ـ انتى بقى سما ليه حق بصراحة يموت عليكى طول عمره مزواق

سما باستغراب: هو حضرتك بتكلمينى انا

ـ ايه ده وزى ما اتقالى بالظبط محترمة وزوق

سما: ربنا يخليكى شكرا بس انتى مين وعاوزة منى ايه وتقصدى مين بكلامك ده

ـ الموضوع محتاج نقعد عشان نعرف نتكلم

نظرت سما فى الساعة بتاعتها وقالت: انا اسفة بس انا عندى شغل ومتأخرة عليه جدا ومش هينفع اتأخر عن كده

ـ وانا مش هعطلك خدى رقمى معاكى ولما تخلصى شغلك كلمينى نتقابل ف اى كافيه

سما: تمام اسم حضرتك ايه

ـ اسمى فرح

سما: تمام ي مدام فرح سجلت الرقم واول ما اخلص ان شاء الله هكلمك عن اذنك

مشيت سما مسرعة ونظرت فرح لطيفها بترقب وبعدها رفعت فونها وقالت: حصل اللى قولت عليه

ـ وكان رد فعلها ايه

فرح: لسه محكيتش ليها حاجة عشان كانت مستعجلة ع الشغل بس تعرف طلعت زى ما قولت بالظبط بريئة جدا وحتى فضولها غريب انا شوفته بعيونها ومع ذلك معادتش السؤال عليا مرتين اللى هو تقصدى ايه بكلامك وعن مين

ـ عشان كده قولتلك لازم نساعدها لازم نخليها تفوق وانا واثق اوى انها مش بتحبه اصلا هى ممكن تكون اتعودت ع وجوده مش اكتر

فرح: هو انت بتعمل معاها كده ليه اشمعنا هى بالذات

ـ اجاب بتوتر مدارى خلف الشاشة: تقصدى ايه بكلامك ده انا بساعدها عشان هى متستاهلش

فرح: امممم اه هعمل نفسى مصدقاك حاضر

ـ تصدقى او لا دى حاجة تخصك انا هقفل عشان عندى اجتماع مهم سلام

اغلق الهاتف …فرح لنفسها: ماشى هتروح منى فين الايام بيننا

اما عند سما وصلت الشغل متأخرة وطلعت ع مكتبها وهى بتنهج وقعدت بتعب

لارا صديقتها بالشغل: ايه يا بنتى مالك انتى جاية جرى ولا ايه

سما: حاجة زى كده المهم مستر شريف وصل ولا لسه

لارا: اه من ربع ساعة

سما بخوف: وعرف انى لسه موصلتش

لارا: معتقدش وبعدين ايه المشكلة حتى لو عرف انتى طول عمرك ملتزمة وعمرك ما اتأخرتى عن مواعيدك

سما: يا بنتى متنسيش ان باب الترقى قرب ومش عاوزة اى غلطة بملفى وكده كده هيعرف من الزفتة البصمة

لارا: انتى عبيطة يا سما دى هى نص ساعة تأخير انا مش فاهمة دماغك

سما بصوت منخفض: اذا كان انا نفسى مش فاهمها

لارا: بتبرطمى تقولى ايه على صوتك

سما: هو انتى جاية تقولى شكل للبيع والله ما قولت حاجة عليكى ده انتى رخمة

لارا: شكرا يا زوق

سما: طب ركزى فى شغلك يا اختى وسبينى فى حالى بقى

لارا: تعالى هنا الاول رامى جه زى ما وعدك ولا لا؟!

سما بتفكير: اه جه بس بابا طلب منه وقت يسأل عنه الاول

لارا بفرحة: واخيرا عروسة وحفلة ودريس سواريه وهيلز انا متحمسة اوى

أغمضت سما عيونها بحزن: ان شاء الله اللى فيه الخير يقدمه ربنا

فى وقت الشغل لاحظت لارا سرحان سما المتكرر زى انها بتبص للورق بتوهان او حد يكون بيكلمها ومتركزش بكلامه واخرها وهى بتعمل لنفسها شاى وفضلت تصب لحد ما المياه نزلت ع ايدها

سما: اها

لارا بخوف: انتى عبيطة تعالى بسرعة اقعدى

جابت علبة اسعافات وحطت ليها مرهم للحروق …لارا: بتوجعك اوى

سما: يعنى بتحرقنى

لارا: مالك يا سما فيكى ايه انتى النهاردة مش طبيعية وانا ملاحظة كده ومتقوليش مفيش لانى فهماكى وحفظاكى اكتر من نفسى

سما: اصل حصلت حاجة معايا الصبح شغلانى شويه

لارا: ايه هى بقى

حكيت ليها سما عن فرح واللى حصل … لارا: طب ما كنتى رنيتى عليها وفهمتى فون لزومها ايه المقابلة دى يعنى

سما: مجاش فى دماغى كل ده لانى كنت مستعجلة عشان الشغل

لارا: طب اسمعى انا هاجى معاكى رجلى ع رجلك

سما بابتسامة: ربنا يديمك يا لورا مش عاوزة اتعبك معايا

لارا: بس يا بت انتى بطلى عبط احنا منعرفش دى مين ولا ناوية ع ايه خلينا نفاجئها بوجودى يعنى متعرفيهاش انى هكون معاكى

يعدى الوقت واول ما قربت سما تخلص رنت ع فرح وقالت: السلام عليكم

فرح: عليكم السلام فكرتك هتطنشى

سما: اطنشك ازاى انا قولتلك هقابلك بعد الشغل عشان افهم انتى مين وعاوزة منى ايه

فرح: حلو يعنى انتى خلصتى شغلك

سما: ربع ساعة بالظبط واخلص اجيلك فين

فرح: الكافيه اللى ف اول الشارع اللى اتقابلنا عنده قريب منى

سما: تمام ان شاء الله مسافة الطريق

اغلقت سما ووضعت رأسها ع المكتب لتجد هاتف المكتب بيرن: الو يا مستر شريف

شريف: تعالى عاوزك يا استاذة سما

سما: حالا يا فندم

راحت سما على مكتب شريف وبعد ما استأذنت بالدخول …. سما: ايوة

شريف: مالك النهاردة

سما باستغراب: مش فاهمة حضرتك تقصد ايه

اشار شريف على ايدها وقال: الحرق ده ايه سببه ايه اللى مشتت تركيزك

سما: احم ولا حاجة حضرتك شوية ضغوطات

شريف: سما متنسيش اننا كنا زمايل بالكلية يعنى انا دلوقتى مش مديرك عشان تتعاملى معايا برسمية

سما: واحنا هنا جوة المكتب ف الشركة يعنى لا مكانه ولا وقته

شريف: انتى ليه بتتهربى منى

سما: اتهرب منك ليه احنا مفيش بينا الا الشغل وبس يا مستر شريف عن اذنك

خرجت سما وظل شريف يراقب طيفها بغضب ….. بعد خروجهم من الشغل راحت سما مع لارا ع الكافيه وكانت فرح بانتظارهم

فرح: فى ميعادك بالظبط مين الاستاذة

قبل ما تجيب سما ردت لارا: معتقدش ان مهم ليكى تعرفى انا مين

فرح بضحكة: مالك فى ايه انا بس بتعرف عليكى مش اكتر

لارا: وتتعرفى عليا ليه اصلا هو انا اعرفك

سما: اهدى يا لارا مش كده … ثم نظرت لفرح: معليش انا اسفة هى بس عصبية شويه

فرح: قولى شويتين تلاتة

سما: حقك عليا ممكن اعرف بقى ف ايه

فرح: بس انا عاوزة اتكلم معاكى لوحدنا لو سمحتى

لارا: لوحدكم ليه ان شاء الله اتفضلى قولى اللى عندك وانا معاكم

فرح: بس اللى انا عاوزة سما فيه مينفعش اقوله قصاد حد

لارا: وانا مش حد يا حبيبتى انا صاحبة عمرها وخازنة اسرارها فاللى فى عيبك كله ارميه قصادى عادى

نظرت فرح لسما وقالت: حتى لو كان الموضوع بخصوص رامى المهندس ووووو…….