عند نورة فى البدروم

قاعده وسانده على الباب وخلاص صوتها راح من الصريخ وبتبص حوليها بخوف قامت بتعب وهى حرفياا من قادرة تقف على رجليها من الخوف وراحت نامت على السرير الحديد وغمضت عينيها وبتكلم نفسها بصوت مسموع وهى منهارة:غمضي عينيك يانورة ... متخافيش... انتى كويسه اوعى تفتحى عينيك..فكرى فى الناس اللى بتحبيهم وبيحبوكى....فكرى فيهم هما وبس بلاش خوف....فكرى فى ماما وبدات تفتكر مواقف ليها مع مامتها

وفى يوسف وفضلت تفتكر مواقفها مع يوسف وكل مرة وهو بينادى عليها نوراه قلبي

وفى فيروز بدات تفتكر جنانها هل وفيروز وموافقهم سواا وضحكت بصوت عالى

وصفصف ونيرو .....كل دول بيحبوكى يانورة .....

نورة سكتت شويا:فكرى فى امير يانورة بدات تفتكر لما امير جه عشان يتقدملها

••فلاش بااااااك••

فى اوضه نورة كان واقفه قدام المرايه ولابسه دريس بسيط بلون اللافندر وفى ورد بلون الابيض وطرحه وشوز بلون الابيض مع بعض اللمسات الخفيفه من الميكب وكانت قمرايه بس كانت متوترة وجسمها كله بيترعش

فيروز:ماتهدى بقي يابنتى هتموتى من التوتر

نورة:قلبي هيقف يافيروز سامعه بيدق ازاى

فيروز ضحكت عليها:والله مجنونه مش انتى اللى كنتى بتستنى اللحظه دى من زمان

نورة لسه هترد عليها اتخضت لما الباب اتفتح

فيروز ضحكت عليها

يوسف دخل وقرب منها:زى القمر يانوارة قلبى

نورة بفرحه:بجد حلوة

يوسف:حلوة بس دانتى جميله فوق الوصف

نورة:الحمدلله

فيروز:اخيراا اقتنعتى بقالى ساعه بقولك حلوة حلوة

يوسف:يلا ياحبيبتى عشان نخرج

نورة بخوف:اخرج فين لالا مش خارجه انا هنا حلوه

يوسف:هنا حلوة ازاى والراجل اللى قاعد برا ده اقوله ايه

فيروز:قوله مش موافقه

نورة:لا طبعاا موافقه

يوسف وفيروز ضحكو عليها

يوسف:طب يلا

يوسف مسك ايد نورة وخرجو ماكنش فى غير مامتها وصفاء ونيرة وامير مش معاه حد لانه اهله متوفين ومالوش غير خال عايش فى امريكا

نورة سلمت على امير ويوسف قعدها جمبه وراح قعد جمب فيروز وقرو الفاتحه وكانو مبسوطين

بعد شويا امير ونورة واقفين فى البلكونه سوا

امير شايف توتر نورة وايدها اللى بتترعش:مبروك يانورة

نورة بصتله:الله يبارك فيك

امير:نورة انا شوفتك مرة واحده بس لما اتقابلنا فى مكتب يوسف ومن وقتها وانا معجب بيكى وعشان كدا طلبت ايدك من يوسف ويارب تكونى مبسوطه

نورة ابتسمت بخجل وهزت راسها باه

امير:طب الحمدلله ان شاء الله ننزل نجيب الشبكه من محل باباكى الله يرحمه انا ويوسف اتخنقنا كتير عشان هو عايز يجيبلك شبكتك بس انا موافقتش الصراحه لان شبكتك لازم انا اللى اجيبها مش هو ولا انتى ايه رايك

نورة:اكيد من حقك

نورة وامير اتكلمو كتير اوى سوا ونورة ارتاحت ونست توترها واتكلمت بطبيعتها مع امير اللى اكتشف انها شقيه ومجنونه جداا وبعدها استاذن ومشي ونورة كانت طايرة من الفرحه

••باااااااك••

نورة كانت لسه مغمضه عينيها وبتفتكر وهى مبتسمه وافتكرت مواقف كتير لحد مانامت من التعب

****************

يوسف رجع على البيت وكان موعوب على نورة وهناء شافته:مالك ياحبيبي كنت متعصب وخرجت وانت بتجرى

يوسف:مافيش ياست الكل مشكله فى الشغل

هناء:واتحلت ياحبيبي

يوسف:الحمدلله

هناء:فيروز رنت عليك كتير وانت كنت سايب فونك هنا

يوسف:هكلمها اهو

*****************

فى منتصف الليل عزام رجع الفيلا ودخل قرب من باب البدروم وبدا يسمع لكن مسمعش اى صوت فتح الباب ونزل وبص على نورة من الفاتحه اللى موجوده فى باب الاوضه شافها وهى متكومه زى الجنين ونايمه على السرير وسامع شهقاتها اللى بتدل انها نامت وهى معيطه وطلع تانى وراح على جناحه ودخل اخد شاور وخرج نام على السرير بس مش قادر ينام ولا قادر ينسي شكلها وهى بتترجاه عشان يخرجها وانها بتخاف من الضلمه وصوت صريخها اللى كان مالى الفيلا كلهااا وقام من على السرير وخرج البلكونه الكبيرة اللى فى جناح ورمى نفسها فى حمام السباحه وخرج كل غله وخنقته فى اكتر حاجه بيحبها وفضل رايح جاى فى حمام السباحه الكبير

*******************

عند يوسف دخل الاوضه ومسك فونه ورن على فيروز اللى ردت عليه :انت فين يايوسف

يوسف:كان عندى شغل ونزلت ونسيت التلفون فى البيت

فيروز حست انه مخنوق:يوسف انت كويس

يوسف:كويس يافيروز انتى كنتى عايزانى فى حاجه ضروريه

فيروز:اه فى حاجه ضرورى وانا قاعده مستنياك من بدرى على السطح

يوسف اتنهد بتعب:مينفعش تستنى لبكرة

فيروز:لا يايوسف دى حاجه ضروريه جدااا تخص عمى

يوسف:عمك هو جالكو تانى

فيروز:ممكن تطلع الاول

يوسف:جيلك اهو

يوسف خرج من شقتهم وطالع على السلم ووصل عن شقته وشاف الباب مفتوح حته صغيرة وهو استغرب لان مافيش حد معاه مفتاح الشقه دى غيره وفتح الباب ودخل واتفاجأ بالصاله متزينه بالبلالين والشموع وفى كيك على التربيزة وفيروز واقفه فى نص الصاله ولابسه دريس طويل سك بلون الازرق وسايبه شعرها نازل على ضهرها وعمله ميكب بسيط وكانت جميله جدااا ودى كانت اول مرة يوسف يشوف فيروز بشعرها

يوسف دخل وقفل الباب وقرب منها واضاءه الشقه كانت خفيفه

يوسف:ايه كل ده

فيروز ضحكت:كل سنه وانت طيب يايوسف

يوسف كان نسي عيده ميلاده اصلا بسبب اللى حصل

يوسف ابتسم:وانتى معايا يافراشه قلبي

فيروز:ايه رايك فى المفاجأه بقي