كاعدة مقابيل ميلاد ودا اسولف وياها اسد عليها الهيها عن الوجع الكاعد تتوجعه بعد ما اكتشفنا بيها ( سرطان الدم ) بس ما گنالها ..

احا سويسو كال : صبا جدي يريدج 

انداريتله واني احاجي : راحو ؟! 

- اي راحو 

- حازم وياهم مو 

- اي وياهم 

- وما صاحني ! 

- لا 

استغربت وضجت وكمت من مكاني واني احاجي : - شصار ؟ شكالوا ؟ 

- ما ادري انزلي جدي يحچيلج 

نزلت هدى واكفة كدام المرايا باوعتلي وكتلها : عمي وينه بالدكان !؟ 

- لا بالدوانية 

حجتها واجت وراي تمشي رحت لعمي دخلت وكتله : ها عمي شحجو شكالوا 

- طلكوا ومشوا 

احاجي واريد اكعد كباله .. جمدت ما عرفت شلون اكعد 

رجعت وكفت واني اكله : منو الطلك !؟ 

- حازم والشيخ جان موجود ورمى يمين الطلاك بالثلاث بشهود الكاعدين 

كضيت الحايط رجليه بادن واني اكله : صدك عمي تحجي لو كاعد تقشمرني 

- اقشمرج شنهي الزلمة طلك ومشى هاي بعد قسمتج ونصيبج شتسوين خلي يولي 

- ليش طلك ما سمع مني ما صاحني اني فوك ومنتظرة اتصيحوني اتسمعون مني احجي العندي اكول شنو شفت وبشنو مريت 

لا ما معقولة حازم يسويها 

ما يسويها ما يكدر 

- هذا الصار اتضنينه شاريج وهو اول البايعينج 

يوم الكتلة تريد اعتذار وبيت بعيد عن اهلك رمى يمين الطلاك بلا ما يرفله جفن .. 

- واني شسويت حتى يطلكني ؟ شنهو جرمي 

- جرمج ما حجيتي لو من الاول ما تعدا عليج محاجيته محاجيتني محاجيتلج زلمة يوكف بالسالفة ضمضميتيها بين النسوان شكالت سهى وحجت امه هاي عمي خلهن يفيدنج النسوان .. طلكاج وطلع 

كامت دموعي تجري واني اباوعله 

انعقد الساني اريد احجي اريد اكول اريد انطق 

العبرة ابلعومي صارت مثل العجارة النابتة بركبتي هلكد ما خنكتني واذتني 

عفت عمي ومشيت صعدت فوك بسرعة .. 

اخذت التليفون مال دنيا وخابرت منه على حازم 

لازم احجيله لازم يسمع مني اني اعرفه والله اعرف لو سمعني وفهم مني ما يطلك . 

انتهى الاتصال وما رد .. 

رجعت اتصلت واني امشي وافتر بالغرفة وايدي وجسمي كله يرجف واعض باظافري من التوتر وامسح دموعي وارجع اباوع للتليفون يرد واني اكله : رد حازم رد .. لتعوفني ! 

انتهى الاتصال ومجاوب 

كتبتله : حازم والله ما سويت شي اليخليك اطلكني اني بس خفت احجيلك اني المظلومة من كل الصار وجنت منتظرة تسمعني .. جاوب 

ما رد ولا اتصال 

رجعت كتبتله .. يمكن انت هسه مشغول وناس يمك 

من تصير وحدك خابرني وجاوب الله يخليك والله اني ما سويت شي بدل ما تنصفني تطلكني ليش عليك الله جاوب . 

ما جاوب .. يمكن يمه ناس راح يجاوب 

اني متأكدة راح يجاوب .. راح يسمعني وراح يصحح الموضوع ويرجعني .. حازم ميعوفني اني اعرفه يحبني ولو غبت عنه يوم يتعب بدوني وما يتحمل بس هو هالفترة تعبان واكيد غيروه عليه لازم احجيلا .. 

تركت التليفون وكلت هو من يفضى راح يخابرني 

وكفت هدى كالت : ليش اتخابرينه اذا بدال ما ينصفج طلكاج عليمن مشتريته ذبي وراه سبع حجارات وعوفي 

- اني ما اكدر اسوي هيج ما اكدر 

هو عنده اهل ومرة واطفال وكلشي عنده .. بس ما عندي غيره لا اهل ولا احد ولا حتى طفل .. هو كلشي بحياتي هو بيتي هو راحتي هو اماني اني ما اكدر بدونه ما اكدر 

حجيتها وكعدت من طولي احط راسي بين وجليه وابجي من كل كلبي .. اجت يمي حطت ايدها على ظهري تطبطب : حقج والله حقج ويلوم اللي يلومج بس شتسوين هاي قسمتج بعد 

يمكن الله كاتبلج الاحسن منه 

شعدج شو لا ولد ولا تلد وحلوة واتخبلين وشاطرة ونادرة والله الف واحد يتمناج .. ما يستاهل دموعج هاي والله 

هي تحجي واني انحب بصوت مسموع 

عمتي صعدت على صوت نحيبي وميلاد كامت تتجى و تمشي حتى تجي يمي .. كضتني عمتي وهي تكلي : يا اصبية عليمن هالبواجي جنه ميت ما مطلك خايبة يولي نعلت ابو زينة هالدموع هاي كلها علمود رجل عمت عينه كون 

حضنتني عمتي وجرتني الها ذبيت روحي بحضنها اشهك من كل كلبي وابجي واكللها : والله لو مسوية شي ما انقهر اكول استاهل عمة والله ما سويت شي اني بس خفت احجيلا .. خفت اخسره بس خسرته ! 

- ما جان ربح خاطر تخسري ولج اتاذيتي من وراه حيل .. شعمل بحالج تاليته صدك اهله وطلكاج .. عسنى لا رجع شنهي بايرة يعمه لو معيوبة شو بنية وضاوية جنج شمس عليمن تبجين يروحلج فدوة 

جرت ايدي ميلاد وهي تكلي : لا تبجين عليج الله بواجيج كاعد اتأذيني .. الله ما ينسى احد وكل امر الله يكتبه نكوله خير .. يوم الطلكاج عدنان حسبتي روحج ضعتي بس الله ما يضيع بشر كلنا تحت رحمته وينظر النا بعين عنايته وعطفه ما ينسى احد بينه .. لا تبجين صبا 

كومني وغسلن وجهي 

بس دموعي ما نشفت والتليفون ما طاح من ايدي 

كلبي متأمل حازم راح يتصل او يراسل من يصير عده مجال 

مرت الساعة والساعتين واجا الليل وحازم لا خابر ولا اتصل ولا رد على رسايلي .. وهن يواسن ويحجن بس جيب راس اليسمع .. 

اكدر اكول ساعتها من صدگ كلبي انكسر 

احس اكو بيت جان بداخلي بانيته واسمه حازم ومتأملة اعيش بخيره وما محسبة للدنيا ومصايبها اكول هو موجود .. ما ادير بال للدنيا ما دامه وياي .. حيطان هالبيت البانيته بداخلي كاعد يتكسر جواي طابوكة طابوكة ويتهدم ويوكع فوك راسي .. والدم دموع تنزل من عيوني . 

اني صحيح ما حجيت وصح جنت حاسبة انو مشكلة وجبيرة وراح تكبر بس بالنهاية تنحل ابد ما حاطة ابالي ان فد يوم حازم يسويها ويخذلني .. لان اني ذابة كل حملي عليه ومعتبرته سند .. شعور الخذلان الجاي احسه يذبح .. 

شعوري كاعد يطلع روحي من جسمي هلكد ما حاسبة بخيبة وخذلان .. واسال نفسي شسويت ليش طلك بدون ما يسمع مني ؟ 

وارجع اقنع روحي واملها انو لو سمع مني 

راح يفهمني وراح يصلح الموضوع بيناتنا وعقلي يكعد يصفلي الحجي اللي لازم احجي واكله شلون جان يجي واني اخاف واخاف احجي اخاف لا اخسره .

الليل المر ما نمت ولا عيني شافت النوم 

عيوني ما شافت بس الدموع .. هلكد ما بجيت صبحت الصبح عيوني وارمة 

شافني رسول واني انزل للحمام جوا 

كال : يمعود عيونج مطككه عليمن دنعل ابوه لابو الجايه 

ما يسوى تسوين بحالج هيج صبا 

عفته ودخلت للحمام .. غسلت وطلعت 

عمي صاحني احيت وكفت كباله وراسي احسه راح ينفجر من الوجع كال : شبيج بويه شنهي اتحسبين اذبج .. جا انا ما ذبيتج من اول اذبج هالنوب .. البيت بيت ابوج وتاخذينه طول بعرض لا اتحطين ابالج ولا تقهرين نفسج يا عمي .. خل يولي جا سوين اتموتين روحج 

- يطيك العافية عمي 

- دغسلي وجهج غسلي وسويلنا ارويك واستكين جاي خل نكعد انا وياج ناكل ياله بتي 

- اعذرني عمي والله راسي يوجعني ومالي نفس احط شي بحلكي 

- وشلون تموتين روحج وراه 

- عمي اني اكولن لو سامعني ... قاطعني 

- ما رايد يسمعج لو رايد جا صاحج بتي ، ارضي بالقاسمه الله عليج وانسي .. وهاي تاكلين اكلتنا واتشربين شربتنا انت بنيتي شاهد الله 

هزيت راسي ومشيت كعدت ع الدرج 

صافنه بالتليفون واعيد برسايلي اله  رسالة رسالة حرف حرف 

وبغبائي كاعدة اتامل يرد .. يمكن يفتقدني اوي أنبه ضميره ويجاوبني ويسمعني .. 

دخلت سهى هي ومنى للبيت جايات اثنين بتكسي واحد 

اول ما فاتن باب الحوش اني كاعدة بالدوانية صرت كبالهن كالن : هاااا 

- هلا بيجن 

بس حضنني جنه شلال مال دموع انفتح بعيوني .. 

وكعت بحضنهن ابجي .. وكف عمي وهو يهلي بيهن ويكلهن : ديرن بالحن عليها لا تسوي بروحها شي هاي مسودنة كاتلة روحه اعلى واحد طاعن بيها ورايد يكتلها ومطلكها . 

سهى : عبن غبية لو ما غبية جا دمعة وحدة ما نزلت عليه .. هو يسوى .. حرام دمعة من دموعها ما يسوى 

- ليش تحاجوني هيج 

العشرة متهون على ابن الحلال وعشت وياه عمر كم سنة صالي .. ياما سمعني كلام حلو وياما داراني من اتمرض وياما اتحملني من اضوج وانقهر واصيح وابجي واطلع حركتي بيه .. الشفته من حازم ما شفته من غيره .. 

صارلي كم سنة عده كل يوم يمر وهو بالدوام احسب الساعات بالدقايق شوكت تخلص واني اباوع للوكت شوكت يجي .. ومن يجي جن اهلي كلهم اجو .. 

ياخذني باديه مثل الطفل يداريني .. 

ولو طلع يتنغصلي بكلشي احبه اكل حلويات .. 

وما مخليني بحاجة احد ولا فد يوم احتاجيت حتى لفلوس شغلي ولو شافني مكسور ظهري ع الشغل يكلي .. عليمن اتعبين واني موجود كليلي اني اطيج فلوس تعبج بس لا اتعبين واكله لا الهي روحي 

اني وهالذكريات كلولي شلون انساهن .. 

خسرت بيتي وراحتي وعيشتي .. وصفيت بلا كلشي .. رجعت وحدي .. اعرف هسه انتم كلكم يمي وصافين وياي ومستخطيني بس بعد شهر من الي ووين اصفى .. وعد منو اكعد ؟ ومنو البيكم يتحملني ؟

اخسر بيتي الرممته واثثته بيدي قطعة قطعة وارجع من الصفر !؟ 

ما اكدر اتحمل ما اكدر .. اني اريد بيتي .. اريد مكاني . 

ضلوا يواسوني واتحملي وصبري وهاي قسمج وشتسوين وما يستاعل ومن هالحجي اللي كله كلبي ما قنع بيه .. ومتامل حازم راح يسمعلي ويفهمني .

لثاني يوم الصبح واني النار شاعلة روحي وكاعد تحرك شكو بداخلي وما كاعد تطفى ولا كاعد اعرف شلون اطفيها .. 

طلعت من الصبح واتعنيت لمستشفى مدينة الطب .. 

خابرت بشار من رقم دنيا رد .. كتله : اني بالمستشفى انت وين 

دلاني مكانه .. مشيتلا .. 

دخلت عليه هو بردهة بيها هواية ناس .. 

فتحت البردة كال : سديها لو رايدة تحجين 

عفتها ما سديتها وتقربت من عنده : تضن حوبتي ما تطلع بيك ؟ 

هجمت بيتي وهديتني وخربت حياتي ليش 

شسويتلك ولك مو عندك خوات والله باجر عكبة يعرضلهن واحد مثلك ويسوي بيهن السويته بيه ما خفت من ربك ما كلت هاي اليتيمة لو تعديت حرمتها منو يطلعلها لو خربت سمعتها والمن تروح لو خربت حياتها 

اني احجي وهو مدنك .. دموعه كامت تجري 

كض التليفون واتصل واني كاعد احاجي .. رفعلي ايده على حلكه وهو ياشرلي ؛ هش 

ضليت واكفة 

فتح سبيكر حازم رد عليه بسرعة وهو يكلي : اتخابرني ولك نكس حسبالك تفلت مني بالعباس ادفنك والحسين ادفنك بعد .. بس اكضك 

- استاهل تسوي بيه التريده بس هي ما سوت شي 

-لا اتجيب طاريها على السانك 

-اعرف بس والحسين وحق هو العباس هي ما طاوعتني اني غلطت بحقك وخذتني نزواتي وانغويت بس والله هي بريئة مني ومن افعالي هي ما سوت شي وجنت اهددها ما تحجيلك .. لهذا خافت ما حجت .. 

- لا اتجيبها اعلى السانك ولك نكسسس ابن *** جاي ادافعلها يمييييييي 

- اني غلطت بس مو هي التدفع غلطتي اني اجيك من المستشفى وهالمرة حط الطلقة براسي وكول جلبت اتعدى على بيتي وكتلها بس لا اتحملها ذنبي هي ما طاوعتي وما غلطت وياي هي بس خافت تحجيلك 

كام يفشر عليه حازم وسداه بوجه 

رفعلي وجهه وهو يكلي : والقران الندم كاتلني 

اني انغويت وانت الضحية ادري بس والله ما جان ابالي اخرب سمعتج هيج لو اخرب حياتج .. اني بس ... 

كام يبجي وهو ع السديا

دخل اخوه وهو يكلي : شعدج جاية 

- حوبتي ما راح تتعداكم وراح تطلع باعراضكم واعز احبابكم 

ناخية ام البنين هي مرة واني مرة اليحرك بيوتكم واحد واحد ويفضحكم مثل ما حركتوا روحي وهدمتوا حياتي .. الله ياخذ حوبتي منكم 

طلعت منهم .. وهو يكله : شرادت منك 

- هي ما سوت شي والله سوت شي اني بس السويت اذا تكدر اتاثر على حازم يبريها واذا ما تكدر اخذوني اله اتواجه وياه خل يكتلني ويبريها بكتلتي 

- خل تولي هالساقطة هاي .. ابقى بمكانك ومعليك بالرايح والجاي كوم على حيلك حتى تروح للبصرة هناك راح تستقر وتبتعد عن عين حازم. 

حازم متسممة روحه ما يعرف شيسوي .. 

ما كاعد يتقبل فكرة زلمة جان يتعدا بيته ويدخل وهو غافل وما يدري عن شي وصبا ساكتة بوكت جان يوسل بيها تحجيلا شبيها وهي الرضتله الفضيحة وما كالتله على الداس بيته 

رجع بالليل فتح باب بيت محمد ودخل للاستقبال .. امه كاعدة 

كالتله : ها ييمه خير الساعة  ١٢ ونص اكو شي 

- لا 

حجاها وهو يتمدد يم راسها 

- جا شعدك 

- ما عدي شي بس تعبان 

- الجهال وين 

- بالبيت 

- وامل ؟ 

- الكل بالبيت يمه .. بس اني يمج 

- شبيك وليدي كول يا الله تعدي هاي انت المومن القوي 

طب محمد : ها حازم هنا 

- عايف بيته وجهاله وجاي ليجاي بالله شوف 

محمد : متندم شنو ؟ ترا الله خلصاك منها خوية مرة مو راحة كوا هي ترا انت المخدوع بيها والعباس احلف عليها مو خوش مرة هي الجانت اطببك من ورا اعلها واخوتها صعبة تسويها ويا غيرك

صرخ حازم وهو يكله : محمممممممد انجب وجفيني شر حسك والعباس اكوم اطلع ضيم الله بيك 

- خب دكوم كو* تغلط عليه واني اخوك الجبير على مود وحدة زايعتها الكاااع  اطبب زلم من وراك 

كعد من مكانه وهم يريد يكوملا حازم وهو يكله : ابو **** انت ليش تخليني اكوملك والحسين 

كضته امه وهي تكله : يا يا شجاكم ما تكلولي يمه اتهدوا برحمانكم صدك تحجون تتمالخون على فرد مرة محمد تشوف اخيك تعبان مالها داعي يمه تغثه اسكت 

-مو هو اني هذا الكاتلني قاهر روحه وحاركها علمود وحدة اليوم جانت بالمستشفى يم بشار زايرته الادبسز .. تطمن عليه 

اندارله حازم : منو الجانت يمه

- صبا رايحتلا للمستشفى .. اخوه هو كايلي ومتعارك وياها وطاردها كايللها انت ما تستحين رجلج توا طلكاج كلبتي اتشوفيلج واحد ينفكج .. جوزي من عدنا .. وطايح بيها وطاردها 

- الحجي منك محمد لو صحيح 

- عمي اجتافاتي للعباس .. رايحتله اليوم وكاعدة وياه واذا ما تصدكني خابر حسنين واتأكد 

كام حازم من مكانه وامه فزت ورا .. 

عافت البيت وطلع وهي تصيح : حازم يمه يواشك انت مريض وكلبك ما يتحمل يا ابني اذكر ربك .. حاااازم ولك يمممه 

راح حازم للبيت ومشتعلة روحه بالنار ع السمعه 

وكام يقارن الصبح من بشار مخابره ومبريها اكيد هي رايحتله ومخليته يخابر .. 

متخبل الوحده .. يروح ويرجع ويكض براسه 

كوم شي النفط ورش غرفة نومك انت وصبا كلها واشعل جداحتك ووجها 

اتلاكفت النار الغرفة من كل مكان 

ولاحت النار ايده وهو بنصها يصرخ ويصيح 

نازلين عائلته امل ودنيا كايمات يصيحن و علي وسجاد راكضين على عمامهم يدكون الباب ويصيحون بيتنا احترك 

اتراكضوا العمام من كل صوب الشايل سطل والجار البطانية والشايل جيس رمل  ويركضووون 

جارين حازم من نص النار .. 

ويحاولن يطفون الغرفة ما تطفى .. 

طك المكيف اللي بالغرفة  وانفجر ونزلوا الكهربائيات وطفوا البيت كله و هم يتصايحون ويتراكضون يطفون بالنار اللي اشتعلت 

لحد ما طفوها .. الغرفة كلها صايرة رماد الكنتور ما بقى منه شي .. كلها اتساوت ويا الكاع .. 

وناقلين حازم للمستشفى مرتفع ضغطه وكايم يزوع من راسه وما يشوف .. منطينه علاجة وحبابة تحت اللسان وخافوا عليه من الجلطة لان كلبه تعب حيل 

نوموه مستشفى كبل ..

للصبح ما رضى يبقى رفض الا يطلعونه ما يتحمل هوسة اخوه وولد عمه والممرضين والدكاترة .. 

عافهم ورجع دخل للبيت وحده وكعد بالاستقبال 

نزلتله امل كاللها : لا توصليني ولا تكربين ولا تنزلين حدج بيت ولا اشوفيني وجهج .. عوفوني . 

صبا :  الظهرية وعمي بالدكان وهدى تطبخ وعمتي بالاستقبال تسبح بسبحتها 

فكرت محل حازم براس الشارع واني اعرفه هيج وكت يمر لمحله يشوفه يجيك الوضع يرلا يرجع للبيت ... 

مدري شطار بعقلي وكضيت عباتي وطلعت

كلت اذا اشوفه اجبره يسمعني .. لا يسمعني 

ما راح ارتاح اذا ما احجي كلشي بكلبي ساعتها اذا سمع مني كلشي وما صدكني ونصفني ذاك الوكت اطي الكلب صامت واخلي روحي تحقد عليه وتكرهه 

ما طولني ما حاجية عقلي ما راح يكف وهو يتخيلي ان لو سمعني راح يتصلح كلشي .. مشيت لمحله لكيت  ابن عمه اخو امل بالمحل .. كتله : حازم اجا لهنا ؟ 

- لا

- يعني بعده ما حاي 

-شتريدين منه ؟ 

- رايده احاجي 

-ما يجي اليوم الصبح طلع من المستشفى 

- طلع من المستشفى ليش ! شبييييه 

-اتمرض ووكع وشلنا للمستشفى والصبح طلع 

-وهو هسه وين ؟ 

- ابيته ما انصحج تروحيلا 

طار كلبي من سمعت طايح وشايلينه 

كضيت الدرب وطلعت لبيتي .. 

وصلت هناك .. فتحت الباب  رمل وتراب وهوسة .. دخلت للمطبخ 

ضليت عاقدة حاجبي واني اشوف البيت اظلم اتقربت للغرفة مالتي ظلممممممة ما بيها ولا اي اثاث كلها محتركة 

حطيت ايدي على حلكي : ادخيلك ربي هاي شصاير بغرفتي !؟ 

.. حسيت اكو حركة بالاستقبال .. وصوت حازم كاعد يصيح : منووو نزل ..  مشيت للاستقبال دخلت ولكيت حازم كاعد ومرجع راسه للتخم ومغمض 

حجيت ... حازم .. 

فتح عيونه وفز دار وجهه بسرعة 

كاملي : شجابج هنا 

- اني اجيت اشوفك كالولي انت جنت بالمستشفى 

- واني ما رايد شوفتج امشي ولي منااااا 

- حازم عليك الحسين بس اسمعني احجيلك انت ما سمعت مني 

- ولا رايد اسمع امشي اطلعي برا 

- اني والله ما سويت شي والقران ما سويت شي يضوجك هم اللي سووا اني ما سويت 

- انت ما تستحين جاي اكلجججج امشي اطلعي براااا 

- زين بس اسمعني ليش تحكم عليه بدون ما تسمعني 

- من جنت اكعد اتوسلج وكلي اذان صاغية حتى اسمعج شبيج متضايقة ما حجيتي هسه بعد ما خليتني علج بحلك اليسوى والمايسوى جاية تكليلي اريد احجي  تروحيله للمستشفيات تتحمديلا وجاية تريدين اسمعلججججج .. عنج لا حجيتي امشي اطلعي برا 

- خفت والعباس خفت .. والإمام علي خفت ما تصدكني 

حازم الله يخليك بس اسمعني 

كام يدفع بيه واني اترجاه واتوسله بس يسمعني 

وهو يجر ويعت بيه ما سمعني .. وهنت نفسي ونزلتها لادنى مستوى تالي خلاني ع الباب وطبكه بوجهي .. 

ظليت واكفة .. 

دموعي تجري بقوة 

ضليت اباوع ع المنطقة ع البيت 

مشيت بسرعة من المكان وجانت ادموعي مطر وكلبي باضعاف حالاته احسه حمره بصدري مو كلب .. هلكد ما مأذيني 

رحت على بيت عمي اول ما طبيت حيدر صار بوجهي نازل من دوامه وعمي حاجيلا كالي : وين جنتي 

بس حجاها اني ذبيت روحي عليه وابجي بقوا انحب 

مد اديه ولمني وكال : هاي ليش هيج تبجين على واحد مثل حازم دخل يولي 

كمت ابجي بقوا .. 

طلع عمي كالي : ياهييي ما تكضي هالربابة بعد نصحى ونام اعلى بجى .. دكافي يا بويه ما جزعتي ما ملتي جا هسه زلمة ما يريدج شلون كوا 

وخر راسي حيدر وهو يمسح عليه ويكلي : تهون كلها كم يوم وتعدي وتنسين .. تروحين وياي للبيت لو تبقين هنا ؟ 

هزيت راسي وبعدت نفسي 

كال : ديلا جا انتظرج بالسيارة استعجلي 

صعدت خذيت غراضي من غرفة جهال يوسف ونزلت رحت ويا حيدر لبيته .. دخلت كالي : ذيج غرفتي روحي ارتاحي بيها اني راح ابقى هنا ع التلفزيون 

مشيت لغرفة نومة جان حاط حصيرة ومدات ومخاد وبوفيه صغيرة ام الطلاقتين ما مشتري غرفة نوم لهسه .. واكو تلفزيون صغير محطوط ع البوفية .. شعلت التلفزيون واتمددت ع الدوشك الممدود مبين فراشه 

ضليت استذكر الموقف وعيوني رجعت تجري .. 

كعدت وتحيت ظهري للحايط ولميت نفسي .. وحطيت راسي بين رجليه ابجي 

معقولة انتهى كلشي 

غرفتي ومكان راحتي كلها احتركت 

غراضي ومكينتي وبيتي و كلشي راح .. 

الكابوس الجنت احلم ارجع وحيدة ومالي احد عشته وهسه اني رجعت للصفر 

شنو صار حتى حازم هيج كرهني وما كام يسمعني 

معقولة اني الجنت متوهمة يحبني 

ودلاله وحبه وحضنه وما ينام الا يمي وما يرتاح الا اني حواليه 

كل هذا راح واختفى وانتهى .. وصار ماضي 

شلون كدر يتغير هيج ويعوفني اني اكدر اني اريده 

فكرة اكمل عمري بدونه صعبه صعبة ما اتحملها 

اني احبه مشكلتي احبه حيل وروحي تريده 

شلون راح تمشي حياتي 

شلون راح اعيش 

راح اكدر 

مر يوم ورا يوم واني اذبل واضعف .. 

الباب ما وصلته واكل يا دوب كم لكمة ويا حيدر وتلعب نفسي .. 

اتمرضت حيل 

اسبوع كامل اني بالفراش .. 

حيدر جان موجود ما انكر بهالفترة وكفلي 

جابلي علاج راد ياخذني دكتور بس ما قبلت 

اتمنيت تسوء حالتي اكثر حتى اموت واخلص من هذه الحياة اللي ما شفت منها بس القهر . 

يوم يوم روحي بدت تنشف من كد القهر .. 

رجع حيدر التحق وتركني وحدي بالبيت .. ما وجعت لبيت عمي ما جنت رايدة اكعد ويا بشر ولا اعاشر احد بس رايدة اسد الباب وانزوي وما اشوف احد 

خواتي يخابرن مالي خلك ارد عليهن 

ومالي خلك اسمع كلمات المراسات اصبوي واتحملي وانت قوية وانسي ولا تصيرين غبيه وما يفيدج وما يستاهلج وهالحجي كله ما رايدة اسمعه .. 

اتوحدت وضليت معتزلة بروحي ما يعجبني حتى سبح اتثاقل اكوم واسبح واغسل جسمي يمكن كام يمر اسبوع واني ما بيه اروح للحمام واغسل .. كرهت نفسي كلش والإكتئاب وصل بيه مرحلة 

جانت اكو اغنية لبنانية  طلعت ع التلفزيون سمعتها ورحت نزلتها بتليفوني  

تكول .. طيرت النوم من عيوني 

دمعي محى كحل جفوني

كلهم قالولي مجنوني  لازم تنسي 

لكي شو عم يعمل فيكي 

لبيهتم ولا بيحكيكي

متخلي حبو يمحيكي لازم تنسي 

شو سهل الحكي مين اللي بيعرف بقلب الثاني شو فيه ؟ 

شو سهل الحكي انا لولا وجودو بعمري.. عمري بينطفي .

يمكن اسبوعين اني اعيد واصقل بهالاغنية بحيث مرات من اسمعها عقلي يرجع لهالفترة لا ارادي واتذكرها بحذافيرها من كد ما عشت شعور هالاغنية وسمعتها وعدتها . 

فجأة لا بيتي لا غرفتي لا رجلي ولا كلشي ماكو 

ابيت اخوي مثل الخطار ما اعرف مصيري شنو لو اتزوج. 

شهر اني كاعدة لوحد واحاول استوعب وضعي الجديد

لحد ما نشفت من القهر ونشف كلبي .. وخلص استوعبت الموضوع وقررت اشطب حازم و كل ذكرياته من ذاكرتي .. وابدي من جديد. 

دخلت الحمام سبحت طلعت .. باوعت بالمرايا حاجبي اثخن من حاجب ابو جعفر المنصور .. شواربي .. السواد الجوا عيوني .. بشرتي باهتة ومن قلة الاكل صارت مايلة على صفار .. 

جسمي نزل وزنه ما ادري شكد بس حسيت على روحي هواي ضعفت عظام وجهي بينت ولغودي الجانت عندي راحن .. 

وجهي يخوف صاير جني واحد معتقل . 

ليش وعلى منو  ؟ 

وشنو السويته حتى يسوى اسوي بروحي هيج واعدمها ؟ 

شعدي اذكر ناس ما ذاكريني واقهر بروحي عليهم وهم البايعيني 

اني غبية فعلاً غبية 

كمت لحيلي .. اخذت فلوسي 

جنت جامعة  بالمليون وميتين وكسور من شغلي مال الخياط .. جنت ناوية اجدد بيهن الكليدور مال الحمام .. اصبغه اجدده اسويله ديكور بس .. راح كلشي والفلوس بقن عندي 

اخذتهن ومشيت اول شي سويته 

على جنسيتي جددت وطلعت سيمكارتي القديم لان كل زبايني بيه .. وطلعت بوجهي لرشا صديقتي ام الصالون 

رحبت بيه واتخبلت من شافتني 

متغيرة ضعفانة شصاير بيج .. كتلها اطلكنا 

كامت تكلي ما يستاهلج وطبه مرض ولو بيه هير جا ما راح ومن هالحجي 

كتلها : المهم جايتج اطلعيني وحدة ثانية 

شكلي كلش ما عاجبني شعري باهت .. بشرتي 

اريد اطلع غير وحدة 

كالت : نغير الشقارات نصبغه بنيات حتى ينطي بياض لبشرتج ونطفي هاللون .. والوجه نحفه .. واذا تريدين اتسوين تاتو 

- لا اني اصلا حاجبي ثخين وعالي ما يحتاج تاتو 

-جا خل اسويلج شمع اشيل الجلد الميت كله من وجهج وبعدين احفج ونصبغ 

صدك سوتلي وجهي بالشمع وحفتلي وشتلت حاجبي وصبغت شعري وخلت ويا الصبغ نسبة مسرح ومنعم ومعالج .. سوتلي ع البخار تنظيف بشرة وعدلتلي وجهي كله واطتني كريم كالتلي : هاج هذا يومية بالبيل حطي منه وادعيلي راح يبيض ويحمر وجهج يخليج تفاحة .. بس استمري عليه 

شكرتها وردت منها اعرف شكد 

ما خذت مني ولا فلس 

كالت ابد والله ربع دينار ما اخذ 

عاد شكرتها وسلمت عليها ورجعت 

ثاني يوم .. طلعت للسوك جبتلي مكينة خياطة واقمشة وشغلات الخياط واتسوكت لروحي كم اقماش وقراصات على مكياج على شحاطات ام الاصبع على اكسسوارات وحجول وهالشغلات التسعدني رغم شي بسيط .. بس اعوض روحي بيهن واسعدها . 

رجعت للبيت خابرت حيدر 

ع المكينة كتله احطها بالاستقبال لو بالغرفة 

كال : ها ما ترهم بالاستقبال 

- لعد شلون بالغرفة 

- لا بالغرفة اول وتالي راح اشتري غرفة نوم خو ما يومين وهم اتشيلينها والاستقبالي يجون ربعي جماعتي مو مال مكينة بيها 

كتله : هاهية افتهم راح ارتبلها مكان لعد 

- بكيفج 

مطبخه جبير .. فرشته ورتبتلي مكان للمكينة وجبتلي كرسي  وبوفية صغيرة لغراضي وحطيتهن .. واشتريت حاجيات للمطبخ ورتبت المطبخ سويته يخبل .. كلت ما يحتاج اذب روحي حتى لو انام هنا .. ولازم تحد واشتغل وارجع لحيلي واشتريلي بيت لو شي .. 

بيت الشماعية باعه حازم  ب١١ مليون وكالي فلوسه دين 

بس اني اصلا نا دافع بيه يمكن اقل المليون ونص الباقي كله هو كمل اقساطه ودفعه .. فما اريده ولا انزل روحي واطلب فلوس البيت .. حتى الحاضر والغايب العمي كاعد يتفق عليهن .. قررت اتنازل عنهن . 

منا وجاي ما اريد من احد شي .. ولا راح انتظر من احد ينطيني لو يصرف عليه .. لازم اني اصير لروحي .. الشي الاتمناه .. اني الاجيبلها البيت الترتاح بيه واني الاصيرلها السند واني اهل نفسي . 

بشدتي هاي عرفت قيمة نفسي صدك 

ما تسوى اقهرها واذيها وامرضها على كائن من يكون بالحياة . 

لو صار بيه شي لو اتمرضت منو يفيدني ؟ ومنو يحل من جيسه وينطيني بعد اني امرضه روحي وذابحتها عليمن .. لازم ابطل غبائي واعتمد على روحي صدك .. واهم شي ابطل طيبتي 

لا اكص كلبي واذبه بالزبل لو حن على بشر بعد . 

خيطت لروحي دشداشة جديدة واتفننت بخياطها 

ولبستها وطلعت بيها لبيت عمي .. مرت عمي فرحت من شافتني استعدلت وعفت الخزن 

وعمي كال : اي هيج طلعي شوفي الوادم بعد حابسة روحج وعازلتها عليمن يا عمي وياهو اليسوى 

- لا والله عمي محد يسوى ، بس اريد اشوفلي شغل مو مال اضل كاعدة بس ع الخياط لان اغلب زبايني هناك يم بيت حازم واكيد اكثرهم هسه لان ابتعدت بعد بطلوا ما يخيطون فمنا لما ارجع اكسب زباين هنا احتاج اشتغل

- اطلعي العصرية على الشارع وفري 

بلكت صالون عيادة شي محتاجين عاملة اشتغليلج وعيلي نفسج 

- هم صح  يحتاجلي والله اخذلي فرة واشوف 

اليكعد وين يلكى شغل . 

احجي واباوع لرسول ملتهي ومندمج بتليفونه الجديد 

: شنو هاذ التليفون رسول شكبره 

- خب غير كلكسي شبح يموت 

- كلكسي شنو 

- جهاز  تليفون بس جبير مو صغير مثل القديمات ذني يصير بيه انترنت والعاب وكلشي وكلاشي وكامرته تموت باعيلي خل اصورج 

شال تليفونه صورني وهو يكلي : شو حاجبج حلو خرب بعرضج يلمع 

ضحكت واني ارفع حواجبي مستغربه بحجيه : شبيك متكلي 

- لا صدك شوفي الصورة 

باوعتها 

- يا صدك شو صورته حلوة شسمه شسمه التليفون 

- كلكسي اس 3 

- بيش خذيته ؟ 

- والله صار عليه بخمسيمة من واحد صاحبي 

- والله اريدلي واحد 

باوعلي : ها ولج لازم زنكينه وعدج فلوس 

- لا والله شو عجبني اخذ من عده عليك الله يطلع مسلسلات يعني بنت وهيج 

- اكلها كلشي ابالج يطلع حتى الاوربي 

غميته : عابتلك والله فلا تستحي 

- جا غير اصارحج 

يحجي ويلعب لعبة طوبات ملونة ويلمس الشاشة ويضرب على البلونهن .. 

اندمجت وياه 

كتله: عليك العباس اريدلي واحد 

- اخابره الج اشوفه اذا عده

- اي والله خابره 

خابر عليه كاله باجر يجيني واحد مواصفاته فول وهم اس ثري .. اذا تريد مرلي وشوفه .

حجزه وكالي باجر اجيبه واجيج .. تدللين 

حجت عمتي : اصبية عمة ما اوصيج 

- عيوني الج كولي 

- سالمة عيونج يبعد كلبي .. رايدتج تروحين لميلاد بالمستشفى تنطينها الفلوس و الاكل وتردين يوسف اليوم ما يجي ورسول هالمبور ما يكوم واهلها غاد وياها فشل مو مال نعوفها 

- هي وين 

- بمدينة الطب 

صفنت .. يلا ما عندي شي اخذ تكسي وامشي 

اطتني الفلوس

ورحت لهدى كاعد تخلص الاكل 

كبة وشوربة كتلها : ملابسي هاي زينة اذا اروحن بيها للمستشفى ؟ 

- خايبة عدي بنطرون وقميص جبتهن جدد شلون حلوات جربيهن ..

- يا واروح ببنطرون وقميص 

- وشمجلبه بالعباية جنج عجوز بيها خليها بس هنا بالمدينة من اطلعين من المدينة البسي قميص طويل وبنطرون مرتبات اكثر والله لبست كم مرة وطلعت شو رسول ما حجه كلت بعد احسن . 

- بالله شوفيني 

راحت طلعتلي الملابس واني اسائلها على وضعها ويا رسول وهي تحجيلي عن سوالفه تكول : جزت منه لان اذا ابقى وراه واتعارك على كل مشكلة حرام اموت بجلطة  من القهر وهو صاحي سليم كلشي ما يطكه

لبست الملابس شميتهن ريحتهن طيبة وهي تسولف .. 

اجني على قياسي بس غير شكلي كلش .. وحيل حلوات عليه 

اجت عمتي وهي تريد توصيني وكفت كالت : اللهم صل على محمد وال محمد حيل لايكاتلج خليج بيهن حلوات 

- واطلع بيهن 

- اطلعي ياهو الاله غرض بيج شو بعمه صفيتي بلا والي تنطرين من احد يرضالج وما بيهن شي مستورات وحلوات . 

- جا خوش 

لفيت الحجاب وعدلته .. ورتبت نفسي واهم شي رفعت قراصتي الحبيرة كاتلة روحي بالقراصة الجبيرة اذا مو هي احس روحي ناقصة ..  واخذت الغراض اجتني عمتي حطت ١٥ بيدي كال : فلوس روحتج وجيتج 

- لا يا عمه صدك جذب عندي 

- ادري عندج والله يزيد بس اني موديتج 

سلمت عليها وجاي اطلع وكف رسول : هلله هالله هاي شطالعة عمي . 

- وخر مني ابو النسوان 

- اوصلج الراس الشارع 

- كاعد اتشوفون الشرف لراس الشارع 

- تريديييين لو لا من الاخيييير 

ضحكت : يلا كوم 

كام صعدت وياه بالسيارة وكف ع الشارع اجر تكسي وصاحني كالي : انتقلي 

صعدت بالسيارة الثانية ذبتني بمدينة الطب صعدت الاكل والفلوس الميلاد .. كامت توصيني ع الجهال وعلى داليا بالخصوص توصيني ما تبقى فوك وتنزل يم بيبتها تنام لا تنام وحدها بالغرفة فوك 

كتلها : كلهم بخير ودايرين بالنا عليهم انت بس طيبي وكومي بالسلامة وبيج خير وادللي 

بقيت شوية اسولف وياها وويا اختها .. 

وحجيتلهن اريد اشتغل جديد وادور على شغل 

اختها كالتلي : روحي لعشتار قريب عليكم .. وبت عمتي هناك محتاجين وحدة تشتغل وياهم 

- عشتار محتاج 

- روحي بلكت الله بعدهم ما جابوا عاملة وتاخذينه انت 

- ليش لا يا ريت 

رجعت منهم .. مريت بالسوك 

اخذتلي ملابس طلعة جدد .. ونازل موديل القميص المقفل الكل ضاج بيه .. فاخذتلي قمصان نسائية وفضفاضة شوي متكون لزك ع الجسم .. حتى البسهن 

جنه كبل بالمدينة ممنوع البنطرون 

والما تلبس عباية وجواريب ييذبون تهديد لاهلها بايام السقوط فجانت النسوان كلها عبي وجبب .. بس فجأة المدينة اتغيرت واستقبلت هالامور وتركت التعصب .. كمت حتى مو محجبات اشوف بالمدينة يمشن عادي .

رجعت للبيت .. وياي كومة غراض صفطتهن بخانتي 

وهدوم هدى نزعتهن وغسلتهن .. حطيتهن على صفحة حتى ارجعهن . 

ثاني يوم من الصبح .. 

طلعت لصالون عشتار .. دخلت وحجيت ويا صاحبة الصالون 

كتلها : اني محتاجة الشغل حيل واعرف احف وانظف بشرة واصبغ شعر بس مو كلش بالمكياج 

كالتلي اسويلج تيست صبغ اذا طلعتيلي اللون تشتغلين ويانا 

خلتني ع التجربة وخبطت اللها اللون وصبغته وطلعته كالت : زين راح يصير شغلج حفافة وتنظيف بشرة .. وصبغ ويا ام علي .. 

ومبدئيا يوميتج عشرة اذا اتقويتي بالشغل وشفت شغلج صدك ارفعلج الاجر وبعد انت وشطارتج 

- تسلمين

ابلش من اليوم 

- اذا ما عندج شي بلشي من هسه 

- ادللي 

اكو ٣ جايات حفافة .. 

حفيتلهن ادية خفيفة وسريعة بالحفافة .. وشسورت شعر كم وحدة .. وهي تراقب وتباوع شغلي .. من كملت العصر كالت : هاي يوميتج وتكدرين تجين يوميا من ٨ الصبح للـ ٦ العصر 

انت متزوجة ؟ 

- لا مطلكة 

- وين بيتكم 

- هاي هنا مقابيلكم قريب 

- هاااه زين اذا قريب معناها اكدر اعتمد عليج تفتحين الصالون الصبح وترتبينه 

- اي ما عندي شي ليش لا .. 

انطتني نسخة من مفاتيح الصالون  اخذتها وشكرتها ومشيت .. 

باوعتها اول عشرة الاف من شغلي الجديد .. 

طبيت بيها للاسواق اشتريت بيها كلشي بنفسي من الحلويات  والاجباس .. طلعت واني بيدي علاكة هاكبرها . 

خابرت حيدر وكتله : بديت شغل ويا صالون عشتار يوميتي ١٠ احسن منا كاعدة وكلت انطيك خبر 

كال : هاهية احسنلج من الكعدة والعزلة اللي انت بيها 

- شوكت تجي البيت وحشة 

- هاليومين ان شاءالله 

- فكرت من تجي نسوي عزيمة لاهل رقية اذا ابيتنا او ابيت عمي ما عزمناهم من يوم ما خطبت مو صحيح 

- والله يحتاجلها بس اني استحي اكل لعمي تعال اعزمهم وما اكدر اعزمهم بالبيت ومحد بيه 

- مالك علاقة خليها يمي .. اني ارتبها 

- جا خوش انت رتبيها لبين ما اجي حددي يوم نعزمهم بيها 

- ان شاءالله يلا حبيبي اخذ راحتج واذا تحتاج شي خابرني 

- ديري بالج على نفسج 

- ماشي حبيبي 

سديت التليفون من عنده .. وتنهدت 

اذا مو هيج واجامل الكل مراح اكدر اعيش 

لازم ارجع اوكف على رجليه .. وابني روحي بروحي . 

سبحت وعدلت نفسي ورحت على بيت عمي بنفس الفرع مالتنا .. ما ايرد امعد لوحدي واصفن واستذكر نفسي اريد اختلط التهي انسى اطلع من القوقعة اللي قوقعت روحي بيها وصورت لنفسي مالي سبيل بهالدنيا غير حازم وبيته .. والحقيقة ما دام النفس موجود والله فوك كلشي ممكن ينعاد وتعيش احسن من كبل اذا ردت واجتهدت . 

كبل لا اوصل شفت رسول بالباب كال : ما دام اجيتي نروح ع الموبايل تشترينه لو لا 

- يلا 

- امشي 

خذاني ورحنا اشتريناه بخمسمية وب٥٢٥ الف صار اخذته احس اشتريت اله عجيبة .. مجرد ما امرر اصبعي كانما صوت مي .. وجهاز يجنن وكامرته تموت 

حيل فرحت بيه ورجعني رسول واني راسي بيه 

كالي : دشوفي شراح اسويلج بيه 

اخذه من عندي وحط وكام يمعمر بيه وكال : هاج حطيتلج بيه انترنت هسه شوفي مو ادخلين هاذ اسمه يوتيوب بيه كلشي ابالج 

- شنو كلشي ابالي حتى صور خياطة يطلع 

- باع هاي صور خياطة ام الجعج .. اكلها كلشي تفكرين بيه يطلعلج 

- بالله اكتبلي عمار كوسوفي صدك يطلع 

كتب كال : هاج هاي شوفي 

- ياااا شني هذا ولك والله حلو منين اكتب 

- باعي هذا يسمونه كيبور بس المسي الحرف ينكتب 

مادة اصبعي واكتب صبا .. صدك انكتب 

كال : تعاي بعد هاي .. هذا يسمونه سوق بلاي يعني سوق الالعاب يا لعبة ابالج تعجبني اتنازلينها كلها ابلاش 

- خرب ببليسك من زمان وكلي اشتري شلون ونسه هذا 

يصيحونا على اكل واني عقلي اتركز بالتليفون 

كتله : زين اذا اروح للبيت هم نفس الشي عادي اشوف وهاي 

- لا مو هنا ربطتلج ع الراوتر مالتنا بيه نت انتم ما عدكم 

- شنو هذا الراوتر 

- منظومة مال انترنت لازم تشكلينها يلا يوصلج نت 

حجه عمي : خب صبااااا 

- ها عمي 

- احاجيج يا عمي انتبهي 

- والله يا عمي هذا المصكوع صكعمي بهالطركاعة هاذ اي كول 

- اني راح ادزن ناس على حازم .. اطالبه بحاضرج وغايبج خو هذا حكج 

- متنازلة بيهن عمي ما اريدهن لا تروحله ولا ابد 

- شلون حجي هاذ وتعوفين حكج 

- اذا ع الحقوق الي بذمته كومة حقوق .. واولها يبريني من التهمة الطعنوني بيها اهله وكرابته وبدل ما ينصفني يطلكني ويظلمني .. ما ابري الذمة لو ما طلعلي حقي وبراني كبالهم . 

- هسه هاي شي وفلوسج شي ثاني انت محتاجة 

- ما محتاجة غير رب العالمين واحس الله فاتحلي باب ومسهلي طريقي ورايدني بس اسعى حتى يوفقني .. فما رايدة اطلب شي من غير الله. 

- وتعوفين حقج 

- الله ما يعرف حق واشوفن يوم بحازم 

هدى : عزا العزاج هلكد حقدتي عليه 

- لو جنت مذنبة ما حقدت بس من اتعاقب وانطرد واني صاحبة الحق وهو المتكفلني وما جابلي حقي .. احقد اي .. وبعمري ما احن عليه . 

- الله ما ينسى عبد .. يعني اعوفها .. ما ادز احد

- لا لتدز 

- زين راح تظلين كعدتج وين رتبتي وضعج يمي يم حيدر 

- حاليا كاعدة يم حيدر 

- حيدر بس يتزوج عمي يكلج الله وياج مو صاحب طويلة 

نزلت راسي واتنهدت : ادري عمي .. شسوي الله موجود 

- اني ابالي شي بس مو وكته .. بالاول كومي لحيلج وخلصي عدتج وبحيل الله سهلة . 

- شنو هو 

- هسه الله كريم اكضي العده ونسولف وكتها 

ضحكت : شنو شايفلي عريس عمي ؟ 

- جا شناقصج شو بت مثل الكمر وصغيرة وشابة المن ضالة عمي 

- كول يا الله عمي .. بعدني عدك ما مخلصة .. وكمت ادورلي رجال 

- احسنلج عمي بس كون رجال يصونج يريح بالج مو هيج ياهو الجان .. هسه هذا الحجي مو وكته الله كريم سدي الموضوع وكملوا ملاعيبكم هاي 

صفنت .. من هسه يفكرون يزوجوني ويخلصون مني 

لا هواي خلوني اشوف روحي واوكف على رجليه . 

انداريت لرسول كاعد يمعمر بتليفوني : انت شكاعد تسوي 

همسلي : نزلتلج فيس 

- وشنو هذا الفيس ؟ 

- لا تكولين لاحد منزلته 

- هسه غير اعرف شنو هذا 

- وجوه الله كلها بيه 

- عزا العزاك كون ابو راس انت شكاعد تسوي بيه .. شنو وجوه الله 

- هسه دكليلي شسميلجياه 

- هو شنو 

- صفحتج 

- صفحتي شنو خب احجي عدل ما افتهم اني 

- باعي هذا موقع كل العالم بيه ناس كن كل البلدان ينشرون ويسولفون 

- عليك العباس 

- والحسين حلو بس لا تكولين لاحد مسوية فيس 

- ليش 

- يستنقدون جيف بيه هواي ناس 

- يعني هو بس للزلم 

- لا بيه بنات هواية ليش بس انت لا تكولين .. هسه اختاري اسم 

- صبا غير اسمي 

- حتى من باجر ايدكولج طبل صبا مسوية فيس باسمها 

- يعين هو عيب عليك العباس جا لا تسوي لا تجيبلي مصيبة 

- خب مو عيب بس لا تكولين دحجي شسمي .. اجتي كعدت هدى همست : ها هم سوالج فيس 

- والله بالعباس ما عرفه شنو هاذ 

- حلو ولج تتونسيني بيه سوي حتى اضيفج بس لا تكولين مسوية عليج العباس 

- هذا رجلج راح يحرفنا بالعباس 

- يمعووودة دخل ننحرف 

اندارلها : ها هااا هي شنيييي 

- اي جا يلوكلك وما يلوكلي 

- خاب لا تخليني الخج ادير فجج احجي عدل لا امسحه والله . 

ضحكت وكتله : هسه دعوفها وسميلي 

- اسمي من يمي يعني 

- لا ما اصق باسمائك .. انت شمسميته 

- الاوتار الحزينة . 

- لا اريد دموع الورد 

- واحطلج صورة عمار كوسوفي خب صبا انت والله قديمة 

- هسه اني احبه يا اخي انت شعليييك ؟ 

- هسه دموع الورد ؟ 

- اي 

سمالياه دموع الورد .. وحطلي صورة بنية دايرة وجهه كال : هاي قراصتها مثل قراصتج الاكبر من راسج 

ضحكت : تروحلها فدوة لا تعيب على قراصتي 

- دهاج هاج .. بعد انت 

دخلت وكمت اباوع كاتبلي اشخاص قد تعرفهم 

محمد اخو حازم وولد عمه .. يا يا يا صحام الصخمك يرسول ذوله بس لا يعرفوني ويشوفوني 

- اي مو حاطه جهرتج ويشوفونج 

- زين شلون عرفوا اذوله اشخاص اعرفهم 

- ع الرقم اذا هم مسجلين رقمج او انت مسجلة ارقامهم .. يطلعولج هم والمقربين منهم 

- يا يا هذا فضيحة خاب خفت 

- لا حلو بس ادخلي كروبات .. 

- شنو يعني كروبات 

- كروب يعني مجموعة .. ناس متجمعين بكروب او بمحادثة وحدة ينشرون ويسولفون 

- لا لا عيب ما اريد احد يعرفني 

- براحتج 

كمت افتر على اصدقاء قد تعرفهم وادور بصفحاتهن واشوف شلون ناشرين .. زين رسول هاي شنو الايد المسوية اوكي ؟ 

- هاي اعجاب

- يعني الاحطه عليه معناها اني معجبة بيه 

- اي فيدخلج يراسلج حتى يتزووج 

- يا صخام احذفه احذفه عليك العباس يمه اعجاب شني . 

- خب اعجاب يعني انعجبتي بالمنشور مو بصاحبة 

- والمنشور شنو 

- عاي الصورة مو منشورة يسمونها منشوووور اكلج صبا احذفي انت اتعبين 

- لا عوفه .. خل اشوف بعد بس ما انطي اعجاب لاي بشر عيب 

- عفية 

ضليت اكلب بيه واتمعمر .. 

شو ما احس ال اشيل راسي اشوف عمي مدد بفراشه 

بيش الساعة اندار .. الساعة ب١ ونص 

يا صخام الصخمني هذا صدك ياخذ كل الوكت .. 

خل اكوم اروح حجه عمي ي باتي الليلة هنا لا تروحين 

- لا عمي باجر لازم من الصبح اروحن للصالون وغراضي غاد 

سلمت وطلعت .. وطبيت للبيت قفلت الباب وحللت وتمددت فراشي كلبت شو كام ما يشتغل الفيس ما يحمل  يكلي ماكو انترنيت 

بس لا ما يشتغل بس عد بيت عمي . 

ضميته جوا راسي ونمت .. 

ثاني يوم من السبعة كعدت سبحت ورتبت نفسي ومشطت .. وتعدلت ومشيت للصالون .. فتحته اني اول وحدة جاية رحت للحمام خذيت السطلة .. ومسحت الصالون كله مسحت الميوزه .. وهلكت التلفزيون ع القران واني اصفط بالغراض 

اجتي عاملة وياي .. سلمت وكعدت تسولف 

كالت : متريكة 

- لا والله 

- اروح اجيب ريوك واجي حضريلنا الجاي 

- زين 

رحت ادور واسوي الجاي .. اجت زبونة .. رايدة احفافة بس مستعجلة 

طفيت الجاي وبلشت بوجهه اجتي ام الصالون شافتني اشتغل كالت : لعد نور ما اجتي 

- لا بس راحت تجيب ريوك 

اجت وكفت يمي تباوع شغلي هزت راسها وطبطبت على ظهري وراحت حمت الجاي .. اجت نور وسون الريوك اني كملت البنية لكيت اثنين وراها 

حجت مديرة الصالون : تعاي اتريكي هسه كملي وكومي 

كعدت سويت لفة وهي كامت للبنات شافتهم شيريدن .. شربت جايي واني اسولف ويا العاملة الثانية ع التليفون 

كالت : اكو نت هنا اذا تريدين احطلج 

- اي والله يا ريت .. 

حطتلي .. بس ما كعدتله لان مديرة الشغل موجودة خذت كوب الجاي وكمت للبنية كتلها : احفافة مو 

- اي والله 

- يلا هلا بيج 

كعدت ع الكرسي كبال المريا .. واني شغلت بالتليفون اغنية وكعدت اشتغل والاغنية مشتغلة 

حجت مديرة الصالون : اكو اغنية اسمها تغمض عيوني شوكت شايفتها 

- اي سامعتها 

- اشكد تشبهين البنية اللي بيها 

- صدك 

- اي والله نسخة منها سبحان الله شعرها جسمها حتى دورة الوجه 

- ما ادري والله 

- عندج اطفال 

- لا والله عاجر ميصير عندي 

- صدك 

- اي والله 

- ما راجعتي يعني شفتي شنو الخلل 

- تشوه خلقي ما عندي رحم 

- الحمدلله .. يلا يمعوده احنا الخلفنا شحصلنا بس تعب وداعتج 

- الحمدلله على كل حال . 

- شوكت اطلكتي 

تحجي وهي كاعدة ع الكرسي كبالي  رجل على رجل واني احف للبنية : صار شهر ونص تقريبا 

- ها يعني جديدة 

- اي والله لهالسبب دورت شغل 

- كعدتي ويا اهلج 

- ويا اخوي 

- الله يقويج ان شالله شتحتاجين احسبيني اختج وادللي 

- فدوة لعينج ما تقصرين . 

كملت شغلي .. 

كالت : هيج ايام احد ثنين ثلاثاء يكون الشغل خفايفي 

التعب الصدك الخميس والجمعة والسبت ما نلحك نحك روسنا 

- سهلة ان شاءالله 

- اشتغليلي شعر هاي المرية .. بس تريد تغطية للشيب وساوي ويا شعرها 

وكفت للحجية .. خبطت وبديت اصبغلها 

مديرة الشغل استساغتني تكلي وجهج بيه قبول ادخلين الكلب بساع بسوالفج والسانج 

- يا بعد كلبي تسلميلي 

خلصت شغلي ب٥ كالتلي : اذا تحبين روحي بعد اخذي راحتج 

مشكور 

كعدت ع الكرسي ولزمت تليفوني لان هنا نت حتى انزل العب اكثر .. 

بس شفت رقم خمسة احمر .. 

دخلت .. مكتوب ( طلبات صداقة ) 

خفت اتقرب منهن .. عفتهن وكمت لبست حجابي سلمت وطلعت ..

صاحت وراي .. انطتني يوميتي شكرتها ومشيت 

ضليت امشي ع الشارع ومدنكة راسي .. رفعت راسي هيج كاعد اباوع وراي .. والكا حازم وصاحبه واكفين اباب المحل يسولف وياه .. 

اهتزيت كلي من فوك ليجوا من شفت وجهه كبالي 

خوف على ارتابك على شعور ما ادري شلون اوصفه .. 

ردت انزل من الشارع واعبر لذاك الصوب وعود ارجع اعبر لفرعنا من اتعداه .. بس كلت لا .. ليش اشرد واخاف اني شمسوية 

عدلت مشيتي ومشيت هو كاعد يسولف ويا الرجال .. من بعيد باوعلي بس ما عرفني لان ما لابسة العباية ، من اتقربت وصار وجهي كباله .. عرفني بسرعة اتعديته وهو راسه اندار وراي .. 

خليته وراي حتى ما انداريت ودخلت للبيت 

بس كلبي صار طب وجسمي كله كام يرجف .. رحت للبيت كبل .. طبكت الباب وراي وذبيت الحجاب من راسي ووكفت كدام المرايا .. اتنفس بقوة وكاضة كلبي 

... الله يطلع حوبة كلبي بيك ان شاءالله 

انت واهلك .. يحركم مثل ما حركتوا كلبي وخليتوه رماد . 

اندكت الباب .. تنهدت 

منو ممكن يدك عليه الباب هسه !؟ 

اصلا بابانا ما يندك ما مختلطة ويا احد وحيدر ما موجود 

صحت : منووو 

: افتحي 

عقدت حاجبي الصوت مو غريب بس ما عرفته 

اخذت حجابي حطيته على راسي وكمت اريد افتح الباب حتى اعرف منو صاحب الصوت ... يتبع