ـ بس احنا منعرفش بعض كويس لكن انا هقولك ع حاجة كويسة هتعرف ردى ان شاء الله لما موضوع خالد يخلص الاول

ابتسم اسلام قائلاً: وانا موافق ومش هيأس ممكن نتكلم عن بعضنا شويه كدردشة عادية يعنى ولا نأجلها برضه

ابتسمت وكانت تستمع له باهتمام وتجاوب على اسئلته وسط نظرات ياسمين المليئة بالفرحة وكانت يداها ترتعش من التوتر وعندما رأها خالد تفهم ومسك يدها بسرعة قائلاً: اطمنى كل حاجة هتكون بخير ان شاء الله 

ياسمين بدموع: اول مرة اشوف اللمعة دى فى عيونها من تلات سنين ي خالد كنت خايفة اخسرها بجد

خالد: مفيش خسارة ان شاء الله شيما بتحبك وانا واثق ان اسلام جدع وهيكونوا العوض لبعض ان شاء الله 

انتهى اليوم وعادوا الى المنزل وقد تفهمت شيماء موقفهم ورغبتهم فى مساعدتها وابدت اعجابها بشخصية اسلام المرحة وان ليس عندها اى مانع لتتعرف عليه اكثر ... على الجانب الاخر فى فيلا لقاء وكمال الذى عاد فى وقت متأخر من الليل ليجد المكان مظلم بشدة اندهش لكن سرعان ما عاد الضوء ليجد المكان مرتب بشكل رومانسى وكانت لقاء تقف فى منتصف طريق ملئ بالورود وترتدى فستان نارى يبرز قوامها الرشيق وتضع بعض المساحيق التى تبرز انوثتها لتقترب بدلع منه وهى تتمايل عليه لتتعلق بعدها فى رقبته 

لقاء: اتأخرت كده ليه ي روحى

كمال وهو مغيب: كنت ...كنت بخلص كام حاجة انتى حلوة اوى ي لقاء 

اقترب منها برغبة لكنها ابتعدت سريعاً وقالت بضحكة انثوية: تؤ لسه الليل طويل ي كراميلا ولازم النهاردة يكون مميز 

كمال: مش قادر اقاوم جمالك ده بصراحة ي لولو

لقاء وهى تمثل الحزن: هو انت مش عارف النهاردة ايه بجد 

اقترب منها كمال وهو يضع جبهته على جبهتها: ازاى انسى اهم يوم فى حياتى اليوم اللى اتغلبنا فيه على كل العوائق بما فيهم ابوكى وبقينا مع بعض وبقيتى على اسمى كل سنة وانتى معايا ي روحى ودايما ذكرى جوازنا تكون سعيدة

ابتسمت بفرحة وعانقته: كنت خايفة اوى تكون نسيت كنت هزعل بجد

كمال: ده انا انسى نفسى واسمى ومنساش واسف نسيت اجيب هدية لكن بكرة الصبح هيكون ف انتظارك احلى هدية 

لقاء: هديتى الوحيدة اخدتها من الدنيا وكانت انت ي روحى

وبعد ليلة جميلة تمنت لقاء الا تنتهى ابدا اخذها كمال الل عالمهما الخاص فى الصباح استيقظت من نومها وهى تتململ على السرير ووضعت يدها الى جانبها تتحسه ولم تجده وشعرت بأن شئ ما مربوط فى اصبعها فتحت عيناها ونظرت بالغرفة ولم تجده وبعدها لاحظت خيط رفيع فى اصبعها ابتسمت وظلت تسحبه لتجد ورقتين فى ظرف اولهما مكتوب عليها الى حبيبتى لقاء فتحتها بسرعة ولهفة لتجد فيها : صباح الفل ي قلبى وعدتك امبارح ان الصبح هتلاقى هديتك وهى الورقة اللى موجود مع الجواب دى ورقة طلاقك ي روحى انا طلقتك من يومين وكنت ناوى اقولك امبارح بس بصراحة كنتى جامدة ومقدرتش امنع نفسى عنك وبالمناسبة متدوريش ع الفلوس ولا عليا عشان احنا الاثنين ركبنا جناحات وطيرنا واحمدى ربنا ان الفيلا باسم اخوكى سلام ي لولو