" خلعت منهم بالعافيه و كنت بحاول اخرج بس المكان كبير ومليان ناس وانا حاسه اني تايهه وخايفه لحد ما فجأة لقيت حد بيشدني جامد " 

بصتله بصدمه: أدهم!؟ انت.. بتعمل ايه هنا؟!

أدهم قرب ناحيتة فريده بغضب: انتي الى بتعملي ايه في المكان ده !! 

كانت واقفة جمبه واحده: مين دي يا ادهم؟

فريده زقت ايده: مش بعمل حاجه انا ماشيه

"اتحركت بعيد عنه خطوتين فا ساب البنت وراح ورا فريده"

"خدها من ايدها وخرجوا لحد بره عند عربيته و فريده كانت مضايقه من طريقته"

- اوعي بقا بطل تمسكني كده وسع

= انتي مين سمحلك تيجي مكان زي ده! 

- ملكش دعوة اصلا!!! انت مالك !! هو انا مش واحده نصابه وكدابة وكل ده خليك في خالك بقا

" أدهم افتكر نتيجه التحليل و انها خلاص بقت مربوطه بيهم رسمي! "

= كان نفسي والله صدقيني كان نفسي

- انت بجد مش طبيعي!

= طب اركبي العربية عشان اروحك ولما نوصل يبقي

 لينا كلام تاني

- مفيش بينا كلام اصلا! هو انت صعب عليك تفضل بعيد عني !؟

بصلها واتكلم بغضب مكتوم: هو انتي فكراني ايه بالظبط عشان اللاقيكي في مكان بالمنظر ده واسكت ؟ هاه؟

فريده فضلت باصة لعيونه ومتنحه وادهم كمان سرح لثواني وبعدين اتكلم: كنتي بتعملي ايه جوه؟؟؟

- مش حاجه تخصك..

زعق بنرفزه: بطلي تستفزيني !!! تعرفي مين جوه عشاه تدخلي ولا مين الي جابك اصلا !!

ردت بعصبيه: متزعقليش !!  ده على اساس انك كنت فين يعني!! ما انت كنت جوه برضو وقاعد مع واحده  في المكان اهو على الأقل انا كنت ماشية ومكنتش مع حد ! يا تري بقا جدو يعرف الكلام ده ؟ ولا انت ضاحك عليهم و بتمثل انك في الشغل ! 

"اتعصب من فكره انها عماله ترد و تستفزه وكمان عرفت هو فين وبيعمل ايه مبقاش قادر يتحكم في اعصابة"

مسك دراعها وبص لعينها: بصي بقا عشان واضح اننا هنعيش مع بعض وهتفضلي لزقه في حياتنا كتير اوعي تفكري تحطي راسك براسي او تهدديني فاهمه؟؟ 

" فريده بعدت وبصتله بتحدي" 

- انت تبقي غلطان لو فاكر انك هتمشي كلامك ده عليا وتخوفني تبقي بجد غبي ولو مبعدتش عني وبطلت تقربلي هقولهم كنت فين وبتعمل ايه

فريده موبايلها رن فا ردت: الو انت فين!

- انا بدور عليكي يابنتي انتي بتعملي اي عندك؟

= ايوه انا شوفت عربيتك خلاص اهو ، بشاور لك

- اه شوفتك

" ادهم كل ده واقف شايط ومش مستوعب برودها ومستني يشوف مين الى جي عشان شوية وكان هيفرتك دماغها "

" لحد ما زين وصل و الاتنين اتفاجئوا ببعض " 

أدهم: اه ده انت كمان؟ والله دي حاجه جميلة اوي

زين بص لفريده: انتوا بتعملوا اي هنا

فريده: انا مكنتش معاه اصلا لاقيته جوه

زين: طب وانتي جيتي هنا ازاي؟؟

فريده بأستفزاز: لما نروح يا زين هبقي احكيلك يلا بقا عشان مش قادره بجد

ركبت العربية و زين بص لأدهم ومش فاهم حاجه: انت مش مفروض كنت في شغل تبع المؤتمر ؟

ادهم تجاهل سؤاله: روح روحها.. روح قبل ما امسك دماغها احْطبها في العربية..

" زين مردش عليه وسابه وركب هو كمان "

>>>>>>>>>>>>>>>>>>>>>>>>>>>>>>>>>

صلي على محمد

|| في الفيلا | الساعه 12 ||

" زين وفريده وصلوا الأول و كان مضايق بس بيحاول ميبينش "

- فريده استني.. ممكن تفهميني؟ انتي كنتي هناك ازاي وانتي باعته من بدري انك في لوكيشن تاني خالص؟

= عشان هما خرجوا من الفيلا وخدوني معاهم وانا اصلا مكنتش فاهمه اي حاجه بجد ولما لاقيت كده قولت لهم اني همشي من المكان وانا خارجه لاقيت اخوك في وشي وقعد يقولي بتعملي اي وبتاع 

" زين اتنهد بهدوء و راحه لما حكت له "

- انا كده كده كنت مستغرب وجودك هناك وعارف ان فيه حاجه

= بس مستغربتش انك لاقيت ادهم هناك!؟

" زين مكنش عارف يقول ايه فا سكت.. على دخول أدهم الى اول حاجه عملها دور على عبد العزيز وبصلهم بعدم اهتمام و بعدين دخل مكتبة  "

سهير: فريده انتي جيتي اي كل ده؟ 

- اي سهرك بس يا تيته 

= كنت قلقانه عليكي

- انا كنت مع صحابي و زين جه خدني اهو متقلقيش من حاجه

= طب مش جعانه

زين: اه.. انا جعان موت بصراحه

ضحكت: وانا بجد اوي كنت هنام بس خلاص ناكل سوا

لو فيه اكل 

سهير: ايوه فيه يحببتي هسخنلكم

فريده: لا روحي بقا انتي ريحي يا سوسو واحنا هنتعامل

" روحنا المطبخ ناكل زين حط الاكل في المايكرويف وانا كنت بعمل طبق سلطه وجهزنا وقعدنا ناكل "

- بس أعتقد بقا متخرجيش معاهم تاني افضل يعني

= ايوه.. معاك حق هنتكلم عادي بس هقولهم اني مش بحب الاماكن دي 

- ايوه صح كده

قاطعهم دخول أدهم: جدو عاوزكم في المكتب

فريده سابت المعلقه وبصتله وهي بتضحك: فعلا؟

أدهم بعقدة حواجب: انا قولت حاجه بتضحك؟

- اه.. فاكر انك كده حطتني في موقف وحش قصاد جدو لما تقوله الى حصل صح

زين: هو عاوزنا في ايه يعني انت قولت ايه

أدهم: والله خلص و روح شوف بنفسك

فريده: انا خلصت

زين: وانا كمان

" التلاته دخلوا المكتب " 

"فريده قعدت قصاد عبدالعزيز وهو كان هادي جدا"

- ايه اخبارك ايه يا فريده

= الحمدلله يا جدو

- الكلية كانت كويسة؟

" ادهم بصله بستغراب على طريقته معاها! " 

= اه مرتاحه فيها

- طيب كويس..احكيلي بقا ايه موضوع المكان الى روحتيه ده 

= مفيش انا اتعرفت على بنات في الكلية وخرجت معاهم ولما اكتشفت انوه المكان بار وكده قولت لهم همشي لأن حتي وانا لوحدي بره مكنتش بروح الأماكن دي بس يعني وكنت خارجه فا وانا خارجه لقيت ادهم قدامي و شدني من ايدي وكلمني بطريقه وحشه وانا كدا كدا كنت لما هاجي هقول كنت فين وهحكيلك عادي لو حضرتك سألتني مكنتش هكدب لأني معملتش حاجه غلط ولا حضرتك شايف ايه

أدهم: والله قصة جميلة اوي

عبدالعزيز: متقطعهاش يا ادهم

زين: هي مكدبتش في حاجه فعلا وانا اصلا كنت متابعها زي ما جدو قالي و روحت جبتها 

عبدالعزيز: خلاص يا زين الموضوع مش مستاهل كل ده.. انتي بس يا حببتي لازم تخدي بالك بعد كده و متثقيش في اي حد وتعرفي رايحه فين

-  حاضر

" بعد لما خلصنا كلام جدو شبه صالحنا على بعض وخرجنا انا و زين و كنت شايفه أدهم شايط وهو جوه لسه تقريبا عايز يكمل تسخين!"

- حضرتك كده حذرتها يعني ؟ 

= اديك سمعت بودنك كانت هناك ليه وازاي تقدر تقولي بقا انت كنت بتعمل اي هناك ؟

- عادي كنت مع صحابي!

= و من امتي مقبول عندنا تروح اماكن زي دي

- انا راجل وعارف اتحكم في تصرفاتي ياجدو مش عيل

= ده بأمارة اليوم الى كنت راجع فيه شكلك متبهدل و عملت برضو مشكلة معاها.. اوعي تكون فاهم ان دي الرجولة؟ والكدب برضو رجولة؟ لما تقولي انك شغال على المؤتمر ويطلع الموضوع غير كده؟

" أدهم اضايق ان الحوار اتقلب عليه هو" 

- لأني بتعامل منكم كأني طفل مؤخرا مش عارف ليه وانا مش كده انا عارف اتحكم في تصرفاتي كويس وبعدين مش حضرتك كنت بتقولي اني الكبير! ومفروض اشيل المسؤلة و كل ده ؟

= الكبير كبير بأفعاله! وعلى العموم احنا سايبينك براحتك جدا اهو بس اعرف ان الوقت الى هتقع فيه محدش هيخسر غيرك يا أدهم

- لا انا مش هقع ولا هخسر انا عارف بعمل ايه! 

= ما علينا انا دلوقتي عاوزك تبقي فاهم ان الى مش هتبقي براحتك فيه ابدا معاملتك مع فريده لو مش هتعرف تتعامل معاها بشكل كويس يبقي ملكش دعوة بيها من اساسه و اهو زين مخلي باله عليها وعارف يتعامل معاها ازاي

" أدهم جز على سنانه بنرفزه و الموضوع خلص لحد هنا وعبدالعزيز قاله يتفضل.."

" خرج من المكتب وطلع اوضته زين فتح الباب ودخل " 

- خير عايز ايه

= انت تعرف اني بكرهك!

- عارف ايه الجديد؟

= بقيت اكرهك اضعاف انت وهي !

- كفاية عليك تحب نفسك يا أدهم.. كفاية بجد اوي فكك مني بقا و سيبك من فريده انت زودتها و انت عارف كويس ان من وقت لما جت وانها بنت عمك ايه لازمته الشغل الى عمال تعمله ده؟

أدهم بسخريه: من ساعه ما جت !! لا والله ده بأماره ايه ان شاءالله؟ 

- بأماره انها شبه عمي جدا بتنكر ده ليه؟ وكمان بأماره ان جدتها مش كدابة وكلمت جدو وأكيد هو مش صغير عشان يضحك عليه وبعدين انت مش بتعمل تحاليل تاني؟ هتشوف هيطلع ايه

" أدهم اوردي شاف النتيجه واتأكدت انها بنت عمه جلال و ده الى مخليه متعفرت زياده..! "

= تمام خليك في صفها ضدي يا زين 

زين بصله بأستعجاب: انا مش مضطر اخد صف حد اصلا هي حر..ب ؟ انت بجد محتاج تراجع نفسك! مش شايف انك كبرت الموضوع لحد ما بقي بايخ !!

" ادهم مردش عليه و سابه وخرج و زين كان مخنوق جدا من الى بيحصل.. من زمان وعلاقته بـ أدهم مكنتش احسن حاجه ودلوقتي بتبوظ أكتر "

>>>>>>>>>>>>>>>>>>>>>>>>>>>>>>>>>>

بقلمي سلسبيل_أحمد 

|| تاني يوم الصبح || 

" الكل كان قاعد بيفطر كا المعتاد ولكن أدهم مش موجود " 

هدي: امال أدهم فين يا وليد؟

وليد: عنده مؤتمر في شرم الشيخ صحي بدري وسافر

هدي: هيقعد قد ايه ؟

عبدالعزيز: تلت ايام بالكتير وهيرجع 

زين: يا بخته عبالي كده لما اسافر

عبدالعزيز: خلص بس الاول وعدي الترم ده

سهير: وانتي معندكيش جامعه انهارده ولا ايه يا فريده

زين: اه ملبستيش ليه

- انا معنديش محاضرات انهارده 

وليد بهزار: خلاص تيجي تاخد وظيفه في الشركه بقا

بصتله بسرعه: هو ينفع !

عبدالعزيز ضحك: انتي عاوزة تيجي!؟

فريده: احمم.. ممكن يعني اروح اشوف بتعملوا اي وكده.. زي المره الى فاتت

وليد: خلاص يبقي تيجي تحت إشراف الجيار بيه

عبدالعزيز: اوي اوي بس قدامك عشر دقايق 

" سبت الأكل بسرعه و طلعت اوضتي اجهز و اللبس و نزلت لهم بسرعه جدا مكملتش حاجه! "

>>>>>>>>>>>>>>>>>>>>>>>>>>>>>>>>>>

بقلمي Slsbell Ahmed 

|| على طريق شرم الشيخ | استراحه ||

- انا طلبت قهوه يا باشا شكلك مش مفوق

= والله يا مصطفي قرفان ياحبيبي

- ليه مالك

= ملكش دعوة

- مش هتبطل الحركه دي؟

= ملكش دعوة

- اتفلق يا ادهم

"مصطفي قام وسابه و هو فتح موبايله يعمل مكالمه"

- الو

= ايوة يا ادهوم اي اخبارك 

- شوفتي المسدجات الى بعتهالك ولا لاء؟

= شوفتهم

- فهمتي انا عاوز ايه؟ مش طالبة غباء يا ليلي

= عيب عليك.. احنا كده كده كنا هنسجل لك حتي لو مطلبتش 

- اشطا لما ارجع من السفر بقا نتقابل ونرتب الدنيا

= أوكيه

>>>>>>>>>>>>>>>>>>>>>>>>>>>>>>>>>

|| في الشركه | مكتب عبد العزيز ||

- واضح انك شاطره جدا فهمتي بسرعه

= ده عشان بس حضرتك بتشرح حلو

ابتسم: انتي حابة الشغل ده؟

- جدا! انا دخلت بيزنس عشان كنت حابة اشتغل في شركه وكده ويبقي حاجه ليها علاقة بالتنظيم حاجه مهمه يعني مش اي شغل وخلاص زي هنا بالظبط.

= يا سلام.. الشركه كلها تحت امرك انا ياما قولت لزين يجي لكن هو صمم على مجال الطب

- طب لما اتخرج ممكن اتعين؟

= ومن دلوقتي كمان لو تقدري

فتحت عيوني بتعجب: بجد! هشتغل بجد؟ ولا هتمرن بس

= هتتدربي في الأول وبعدين تمسكي شغل ويبقي ليكي مكتب 

ابتسمت بسعاده: ايوه! انا عاوزة اتمرن 

- بس هتعرفي تشتغلي و تدرسي سوا

بحماس: ايوه ايوه!! 

" وفعلا!! الوقت الى كنت ببقي فاضيه فيه ومخلصه مذاكرة بنزل اتعلم فضلت كده لمده اربع ايام مذاكره وشغل وكان عندي حماس رهيب زين كمان كان بيشجعني هو وتيته وكنت مرتاحه من ادهم الحبه دول!! بس يلا الحلو ميكملش "

>>>>>>>>>>>>>>>>>>>>>>>>>>>>>>>>

استغفروا♡

|| في الفيلا ||

- يلا يابنتي عايز اوصلك قبل ما اروح الكلية

= مش عايزه آخرك كنت هاروح مع السواق

- لا حنينه اوي

سهير: فريده خدي العلبة دي

زين بضحك: لانش بوكس ده؟ فيه اكل وكده؟

فريده: شوفتي ؟ اهو هيتريق

سهير: يعبيـ.ـطه ده غيران..

فريده ضحكت: هههه خلي اكل الكافتيريا ينفعك

- طب يلا يا حلوة

" ركبنا العربية و لاقيته بيبصلي"

- يعني مش هتجيبي ساندوتش؟؟

ضحكت جامد وفتحت العلبة: هي حطه بانيه ولانشون عاوز انهي فيهم

= ده احنا طالعين رحله بقي مفيش خيار؟

- ههه خد بانيه واسكت يا زين

" خد مني السندوتش ياكله...

وبعد شوية وصلنا تحت الشركه سلمت عليه وطلعت وكالعاده روحت مكتب جدو ودخلت بعد ما خبطت علطول.. عشان اتفاجئ بأدهم بيه قاعد"

عبدالعزيز: تعالي يا فريده ادخلي 

"قعدت قصاده وكنت بتجنب ابصله"

- أدهم كان بيحكيلي عمل اي في المؤتمر.. المره الجاية عاوزك تبقي تطلعي تشوفي الأوضاع

أدهم بستغراب: تطلع فين مش فاهم

- فريده في فتره تدريب في الشركه دلوقتي.. انت عارف انها كلية بيزنس زيك وحابة تشتغل في الشركه بعد ما تتخرج

= امممم تمام

- ايه رأيك تكملي تدريب مع ادهم

ردينا في نفس واحد: نعم؟

فريده: انا ممكن اكمل مع اي حد عادي

أدهم بصلها بخبث: اشمعنا؟

فريده بذكاء: عشان محسش اننا واخدينها هزار لما اتدرب مع حد غريب هيبقي افضل و هنكون طول الوقت جد في الشغل ومركزين

عبدالعزيز: انا من وجهه نظري تدربي مع أدهم هو شاطر و هيعرف يوصلك المعلومه بسرعه ومتقلقيش هو في الشغل حد تاني ولا ايه يا استاذ أدهم 

ابتسم ابتسامه واسعه: طبعا! 

فريده: انا عندي سكشن في الكلية الساعه 11

- طيب الساعه دلوقتي 8 اقعدي معاه ساعتين وبعدين عرفيني انك نازله اكلم السواق يوصلك

>>>>>>>>>>>>>>>>>>>>>>>>>>>>>>>>>>

" وفعلا روحت معاه المكتب و عارفه انوه مش هيعدي الحوار على خير فضلت قاعده ساكته على كرسي جمبه وهو شغال "

- ياريت تبعدي شوية حاسس انك قاعده فوق دماغي

" لاقيتها بعدت بصمت ومردتش بس لاحظت انها اضايقت وكانت متوتره ابتسمت بخبث وحبيت اوترها أكتر.. فا بصتلها " 

- اقعدي مكاني

" قومت من الكرسي بتاعي وهي قعدت وطلبت منها تعمل ملف معين وكنت واقف جمبها براقبها وعارف هي هتعطل فين بالظبط كانت حاطه ايدها على الماوس و بتفكر فا حطيت ايدي عشان احركه وهي اتوترت زياده وشالت ايدها"

- بندوس هنا ياريت تركزي

= انا مش مركزه انت موترني!

- موترك اممم... ليه ياتري؟ يمكن عشان عارفك على حقيقتك مثلا ولا عشان عارف ان كل البنات زي بعض؟

"بصتلي وبرضو مردتش وبعدين قامت "

- انا مش هكمل شغل بالطريقة دي طريقتك دي بضايقني وانا مش هتقبلها انا فعلا معرفش بتعمل معايا كده ليه وانت عارف ومتأكد اني مش كده

" خرجت وسابتني وانا استغربت هدوئها انهارده وحسيت اني مكنتش حاسس زي كل مره بضايقها.. حاسس ان المره دي مكنتش مبسوط" 

>>>>>>>>>>>>>>>>>>>>>>>>>>>>>>>>>>>

" وصلت الكلية بدري بعد ما قولت لجدو اني محتاجه اروح بدري اسأل عن كام حاجه لكن في الحقيقه.. مكنتش قادره حتي ادخل السكشن ولا اتعامل مع حد أدهم قفل يومي..! ليه يبقي فيه حد عاوز يآذي الى قدامه وبس!  "

" قولت استني زين يخلص ونمشي سوا ولما لقيت قدامه شوية قومت عشان ادخل السكشن وخلاص لكني قبل ما ادخل لاقيت ولد جاي ناحيتي "

- ازيك ؟ 

= تمام.. انت مين؟ 

- انا كريم؟ مش فكراني انا كنت معاكم في البار.. كنت بدور عليكي عرفت انك مشيتي وبعدين جني قالت لي انك في كلية بيزنس

" اتفاجئت هو مين ده اصلا و بيدور عليا ليه "

= لا اسفة مش عرفاك 

كنت همشي وقف قصادي: مش مشكلة نتعرف انا بصراحه معجب بيكي من اول لما شوفتك

قال جملته وكان بيقرب ناحيتي فا بعدت واتكلمت بنبره حاده: لا انا مش عايزه اتعرف! وعديني عندي سكشن 

مسك ايدي: اصبري بس اديني فرصه نتكلم انتي حاميه كده ليه يابنتي

" بعدت ايده عني برده فعل سريعه وصْربته بالبونيه بقوة!! مهرفش عملت كده ازاي مشيت بعدها ودخلت على السكشن بسرعه.. فضلت قاعده مش على بعضي و بعت مسدج لـ زين يقابلني عند السكشن بتاعي بعد لما خلصت وفضلت جوه وكنت حاسه اني خايفه لحد ما لاقيته دخلي "

- فريده؟ انتي قاعده كده ليه السكشن فاضي!

" مردتش و خرجنا وانا فضلت ابص حواليا"

- مالك يابنتي ؟

رفعت ايدي امسك فيه من توتري فا بصلي بستغراب: فيه ايدك؟ وليه ايدك ساقعه و بتترعش مالك!!؟؟

= مفيش.. ينفع تروحني عايزه اروح دلوقتي..

" شوفت الولد تاني و وشي جاب اللوان وهو بص عليه ورجع بصلي " 

= يلا نمشي يا زين

- انتي حد عملك حاجه؟ انا مش هتحرك غير لما افهم قوليلي متخافيش! حصل ايه

= فيه ولد.. ولد معرفوش مسك ايدي وكان..

- نعم !! فين ده

=  كان.. انا مش عارفه كان عاوز اي معرفش بس هو حْضني فا.. صْربته.. انا صْربته و دخلت السكشن بسرعه 

= هو فين ده شاوريلي عليه !! هو ده الى بيبصلك ؟؟

هزيت راسي بـ أيوه لاقيته بيحط حاجته في ايدي: استنيني هنا

مسكته: لا زين يا زين استني !! 

" زين راح عنده ومتفاهمش معاه مسكه من التي شيرت بقوة و انفعال " 

- انت مالك بيها بقا هاه ؟؟ 

" وقبل ما يكمل الواد زقه جامد  فا زين كان هيقرب ناحيته راح الواد مقرب هو وصْربه في وشه بعدها جت ناس كتير وسلكت بينهم وكذا حد كان يعرف زين فا الواد لما لقاهم معاه خد بعضه وركب عربيته بسرعه ومشي "

- خلاص يا رجاله محصلش حاجه!! 

= انت كويس يا زين

- اه مفيش حاجه 

" راح عند فريده لقاها خايفه جدا من الموقف الى حصل"

- اهدي محصلش حاجه..! اهدي تعالي نروح يلا

>>>>>>>>>>>>>>>>>>>>>>>>>>>>>>>

|| في الفيلا ||

" متكلمتش طول الطريق ولما وصلنا طلعت اوضتي في صمت و هو مضغطش عليا لما لقاني ساكته.. تيته الى فضلت تسألني لو زعلانه من حاجه وانا حاولت اتهرب منها وكمان منزلتش على الغدا و قولت للدادة تقولهم اني نايمه مش هاكل " 

" لكن حسيت اني مفروض اتكلم معاه.. خصوصا انوه اصْرب بسببي روحت اوضته لاقيته قاعد فا دخلت " 

- زين..

= ايوه انتي كويسه؟

- انت كويس!

= ايوه يا فريده مفيش حاجه والله! الموضوع خلص

"عيوني دمعت لما لاحظت الكدمه في خده"

- انا اسفه بجد يا زين حقيقي اسفة

زين قعدها قدامه: اهدي بس هو انتي عبيـ.ـطه؟ دي مش غلطتك اصلا وتاني مره تكلميني في ساعتها اجيلك لو حصل اي حاجه هو انا لازمتي ايه؟ 

بعياط: انا كنت خايفه ومش عارفه افكر وفضلت قاعده في السكشن عشان لو حصل حاجه ابقي وسط الناس 

قرب مني: طب بس بس اهدي متعيطيش!!

- انا مش بعيط

= ماهو واضح على وشك اه.. قوليلي بس صْربتيه ازاي هو الورم الى في عينه ده كان منك؟

بصتله وضحكت: هي ورمت؟.. احسن

- طب اهدي كده وبطلي عياط الموضوع ميستاهلش بجد وانا ملحقتش اعجنه طلع جبـ.ـان وجري 

" في اللحظه دي أدهم كان رايح لزين ولما سمع جملته مدخلش وفضل واقف " 

= تفتكر هيجي تاني ؟

- لا.. وبعد كده لو حصل اي حاجه تكلميني يا فريده فاهمه؟ متتصرفيش انتي وانا كده كده معرفتش حد عشان متحسيش بتوتر

= طب يعني و قولت ايه على الكدمه الى في وشك دي؟

- ماما سألتني قولتلها اتخبطت عادي

ادهم فتح الباب و دخل بصلهم و بص لزين: ضربة ايه؟؟ مين الى مد ايده عليك ؟؟ 

يتبع..