- الواد العربجي ده صوته عالي ليه؟؟

= عايز ينزل معاك يا أدهم 

- هو انا رايح اللعب ده انهارده بالذات يوم مرهق

= طب كلمه انت بقي ده عمال يستحمي بسرعه عشان يلحق يروح معاك

- انتي سيباه يستحمي لوحده؟

= قالي انا هعرف اخلص لوحدي

" روحت وقفت قدام باب الحمام وقبل ما اخبط لاقيته خارج يجري و لافف فوطه على وسطه بعشوائية وماسكها بأيده عشان متقعش "

- بابي

ضحكت على شكله ومسكته: خد هنا عامل في نفسك كده ليه هتبرد يا عز

رفع عيونه وبصله: عامل زيك

"حبيبه ضحكت وشالته و نشفت شعره وهو عينه على ادهم"

- يا بابي استناني

= براحة يا حبيبي احنا لسه هنفطر سوا

- طيب خدني معاك .. شلني!

" ادهم مكنش حابب يدلعه.. لأنه بيلاحظ ان عز بيعرف يضحك عليهم كلهم ويدلع عليهم براحته.."

- لا انت كبير هات ايدك ننزل سوا يلا..

"عز مد ايده و ادهم مسكه ونزلوا تحت"

>>>>>>>>>>>>>>>>>>>>>>>>>>>>>>>>>>

بقلمي سلسبيل_أحمد 

|| في اوضة زين و فريده ||

- زين شيل بنتك دي بعيد عني مش عارفه احط ميكب

= ميكب ايه ياحببتي مفيش ميكب

- ليه بقا ؟

= هو انا ملاحق على حلاوتك الطبيعه عشان تزوديها بالميكب

بصتله وضحكت: اه اضحك عليا أيوه

- خلاص بقا هنتأخر على الواد ما صدقنا هنجوزه ونخلص منه..

= مش لسه هنفطر سوا ولا نسيت القواعد.. وبعدين يوسف غلبان يا زين.

- والله ما غلبان غيرك ده صايع بتاع بنات

= اوعي تقول كده قدام مريم هي بتشك فيه خلقه

- ما عشان يستاهل.. صايع..

= طب اسكت

مسكت ليلي: يلا يا لولي..

- حيلك حيلك انا هشيلها دي حببتي

= شيل شيل مانا جبت صْره لنفسي..

" نزلوا بعد ما خلصوا و لقوا يونس و يزن قاعدين على السفره بالبدل"

فريده: ايه الشياكه دي .. شكلكوا قمر عقبالكم

زين: اه ونخلص منكم سوا

يونس: حاططني في دماغك ليه؟؟ هات ليلي اشيلها

زين بصله برفعه حاجب: انا مش حاطك في دماغي  طلع انت بنتي من دماغك

يزن: بالظبط.. عشان ليلي محجوزة ليا انا

زين بدهشه: انتوا مجانين شكلكوا محدش له دعوة بالبنت هعجنكم والله

يونس: شايف يا ادهم بيه؟

أدهم بنكش: هيشوف نفسه علينا عشان مخلف بنت

زين: طب اسكت بس

عز: عايز اشيل ليلي

كلهم ضحكوا و زين بص ناحية أدهم: ابعد الواد عن بنتي انا قولتلك اهو

أدهم: انت تطول ولا ايه

"فريده خدت حبيبه من زين و خلت عز يشلها"

حبيبه: ايه ياعز.. حلوة؟

عز ببراءة: حلوة اوي.. احلي من ساندي يا مامي

فريده: مين ساندي يا شقي

حبيبه ضحكت: ساندي دي سنجابة في سبونج بوب

" يونس و يزن كان صوتهم عالي فا ادهم بصلهم "

أدهم: ايه  فيه ايه خناقه على الصبح؟

يونس: لا ربنا ما يجيب خناق هو ايه القمر ده يا حبيبه هانم

أدهم بص لزين: مش قولنا هندي الواد ده علقه؟

فريده ضحكت: مالك بمراته دلوقتي يا يونس

يونس: مانا مش لاقي له بنت مزه زي بنتك اعاكسها

يزن: يونس بيتغذي على استفزاز أدهم

ادهم بغرور وثقة: وياريته بيعرف.. ده أهبل

"وليد نزل هو وهدي و كان شكلهم جميل و راقي هدي لابسه فستان هادي و وليد بدلة كلاسيك"

فريده: واو.. ايه الحلاوة دي !

أدهم: ايوه يا وليد بيه ما الخال والد برضو.. تخيل حضرتك خال يوسف الصايع

"ضحكوا كلهم و الى سمعت جملة ادهم كانت هبه نزلت لهم بفستان جميل لونه ازرق داكن"

- مالك بأبني يا واد يا أدهم ؟؟

ادهم لف بصلها: عندي ابني هيكمل ست سنين وتقوليلي واد يا عمتي؟

- اه واد.. اوعي كده

وقفت جمب فريده و حبيبه: الفستان حلو ؟

حبيبه: حلو اوي ولايق عليكي يا هوبا

فريده: اه جميل والله

" نادية كمان نزلت و كده كلهم اتجمعوا وبدأو يفطروا سوا و بعدين كانوا بيستعدوا عشان يروحو القاعه "

ناديه: لازم يختي ابنك يلففنا وراه في القاعات

هبه: لما نشوف عيالك هيعملوا فرحهم فين

زين: تحت بير السلم احم..

" كلنا ضحكنا وبعد شوية مناكفه خرجنا نركب العربيات عشان نروح على القاعة.. "

>>>>>>>>>>>>>>>>>>>>>>>>>>>>>>>>>>

- مالك يا ادهم

= مفيش حاجه يا حبيبتي

" مسك ايدها وباسها وكمل سواقة و حبيبه كانت عارفه كويس ايه الى شاغل تفكيره.. "

|| امام القاعة ||

" كان واقف يوسف ومعاه عبدالرحمن "

يزن: منور يا بابا ايه الى موقفك مع الواد ده

يوسف بزهق: بتستعبطوا صح كل ده تأخير؟ 

يونس: كنا بنفطر ما انت عارف دي تقاليد العيلة

يوسف: يعني مش عارفين اني لسه هاروح اخد مريم! 

يونس: يزن هو الى كان مأخرنا

يزن: كداب دي امك الى اخرتنا

عبدالرحمن: ولد انت وهو بس !

يونس: حاضر يا حج

أدهم راح لهم: فيه ايه؟

يوسف: كل ده عبال ما تيجوا؟ بس ماشي نعجن بعض بعدين ماشي..

زين ضحك: روح اجري روح هات مريم 

فريده: خلي بقا ليلي معاك يا زين لأننا رايحين معاه

حبيبه: اه و خلي عز معاكم يا أدهم يلا يا يوسف

و فعلا مشيوا و سابوهم ادهم بص لزين: تبدل؟

زين ضحك جامد: مقدرش اسيب بنتي حببتي

- ماشي يبنالـ..

هدي قربت وبصتله: ايه؟

= الحلوة..

>>>>>>>>>>>>>>>>>>>>>>>>>>>>>>>>>>

صلي على محمد 

|| في مكان البيوتي سنتر ||

" وصل يوسف و معاه فريده و حبيبه..

 طلعوا هما يشوفوا مريم و يوسف كان بيسلم على أهلها.. "

*طق طق طق*

- جاهزه يا عروسة؟

مريم بصتلهم: كل ده؟

حبيبه: والله حاولنا نيجي بدري

مريم: طب ها!!! ايه قوليلي شكلي حلو؟؟!

فريده: شكلك زي القمر بجد يا مريوم

حبيبه: شكلك تحفه اللهم بارك يا ميمو

" البنت عملت لها الطرحه اخر حاجه و بعدين حبيبه و فريده نزلوا يعرفوا يوسف انها خلصت و طلع ياخدها وكان متوتر.."

- احمم ادخل؟

= ادخل..

" يوسف فتح الباب ودخل بعد لما خبط وأول لما رفع عينه وشافها بصلها بدهشه"

- ايه الحلاوة دي!

مريم بكسوف وعيونها بتلمع: انت كمان شكلك جميل اوي

قرب لها و هو بيتأملها: انتي احلي بكتير!!

مسك ايدها وباسها: اخيرا يا مريم.. بعد خمس سنين!!

بصتله بنص عين: بعد صياعتك يا يوسف

ضحك وبصلها بحب: انسيها بقا.. قولتلك مفيش في قلبي غيرك يا مريم انتي و فساتينك..

ضحكت جامد وهو تنح لها: لا بقولك ايه يلا نروح

- يوسف! 

= بلا يوسف بلا بتاع تعالي نهرب محدش هياخد باله

- يوسف انت شوية وهتزهق مني اصلا!

اتكلم بحنان: عمري ما ازهق منك يا مريم.. انا حقيقي مهما لفيت مش هلاقي زيك.. وانا اصلا مش عايز غيرك.. انا بحبك انتي..،

 انتي بالنسبالي حياتي

= وانا مبسوطه اني معاك يا يويو!

يوسف بصلها وقال وهو بيقلدها:  اممم.. انت لو اخر راجل في العالم انا مش هتجوزك يا يوسف

" مريم ضحكت وافتكرت حاجه "

# فلاش باك 

- انتي بترمي الدبله في وشي !!!!! 

= اوعي ابعد ايدك دي عني يا حيـ.ـوان

- انتي اتجنني يا مريم

= بقولك ابعد عني انت الى مجنون لو فاكرني نايمه على وداني معرفش الزفت الى بتعمله هنا

- وطي صوتك احنا تحت الشركه !!!

= هو ده الى همك ها؟؟ انت اقسم بالله لو قربت مني مره تانيه ولا فكرت تقولي نرجع

يوسف قاطعها ومسك ايدها شدها ناحيته: انتي بتقولي ايه؟؟ احنا مش هنبعد عن بعض فاهمه ؟؟؟ 

زقته بقوة وكره: انت لو اخر بني ادم في الكون ده كله مش هتجوزك يا يوسف !!!! 

باك # 

- كنت متعصبه يا يوسف.. وكنت لسه صغيره برضو والمواضيع بالنسبالي بتاخد اكبر من حجمها بس انت الى غلطان برضو مش انا

= و عشان ايه كل ده؟؟ دخلتي لاقتيني بهزر مع السكرتيرة! وبنضحك بس امال لو لقتيني ماسك ايدها هتعملي ايه

- طب اتلم بقا

= طب بقول يلا بينا قبل ما تقوليلي اللغي الفرح

ضحكت: ماشي يلا

" مسكت في ايده و نزلوا.. و لما حبيبه و فريده شافوهم عينيهم دمعت من كتر جمالهم سوا.. و فريده افتكرت قد اي حصل مشاكل وبعدوا ورجعوا تاني..! لكن اخيرا بقوا سوا.. وبعد شوية طبل و اغاني ركبنا العربيات و اتحركنا على القاعه "

>>>>>>>>>>>>>>>>>>>>>>>>>>>>>>>>>>

بقلمي Slsbell Ahmed 

|| داخل القاعه ||

يونس: بقولك يا زين متجيب ليلي شوية

زين: فكك من بنتي ياض!

يزن: شايفين البلوند الى هناك ده

يونس: اوبا.. يابن اللعيبه

يزن: تبع مين دي

زين: دي قريبة مريم اتهد شوية

يزن: متكلملي حبيبه ترتب ليا جوازه كده زي يوسف ومريم يا معلم

ادهم: لما تنضج بس الاول انت و اخوك

زين: بالظبط

يونس: النجم وصل

" يوسف وصل هو ومريم و الكل اتجمع وبدء يهيص

ورقصوا كتير لحد ما راحو قعدوا وكانوا فرحانين اوي كلهم عشان يوسف.. وبعد شوية البنات اتجمعوا وقعدوا يرقصوا سوا و الرجالة كانت في الناحيه التانيه" 

زين: خلينا احنا في الهدوء هنا لحسن البنات مبتسكتش

أدهم: طبعا مخلف بنت بقا مش مقدر النعمه

"يوسف ابتسم بصمت فا يزن بصله"

- مالك؟

يوسف: مفيش.. مش مصدق بس اني اخيرا اتجوزتها.. بعد كل ده يعني.. عموما الفترة الى فاتت كانت صعبه اوي علينا كلنا انا عارف

زين: دي حقيقة.. حتي انا شغلي كان كتير.. ومكنش فيه وقت لأي حاجه

أدهم: كبرنا يجماعه.. والمسؤليات زادت

يوسف: صح.. على رأيك..

بص ليزن و يونس: طبعا انتوا لسه بتقولوا يا هادي

يزن ضحك: بس انا عجبني واحده بلوند..

زين: طب يلا يا يونس اختار مع اخوك عشان تتجوزوا سوا و نوفر وقت و مجهود

أدهم: اه بالمناسبة اخر فالاجازة اسبوع يا يوسف

يوسف: بصوا بقا الافترا

أدهم: وقع لنا الشركة الام بقا! عاوز شركتي الجديدة تبقي اعلي من الشركه الى بقالها سنين؟

" وليد راح قعد معاهم هو و عبدالرحمن "

عبدالرحمن: بترغوا في ايه و سايبين الفرح

وليد: اراهن انكم بتتكلموا في الشغل

يوسف: عرفت منين يخالو

وليد: لا مانا عارف عيالي ادهم قالك ان الاجازه يومين و لا لسه

يوسف: ده قالي اسبوع

أدهم: دايما ظالمني يا حج انا شواف برضو اديته اسبوع بحاله

وليد ضحك: سيبك منه انا الى ماسك الشركه دلوقتي هنظبط اجازتك سوا

يوسف: فعلا الخال والد.

" حبيبه و فريده و مريم راحوا خادوهم عشان يرقصوا سوا و قضوا باقي اليلة في سعاده وفرح.. وتم الفرح على خير."

>>>>>>>>>>>>>>>>>>>>>>>>>>>>>>>>>

|| بعد مرور سنه || 

- انا خايفه اوي يا فريده..

= بطلي عبط يا حبيبه.. أدهم ايا كان نوع الجنين هيحبه! ولا انتي لسه متعرفيهوش

مريم: معاها حق.. متربطيش بأنه عايز بنت و انه لو جه ولد هيزعل لا!

- ربنا يستر حد يقوم يشوف كده ايه الأخبار

" فضلنا مستنين لحد ما حبيبه دخلت تعمل سونار و بعد شوية لاقيناها خارجه وشها كله غرقان دموع "

"اتصدمنا انا و مريم و زعلنا اوي"

مريم: معلش يا حبيبه والله الـ

حبيبه قاطعتنا: انا حامل في بنت

بصينا بصدمه: امال بتعيطي ليه !!

حبيبه بدموع: من الفرحه!!!

فريده: ياشيخه حرام عليكي وقعتي قلبنا

" حضنها واحنا بنضحك و فرحانين مكانتش قادره تصبر لحد ما ادهم يروح من الشركه وفي نفس الوقت مش عايزه تقوله هناك عايزه تقول للعيله كلها.. فا عملنا خطه "

>>>>>>>>>>>>>>>>>>>>>>>>>>>>>>>>>>

سبحان الله وبحمده سبحان الله العظيم 

|| في الفيلا ||

- يا يوسف بقا ! سيبه وركز معايا شوية ! 

= مركز يا مريم الله ! حطه نقرك من نقر الواد ليه!

انت حبيب بابي ؟

مريم ندهت على الداده بنفاذ صبر: لو سمحتي يا داده خدي كريم 

يوسف: بطفشيلي ابني

- اه كلمه بقا يلا يا يوسف دلوقتي

" خلينا يوسف يكلم أدهم يقوله انهم محتاجينه في البيت ضروري.. و كنا احنا جمعنا الكل وصل و لما دخل وشافنا متجمعين استغرب "

- فيه ايه ؟؟ حصل حاجه !!

حبيبه قامت وبصتله: اه.. و قولت لازم اجمعكم عشان تعرفوا

أدهم: طب قولي انتي كويسة

- انا حامل 

أدهم بصلها بفرحه: بجد!!!! الحمدلله يارب بعد كل ده..

حبيبه بصتله بستغراب: مش هتسأل ولد ولا بنت!

- مش لسه بدري عبال ما نعرف؟

هزيت راسها بالنفي وضحكت: بنت..

ادهم بصلها بصدمه: متهزريش يا حبيبه ! 

فريده: مش بتهزر شوف بعينك 

" أدهم مسك الصور وشافهم و بعدين حضن حبيبه بقوة و الفرحه مكانتش سيعاه!!! ولا كان مستوعب انوه حصل اخيرا حرفيا كان مبسوط جدا و الكل قام يبارك له ويحضنوا "

وليد: العيلة مكمله في التوسع..

هدي ضحكت: الدور عليكي يا فريده

زين: لا يا ماما كفايه علينا ليلي 

فريده: اه احنا متفقين

هبه: خلاص يبقي يوسف يخلف تاني

يوسف: لا كفايه عليا كريم اصل مريم بتغير

"ضحكوا و بعدين ناديه بصت ليونس و يزن"

- محدش فيكوا ناوي يتجوز قرفتوني

يزن بضحك: ربنا يسهل شكلها صالونات والله

يونس: شوفولنا حد بقا مبدهاش

وليد: البنات كتير انتوا الى حابين الصياعه..

مريم بتلقيح: ياتري طالعين لمين

" عز نزلهم و أدهم خده يقعد جمبه "

- كنت بتعمل ايه كده؟

عز بهدوء: لقيت صوتكم عالي روحت اطمن ان ليلي مصحيتش لحسن تصحي تعيط..

فريده حضنته: ياروح قلبي انت

زين بصله: برضو مش هتتجوزها خد بالك

عز اتكلم بتلقائية: بابا قالي هتتجوز ليلي لما تكبر

ادهم قعد يضحك جامد من دهشه زين: اه.. قولت له مالك؟ انت تطول؟

يوسف: حيس كده وانا كمان بطلب ايد النونه الى جاية لكريم واهو يبقي زيتنا في دقيقنا.. 

" كلنا قعدنا نضحك و بعدين بصينا لادهم"

- هتسموها ايه صحيح

حبيبه: أكيد يا ادهم انت فكرت في اسم البنوتة..

- كارما.. عشان هتبقي كراميلتي

يوسف بأستفزاز: قصدك كراميلا كريم.. تصدق لايقين على بعض

أدهم بصله برفعه حاجب: متخلنيش اغير الأسم!

حبيبه: لا لا كارما جميل

وليد: مبروك يا حبايبي.. و كويس ان نسل البنات هيرجع ليلي وكارما..

ادهم ابتسم: جدو كان هيفرح بيهم اوي

فريده: تفتكر كان هيحبهم اكتر مني!!!

زين: لا هو انتي فيه زيك يا فيرو.

يونس: طب راعو ان فيه ناس سنجل..

يزن: اه والله يا يونس يخويا..

" بعد ما قعدوا شوية كل واحد رجع شغله.. لكن أدهم قبل ما يمشي خد حبيبه يتكلم معاها "

- قوليلي بقا مالك؟

= مفيش.. انا دلوقتي مرتاحه خلاص

- مش فاهم؟

اتنهدت بتعب: جبنا بنت زي ما كنت عايز

- وانتي كنتي شايله هم ده؟ ليه!

= عشان عارفه انك نفسك اوي تجيب بنت.. طول الوقت بتقول كده وفضلنا سنين نأجل الخلفه تاني مش بس عشان كنت تعبانه انا كنت حاسه انك خايف نخلف تاني يطلع ولد

- ايه يا حبيبه الكلام ده؟ ازاي شيفاني كده

= انا مش قصدي حاجه.. انا اقصد اني عارفه إنك هتبقي مبسوط اكتر لو جت بنت

- ماشي بس معني كلامك اني مش بحب عز مثلا

= لا يا ادهم.. انا كنت متلخبطه وخايفه وخلاص.. الحمدلله البنت جايه

- ليه مشاركتنيش كل ده ازاي اصلا تفضلي كل ده شايله حاجه؟

= انت ايه مزعلك دلوقتي!

- تفكيرك فيا يا حبيبه ازاي بتفكري فيا كده؟ ازاي مش فاهمه اني بهزر علطول وبنكش زين اخويا عشان جاب بنت الأول ازاي مش عارفه قد اي بحبك وبحب عز! 

= متكبرش الموضوع يا أدهم! 

- لا صدقيني هو كبير بقالك كتير اوي خايفه نخلف

عيونها دمعت: انا آسفه 

مسح على وشه وحضنها: بس يا حبيبه بلاش عياط

- انا مش قصدي

= خلاص.. انا عارف.. حقك عليا.. يمكن انا طريقتي كانت غلط وفهمتي غلط

بصتله بدموع: هو انت دايما تلحق الخناقه قبل ما تحصل و تصالحني! 

ابتسم ومسح عيونها: مينفعش تزعلي لو دقيقة حتي.. مش عايز اي زعل بينا وبعد كده طلعي كل الى جواكي.. وخلي بالك بقا بلاش زعل كتير لحسن كارما تطلع قماصه زي امها

ضحكت وحضنته جامد: بحبك اوي يا أدهم

- وانا يا روح أدهم. 

>>>>>>>>>>>>>>>>>>>>>>>>>>>>>>>>>>>

" وفات الوقت.. عدي كتير على عيلة الجيار ! وفضلت تكبر في الشهور الى حبيبه كانت حامل فيها يزن و يونس اتجوزوا..! وبعدها كارما هانم شرفت.. الى كانت دلوعه البيت بسبب دلع أدهم ليها.. و عز بقي عنده 7 سنين و ليلي كانت بتمشي و بتقول شوية كلام على قدها.. و كريم كمل سنتين و طبعا كارما لسه كانت اصغر نونو في عيلة الجيار.. "

- مامي.. عايز 100 جنيه

بصتله بستغراب: بتوع ايه ياعز؟

= نشتري عروسة عشان عيد ميلاد ليلي

حبيبه ضحكت وبصت لأدهم: ابنك مش هيسكت غير لما يشل زين..

ادهم ضحك: هننزل انا وانت ياحبيبي نشتريها حاضر

بس بعد الغدا عشان كلنا هنتجمع.. انتوا خلصتوا؟

حبيبه: اه لبسنا اهو

- طيب يلا

= طبعا هتشيل كارما هانم

- أكيد يعني هاتي

" نزلوا على السفرة و الكل بدء يتجمع.. اتفقوا يتجمعوا كلهم في الفيلا كل جمعه وثبتوا المعاد بسبب ان كل واحد بيبقي مشغول طول الأسبوع.."

وليد: الحمد لله على نعمتك يارب.. لمتنا بالدنيا يا ولاد

" ابتسمنا كلنا وبعدين روحنا نقعد سوا.. عمي وليد و عمو عبدالرحمن و عمتو هبه وناديه و طنط هدي كلهم قعدوا سوا.. "

" وانا و زين و ادهم و حبيبه و يوسف و مريم و يزن و يونس قعدنا سوا.. و اه.. يزن كان معاه خديجة مراتة و يونس معاه جني.. " 

" كنا قاعدين وادهم شايل كارما و يوسف بيلاعب كريم و عز و ليلي بيلعبوا سوا قدامنا " 

أدهم: مش ناوين تخلونا نشوف نسلكم ولا ايه

يزن ضحك: لسه شوية خديجه عندها فوبيا بتقولي مش عايزه اولد ولا طبيعي ولا قيصري

خديجه: طبعا مانت مش تعبان في حاجه

جني: هما بس يشيلوا و يدلعوا

فريده: اه معاكي حق.. اهم قدامنا

" شاورت على يوسف و أدهم "

زين كان باصص على ليلي: لو بس حد يبعد الواد ده عن بنتي 

يوسف: وحد يقرب كيمو من كارما..

ادهم بصله برفعه حاجب: انسي.. هو كارما ادهم الجيار تاخد اي حد

يوسف: حلو اوي يعني انا ابني اي حد؟ قصدك اننا جربانين ! 

فريده: شكله كده..

" وبعد ما شوية النكش خلصوا خرجنا انا و زين و ادهم الجنينه.. " 

"كنت باصه للسما ورجعت بصتلهم"

- زيزو زمانه فرحان بينا اوي..

زين ابتسم: اه.. كبرنا عيلة الجيار ودخلنا فيها بنات هو فيه احلي من كده؟

أدهم: هو احلي من كراميلا

زين: شوفي المغرور..

"ضحكت و عيني راحت على عز و ليلي"

- يا ليلي هاتي ايدك هتقعي

"مدت ايدها ببلاهه اطفال! و عز مسكها كويس"

- هخليكي تلمسي المياة براحه

" روحت لعندهم بسرعه "

- عز بتعملوا ايه عند البسين

= عايزه تنزل المياه كنت هخليها تحط ايدها بس متخافيش انا ماسكها حلو

ابتسمت على طريقته: لا ياحبيبي الاحسن تبعدوا خالص 

- حاضر يا مامي تعالي يا ليلي نلعب عند الشجر

" رجعت لأدهم و زين وانا بضحك"

زين: ايه؟ 

- احممم.. هو توقعاً كده.. عز مش هيسيب ليلي

أدهم ضحك وبص لزين: يبختكم ياحبيبي بأبني

زين: بطل غرور و روح شيل ابنك ده من قدام بنتي

فريده: لا.. انا موافقة.. عز مخلي باله عليها.. زي بالظبط لما كنتوا بتخلوا بالكم عليا زمان فاكرين؟

زين ابتسم: انا فاكر اه.. لما حضرتك خرجتي تجري إلي اللا شيء

ادهم: ولما كنتي في البار عايزه تخرجي ومش عارفه.

ابتسمت وانا بصالهم..: انا محظوظه اوي بيكم

"زين ابتسم و حضني و ادهم حضنا احنا الاتنين"

- ..♡احنا محظوظين اننا عيلة الجيار

>>>>>>>>>>>>>>>>>>>>>>>>>>>>>>>>>>>>