الراجل: هقولك عليه بس افتكر لو منفذتش الطلب ده عمرك في حياتك ما هتشوف اهلك ولا هتعرف هما مين وهتعيش طول عمرك وانت تتمني تشوفهم

يونس بغضب: خلص عايز ايه 

سكت الراجل شويه بعدين قال: تطلق نور

انصدم يونس من طلبه وقال بغضب: مستحيل اعمل كده 

الراجل: لو معملتش كدا عمرك في حياتك ما هتشوف اهلك يا يونس.... طلقها مقابل تعرف مين اهلك وترجع تعيش في حضنهم من تاني 

يونس بغضب: مش عايز اعرف مين 

الراجل: تتخلي عن اهلك عشان حتة بت زي نور 

يونس بانفعال وغضب: واتخلي عن العالم كله عشانها... مش عايز اعرف مين اهلي مش محتاجهم اصلا 

وقفل يونس المكلمه من غير ما يسمع رد الراجل عليه.... قعد يونس و دفن وشه بين كفوف ايديه بارهاق وحزن شديد 

فلاش 

لما كان عمره 3 سنين صحى لقي نفسه نايم في الشارع وفي مكان ميعرفهوش وهوا مش عارف ازاي جي هنا... افتكر لما مامته قالتله يستناها لحد ما تجيب حاجه من السوبر ماركت و ترجعله بس مش فاكر اي اللي حصل بعدها وازاي بقي في المكان ده 

كان حاسس بالخوف الشديد مشي في الشارع وهوا بيدور علي مامته 

يونس بدموع وخوف شديد: ماما.... ماما انتي فين.... ماما 

كان بيعيط من خوفه ومحتاج مامته معاه بس مش لاقيها 

فضل يمشي في الشوارع وهو بيدور عليها بس مش لاقيها... الدنيا بقت ضلمه والجو بقي برد راح نام تحت عربيه في الشارع بيستخبى تحتيها وهوا عمال يعيط ومش لاقي حد لحد ما نام 

وكل يوم بقي علي الحال دا بينام في الشارع وهوا مرعوب من الخوف و دموعه مش بتجف من عينيه وكان لما يجوع يروح يفتش في الزبـ اله عن اي حاجه ياكلها كان طعم الاكل بيبقا وحش بس بياكل غصب عنه من شدة الجوع 

لحد ما شافه واحد شكله مكنش لطيف قرب منه وقال: مالك يا حبيبي قاعد وحدك كده ليه 

يونس بدموع: عايز اروح عند ماما 

ابتسم بخبث وقال: طيب تعال معايا انا هاخدك و ارجعك عند ماما 

يونس ببرائه: بجد يا عمو هترجعني عند ماما 

الراجل: طيب يا روح عمو تعال معايا 

راح يونس معاه وهوا مبسوط انه هيرجع عند مامته... بس مكنش عامل حساب العذاب اللي هيعيش فيه... خده الراجل مع باقي الاطفال اللي معاه وكان بيخليهم يدورو في الشوارع و يشحتو ويطلبو من النااس فلوس واللي كان يرفض كان يضربه بالحزام من غير رحمه يونس من خوفه كان بيعمل اللي هوا عايزه.... ويمشي في الشوارع يشحت من الناس.. الناس كانت تتعاطف معاه بسبب سنه الصغير 3 سنين وبيتعذب العذاب ده..... واخر النهار ياخدهم الراجل ويرجعهم بيته وياخد منهم الفلوس وكل يوم علي الحال دا وكل يوم يأكلهم فول و طعميه لحد ما يونس نسى طعم الاكل الحلو اللي كان بياكلو نسى الراحه واللعب وحضن مامته الدافى اللي كان بينام فيه 

وفي يوم وقف يونس قدام دكان صغير بص للشوكلاته وهوا مشتاق لطعمها والبسكوت والعصير... عطا صاحب الدكان فلوس وخد اللي هوا عايزه.... قعد علي جنب وبدأ ياكلهم وهوا مشتاق لطعمهم اوي.... شافه الراجل اللي خده ومشغله عنده بصله بغضب وضربه وخد الحاجه منه... رجعه علي البيت وزعق فيه جامد علي الفلوس اللي نقصت وجاب بيها الحاجه... طلع حزامه وبدأ يضربه من غير ما يعمل اعتبار لسنه الصغير اللي مش هيستحمل ضربه 

فضل يونس مع الراجل ده لحد ما بقي عمره 5 سنين تعب يونس جدا من الراجل و معاملته و ضربه ليه فقرر يهرب وراح اتخبى في شنطة عربيه شويه والعربيه مشيت دور الراجل عليه بس ملقيهوش 

العربيه دي كانت لصاحب رجل اعمل مشهور جدا وكان صابر... شاف صابر يونس والحراس مسكينه امرهم يسيبوه... خده صابر واكتشف ذكاء يونس خده نضفه وعلمه كل حاجه لحد ما يونس كبر وبقي رجل اعمال معروف بسبب صابر 

باك 

رفع يونس وشه وكانت عينيه مليانه دموع وحزن شديد.. من طفولته ومتعذب الطفوله اللي بيعيشها اي طفل بحريه ويعمل اللي هوا عايزه... اتحرم من كل حاجه اتحرم من ابسط حقوقه اتحرم من عيلته حب مامته وباباه... اتحرم من كل حاجه حلوه.... لحد ما شاف نور ومن وقتها الحياه بدأت تضحكله وحب الحياه بيها و بوجودها معاه فمستحيل يستغني عنها او يطلقها لاي سبب من الاسباب يتخلي عن عيلته اللي اتحرم منها ومشتاق ليها بس ولا يتخلي عن نور اللي عاش معاها لحظات جميله و رجعتله حياته من جديد

********** 

دخل يونس البيت وقفل الباب بصتله فريده بسخريه وقالت: لسه فاكر تيجيلي لسه بدري 

قرب يونس وقال ببرود: انتي اللي بعتيه

فريده باستغراب: بعت مين

يونس بغضب: انتي هتستعبطي يا بت الراجل اللي كلمني امبارح انتي اللي بعتيه 

فريده باستغراب وصدمه: راجل مين انا مش فاهمه انت بتتكلم عن اي 

يونس بغضب: محدش يعرف موضوع اهلي غيرك انتي وابوكي والاستاذ عبد القادر الله يرحمه.... يبقا يا اما انتي اللي بعتيه او ابوكي 

فريده بصدمه: انا مش فاهمه حاجه قولي طيب حصل اي في اي خبر جديد عن اهلك 

يونس بحده: فريده