لو كُنتُ أعلمُ أنَّ الحُلمَ يجمعنا..

لأغمضتُ طولَ الدَّهرِ أجفاني..

-------------------------------

يونس

ما تنطق يا ابني اخوك فين؟ 

يزن 

هو جاي خلاص قدام البيت اهو 

شهد 

وكان فين  كل ده؟ 

يزن

قفل معايا وجاي واسألوه بنفسكم انا ما ليش دعوه.. 

_دخل في الوقت ده يوسف وهو ماااسك بوكيه ورد شكله حلو جدا في ايده وقال بحماااس.. 

يوسف

معلش يا جماعه اتأخرت عليكم يلا بينا، انا لسه قافل مع رضوي برضو وهما مستنينا... 

يونس بغضب

انت كنت فين وما بتردش علي موبيلك ليه وسايبنا هنا علي اعصابنا؟ 

يوسف

والله ما كنت سامع الموبيل، ورضوي بتحب نوع الورد ده وانا لفيت مصر كلها يعتبر عشاان اللاقيه وجيبته ليها الحمد لله

شهد 

يا حبيبي طيب كنت قولنا احنا كنا قاعدين قلقانين عليك 

يونس بحده 

حبك برص انتي وهو ورضوي.. 

يوسف

مال رضوي بس يا بابا عملتلك ايه ولا هتعمل عليها شغل الحموات من دلوقتي، والله اتجوزها واعيش بعيد عنك 

يونس

وليك نفس تهزر يا بارد، قاعدين ملطوعين مستنينك والناااس مستنينا وانت رايح تجيب ورد.. 

يارا

احنا افتكرناااك طفشت والله.. 

يوسف

ايييه اخص عليكم بقي تفكرو فيا انا كده، وبعدين اعمل كده في رضوي ده انا ما صدقت ما تقولهم يا بابا.. 

ضحكو كلهم معادا يونس اللي قال بغيظ

اقول علي ايه يا بارد  انت.. 

يوسف

يا بابا انا عريس المفروض تحترمني شويه يعني النهارده 

يزن 

طيب يلا بينا عشان ما نتأخرش علي الناااس اكتر من كده.. 

يونس 

يلا وربنا يعدي اليوم ده علي خير.. 

ــــــــــ #بقلم_الكاتبه_رحاب_القاضي ــــــــ

_وفي شقة عبدالله دخلت روان بالمفتااح اللي معاها وفي نفس الوقت كانت بتكلم زين علي الفون وبتقوله 

روان

يا زين انا لسه داخله اهو اصبر دقيه واحده هجيب الهديه وانزل علي طول اقفل بقي ما تبقااش زنان.. 

_ وقفلت معاااه وراااحت لاوضة عليااء ودورت علي الهديه وما لقيتهااااش وقالت لنفسها بضيق. 

روان

ممكن تكون حطاها فين دي.. 

_ وفصلت تدور عليها ولما ما لقيتهاااش رااحت ناحية اوضتها هي وعبدالله علي امل انها تلاقيها هناااك واول ما دخلت اتصدمت ان عبدالله نايم جوه، واتصدمت من وجوده في الشقه اصلا وجات تخرج بسرعه بس شاافت الهديه بتاعت علياء جنبيه علي الكومدينو وهو ناايم فقربت منه بهدوووء وبصتله بدموع واشتيااق وابتسمت بحزن وجات تااخد الهديه، بس فجأه هو صحي ومسك ايدها فاتنفضت بخوف وقالت بسرعه.. 

روان 

عمتو علياء نسيت الهديه وقالتلي اجي اجيبها والله ما كنتش اعرف انك هنا.. 

_ساب ايدها وقاام بهدوء وهو بيبصلها من فووق لتحت باعجااب واشتيااق وكانت جميله جدا بفستانها الازرق البسيط والطويل للارض وبأكمام خفيفه وشعرها مفرووود علي ضهرها بشكل جذااب جدا، اتوترت هي من نظراته جدا وقالت.. 

روان

انا همشي علي طول معلش ازعجتك.. 

وقبل ما تمشي وقف قدامها وبص لموبيلها اللي بيرن وقال

مين بيكلمك؟ 

روان بتوتر 

ده زين هو جه معايا ومستنيني تحت هنرجع مع بعض. 

اخد الموبيل من ايدها ورد علي زين وقال

ايوه يا زين انا عبدالله.. 

زين 

ازيك يا عبدالله عامل ايه، فينك مش جاي الخطوبه ولا ايه؟ 

رد عليه عبدالله وهو عيونه علي روان

لا عندي شوية شغل وروان مش نازله معلش ارجع انت لوحدك 

ابتسم زين بخبث وقال

طيب والهديه اللي احنا جايين عشانها اصلا انا وروان 

عبدالله

خلاص يا زين قول لامي بعدين هيبقو يجيبوها ليكي.. 

قال كلامه وقفل معاه وهي ما كانتش فاهمه تصرفاته وقالت

انت عايز ايه انا لازم انزل عشان خطوبة رضوي. 

قرب منهت وقال بهدوء

لا ما فيش خرووج دلوقتي، هتقعدي معايا انا.. 

روان بتوتر وخجل 

عبدالله ما تنسااش انك طلقتني.. 

مرر ايده بهدوء بين خصلات شعرها وقال بهدوء

لا ده يمين واحد لحظة عصبيه، يعني انتي لسه مراتي وليا فيكي كتير اوي.. 

روان ابتسمت بهدوء وقالت

يعني انت خلاص سامحتني.. 

_ما ردش عليها وقرب منها جدا كزوجه ليه متجاهل اي حزن بينهم او مشاااكل.. 

ــــــــــ #بقلم_الكاتبه_رحاب_القاضي ــــــــ

_وفي الوقت ده في بيت الاستاااذ حسن كان قااعد عز مع طارق اللي مدايق جدا وقاله بهدوء.. 

عز

اهدي يا بأف ما حصلش حاااجه 

طارق

يعني انت عاجبك اني اقعد في بيتنا وانا زي الغريب

عز 

ايوه ما هو من عمايلك.. 

قربت منهم هنا وحطت قهوه قدام عز وقالت

القهوه يا عمو حاجه تاني.. 

عز بخبث

شكرا يا قمر ايه الحلاوه دي كلها يا هنا، بقولك ايه تفكك من الواد البأف ده ونتجوز انا وانتي.. 

ابتسمت بخجل وطارق قاله بغيظ

لا ما هي مش ناقصه استظراافك انت كمان كفايه عمايل اخوك فيا، وبعدين انا ما اتعمليش قهوه ليه مع زيزو يا هنا؟ 

ما ردتش عليه هنا وقالت لعز بهدوء

حاجه تاني يا عمو

كتم عز ضحكته وقال

لا شكرا يا قلب عمو.. 

_وسابتهم هنا ودخلت المطبخ وبصلها طااارق بغيظ وعز فضل يضحك وقاله بشماته.. 

عز 

جااامده البت دي والله عندها قوة تجاهل جبااره.. 

طارق 

اخص عليك يا زيزو ده بدل ما تقولي اصالحها ازاي.. 

عز 

وانا مالي وبعدين قبل كده نصحتك كتير وانت ما كنتش بتسمع لحد.. 

اتنهد طارق بضيق وسكت وعز قاله بهدوء

بس مدام وافقت بيك يبقي خير، هبقي اقولك تصالحها ازاي... 

طارق 

حبيبي يا زيزو والله.. 

قعد حسن جنبيهم وقال

هما اتأخرو ليه كده؟ 

عز 

يونس قفل معايا من شويه وقالي انهم في الطريق... 

حسن 

لا عبدالله ولا كمال  جم، انا مش محتاجهم في حاجه بس علي الاقل يقدروني.. 

عز 

سيبك من كمال عشان الموضوع القديم بس عبدالله اكيد معاه حاجه منعته يجي ده ابو الواجب وانت عارف كده.. 

حسن 

خير يا عز ان شاء الله.. 

_ وفي اوضة رضوي كانت واقفه قدام المرايا بفستانها الاوف وايت الرقيق جدا وشكله حلو اووي وكانت فعلا اكتر من الرائعه ودخلت عندها ليلي واول ما شافتها ابتسمت وقالت.. 

ليلي

بسم الله ما شاء الله زي القمر يا حبيبتي.. 

رضوي 

شكرا يا ماما وبعدين زي القمر عشان شبهك اكيد.. 

ريناد

في دي معاها حق يا ماما احنا حلوين عشان شبهك انتي.. 

ليلي

طيب يلا يا ريناد انتي وهند اطلعو ساعدو هنا البنت واقفه معايا لوحدها انجري يلا منك ليها ساعدوها

ريناد 

حاضر يا ماما هي فين روان؟ 

ليلي

شكله جوزها مش فاضي فراحتله عمتك قالتلي.. 

رضوي بقلق

ازاي يعني هو ده وقته انا هكلمها تيجي.. 

ليلي

خليكي في حالك انتي النهارده مالكيش دعوه لا باختك ولا بحد.. 

طلعت ريناد هي وهند وليلي قربت من رضوي وقالتلها بهدوء

ما تزعليش مني لما كنت بتخانق معاكي علي موضوع الجواز انا والله كنت ببقي خايفه وزعلانه عليكي، ودلوقتي انا اكتر واحده مبسووطه بيكي وانتي احلي عروسه في الدنيا كده، وحاسه ان المره دي هتبقي بجد وهتم بخير.. 

حضنتها رضوي وقالت بدموع 

انا عمري ما ازعل منك ابدا يا ماما... 

دخلت روفان في الوقت ده وقالت

العريس جه يا ماما شكله زي القمر يا رضوي وجايب ورد حلو اووي 

ليلي

الله واكبر في عينك قولي بسم الله ما شاء الله.. 

رضوي بتوتر

ماما بجد بقي من غير مجاملات انا شكلي كده حلو.. 

ليلي

والله زي القمر يلا بقي هطلع استقبلهم وشويه وانتي هتطلعي تسلمي عليهم.. 

_وطلعت ليلي فعلا واستقبلو كلهم عيلة يونس الصاوي بكل ترحاب ومحبه وقعدو كلهم مع بعض وناهد اخت ليلي قربت من بنتها وقالت بغيظ.. 

ناهد 

صبرت ونالت رضوي دي انا كنت فاكره انها مش هتتجوز تقوم تقع في جوازه زي دي، قال وانتي زعلانه علي طارق بلا خيبه.. 

هند بضيق

بس بقي يا ماما سيبيني في حالي لو سمحتي.. 

عز 

منورين والله يا جماعه.. 

يونس

منور بأهله يا عز اومال ابنك فين؟ 

حسن 

جاي حالا راح يجيب طلب مهم وجااي.. 

يوسف 

انا مالي بزين العروسه فين؟ 

ضحكو كلهم وليلي قالت 

هتيجي يا ابني طبعا روحي يا ريناد هاتي اختك.. 

_ودخلت ريناد عند رضوي اللي كانت متوتره جدا وريناد ضحكت علي شكلها وقالت.. 

ريناد

في ايه يا رضوي فين الشخصيه القويه والكاريزما اييه هنخيب من اولها. 

رضوي

ما هو انتي ما تعرفيش يوسف ده مش طبيعي يعني ممكن يعمل اي موقف يكسفني ويوترني قدامهم كلهم.. 

ضحكت ريناد وقالت

هههههه لا ما هو لسه برضو عامل موقف زي الفل، بكل جراءه قال فين العروسه.. 

رضوي بخوف

شووفتي انا غلطااانه اني وافقت بيه.. 

ريناد

اجمدي كده يا رضوي العيلتين كلهم بره اكيد هيبقي عاقل شويه يلا بينا.. 

_اخدت نفس عميق وحاولت تباان هاديه جدا وطلعت مع ريناد واول ما شافها يوسف قبل ما حد يتكلم قاام بسرعه ورااح وقف قدامها وهو ماسك الورد في ايده وهي بصتله بتحذير، فابتسم بهدوء وقال بنبره عاشقه.. 

يوسف

اختارتك تبقي نصيبي وبحبي ليكي هكمل باقي حياتي الجايه ، مبروك عليا احلي عروسه في الدنيا.. 

ابتسمت بخجل وبصت في الارض وعز سقفله وقال

عااااش يا ابن يونس الصاوي انت هتجيبه من بره.. 

يونس بابتسامه واسعه 

لا ده عدي ابوه والعيله كلها.. 

يوسف بصلهم بغيظ وقال

لو سمحت يا بابا ما حدش طلب منك انت وصاحبك تعلقو وتفصلونا.. 

ضحكو كلهم ورضوي ردت عليه بهدوء وهي بتاخد منه الورد

الله يبارك فيك.. 

دخل زين في الوقت ده وقال

مالكم واقفين كده ليه؟ 

طارق 

تعالي ده انت فااتك كتير كلنا بعد كده هنقعد ونتعلم من يوسف بيه الصاوي.. 

زين 

نتعلم ايه؟ 

يزن بسخريه

المحن هو في محن اكتر من اللي اخويا فيه ده.. 

يونس

طيب بعد اذنك يا استاذ حسن انا قبل اي حاجه كنت عايزك في كلمتين مهمين لوحدنا يلا يا يزن.. 

يزن بحمااس 

تمام يا بابا.. 

عز 

احنا برضو عايزينك في نفس الكلمتين المهمين دول، يلا يا عريس.. 

يوسف

لا انا قاعد هنا وبعدين وقت كلام ده.. 

حسن 

يا ابني اهدي شويه واحترم وجودنا بقي، وبعدين انا اللي عايزك في كلمتين.. 

يوسف 

لا مدام حمايا انا ما عنديش مشكله.. 

_ وراحو الرجاله كلهم قعدو في شقة حسن، وشهم اخدت رضوي وقعدتها جنبيها وقالتلها بخبث.. 

شهد

انا نفسي افهم بقي انتي عملتي ايه في ابني ده دماغه باظت خالص.. 

رضوي

سوري يا طنط بس انا من يوم ما عرفت ابنك وهو علي كده.. 

شهد

لا ابني سيد العاقلين علي فكره.. 

فيروز 

شهد في ايه يا حبيبتي براحه علي البنت مش هتبقي انتي وابنك عليها

شهد 

مش قصدي حاجه وبعدين هو معاه حق في اللي عمله ما هي زي القمر.. 

ابتسمت رضوي بهدوء وقالت

ميرسي يا طنط.. 

_ وفي شقة عز كانو كلهم قااعدين ساكتين ويوسف بصلهم بغيظ وقال.. 

يوسف 

لا ما انتو مش مخليني سايب عروستي وجاي اقعد مع صف بدل عشاان تسكتو.. 

عز 

ابوك الكبير وهو اللي يتكلم الاول.. 

يونس

لا حبيبي انت الاكبر وقول اللي عندك الاول.. 

حسن. 

انا الكبير وانا اللي هتكلم وانتو لسه في عز شبابكم خلاص.. 

وبص حسن ليوسف وقال

انا عايز منك كلمة رااجل انت قد انك تحافظ علي بنتي وتسعدها ولا لا، انا كل اللي انت بتعمله ده ما يهمنيش اللي يهمني كلمه ووعد هتقدر تحافظ عليها؟ 

يوسف بجديه 

والله العظيم هتبقي ديما في عينيا وفوق راسي يا عمي.. 

عز 

الحاجه التانيه احنا اتفقنا انهم هيقعدو في بيتك يا يونس تمام، بس موضوع انك انت اللي تفرشلهم الشقه ما فيش الكلام ده.. 

يونس

ليه يا عز ما احنا اتفقنا وخلاص بقينا اهل واحنا مش هنضغط الاستاذ حسن.. 

عز بجديه

وحسن قادر يجيب لبنته احلي عفش في البلد كلها ما تشيلش هم.. 

حسن 

عز معاه حق يا يونس بيه ما تشلش هم.. 

يونس 

تمام زي ما تحبو، في حاجه تاني بقي هتتكلمو فيها ولا اتكلم انا في الموضوع اللي عايزكم فيه.. 

عز 

اتكلم خير ان شاء الله؟ 

يونس

طبعا احنا بقينا خلاص اهل وعرفنا بعض وعلاقتنا ببعض الحمد لله كويسه وزي الفل.. 

عز 

اختصر يا يونس عايز ايه؟ 

يونس

انا كلي طمع في الاستاذ حسن انه يوافق ان يبقي بينا نسب تاني، قصدي تالت ان شاء الله.. 

بص حسن ليزن وقال بهدوء

ده شرف لينا يا يونس بيه، بس انت تقصد مين بالظبط؟ 

يونس

انا طالب ايد الانس... اا ريناد لابني يزن.. 

حسن

تمام.. ما فيش حد غريب بينا موجود فأسمحلي اوضحلكم الاول ظرووف بنتي.. 

يزن 

بعد اذنك يا عمي انا عارف كل حاجه وعايز ريناد.. 

حسن 

اسمعني بس يا ابني الاول ولازم ابوك يبقي برضو شايف الصوره واضحه، انا بنتي كانت متجوزه ابن اختي فضلت معاه تقريبا عشر سنين او اقل شويه كانت بينهم مشاكل عاديه جدا وبنتي عمرها ما غلطت معاه في حاجه، ومش بقول كده عشان هي بنتي لا انا بقولك كده عشان انا بنتي تعبت ومش عايزها تتعب تاني وعايز اللي يتجوزها المره دي يبقي راجل بجد وعارف قيمتها، هي دلوقتي مطلقه ومعاها بنت ولما جات وكلمتني عليك يا يزن قالتلي انك مش هتقعدو في بيت واحد بأستمرار الكلام ده بجد.. 

بص يونس بضيق لابنه ويزن قال بهدوء

ايوه فتره مؤقته لحد ما نشوف حل سوا.. 

حسن

ولو ما كانش في حل.. 

يزن 

يا عمي انا عايز اتجوز ريناد معني انها هتبقي مراتي هتبقي بنتها بنتي وهبقي ديما حاطط علاقتها ببنتها اهم حاجه في حياتي انا عمري ما هكون سبب اني ابعدهم عن بعض، ولو علي المشاكل اللي بينها وبين طليقها بيحصل اكتر من كده وبالقانون كل حاجه بتتحل، فلو سمحت وافق وانا واثق من كلامي ده اللي حصل مع ريناد في الاول صفحه واتقفلت وهي بالنسبالي بنت ما فيش زيها وهبقي اسعد واحد في الدنيا لو هي بقيت مراتي.. 

عز 

انا من ناحيتي موافق.. 

حسن 

طيب اسمحلي بس اخد رئيها مره تانيه

يزن 

تمام بس لو وافقت بعد ما يوسف يلبس رضوي الشبكه، احنا نقرا الفاتحه ومعاد الفرح وباقي التفاصيل مش هنختلف فيها صدقني.. 

عز 

عارف يا يزن اللي عجبني فيك انك عاقل ما تباانش انك ابن يونس الصاوي وواثق من نفسك وعارف انت عايز ايه، فانا معاك واعتبر انك اتجوزتها خلاص بلا ابوك بلا ابوها انا العيال دول عيالي اصلا.. 

حسن 

طبعا كلهم ولادك يا عز، هروح انا اشوف ريناد واللي فيه الخير يقدمه ربنا.. 

ـ ورجعو كلهم لشقة حسن معادا يزن اللي وقف هو وباباه بره الشقه ويزن قاله بقلق.. 

يزن 

انا اسف يا بابا لو كنت دايقتك في اللي حصل من شويه ما تزعلش انا ما كانش قصدي ادايقك.. 

يونس

ازعل عشان ابني راجل وكلامه موزون وعارف يعتمد علي نفسه، انا مش زعلان منك ربنا يتمملك علي خير انت واخوك ويسعدكم وو.. ادخل قووم اختك من جنب ابن عزالدين بدل ما اطربق البيت علي دمااغه هو وابوه.. 

يزن بغيظ

ايه ده فعلا عبيط ده ولا ايه.. 

في الوقت ده كانت قااعده يارا جنب زين اللي قالها 

هيفتكرو اننا مطقمين مع بعض مش صدفه ان لون فستانك نفس لون الجرافته بتاعتي.. 

يارا

هي والله بجد صدفه ولا انت شوفتني امبارح وانا منزله صورة الفستان وبقول انه من تصميم مامي؟ 

زين 

مشيها صدفه وخلاص بس شكلك زي القمر فيه والحجاب محليكي اكتر.. 

ابتسمت بخجل وقبل ما ترد عليه وقف يزن جنبيه وقال

قووم اقعد جنب ابوووك يا حبيبي

زين 

ما انا حلو هنا جنب التكييف 

يزن 

قووم يا زين يونس الصاوي خد باله وادايق.. 

زين بخوف

يا نهار اسود علي فكره هي اللي ندهتلي انا ملتزم بوعدي معاه والله.. 

كتم يزن ضحكته وقال

ما تقلقش مش هيعمل حاجه بس خلي بالك مش وقته الكلام والجو ده في نااس هنا ما تعرفش انك متكلم عليها.. 

زين بتفهم 

تمام خلاص مش هتتكرر.. 

_وبكل هدوووء رااح قعد جنب عز الدين اللي قال لحسن بصوت واطي.. 

عز 

مش وقته كلامك ده يا حسن.. 

حسن 

ما انت ما تدبسنيش قدامهم وتقول مش وقته، يا عز ما انا قولت ما فيش قايمه وما فيش جهاز 

عز 

لا انا بنت اخويا تتجوز باحلي جهاز وتتكتب ليها اغلي قايمه دي عداتنا في الصعيد ومش انا اللي هفكرك.. 

حسن

ماشي يا عز بس مش هاخد منك ولا قرش

عز 

وانا مش هديك انت انا هجيب لبنتي واقسم بالله يا حسن لو اتكلمت تاني في الموضوع ده هسيب الخطوبه وامشي.. 

_في الوقت ده جابت ليلي الشبكه من جوه واديتها ليوسف اللي لبسها لرضوي وقالها بهدوء. 

يوسف 

والله العظيم انا مش مصدق اللي بيحصل ده.. 

رضوي 

والله ولا انا اكتر واحد قولت عليه مستحيل اتجوزه بقيت دلوقتي لابسه دبلته في ايدي.. 

يوسف 

عقبال ما تبقي في الشمال يارب.. 

يونس 

طيب ايه بقي يا استاذ حسن نقرا فاتحة زين وريناد.. 

ـ الكل ابتسم بسعاده معادا ناهد وبنتها ولمياااء اللي عيونها اتملت دموع لانها كانت متعشمه ان ريناد ترجع لسيف.. 

حسن 

ايه رئيك يا ريناد نقرا الفاتحه. 

ريناد بخجل 

اللي تشوفه حضرتك يا بابا.. 

حسن 

علي بركة الله نقرا كلنا بقي الفاتحه يا جماعه.. 

_ وقرو كلهم الفاتحه بكل فرحه وسعاده، وبعد ما خلصو باركو كلهم لريناد ويزن وبدأو يتصورو مع يوسف ورضوي ووقف يزن وهو وريناد جنبيهك ويزن قالها بهدوء.. 

يزن 

مبروك.. 

ريناد 

بتبارك علي ايه بالظبط؟ 

يزن 

علينا طبعا ده الاهم بالنسبالي بصراحه.. 

ريناد

الله يبارك فيك بس انت اتسرعت شويه كنا نستني بعد الخطوبه.. 

يزن 

وهنتجوز قبلهم كمان وهتشوفي، هي فين تيا؟ 

ريناد 

تيا نايمه لانها بتناام بدري ما بتسهرش.. 

يوسف 

اتصرونا وخلصنا هتفضلو ترغرو فووق راسنا كده كتير.. 

يزن 

حتي وانت عريس رخمم، رايحين نقعد يا اخويا اهووو.. 

 وقعدو كلهم ويونس قال لرضوي  بسخريه

ايه يا رضوي اللي خلاكي تجيبي الشبكه دي، حد قالك ان مش معانا فلوس نجيبلك اللي نفسك فيه، ليه بتسترخصي كده ده انتي خطيبة ابن يونس الصاوي؟!

ردت عليه ليلي بحده وقالت

ما اسمهاش بتسرخص يا اخويا، انا بنتي عينها مليانه ما يهماش الكلام الفاضي ده، اهم حاجه عندها الادب والاخلاق والاصل يا اهل الاصول.. 

حسن

 ليلي الاكل يا حبيبتي يلا خلينا نتعشي كلنا سوا.. 

_قامت ليلي وهي بتبص ليونس بغضب، وقرب يونس من يوسف وقاله بصوت واطي.. 

يونس

حماتك شكلها عقربه يا ابن الفقريه

يوسف بغيظ

 قال وانت اللي ملاك بجناحات يعني

يونس

مااشي بس نروووح البيت وانا هرد عليك يا ابن الجزمه

يوسف 

لا ما انا مش مروح معاك

يونس

ايه هتباات هنا 

يوسف

ياريت ينفع شاايف عيله حلوه كلها حب ودلع ازاي.. 

يونس

مبروك عليك يا اخويا لو رااجل خليني اشووف وشك في البيت النهارده.. 

رضوي بقلق

في حاجه يا يوسف.. 

يوسف

لا ما تشغليش بالك الحج بيهزر معايا.. 

وقفت روفان جنب حسن وقالت

بابا انا عايزه اتجوز.. 

حسن 

هو ده وقته انتي كمان اصبري شويه تكبري وهجوزك زي اخواتك كده وارتاح منك

روفان 

لا لما اكبر هيكون اللي عايزه اتجوزه فلسع 

حسن. 

ليه انتي عايزه تتجوزي مين؟.. 

روفان بصوت واطي

ابو العريس.. 

بصلها حسن بصدمه وروفان قالت

شكله حلو اوووي يا بابا والنبي

حسن 

ادخلي جوه يا حبيبتي روحي نامي جنب روز وتيا يلا.. 

عز 

مالك ومالها في ايه روفان 

روفان بصوت عالي

اخوك زعلان عشان قولتله عايزه اتجوز ابو العريس.. 

يونس بصدمه

انا؟!.. 

شهد 

اتفضليه يا حبيبتي هو مش هيقول لا.. 

حسن 

معلش يا جماعه دي تربية عز الدين انا وامها متبرين منها.. 

يونس ابتسم وقال

تعالي هنا يا سكر انتي قوليلي اسمك ايه.. 

قربت منه روفان وقالت

يالهوي ده مش عارف اسمي.. 

يونس بصدمه

لا الحمد لله وزين مش تربيتك يا عز، دي عندها كام سنه دي؟ 

روفاه 

عندي تسعه وانت؟ 

عز 

ايوه وانت بقي عندك كام سنه؟ 

يونس

مش مهم انا بقي موافق اتجوزك بس بشرط.. 

روفان 

هو ايه وانا موافقه.. 

يونس 

هاتي بوسه حلوه كده وتقعدي جنبي نتعشي سوا.. 

باسته روفان في خده وقالت 

موافقه.. 

_ابتسم يونس بهدوء وكانت شهد بتبصله بابتسامه صفرااء فقرب منها وقال بصوت واطي.. 

يونس

بتغيري من عيله صغيره... 

شهد 

لا وحياتك كان نفسي تبقي حنين كده معايا زي ما انت حنين مع كل النااس.. 

يونس

والله انتي كدابه ده انا اكتر واحده بحب ابقي حنين معاها هي انتي.. 

شهد 

انا كداابه من يوم ما بقيت عايشه معاك، ما هو لازم اتعلم اللف والدوران ده انت قدرت تثبت عيله صغيره اهو.. 

يونس 

الله واكبر ما تقريش بس الحاجات دي بتتنظر.. 

_ كتمت ضحكتها وبعدين فضلت تتكلم مع فيروز وبعد شويه قعدو كلهم يتعشو في اجواء عائليه سعيده، لحد ما دخل من الباب اللي كان مفتوح سيف ومعاه شرين اللي ماسكه في دراعه وقال بخبث... 

سيف

الف مبرووك مش كنت تعزمني يا خالي.. 

ــــــــــ #بقلم_الكاتبه_رحاب_القاضي ــــــــ

_وفي شقة عبدالله كانت واقفه روان بتظبط في هدومها قدام المرايا وهي مبتسمه بسعاده، وطلع عبدالله من الحمام وهو بينشف شعره ورااح ناحية الدولاب عشاان يطلع هدوووم ليه، فقربت منه وحضنته بهدوء وقالت.. 

روان 

هتيجي معايا نلحق اللي فاضل من الخطوبه مش كده؟ 

بعد عنها وقال بجمود

لا انا مش هرووح عند حد.. 

روان

حد؟!.. يعني انت مش عايزنا نروح دلوقتي ولا ايه؟ 

ضحك عبدالله بسخريه وهو بيلبس هدومه وقال

انا صدقت فعلا دلوقتي ان الواد اللي كنتي مصحبااه قبل كده ده ضحك عليكي.. 

روان بضيق

ايه لازمته الكلام ده يا عبدالله وقصدك ايه بيه؟ 

عبدالله بجمود

قصدي انك عشان قربت منك دلوقتي وضعفت قدامك شويه افتكرتي اني كده رجعت عن موضوع الطلاق خلاص.. 

اتملت عيونها دموع وقالت

يعني ايه؟ 

وقف قدامها وقال بكل قسوه

يعني اللي حصل بينا ده لوقتي لحظه وخلصت، وفي اقرب وقت هطلقك وعلي فكره انا اتقدمت لواحده من البلد بنت مؤدبه ومحترمه ابوها شيخ الجامع والكل بيحلف بأخلاقها... 

نزلت دموعها وقالت بعدم تصديق 

انت بتهزر صح، انت ليه بتعمل فيا كده هو ده الحب اللي انت كنت بتقولي انك بتحبهولي.. 

رد عليها بحده وقال

الحب ده اللي دمرتيه، بس هو كان غلط من البدايه انا كنت فاكرك حاجه وطلعتي حاجه تانيه خالص.. 

روان بعصبيه ودموع 

ومدام هو كده قربتلي ليه دلوقتي قولتي ليه اني مراتك وانك عايزني، بتنتقم مني يعني.. 

عبدالله بهدوء

افهميها زي ما تفهميها انتي حكايتك خلصت معايا واطمني اللي حصل ده مش هيتكرر تاني اصلا.. 

_قال كلامه وهو بيبصلها من فوووق لتحت بسخريه، ورااح مسك موبيله وفضل يقلب فيه وهو بيتصنع تجاهل وجودها، فضحكت هي بقلة حياه وقالت.. 

روان 

بجد برافو عرفت تنتقم لكرامتك ورجولتك مش انت مبسوووط كده يبقي خلاص هي خلصت ، والمره دي انا اللي مش عايزاااك يا عبدالله واقسم بالله لاطلق منك وارجع اعيش حياتي زي ما انا عايزه، قال وانا اللي كنت ناويه ادفن نفسي معاك بالحيا عشان ارضيك بس انت واحد اناني ومغرور وما تستاهلش اي حاجه يا عبدالله.. 

_قالت كلامها واخدت شنطتها والموبيل بتاعها وسابته وخرجت بره الشقه، ونزلت علي السلم من غير ما تستني الاسانسير وفجأه قعدت علي السلم وهي بتعيط بحزن وكسره حقيقيه، فطلعت ست كبيره من الشقه اللي جنبيها وقالت.. 

_انتي كويسه يا بنتي في حاجه ولا ايه؟ 

مسحت روان دموعها وقالت بنبره مهزوزه

لا ما فيش حاجه مم مافيش.. 

_طيب لو عايزه تيجي ترتاحي جوه عندي شويه ما فيش مشكله البيت بيتك.. 

 قامت روان وردت عليها

لا شكرا معلش ازعجتك.. 

ـ ونزلت بسرعه واخدت تاكسي لبيتهم وهي بتتعود لعبدالله بالانتقاام منه لكرامتها بأي طريقه، وفي الوقت ده كان هو قااعد مكانه من اول ما هي مشيت وعيونه مليااانه دموع وقال لنفسه بضيق... 

عبدالله 

انا صح هو ده اللي كان لازم يحصل اصلا.. 

ــــــــــ #بقلم_الكاتبه_رحاب_القاضي ــــــــ

_وفي بيت الاستاذ حسن كان قااعد سيف هو وشرين بيتعشو جنب لمياااء اللي قالتلهم بحده وصوت واطي.. 

لميااء

هو انا كنت قولتلك انها اتخطبت عشاان تجيب السنكوحه دي وتيجي 

بصتلها شرين بغيظ وسيف رد عليها وقال

هو انتي فاكراني زعلان انها هتتجوز، لا انا ريناد ما تفرقليش انا جاي اخد بنتي يا ماما

لمياء 

هو ده وقته في ناااس غريبه قااعده 

سيف

ما تقلقيش انا مش جااي اعمل مشااكل انا جاي اخد بنتي وبس

لميااء

والله يا سيف لو عملت مشكله النهارده ما تعرفش انا هعمل معاك ايه.. 

_ما ردش عليها سيف وبص لريناد اللي واقفه مع هنا بغضب وهي اول ما شاافته بيبصلها اتنهدت بضيق ودخلت المطبخ وراحت وراها عليااء وليلي اللي قالت بقلق.. 

ليلي

شايفه ابن اختك يا علياااء جاي يخرب اليوم ويفضحنا قدام النااس

علياء

ما تقوليش كده يا ليلي ما هو جه وقعد هو ومراته ساكتين اهو وما حدش قال حاجه 

ريناد بدموع 

سيف مش جاي يعمل الواجب يا عمتو، انا اكتر واحده اعرفه والله مجيته دي ما هتعدي علي خير انا هدخل عند تيا ومش طالعه لحد ما يمشي 

ليلي بحده

ليه ان شاء الله هو كاسر عينك ولا كاسر عينك انتي تطلعي وتقعدي مع عريسك بره وسيبي بنتك نايمه انا كل شويه بدخل اطمن عليها، ولو البيه مش عاجبه يغور يمشي

علياء

امك معاها حق وما تخافيش يا حبيبتي كلنا جنبك ومعاكي ولو عمل حاجه ابوكي وعمك موجودين وهيوقفوه عند حده.. 

_في الوقت ده كان يزن اكتر حد مدايق من وجود سيف وشرين وخايف ليعملو مشكله قدام باباه، وبصتله شرين بخبث وقربت من سيف وقالتله بصوت واطي... 

شرين

يلا يا حبيبي عشان انا عايزه امشي 

قاام سيف ورااح لحسن وقال بجمود

بعد اذنك يا خالي ممكن تجيبلي تيا عشان انا مااشي.. 

ـ الكل سكت وركزو مع سيف ورد فعل حسن اللي قام وقف قدامه ورد عليه بهدوء وقال.. 

حسن 

هو ده وقته وبعدين تيا نايمه.. 

سيف بصوت عالي

وامتي وقته هو انا عارف اشووف بنتي منكم اصلا.. 

طارق بحده 

ولا هتشوفها اصلا ووجودك مش مرغووب فيه ويستحسن تمشي.. 

حسن 

اسكت يا طاااارق.. 

سيف

ويسكت ليه ما هي دي اخلاقكم ولا هتغيروها دلوقتي.. 

عز بحده 

سيف احترم نفسك وخد مراتك وامشي من هنا.. 

سيف 

انا مش همشي من هنا غير وبنتي معايا.. 

حسن 

ابقي كلمني ونتفق علي معاد وهخليك تشووف بنتك 

سيف

لا معلش انا عايز بنتي دلوقتي.. 

لميااء 

معلش يا حسن هات تيا وانا هاخدها عندي تبات معايا في بيتي والله.. 

طلعت ريناد في الوقت ده وقالت 

معلش يا عمتي بس انا بنتي مش هتباات بعيد عني.. 

يونس 

طيب نستأذن احنا يا جماعه ونسيبكم تحلو المشكله دي بينكم.. 

سيف

ليه كده انا مش جااي اعمل مشااكل.. 

وبص لريناد وقال بسخريه

انا جااي اخد بنتي عشاان الهانم تعرف تاخد راحتها مع عريس الغفله من غير ما حد يزعجها.. 

يزن بحده 

انت قليل الادب يلا ولازمك تربيه.. 

وقبل ما يمسك فيه وقف يووسف قدااامه وسيف قال بحده

اتعلمها انت الاول ومن الاخر يا ريناد انا بنتي مش هتتربي مع راجل غريب هتتممي الجوازه دي يبقي تيا ترجعلي وتتربي معايا انا.. 

عز بحده 

طيب مش قولت اللي عندك امشي، خدي ابنك ومراته وامشي يا علياااء وحسابي معاه بعدين.. 

لميااء بحزن 

يلا يا سيف وكفاايه لحد كده اللي عملته.. 

ـ ابتسم سيف لريناد بشماته وهي عيونها ملياانه دموع وواقفه محرجه قداام اهل يزن، واخد شرين ومامته ومشي، وحسن قال بضيق.. 

حسن 

انا بعتذر يا جماعه علي اللي حصل ده.. 

يونس بهدوء

ولا يهمك يا استاذ حسن احنا بقينا اهل، انا هاخد الجماعه وامشي ويزن ويوووسف هيجو ورايا بعد اذنك.. 

ـ ومشيو فعلا ونزلت معاهم ليلي وعز وحسن، وشهد وقفت مع ليلي وقالتلها بهدوء.. 

شهد 

ما تقلقيش يا ليلي احنا بقينا اهل خلاص واللي حصل ده مش مشكله عادي بيحصل اكتر من كده في احسن العائلات.. 

ليلي 

تسلمي يا حبيبتي وان شاء الله يتعوض اليوم يوم فرحتنا بيهم الكبيره... 

شهد 

ان شاااء الله، بعد اذنكم.. 

ليلي 

اتفضلي مع السلامه يا يارا وهبقي استناكي تيجي تقعدي مع البنات.. 

يارا 

ان شاء الله يا طنط في اقرب وقت.. 

_ ومشيو فعلا وفي الوقت ده كان يزن قااعد هو وريناد لوحدهم وقالها بهدوء.. 

يزن

ما حصلش حاجه خلاص انا بس اللي كلامه عصبني... 

ريناد بضيق

هو انت لسه شوفت استفزاز، الموضوع من اوله وكده تخيل بقي لما نتجوز 

يزن ابتسم وقال

هيبقي احسن من كده طبعا كفايه اني هبقي متجوز احلي واحده شوفتها في حياتي

ابتسمت ريناد بخجل وقالت

انا بتكلم علي سيف وموضوع تيا

يزن 

هتتحل ان شاء الله ما تخافيش ما تخليهوش ينكد علينا فرحتنا اكتر من كده، وبعدين هو لو كان يقدر يااخدها دلوقتي كان اخدها.. 

_ وقصاادهم كان قااعد يوسف هو ورضوي ومعاهم طارق وهنا وزين اللي قال.. 

زين

ريناد ضحكت خلاص يا جماعه يزن عرف يراضيها.. 

يوسف

طيب الحمد لله روحو بقي اقعدو معاهم وسبوني انا وخطيبتي لوحدنا

طارق

بعينك انت مش هتقعد معاها لوحدك 

يوسف

اشمعنا انا ما يزن قااعد مع اختك اهو

زين بخبث

لاا. يزن ده ادب واخلاق واحترام ويتأمن علي الدهب، و افتكر اني قولتلك يوم عندي ويوم عندك

يوسف بغيظ

يعني انت اللي جايبهم ماااشي صبرك عليا اللي ما يزعلش.. 

رضوي 

خلاص يا يوسف عادي يعني خليهم قااعدين. 

يوسف 

لا مش عادي كان في حاجات عايز اقولهالك بينا من غير ما طرف تالت او رابع او خامس يسمعها

طارق

كنت هتقولها ايه يعني؟ 

يوسف

كنت هقولها عامله ايه ارتحت؟ 

ضحكو كلهم وهنا قاامت دخلت المطبخ وطارق قال لزين 

بقولك ايه يا زين هدخل اشرب وجاااي، عايزك محرم معاهم ما تسيبوش لوحده معاها 

زين 

من غير ما توصيني انا قاعدله النهارده ده حبيبي ابو نسب.. 

يوسف 

قعدت عليك حيطه انت وهو.. 

_ وكانت هنا واقفه في المطبخ بتلم الاطبااق مكان الاكل، ودخل عندها طارق وعمل نفسه بيطلع مايه من التلاجه وقال بهدوء.. 

طارق

واخرة التجاهل ده ايه؟ 

_سابت الاطبااق من ايدها وجات تخرج بس هو مسك ايدها وقال بنبره غاضبه.. 

طارق

بكلمك انا وبعدين يا هنا هتفضلي بتتعاملي معايا كده لحد. امتي؟ 

هنا بنبره تحذيريه

سيب ايدي.. 

ساب طارق ايدها وقال

سيبتها اهو بس اتكلمي معايا وخلينا نتفق هنعمل ايه الفتره الجايه 

هنا 

هنعمل ايه في ايه؟ 

طارق

في خطوبتنا مش متفق مع بابا اننا هنتخطب بعد رضوي ويوسف

هنا 

وانا قولت لبابا حسن كفايه نجيب دبلتين دلوقتي ومش عايزه خطوبه ولا اي دوشه نلبسهم حتي قداام الصايغ لاني مش فاضيه بحاول اجهز للجامعه 

طارق

هتدخلي تربيه مش كده؟ 

هنا 

صيدله هبقي الدكتوره هنا يا دكتور طارق، وما تقلقش زين قالي ليه زمايل في صيدله كويسين اووي هيخليهم يساعدوني.. 

طارق بهدوء

زي ما تحبي يا دكتوره هنا.. 

هنا 

ما زعلتش يعني.. 

طارق

ابقي غبي لو زعلت ان مراتي المستقبليه هتبقي دكتوره، وعلي فكره احنا سنه بالكتير وهنتجوز وانا هبقي اكتر واحد واقف جنبك لحد ما تتخرجي يا دكتوره هنا.. 

هنا 

يا سلام وايه التغيير ده بقي؟ 

طارق

لا ما انتي برضو هتكوني معايا وهتساعديني في المشروع الكافي بتاعي، كل حاجه هتبقي بينا شركه يا هنا 

هنا بهدوء

ان شاء الله هروح اشووف تيا جوه.. 

_وراحت بسرعه لاوضة ريناد وقعدت جنب تيا اللي كانت نايمه وابتسمت بهدوء من كلام طارق ليها وهدوءه معاها.. 

ــــــــــ #بقلم_الكاتبه_رحاب_القاضي ــــــــ

_وبعد ما خلص اليوم ومشي يزن هو ويوسف وكان الكل سعيد ومبسووط رغم اللي حصل من سيف، ولكن فرحتهم ما كملتش اول ما دخلت روان وعيونها حمرا من كتر عياطها وباين عليها الحزن بشكل كبير، اول ما شافتها علياء انقبض قلبها وليلي قربت من بنتها بسرعه وقالت 

ليلي

في ايه وكنتي فين كل ده؟ 

ردت وهي نظراتها كلها لووم لعلياء وقالت

كنت مع عبدالله.. 

حسن 

وهو فين وازاي يسيبك تيجي في الوقت ده لوحدهك

طارق بسخريه

تلاقي الهانم عملت مصيبه ونكدت عليها وعلي جوزها وجات.. 

نزلت دموع روان وقربت من حسن وقالت ببكاء

واغلي حاجه عندك لو بتحبني بجد يا بابا خليني اطلق منه انا مش عايزه اكمل معاه تاني... 

حسن 

طيب اهدي طيب وقولي حصل ايه؟ 

روان ببكاء

ما حصلش حاجه انا مش عايزه اكمل معاه 

علياء

خلاص يا حسن سيبها تهدي شويه دلوقتي وبعدين ابقي اتكلم معاها وافهم كل حاجه 

روان 

انا هاديه وكويسه وده اخر قرار عندي

حسن

ماشي يا روان بكرا. هكلمه يجي ونشووف موضوت الطلاق ده، ادخلي ناااامي دلوقتي واللي فيه الخير يقدمه ربنا.. 

ـ ودخلت روان اوضتها وراااحت وراها هنا وريناد اللي سألتها بقلق وقالت... 

ريناد 

في ايه يا روان عمل ايه عبدالله عشان تبقي بالحاله دي.. 

ـ ما ردتش عليها روان وقلعت الجزمه بتاعتها ونامت، وريناد قالت بعصبيه.. 

ريناد 

يا بنتي اتكلمي معانا قولي حصل ايه؟ 

روان بدموع

انا عايزه اناام سبيني ومالكيش دعوه بيا.. 

هنا 

خلاص يا ريناد سبيها تهدي وترتاح دلوقتي، تعالي نخلص شغل المطبخ مع ماما بره وسبيها هي نايمه.. 

_وسابوها فعلا وراحو المطبخ، وعليااء قالت لزين يضيق.. 

علياء

هتعبك يا زين تعالي وصلني 

زين 

هخلي طارق يا عمتو عشان انا هوصل ماما 

عليااء

طارق لو رااح في وش عبدالله دلوقتي مش هيحصل كويس، تعالي وصلني وطارق يوصل مامتك يلا.. 

_ ومشيت فعلا مع زين وفيروز سلمت علي ليلي وحسن وكانت ماشيه فراحلها عز وقال.. 

عز 

زين راح مع عليااء هيوصلها ويرجع 

فيروز بضيق

طيب انا هاخد تاكسي واروح.. 

عز 

في الوقت ده ولوحدك.. 

فيروز 

ايوه عااادي متعوده علي فكره مش هخاف يعني 

عز 

بس انا دلوقتي موجود تعالي هوصلك اورجع.. 

فيروز بهدوء

ماشي.. 

عز 

ده بجد انتي وافقتي علي طول من غير مناهده.. 

فيروز

هتوصلني ولا انزل اخد تاكسي.. 

عز

ثانيه واحده اجيب مفتاح العربيه من الواد طارق.. 

_ورااح عز شقته وكان طاؤق قااعد مدايق بسبب حالة روان ولما شااف عز قاله.. 

طارق

بكلم ابن اختك ما بيردش اقسم باللن لو كان مد ايده عليها او عملها حاجه لتبقي اياامه سودا

عز 

ما تكبرش الموضوع وما تكلموش دلوقتي انا هروحله واتكلم معاه ولو كان غلطان هديه بالجزمه، ابوك مش نااقص مشااكل يا طارق فنلم الموضوع مش نخربه اكتر.. 

طارق بضيق

طيب يا عمي.. 

عز

هات المفتاح بتاع عربيتي

طارق

ليه؟ 

عز 

ما شوفتش في برودك عربيتي وسيبهالك بقالي شهر وعايزها انت مالك.. 

طارق 

ما انت رايح فين دلوقتي والمصايب دي عماله تنزل علي دماغنا 

عز 

ما فيش مصايب يا عم، فيروز مروحه وزين راااح مع عمتك فانا هروح اوصلها.. 

طارق بخبث

قولتيلي كده تمام المفتاح اهو 

عز 

وتكمل جميلك بقي ولما يرجع زين تخليه يبات هنا.. 

طارق

بس كده من عينيا ومبروك مقدما.. 

_اخد منه عز المفتاااح ومشي، وعند روان كانت قااعده معاها رضوي اللي قالت بصدمه

رضوي

مستحيل هو اتجنن ازاي يعمل كده وانتي ايه اللي يخليكي توافقي يتني ما انتو متخانقين.. 

روان بدموع

خلاص بقي يا رضوي انا مش ناقصه هو الموضوع اصلا خلص وهطلق وده اخر قرار ومش هرجع فيه خالص... 

رضوي 

انا هقول لماما ولازم هي وبابا يبقو عارفين اللي عملو، ده انتي لو واحده من الشااارع مش هيقولك كده... 

روان

قولي ما بقتش خايفه علي حاجه معاه خلاص، والله بجد المره دي مش عايزاااه ولا هنسي كلامه واهانته ليا ابداً... 

ــــــــــ #بقلم_الكاتبه_رحاب_القاضي ــــــــ

_في بيت يونس الصاوي كان قااعد يونس مداايق، ودخلت عنده شهد وقالت بهدوء.. 

شهد 

الولاد كلهم في البيت خلاص وكل واحد فيهم في اوضته

يونس

عيالك كبرو ما فيش داعي تروحي تطمني عليهم والجو ده 

شهد 

انا ما بعرفش ارتاح ولا انام غير لما يبقو كلهم موجودين هنا 

يونس

شوفتي اللي حصل في الخطوبه، اهو ده اللي انا بتكلم فيه من اولها مشااكل 

شهد 

طيب والله انا ريناد صعبت عليا طليقها ده باين عليه مش كويس خالص، ده حتي قريبهم برضو كان مصمم يخلي شكلهم وحش قدامنا ما شوفتش كان بيبصلها ازاي وهو بيتكلم وعايز ياخد بنته

يونس

واحنا مالنا يا شهد ليه ندخل في المشاكل والحوارات دي 

شهد 

النصيب ابنك حبها وعايزها هنقف في وشه 

يونس بضيق 

مش احنا اللي هنقف مشاكلها وظروفها هي اللي هتقف اراهنك ان لو الجوازه دي تمت يزن هيندم 

شهد 

نكدت عليا يا يونس نااام بقي، لا تنام ايه تعالي هنا وقولي مين البنت اللي وقفت جنبك واتصورت معاك وكانت عماله تتسهوك دي في الخطوبه 

يونس

دي قريبة الاستاذ حسن اسمها هند

ضربته شهد بالمخده وقالت بغيظ 

تقف جنبها ليه وتكلمك ليه دي قد ولادك علي فكره، بس هي جديده عليك ما انت ما تعود بص ما تتكلمش معايا ولو اتكلمت انا هسيب الاوضه كلها وهروح اتخمد في اي حته تانيه.. 

_ضحك بهدوء وما ردش عليها وهي ناامت واول ما نام جنبيها قاامت قعدت وقالت بعصبيه.. 

شهد 

انت هتنام قوم ورد عليا اتفقت معاها علي ايه 

يونس

اتفق علي ايه يا شهد ما انتي لسه قايله دي من سن ولادي، وبعدين دي من العيله اللي عيالي كلهم مناسبينها.. 

شهد 

يعني هي لو ما كانتش من العيله دي كان عادي، عجبتك اووي مش كده 

يونس

لا عجبتني ولا حاجه هي جات تستظرف بنت خفيفه كده بس ما حبتش اكسفها قدام قرايبها واتصورت معاها وخلاص، انا برضو عارف اي بنت صغيره كبيره حتي لو عيله صغيره بفهم دماغها فيها ايه وجايه عايزه مني ايه.. 

شهد بسخريه

اممم خبره حضرتك.. 

قعد يونس وقالها بخبث

عارفه مهما قولتي انت مش فارق معايا وما بقتش اغير عليك هتبقي كداابه عشاان انتي عمرك ما هتبطلي تحبي يونس يا شهد ولا هتبطلي تغيري عليه.. 

شهد 

ما هي دي الحقيقه انا مش عارفه اكرهك مهما قولت ومهما عملت انا لا هعرف اكرهك ولا هقدر اسيبك.. 

يونس 

سيبك من الكلام اللي مالوش لازمه ده وافتكري معايا كده يوم خطوبتنا.. 

ابتسمت شهد وقالت

كانت صدمة عمري لما شوفت انك انت العريس.. 

يونس

كانت احلي مفاجأه في حياتي

شهد 

اشمعنا كنت حاببني من اول نظره مثلا؟!.. 

غمزلها يونس وقال

لا بصراحه بس كنتي عجبااني اووي وانا ما فيش واحده تعجبني بسهوله.. 

شهد بسخريه

اومال لو كانو بيعجبوك بسهوله كان حصل كنت عرفت بنات ونسوان مصر كلهم.. 

ضحك يونس وقبل ما يرد عليها سمع صوت يوسف بيضحك، فقال لشهد تسكت وقاام رااح وقف في البلكونه من غير ما يشوفه يوسف اللي كان واقف في بلكونة اوضته بيكلم رضوي وقالها.. 

يوسف

بس تعرفي بجد انا بجد حياتي ما نورتش غير لما انتي دخلتيها.. 

يونس بصوت عالي للحارس

بقولك يا ابني افصلي الكهربا عن اوضة البيه.. 

يوسف

ليه ان شاء الله عملتلك ايه انا؟!.. 

يونس بسخريه

كفايه نورها عليك نوفر كهربا شويه بقي.. 

ضحكو الحراااس تحت كلهم ويوسف بصلهم بغيظ وقال

حتي انتو كمان مركزين ما فيش خصوصيه في البيت خالص.. 

طلعت شهد البلكونه وقالت

في ايه يا يونس ما تسيبه براحته.. 

يونس بحده 

انتي طالعه كده ازاي ادخلي جوه انتي كمان.. 

يوسف 

بقولك ايه يا ماما تعالي نسهر سوا علي فيلم هندي من اللي بتحبيهم وسبيه لوحده.. 

يونس

مش لما تخلص محن في التلفون الاول، يلا ننام يا شهد ده فااضي واعمل حسابك يلا هتتأخر بكره في الشغل هيتخصملك... 

_قال كلامه ودخل جوه هو وشهد اللي كانت بتضحك علي مناكفتهم لبعض، ويوسف قال لرضوي بهدوء.. 

يوسف

انتي لسه معايا؟ 

رضوي

امم هو انت ليه كده انت وباباك ديما عاملين زي توم وجيري

يوسف

ما اعرفش حاططني في دماغه ليه الراجل ده 

طلع يونس تاني وقاله

وانت مين يالا عشان احطك في دماااغي، والراااجل ده هو انا واحد. من الشارع ده انا ابووك يا ابن الكلب.. 

يونس

اغلط براحتك ولا عاملي اي قيمه قدامها، انا دااخل وسيبهالك 

يونس

احسن مش ناقصين محن علي المسا.. 

ــــــــــ #بقلم_الكاتبه_رحاب_القاضي ــــــــ

_وفي شقة عبدالله دخلت عليااء وهي متعصبه جدا وراحتله اوضته ولقيت قااعد وحاطط راسه بين ايديه وشكله حزين. جدا... 

علياء

انت عملت ايه في روان؟ 

رد عليها بجمود وقال

خير حصل ايه؟ 

علياء

انا اتلككت وبعتهالك عشان. تتكلمو وتتصالحو انا شايفه وعارفه انها وحشتك، تقوم ترجعها لبيت خالك وهي منهاره ودمعتها علي خدها عملت فيها ايه؟ 

عبدالله 

هبقي احل. كل. حاجه.. 

علياء

تحل ايه وتهبب ايه هي ما قالتش غير انها عايزه تطلق منك، بس لو قالت السبب اقسم بالله هتطلق وما حد هيقل معاك

عبدالله 

اطمني يا امي انا مش هطلقها انا بس كنت بربي مراتي بطريقتي

علياء بحده 

تربيها علي ايه غلطت في ايه وهي علي زمتك، مااشي لما غلطت وقتها انت مديت ايدك عليها وعاقبتها بس دلوقتي ليه كده، هي عملت ايه عشاان تظلمها كده 

عبدالله 

ورحمة ابويا عندك كفايه انا تعبان وهموم الدنيا كلها فوق راسي فسبيني في حالي.. 

علياء بحزن. 

هسيبك يا عبدالله بس ما تخليش عِندك ونشفان راسك ده يخسرك مراتك واهلك اللي كلهم بيحبوك.. 

_قالت كلامها وسابته وراحت اوضتها، وهو مسك موبيله وكلم عز اللي رد. عليه وقال.. 

عز 

نعم عايز ايه مش عملت اللي في دماغك وخربت علاقتك بمراتك وبخالك عايز ايه تاني يا ابن اختي؟ 

عبدالله

هاجي بكره عشان اصلح الموضوع واخد روان وارجع البلد 

عز. بحده 

هي لعبه في ايدك. يالا انت فاااكر ايه 

عبدالله

يا خالي ما انا قايلك كل حاجه 

عز بعصبيه

مش مبرر يا حبيبي انك تهينها وتطلقها والله واعلم عملت ايه تاني النهارده وترجع تقول عايزها فنقولك اتفضل خدها ودوس علي كرامتها بالجزمه احنا موافقين 

عبدالله بضيق

والمطلوب ايه؟ 

عز 

انت تيجي بكره لما انا اكلمك واقولك تيجي اكون ظبطت الدنيا مع خالك، ولما تيجب يحلها حلال واقفل دلوقتي مش فاضيلك.. 

عبدالله

ماشي يا خالي تصبح علي خير.. 

_قفل معاه عز وكان قاعد مع فيروز في بيتها، وهي حطت القهوه قدامه وقالت بهدوء.. 

فيروز

اتغيرت فعلا يا عز بقيت راجل

عز 

ما تلمي لساانك احنا اتفقنا نتكلم من غير ما نغلط في بعض

فيروز

قصدي يعني انك لما كبرت بقي عندك. حتت عقل وبتحل مشاكل اهو، حتي النهارده حسيتك انت ابو العروسه اكتر من حسن 

عز 

رضوي دي بنتي بجد وصاحبتي وبنت عاقله كده وتحبي الكلام معاها، وولاد حسن كلهم انا بقالي عشر سنين عايش معاهم فبعتبرهم ولادي واكتر كمان.. 

وقام قعد جنبيها وقال

وبعدين ايه كبرت دي ما انا لسه في عز شبابي اهو.. 

فيروز

قوم اترزع مكانك ابنك ممكن يجي في اي وقت

عز بخبث

لا ما انا خليت الواد طارق ما يخليهوش يجي

فيىوز بغيظ 

تصدق انك بارد وبجح مش مكسووف من نفسك وانت بتقول كده قدام الولاد 

عز

ايه اللي قولته انا يا بومه يا نكديه، وبعدين هو حرام ولا عيب اني عايز اقعد مع مراتي لوحدنا شويه 

فيروز

اتلم. يا عز مش وقته خالص

عز 

لا وقته ونص خلاص بقي خلينا نبدأ من جديد، وانتي بنفسك اهو شايفه اني اتغيرت

فيروز

خايفه اثق فيك واصدقك اعملها ازاي وانت اتجوزتني تاني اهو بعد ما كدبت عليا

عز 

طيب انا عايز اسألك سؤال وتردي بصرااحه وحياااة ابنك يا شيخه، انتي لسه بتحبيني ولا لا؟.. 

_اتملت عيونها دموع وبصت الناحيه التانيه وهو ابتسم بهدوء ومسك. ايدها وباسها وقال.. 

عز 

انا اسف والله اسف وندمت ندم عمري اني سيبتك ولو عليا كنت رجعت من زمان بس ما كنتش فاكر الوضع كده، انا افتكرت انك نسيتي وعيشتي حياتك قولت كفايه اللي حصل بلاش ارجع واخربلك حياتك تاني، بس والله وحيات زين انا لو كنت اعرف الموضوع كويس كانت حاجات كتير اتغيرت.. 

اتنهدت بضيق ومسحت دموعها وقالت

خلاص يا عز اللي حصل بقي، انت غلطت لما سيبتني وانا غلطت لما حرمتك من ابنك 

عز 

اوعدك والمره دي بجد ان كل حاجه هتبقي مختلفه وهتبقي علي مزاجك انتي وزي ما تحبيها انتي.. 

فيروز 

يعني مش هصحي من النوم الاقيك مش جنبي واختفيت وسايبلي ورقه ومطلقني فيها 

عز بخبث

انتي بس خليني انام جنبك وابقي حيوان لو سيبتك ومشيت تاني. 

ضحكت بهدوء

انت اصلا حيوان اوعي كده هخلص شوية حاجات في المطبخ 

عز 

مع بعض من النهارده كل حاجه هنعملها مع بعض.. 

ــــــــــ #بقلم_الكاتبه_رحاب_القاضي ــــــــ

_وفي شقة عز وصل زين في الوقت ده ولقي طارق قاااعد علي السفره وقدااامه طبق كبير ملياان اكل... 

زين

انت بتعمل ايه؟ 

طارق

جعان ما اكلتش كويس لما كنا بنتعشي تعالي كل 

زين 

لا انا شبعان هو بابا فين؟ 

طارق

عند امك 

زين 

نعممم انت بتقول ايه؟ 

طارق

اه والله زي ما بقولك كده ابوك عند امك وبيقولك بات هنا النهارده ما تروحش وترخم عليهم 

زين بحده 

ما تهزرش يا طارق بابا فين؟ 

طارق

وانا اهزر معاك ليه والله ابوك عند ام... اااه فهمت سوري يا زين بس هو ده بجد يعني ابوك عند امك عريس بقي وكده 

زين بغيظ 

اخرس يا طارق وبعدين مش انا قولتلك انت اللي توصل امي.. 

طارق

ابوك قالي هو اللي هيوصلها اقطع برزق الراجل ليه انا 

زين 

والله انت رخمم اطفح وانت ساااكت انا دااخل انام.. 

_ودخل زين اوضته ورزع الباب وراه بعصبيه وطارق ضحك ببلاهه وقال لنفسه بسخريه

طارق

والله عيله مجنونه.. 

ــــــــــ #بقلم_الكاتبه_رحاب_القاضي ــــــــ

_وتاني يوم الصبح في شقة كمال كان نايم ودخلت عنده اسرار وقربت منه وقالت بهدوء.. 

اسرار

كمال يا كماااال.. 

فتح عيونه وقال بضيق

في ايه مش انا قولتلك اني اجازه النهارده

اسرار

وانا كنت هسيبك تنام بس عبدالله بره، قوم البس هدومك واطلعله لحد ما اقدمله حاجه يشربها 

كمال بهدوء

طيب بعد ما تعمليلو حاجه يشربها تيجي تقعدي هنا 

اسرار

ولو قعدت معاه فيها ايه، انا بفكر اصلا ياخدني معاه اقعد مع مرات عمي شويه

كمال بحده 

لا ما فيش طلوع من هنا يا اسرار غير معايا، واقولك علي حاجه لا تعمليله حاجه يشربها ولا زفت اترزعي هنا.. 

اسرار بغيظ

هو ايه اللي انت بتعمله ده، انت مستوعب بتتصرف معايا ازاي يا كمال اللي بره ده اخوك ويعتبر اخويا انا كمان 

كمال بغضب

كلمه كمان وهيبقي صباح اسوود علي دماغك خلصنا خلاص.. 

_وقاام لبس التيشرت بتاعه وطلع عند عبدالله وهي دموعها نزلت بحزن، وبعد شويه كان قااعد. بيتكلم هو وعبدالله في الشغل وعبدالله قاله بقلق

عبدالله

هي اسرار تعباانه ولا حاجه؟ 

كمال

لا ليه بتسأل؟ 

عبدالله

اول ما فتحتلي كان شكلها مدايق، وكمان دخلو وما طلعتش تاني

كمال

نامت يا عبدالله المهم انا هكلم سيف يرجع تاني الشركه عشان خاطري

عبدالله

انا مش طايقه يا كمال هو ما طلبش مني حاحه وقولتله عليها لا، فـ ليه يسرقني؟ 

كمال

غلطه ومش هتتكرر وبعدين البت اللي هو متجوزها دي شيطانه ولاعبه في دماغه وعملاله غسيل مخ 

عبدالله 

طيب كلمه وشووف الدنيا وابقي هات اسرار ورضوي وتعالي اقعد مع امك شويه قبل ما نرجع البلد 

كمال

لا انا هروح اجيبها كمانزشويه تقضي معانا اليوم هنا وانت كمان تيجي تتعشي معانا 

عبدالله 

مش النهارده رايح لخالك عز وخالك حسن عشان موضوع روان

كمال

قررت ايه صح هتطلقها خلاص؟ 

عبدالله 

لا مش هطلقها هلم الموضوع 

كمال

ياريت والله كلنا واخدين بالنا انها اتغيرت 180 درجة عشااانك.. 

عبدالله 

اللي فيه الخير يقدمه ربنا وابقي سلملي علي اسرار ورضوي.. 

كمال

ما خليك قااعد انت رايح فين دلوقتي؟ 

عبدالله 

هخلص كام حاجه معايا في الشركه عشان هرجع الصعيد بكره خلاص.. 

كمال

تمام ولو احتاجت حاجه كلمني.. 

_مشي عبدالله وكمال قفل الباب ودخل اوضته لقي أسرار قااعده مدايقه وعيونها كلها دموع فقالها بهدوء.. 

كمال

هي رضوي فين؟ 

اسرار

عندها كورس رسم اونلاين فقااعده في اوضتها

كمال

انا اللي علمتها الرسم علي فكره لما كنت فاضي

اسرار

امم. ما هي قالتلي

قعد كمال جنبيها وقال

غيرتي عليكي دي حاجه ما تزعلكيش علي فكره

اسرار بدموع

لا دي مش غيره يا كمال انت قاصد تفكرني اني في يوم كنت بحب عبدالله، بس لو الموضوع ده مأثر فيك لحد دلوقتي ما كنتش اتجوزتني

كمال بنبره غاضبه

موضوع واتقفل وانا مش بغير عليكي من عبد.الله بس لا من عبدالله واي راجل تاني.. 

سكتت اسرار وهو اتنهد بهدوء وقال

 بعد ما رضوي تخلص الكورس بتاعها ده، اجهزي انتي وهي وهننزل نقضي اليوم بره النهارده

اسرار

خد بنتك براحتك انا مش نازله مع حد 

كمال

لا هتيجي معانا عشان نشتري الحاجات بتاعت الجامعه عشان خلاص هقدملك علي تجاره انجلش زي ما قولتيلي

سكتت اسرار وما ردتش عليه وهو قال

ايه مش عايزه نقدم خلاص

ردت عليه بسرعه وقالت

لا عايزه طبعا.. 

ضحك بهدوء وقال

يبقي تسمعي الكلام وبلاش نكد والنبي انا ما بكرهش قد الست اللي تقلب وشها عليا.. 

اسرار

ما هو من تصرفااتك معايا 

كمال

لو بتسمعي الكلام من غير ما تقولي لا وتعندي معايا مش هتعصب عليكي، بس معلش شويه شويه هنفهم بعض اكتر وهتبقي حياتنا حلوه زيك. كده.. 

ابتسمت بخجل وقالت

هروح اشووف رضوي خلصت ولا لسه 

كمال

واعمليلي قهوه طيب.. 

ــــــــــ #بقلم_الكاتبه_رحاب_القاضي ــــــــ

_وفي بيت الاستاذ حسن كان الباب بيخبط ورااحت ليلي فتحت وكان يوسف اللي قالها.. 

يوسف

صبااح الفل يا طنط. 

ليلي بقلق

صباااح النور يا حبيبي في حاجه ولا ايه؟ 

يوسف

لا ما فيش بس جاي اخد رضوي عشان اوصلها الشغل

ليلي

اهلا وسهلا طيب تعالي اتفضل هي بتجهز جوه، معلش البيت مكركب من امبارح كلنا نمنا بقي وما حدش عمل حاجه.. 

قعد يوسف علي الكنبه وقال

لا عادي ما فيش مشكله، معلش بس استعجلي رضوي عشان انا كمان عندي شغل

طلعت في الوقت ده رضوي من اوضتها وليلي قالت

اهي جات اهي عي بتجهز اول واحده وبتروح سغلها اول واحده انشط واحده في عيالي

رضوي اتفاجئت بوجوده وقالت

انت ايه اللي جابك بتعمل ايه هنا دلوقتي

يوسف

شايفه يا طنط ده بدل ما تقولي اهلا وسهلا صباح الخير منورنا.. 

ليلي

معلش هي بس تلاقيها اتفاجئت، رحبي بخطيبك لحد ما اشووف ابوكي خلص لبس ولا لسه عشان يجي يسلم عليه

يوسف

لا ما لوش لازمه يا طنط احنا هنمشي علي طول

رضوي

هنمشي نروح فين انا عندي شغل

يوسف

ما انا. جاي اوصلك في طريقي.. 

رضوي ابتسمت وقالت

طيب يلا بينا عشان ما نتأخرش.. 

يوسف

بعد اذنك يا طنط.. 

ليلي

يا ابني طيب استنو نجهز فطار ونفطر كلنا

يوسف

هنفطر في الطريق انا ورضوي بعد اذنك.. 

_ومشيو هما الاتنين وليلي قفلت الباب وراااهم ودخلت عند حسن اللي كان لسه بيلبس هدومه وقالتله.. 

ليلي

يوسف كان بره

حسن

عارف ولو كنت طلعت كنت هقول كلام يزعله 

ليلي

ليه كده ده الواد زي العسل والله 

حسن 

في اصول يا ليلي هما يدوب مخطوبين يعني الصرمحه دي ما تعجبنيش هيجي هنا يبقي يكلمني الاول يستأذن عايز يوصلها برضو يكلمني او يكلم اخوها ويستأذن الحكايه مش ساهله... 

ليلي

طيب انا هخلي رضوي تفهمه بس والنبي بلاش مشااكل ده انا ما صدقت انها اتخطبت ولواحد بيحبها وهفضل حاطه ايدي علي قلبي لحد ما ربنا يتمملها بخير

حسن

عز باعتلي رساله بيقولي عبدالله جاي بالليل عايز ياخد مراته معاه ويمشي

ليلي بغيظ

خدته عقربه هو ليه عين يجي انت يرضيك يعني اللي عمله في بنتك ده

حسن بحزن

لا طبعا بس.. 

ليلي بحده 

ما بسش يا حسن انا مش عايزه اخرب علي بنتي بس اللي عمله عبدالله ده صدمني فيه انا كنت باجي علي بنته عشاانه زي ما كنت بعمل مع اللي ما يتسمي سيف، وفي الاخر ايه يبهدلو بناتي طيب خليه يجي النهارده وانا هوريه ازاي يقولها الكلام اللي قاله ده.. 

حسن 

ربنا يسترها يا ليلي بس امسكي اعصاابك شويه، عبدالله مش زي سيف هو غلط وهنشد عليه بس انا مش عليز بنتي تطلق يا ليلي وخصوصا انها بتحب جوزها وهو كمان بيحبها، هما بس مش عارفين يتفاهمو عشان لسه ما اخدوش علي بعض وخياتهم وشخصياتهم مختلفه برضو

ليلي 

بس بنتي بتيجي علس نفسها عشااانه يا حسن كتير، روان اتغيرت اووي عشاانه هو مش مقدر ده وكمان يهينها ويجرح كرامتها ليه متجوز واحده من الشارع، بس يجي بالليل والله لاوريه.. 

ــــــــــ #بقلم_الكاتبه_رحاب_القاضي ــــــــ

_وبالليل في بيت الاستاذ حسن كان قااعد عبدالله هناك ومعاه عز الدين وحسن وطارق وليلي اللي قالت بجمود.. 

ليلي

اومال امك فين؟ 

رد عليها عبدالله بهدوء وقال

عند كمال النهارده.. 

ليلي

كويس عشان لو كانت جات كان غصب عني هحترمها لانها ست محترمه وما كنتش هغلط فيك قدامها.. 

عز بقلق

ليلي الكلام بالعقل.. 

ليلي بحده 

وهو كان فين عقله في اللي عمله في بنتي، قولت لخالك عليه ولا لا.. 

عبدالله بهدوء

مشكله بيني وبين مراتي يا مرات خالي وانا جاي اخدها اهو وهنصلح كل حاجه، وبعدين حتي لو غلطتي فيا انا مسامحك ده انتي امي التانيه.. 

ليلي بغيظ

هيعملي فيها مؤدب ويخليني اسكت ويفرسني.. 

حسن بضيق

بص يا عبدالله روان قفلت موضوع الرجوع ده خالص، فيا ابني من غير ما نزود المشاكل بينا خلينا حبايب وزي ما دخلنا بالمعروف نخرج بالمعروف

عبدالله بجديه

انا مش جاي عشان اطلقها يا خالي، انا ارجع مراتي واخدها وارجع البلد... 

حسن 

اومال لازمته ايه كلامك ليها كل شويه انك عايز تطلقها.. 

ليلي

ورمي عليها يمين الطلاق.. 

عبدالله بضيق

ساعة شيطان ولسه انا وهي بنفهم بعض

طارق 

وانا اختي مش لعبه في ايدك، ساعة الشيطان دي تطلع عصبيتك علي اي حد غيرها.. 

عز 

يا جماعه بالراحه عليه شويه، ايه اللي انتو عايزينه او اللي راوان عايزاااه.. 

طلعت روان من اوضتها وقالت بجديه وثقه 

لو سمحتو القرار ده قراري انا وما حدش ليه دعوه بالموضوع ده غيري، انا اللي عايزه اطلق.. 

رد. عليها عبدالله وقال

وانا مش هطلق يا روان وده اخر كلام عندي

روان بهدوء

يبقي هخلعك وانت اللي جيبته لنفسك.. 

ليلي 

خلصت كده بنتي قالت اللي عندها، اظت هتكلقها بعني هتطلقها يا عبدالله عشان دي مش راميه عليك دي بنت ناااس لما تهين كرامتها هتعرف ترد عليك هي وناسها.. 

وقامت واخدت روان في حضنها وقالت

تعالي يا حبيبتي جوه وابوكي واخوكي يحلو الموضوع وهيطلقك ورجله فوق رقبته وهجوزك سيد سيده كمان.. 

_قالت ليلي كلامها واخدت روان ودخلو اوضتها، وعبدالله اتنهد بنفااذ صبر وعز قال بهدوء

عز

طيب نتكلم بقي كلام رجاله، احنا نسيبهم. فتره يا حسن. يهدو ويفكرو علي مهلهم وبعد الفتره دي يبقي القرار لهيم. هما الاتنين لا انا ولا انت يا حسن ولا ابنك ولا مراتك ليهم دخل فيه، روان وعبدالله بس اللي يقررو عايزين يكملو ولا لا.. 

حسن

انا ما عنديش مانع.. 

عبدالله بضيق

انا شايف ان الموضوع مش مستاهل الدوشه دي كلها.. 

عز بغيظ

انت تخرس خالص بقي عشان انت بقيت مستفز.. 

ــــــــــ #بقلم_الكاتبه_رحاب_القاضي ــــــــ

_وبعد اكتر من شهرين عدو علي ابطالنا.... 

_كانت أسرار راجعه من الكليه بتاعتها ومعاها رضوي اللي كانت جايه من المدرسه واول ما دخلت شقتها راحتلها الشغاله وقالت.. 

_في واحده جات من ربع ساعه تقريبا وعايزه حضرتك يا مدام أسرار، وقاعده في الريسبشن جوه.. 

أسرار

مين دي؟ 

_ما اعرفش انا ما شوفتهاش ابداً جات هنا.. 

أسرار

طيب خدي رضوي خليها تغير هدومها.. 

_سمعت الشغاله كلامها واخدت رضوي لاوضتها، وراحت أسرار للضيفه المجهوله واول ما شافتها كانت واقفه قدام الشبااك ومدياها ضهرها.. 

أسرار

مين حضرتك؟ 

بصتلها شرين من فوق لتحت بسخريه وقالت

انا شرين مرات سيف ابن خالة جوزك، بس حقك ما تعرفنيش ما هو ما فيش واحده تعرف عشيقة جوزها.. 

_اتصدمت أسرار من اللي سمعته و؟؟...... 

"تفتكرو هيحصل ايه؟" 

ــــــــــ #بقلم_الكاتبه_رحاب_القاضي ــــــــ

_و في المستشفي كان واقف راجل في ال50 من عمره وهو متوتر وقلقان جدا، وجات في الوقت ده سوازان مامت نيللي وقالتله بقلق.. 

سوزان 

في ايه يا فتحي مالها نيللي؟ 

فتحي. بضيق

مش عارف كانت عندها جلسه في المحكمه بيقولو تعبت وجابوها علي هنا وكلموني جيت لقيت واحد. من الموظفين زمايلها خليته مشي وكلمتك، انتي بقالك اد ايه ما شوفتيهاش؟ 

سوزان

من وقت ما كان متقدملها ابن الصاوي وبعدين انا سافرت ولما رجعت وحبيت اقابلها كانت بتقولي انها مش فاضيه

فتحي بحده 

انتي لو كنتي عايزه تقابلي بنتك كنتي هتقابليها.. 

سوزان بغيظ

بقولك ايه بدل ما تحاسبني حاسب نفسك انت بقالك اد ايه ما سألتش عليها سنه لا حرام اظلمك اقل شويه مش كده.. 

_قبل ما يرد عليها فتحي طلع الدكتور وسوزان سألته بهدوء وقالت... 

سوزان

خير يا دكتور طمنا نيللي مالها؟ 

الدكتور

خير يا مدام ان شاء الله الف مبروك. المدام حامل.. 

_ اول ما الدكتور قال كلامه اتصدمت سوزان هي وفتحي وبصو لبعض بصدمه وو؟؟..