"وبدأت زينة تبقى احسن لحد ما خرجت من المستشفى ورجعت البيت تاني."

| في اوضة زينة |

"كلهم متجمعين حواليها، حتى رحيم مسبهاش وفضل معاها."

ام زينة: ارتاحي بقى لحد ما اعملك الاكل الي بتحبيه تعويضًا عن الاسبوع يحبيبتي .

زينة: مش قادره اكل يا ماما .

ام زينة: لا يحبيبتي لازم تاكلي ده انتي هفتانه خالص وعايشة على الاجهزة بقالك اسبوع .

ابو زينة: سيبك منها واعمليلها حاجه تاكلها يا ام زينة .

مريم: يلا يا ماما انا وانتي نعملها احلى اكل .

زينة بضحك: ومن امتى يا مريم بتدخلي المطبخ مع ماما؟ 

مريم: عادي يعني انا داخله عشان اختي حبيبتي تاكل من ايدي وتبقى زي الفل .

ابو زينة: مش مطمن لكلمه تاكل من ايدي دي .

"كلهم ضحكوا وهزروا مع بعضهم وكانت قاعدة جميلة اوي وهي العيلة متجمعه من تاني."

"ومريم راحت مع مامتها للمطبخ يعملوا الاكل وفضل مع زينة دياب وريان وليان وابو زينة ورحيم."

دياب باس راس زينة وقال: البيت وحش اوي من غيرك بس نورتيه بوجودك تاني .

زينة حضنت دياب وقالت: انا كويسه الحمدلله اهم حاجه دلوقتي تركز في دراستك باين عليك سايبها خالص بسبب تعبي .

خرج من حضنها وقال: دايما بتحسي بيا من غير ما اقول .

ابتسمت زينة: عشان انت اخويا يحبيبي لازم اخاف عليك وعليكم كلكم بس متنساش انك بردو تركز في مستقبلك ومتهملش نفسك عشاني .

دياب: حاضر، عندي درس بعد ساعة كنت هكنسل عشانك بس هسمع كلامك واروح امري لله .

زينة بإبتسامة حب: ربنا يوفقك يقلب اختك .

ريان: وانا مش بتحبيني؟ 

زينة بصتله: مين قال كده بس ده انت حبيب القلب ونن العين .

ليان بصتله: انت ناسي انها تعبت بسببنا ولا اي يا ريان .

بصتلها زينة وقالت: متعبتش بسببكم انتو ملكوش علاقة بتعبي ده كان كابوس وانزاح يحبايبي انا كويسه ومعاكم اهو .

ريان: يعني تعبك مش بسببنا عشان قالوا انك لما تعبتي كنتي بتنادي علينا .

زينة بإبتسامة: انا لما ندهت عليكم كان ليكم كلهم بس وقتها جريت على اوضتكم انتو لان الكابوس كان وحش اوي وخوفني عليكم .

ليان: واي الكابوس يا زينة؟ 

زينة: كان حلم واتحول لحاجة وحشه خلاني اقوم قلقانه على البيت كله بس جات معايا بعدها بتعب وانتو بقى الي عارفين الباقي حصل فيه اي .

ريان بص لليان: مش هي وقعت وراحت المستشفى يا ليان بعدها؟ 

ليان بحزن: ايوة وزعلت اوي اني ممكن مشوفهاش تاني لما فضلوا يقولوا ادعولها تقوم بالسلامة .

وراحت ليان حضنه زينة وقالت: متسبيش البيت وتروحي المستشفى تاني، متسبيش البيت يا زينة .

زينة بحزن: مقدرش اسيبكم وامشي، انا رجعت وسطكم تاني اهو .

ريان حضن زينة وقال: حمدلله على سلامتك يا زينة، بجد كنتي وحشانا كلنا .

خرجو من حضنها وزينة قالتلهم: انا كويسة، بس لو عايزين ابقى احسن يبقى لازم تروحو تشفه دراستكم عشان افرح بيكم .

ريان وليان قالو في وقت واحد: حاضر هنروح .

"وبالفعل قاموا راحو اوضتهم وعيون زينة دمعت على اخواتها بس ابوها طبطب عليها."

ابو زينة: اخواتك بخير، وكلنا بخير، وانتي كويسة، متعيطيش يحبيبت ابوكي وتوجعي قلبي مصدقت اشوف ضحكتك .

رحيم: طب يا عمي استأذن انا وهبقى اجي تاني .

ابو زينة: ليه بس يبني ما انت مونسنا .

رحيم بحرج: معلش يا عمي عشان الشغل بس واهو الحمدلله اطمنت على زينة لحد ما جات بيتها وهجيلها تاني اكيد .

زينة: خليك شوية يا رحيم عيزاك .

ابو زينة: طبعا مدام قالت عيزاك يبقى هتفضل معانا لحد ما يعملوا الاكل وتاكلوا سوا ومش هتنزل الا لما تاكل، هسيبكم تتكلموا وهسيب باب الاوضة مفتوح لو حصل حاجه قولي على طول .

"وطبطب على ضهر رحيم وقام طالع وسابهم مع بعضهم يتكلموا."

"الاتنين ساكتين مش لاقيين كلام يقولوه بس جواهم مليون سؤال من غير اجابات."

رحيم: حمدلله على سلامتك يا زينة البنات .

زينة بإبتسامة: الله يسلمك يا رحيم .

رحيم: كنتي عيزاني في اي يا زينة البنات .

زينة بتنهيده: طبعًا انت عارف انهم بيقولوا بقالي اسبوع في غيبوبة، ولما فوقت لقيتك جمبي برغم اني كنت حاسة بوجودك بس مكنتش اعرف انت مين في احلامي، وسمعت منك كلام كتير ومنهم انك .. كنت قايل يعني انك ...

رحيم فهم كلامها وقال: عارف، قولت مش هسيبك واني عايزك ترجعيلي تاني صح؟

زينة: ايوة، بس عايزة منك طلب .

رحيم بإبتسامة: وزينة البنات طلباتها اوامر، تطلب ويتنفذ الي هي عيزاه .

زينة: بص يا رحيم، انا في الغيبوبة جاتلي شخصية شبهي بالمللِ بس من الحزن متغيرة ودبلانه، استغربت ان هي انا وقالت بالحرف اني هدخل في مشاكل وهطلع منها خسرانه وخايفة اوي من كلامها ومش عارفه هيحصل اي غير الي حصلي !

رحيم: مش يمكن بيتهيقلك يا زينة وان ده عقلك الباطن بس عشان خايفة ان حاجه تحصل؟ 

زينة: مش عارفه يا رحيم، افرض حصل حاجه بجد؟ وطلع كلامها صح واني معملتش حسابي للمشاكل !

رحيم بإبتسامه: ربنا ما يجيب مشاكل يا زينة وكل مشكله ليها حلول، ارتاحي انتي بس دلوقتي وبأذن الله نتكلم بعدين .

زينة: مش عارفه يا رحيم من غير وجودك جمبي ممكن اعمل اي .

رحيم: متقلقيش، ان شاء الله مفيش حاجه تفرقنا، انتي بس اهدي واستغفري الله وشيلي الافكار دي من راسك وكل حاجه هتبقى بخير .

"ابتسمت زينة لرحيم، وهو استأذن ومشي، وابو زينة دخل وهو مبتسم وقعد جمبها."

ابو زينة: معاه حق، مغلطش في ولا حرف، الولد ده كل مرة بيعجبني اكتر واكتر بكلامه، ربنا يتمم بخير ليكم يحبيبتي، المهم ارتاحي بقى دلوقتي .

"وباس راسها ولسة هيطلع من الاوضة لقى ام زينة واختها مريم داخلين وعاملين المحمر والمشمر زي ما بيقولوا واكل يكفي اسرة بحالها لزينة وبس."

زينة بتضحك: اي كل ده هاكله لوحدي؟ مش معقول .

ابو زينة بهزار: هو انا لازم اتعب عشان تعملولي اكل زيها ولا اي؟

مريم بعصبية: بعد الشر عليك هو احنا نخلص من زينة تقولنا الكلام ده دلوقتي .

ام زينة: وانت فاكر يعني اني نسياك ده انت غالي، روح في المطبخ خد الي انت عايزو .

ابو زينة: يخليكي ليا يأم العيال .

"وكله ضحك على كلامهم وبقى وقت سعيد بينهم خلى زينة تنسا الي حصل والي هيحصل."

_________

"وبعد ما عدى اسبوعين، زينة بقت احسن ورحيم مكانش بيسيبها ابدا ودايما بيطمن عليها ويروحلها البيت يجيبلها الي نفسها فيه من غير ما تقول، بس بعد الاسبوعين دول حصل الي كان غير متوقع انه يحصل." 

"زينة كانت ماسكه الموبايل بتقرأ رواية، فجأة لقِت رسالة من رقم غريب على الواتس وكان مكتوب الآتي."

شخص مجهول: بقيتي زي القمر لما كبرتي، مخرجتيش من بالي طول السنين دي كلها، سمعت لما رجعت انك اتخطبتي وفشكلتي واتخطبتي تاني بعديها، زعلت اوي على الي بيحصلك، وحشتيني يا ناني، فكراني ولا نستيني يا نونتي؟