ساره نظرت الي حازم وتحدثت بحده/ انت اتجننت يا متخلف انت.. انت ازاي تعمل معاه كده. 

حازم بسخريه/ انتِ لسه شوفتي جنان.. ده انتِ جيتي في ملعبي.. ثم اكمل بإبتسامة شر.. والله لردلك اللي عملتيه معايا.. نظر حازم الي جميع من في الجامعه وتحدث بصوت مرتفع.. الهانم اللي عامللنا فيها محترمه ومبتكلمش شباب.. رايحه تحضن شاب قدام الجامعه كلها... 

حازم كان سيكمل حديثه ولكن قاطعته لكمه قويه للغايه من هشام مما جعلته يتراجع عن مكانه. 

هشام بحده/ اخررررس يا حيوان اللي بتتكلم عليها دي تبقى اشرف منك ومن أهلك. 

حازم وضع يده مكان الضربه ونظر الي هشام وتحدث بسخريه/ ليك حق تدافعلها ما انت حبيب القلب.. مكنتش انت تدافعلها مين يدافعلها يعني وخاصتاً بعد ما حقيقتها انكشفت قدام الجامعه كُلها. 

هشام ذهب اليه وظل يربحه ضرباً وكل من في الجامعه تجمع حولهم و رامي كان في محاولاته في بعد هشام عن حازم.. و ساره كانت واقفه مصدومه ولا تعرف ماذا تفعل حتي تبعد هشام عن حازم. 

حازم أيضاً قام بضرب هشام وظلوا يتشاجرون.

رامي بحده/ خلاص يا حاااازم كفااايه بقى. 

ساره اخذت نظرت ل حازم بغضب وذهبت اتجاههم و بعدتهم عن بعض بصعوبه و وقفت امام حازم وقامت بالتصفيق له وهو ينظر لها بغضب وهي تحدثت بسخريه/ براڤو يا حازم.. حقيقي براڤو عرفت تردلي اللي عملته فيك.. عرفت ترد حقك يا دنجواي الجامعه.. ثم اكملت بهدوء.. بس عارف انا مش مستغربه اللي انت عملته.. عارف ليه.. عشان انت واحد معقد ومحتاج تتعالج.. ثم اكملت بإبتسامة استفزاز.. بجد صعبت عليا.. انصحك تروح تتعالج.. صدقني هترتاح. 

رامي كان متمسك ب حازم الذي بداخله بركان من الغضب سوف ينفجر. 

ساره نظرت الي هشام ومن ثم نظرت الي جميع من يقف حولهم وتحدثت بصوت عالي وجرأة/ اسمعوني كويس.. ده اسمه هشام عبدالله وانا اسمي ساره عبدالله يعني احنا اخوات.. الجميع نظر اليها بصدمه وظلوا يتهامسون مع بعضهم البعض.. اكملت ساره.. يعني اكيد مفيش مشكله لما اخويا يحضني.. اللي عايز يصدق خير وبركه.. نظرت الي حازم وتحدثت بإشمئزاز.. واللي مش عايز يصدق يروح يشرب من البحر مش فارقلي أصلاً.. ومن ثم عادت النظر الي الجميع وتحدثت بنفس نبرتها الاولى.. اعتقد كده انتم عرفتو كل حاجه عشان مفيش اي حد بعد كده يتجرأ ويقول كلمه وحشه في حقي.. ولو حصل وسمعت اي كلمه متعجبنيش حقيقي الشخص ده هيندم أوي.. والكلام ده للجميع. 

ساره نظرت الي هشام ومن ثم ذهبوا هما الاثنين.. وتركوا حازم في غضب جحيمي. 

رامي نظر الي الجميع وتحدث بصوت عالي/ يلا يا جماعه كل واحد يروح يشوف وراه ايه.. فضنيها خلاص خلصت. 

ذهب الجميع ونظر رامي الي حازم وتحدث بهدوء/ تعالي يا صاحبي نروح نقعد في اي حته. 

حازم بحده/ مش عايز اتزفت.. انا هروح. 

ذهب حازم وترك رامي في حزن على صديقُه المُقرب. 

ــــــــــــــــــــــــــــــــــــــــــــ✦

في النادي... 

مراد كان في محاولاته في البحث عن نور وعن اي معلومات عنها. 

وبعد كثير من المحاولات نجح واستطاع ان يعرف كل شيء يريد ان يعلمه عنها. 

ظل يبحث عنها في النادي حتي وجدها في غرفه التدريب وتتدرب مع المُدرب و وقف وظل يتأملها ويتأمل لعبها بإحترافيه.. ولكن انتبه عليها عندما وقفت لعب وقام بالأختباء حتي لا يراهُ كُلاً من المُدرب ونور. 

ــــــــــــــــــــــــــــــــــــــــــــ✦

عند نور.. 

المُدرب بإبتسامة/ اعتقد كفايه لحد انهارده.. نكمل بكره ان شاءلله. 

نور بإبتسامة/ اكيد باذن الله يا كوتش. 

ذهب المُدرب وهي اتجهت الي الكافيه وطلبت قهوه وجلست علي احدي الطاولات الفارغه وكانت في انتظار رُأيته بفارغ الصبر. 

بعد دقائق معدوده.. وجدته يقف امامها.. نظرت له وتحدثت بسخريه/ هو النادي ده مبيستخباش فيه حاجه ولا ايه.. ولا تكونش دي صدفه اني اقابلك تاني. 

مراد بتساؤل/ بتعملي ايه هنا يا نور وايه خطتك.. عايزه تنتقمي مني؟!. 

نور وقفت امامه و وضعت يديها في جيبها وتحدثت بسخريه/ ده انت عرفت اسمي وجاي بتحقق معايا ومستنيني ارد على اسئلتك اللي انا مش فاهمها الصراحه.. ثم اكملت بحيره.. ياترى يا مراد بيه الناس ممكن تيجي النادي تعمل فيه ايه مثلا.. ثم اكملت بهدوء.. شوف يا مراد.. انا جايه النادي عشان انا عايزه كده.. واما بالنسبه اني انتقم منك والكلام الاهبل ده.. ف انا نسيتك اصلا وحتي لو زي ما بتقول اني عايزه انتقم منك.. هاجي انتقم منك في النادي.. ثم اكملت بإبتسامة سخريه.. سوري يعني بس هو انت عبيط. 

مراد بحده/ ما تخلي بالك من كلامك واعرفي انتي بتتكلمي مع مين. 

نور بنفاذ صبر/ ونبي بلاش الكلام اللي زهقت منه ده.. شُغل انتي متعرفيش بتتكلمي مع مين والكلام ده بقى ملوش لازمه.. ثم اكملت بإبتسامة استفزاز.. وبعدين هتكون مين يعني هاا.. اقولك انا.. انت تبقي مراد الانصاري، المغرور، المتكبر، اللي مفيش لاعب زايه في لعبه التنس.. تحب اكملك؟؟. 

مراد بسخريه/ ده انتي مذاكره اهو.. اومال ايه نسيتيني دي.. ثم اكمل بغمزه.. اومال لو مكنتيش نسيتيني كنتي هتعملي ايه. 

نور بإستفزاز/ خليها مفاجأة احسن. 

مراد شعر بالضيق من استفزازها في الحديث ومن ثم خطر علي باله شئ ومن ثم تحدث بتساؤل/ هو انتي بجد هتشاركي في المسابقه بتاعت التنس. 

نور بهدوء/ ايوه هشترك.. عندك مانع؟؟. 

مراد بنفي/ لا طبعا وانا هيبقى عندي مانع ليه..ثم اكمل بسخريه.. بس اعتقد انك مش هتكملي لانه باين عليكي مبتعرفيش تلعبي. 

نور بإبتسامة مزيفه/ والله بقي دي حاجه متخصكش اخسر ولا اكسب.. وموضوع بقى باين عليا بعرف العب او لأ.. ف ده بردوا ميخصكش.. انت اللي ليك اني وقت ما العب ضدك نشوف مين اللي هيكسب.. ثم اكملت بصوت عالي نسبيا وهي في طريقها للذهاب.. والبقاء للاقوى يا بطل. 

مراد كان واقف في قمه غضبه ونور ذهبت وهي تبتسم ابتسامه انتصار. 

ــــــــــــــــــــــــــــــــــــــــــــ✦

في المدرسه الثانويه.. 

في الكافيه.. 

كانت لينا جالسه وكانت تتحدث مع صديقتها وتُدعى «ليل». 

ليل وهي تنظر ل يوسف الذي ينظر ل لينا بتوعد. 

ليل بإستغراب/ انا مش فاهمه البنأدم الملزق ده عايز منك ايه. 

لينا بلا مبالاه/ مش فارق معايا عايز ايه.. فكك منه ده مجنون. 

ليل بضحك/ على رأيك والله. 

لينا بتذكر/ ااه صحيح.. فاكره الشاب اللي كنت بحكيلك عليه انه بيعدي كل يوم من قدام مدرستنا. 

ليل بإبتسامة/ ايوه فاكراه.. ماله بقى. 

لينا قصت لها كل ما حدث معها عندما رأته. 

ليل بغمزه/ ايوووه بقى.. شكلها لعبت معاكي يا لينا يا قمر انتِ. 

لينا بضيق/ ونبي تسكتي ده لو تشوفي شكلي وقتها.. كان شكلي عبيط اوي. 

ليل بضحك/ هو انتي هتقوليلي ما انا عارفاكي. 

لينا بغيظ/ طيب يلا نروح class عشان الحصه هتبدأ. 

ليل بضحكه خفيفه/ يلا يا لي لي. 

ــــــــــــــــــــــــــــــــــــــــــــ✦

في النادي.. 

نور كانت تجهز حالها للذهاب الي المنزل ولكن اوقفها كُلا من شريف وانور. 

شريف تحدث بإبتسامة/ ازايك يا دكتور.. نورتي النادي. 

نور تركت اشيائها و وقفت امامهم ونظرت الي انور ومن ثم نظرت الي شريف وتحدثت بإبتسامة مزيفه/ تسلم.. بس متعرفناش. 

شريف بغرور/ انا شريف المصري وافضل لاعب تنس في الشرق الاوسط. 

نور ظلت تضحك مما اثار غضب شريف واستغراب انور. 

نور توقفت عن الضحك وتحدثت بتساؤل/ سوري بجد.. بس هو ليه كل واحد يكسبله كام مباراه ورا بعض يجي يقول انا افضل لاعب في الشرق الاوسط.. هي الجمله دي انتو مش حافظين غيرها. 

شريف كان يحاول التماسك امامها ومن ثم تحدث بإبتسامة ثقه/ شوفي يا دكتور نور.. انا شريف المصري.. لو متعرفنيش اسالي عني والف من يدلك. 

نور بإبتسامة استفزاز/ في دي عندك حق انا لازم فعلا اعرفك كويس.. عشان لما العب ضدك في المسابقه اعرف ازاي اكسبك بسهولة. 

شريف نظر الي انور و انور ادرك انه شريف بدأ يغضب من حديث نور. 

انور بهدوء/ شوفي يا دكتور.. احنا جايين وبنقدملك عرض ممتاز. 

نور برفض تام/ انا اسفه مش عايزه اسمع اي عروض.. دلوقتي تقدروا تتفضلوا لو مفيش اي حاجه تاني تقولوها. 

شريف لم يعد يتحمل نور وخرج علي الفور ونور نظرت الي انور بإشمئزاز ومن ثم تحدثت بسخريه/ روح الحقه بسرعه عشان متتوهش يا صغنن. 

ذهب انور وهو في غيظ من حديث نور له. 

ــــــــــــــــــــــــــــــــــــــــــــ✦

في الجامعه.. 

عند ساره وهشام... 

ساره كانت تحاول ان تخفف من جروح هشام وكانت تدواي جروحه بالقطن ومن ثم تحدثت بحزن علي اخيها/ حقك عليا يا هشام.. كل ده بسببي. 

هشام بحزن/ انا كده هزعل يا ساره.. معقول تقولي كده.. يعني لو مدافعتش عنك هدافع عن مين يعني.. انتي اختي يا ساره. 

ساره بإبتسامة حب/ ربنا يخليك ليا يا احلي اخ. 

هشام امسك يديها وتحدث بتساؤل/ اولا انا عايز اعرف انتي جيتي مصر امتى وازاي انا مشوفتكيش ولا مره في الجامعه وازاي اصلا متتصليش بيا تعرفيني.. وانتي قاعده فين دلوقتي.. وثانيا مين المتخلف اللي انا كنت هموته ده وانتي عملتي فيه ايه عشان كان عايز يردهولك. 

ساره بضحك/ ايه حيلك حيلك انا لو في تحقيق مش هيبقى كده.. ثم اكملت بهدوء.. شوف يا اتش اولا.. انا جيت مصر من شهرين قبل بدايه الجامعه.. جيت قعدت في اوتيل وبعديها لقيت شقه مناسبه ليا واجرتها ودلوقتي انا قاعده فيها.. متصلتش بيك ليه.. عشان مكنش معايا رقمك وحاولت اوصلك كتير انت ونور بس معرفتش وكنت بدعي كل يوم اني الاقيكم.. والحمدلله ربنا تقبل دعائي.. وبالنسبه للمتخلف ده ف متشغلش بالك من ناحيته. 

هشام بإصرار/ لا طبعا لازم اعرف مين اللي استجري انه يضايق اختي حبيبتي. 

ساره بإبتسامة لحنيه اخيها/ حاضر هقولك. 

ساره قصت له قصه حازم بالكامل. 

هشام بتوعد/ والله لدفعه التمن،، حسابه معايا بعدين.. ثم اكمل بهدوء.. المهم انتِ تيجي تقعدي معانا مينفعش تقعدي لوحدك الدنيا مبقتش امان.. وانا استحاله اسيبك انا ما صدقت اني لقيتك. 

ساره بسخريه/ هو انا كنت تايهه ولاقتني يا هشام. 

هشام بجديه/ ساره انا مبهزرش احنا هنروح الشقه اللي انتِ قاعده فيها تلمي حاجتك وتيجي معايا. 

ساره بإستسلام/ حاضر يا هشام.. ثم اكملت بإبتسامة.. صحيح ماما حنان عامله ايه. 

هشام بإبتسامة/ هتتجنن عليكي انتي مش متخيله من ساعه ما مامتك خدتك وسافرتوا لندن وهي نفسها تشوفك ازاي.. صحيح مامتك عامله ايه وليه مجتش معاكي. 

ساره بحزن/ ماما تعيش انت يا هشام.. ده اصلا كان سبب رجوعي مصر. 

هشام بحزن/ البقاء لله يا حبيبتي.. انا اسف والله.. كنت بتمني ابقى جمبك عشان متعشيش العذاب ده لوحدك. 

ساره بإبتسامة مزيفه/ متتأسفش يا حبيبي.. الحمدلله على كل حال.. انا راضيه بقضاء ربنا و عارفه انه هي دلوقتي في مكان احسن. 

ــــــــــــــــــــــــــــــــــــــــــــ✦

في المدرسه الثانويه.. 

لينا انتهت من يومها الدراسي وكانت في انتظار شقيقها أن يأتي ليأخذها ولكنه تأخر للغايه وحاولت الاتصال به عدّة مرات ولكن لا اجابه.. لينا ملت من الانتظار وقامت بالاتصال ب اخيها مراد وانتظرت ثواني معدوده ومن ثم اجاب مراد علي مكالمتها. 

لينا بضيق/ ايوه يا مراد انت فين. 

مراد بإستغراب/ انا في النادي يا لينا في حاجه ولا ايه. 

لينا بتعب/ ايوه يا مراد انا خارجه من المدرسه بقالي ساعه واخوك اتأخر عليا اوي وبرن عليه مش بيرد.. تعالي خُدني بليز عشان تعبت اوي. 

مراد بهدوء/ طيب يا حبيبتي انا جاي اخدك.. ربع ساعه واكون عندك. 

اغلقت لينا مع مراد ومن ثم وقفت تنتظره بفارغ الصبر. 

ــــــــــــــــــــــــــــــــــــــــــــ✦

عند شريف.. 

كان في قمه غضبه من نور وتحدث بحده/ بقى انا شريف المصري.. تيجي بت زي دي تتكلم معايا انا كده. 

انور وهو يحاول تهدئته/ اهدي كده يا باروا عشان نفكر احنا هنعمل اي في المسابقه. 

شريف بحزم/ انا لازم اكسب المسابقه دي السنادي انا مش هسمح بأي خساره.. شريف المصري ميدخلش تحدي ويخرج منه خسران أبدا. 

انور بثقه/ هتكسب ان شاءلله هتكسب وبكره تشوف. 

شريف بنفاذ صبر/ اما نشوف يا انور. 

ــــــــــــــــــــــــــــــــــــــــــــ✦

عند هشام.. 

كان يذهب هو وساره سويا بعدما انتهوا من جامعتهم. 

هشام بفخر/ بس انا فخور بيكي اوي انهارده.. اتكلمتي قدام الجامعه كُلها بشجاعه ومهمكيش كلام المتخلف ده. 

ساره بإبتسامة/ طلعالك يا حبيبي.

هشام بإبتسامة/ بتفكريني ب بابا كان دايما يتكلم معايا انا ونور ويقولنا اهم حاجه في الحياة تكونو اقوياء.. مهما الدنيا حاولت تضعفكم انتم تهزموها بقوتكم.. وطول ما انتم على حق اوعوا تخافوا من اي حد مهما كان هو مين واهله مين.. طلما انتو على حق ميهمكوش.. وفعلا كلامه طلع صح. 

ساره بإبتسامة حزن/ الله يرحمه.. كان أب عظيم وعارف يعني ايه مسئوليه. 

هشام في نفسه/ عندك حق يا ساره.. ياريت نور كمان تقتنع انه بابا كان كويس ومش وحش زي ما هي مفكره. 

هشام نظر الي ساره وتحدث بإبتسامة/ من حسن حظك اني جبت عربيتي انهارده عشان نجيب حاجتك من الشقه ونطير على بيتنا.. ده ماما هتفرح اوي لما تشوفك. 

ساره بحماس/ وانا كمان نفسي اشوفها واحشتني اوي.. يلا بسرعه عشان انا اتحمست. 

هشام ضحك على براءة شقيقته.. وذهبوا هما الاثنين في طريقهم الي سيارة هشام. 

ــــــــــــــــــــــــــــــــــــــــــــ✦

عند لينا.. 

جاء مراد وركبت معه ونظر اليها بإبتسامة وتحدث بهدوء/ حقك عليا يا حبيبتي انك استنيتي كل ده. 

لينا ادارت وجهها واصتنعت الزعل.. مراد ضحك وادرك انها تتصنع الحزن.. وقام بإخراج الشوكلت التي تعشقها كثيرا وقدمها لها وتحدث بإبتسامة/ طيب وبعد ما تخدي دي هتبقى لسه زعلانه. 

لينا نظرت الي الشوكلت بسعاده واخذتها وتحدثت بإبتسامة وهي تفتحها/ لا انا مقدرش ازعل منك اصلا.. انت حبيبي يا مراد. 

مراد بخبث/ دلوقتي بقيت حبيبك.. ثم اكمل بإبتسامة.. ماشي يا بكاشه. 

قام مراد بتشغيل السياره وانطلقوا الي المنزل. 

ــــــــــــــــــــــــــــــــــــــــــــ✦

مساااءااا.. 

في منزل عبدالله.. 

حنان منذ ان رأت ساره وهي تهتم بها اكثر ما كانت تهتم بأولدها الحقيقين. 

هشام بضحك/ ايه يا ماما يا حبيبتي اهدي شويه عليها. 

نور بسخريه/ من لقي احبابه نسي اصحابه.. ولا ايه يا ماما. 

حنان بغيظ/ امشي يالا منك ليها من هنا وسيبوني انا وسوسو لوحدنا. 

نور بإبتسامة/ يحظك يا سوسو هتدلعي اخر دلع واحنا هنتركن على الرف. 

ساره بإبتسامة/ مفيش الكلام ده طبعا.. احنا كلنا معزتنا واحده عند ماما حنان.. مش كده ولا ايه يا ماما. 

حنان بإبتسامة/ طبعا يا حبايبي دي مفيهاش كلام.. ثم اكملت وهي تمسك ب الشبشب تباعها وتتحدث بغيظ.. هو انا مش قولت امشوا ولا لازم اديكوا بالشبشب زي زمان. 

نور بإبتسامة وهي تنظر ل هشام وتستدير للخلف/ في الحالات اللي زي دي يا اتش بنقول انه الجري نص الجدعنه. 

هشام وهو يستدير معاها للخلف/ لا يا اختي مادام فيها شبشب ست الكل يبقى الجري الجدعنه كلها. 

حنان بغضب/ امشوا من وشي فورا. 

نور وهشام ظلوا يجروا واتجهوا الي حديقه المنزل. 

حنان تركت سلاحها الخاص وظلت هي وساره تضحكان على كلا من هشام و نور. 

 ــــــــــــــــــــــــــــــــــــــــــــ✦

في الحديقه..

هشام بتساؤل/ انتِ مش متضايقه من وجود ساره صح؟؟

نور بإستغراب/ ايه اللي انت بتقوله ده يا هشام.. لا طبعا مش متضايقه دي اختي..ثم اكملت بهدوء..بص انا عارفه انك كنت بتشوفني زمان اني بتعامل مع ساره ومامتها بطريقه مش حلوه لحد ما مامتها اخدتها وسافروا لندن..بس ده كله بسبب بابا.. ربنا يرحمه ويغفر له..خلينا في المهم .

هشام بتساؤل/ خير حصل حاجه؟؟

نور بهدوء/ شوف يا هشام قبل ما احكيلك اي حاجه لازم توعدني انك هتبعد عن اللي اسمه أنور ده.

هشام بهدوء/ حاضر يا حبيبتي احكيلي بس هو هبب ايه وانتِ شوفتيه فين اصلا.

ــــــــــــــــــــــــــــــــــــــــــــ✦

في مكان آخر في منزل عبدالله..

حنان بهدوء/ شوفي يا ساره انا فاهمه انتِ بتفكري في ايه..وعايزه تسالي تقولي ايه..بصي يا حبيبتي انا و عبدالله اتجوزنا جواز صولونات ومع مرور الوقت بدأنا نفهم بعض ومع العِشره بدأنا نحب بعض وانا حملت في نور وعملنا اسره سعيده..لحد ما قابل مامتك.. حياتنا اتغيرت 180 درجه بقى شخص تاني خالص..حياتنا بقت معظمها مشاكل ومبقتش مستقره وانا اتخنقت ومعرفش ايه سبب تغيره..لحد ما في يوم اكتشفت اني حامل في هشام فرحت وقولت اكيد عبدالله هيفرح وهيرجع كويس زي الاول..واليوم اللي جيت اعرفه فيه اني حامل في هشام..صدمني هو بخبر جوازه من والدتك..ساعتها معرفتش اعمل اي حاجه وبعد ما خرجت من تأثير الصدمه طلبت منه الطلاق وهو وافق يطلقني بس كان شرطه الوحيد اني أوافق اسمعه واديله فرصه يشرحلي هو عمل كده ليه لاني كنت رافضه أعرف اي حاجه او اسمع منه اي مبررات وبالفعل وافقت وقالي الشرط التاني اني اسامحه..سبب جوازه من والدتك انه هو كان بيحبها من هو صغير وكان متعلق بيها جدا ولما هي سافرت هو حاول ينساها بس معرفش وفضلت في باله حتى بعد ما اتجوزني لحد ما قابلها تاني ومقدرش يستغني عنها وهي كمان كانت بتحبه..المهم هو طلقني و اتجوزها وقعدوا مع بعض سنتين..وانتي جيتي بعد هشام بكام شهر..للامانه عبدالله رغم انه كان عايش مع مامتك بس كان بيجي كل فتره يطمن على الاولاد ويقعد معاهم وكان هو متكفل بمصاريفهم في كل حاجه ومكنش مخليهم محتاجين ل حاجه.. بعد ما قعد مع مامتك سنتين اتوفي ومامتك جتلي وكانت بطالب بالورث وانا كلمت المحامي وعمل كل الإجراءات عشان كل واحد ياخد حقه بما يرضي الله وبالفعل كل واحد خد حقه.. وبعدها حاولت كتير اقنع مامتك انها تجيبك وتيجوا تعيشوا معانا عشان انتي متتربيش لوحدك وانا اصلا في الوقت ده كنت متعلقه بيكي جدا وهشام كان بيحبك جدا بس للاسف هي موافقتش وخدتك وسافرت لندن.. ومن ساعتها وانا معرفش عنك حاجه.. ثم اكملت بحب.. اللي عايزه اوصلهولك انك رغم انه انتِ بنت ضُرتي بس يعلم ربنا انا حبيتك ازاي واعتبرتك زي ولادي.. مش معني انه انا كُنت مرات باباكي ف اعاملك معامله وحشه او اكره ولادي فيكي.. فهماني يا بنتي. 

ساره بحُب/ فهماكي يا ماما وعشان كده انا بحبك وبحب هشام ونور اوي وعمري ما اعتبرتك مرات بابا بالعكس انا من اول ما شوفتك وانا حبيتك اوي وكنت بعتبرك زي ماما وممكن تكون ماما خدتني وسافرت لندن عشان خافت ل أحبك اكتر منها او ممكن تكون فكرت انه حضرتك هتخديني منها.. المهم انا مبسوطه اوي اني شوفتك وربنا يخليكي ليا وميحرمنيش منگ ابدا يا احلي ماما في الدنيا. 

حنان عيونها دمعت من كلام ساره واخذتها في حضنها وطبطبت عليها بحب. 

ــــــــــــــــــــــــــــــــــــــــــــ✦

 عند هشام ونور.. 

هشام بصدمه/ انتي متاكده انه ده كان انور. 

نور بثقه/ طبعا يا هشام هو انا معرفش انور يعني.. انا متاكده من اللي قولتهولك هو جيه واللي اسمه شريف ده وكانو عايزين يعرضو عليا عرض.. بس انا منعتهم. 

هشام بتوعد/ ماشي يا انور والله لوريك.. ثم اكمل بتساؤل.. طب وانتي ايه خطتك عشان تهزمي اللي اسمه مراد ده. 

نور بإبتسامة شر/ هقولك.. 

ــــــــــــــــــــــــــــــــــــــــــــ✦

صباااحاااا.. 

في المدرسه الثانويه.. 

كانت تقف مع شقيقها وتتحدث بغيظ. 

/ البت اللي اسمها لينا دي مُستفزاني اوي يا أدهم. 

أدهم بإستغراب/ وانتي مالك بيها يا ريم.. ولا هو انتي ما بتصدقي تحطي حد في دماغك عشان تتخانقي معاه. 

ريم بسخريه/ لا وانت الصادق ده انا هعملها مفاجاءه هتعجبها اوي. 

ريم ذهبت من امام أدهم.. وأدهم تحدث بصدمه/ رايحه فين المجنونه دي. 

ريم كانت في طريقها للذهاب الي لينا وادهم كان في محاولاته لمنعها. 

ريم وقفت امام لينا وتحدثت بإبتسامة مزيفه/ ازايك يا لينا عامله ايه.

لينا كانت تتحدث مع صديقتها ومن ثم نظرت الي ريم وتحدثت بهدوء/ انا بخير وانتي عامله ايه يا ريم. 

ريم بإبتسامة استفزاز/...............

ريم كانت في صدمه كبيره عندما تلقت صفعه قويه هبطط على وجهها من لينا... 

يـتــبـع🦋..