لطمت خدي : دهر الدهرني يمه شلووون مات 

-ولج هذا ميت كعدي حازم اركضييي 

طلعت من الغرفة اركض وامل تصيح : صبا شبيها عمتي صبا الجاهل شبيه حاجيني 

صعدت لفوك بسرعة وطبيت للغرفة مالته فوك 

مشغل مكيف ومتغطي .. كسر خاطري شلون اندها من تص نومته على هيج خبر 

تقربت منه ومسحت دموعي وكعدته بهدوء حتى ما يفز لان هو كلبه ضعيف ميتحمل هيج فزعات وهبطات خصوصا وهو نايم .. خفت عليه مشيت ايدي على شعره وحجيت بهدوء : حازم حازم 

شال راسه : ها شبيج 

- اكعد حبيبي 

- شكو 

- بس الطفل خطية متاذي كوم اخذه للمستشفى 

- مو كالوا بس دفي .. ما دفيتوه 

- ما ادري كوم شوفه امك دا تصيح 

وخر الغطا من جسمه وكام على حيله ونزل 

ع الدرج وسمع امل تصرخ ركض حيل وراح على صوت امه 

بس كاللها : هااااا 

- وليدك مات ييمه .. ما مقسوملك ماااات 

ركض عليه يهز بيه ماكو الطفل مثل الوصلة التايخة 

اخذه وراح يركض بيه للشارع امه جرت عباتها وركضت وراه .. و امل تبجي وتنوح وتريد تكوم وراه 

رحتلها دموعي بعيني وهي تصيح : راح ابني ماااات 

راح تعبي وعملتي يممممممممه 

اخ ولج يمه 

ضليت اكض باديها 

الجهال كلهم نزلوا على صوت صريخ امل 

علي من عرف الطفل مات كض نعالك واركض وسجاد لحكه 

راح دك الباب وخبر كل عمامه وكرايبهم .. 

محمد ماخذ السيارة ولاحك حازم للمستشفى 

واهل امل و بيت محمد وكرابتهم كلهم التموا علينا بنص الليل يواسون بامل ويسكتونها 

خابروا على حازم .. اكدلهم الخبر صدك ميت الجاهل

تخبلت امل من مات ابنها كامت ادك على راسها 

حجت مرت محمد : ماي جاي للناس صبا 

مسحت عيوني واخذت السراحية ورحت اطي اوزع المي بكلاص 

نهرتني امها وهي تكلي : حطيني نفسج بالجاهل وكتلتي 

جيف ضرتج خلفت وانت عاجر .. 

علكتي عليه التبريد وكتلتي ما تخافين الله 

-اني ياهو مالتي اذكر الله حجية خليج محضر خير 

-جا مو انت العلكتي التبريد على الجاهل 

ندستني مرت محمد جريت روحي ورحت للمطبخ وامهن تحجيلهن شلون حاطات الجاهل بغرفتها واني علكت المكيف عليه كلت المرت محمد : ما جان بالغرفة من علكت التبريد ونمت والله .

-اتحملي شتسوين بعد يريدولهم حجة 

كمت وكفت بالمطبخ ما اتقربتلهم بعد 

حازم واخوته وابن عمه طالعين دافنين الجاهل من المستشفى .. 

ورجع وجه الصبح كلش تعبان 

تلكته امه وهي تكله : ما مقسوملك يمه لا تنقهر 

-لا يمه الحمدلله على كل حال هاي بعد حكمته وقدرته ومحمود مشكور على اقداره 

حجت ام امل : يا قدر خالة امس الصبح الجاهل يا حلاته مدارينه غير مرتك علكت التريد عليه وموتته 

شال راسه : يا مرتي 

- صبا غير .. مدري من حركتها مدري من غيرتها مرضت هالجاهل ومات 

- عمة هالحجي ما ارضى بيه البنية صارلها ٣ ايام تركض ويا بتج وتسهر وياها وانت نايمة الحجي هاذ مال مرتك ومرتك عيب 

- عيب شني كلشي تسوي تسدسدلها واسكتوا اسكتوا لا تحجون حازم ما يرضى احد يحجي على مرته ليمتى .. الولد مات وكصت بطنها راحت عمى على يا مال 

- اني تعبان اشربوا جايكم واخذوا راحتكم 

صفصفت : يا تطرنا فوك ضيم بتنا وتطردنا 

محمد صاح : حازم مو هيج شنو السالفة 

عافهم وكامن منهم راح للغرفة لحكه محمد .. 

وام امل كامت تحجي ما خلت حجاية بكلبها ما زاعتها وادعي عليه وتصيح : كله من حدر راسك .. الجبت هالحية هاي وخليتها ابيتك كسمت نص بيت بتي وعلكتها فوك بس حتى ترضى وذبيتها وهي حامل لا طخيت ولا رجعتها وكلت حبلى خليتها بطرك روحها شهور لحد ما راد تجيب رجعتها حوبة بتي تطلع بيك ان شاءالله .. جابت من وكت من ضيمك وقهرك .. الله لا ينطيك ان شاءالله 

كرابتهم كاموا يجرون بيها وامل ساكتة بس تبجي وتنوح ومتألمة من بطنها .. وامه تكللها : فالج لا كبالنا ان شاءالله ودعاج على اكفاج جا كلنا بتج عدها مصاب بس مو ادعين على ابني .. ما قصر حويزم هي الزعلت خاطر ترد لشغلها وتعبت روحها بالشغل وما دارت وضعها 

ردتها : جا من ذيج تشتغل وتكرف فلوس وتخيط بردات وفرش وهدوم وتحط بجيبها والوادم رايحة جاية ع البيت والبيت صاير سفردحي للرايح والجاي ما تحجون بس من بتي تشتغل هيضتوا الدنيا وخبصتوها .. ذيج يرضالها وهاي مزاعلها ومذممها هل يخاف الله هل اخذ منه بزر وجازاه خل يراجع روحه 

كامت تعمتي تحجي وتكللها : تشتغل وكاعدتله بالبيت وخادمته ومراعيته وبيتها يلهث مثل حرارة الايد اطبين تحتارين تعايني ع الترتيب على ع الكاع التشوفين وجهج بيها خية شنهي بتج راحته كعدتله كابلته وتتهمنه ظالمها خافي ربج مثل ما بتج صاحبة امصاب هو هم ابنه رايحله ومضيوم 

كامن وحدة تكبس والثانية ترفع 

زعلوا اهلها وخذوا امل وطلعوا من البيت .. 

ومحمد طلع من الغرفة وهو يكللها : يا يمه ما عرفتي تتغاضين شوية واتسكتين تشوفينهم مقهورين على بتهم والجاهل 

- هم مقهورين واحنا شنهي مفرهين لو فرحانين جا موش ابن ابني المات ادعي على ابني 

- جا مو تتعاركين وياها وكتها 

- لا وكتها ونص ... كافي جزعنا

ضلت انه تصيح وتحجي ومحمد يحاجي بيها ويهديها 

اني رحت لغرفة حازم لكيته كاعد ومدنك .. تقربت منه وكتله : ما جان الجاهل موجود من نمت والله .. لهذا شغلت السبلت 

- لا تبررين اني جنت موجود ونمت الجاهل ما جان موجود جابته دنيا واحنا نايمين فزيت لان فاتت بدون مدك الباب كالت بس احطه 

-جا ليش ما كتلهم دنيا 

-ما اريد احملها اثم موت اخوها وتحز بنفسها وهي بنية خطية ، لا تهتميلهم خل يولون 

تقربت منه وحطيت راسي عليه تحرك و سحب المخدة و نمنا .. 

كعدت ويا اذان الظهر على صوت الباب يندك شلت راسي حازم ماكو رايح صحت : منو ؟ 

دخلت اخت حازم : خية اكعدي الوادم ملتمة ابيتج وانت نايمة للظهر يصير هذا الحجي 

-حازم وين 

-بالاستقبال 

كمت على حيلي غسلت ووكفت بالمطبخ 

لكيت خواته سالكات دجاج وحاطات جدر مي جبير يريدن يسلكن التمن حجت :بريمز جبير عندج 

طلعت الها ووكفت وياهن 

زلمهم بالاستقبال واني بقيت اطبخ وياهن لل١ وشوية كمل الغدا وصبينا للزلم 

والنسوان بالمطبخ بالمجاز كاعدات .. 

سديت كنتوري وشلت المفاتيح وفتحتلهن الغرفة كعدن تغدن

حجت مرت عمه جبيرة : هو هنا الجاهل مات 

ما جاوبتها ردت حجت : غير اديرين بالج هذا البرد الجبير ما يتحملة مو الجاهل

هم ما جاوبتها 

كالت : غدي الوجه ينكط شر شمالج الواحد يحجي وياج ما تجاوبين شنهي كاتلين اهلج 

- خالة اكعد اتعارك وياج واكلج اني مالي غرض وجهي ينكط شر عليمن جاي واتذبين حجي اكلي واحترمي البيت الكاعدة بيه مالج علاقة باموره كل بيت اله اسرارة عيب الواحد يتدخل بيها 

ما رضت تكعد حسبتني طردتها راحت على الاستقبال تريد تطلع وتكلهم طردتني صحت : ما طردتها بس تعلط وتكول غدي الوجه ينكط دم جيف ما ارد عليها من تكلي موتي الجاهل 

ندستني اخت حازم : يا يا صدك تحجين مرة خطارج عيب عليج 

- عيب على اليتهم بلا خجل خطاري تحترم وتسكت لو تحاجيني باحترام وتكلي شلون مات احترم واسولفلها تتهمني بلا حجة 

كامت اخته تحجي شلون جاوبت 

طلع حازم خزرني واشرلي افوت جوا .. 

وحجه لاخته : فضوها خوية عوفوا الحجي 

- جا يصير تحجي ويا المرة هيج مو... قاطعها 

- فضوها خوية رحمة للعباسسسسس ترا ما بينا حيل 

دخلت للمطبخ عمتي كاعدة وهي تكله الضاهر حازم صدك اتغوشن عيونه ابنه ميت وهو ملتهي اس واسكتن ولا تحجن .. 

حجت عمتي : جا تضلن تلعلعن بحال حجي شيسويلجن يصفكلجن وانت تهذرن كااافي 

- مجذبين يمه .. الجاهل لان مشتغل عليه التبريد مات 

انداريت الها : خية من انت هيج حريصة جا ما جيتي كابلتي ابن اخوج وحطيتي بحضنج .. شو اهلها يجون جية الخطار وانتن ما شفنالجن طول وبس بالحجي نشوف الساناتجن 

- انت اتسكتين وما تفكين حلكج فوك شينج كوات عينج 

- ليش شيني شسويت صالي تلث تيام افتر والنوم ما شايفته شنهو الشين السويته بعد 

كامت امه تصيح وتسكتنا .. 

ودفعت بتها طلعتها ليغاد 

وكامتلي وكالت : اسكتي واتحملي شجاج لو حملتيها 

- هالك اسكت حتى تثبت عليه 

- تثبت عليج غير انت الشغلتي التبريد بس بعد قضاء وقدر الجاهل ما مكتبوبله يموت 

- خالة من نمت الجاهل ما موجود فشغلت وحازم اجا نام ما موجود دنيا الدخلته وخلته بالغرفة واحنا نايمين 

- ياهو الكالج هذا الحجي 

- حازم بس ما راد يحجي كال لا دنيا تضوج وتحمل نفسها موت اخوها 

- ميخالف خليهم يحجون حطي عينج بعين الله واتحسبي على اليتهم 

- والله يا عمه جزعت من التعب الما محصله منه غير الحجي والتهايم واحد يسوي الخير يصبح مو خوش من هي تحتاج رعاية هي وابنها جابوها عندي شني

-لا تخربين زيناتج بحجيج اسكتي سويتي الزين احسبي لله كافي 

عافتني وراحت لبتها سكتتها .. 

كملت الجاي ووديته الهم وبقيت كاضة الجاي واشرب ونقطة اكل ما حاطة بحلكي من قهرهم وحجيهم 

لليل الكل كف واني راسي ذبحني 

كاعدة بالمطبخ واسمع اخته تحاجي حاكم تكله : خوية صدك النسوان تحجي وتستنقد .. جا انت الما خليت امل تشتغل وهجرتها وخربت علاقتك وياها بس هاي مرتك الثانية كاعد تشتغل والفرع والمنطقة كلها تعرفها شلون .. 

باوع الها : وكته الحجي خوية ؟ 

- لا مو وكته بس الناس جاي تحجي خصوصا امل ابنها مات  ويكولون من ورا ضرتها 

- يطبهم طوب الحجو والما حجو هم والبرجلي احتار بضيمي لو احتار بحجي الكواوي....

- يا خوية شجاك 

- الجايني ضيم خوية كافي فلان كال وفلان حجه الناس ياهو مالتها ابيتي وشسوي ما اسوي ويا نسواني  كافي .. جزعتونا زلم طبت طلعت محد منهم حجاله حجاية وانتن النسوان تلوكن بالمشاكل لوك وتنبشن كااافي 

- خلف الله عليك يعني اني جاية البيتك خوية انبش مشاكل 

- جا خوية ياهو مالتج ياهي الاشتغلت وياهي الضلت 

- لا مالي غرض بس انت ظالم  ويا امل سويتها شكبرها وهنا لا عين ترى ولا اذن تسمع

- وانت ياهو مالت خوية انا اظلم منو وانصف منو 

- اي كول غريبة وخليني اسكت

- جا الا غريبة يلا اتسكتيني اني اخوج ادري ابيتج شيجرى اعرف اسرار بيتج متحكم ابيتج احجي ادخل غير بيتج

سكتت ما حجت 

اني رحت لغرفتي كعدت وضل هو واهله بالغرفة 

هستوني كعدت دايخة وراسي يوجعني .. دك تليفوني 

باوعته سهى .. رديت عليها 

كالت : ها شلون صرتوا ، امل خوما اتذت على ابنها 

-لا راحت يم اهلها 

-خير 

سولفتلها الصار كله كالت : مالج غرض ما طول رجلج متكفل الرد عنج اسكتي واطي ظهرج الا اكلج صدك ولو عدكم مصاب بس حيدر خابراني ورايدج ومستحي يحاجيج 

-حيدر مستحي !؟ عليمن 

-هاي الجمعة خطبته 

-بيها الخير .. ياهي الراح يخطبها 

- رقية 

- اخت سارة ؟ 

- اي يحبها من زمان ورايدها يكول احبها 

- ما جاز منها شسوت بينا ع ال٦ ملايين مو لعبت بينا طوبة 

- بعد هو رايدها ومقتنع اكره روحي من ادخل 

- المهم .. شرايد مني 

- يكول كلجن امهات ابيوت وبروسجن جهال واني محتاج صبا وياي تساعدني هي خفيفة وتعرف لسوالف الخطبة والبدلات وهالامور والبيت هم محتاج  ترتيب وغراض

- اي اكل لحازم اذا قبل عود اروحله اني ما رايحة لبيته وين اخذ هو ؟

- اجر قريب من بيت عمي بنفس الفرع لان هو دوام يخاف لا يعوف البيت وحده ايام دوامه 

- بيها الخير اي اكل لحازم ولو رضا ما عندي شي 

- اي والله ولو عنده مصاب حازم بس حيدر هم اخوج ومحتاج عونة اني كتله اجيكم كبل الخطبة بيوم ومنى يمكن هم امرلها تجي وياي 

- ان شاءالله 

ضليت اسولف وياها شوية لحد ما اجا حازم نهيته منها وباوعتله : جوعان محتاج شي اكوم اسويلك ياه 

- لا بوية اخذي راحتج انت هم تعبتي 

- لا يروحي تعبي يروحلك فدوة 

تمدد وانطاني ظهره عرفته مقهور .. 

حطيت راسي على راسه : مقهور ع الطفل 

- ما ادري رغم هو طفل انفاس بس من شلته باديه صار بكلبي فرحت بجيته بس الله ما كاتبلياه والحمد لله على كل حال 

-فوك القهر حجي الناس الماله طعم امل نفسها ما سمعتني حجاية ولا حجت هم الشالوها وخذوها 

- مالج غرض بيهم خل يولون 

- صدك حازم ولو مو وكته بس الجمعة هاي خطبة حيدر 

- اي

- تعرف شاب وحده وما يعرف يدبر شي ومحتاجني وياه حتى لو شما صار كبل .. الظفر ما يطلع من اللحم واسويها لامي وابوي امي جانت حيل تحب حيدر ما اريدها تنقهر وهي بكبرها واني اعوفنه وحيد يركض بخطبته ومحد اله لا اخوه ولا اخت 

-خواتج البقية لعد وين 

-عدهن جهال مدارس يعني هم معذورات لو ما عدهن شي جان كلت بس هم ما بديهن شي قابل يغيبن جهالهن وهاي ايام امتحانات 

- ما تشوفين روحج ضالة تعوزة لهذا وذاك ومحد معترف بيج مثل السمج ماكول مذموم 

- شلون 

- ركضتي ويا امل تالي طلعتي بالوجه الاسود وهاي حيدر اجاج هسه من تشيلينه وتخدمينه اضنين راح يشكرج لو يحسه واجبج وباقرب هوسة ايده تدمغ راسج ؟ 

- دامه معتازني ما معتازته  ولا بعازة احد وانت فوك راسي الف الحمدلله والشكر 

- بس طيبتج ويا الناس ما تنفع الناس تحترم الحقير الطيب اتدوسه 

- شضال بالدنيا يمعود لو كل واحد يسوي للناس ما عمرنا اخرتنا .. ما دام الله يشوف ويحسب ويجازي ويعوض .. الف الحمد الله والشكر 

تنهد وهز راسه : تريدين تروحين يعني 

- تكدر توصلني باجر 

- لبيت عمج 

- اي 

- ان شاءلله 

بسته بخده وكمت : وييين كعدي ارتاحي 

- لا راسي يوجعني خل اروح اسويلي استكان جاي وهم الم البيت وانظفه وملابس الك وصخة هم اغسلنها باجر رايحة ياهو اليغسلهن الك 

- الله يكويج جا طفي الضوا بطريقج خليني انام 

كمت للاستقبال اخته و امه بعدهن موجودات كاعدات بالاستقبال مديت راسي كتلها : سعودة  جوعانة ابالج شي تريدينه ؟ 

اندارت : عسبالي نمتي 

- لا والله جنت كاعدة احجي ويا اختي انوب اجا حازم .. رايدة شي 

- شتريدين تسوين 

- جوعانة واكو دجاج كلت افلسه واسوي حميسة واستكان جاي 

- اي جيبي ناكل وياج 

- بعيني 

كمت ثرمت البصل وفلست الدجاج وذبيته وحطيت قوري الجاي ورحت ترست السطل  مي وزاهي وديتول وشمرته بالبيت وكضيت الفرجة ام العودة الطويلة واجلف البيت كله .. رجعت شمرت طماطة  ع الحميسة وقبقتها وتركتها تتسبك ومسحت البيت كله بالماسحة ورجت وراه بالوصلة .. كملت لكيت الاكل مكمل 

حطيته بالصينية وخليته كبال عمتي واتذكرت الجهال فوك 

كتلها : هم فوك خل اشوفهم خاف جوعانين محتاجين شي ما راحو لامهم 

صعدت فوك لكيت سجاد كاعد ع التليفون وعلي نايم .. 

و دنيا كاعدة لوحدها كتلها : متعشية ؟ 

- لا ما اشتهي 

- شبيج 

- اني اعرف اخوي مات بسببي بس اني ما جنت اعرف البرد مو زين عليه 

تقربت منها : هذا قدره حبيبتي .. لا تضوجين 

بجت : يا صدك تحجين هاي عود ابوج ما حجه خاف تضل بخاطرج وتنقهرين دكومي يمعودة يلا خل نتعشى 

سجاد : اني جوعان حيل 

- كوم انزل لبيبيتك حاطة العشا 

كومي حبيبتي كومي 

مسحت دموعها وكتلها : تروحين وياي باجر 

- وين 

- حيدر اخوي راح يخطب ورايدني اساعده بتجهيزات الخطبة 

- بابا يرضى اروح وياج 

- نكله اذا يرضى تروحين 

- ماشي 

- دكومي وياي يلا 

كومتها ولملت الهدوم مالتهم الوصخة كلها ونزلت بيهن ذبيهتن بالغسالة وشغلت الغسالة .. ورحت اكل وياهم اخته ما تحاجيني دايرة وجهه واني هم ثكلت وياها ما حاجيتها .. ضلت عمتي تبوس بدنيا وتحاجيها تكللها مو انت السبب وهذا يومه وهو مريض 

كالتلها : بيبي حاجي ابوي اروح ويا صبا 

- وين رايحة ؟ 

سولفتلها حجت اخته : يا جا عدج امصاب وتروحين خطبة 

- خية امصابيش لا سامح الله ترا طفل نفاس ومات 

- اي جا مو روح 

- واني شمسوية غير اخوي محتاجني ورايحة اساعده 

- والله ما ادري حازم شلون راضيلج وراضي لتصرفاتج 

- مسويتله سحوره 

- بعد شمدرينا يجوز صدك 

هزيت ايدي وضليت اكمل باكلي ..

وعمتي تندسني اسكت .. شربت جايي ورحت للغسالة حطيتهن بالنشافة ورحت شلت الصينية غسلت المواعين ونظفت الكاونتر واجيت طلعت العدوم من الغسالة وشريتهن بالحديقة 

اشر واسمعها تكللها : مو حقها امل اطك من القهر حاط هاي ومحترمها ومطيها نص البيت تصول وتجول ومكعد بزره وجهاله فوك .. شني صايرة دايرة 

ردتها عمتي : من ايدها ياما كنالها ولج امل كضي رجلج داري لا تجي غيرج اداري ويندار الها .. ترفع بخشمها وتصيح يا واني يهمني رجل .. اني شغلي وبس اهم شي شغلي .. لحد ما خلته يدور بدرب النسوان ويحصله وحده على كيفه  ملت عينه فراشه وبيته وهدومه نظيفة واكلته طيبة سيطرت عليه عسى مو تشتغل لو شما تسوي ما يحجي عبنها راضيته ذيج شسوت نص يومها برا البيت ولو حجى تمالخت وياه والبيت والجهال حال الضيم .. هي الضيعت روحها محد ضيعاها خل تحضن الفلوس والشغل وتلتف بيهن لا تكعد تنقهر . 

- يمه انت شو طابكة وياها خاف انت هم ساحرتج 

- لا اني هم جنت ما اودنها اول بداية من عرفته متخذته بالسر وصارت الهوسة مال اخوها الانكتل والعشاير والطلايب كمت اشوفنها دم سنوني بس يمه من عاشرتها وكعدت وياها البنية ملاكاها طيب معشرها طيب مالها اذية على بشر وراضية ابني بعد عليمن احط كوري وياها . 

اخذت نفس .. كلت هم زين هو وامه متفهمين وصافين وياي .. 

الا الناس اتحط روحها ها اشتغلت ها حبها ها سكتلها هو الواحد شعليه .. اني لو شلت روحي وحطيتها ابيتهم واستنقدت حياتهم راح يرضون ؟ حاطين ارواحهم ويفتون بحياتنا ليش ؟ 

كضيت شغلي ورحت لغرفتي لكيت حازم غاط بنومته فتحت بطانيته وحشرت روحي وياه .. حس واخذني بين اديه ونام . 

ثاني يوم الصبح هو سابح وطب يبدل كعدتني كالي : كعدي خل اوصلج وارجع .. كمت للحمام سبحت ورجعت ابدل .. حسبت هو جاهل ما ينلبس اسود فبدلت الاسود امس لبست الوان . 

شو اخته شافتني لابسة الوان كالت : يا غدي جا بسرعة ذبيتي الاسود اقلها احترمي اسبوع عشرة ايام شبيج 

- خية هو طير بالجنة عليمن نلببس اسود 

- جا روح من عدنا لو لا شلون ما نلبس عليه اسود ولو يا اسود انت رايدة تروحين تهوسين لخوج وخطبته روحي خية روحي 

عفتها تخربط بكيفها و سديت غرفتي واخذت مفتاحه .. 

وعمتي مقنعة حازم اخذ دنيا وياي ما راضي بعدينا كعدنا براسه وخطية وضايجة ومقهورة رضى بس كالي : ديري بالج عليها 

خذيتها وصعدنا بسيارة حازم وصلانا لبيت عمي وسلم على عمي وعمي عزاه بموت ابنى وكام يحجي وياه .. خابرت على سهى كتلها : كلي لحيدر اني يم بيت عمي 

مخابرته دقايق هو اجانا حازم واكف يريد يطلع 

خذا حازم بالاحضان وكاله : سمعت بموت ابنك خاتمة الاحزان ان شاءالله .

سلم عليه حازم ووصاه علينه .. وهناه وحيدر عزمه ع الخطبة كاله : ان شالله حاضرين 

راح حازم واني ودنيا رحنا لبيت حيدر .. 

جان عبارة عن حوش جبير اول ما تدخل للحوش الاستقبال على يمينك .. والمطبخ بصفه وغرفة النوم بالمهاية بس كلهن بابهن ع الحوش .. وما بيه غراض ولا اثاث .. حيدر بس حاطله  حصيرة ودوشك .. وبوفية صغيرة وعليها تلفزيون قديم .. 

كتله : عندك تشتري لو لا 

كال : اثاث البيت عدي مليون بس شيجيبن 

رحنا اني وياه  ودنيا نزلنا ع الحي .. اخذت كاونتر مستعمل بس جديد واخذت كاونتر منضدي مستعمل  وثلاجة مستعملة صغيرة .. ميز تلفزيون كزاز .. وكتله ياخذ صبغ كال .. ما عندي نجيب صباغ .. 

كتله : اني وياك نصبغه 

صدك رجعنا للبيت حطينا الغراض كلهن بغرفة النوم بعدها ما بيها اثاث .. كاله هاي بعدين نصبغها ونأثثها لوحدها غرفة عرسك .. هسه بس البيت .. 

وكمت جبت نفط من بيت عمي واجا وياي رسول .. وصبغنا اني وياه ورسول البيت كله ابيض .. دنيا ايدها وياي تساعدني شفت رسول عينه عليها .. 

كتله : رسول خوية روح بعد خاف تعبان احنا نكضي 

كال : لا صدك جذب وياكم حيدر اخوي 

جابله برميل نفط فارغ واصعد عليه واصبغ السكف .. حيدر يمدح بيه ويتشكره .. خلص كتلهم : يلا برا .. صار الليل ما ضل شي ويرجع النا حازم .. برا خل نغسل البيت 

طردتهم وشديت حزامي ودنيا وياي غسلت البيت جلف بسيم جبير وسفنجة جلغت الصبغ كله ومسحته .. دك الباب علينا فتحت لكيته رسول طب كال : جبتلجن عشا كلت تعبتن خطية 

جايبلنا نفرين كص لحم 

كاله كثر الله خيرك .. فرشت الحصيرة القديمة بالحوش وحيدر اجا .. كام يمدح بالتنظيف كتله : ارجعلك باجر نكعد الغراض وبردات بيتك عليه اني اخيطهن 

- لا مو باجر اريدج تروحين ويا رقية علمود البدلة 

- لعد كللها امرلها الصبح .. اخذها للسوك 

- تكدرين ؟ 

- اي غير نحجز بدلات 

- وصالون 

- اكو بنية براس الشارع مال بيتي شغلها حيل حلو وصاحبتي تريدني اخذها عليه هي الصالون مال الخطبة على اهلها غير 

- لا وين عليه حتى الكيك والبيبسي كله امها كالتلي تجيبه

- انت منو اتفقلك وياهن ؟ 

- اني غير 

- يعني سهى ما راحت ما خابرت ؟ 

-لا كتلها كالت جهالي عدهم امتحانات خابرت منى هم عدهم امتحانات ليش كتلها خابريلي صبا اني وحدي ما عرف هالامور . 

- عدك شي انت باجر 

- لا 

- يعني تكدر تمرلي بسيارتك حازم مشغول 

- اي لا ما عدي شي اني اجيج لا تخلين حازم 

- خوش لعد انتظرك الصبح نروحلهم والحجي يصير كدامك .. راح احاجيهن وانت عوف الحجي اليه .

كام يتشكر مني 

واندار كال : روحي لبت رجلج رسول ما ناويلها خير 

رحت كعدت وسيتلهم لفات كص ورسول دز بيبسي اكلنا وشربنا وهو يسولف دنيا تاخذ ميانة بسرعة وتحب تسولف وتنطلق بالسوالف تنسى نفسها وتداهر وتحجي وهو يداهرها ندستها كتلها : عوفي 

سكتت وكعدت يمي خلصنا اخذنا حيدر ووصلانا 

من طبينا كالتلي : ليش ندستيني ؟ 

- ما شفتي لزك 

- يعني معجب ! 

- اي رسول بعد وسالفه مو حقها مرته تغار 

- ما ادري اني شفت حجيه عادي 

دخلنا البيت عمتي واخته موجودة 

عمتي ضايجة لان قافلة باب غرفتي .. اعتذرت منها وكتلها ما جان بقصدي بس خفت همي جون ناس مو مال يكعدون بغرفة نوم مرة ورجال صعبة 

ضلت تحجي الله لا يعوزنا لبيتج وانت كبر راسج وحازم هم صوجه والضاهر صدك منطيج عين كاعدين بالبيت وخطار يجون شني ننحبس بالمطبخ نكعد وانت قافلة غرفتج علينا 

عفتها تحجي وترزل براحتها 

واني رحت طلعت قماش وكعدت على بردات حيدر اشتغلتهن لحد ما كملتهن وكويتهن ورتبت التور وياهن ونمت .. 

ثاني يوم خابرني حيدر الصبح كتله جاهزة 

نزلت دنيا كالت : ها نروح 

-ابوج ما قبل تروحين كال كافي 

-لا ليش للسوك 

-ما قبل غير مرة بلكي ارجع اليوم اقنعه 

عفتها ولطعت لحيدر اجاني طلعنا للشماعية خذينا رقية و امها 

اني جنت كاعدة بالصدر من صعدن امها وكفت ورقية صعدت باوعتلي امها وصعدت متنگة  .. لهناك بنص الطريق حجت رقية كالتلي : غير الاحترام يكول المرة الجبيرة تكعد بالصدر شو انت المتربعة بالصدر 

انداريت عليها : عليه ؟ 

- اي جا ع البصفج 

- شمدريني عادي تكعد بصف حيدر ؟ 

- اي عادي غير جبيرة 

امها يطلع عمرها نهاية الاربعينات يعني مو جبيرة وحيدر يطلع بالثلاثين يعني حسيتها صعبة تكعد بصفة بالصدر لهذا ما نزلت بس اتجاهلت الحجي بس باوعت لحيدر ساكت .. 

بعدين كال : انتم لسوك الاولى مو

حجت امها : لا للكيارة 

باوعلي .. اشرتله يمشي 

وصلنا للسوك اخذتهم للبدلات .. اجرن اغلى شي .. بس بدلة الخطبة ايجارها صار ٣٠٠ .. لان جديدة طك كارتونة تكول ما اتحمل البس مستعمل كتلها : هاهية ادللي 

انطيت عربون الايجار وحجزنا 

انوب رادت تشتري عقد كريستال ب٣٥ كتلها بكيفج اشتري 

كالت : اي انطيني 

-شنطيج ؟ 

- فلوس العقد غير ويا البدلة لازم اشتريها

- هي خطبة مو عرس حتى علينا حتى بدلة وصالون ترا المفروض عليكم بس حيدر بعد اتفق وياكم علينا ومشيناها 

- لا عيني عليكم شنو علينا غير انتم الخاطبين 

- اي خطبة قابل عرس حتى يصرف !؟ 

امها متنكة ما تحجي هنا انفجرت وكالت : هو عاف خواتج جابج انت الدلالة ويانا 

- دمشي خالة مو وكت حجي ماصخ 

- اني احجي حجي ماصخ 

عفتهن وكاعد ارجع للسيارة شفت حصران حلوة .. 

اخذتله حصيرة وزوج مدات حلوات .. ومخاد .. من الفلوس الباقية عدي .. 

وصحتله يصعدهن وياي كال : عاشت ايدج اني راحت من بالي المدات والمخاد صدك اذا اجو الزلم بالعقد خوما يكعدونب س ع الحصيرة 

- لا اني ابالي هسه ارتبلكياهن يطلع البيت يضوي 

- عاشت ايدج بس الجماعة وين 

 .. سولفتله كال : هاي امها مصيبة ما تنكدر لا تسكتيلها

حجيت بكلبي هي ليش الماخذها تنكدر حتى امها

اجت لكتني هم بالصدر تنكت بالزايد ورقية هم طنكرت 

كال : هسه وين 

كتله : لبيتي ع الصالون الكتلك عليه 

كالت رقية : يا صالون شنو الصالون على كيفج عيوني اني اريد صالون بشارع فلسطين ما اريد صالونج 

ندست حيدر : بكيفج احبيبه اذا عدج وتريدين تروحين لشارع فلسطين بعد انت حرة . 

- عندي شنو 

- فلوس لان اني اريد اروح لهاي لان صديقتي وهي خطبة مو عرس وهو وراه كوم مصاريف وشارع فلسطين ياخذون هواي ع العروس 

- لا والله ما يعجبني اني اريد شارع فلسطين 

- بكيفج 

حيدر : اذا شارع فلسطين يسويج ب٥٠ اطيج غيرها ما ااكدر واذا تريدين اطيج ٥٠ وانت زيدي بعد عليها من يمج وروحي للي يعجبج . 

ما رضت طنكرت .. كالتله : رجعني للبيت 

هو ما كال باطل كوم ولف السيارة وارجع بيهن للشماعية .. وصلاهن هي اتخبلت نزلت زعلانة .. 

رجعنا اني وياه جابلي دريل وكمت اكعد الكاونتر بس هو يكضلي ويساعدني .. وكعدنا الكاونتر الطباخ حطيتله ميز صغير جبتله بواري مال بردة ونصبتله البردة تور بالمطبخ حيل فرح 

وكام يتشكرني 

ورحت فرشت الحصير بالاستقبال ونصبت البردة والمدات ووزعت المخاد .. سمعته يعارك .. كمل واجاني كالي : بعد ما اخطب خل تولي 

- يا شصار 

- خل تولي مو ادمية ما اخطب لو هسه تصير مريم العذراء ما اريدها

- يا جا وهالتحضير والهوسة 

- الي اني اكعد خ تولي 

كمت اكمل بالبيت وهو طنكر شكد خابرته شكد دزت رسايل قفل ما يجاوبها ذباه وطلع .. عاد اني خابرت على حازم وكتله : وين انت 

- بالمحل امرلج 

- ها اذا قريب مرلي 

اجاني للبيت شافه كال حيل حلو ومرتب البيت 

كتله : غير لو شايفة كبل تشرد منه بس غير صبغته و ترسناه اضوية واثااث جديد بس شو حيدر هون يكول بعد ما تريد الخطبة 

- ليش 

كمت اسولفله 

يكلي : اخوج ارعن لو يفتهم من ذيج السالفة يحرمها بعد وما يكربها بس شعلينا دكومي امشي . 

اخذني بالطريق خابرتني رقية : صباوي حبيبتي اني ادري زعلتج والله بس مو قصدي 

- لا شزعلتيني اني شعليه 

- لا عليج الله اريدج تخابرينه تقنعينه والله راضية بيا صالون حتى لو اني اطي فلوس عادي 

- شقنعه بيش 

- يرد عليه والله كاعد اخابره ما يجاوب 

- هسه اخابره واحاجيه

سديته منها وخابرت بعدين انذكرت هو ذباه بالبيت 

كتبتله من تشوف الرسالة خابرني .. نص ساعة وخابراني 

كمت اقنع بيه وميخالف ومشي والبنية مشتريتك ومن هالحجي .. وقنع كال .. عود امرلج اخذيها بس ما ارد عليها ختولي 

كتله : ما يحتاج امرلها اني اخابر صديقتي واتفق وياها 

سديته منه وخابرت على صاحبتي ام الصالون كالت صالونج شوكت ما تجين كل الهلا بيج انت والوياج .. 

قبل الخطبة بيوم رحت لبيت حيدر 

اتسوكتلا مخضر ومسواك للخطبة واجتني سهى ومنى ساعدوني .. سلكنا الدجاج من الليل .. وسويت التبسي كتلها : منى بس بقى تكلين الدجاج و تسوين التمن باجر ما يبقالج شي كملت كلشي 

كالت : هاهية بعيني 

ب٣ بالليل نمنا وكلنا بتنا ابيت حيدر .. شلون نومة ع الحصيرة وغطا ماكو .. وبس المخدات الجبتهن نمنا عليهن واتغطينا بعبينا .. للسبعة الصبح كلنا كعدنا منى سوتلنا ريوك اكلنا وطلعت اني وحيدر جبت البدلة ومريت على رقية خذيتها ومشيت للصالون البراس الشارع مالتي .. 

البنية اسمها رشا ام الصالون 

كتلها : رشا ديري بالج عليها خل اروحن اجيبن هدومي واجي .. حتى هنا ابدل واطلع منا .. 

رجعت للبيت كبة تمن و كبة مصلاوية كليتهن وسويت وياهن طاوة طماطة .. واخذت صينية وغراضي وشلحة مخيطتها جديد ما لابستها .. ومشيت للصالون بطريقي جبت صمون حار وطبيتلهن بيدي صينية الغدا كامن يهلهلن بطبتي 

عافن من اديهن وفرشنا وكعدنا ناكل سويت لفة لرقية كتلها اكليها كبل لاي مكيجولج ترا تموتين من الجوع .. رشا بروح اهلج جاي جا سويته بس لما اوصل ليجاي يصير ثلج 

- يا غير جنج على جاي صدك سويت تنظيف بشرة لمرت اخوج .. حتى المكياج يكعد على وجهه 

- معدلة جا شوفي شجبتلح 

طلعتلها الشلحة ماتت عليها .. كالت والعباس اليوم اطلعج تخبلين على هالشلحة هاي دكومي 

ضحكت وكمت غسلت شسورت شعري .. ومكيجتلي .. 

وكملت مكياج رقية وحطتلها رموش وبوطرلها جسمها جنه ناسين البوطرة .. وحطلها اكسسوار باديها طلعنها لعابة حتى هي انهجبت حيل بمكياجهن 

عاد لبست الفستان الاني مخيطته لروحي 

لبسته اجا فيت على جسمي نثرت الشعر المصففته اليه وبارمته والمكياج ورشيت عطر .. عجبني اعرس من جديد على هالاجواء .. 

اجاني حازم .. صعدت رقية وكعدت يم حازم .. 

كالي : ها بوية جا المعرسين اثنين والمجانين الفين انت عليمن مزوكة 

- يا غير اخت العريس 

- ههههه الله يفرحج بويه صدك ترا دنيا منتظرتج امرلها تاخذيها وياج 

- اي خابرتني كتلها ابوج يجيبج 

- خل ناخذها بعد بطريقنا  .. من رخصتج عروس 

ما حجت انداريتلها غمزتلها ضحكت .. 

مر بسيارته للبيت اهل امل .. صف وخابر 

اجا بشار ع العكازة كصني كص بالنظر انداريت عنه اجا يم حازم كاله : شني معرسين اليوم 

- عرس الاهل وجاي اخذهم 

طلعت دنيا مزوكة كاللها : شنو المكياج هذا بويه انت صغيرة عيب غسلي وجهج 

كتله : ايييي هسه بنية وين رايحة راح تضل وياي عوفها 

غمزتلها .. اصعدي 

ركضت كعدت يم رقية .. بشار يكله : خوش صاير سايق الهن

حازم : لا خير البيه ما يصير سايق لاهله خوما اعرفهن للغرب

ضحك وهو يباوعلي ..

دايرة عنه ما صديتله مشى حازم وصلنا العروس ورجعنا لبيت حيدر نزلنا وهو سبقنا للبيت صار كبالنا حتى اني و دنيا نفوت وما نصير كدام باب غرفة الاستقبال المتروسة زلم ويشوفونا 

فتنا للغرفة الاخيرة  دخلت عليهن ذبيت الحجاب والعباية وكمت اهوس واكللهن : هذا لعبنا ولا تكول استهتار .. 

وهن يهوسن وياي 

حجت سهى ( اخونا خوش اخو يستاهل الهوسة ) صحت : كلش خوووووش اخو يستاهل الهوسة 

ضحكت مرت عمي الحجي وكالت : فلشج كون ولج اصبية ولا تجوزين 

كتلها : شبية عمه غير اخوي خوش اخو .. جا شني شحسبالج مو خوش اخو ؟ 

كالت : لا يا شلووووون 

ضحكنا وكضيت بمنى كتلها : امنية لو ما ضامة غدا لرجلي هسه هنا امدج وادبج بيج 

-يا ما وصيتيني على رجلج بس ضميت غداج 

-اي دطلعي خل اصبلا يتغدا كبل ليروح للخطبة خطية 

رحت للمطبخ شفت تمن وربع دجاجة وتمن 

سويتلا صينية ودزيت عليه وتحد من الجهال .. كام ياكل وهو واكف ع السريع .. رحت جبت جنطتي جايبتلا عطره وجبتله فرجة من حيدر دخل للحمام غسل عدل روحه ورتب شعره وطلع يرعص رعص  كمت اكله : خمسة واخميسة اعلى طولك يمه رجلي شلون حلو فدوة لطوله 

ضل يضحك وهو يكلي : اخبالج ماكو منه 

راد يبوس خدي كتله : تنصبغ وتخربلي مكياجي ضم البوس هسه 

ضل يضحك ودمغني على راسي ومشى للزلم 

باوعت لطوله من الكفى وهو يمشي .. كلشي الانه بيه عزي وخيري ودلالي وحتى احترام الناس الي بسببه هو القدرني و جبر الناس تقدرني وتحترم .. لولا اني الله يعلم بحالي .

اجت كية النسوان صاحوا علينا .. 

حازم ما رضى نركب بالكيا جيف السايق غريب واني وبته امكيجات .. خلانا بسيارته وطلعنا للشماعية جبنا الطريق كله نهوس ونركص وهو ويانا .. 

لحد ما وصلنا بيت العروس كال : يلا ضبن روحجن لا تصفكن كدام الزلم عيب ادخلن 

خذيتها وطبينا جوا اني وياها راحت رجلينا هلكد ما هوسنا ..

خليتها تاخذلي صور ويا العروس ووحدي .. وخذيتلها هي صور همينه .. وخذنا سوية 

لحد ما اجو السيد راد يعقد طلعنا كلنا التفينا بالعبي برا لحد ما عقدوا وطلع السيد وطبينا .. كمنا نهوسلة .. سهى طلعتله الحلقات وكاموا يلبسون 

همستلي دنيا .. شكد حلوين مبينين يحبون بعض 

ابتسمت : اي صحيح 

- ادعيلي الله يفتحها عليه ونعرس اني وبشار 

كاعد اباوع عليهم مبتسمة .. من سمعت اختفت البسمة من ملامحي وباوعتلها : بشار!؟ شلج بيه 

- صبا اموت عليه اموت انتي شايفته شلون شخصية يموت 

- شخصيتيش يمعودة اني احسه مو خوش ولد 

- لا ما تعرفي فد انسان طيب هو صحيح مبين متكبر وهيج بس هو كلش طيب اذا تتقربيلا

- وانت متقربة منه 

- اني احبه 

- وهو ؟ 

- ما اعرف يوم يحيبني يوم يكلي بعدج صغيرة وابوج صاحبي وابن عمي 

- ها يحترم ابوج خطية 

- اي هو كلش يحب ابويه ويحترمه 

- لا يغرج الهوسات و الصفكات ترا العرس مسؤلية تكسر الظهر وانت بعدج صغيرة ومدللة مو مال زواج 

- دخل اخذ بشار حتى الدلال ما ارييييده 

حجتها وهي تسوي نفسها تبجي بضحك وتتغطا بيه 

لاشيتها بس  ضجت بنفس الوقت البنية حيل حابته وهو فد واحد ادب سز 

كملنا خطبة وطلعنا من بيت العروس ورجعت اني و دنيا وخواتي لمينا بيت حيدر من كملنا خذانا حازم وصلنا سهى وجهالها .. ورجع اخذنا لشارع فلسطين اني وبته وكلنا لفات همبركر واصابع بتيتة يسموونها فنكر يحطون عليها صلصات طيبة حيل عجبتنه .. انوب اخذنا وكلنا ازبري .. اتونسنا حيل لحد ما رجعنا بالطريق اني كمت اغفي 

ما عولت اوصل البيت سبحت وذبيت روحي مثل الميتة 

ثاني يوم سمعت صوت امل فوك عرفت رجعت لبيتها .. ما صعدت الها عفتها . 

جانت مثكلة وجهه عليه رغم عرفت من دنيا هي الدخلت اخوها لغرفتنا واحنا نايمين بس ما ادري هم عفتها وسديت بابي كلت شعليه . 

بشار رجع المولدة على عكازته .. 

بمن بعدها كملوا فصل الولد الدعمه .. اخذوا منه ٧ ملايين على كسر رجله وعمليته . 

من اخذهن بشار حجه ويا اهله بسالفة خطبة 

وكاللهم .. اريد بت حازم اخطبها الية .. ليما اكوم على حيلي نتزوج 

فاتحوا حازم بالموضوع كاللهم اشوف العائلة وارجعلكم خبر 

من سائل امل وماخذ رأي دنيا .. كايلتله اني موافقة .. 

ونزلتلي ركض طايرة من الفرح 

تكلي : ولج ما اصدك ما اصدك خطبني 

ولج طلع يحبني ما اصدك يمه كلبي واح يوكف 

- دنيا انت متاكدة تريدي ؟ 

- شنو متاكدة اني طاير كلبي عليه 

- بس عمرج بعدج ما طبيتي ال١٥ حيل صغيرة مو مال زواج 

-يا عمر يا بطيخ اكلج ميتة ميتة عليييييه ولج كلبي راح يوكف من الفرحة 

ضحكت لفرحتها وبنفس الوقت خفت عليها 

طفلة مو مال زواج ومتعرف هذا الحابته شنو 

فد واحد دماغ سز كلش مو مال احد ينطي مرة مستهتر 

من اجاني حازم بالليل كتله : رديت خبر لبيت نعمة على خطبة بشار 

- باجر كلت اكل لمحمد يبلغهم 

- قررت تنطي بتك 

- والله الصدك اني اول ما كالي ردت ارفض بس عمي ندسني وكالي لا ترفض اسائل العائلة واطينا خبرهم  من سالت امل واخذت راي البنية حسيت بيها هي رايدته .. وما طولها رايدته وطالبها على سنة الله ورسوله اطيها احس من اللعب يصير من ورا ظهري 

- يا لعب البنية بعدها صغيرة حازم مو مال زواج 

- تشوفينها من المدرسة بطلت بعد كعدتها شنو ؟ ما طولها حاطة ابالها عرس وراضية بقسمتها بعد هاي حياتها الله يوفقها 

- وبشار 

- احسن من غيره اقلها ولد اعرفه خوش ولد متربي ويشتغل وياي واعرفه شاغول 

-والله اني الصدك ما احبه احسه ملعب 

-ليش هيج اتحسين 

-ما اعرف ما ارتاح لوجهه احسه استغفر الله 

-ليش اتكولين هيج من صارت بيناتنا اني وياج مشكلة الولد ما قصر وجان يتعنى ويوصلج مسواك ووكف وكفة حلوة 

- اي ، هم صدك بعد يمكم اني مالي علاقة اني اشوفها بعدها صغيرة ومو مناسبين .. وبعد بكيفكم 

ضل يباوع عليه .. كتله : لا تباوعلي الموضوع ميخصني ما وطل دا تكول رايدته هاهية 

- اكو شي ؟ 

- لا شكو قابل اني بس دا اشوفهم مو مناسبين بس 

- ها .. الله كريم 

لثاني يوم مرجعلهم خبر موافق .. 

كلت معليه اني اسد بابي ومالي علاقة باحد .. 

يومها العصرية جانت مارتلي نسوان جيرانا وايدات يمي فصال .. وضيفتهن بالاستقبال وكعدت هم اسولف وياهن وهم اشوفهن شيريدن 

رادن يشوفن صور الفرشات الاخيطهن 

كمت اشوفهن اني كل ما اخيط فرشة انصبها على جربايتي واصور .. رادن مثلها كتلهن مفروشة هسه كومن شوفنها .. كومتهن شافن قماشتها وخياطها .. وصن اثنين منها .. وسجلت بالسجل مالي اليريدنه وكتلهن من باجر اروح تجيب واطيطهن الجن هالاسبوع بحيل الله اكمله الجن 

شكرني وطلعن .. اني وصلتهن لباب المطبخ وسديت الباب .. 

وانداريت جبت صينية الضيافة عسلتها ورجعت حميت الجاي .. على ما يحمى الجاي .. طلعت غراض الثلاجة .. كلهن ع الكاونتر .. واخذت الرشاش رشيت الثلاجة ومسحتها مسحة سريعة هي نظيفة لان اني ايدي بيها يومية اطلع وامسحها وارجعهن حتى لا تضل بيها وصخة .. 

واني كاعد ارجع الغراض جنت لابسة ثوب ربع ردن 

وجوا الركبة ومخصر على جسمي وبيه جاكة صفح وجارة شعري بقراصة جبيرة منا ومنا وعايفته على متني .. واني صابغته واميشته دومي ايدي بيه ما اهمل شعري كل ما حسيت اللون بهت رحت لصديقتي صبغته اليه وجددتلي اللون .. 

وواكفة ارجع بسلات المخضر وادندن 

البعيد مو عن ناسه واحبابه واليغيب لابد يملك اسبابه 

حسيت الباب انفتح حسبالي دنيا طبت .. 

انداريت بابتسامة اريد اكلها ها عروس .. جان باوعته بشار وراي .. بس شفته فزيت من مكاني وكضيت بالكاونتر .. انهبطت من الخوف احس كلبي صار بين رجليه .. شرايد؟ 

هالزواج راح يقربني منج هواي 

راح اكدر اشوفج كل يوم 

عفته وركضت لغرفتي بسرعة ..... يتبع