ظهرية وهستوني متمددة كاضة تليفوني واكلب بيه .. 

وحازم متمدد يمي جاي من الدوام ونايم .. 

دك تليفونه شو هذا هو كعدة هو فزة من الفراش هو وكفة على طولة بحيث فزيت وياه صحت : اسم الله هاي شبيك .. فززتني

رد ع التليفون بدون ما يندارلي .. 

ضليت اباوع عليه .. بسرعة كام يصيح وما كاعد افتهم شبيه 

فزيت من مكاني وكمت واني اگله : حازم شبيك ، شصاير

كام يهدد بالتليفون وذباه وجر دشداشته لبسها وخذا تليفونه ونزل يركض .. نزلت وراه اركض .. علي كاعد بغرفته شاف ابو يركض نزل ورانا .. 

وحازم يصيح : كتلوها ولد الجلااااب اليوم انعل والديهم والعباس 

- كتلوا منو حازم بس اوكف دقيقة فهمني 

- ولكم بتي رااااااحت كتلوها 

حجاها وطلع من البيت .. لطمت على وجهي : اسم الله ربي الستار 

علي : شبي شني كتلوها ؟ 

- كاعد يكول كتلوا بتي 

- شني كتلوا بتي يعني كاتلين دنيا 

- اي احتمال ضاربيها عيالها ورايحلها 

طلع علي من البيت واني جريت حجابي ووكفت اباوعله راح يخابر ومشى لبيت خواله .. خبر امه وكاللها: ابوي مخابرينه كاتلين دنيا 

فازة هي لابسة عبايتها وطلعت تخابر تريد حازم يرد عليها ماكو 

طلع محمد وعمتي .. يخابرون عليه وهم ما يرد لحد ما جاوب على محمد وهو يصيح : كتلوا بتي موتوها ولك يكلي حاطين طلقة براسه ولك خوية 

تخبل محمد وكاللنا يمه وكفت كلوبنا 

كلها كضت سياراتها وطلعت هجت ورا حازم و امل راحت تركض حافية وتصيح : ادخيلك ربي بتي راحت يمة الحكيلي ولج يمه راحت بتييييي 

صعدوها وياهم بالسيارة وطلعوا .. 

اني واكفة بالباب ومصطكة من الخوف ودموعي تجري .. 

اجوي نسوان بيت عمهم وكفو كدامي : شوكت راح شوكت 

- هستوه فز ورد عليهم وراح يركض 

- شكالوله ؟ 

- ما ادري هو سمع وكام يصيح ويهدد حتى ما افتهمت من صياحه شي احاجي ما يجاوبني 

- احتمال ما كاتلينها هيج باسطينها شني يمه هيتة يكتلون بت وراها اعل وعمام شمسوية قابل 

- والله خية ما ادري 

اجتني ام فراس تركض : خايبة ها شني رجلج شماله 

سولفت الها كالت : دخابري خابري افتهملنا منه شني كاتلينها خاف مو كتل 

حجت مرت ابن عمه : اني هم اكولن هيج خاف هم سامعين غلط 

كمت اتصل بحازم اريدهي رد ميجاوبني .. 

غير كون الواحد يهنله يكعد لو يرتاح ويبرد كلنا واكفين وندور ونفتر نريد نعرف الخبر الصحيح 

رد عليه علي ورا اقل الساعة وهو يبجي ، صحت : ها ولك علي كول شبيها اختك 

- كاتلينها دنيا ماتت 

ويبجي بصوت عالي 

صرخت : يمممه عزا العزاني وليش ليش كاتلينها شسوت 

احجي ولك ليش كاتلينها 

التمن عليه نسوان عمه و جيرانه وهن يكولن 

: شنو ولج كاتلينها حااااجينا 

نزلت التليفون وكتلهم : كاعد يكول كاتلينها وهم هسه بالمستشفى 

لطمن على وجوهن واني بادن رجليه وكعدت ابجي .. 

وهن يتصارخن ويصحن : يا مصيبتك يا حازم .. عزا العزاج امل بهالمصيبة هاااااي يمه . 

نصبناها مناحة وبجي .. 

كضتني ام فراس وكالت : ادري بحالج خالة والله يعينكم على مصابكم بس كومي قفلي غراضج خالة الناس راح تجي والبيت راح يمملي كومي .. لبسن ما نتبين خبرهم ويوصلنا طارشهم همي حيلج بنيتي 

كمت مسحت الدمعة من عيني ومشيت .. قفلت غرفتي .. ومشيت على غرف الجهال .. شفت غرفتهم .. شكد انقهرت معقولة ماتت هاهية بعد متمر منا وتنام هنا وتدلل ومتكعد ومتنزل .. شسوتلهم وكتلوها .. ما كاعد اصدك فكرة كتلها احتمال بعدها عايشة مستحيل تنكتل بهالسهولة ليش تنكتل. 

واني فوك سمعت صوت حازم ووياه زلم هوسة وعجة وصياح 

ركض هو ع الدرج رايد يروح للغرفة ويصيح : هددددوني 

وهم يكضون بيه ويصيحون : حازم اهدا مو هيج تنحل الامور ، حازم بس كض رووووحك 

وهو يجر بروحه منهم ويصيح : ولكم كتلوا بتي وتريدوني اسكتلهم وحك هو العباس اليوم اخلي جثثهم تاكل بيها الجلاب .. 

- والعباس ما نعرفهم بس لا تستعجل خلينا نفكرلهم بعقل حازم .. يا خوية بس انززززل 

ما نزل ودفع بالباب مقفول 

اني واكفة بس مرعوبة وبمكاني اباوعلهم وابجي 

صرخ عليه : مفاتيح البااااااب وين 

- ما تطيكياه حازم اسمع ، خلينا نروح ندفن البنية ونقيم عزاها ونرفع رايتها البيضة .. وبعدها نكعد ونعرف شنترف وياهم 

- وادفن بتي وجتاااااالها عاااايش ... انتم عاقلين مسودنييينين ما اخلي يشم الهوى والعباس اطينيييي المفاتيييح 

صعدله امه وام فراس .. وكامن يجرن بيه ويحبحبن ويتباجن وهن يتوسلن بيه ينزل ويعوف السلاح والاستعجال . 

كضوا ونزلوا واني نزلت وراهم 

كعد ع الدرج منزل راسه ويصرخ : كتلوا بنيتي يا ناس كتلوها 

وينحب ويهتز جسمه كله وياه من النحيب 

وكلها تبجي على بواچيه . 

شالوه وسندوه يوكف وراحو بيه للمستشفى .. 

انتظروا يحللون الجثة .. وكملوها وخذوها جابوها للبيت بالتابوت .. 

امل فاقدة ع التابوت وحسها مبحوح وبس حاطة راسها 

وحازم كاضينة على صفحة وكوا لازمينة وموكفينه 

منتهي كلش على بته ، خالاتها وبنات خالها وخالتها كلهن يصيحن ويبجن على تابوتها 

علي واكف على صفحة ويبجي بقوة 

وسجاد واكف يمه ويبجي بصياح وهم يباوعلهم 

اني واكف وحاطة حجابي على خشمي وابجي بلا وعي بصريخ 

حالة صدمة موتها مكاعد نستوعب دنيا ميتة وهذا تابوتها كبالنا 

شالوها وشيعوها وطلعت بتشييعها 

اخذوا الفرع كله وهم يصيحون : 

لا اله الا الله .. محمد رسول الله 

وحازم وعلي ومحمد ووولد عمهم الشايلين التابوت على ظهورهم ويمشون بيه ، شاله الجناز وصعد التابوت فوك الكوستر .. والنسوان تبجي وتتصارخ براس الشارع 

المنطقة كلها طلعت ويانا بزلمها ونسوانها وجهالها 

وكلها تبجي . .. 

طفلة صغيرة يطلع عمرها ١٥ سنة تنكتل بحجة غسل عار 

مصيبة وفاجعة هي شتفتهم حتى تنكتل بدال ما يماعدوعا يعلموها يربونها ينصحونها .. لو يدزونها لاهلها يربونها ويعلموها .. يكتلونها هيج بدون ذنب 

زانية .. لا ؟ 

جايب واحد لبيت رجلها لا .. 

غلطت وردت على خطيبها القديمة .. غلط بس مو عقابة القتل ! 

والذنب مو ذنبها بكد ما ذنب اهلها اللي رضوا يزوجوها بهيج عمر لان غلطت كم مرة وتعبتهم فبتفكيرهم يزوجوها حتى تعقل وتنستر وتبطل هالسوالف ! 

هم الما يربي بزره ينتظر من الناس تربي وتعقله ؟ 

ومنو المستعد يربي بزر غيره .. ما راح يربي راح يظلمه باعتباره ما متربي .. والسبب اهله ! 

مو يكولون

الما يسوگه مرضعه سوك العصى ما ينفعه ؟ 

ركبوا بسيارتهم وبالكوستر وطلعوا للنجف .. بنص الليل تقريباً جانت الساعة ب١١ بالليل . 

اني ما رحت وياهم للنجف .. 

رجعت للبيت ضليت كاعدة ويا النسوان التبجي ابجي وياهن .. 

وخابرت على منى كتلها وخابرت على مرت عمي وبلغتهم .. 

ولد عمهم نصبوا الجادر بالليل .. 

ورغم جانت الدنيا ليل بس ناس كومة تجي وتعزي وتسال وتستفسر .. ويكلولهم مخابر عليها خطيبها القديم ومجاوبته رجلها من داري مجاوبته كايم وكاتلها . 

كلها مقهورة ع الحادث لان بنية صغيرة مال تتعلم مو تنكتل بهالطريقة .. وكاموا يلومون باهلها .. ما عدهم خبز .. اكو واحد يزوج بنية هلكدها عمي الدنيا اطورت بت ١٥ ازوجها شني تعاجزت منها يحازم واطيتها .. شو هالوحيدة عدك .. جا خليتها تكضي دراستها تشوف مستقبلها رحتو اطيتوها وزوجتوها هي مال زواج بهالعمر هي تحتاج الي يربيها .. مو تتزوج وتخلف وتربي .. 

ناس تصيح لا مو نسوان اول جانن يتزوجن وهن بعمر ١٢ و١٣ .. ومشن عدل وما سون ولا غلطن 

يكله تجيب نسوان كبل الحد علمهن الزرع والمحصول 

لبنات هسه الما شايفتلهن لا مسلسل تركي ولا عايشات على قصص الحب والعشك ويتعشمن بيه ويحاولن يعيشن قصص حب مثلهن ويتمنن  خو التليفون و الانترنت الطبن علينه مصيبة خبلت الرادم .. هسه عمي الوكت تغير والاخلاق تغيرت والناس تغيرت .

لل٣ بالليل واني واكفة بالمطبخ .. واخدر جاي للنسوان وللزلم 

ووياي بنات كرايبهم .. 

غير كون الناس تروح تنام تعبنا .. 

ماكو ب٣ والناس بعدها تجي حرام محد نايم .. 

لل٤ نمت واني كاعدة بالمطبخ 

كعدتني ام فراس : كالتلي امشي نامي بغرفتج خالة ارتاحي 

عفت البيت وصعدت وقفلت الغرفة عليه لـ ٨ الصبح 

كعدت خابرت على حازم ما رد عليه .. 

خابرت على اخته 

جاوبتني كالت اتخربط عدنا غاد ونقلناه للمستشفى 

- وهسه انتم وين 

- بالمطعم نزلنا ناكللنا لكمة من امس ما حاطين شي بحلكنا نخلص ونرجع لبغداد 

- وحازم وين 

- بسيارته محمد يمه 

- يعني زين هسه هو لو مريض 

- حيل تعبان .. حضريله انت فراشه لازم يرتاح 

- بس خل يجي بالي كله يمه والله 

سديته منها وكمت نزلت جوا كفيت الريوك ونظفت البيت .. 

وبقيت دايرة ع البيت رجل بالاستقبال استقبل الجايات ورجل ع البيت ورجل ع المطبخ 

اجتني منى وسهى 

باوسني وعزني وكامن وياي ابيتي بالعزه .. 

لل١٢ تقريبا صاحو اجو .. 

الجيران والناس كلها دخلت البيتنا كبل لا يطبون الدفانة.. حازم طب لجادر الزلم كبل لا يفوت للبيت .. 

بس طبت امل تلكنها جيرانه وهن يلطمن وياها بفزاعية :

شلتي من وكت وسفة يالبنية .. وشلتي من وكت 

ما لايگ لج نوم الغريرية .. وشلتي من وكت 

... ولج ردي تعبتي امج يالبنية .. ولج ردي 

كامت امل تلطم على وجهه وراسها وهي تصرخ بصوت مبحوح 

كمت ابجي على حالها وهي تملخ بروحه وتشيل بنفسها وتذبها وتصرخ على بتها . 

صاح علي محمد واني واكفة اباب الاستقبال : صبببا 

انداريت وركضت بسرعة كضيت بايد حازم اني شفته وشفت وجهه وكسرت لو دموعي كامن يجرن عشرة عشرة اريد اشوف دربي وامشي بيه ما اكدر 

صعدنا بيه للغرفة فوك .. 

ومحمد يكلي : طلعيله ملابس بسرعة طلعيلا 

فتحت الكنتور بسرعة وطلعتله دشداشته السودة مال محرم .. ووياها الغترة البيضة .. خذيته للحمام .. كوة كعدته ما يرضا اطب وياه 

غسل وطلع لابس كاله : محمد ارتاح خوية ونام لا تنزل 

اشرله لا اريد انزل 

عاف الفوك ونزل جوا طلع بجادر الزلم .. 

وين نزلت حازم .. وزعوا اكل 

خواتي ونسوان ولد عم حازم هم الكاموا ياخذون ويوزعون للنسوان 

انترس البيت ترس من الكراج للاستقبال للممر للمطبخ للغرفة القديمة مالتي للدرج لصالة الدرج لغرفة الجهال .. بس غرفتي سادتها باقي البيت يغص ويبلع بالنسوان . 

اجتي الملاية للبيت .. وصار مجلس عزاء .. 

وصت الملاية بالسماعة رج البيت ونعاويها يشكن الكلب .. كابلت خواتي بالمطبخ وكمت ابجي 

والبنات لازمات القواري الكبار مال الجاي ويعزبن بالمعزايات .. 

طبت مرت عمي ووراها هدى وهي تلاجي من الباب : خييييية جذبناه الجايب علمك .. جذبناه 

كمنا اني وخواتي لاكيناها والنسوان وكفتلها تلطم وياها والملايا كملت وياهن على لطمنا .. 

ندستني اخت حازم : صبا حضري صينية للملاية اليوم يشيلون الجادر كومي 

- يعني مو لباجر 

- لا اليوم اذا عدج حنة خبطيها 

- لا والله ما عدي 

راحت للسوك بسرعة جابت حنة وجكليت و مصقول و بخور وتوتو وجيس مال تمر جبير .. احنا نصبنا صينية الختمة للملاية والبنات كامن يفلسن التمر .. 

ودزينا الولد حتى يجيبولنا خبز من المعمل .. 

جابولنا كصصنا الخبز بالسجينة مثل البيتزا وكمنا نحط بيه رولة تمر وكرفس .. ونلف الخبزة وسوينا منه صواني ووزعنا شي ع الحادر مال الزلم وشي على النسوان 

وسوت الملاية الختمة 

والبيت كام ما بيه محط رجل من كومة النسوان الترست البيت . 

صبينا العشا .. 

كضينا عمتي عازتني ووصلتني هي وهدى ومشن 

وخواتي سلمن عليه وراحن .. وراحت ناس بس اكو بعد هواي متروس البيت بيهم 

دخل حازم وصعده محمد للغرفة فوك 

ونوماه ع السرير .. واني صعدتله العشا 

ما جاسه ولا مد ايده للاكل .. منتهي كلش على بته . 

يريد يثور ويكضه محمد ويكله .. اصطبر ما ناسين امرهم نخلص عزا بنيتك ونندارلهم .. لا تخاف حكها ما يضيع . 

طلع منه محمد اني كابلته وكعدت دموعي تجري على حاله .. كضيت ايده كمت افرك بيها فتح عينه باوعلي .. كام يحجي : دنيا ماتت صبا 

حجاها واتجمعت الدموع بعينه 

ضكيت على ايده : والله راحت للجنة مظلومة لا تقهر بروحك عليها مو سهل صحيح بس راحت يم الارحم مني ومنك بنيتك يم الله لا تخاف عليها 

- ما اشوفها بعد ولج صبا .. بنيتي كتلوها

كام ينحب .. 

حطيت راسي على راسه وانحب وياه .. 

شفته متأذي .. مسحت دموعي وكمت اصبره واسكته .. 

كمت امرغلة اديه ورجليه تعبان منتهي كام يغفي .. لحد ما نام 

نمت يمه واني كاسرة المخدة وعيني عليه مكابلته 

لحد ما صارت ب٥ حسيت عليه يكوم .. صعد فوك السطح كلش حتى يبجي وينوح براحته .. ما يبجي كدام احد يستحي 

تركته شوية ونزلت كلت لامه تصعدله .

صعدت اله حضنته وبوسته ونزلته .. الزم من عمامه وولد عمه وعشيرته كلها التمت يمه بالاستقبال من الصبح .. 

كالوله : الشرطة معتقلة مسلم ( رجل دنيا ) وماخذته البارحة بالليل .. على حادثة القتل واحنه راح نرفع دعوى عليه ويتحاسب هذا مو غسل عار البنية ما زنت حتى ينغسل عارها .. منو ما يكول احد ملفقلها  عليها الكلام وكاتبه لخطيبها القديم ومنو اليثب مجاوبة صدك .. 

ونحتاج شهادة بشار يشهد النا بهالشي ضدهم وينكر واصلته هيج رسايل منها وينكر .. تواصلها وياه .. ونكلب السالفة عليهم 

حازم اعترض 

كاللهم بشار مهدور دمه .. واذا جنت لاهي عنه كبل وعفته يشرد 

هالساع بتي ماتت بسببه وراح انبش وراه بحفرة لحد ما اكتله 

كالوله : بس هيج يندار الحك عليك 

- يا حك هذا التحجون بيه ببتي ميتة انتظر الشرطة عسى ولعل ترضى تسجنه وهو كاتل بتي ؟ حجي هاذ لا ما اقتصيت منه بنفسي ما يشفى غليلي منهم . 

رافض كل حلولهم وشايل سلاحه .. 

وولد عمه فزعوا وياه .. وراحو دكو بيت اهل مسلم زرفوا بيتهم تزرف .. وهددوهم وطلعوا .. 

امل رايحة رافعة دعوة ومثبتتها على مسلم حتى ينسجن

اهل مسلم دزوا ناس واجتي شيوخ وعكل حولوا يم حازم حتى يطالبونه يتنازلون عن الدعوة .. ويحلونها بالعشاير .. 

حازم طالب من امل تتنازل 

وامل ما راضية .. تعارك حازم وامل على هالموضوع وامل قافلة ما تنزل الدعوى الا قاتل بتها يتحاكم .. 

تخاف لا العشاير يحسبونها غسل عار ويثبتونها .. وتخسر بتها 

رايدة تجمع كل الادلة والشهادات حتى تثبت براءة بتها من الخيانة والقتل الثار مو غسل عار . 

ابو الولد من ما راضين يتنازلون على الدعوى مال ابنه 

جاي وهاد ع المنطقة هو وعمامة ما خلوا كلمة طعن على دنيا ما ذبوها .. سووها مو بنية وسووها من كبل لازمينها وساكتين وابوها كو* وراد بس يخلص من بته 

متلاغين ويا عمام حازم وصاير بينهم معارك بوكسيات 

حازم ما جان موجود وكتها .. من راجع وسامع الحجي متسودن على الكلام والطعن الطاعن بيه بته وهو الراحلها بصباحية عرسها ونزل عدهم ورايتها بيضة ، هسه جاي تهم الميتة ويكول عنها جانت مو بنية ! 

اتحلفله حازم .. 

وولد عمه وعمامه كلهم وياه ويكضون لا يستعجل ويروح بيها 

لحد ما يوم .. اجا حازم دخل للغرفة ينام.. 

اجا محمد كال كلشي يصير انت اتشهدين تكولين مريض ونايم صاله يومين .. وعلي ابنه يشهد وامه .. لان بقت عدنا ورا الفاتحة الناس تجينا فكلنا علمونا نشهد حازم ما طلع من البيت مريض 

يا اخي شكو شصاير فهمونا 

ماكو شي بس اذا سالوكم حازم وين جان تكولون مريض ونايم وتشهدوله .. 

خفت اكو ورا الموضوع شي 

ومحد كاعد يحجيلنا شكو وشصاير 

حازم اساله ما يجاوب قهره صب على السانه كام ما يحاجي احد ولا يسولف .. واذا حجه يحجي بدم وثار .. 

سالته ودت ما جاوبني 

ماكو ورا يوم جنت كاعدة الصبح وعمتي نايمة بالغرفة الصغيرة وكاعد ابدل لبنونة حتى ياخذها علي للمدرسة .. صفت  دورية الشرطة  اباب بيتنا 

ركضت كعدت علي يطلعلهم ويكللهم : ابوي موجود ونايم مريض 

راحلهم .. واني مشيت كعدت عمتي: ولج عمه اكعدي شلون بحالي الشرطة بالباب 

- اسم الله علي شرايدين من عدنا يمه 

- ما ادير 

دخل علي كال : يكولون عدنا امر اعتقال على ابوي  

لطمت وجهي : اصخام الصخمني يمه دهر 

كامت عمتي وهي تصيح : ادخيلك يالعباس استرنا 

طلعت للشرطة وحازم نزل على صوت دورية الشرطة 

كضيته : وين طالع يكولون عدهم امر اعتقال حازم اكعد فدوة 

- جا اخليهم يدوسون بيتي دوخري 

- حازم عليك الله فدوة لا تطلع 

وخرني منه وطلع كمت الطم على راسي واصيح : ادخيلج يالزهرة الحكيني

طلعت للباب يكلوله عليك دعوى بغياب المدعو ( مزهر نجم حيال) 

كاللهم : مالي علم بغيابه ما ادري عنهم 

صحيح بينا والله ثار على كتلة بتنا بس كتالها مشتكين عليه ومخلين القانون ياخذ مجراه 

كايليله : عدنا امر باعتقالك لازم ناخذك هناك تسجل اقوالك يم الضابط 

كاللهم : زين بس ابدل واجيكم وتامرون امر 

طب وعمتي تبجي وتصيح واني اكله : راح يسجنوك حازم وين رايح للسجن .. وين مخليني .. عزا وصخام براسي 

- صبا ما عليه شي بويه بس اعدي ما اطول اطي اقوالي وارد لا تخافين 

- ولو جلبوا بيك كلي اني وين اروح حازم راح ينهجم بيتي عوف الثار كتلتني .. راح اموت حازم ما اتحمل يصير بيك شي كااافي ارواحنا تعبت من المصايب والموووت كااافي 

من شافني ما كاعد اهداء 

بدل وهو يوصي بعلي ابنه يروح على عمامه وولد عمه يلحكونه للمركز . 

نزل وصعد بسيارة الشرطة وطلع وياهم 

وعل راح خابر على عمه محمد من ما لاكي وماشي على عمامه .. 

بسرعة ولد عمه ماخذين سياراتهم ولاحكينه للسجن ومخابرين شيخ عشيرتهم ..

اهل مسلم فاكدين ابوهم 

يخابرون عليه تليفونه مغلق .. يدورون عنه ما هو 

رافعين دعوى بعد مرور يوم كامل على غيابه .. وتاهمين حازم بغيابه 

جاية الشرطة معتقله حازم 

ناكر هو اله علاقة بغياب ابوهم وكايللهم اني مريض ونايم ابيتي 

كايليله بس انت واهلك وعمامك مهددين المفقود بالقتل 

- هدننا لان اجا لمنطقتنا يطعن بعرض بتنا الكتلوها عدر اني صباح عرسها جنت يمهم وشايل الهم الريوك وبتي برية يكتلها بغسل عار ويكول عنها ما جانت بنية ! 

الضابط ما مقتنع 

شاك هم ورا القضية بس لايفينها .. وعدهم علم بغياب المفقود 

ذاب حازم بالسجن .. ورافع القضية للتحقيق .. 

اتخبلت من دريت انسجن .. انتهيت 

اجانا الضابط للبيت حقق ويانا كلنا شهدنا حازم يمنا بالبيت حتى بنونة وكفت بوجه الضابط وتكله : عمو هو انتم شعدكم ساجنينة هو غير بابا مريض ونايم فوك ما مريض ترا والله حرام عليكم 

كاللها : انت بته 

- لا بس هو مثل ابوي واني احبنه هواي والله عمو هو صاله هواي بس نايم وتعبان غير كاتلين بته 

ابتسم الصابط ومحمد كايللها : ما ضاع الربى بيج والله عفية 

حقق ويانا .. وكلنا على نفس القول صعار وكبار 

كتله للضابط : عليك الله خوية اطلعونه لو راح ينسجن والله هو ما مسوي شي واحنا مالنا غيره 

- انرفعت القضية محكمة اختي واذا ثبتت برائته راح يخلون سبيله اكيد 

وكلنا محامي شاطر 

جان يشتغل قاضي وجان القاضي فترة بمحاكمة صدام حسين 

عنده فريق مال محاماة وهواي نصحونا بيه كالوا شاطر عاد وكلناه بالقضية ، وكلناله شكد ما تريد فلوس ننطيك بس طلع النا حازم 

اتوكل القضية ومشى بيها 

بس اجرائات المحكمة كلش بطيئة .. بين جلسة وجلسة بالشهر وشهرين وبكل جلسة القاضي ياجلها لعدم كفاية الادلة .. والمحامي مال اهل مسلم هم شاطر 

جرجرها 

شهر ورا شهر .. وحازم بالسجن 

ذبلت كلش بغيابه .. حيل كسرني .. بيتي فرغ محد كاعد وياي غير علي وعمتي .. 

علي لزم المولدة مال ابوه والمحل بس بمساعدة محمد لان علي صغير لا يعرف بسوالف الاستيراد ولا الشره والبيع جان حازم متوكلهن .. وهو بس يوكف يلزمله شغل من غاب حازم صارت المسؤلية على علي .. 

حتى سيارة حازم كام علي يركبها 

رغم جان صغير يطلع عمره ١٤ سنة  بس طويل وكاعد يجر بضخامة ومتعلم ومتربي على ايد ابوه يعرف منطق الزلم ويعرف يتعامل ما تحسه طايش وجاهل .. حتى من يسولف تحترم كلامه 

جان حازم ابد ما يخلي يكعد بمجلس نسوان لو يخالط نسوان حتى لا يتخنث وياهذ سوالفهن لو يكوم يتمضيك ويتنعوص .. وعلمه ع الشغل من هو بعده ما داخل مدرسة ياخذه وياه للمحل ويسخره ويحمله باللي يكدر عليه وكام شما يكبر يزيد عليه بالمسؤلية 

لحد ما انسجن حازم 

علي اخذ دور حازم بالبيت 

هو يتسوك النا هو يجيبلنا النحتاجة 

ما عشت بحاجة شي من هو بالسجن .. بس كلشي بدنيا جان ما يعنيني وحازم مسجون 

٧ اشهر مرت على سجن حازم 

لا عرفت الكحلة ولا الحمرة .. مو اخجل من احد وخاف يستنقدني .. لا بس كل خلك ما الي شعراية من حاجبي مالي خلك اشيله واني الجانت ايدي بوجهي حرام ما اخلي شعراية بحاجبي تنبت كل عصرية المرايا بيدي واباوع وجهي يس من انسجن احس انطفى خلكي .. ماكو شي يسوى ازين نفسي لو اعدلها .. حتى لو لنفسي .. لان اصلا كارهه روحي وهو ما موجود. 

ما رحت زرته غير مرة وحدة بعد كومة تواسيل من محمد يلا رضا علي ياخذني .. وصدك رحت زرته .. ما شفته هلكد ما عيوني ما سكتن من البجي 

بس وصا علي ابنه عليه كاله : بابا صبا امانتك تصيرلها مثل ما اني صرت لا تعوفها .. مالها احد غيرك بعدي .. دير بالك عليها ابني .. لا تعوفها . 

بهالفترة عمي يروح ويجي عليه خاف محتاجة شي 

حيدر صالحاني ويخابر خاف محتاجة شي 

بس اني جنت اجانل بعلاقتي وياهم 

واشكرهم واكلهم ما محتاجة شي . 

جنت متأملة حيل بالجلسة هذا الشهر 

واحسبلها يوم ويوم ونذرت طليان اثنين واحد لام البنين والثاني للامام علي لو طلع حازم بهالجلسة سلامات .

يوم الجلسة ردت من محمد يخليني اروح للمحكمة احضر بس ما خلاني .. بس خذا عمتي وعلي وراحو .. 

ضليت افتر بالبيت وانخي الله واهل البيت يجيني الخبر وافرح . 

مرت ساعتين .. 

واني الوب اخابر عليهم ما يردون 

كمت اخابر على محمد مرة مرتين .. 

رد عليه : ها صبا 

- ها محمد عليك العباس شني ترا انكطع كلبي 

- والله يا صبا ما ادري شكلج 

- شني احجي لا تعلعلني 

- ماكو القاضي حكم بسجنه 

- عليك الحسين .. دكول والعباس 

حجيتها ودموعي يا سرع مجراهن .. شلون محمد مو اطينا كوم فلوس للمحامي وكال راح يطلع وطمنه جان يجذب علينا .. كلي عليك الله محمد صدك يعني انحكم هاي 

- اي والله انحكم ، هسه مشغول هاج هاج بعدين اخاربج احجي ويا امي 

اني كالي انحكم يا امه يا احجي وياها 

كمت من مكاني واصيح : ليش يا ربي ليش .. بس هالانسان عدي وتحرمني منه .. اخ دخيلك ربي 

اجاني صوت حازم : لا تبجين بابا هذا يجذب عليه 

فزيت من مكاني : حازم هدا انت عليك العباس .. هذا انت ؟  

- اي اني حازم وانحكمت براءة وراح اطلع واجيج طمني كلبج عليه يابه 

من حجاها كعدت من حيلي وكمت ابجي بعياط 

كال : دموعج ياذني صبا .. لا تبجين هاي اني راح اخلص اجرائات السجن واجيج 

سديته من عده .. وخابرت على حيدر جان موجود ابيته 

كتله : ناخيتك حازم انحكم براءة .. ورايدة ذبيحة نذبحها جوا رجله بطلعته فدوة 

كال : ميخالف هسه اشتريها واجي وعود من اجيج اطيني افلوسها 

- اي والله بعد اختك 

خابرت خواتي بشرتهن وخابرات جاراتي وكرايبة طرت من الفرح طرت احس روحي صرت بخفة الريشة 

وركضت للحفافة حفيت وجهي كله .. وكصيت شعري ورجعت للبيت غسلت البيت و حضرت الاكل لجيته وحضرتله هدومه وكلشي وكلبي طاك على شوفته احس بروح كاع صبخة وتتنطر الماي بجيته . 

ترست البيت ريحة عطر وبخور .. 

وفرشته وحضرته وعطرته واني والبيت جاهزين لجيته 

حسين وبنين على واهسي طايرة كلوبهم وكاعدين بالباب يتنطروه 

لحد ما دخلاو وهو يصيحون : اجا 

يمه طار كلبي كضيت الحجاب والعباية وطلعت اركض 

ولد عمه واهله وجيرانه وكرابته كلهم تلكوا .. بهوسات ومهاويل 

واني من الحوش اهوس وادبج على صوت مهاويلهم ودبجاتهم والفرحة ما واسعتني ، واصيح : هلا بيك هلا وبجيتك هلا 

وذحوا ذبيحة جوا رجله .. 

يمه دخل للبيت وشفته واني ذبيت روحي بين اديه وبوري دموع انفتحوا بعيوني .. مصدكة اني حازم بين ادية .. مصدكة رجعلي وراح يبقى وياي وما يفتركني .. مصدكة كلبي رجعله ولفى وانتهت ايام فراكه 

اشمشم بيه وادوره واحضن بيه بلهفة وابجي 

باس راسي وكالي : يمج ما افاركج بعد وعيونج .. لا تبجين عيون 

مسح دموعي بيده وحضني ودخل للبيت .. 

دخلوا ولد عمه وكرابته للاستقبال وهو دخل وياي للمطبخ 

سلم على خواته ومرت محمد وكرابته .. 

ومشى للحمام اني محضرتله هدومه كاملات هو يسبح اني جهزت صينة الاكل طابختله تشريب لحم ومسويتله تمن برياني و عليه هبرة لحم وكاسة ثريد ولبن و بصل وزلاطة وخضرة وفاكهة 

بس طلع حطيتها كباله 

وعيوني تتلامع بشوفته ابتسم وهو يباوعلي 

حجه : ضعفانه 

- حيلي خذته وياك يا بعد حيلي مو بس جسمي ضعف حتى روحي بادتت بفراكك 

ابتسم ومد ايده للاكل .. 

وولد عمه يحجون وياه 

مشيت جبت صينية الجاي وكعدت بالكاع بسده 

صبيت جاي للكل وانطيت وهو يسولف الهم المر وياه بالسجن والمواقف

واني كاعدة ورافعتله راسي ومركزة بوجهه وتفاصيلة وفاصلة فيشة من وسوالفه موضوعه .. دنك يمد ايده للجاي ياخذه انتبه عليه .. سوا حركة وكرص خدي وابتسملي .. كدام الكل 

حيل خجلت.. وفرحت بنفس الوكت 

كالي ابن عمه : اليوم عيدج يابه زلمتج رجعلج 

- اي والله عيدي 

- كرة عينج برجعته ان شاءالله 

طب سجاد كاله : بابا جماعتك جايين عليك 

فزينا احنا النسوان بساع وكمت اخذت الصينية ولمينة الاستكاين بسرعة وطلعنا .. 

وكامت الخطار تجر لل١٢ بالليل والخطار موجودين لحد ما هو اتعذر منهم وكاللهم : جيتكم على راسي بس حيل تعبان وما نايم من الصبح 

سلموا عليه ومشوا 

واني مسويتله الغرفة جنة ومنتظرته 

اول ما طب فتحلي اديه وكالي : تعاي ولج تعاي مشتاقلج حيل وعلي 

رحت ذبيت روحي بحضنه وهو يشتم بيه ويكلي : ما تدرين شكد روحي ملهوفة عليج ، واني بالسجن ما شايل غير همج ها حاجوها ها سمعوها حجاية ها شصار بيها واني ما موجود 

- لا خطية محد منهم قصر الكل وكف ويانا وامك ما عافت البيت بغيابك ابد ما جان ناقصنا غير وجودك دنياتي بلياك جهنم ما تنحمل 

حضني ولمني بحضنه . 

واسبوع كامل ضلينا ما نتشاوف غير بالليل 

الناس ليل نهار تصب خطار وروح تعال وسوي غدا وسوي جاي وانصب عشى .. 

اتزينت روسنا بس من ورا الخطار 

مر اسبوع يلا كفت رجل الناس من عدنا وحازم كام يراجع علمود شغلة ومعاملة الدوام مالته لان جان بسجن ومحكمة وطلع براءة وهسه كام يمشي بيها ومنتظر الموافقة 

كعد هالفترة بالبيت 

من كعد وهدت الوضعية 

وبعد محد اجانا .. ولحد دك بابنا وصفينا لوحدنا 

بدت صفناته تكثر وهو يستفقد بنته بكل مكان 

منا طبت .. هنا كعدت ، هنا نزلت تدلل عليه وتطلب منه وتتنعوص وهو يبوسها ويدللها 

وكتله الندم وهو يكول 

من ليلة عرسها لجمني كلبي وجنت ناوي امشي اجيبها وارجع 

شبية ما جبتها ، ليش مشيت بحجيها من تكلي مرتاحة وهي جانت مغصوبة .. شمالني ما جبت بتي واجيت بذاك اليوم 

جان لهسه بنتي عايشة وبخير 

مو جوا التراب .. 

خذاني وطلعنا اني وياه للنجف .. 

جان الدنيا مغرب وصلنا هو نا راد نروحلها بنهار 

تمدد على كبرها وهو يحاجيها : دناوي بابا يابعد ابوج وكلبه 

بردتي بويه .. احتريتي .. شصابج بغيابي وانت جوا التراب .. يريت الموت خذاني وبقاج بوية .. ولج والله يابوية كسرتي ظهري بغايبج .. ليش ولج بابا سويتي بنفسج وبابوج هيج ما فكرتي بيه ما كلتي ابو ما يحمل فراكي .. ولج بوية دنيا وين الاكيج واشوفج واشبع منج .. مشتاقلج ولج بابا وين اشوفج .. يا اخ يادنيا يابويه ، 

ردت امنعه كالي : خليني افضي كلبي لا تكضيني عوفيني اطلع العبرة البكلبي الضامها صارلي شهور .. تعبني موتها تعبني . 

بجى على كبرها لحد ما خوى 

رحنا زرنا الإمام وهو يشكي للامام ويكله .. خذو مني شمعة بيتي يا علي خذو بنيتي وكتلوها بيش اطفي نار كلبي .. بتي امانتك  صغيرة واجاها الموت لا تهد بنيتي امانتك يا علي . 

كمت الح عليه نرجع بحجة تعبت بس الصدك اني ردت نرجع لان تعب حيل .. اذا يبقى هنا اخاف يوكع 

رجعنا للبيت ونام 

ثاني يوم كعدت الصبح اطلع بنونة للدوام 

كعد هو كتله : هلا بيك هلا بصباحك 

- هلا بيج يابه صباح الخير 

- انته الخير واهله ، تتريك ؟ 

- اي مشتاق نكعد اني وياج نتريك بهدوء 

سويت ريوك وكعدت نتريك اني وياه 

نزل علي كاله : شعجب بابا ما طالع لدوامك 

- ظهري بابا 

- جا بدل واطلع فتح المحل لا تعتمد ع العامل ابني عينك على مالك دوا لازم تضل فوك راسه . 

- تامر يابه 

- خلي يتريك ويطلع خطية 

- خل يتريك 

كعد وعمتي كعدت كابلتنا 

وبقى يسولف ويحجي ويانا طبيعي .. 

لليل كمل عشاه وشرب جايه وصعد 

حجت عمتي كالت : اليوم حاله احسن .. مفتره ويسولف احسن 

- فضى كلبه البارحة بالزيارة وارتاح وامن بته يم الامير 

- والنعم من الامير علي .. اليوداي وليدي ويعافيه بجاه هو علي 

كمت لميت المواعين ومشيت نظفت المطبخ وصعدت 

كعدت ويا بنونة الزم الها الواجب وانوم بحسين .. لحد ما كملت حسوني نايم .. وبنونة فرشتلها كتلها : يلا ماما نامي وراح امتحان 

باستني وكالتلي : الله لا يحرمني منج يا حنونة 

ابتسمت وبستها حيل وكتلها : ابنيتي حبيبتي .. يلا نامي 

غطيتها وطفيت الضوا عليهم وطلعت . 

مشيت لغرفة علي كاعد ع التليفون يلعب .. 

حجيت : علي ما راح تنام 

- لا كاعد العب ليش محتاجة شي 

- لا بس نام مو زين عليك السهر حبيبي وراك كعدة الصبح 

- اكمل كيم وانام 

- محتاج شي 

- لا لا سلامتج 

- اطفي الضوا ؟ 

- اي اي طفي فدوة 

طفيته ونزلت لعمتي : عمه محتاجة شي 

- لا روحي نامي اني كاعدة 

- ما راح تنامين 

- لا كاعد اباوع هاي المسلسلة القديمة 

باوعت طالعة ليالي الحلمية 

وكفت اباوع وياها شوية 

وانداريت طفيت ومشيت ع البيت قفلته وطفيته وصعدت 

دخلت غرفتي حازم متمدد وعيونه بالسكف 

شافني ابتسم .. 

قفلت باب غرفتي ومشيت بدلت هدومي بشي خفيف .. ابتسم وفتحلي اديه .. ذبيت روحي بحضنه .. حضني ورحع لصفنته .. كتله : بيك شي 

- لا بس هيج افكر ليش 

- متنام التفكير ياذيك يا حبيبي 

- ما كاعد يجيني نوم 

كاعد يحجي وكالي : ادي خدرت بس شوية حبيبتي 

وخرت راسي من ايده .. كام يحرك بيها : شبيها افرجلكياها ؟ 

- اي والله شو بادات حيل .. 

كمت افرجله ايده لحد ما كالي : هاي كافي حبيبتي نامي 

اتمددت بصفه وحشرت روحي بجسمه واني اكلب بالتليفون .. 

شوية وغفيت .. كعدت بالليل على صوت بواجي .. فزيت وشلت راسي لكيت حازم كاعد ومنزل رجليه من الجرباية وحاط راسه ويبجي وينحب 

حطيت ايدي على ظهره : حازم ميصير هيج دموع وحزنك ياذيها اترحملها كاعد تاذي روحك 

كام يبجي ويكلي : مشتاقلها حيل .. مشتاقلها 

وينحب واجتافه تهتز بنحيبه .. كعدت من نومي واني اخدي رجعته لظهره ع الفراش وكمت اهدي واقرا عليه ايات حتى يهدا ويغفى وينام 

واني اقرا ايات غفيت .. 

فتحت عيني هو يفرك بصدره ويحاول يندار .. 

وخرت من عنده ونمت على مخدتي وغفيت 

رجعت فتحتها هو نايم .. رجعت غفيت .. 

جريتها غفوة لصلاة الفجر دك تليفونه تنبيه للصلاة 

مطيت نفسي واني اكعد على صوت المنبه 

حطيت ايد على حازم وكتله : حبيبي طفي المنبه زرف اذني 

حجيتها وانداريت خليت البطانية فوك راسي 

حازم لا جاوبني ولا اتحرك وطفى المنبه 

استغربت هو نومه خفيف وبسرعة يفز للمنبه .. 

كعدت ومديت جسمي على حازم وجريت التليفون طفيت المنبه .

حازم نايم على ظهره ما اتحرك واستشعرني ابد 

بسته بخده استغربت وجه حازم بارد حيل ! حطيت راسي على صدره جان لابسه فانيلة تعلاكة .. من حطيت راسي جسم حازم بارد 

استغربت اكثر 

حازم منيله جسمه يصير بارد 

بالشتا اليكص كص حازم جسمه نار جنت اذا اشاقي اجي من برا واركض اطب جوا البطانية واحط ادية ورجليه بجسمه حتى يدفن وهو يضحك .. لان جسمه حامي ٢٤ ساعة تكول صوبة 

زين هو جان شهر الرابع .. 

لا هو صيف ولا هو شتى .. مغلين مروحة خفيفة ليش هلكد بردان 

جريت الغطا غطيته .. ما اتحرك 

عادة حارم اي حركة تصير يمه يستشعرهاي تحرك وينطي ردة فعل يتنفس او يندار او يحرك ايده على راسه او جوا المخدة 

حازم مكاعد يتحرك 

دكيت على صدره واني انده : حبيبي متكعد صارت الصلاة 

ماكو جواب ولا اي ردة فعل 

كمت اهز بيه : شنو قصتك حازم بردان ؟ 

ميجاوب 

كمت اهز اقوى .. حازم .. حازم 

ماكو اي ردة فعل .. 

حطيت راسي على جهة كلبه .. ماكو اي صوت 

فزيت من فراشي وكمت الزم بديه اجره انعثل بيه واصيح : حازم اكعد حاااازم . 

حسبالي متخربط 

جبت مي اذب عليه ما كاعد يكعد 

كمت اصيح واصرخ : حازم حاجيني حاااازم ولك عليييي الحكلي ابوك نا كاعد يرد علييييه عليييييييي 

كام علي يدك الباب بقوة ويحاول يفتحها مقفولة 

فزيت جريت ثوبي لبسه وفتحت القفل واصرخ : ابوك ما كاعد يجاوب ولك عليييي 

وخرني ودخله وهو يشيل بيه ويكله: يابه حاجيني بس رد عليه ويعيني اكومك للسيارة اخذك .. بويه بس حاجيتي 

كام يبجي بقوة 

واني الطم على وجهي صعدت عمتي تركض وهي تصيح : اسم الله الستار شبيكم 

- حازم ما كاعد يرد 

كاعد تحجي وعلي شاله وحطه على ظهره وصاحلي اعينه لاي وكع منه ع الدرج كمت اركض وياها واصرخ وابجي ولازمته فوك ظهري علي

نزلت ركضت كباله فتحتله البيبان 

وطلعت مفرعة للشارع واني افتحلا السيارة يحطه بيها ، كتله : اصبرلي اجسب عباتي 

ركضت بلمح البصر جريتهن وطلعت واني البس بيهن 

نقلناه للمستشفى وصلنا هناك .. استلموا بسرعة من ادينا وركضوا عليه الحراس شالوا وحطوا ع السديا ويصيحون للدكتور الخفر 

ركض الدكتور والممرضين يباوعون بوجهه 

وعلي يكلهم : ابوس اديكم بس كلولي ابوي شبيه 

حط سمعاته الدكتور 

كض معص ايده .. اندار : ميت ! 

يمه اني كالها لو روحي راحت 

هديت عليه واكله : افحص زين ميت شنو كبل شوية جان كاعد ويسولف وياي فحصه زين 

كمت اصيح افحصه وهو يكلي اختي الرجل ميت البقية بحياتكم 

كمت املخ بروحي واصرخ وعلي حاضن صدره ابوه ويصرخ : لا تعوفني ولك بويه والله احتاجك ، ولك يابه رد عليه كبل شوية انت تحاجيني وتسولف وياي نمت ومتتت شلون ترضاها تمشي هييييج جاوبني 

ذبيت روحي عليه واصرخ واكله : حازم افتح عينك ولك حازم لا تموتني جاوبني كللهم انت ما ميييييييت 

اني اصرخ بصفحة وعلي بصفحة جروه من عدنا .. 

ساعة كاملة اني وعلي نتصارخ بالمستشفى ومحد يدري بينا بيا مستشفى ووين احنا طلعنا بلا ما نشيل تليفوناتنا 

من صارت الساعة سبعة 

عرف من كرابتهم بالمستشفى كض علي يبجي وعرف منه موت حازم وكام يصرخ ويبجي ويانا وخابر على محمد 

بنص ساعة كلها التمت 

اجا محمد من بعيد عيونه مجمرات وهو يصيح : اخوووي وين عضيدي وييييين 

اتشابك ويا علي ويتصارخ ويبجي 

اني كاعدة بالكاع لا خاله شعر ممكطعته لا خدود ما مزلغتها 

اجتي امه تصارخ وتبجي 

بس كابلتني اني كمت الطم على وجهي واصرخ واكلها : اتيمت ولج عممممه هسه ماتو اهلي ولج هسه تيمت عمممممه .. راح بيتي راح رجلي راحو كل هلي بموته . 

نقلونه للبيت .. 

وجابوا الجنازة للبيت 

جيب اليخليني استوعب حازم الجان حاضني بالليل هسه جنازة كبالي .. جنت مثل الطير المذبوح الارفش واشيل بروحي واذبها من القهر والمصيبة 

واصيح المن عايشة يروحي اذا راعي روحج راح المن عايشة ولج موتي وياه موتي .. وادك على روحي واصرخ 

ساعة الشلناه للنجف وشفته كبالي يدخلونه للكبر 

فقدت كمت اصرخ صريخ بلا وعي .. 

الدنيا استكثرت عليه حازم 

حرمتني من اهلي وحرمتني من الضنا وحرمتني من الراحة 

وهسه حرمتني من حازم .. حظي عاجر منهن كلهن ما حويت منهن شي 

بس اكول لو الله ماخذ مني كلشي ومبقيلي حازم 

ماتت روحي وانطفت وياه .. 

جانت مصيبة موته صدمة وصعبة 

انسان كلشي ما بيه ينام ما يكعد .. التقرير الطبي يكول كلبه جان تعبان والصار وياه سكتة قلبية

اتذكرت من فتحت عيني وهو يفرك صدره 

جان يصارع الموت واني نايمة ومتهنية عساني لا شفت الراحة ولا هنيت بعده .. مات كبال عيني وما حسيت عليه .. مات وما سمعتله صوت ما كعدني وهو يصارع الموت اودعه اشوفه 

هيج مات وراح من اديه بلايا وداع ؟ 

يا وحشة الدنيا واهلها بغيابه .. وشيسد مكانه 

ومنين اجيبلي حازم وشلون راح اعيش بلياه 

ضعف ايماني لفترة وحاولت اموت بس موتي ما جان وكته 

والدنيا بعدها ما مكتفية مني 

بدت قصتي ويا حازم من ساعة الانطاني شحاطته وضل حافي بالبرد الخاطري .. وانتهت بموته .. 

لربما القاري راح يعتقد انتهت معاناتي 

.. لكن لا ، من بعد موته اني شفت المعانات الحقيقية 

وشفت الذئاب البشرية على اصولها خصوصا لما دروا حازم مسجل البيت باسمي .. 

حازم سجلاه باسمي حتى لا احتاج احد 

ما جنت ادري راح يكون هو سبب معاناتي واكل الذياب بلحمي.

حازم جان الزلمة الصدك بحياتي 

جان الحايط الانتحي عليه حتى لو جنت متزاعله وياه 

مو بس الناس ما جانت رايدتنا سوا ، جتى الدنيا 

واخذته مني بعجل وبساع بساع بلايا اوداع . 

حازم غصة كلبي الما جاي اعبرها رغم مر على موته ١١ سنة 

بس ما ناسيته ولا ناسية ريحته ولا كلبي مل من اشتياقي اله 

حازم اشتاق لبته ولحكها 

اكول عسى ولعل كلبي يوكف من الاشتياق مثل ما وكف كلبه والحكه واعوف هالدنيا واهلها . 

بدت قصتي من ٢٠٠٨ لما شفت حازم باول يوم 

وانتهت بموته يوم ١٣/٤/٢٠١٤

النهاية ...