلك 

طب حيدر كضاني من راسي 

ترا اني خلكي هاكده بت الكلب تتملعبين ويايييييييي 

اكلج تمشين وما تمشييين 

دمغني حيل ورفسني برجله 

بت القنادر تتعاندين عوووود 

رفسني مرة لخ 

كمت اصيح وابجي واكله : مالك علاقة افتهمت اني ورجلي نتعارك نكاصب انت مالك غرض افتهمتتت 

سطرني راشدي وجراني من شعري وتولاني كتلات 

كمت اصيح واريد افلت روحي منه وهو يضرب بيه 

دفعته عني واني ابجي واصيح 

رد كال : دخلي اطلع هالمرة ولا تجين وراي والعباس ادميج 

طلع سحبت العباية واني ابجي .. 

اخذت غراضي وطلعت ركبت بسيارة حيدر ورا .. 

ودموعي تجري .. وصلني لباب بيت حازم وعافني وراح .. 

كمت امسح بدموعي واتردد شلون ادخل هيج 

بس كله من حازم هو الدزاه حتى يجيبني مهيونه اله ويهيني 

بس بسيطة اني اله .. 

دخلت البيت .. 

امل كاعدة بالمطبخ هي وسجاد يسولفون 

فتت صاحت : ها خير شعدج 

عفتها وراي ومشيت لغرفتي 

صاحت : شو هادة علينا والوجه مدلغم خير 

ما رديت عليها كمت افتح اباب غرفتي ما تفتح 

كمت اصيح : مفتااااح الغرفة ويييين 

- ليش تصيحين عد حازم وماخذه وياه ما يبقي هنا 

- لازم مدوره عليه حتى عرفتي هالمعلومة 

- اكلج جاية محملة بشرج ترا مالنا خلك افتهمتي لو لا انجبي وكعدي منا لما يجي وينطيج المفاتيح 

ضليت اباوع عليها لعبانة نفسي من وجهه وما بودي تكابلها ابد 

رجعت طلعت من البيت ردت اروح لامه .. ابيت محمد 

كاعد امشي لمحني بشار من بعيد 

صاح : هناااااااا هناااااا

انداريت واكف ليغاد .. 

عفته وراي وفتت لبيت محمد .. امه كاعده بالاستقبال شافت وجهي صاحت : يا ستار خير 

- ابنج قافل غرفتي وماخذ المفتاح 

- هسه صار ابني يزمو 

-ما اريد كوااا ما اريد ارجع واكابلها ما اريدد 

حجيتها وبجيت 

- يا يا يا وعليش تبجين 

-ما اتحمل اكابلها ما اطيق كعدت البيت وياها 

-حقج يس هو هم ما كايل شي  الزلمة رايدج تصبرين وياه شوية على ما يعزللجن كل وحدة بمجان شلون بالله قابل عده عصى الساحر 

- ما ردت منه عصى الساحر كتله عوفني ابيت الشماعية لحد نا تكمل البيت 

- ما يقبل يتشتت بمكانين خو اتحملي وياه بمكان واحد لحد ما يكمل 

- ليش نا نو يتحمل لحد ما يكمل بناء وهاي صارله سبوع يلا شبنا شحط كلشي ما سوا بحجة متزاعل ما محرك طابوكة من البيت 

- على كيفج عيني على كيفج اكلتينا حاصل فاصل .. درتاحي ارتاحي عود من يجي احاجي 

- كليله يعزل 

- اكله بس لا تنغطين 

- نشوف 

كاعد نحجي اندكت الباب و بشار صاح : هااا

صاحت ام حازم : تعال ماكو احد غريب شرايد 

- رايد اشوفج شني شلون بالله ما نشتاقلج 

- انهجم بيتك يالاعطر .. احجي شرايد 

- لا والله رايد محمد موجود 

- لا بعد مو هسه يجي 

- جا شوكت يجي 

- فد ساعة خير 

-سالفة بيتي وبينه شلون بالله اسرارنا لازم نفصحها الج حتى ترتاحين 

-انهجم بيتك يبو الاسرار 

ابتسم وباوعلي : شوكت اجيتي 

-هسه 

-ياهو الجابج 

-اني اجيت 

-ها بيها الخير ان شاءالله ..

باوع لابن محمد شني مي ما عدكم يباسي انتم 

ركض الولد يجيب وام حازم حجت : شو اليوم هاد علينا مثجل خيرك ولك 

- سعدية بالله لا تدخلين 

- يااااع سعدية شني ولك لاعبة وياك طنب 

- تعرفين 

- يعابيك العباس كون 

ضحك وكاللها : صدك ليش ما نسويلنا زيارة جماعية للامام الحسين  ما طوله الجو حلو لا بارد لا حار 

- نسوي المن 

- ناخذ كوستر ونلم اهلنا 

- ومنين كاعد تطلع بهالافكار بالله 

- هيج كاعد افكر 

- شوف امك اذا دبرلتنا كوستر ليش لا نروح ما نكول لا لزيارة ابو عبد الله 

-عود اكللها وارجعلكم خبر 

حجاها وهو يجر الريموت ويكلب بالتلفزيون جابله ابن محمد مي وشرب وهو يباوع .. كمت طبيت جوا وعفتهم بالاستقبال مرت محمد حجت : منو بشار عدنا 

-اي هو متعود يجيكم 

- يباوعون لعبات هو ومحمد والولد كل فترة يم احد 

- ها 

- شني شالفتكم تصالحتوا لو لا 

- الاه كريم يمعودة دخل اكض مفتاح غرفتي هسه السادها 

- يخاف لا تدخللها امل مو امان 

- ذاك اليوم من اجيت جانت امل موجودة و الباب مفتوح شتغير يعني 

- بعد هو اعرف 

ضليت يمهم ساعتين 

اجا علي ابن حازم كالي : بابا اجا وهذا مفتاح الغرفة يكول خل تجي 

حجت امه : وما يجي هو ياخذها شني معرف شني خل تجي 

- يمعودة ضلت على هاي هو سواها كلش بلا ملح وما دامه سواها هيج احنا هم نمصخها 

- انت ناطحي وهو يناطح والسبع يطلع دم عمت عينج كون 

-جا شسويلا ما تشوفين اسلوبه وياي شلونه 

-جا كسبي ما تعرفين لو صعبه 

-وما يكسبني هو كله اني اكسب تعبت اني المفروض ازعل مو هو وتريديني تني اكسب واراضي 

-يمه زمو شلون تطخ وتراضي امشي امشي خل اروحن وياج امشي 

لبست عبايتها ومشت وياي لبيت حازم 

دخلت البيت هو كاعد يتغدا وامل و جهاله كلهم ملتمين ع الصينية 

حجت امه : جا ما تجي تاخذ مرتك اتدز ابنك تعاي فتحت الغرفة شني معناتها 

ما جاوب 

حجت : ها شني انكطع زردومك وانمحى حسك 

- يمه تتغدين 

- كاعد احاجيك عليها 

- عوفيها هسه وتعاي اتغدي 

- محمد متانيني لو اجا وما لكاني ما يتغدا .. بس انت على يكفك لا تكعد تعاركها عي منا طكة ونص واحد منكم يكبر عقله

مشيت لغرفتي وهي ضلت توصي بيه 

ريحة الغرفة ما تنطب تلعب النفس .. كمت ذبيت عباتي وحجابي حطيتهن بالكنتور واول ما نزلت البردات وفتحت الشبابيج والباب .. وجريت الفرشة والبساط كله من الغرفة طلعته وذبيت البسط بره والباقي بالغسالة 

ورجعت جبت سطل مي حطيت بيه ديتول و زاهي وقاصر .. خبطتهن وطشيته بالغرفة كلها وكمت افرك بالغرفة حيل حيل سحبت الجرباية وغسلت الوراها الميوزه المكينة ميز التلفزيون .. كلها غسلتها .. كاعد امسح بيهن شفته صعد فوك لغرفة امل .. 

تنهدت وسويت روحي ما شفت بس الصدك 

غيرتي صارت فوك وقبق راسي دخن من الحركة 

كمت اذب حركتي بالجلف واجلف حيل واغسل .. نشفت الغرفة كلها .. ومسحتها بيدي .. وكملت بقية الشغل وسبحت .. رجعت قفلت الباب عليه وتمددت 

سويت روحي نايمة ومطفية كلشي 

بس ما نمت ولا اجا النوم لعيني .. 

لليل جعت حيل كلشي مماكله 

ما عجبني امد ايدي ع الثلاجة دزيت علي على لفة فلافل من برا .. ركض يجيبلي كعدت برا ..

اكلتها وانب بالمطبخ شفت البساطات كملت اكلي بساع وطلعت مديتهن ورشيتهن وخليت ثوبي بهدومي منا ومنا ورفعته شوية وكعدت كعدة اجلف بالبسط 

طب هو كام يباوع على رجليه واندار يباوع للجيران منا ومنا رغم ما متسلطين علينا لان اني كاعدة ما انشاف بس عجبه يشوف روحه ويصيح : غطي روحج 

حجاها بلا ما يندارلي وفات 

نزلت ثوبي وغطيت رجليه وكملت جلف وشطفتهن علي كام يساعدني ويرشلي .. تجيتهن وفتت للبيت امل تكله : متعشي لو اسويلك عشى عيوني 

ما جاوبها من مريت من الصالة جاوب 

:كلشي يطلع من ايدج خير وبركة 

عرفته حجاها حتى يغثني .. 

فتت للغرفة صدك مغثوثة قفلت الباب بس هو اصلا لا اجا يم باب غرفتي ولا وصل 

كمت ابجي الليل كله 

هم رجعني غصب عني هم مغلس على سالفة العزال بحجة زعلانة .. حتى عقد زواج محكمة شكد سوف بيه ما سواه كل حقوقي ما مسويهن وهو ابو الراهي وزعلان والله ما قبلت اجي اكابل مرته وبته 

ضليت الليل كله اناشغ واني استحضر حقوقي واكتشف شكد اني مظلومة ومغبونة ومالي احد صدك لو كال بشار مستحكرني جيف مالي احد .. مستصغرني 

كعدت الصبح عيوني مورمة من القهر وصوت ضحكه ويا علي وجهاله واصل لاذاني .. 

طنكرت يعني غاصبني اكعد ويا عائلته ومتجاهلني وما يريدني ومزاعلني .. سهلة 

رحت غسلت واجيت شغلت الفير وشسورت شعري طكيته سشوار ونزلته سويته ناعم ومنفوش يخبل .. كحلت عيوني ودمجت رصاصي طوخ فوك جفن عيني وحطيت حمرة وردية .. وسحبت ثوب يصير ويا ركبة رجلية ازرك جويتي ومن الظهر مخيطته قيطان مثل لحد نص الظهر 

والادين كلها ستراس مشبك خياطي وجايبته فيت مخصر على جسمي .. 

ترست روحي عطر طلعت من غرفتي حافية اتمايل بمشيتي هو كاعد كبال الممر بالاستقبال .. عبرت كدامه وفتت للمطبخ ، امل واكفة .. اندارت باوعتلي : شلابسة ؟ ثوبج كصير وكصيف 

-وانت شعليج 

-بنية مراهقة عدي وولد يفتهم 

- مشكلتكم بيتي ومن حقي اخذ راحتي 

-بيتج 

تجاهلتها واني افتح النار جوا القوري وادندن 

يخاصمني يكلمني يحاول يكترب مني وانا مجنونة يااااا.. قاطعني 

-فوتي جوا 

انداريته : وياي 

-احاجيج فوتي جوا 

-جوعانة اريد اسوي ريوك 

-احااااااجيج 

ما انداريتله 

اجا عليه بهمه كضني من زندي : تتجاهليني من احاجييييج 

-العفو منو منجاهل منو ؟ 

-فوتي جواااا 

-ليش بالله مو انت الجبتني هنا غصب مو انت الكاعد تغصبني وتبينلي فصبا ما عليه اتحمل العيشة ويا عائلتك وما قبلت اعيش لوحدي هناك واخذ راحتي .. خلص اخذ راحتي هنا 

-لا تكثرين حجي فوتي جوااااا 

سحبني فوتني جوا وفات صاح : اني تعبت منج ومن عنااااادج تعبت 

-منو الكاعد يعاند منو انت المعاند لا اتطلعني اني 

ما غصبتك على شي بس انت الكاعد تغصبني على كومة اشياء 

-انزعي الثوب بدليه 

- مرتاحة بيه مو من حقك تحكمني حتى بالبيت عدك جهال اعزلم لا تظلمني بيهم شنو ذنبي اني اتكمط بس لان انت عندك جهاااال ليش يمه 

-هذا وضعي الرضيتي بيه من اول ما اتزوجنا متزوج وعدي جهال وتجين تعيشين وياي 

-جنت اتحمل من جنت اشوفك انت وجهالك تستحقون بس غبية محد يستاهل احرم روحي واتكمط ابيتي لخاطره 

-قبلتي وانجبيتي اتنزعينه وبدووون حجي 

-اول شي  احجي ويايه عدل ولا تغلط ثـ.... 

كاعد اكمل ما احس الا يضربني راشدي 

كضيت خدي : تضربني ليش ؟ 

-اتادبي واحجي وياي لا افرك حلكج والله 

-وتضربني 

-بدلي ملابسج يلا 

-ما ابدل خوشششش ما ابدل 

ما عاجبك طلكنيييييي خوووش يلا طلكنييييي 

-اني ردت اطلكج بس اخوج التلاحكلج وجابج ذبج عليه والا التوكف وتطي بيه كدام عمامي وتغلط عليه ما احويها لو تصير بت نبي 

-انت عود جاي تالف عليه حتى تكلب الحق الك 

طلكني لا ولا تفكر اني انجاز ويا اخووووي طلكنيييي 

-بدلي 

دفعته مني .. طلكني اكلككككككك ما اريددددددك 

دفعني للجرباية حيل وكضني من ركبتي وقيدني كمت ارافس واخاول افكر روحي .. 

هد من ايده وحجه : لا تخليني اذيج صيري ادمية 

-ما اصير وخر مني يلااااا وخر 

دفعته مني وطلعت للغرفة طلع وراي يصيح  : فوتي بدلي اكلج 

اتجاهلته ومشيت للقوري وكفت كباله دموعي تجري اجا وراي : امشي كدامي لا تخليني اجرج والله 

اجر بخشمي ابجي وما اجاوبه 

تنهد واجا يمي : احاجيج ليش تخليني اذيج ولج اتجفي اعصابي مرضتيني والقران 

انداريت : وخر مني لا تطخني 

-ما طاخج ولا اذيج بس فوتي بدلي 

-ابدل تاخذني لبيت الشماعية ما ابقى هنا 

-ممنوع 

-انت عود تريد تذلني ما اريد ابقى هنا كوااا 

-امشي بدلي اكلج 

-ما ابدل الا توديني يلا 

حجيتها وانداريت جريت الوصلة شلت القوري سحبني : اكلج فوووتي بدلي 

انحب من القوري الحار جاي وكع على رجليه فزيت شمرت القوري من ايدي كله فز هو : انجويتيييي 

-وخر متي يلا وخررر 

وخرته واني ابجي واروح للغرفة وانتر بايدي احتركت واناشغ .. طلعت ثوب من الكنتور ونزعت ثوبي فات هو كمت اصيح : اطلع ماي عوووفني 

ببجي .. 

ما طلع كعد ع الجرباية وكال : صوتج نصيييي 

جريت الثوب لبسته واخذت الربطة والعباية 

صاح : وييين 

-لاي مكان ما بيه انت 

عفته وكاعد اطلع لبيت محمد 

لكيت بشار واكف غاد عن البيت بس شافني طلعت اجاني يركض ..... يتبع