صباح يوم جديد فى حارة البطل .

كالعاده البنات صحو من بدرى على صوت الدوشه اللى فى شوارع الحارة .

لارا بنوم:وطو الصوت ده شويا .

رغد ورهف ضحكو عليها .

رغد:لا ياروحى انتى مش نايمه فى الڤيلا قومى يلا .

لارا قامت قعدت بنوم:بس انا عايزة انام اوى .

رهف:خلاص يالولى نامى شويا .

لارا نامت على السرير وراحت فى النوم من تانى .

رغد بصتلها:والله يابختك يالولى نفسي اقدر اعمل زيك .

رهف:هنعمل ايه ؟!

رغد:هنقوم نفطر هنعمل ايه يعنى .

رهف:تعالى نصلى الصبح وبعد كدا نجهز الفطار .

رغد:يلا .

البنات قامو صلو وبعد كدا دخلو المطبخ وجهزو الفطار سوا ولارا صحت وفطرو كلهم سواا .

رغد قامت من على السفره لما فونها رن برقم محمد .

رغد:صباح الخير يا دوك .

محمد:رغد فى مصيبه ولازم تيجى .

رغد:فى ايه يامحمد ؟!

محمد:البنت اللى انتى مسؤله عن حالتها المفروض ليها عمليه النهارده والمفروض ان فؤاد يعملها بس هو رافض ورفض حتى انى ادخل اتابع وبيقول خلى الدكتورة تستحمل اخطاءها .

رغد:تمام يامحمد جهز كل حاجه وتابع البنت لحد مااجى .

محمد:انتى هتيجى بجد يا رغد طب وعمك ؟!

رغد:لازم اجى يامحمد جهز بس انت كل حاجه وكلمنى لو حصل جديد .

محمد:تمام يارغد .

رغد قفلت مع محمد ولفت كانت رهف واقفه وراها وسامعه المكالمه:انتى راحه القاهرة يارغد ؟!

رغد:لازم اروح يارهف البنت لو معملتش العمليه احتمال تموت وهيبقي بسببى .

رهف:طب وعمو ومازن لو شافوكى ؟!

رغد:اكيد يعنى مش هيبقي واقفلى على باب المستشفى يارهف واللى ربنا عايزه هيكون ياحبيبتى .... انا لازم اجهز بسرعه عشان انزل .

رغد دخلت الاوضه لبست سوت بلون الفيروزى وطرحه بلون الابيض واخدت كل حاجاتها فى الشنطه ونزلت بسرعه ومحمد رن عليها .

رغد:ايه يامحمد ؟! ... تمام جهز كل حاجه وانا جايه فى الطريق .

رغد كلمت اوبر عشان يوصلها واكتشفت انها ناسيه الملف الخاص بالحاله ... رنت على رهف وقالتلها تحدفلها الملف .

حسن كان خارج من الورشه وشافها وكانت جميله جداا فى اللون ده .

ام فرح شافتها:بسم الله ماشاء الله ... ايه الجمال ده يارغد .

رغد ابتسمت:تسلميلى ياام فرح عيونك اللى حلوين .

لارا نزلت وكان معاها الملف:الملف يارغد .

رغد باستها:تسلميلى ياقلب رغد ... يلا اطلعى وبلاش شقاوة متتعبيش رهف .

لارا:اوكى ... باى .

رغد:باى .

وفى الوقت ده وصل التاكسي ورغد راحت ركبت بسرعه .

حسن كان عينه عليها وفاق على صوت حنين:سرحان فى ايه ياابو على ؟!

حسن بصلها:ولا حاجه ... انتى راحه فين كدا ؟!

حنين:مانا قولتلك امبارح انى هروح مع واحده صاحبتى عشان نطبع المذكرات للاولاد فى المكتب .

حسن:صح نسيت .

حنين:اللى واخد عقلك يا بطل .

حسن:خفى وروحى مشوارك عشان ماتتأخريش .

حنين بصت على بيت الشهاوى:هو انا ينفع اطلع اشوف الدكتورة ؟!

حسن:الدكتورة خرجت من شويا ....وبعدين تطلعى تشوفيها بتاع ايه يلا اتوكلى على الله .

حنين:عشان كدا واقف سرحان يابطل الابطال .

حسن ضحك:هتمشي ولا ارجع فى كلامى .

حنين:لا همشي ياحبيبي طبعاا.

حسن:اجبلك فلوس معاكى ؟!

حنين:بابا حبيبي ادانى .

حسن:طب يلا روحى ومتتاخريش .

حنين:حاضر يابطل .

حنين مشت وحسن دخل الورشه. 

بقلم الكاتبه جنات 

ـــــــــــــــ★ــــــــــــــ

فى القاهرة وتحديدا فى شركه الصاوى .

مؤمن قاعد فى مكتبه ومركز فى الملف اللى قدامه ... دخل عليه مازن من غير مايخبط .

مؤمن بصله برفعه حاجب:اظن فى حاجه اسمها باب اخترعوه عشان الناس تخبط عليه قبل ماتدخل زى الحمير كدا .

مازن:بنات عمى فين ؟!

مؤمن رجع بضهره وسند على الكرسي:وانا ايش عرفنى .

مازن:انا متاكد انك عارف مكانهم يامؤمن واكيد بنتك كمان معاهم .

مؤمن:وبنتى هتبقي معاهم ليه ... بنتى فى بيتى مع دادا بتاعتها ... وانت شغال نفسك بيهم ليه مش فاهم !!

مازن:لا ابدا انا بس قلقان عليهم من وقت الحريق وهما مختفين .

مؤمن:مش يمكن ماتو فى الحريق ؟!

مازن:الظابط قال ان ماكنش فى حد جوا الڤيلا حتى الخدم ... وبعدين لو كانو ماتو كانت بنتك هتموت معاهم .. وانت لسه قايل بلسانك انها فى بيتك .

مؤمن اضايق منه:والله العلم عند الله ... وبنتى اصلا ماكنتش بايته عندهم ليله الحريق يامازن باشا .... الظاهر كدا اللى بيراقبلك الڤيلا حمار مش شايف شغله كويس. 

مازن:مين اللى بيراقبلى قصدك ايه بكلامك ده .

مؤمن:مش قصدى حاجه واتفضل اخرج عشان عندى شغل ... وتانى مرة تستاذن من السكرتيرة قبل ماتدخل وانا وقتها اقول تدخل ولا تغور من هنا .

مازن اتعصب من طريقه مؤمن وخرج وقفل الباب بكل قوته ومؤمن ملامحه اتحولت من البرود للعصبيه كل ما يفتكر ان بنته واخواتك كانو ممكن يموتو بسبب فاروق وابنه .

بقلم الكاتبه جنات 

ـــــــــــــــ★ــــــــــــــ

بعد وقت طويل رغد وصلت المستشفى ودخلت بسرعه وطلعت على مكتب محمد اللى قالها انه مجهز كل حاجه وراحت عشان تجهز للعمليه .... وفؤاد كان هيتجنن لما عرف انها جت المستشفى وكلم فاروق وقاله .

بعد اكتر من ٣ ساعات رغد خرجت من اوضه العمليات وكان باين عليها التعب والارهاق ومحمد ومها باركولها بنجاح العمليه .

وراحت على مكتبها واول ما دخلت اتفاجت 

بـ فاروق قاعد على الكرسي اللى جمب المكتب .

رغد اتكلمت ببرود:اهلا وسهلا بعمى فاروق  بصراحه مش منور المستشفى خالص .

فاروق:مقبوله منك يابنت اخويا .

رغد قعدت على كرسي مكتبها وبصتله اوى:نعم جاى ليه ؟!

فاروق:فى بنت محترمه ومتربيه تقول لعمها جاى ليه !

رغد:عمها لا والله ... هو انت مصدق نفسك اوى كدا ليه .... وهو فى عم يخطط يقتل بنت اخوه بردو يافاروق بيه !!

فاروق مثل الصدمه:قتل ... ايه الكلام ده يارغد معقول يابنتى تفكرى انى ممكن اعمل كدا .

رغد:وتعمل ابو كدا كمان عشان طمعك وحبك للفلوس يافاروق .

فاروق:تمام يبقي نلعب على المكشوف بقي يابنت خويا ... لو خايفه اوى كدا على اختك .... تتنازلو ليا على الشركه والمصنع .

رغد بصتله اوى مش بترد .

فاروق:هسيبك تفكرى .... واعرفى ان لو خبيتى اختك تحت الارض هجيبها ووقتها محدش هيندم غيرك يارغد .

فاروق قام ولسه هيخرج من المكتب وقف لما سمع رغد بتقول بسخريه:اعلى ما فى خيلك اركبه يافاروق ... بس اوعى وقتها تقع على جدور رقبتك وتتكسر ونرتاح من خلقتك البشوشه دى .

فاروق خرج ورزع الباب بقوة ورغد اتنهدت بقوة وعارفه ان فاروق مش بيهدد وانه صحيح ممكن بسهوله يوصل لرهف لو حب .

رغد دخلت الحمام غسلت وشها وظبطت طرحتها وخرجت ونزلت من باب الطوارئ وكان التاكسي واقف مستنيها زى ما قالتله لانها متاكده ان فاروق هيسيب رجاله يرقابوها ورجعت على اسكندريه .

بقلم الكاتبه جنات 

ـــــــــــــــ★ــــــــــــــ

عند رهف فى حارة البطل فونها رن وكان مؤمن:ازيك يارهف عاملين ايه؟!

رهف:بخير يامؤمن .

مؤمن:برن على رغد من الصبح فونها مقفول وبعد كدا فتحته ومش بترد عليا !

رهف:رغد راحت القاهرة عندها عمليه مهمه .

مؤمن بعصبيه:راحت فين ... ازاى تروح من غير ماتعرفى ... مازن وابوه قالبين الدنيا عليكو .

رهف:انا كلمتها من شويا وقالتلى انها جايه فى الطريق متقلقش .

مؤمن:طب اقفلى يارهف انا جيلكو .

رهف:حاضر باى .

مؤمن:باى .

مؤمن نزل من الشركه وركب عربيته واتاكد ان مافيش حد بيرقبه وطار على اسكندريه عشان يلحق رغد .

بقلم الكاتبه جنات 

ـــــــــــــــ★ــــــــــــــ

بعد فترة رغد وصلت الحارة ونزلت من التاكسي وكان باين عليها التعب من الوقت اللى قضيتها فى العمليه ومن الضغط اللى اتعرضت ليه بسبب فاروق .

بس ابتسمت لما شافت الحاج محمود داخل الورشه هى حبيته جدا لانه فكرها بجدها صالح وارتاحت ليه وقررت تروح تسلم عليه بنفسها .

رغد راحت الورشه وكان محمد واقف على باب:ازيك يامحمد .

محمد:بخير يادكتورة تؤمرينى بحاجه ؟

رغد:تسلم انا شوفت عمو محمود داخل وكنت عايزة ادخل اسلم عليه ممكن .

محمد ابتسم:طبعا دانتى تنورى يادكتورة اتفضلى .

رغد دخلت الورشه ودخلت المكتب بعد ماخبطت وسمعت الاذن من حسن .

رغد دخلت بابتسامه لمحمود:لما شوفت حضرتك داخل الورشه قولت لازم اجى اسلم عليك بنفسي .

محمود ضحك وقام وقف ومد ايده سلم على رغد بحب:احلى حاجه عملتيها يابنتى .

رغد:اخبار حضرتك ايه ؟!

محمود:بخير بابنتى الحمدلله .

رغد بصت لحسن:ازيك ياحسن .

حسن:بخير يادكتورة .

رغد بصت لمحمود:انا بعتلك السلام قبل كدا مع حسن وصلك ولا ؟!

محمود ضحك:وصل يابنتى والله .... اقعدى احنا هنتكلم واحنا واقفين ولا ايه... شوف الدكتورة تشرب ايه ياحسن .

رغد بتعب ظاهر:خليها مره تانيه ياعمو ... انا جايه من القاهرة وبجد تعبانه اوى .

محمود:مالك يارغد يابنتى سلامتك ؟!

رغد اتنهدت:كان عندى عمليه مهمه عملتها وخلصت شويا حاجات كدا وحرفيا تعبانه جداا .... بس اوعدك مرة تانيه اكيد هجيلك ونقعد سوا وندردش لصبح ايه رايك ؟!

محمود ضحك:ده يوم المنى يابنتى والله .

فى الوقت ده دخلت حنين:انا جيت يابشر . بس وقفت لما شافت رغد متعرفش مين دى ؟!

محمود:حمدلله على السلامه يابنتى .

حنين:الله يسلمك يابابا .

محمود بص لرغد وشاور على حنين:دى حنين بنتى اخت حسن الصغيرة يارغد .

رغد:اهلا وسهلا ياحنين

محمود شاور على رغد:ودى الدكتورة رغد حفيده الشهاوى ياحنين .

حنين مدت ايدها وسلمت على رغد:مبسوطه انى شوفتك جدا ... واتمنى نكون اصحاب.

رغد ابتسمت:نبقي اخوات كمان لو تحبي يانونه .

حنين برقت لحسن ورجعت بصت لرغد:اكيد طبعاا ... سمعت ان ليكى اخت تؤام ونفسي اتعرف عليها كمان .

رغد:تشرفينا فى اى وقت يانونه والله .

حنين:حبيبتى يارغد .

رغد:انا همشي انا بقي اشوفكو وقت تانى .

محمود:خدينى معاكى يابنتى ... انا هروح اقعد على القهوة شويا ياحسن .

حسن:هاجى اوصلك يا حاج واوصل حنين بالمرة .

كلهم خرجو من الورشه وفى الوقت ده وصل مؤمن ونزل من عربيته واول ماشاف رغد قرب منها وماخدش باله حتى من اللى حوليه بسبب خوفه وقلقه عليها .

مؤمن:رغد ... انتى ازاى تروحى القاهرة من غير ماتعرفينى ... انا كنت هموت من القلق عليكى .

حنين بصتله ومستغربه هو بيكلم رغد كدا ليه وافتكرت كلام حمزة عن الشاب اللى كان معاها وانه احتمال يبقي جوزها .... وحسن ومحمود استغربو قلقه الزايد عليها .

رغد بصت على محمود واللى واقفين ورجعت بصت لمؤمن:انا كويسه قدامك اهو يامؤمن متخافش ... وبعدين دى كانت عمليه مهمه ولازم اعملها انا بنفسي .

مؤمن:على الاقل كنتى عرفينى يارغد بدل الخوف ده .

رغد:متزعلش يامؤ من هتكرر تانى .

رغد بصت لمحمود اللى مستغرب مين ده:ده مؤمن ابن خالتو منى ياعمو محمود .

محمود:بسم الله ماشاء الله نورت الحارة يابنى .

مؤمن سلم على محمود:منوره باهلها ياحاج وانا اسف مأخدتش بالى منكو بسبب خوفى على الهانم .

رغد ضحكت عليه ومؤمن سلم على حسن كمان:ازيك يابطل ؟!

حسن:بخير يا مؤمن .

محمود:وبعدين متقلقش على رغد ... شكلها جدعه وميتخافش عليها.

رغد:قوله ونبي ياعمو ده بيتعامل معايا على انى عيله صغيرة .

مؤمن:عارف والله ياحاج ... بس خوفى عليها كبير وهى دايما كدا تاعبه قلبي معاها .

رغد:ماخلاص يامؤ بقي انا كويسه قدامك اهو .

رغد بصت لمحمود:عن اذنك ياعمو هنطلع احنا بقي لانى بجد خلصانه .... هابقي استناكى يانونه .

حنين ابتسمت:اكيد يارغد .

رغد طلعت مع مؤمن وحسن وصل الحاج محمود القهوة ورجع مشي مع حنين لحد البيت ورجع على الورشه تانى .

بقلم الكاتبه جنات 

ـــــــــــــــ★ــــــــــــــ

فى محل جزارة بتاع منصور اللى كان واقف هو ومحروسه ومتابع كل اللى بيحصل .

محروسه:البت يعنى جت سكنت هنا وراحه جايخ فى الحارة براحتها وانت واقف تتفرج ومش بتعمل حاجه .

منصور:البت دى مش سهله ومش بتخاف بسهوله انتى شوفتى اخر مرة ولا رمشلها جفن ولا خافت منى انا والرجاله .

محروسه:وهتعمل ايه ياراجل .

منصور بتوهان:البت دى مش بتخاف ... بس اختها حته مزة انما ايه جامده ... هى مش بتخرج من يوم ماجت الحارة بس بشوفها وهى واقفه فى البلكونه .... يمكن نطلع منها بحاجه .

محروسه بشك:حاجه ايه ياراجل ؟!

منصور فاق:قصدى نهددها يعنى .

محروسه:اهاااااااا فكرت ....... ابنك لساله اسبوعين و يطلع و يمكن يقدر يتصرف معاها .

منصور:هيعمل ايه يعنى ؟؟ .. هيروح يسوق البلطجه على بنتين مثلا !

محروسه:ماحنا لازم نتحرك يامعلم ... ولا ناسي المستثمرين اللى انت اخد منهم الفلوس مش بيبطلو زن وعايزين يعرفو هتبدا المشروع امته .

منصور:انا هفكر كويس يمكن الاقى حل .

محروسه:فكر يامعلم فكر .

بقلم الكاتبه جنات 

ـــــــــــــــ★ــــــــــــــ

فى شقه رغد ورهف قاعدين بيتغدو سوا مع مؤمن ولارا الاكل اللى رهف طبخته .... ورغد كان كل تفكيرها فى زياده فاروق ليها .

مؤمن بصلها:مالك يارغد ؟!

رغد:ابدا مافيش بس تعبت النهارده شويا .

مؤمن بصلها وهو مش مصدقها اصلا .

رغد ابتسمت:بجد يارهف تسلم ايدكى الاكل تحفه .

رهف:المفروض ادعى لدادا سلمى لانها هى عملتنى الطبيخ ... غير كدا كنتو هتموتو من الجوع .

مؤمن:فى دى معاكى حق الصراحه .... وحضرة الدكتورة ملهاش فى المطبخ اصلا .

رغد:اتريق اتريق ياخويا .

لارا:بابي انا عايزة ايس كريم .

رغد:وانا كمان .

مؤمن:وانا اجبلكو ايس كريم منين الوقت ؟!

رغد:من السوبر ماركت الله متبقاش بخيل يامؤ !

مؤمن قام وقف:هنزل اجبلكو وامرى لله .

مؤمن خرج من الشقه والبنات لبسو اسدالات ودخلو البلكونه ومعاهم لارا.

لارا:رهف ماتيجى نرسم سوا .

رهف:لسه الاوضه مش جاهزة ولا معايا ادوات يالولى  .

لارا شافت مؤمن جاى من اول الحارة نادت عليه بصوت عالى: بابي .

مؤمن ضحك على بنته وطلع ووقف معاهم فى البلكونه واكلو كلهم ايس كريم وهزرو كتير جدا ومؤمن قرر ينام معاهم وسهرو كلهم فى البلكونه وقضو وقت كله ضحك وهزار وطبعااا كان حسن واقف فى بلكونه شقته ومتابع كل اللى بيحصل .

وبعد شويا وقت لارا كانت عايزة تنام ورهف اخدتها ودخلت الاوضه عشان تنيمها .

مؤمن بص لرغد:احكى .

رغد بصتله:احكى ايه ؟!

مؤمن:انا متاكد ان حصل معاكى حاجه النهارده .

رغد قامت وقفت و سندت على سور البلكونه وبصت لسما:فاروق جالى المستشفى النهارده  .

مؤمن قام وقف:انا قولتلك يارغد بلاش تروحى القاهرة .... حتى ابنه مازن جالى المكتب النهارده .

رغد:جالك ليه .

مؤمن حكالها على اللى دار بينه وبين مازن .

ورغد حكالته على مقابلتها مع فاروق .

رغد:الظاهر كدا حتى لو روحنا اخر العالم هيقدر يوصلنا ... انا كل خوفى على رهف يامؤمن ... انا بجد مرعوبه يحصلها حاجه او يقدر يوصلها .

رغد حطت ايدها على وشها وعيطت ومؤمن قرب واخدها فى حضنه بحب  اخوى:متخافيش يارغد مش هيقدر يقرب منكو صدقينى. 

رغد بعدت عنه ومسحت دموعها:تهديده كان واضح يامؤمن مش هيسكت غير لما نتنازل عن الشركه والمصنع .

مؤمن:وانتى ناويه تتنازلى ؟؟

رغد:لا طبعا ده تعب بابا وانا مش هتنازل عنه ابدااا .

مؤمن:سيبى كل حاجه ماشيه يارغد واللى ربنا عايزه هيكون .

رغد:ونعمه بالله .

مؤمن:انا هدخل انام عشان اصحى بدرى .

رغد:تصبح على خير .

مؤمن باسها من راسها:تلاقى الخير ياقلب اخوكى .

رغد ابتسمت ومؤمن دخل ينام وهى فضلت شويا تشم هوا ورجعت دخلت عشان تنام .

حسن عينه كانت عليها ونفسه يعرف علاقتها بمؤمن ايه غير انه ابن خالتها.

حسن بعد تفكير كبير دخل عشان ينام هو كمان .

بقلم الكاتبه جنات 

ـــــــــــــــ★ــــــــــــــ

صباح يوم جديد فى بيت البطل .

الكل متجمعين على السفرة بيفطرو .

هدى:والله ياحاج بعد حنين ماحكتلى على رغد وانا نفسي اشوفها .

محمود:الايام جايه كتير ياام حسن واكيد هتشوفيها .

هدى:ماحنا نعزمهم ياحاج عندنا ايه رايك ؟!

حنين:فكرة حلوة اوى ياماما. 

هدى:ايه رايك ياحسن ؟!

حسن بصلها:معرفش ياست الكل والله .... اعملى اللى يريحك .

عزة بصت لامها اوى عشان تتدخل 

اولفت بضيق:مش عارفه انتو مهتمين اوى بالبت دى ليه !!

هدى:وانتى مضايقه ليه يااولفت !!

اولفت:اصلك عايزة تعزميها وتدخليها بيتك من غير ماتعرفيهم .

هدى:بيت الحاج محمود دايما مفتوح للغريب قبل القريب يااولفت .... وبعدين احنا عارفين اهلها كويس جداا ومن كلام الحاج وحنين عليها ... شكل البت تدخل القلب طوالى .

عزة:وانتى شوفتيها عشان تحكمى عليها يا عمتى ؟!

حنين:انتى مسمعتيش كلام بابا عليها ياعزة وبابا بيفهم الناس من نظرة .

اولفت:اممم طبعا اومال ايه ده الحاج محمود البطل .

محمود اضايق من الحوار وحب يغير الكلام وبص لحسن:اخوك فين ياحسن مفطرش معانا ليه ؟!

حسن:راح عشان يسلم الشغل الجديد للمعرض ياحاج وقال هيفطر مع الشباب .

محمود قام وقف:ربنا يصلح حالكو يا ولاد ... انا هطلع الشقه فوق .

هدى:ماشي ياحاج دقيقه و القهوة تبقي عندك .

حسن:انا هروح الورشه ياست الكل .

هدى:روح ياحبيبي ربنا يجعلك فى كل خطوة سلامه يارب .

حسن باس راسها:تسلميلى ياست الكل. 

حسن باس حنين من خدها وخرج من البيت .

حنين:ماما انا هشيل الاطباق وهطلع السطح

 عشان نص ساعه والولاد هيوصلو .

هدى بصت لعزة اللى قاعده وماسكه فونها:اطلعى انتى ياحبيبتى وعزة موجوده تشيل معايا ... يلا ياعزة قومى .

عزة نفخت بضيق وقامت تشيل الاطباق وتدخلها المطبخ .

اولفت مسكت فونها وخرجت عشان تكلم ابنها عزت .

بقلم الكاتبه جنات