فى بيت الشهاوى .

البنات كانو بيجهزو الفطار ولارا بتحط الاكل معاهم .

مؤمن خرج من الاوضه:انتو بتنامو ف الدوشه دى  ازاى بجد ؟!

رهف ورغد ضحكوو .

لارا:اهلا بيك يابابي فى الحارة .

مؤمن بصلها بصدمه والبنات ضحكو عليها.

رغد وهى بتضحك:يلا عشان نفطر .

مؤمن:هدخل الحمام واجيلكوو .

بعد شويا مؤمن خرج من الحمام وفطرو سوا ومؤمن دخل يلبس عشان يرجع القاهرة .

مؤمن نزل وشاف حسن واقف على الورشه قرب منه:صباح الخير يابطل .

حسن:صباح النور ..... الشغل بتاع الدكتورة خلص وكنت عايز اشوفها عشان اخلى الشباب يطلعوه .

مؤمن:تمام انا هكلم رغد اعرفها ... وياريت ياحسن تطلع مع الشباب عشان اكون مطمن عليهم مش اكتر .

حسن:اه اكيد يامؤمن وبعدين متخافش عليهم هنا شباب الحارة رجوله اوى .

مؤمن:انا عارف والله يابطل .... انا هكلم رغد وانت اطلع مع الشباب .

حسن:تمام .

مؤمن راح ناحيه عربيته وركبها ومسك فونه ورن على فون رغد بس رهف اللى ردت عليه وقالها ان حسن هيطلع الشغل الوقت ورهف قالتله انها هتعرف رغد .... مؤمن قفل واتحرك بالعربيه .

بقلم الكاتبه جنات

ــــــــــــــــــ★ــــــــــــــــ

فى بيت الشهاوى .

رهف قفلت مع مؤمن ولبست اسدال بسرعه وسمعت جرس الباب بيرن .

رهف بصت لـ لارا:لولى روحى عرفى رغد وقوليلها عمو جاى بسرعه وانا هفتح الباب .

لارا:حاضر .

لارا جرت على الاوضه التانيه اللى كانت رغد بتلبس عشان خارجه وفتحت الباب ودخلت .

لارا:يادودو يادودو .

رغد:نعم ياروح دودو .

لارا:رهف بتقولى اعرفك ان فى عمو جاى .

رغد باستغراب:عمو مين ؟!

لارا:معرفش .

رغد:اوكى هلبس الطرحه وهخرج .

لارا خرجت ورغد بدات تلبس الطرحه عشان تخرج تشوف مين اللى جاى .

بقلم الكاتبه جنات

ــــــــــــــــــ★ــــــــــــــــ

براا رهف راحت تفتح الباب وكان حمزة اللى واقف قدام وشايل الخشب .

حمزة:صباح الخير ياانسه .

رهف:صباح النور ... اتفضلو .

لارا جت وقفت جمب رهف وحمزة والشباب بداو يدخلو الحاجه فى الاوضه اللى رهف شاورت عليها وحسن كان معاهم ... الشباب طلعو كل الحاجه وحسن وحمزة بداو يركبوها ويظبطوه الحاجه فى اماكنها .

رهف:تحبو تشربو ايه ؟!

حسن:ملوش لزوم احنا هنخلض وننزل .

رهف:لا طبعا لازم تشربو حاجه .

حمزة:يبقي قهوة  

رهف:قهوتكو ايه .

حسن:احنا الاتنين مظبوطه .

رهف:حاضر .

رغد خرجت من الاوضه وسامعه دوشه وخبط مش عارفه ايه ده ... قربت من لارا اللى واقفه على باب الاوضه بتتفرج عليهم .

رغد:فى ايه يالولى .

رغد شافت حسن وحمزة:صباح الخير ياشباب .

حسن وحمزة:صباح النور .

رغد بصت على الشغل:ماشاء الله بجد تسلم ايدك ياحسن .

حسن:تسلمى يادكتورة. 

رهف جت ومعاهم القهوة وقدمتها لشباب اللى بداو يشربو .

رغد قربت من رهف:ايه رايك بقي بذمتك مش شبه المرسم التانى .

رهف عينيها دمعت لما افتكرت المرسم اللى ابوها عمله عشانها فى الڤيلا .

رغد سندت بدراعها على كتف رهف:العفو ياحبيبتى احنا اخوات بردو .

رهف ابتسمت:ربنا يخليكى ليا يارغد .

رغد بعدت عنها:ايه النكد ده نسيتينى باقى المفاجاه. 

لارا:لسه فى مفاجاه كمان .

رغد:طبعاا اومال ايه .

رغد راحت الاوضه وجابت شنطه كبيرة جداا ورجعت تانى لرهف:اتفضلى ياستى .

لارا اتنططت بفرحه:دى الوان يارغد .

رغد حطت الشنطه على الارض:ايوا ياروح رغد ... عشان لولى حبيبه قلبي ترسم احلى لوحه مع رهف .

حسن كان بيشتغل وعينه على رغد وشايف اللى بتعمله مع اختها .

رهف:مش عارفه اقولك ايه الصراحه يارغد .

رغد:متقوليش حاجه ياستى ... ولا اقولك ارسمى اول لوحه ليا وانا كدا هفرح .

رهف:من عيونى .

لارا:رغد وانا كمان هرسمك .

رغد:يبقي ربنا يستر .

البنات ضحكو وحسن وحمزة خلصو شغل .

حسن:كدا كله تمام يادكتورة .

رغد:بجد مش عارفه اشكركو ازاى .

حسن: ده واجبنا يادكتورة ... يلا ياحمزة .

حسن وحمزة خرجو من الشقه وراحو على الورشه .

رغد:اسيبكو بقي تعيشو حياتكو ورتبو المرسم وانا هروح مشوار على السريع كدا .

رهف بخوف:راحه فين يارغد .... انتى راحه القاهرة بردو ؟!

رغد:لا يارهف انا هروح اشترى شويا حاجات لـ لارا زى مامؤمن طلب منى .

رهف اتنهدت براحه:تمام .

رغد نزلت من البيت وركبت تاكسي وكان منصور بيبص عليها اوى ورجع بص على بيت الشهاوى بخبث وبص على ورشه البطل ماكنش شايف حد منهم والكل مشغول فى شغله تقريبا وقرب من البيت وطلع بسرعه ووصل عند الشقه ورن الجرس .

رهف كانت بترتب ادوات الرسم فى المرسم ولما سمعت الجرس قربت من الباب وبصت من العين السحريه وشافت راجل غريب استغربت ده مين وافتكرت انها شافته مرة واقف فى الحارة .

رهف لبست الاسدال ونادت على لارا وراحت تفتح الباب:ايوا مين حضرتك ؟!

منصور بصلها من فوق لتحت بطريقه ضايقت رهف جدا.

رهف:حضرتك مين وعايز ايه ؟!

منصور:انا المعلم منصور صاحب محل الجزارة اللى فى الحارة ياجميله .

رهف:اهلا وسهلا بس حضرتك جاى هنا ليه ؟!

منصور:جاى اتكلم معاكى فى حاجه مهمه تخص الدكتورة .

رهف باستغراب:حاجه ايه مش فاهمه !

منصور:يعنى هنتكلم على الباب كدا .

رهف:ايوا مينفعش تدخل البيت .

منصور:تمام ياقمر .... انا كنت اتكلمت مع الدكتورة عشان اشترى البيت وهى رفضت .

رهف:بيت مين اللى تشتريه ؟!

منصور:البيت ده بيت جدك ياانسه ... الجميل اسمه ايه ؟!

رهف:اه وبعدين عايز ايه منى بدام رغد رفضت البيع ؟!

منصور:بصى يامزة انا جاى طالب القرب منكو ومنك انتى بتحديد .... انا معلم ملو هدومى وهعيشك ملكه ومش هاجى جمبكو ولا ناحيه البيت ده تانى .... لكن لو رفضتى قولى على اختك الدكتورة يارحمن يارحيم .... عشان مش انا اللى حد يقف فى طريقى .... وبعدها هطردك انتى الامورة الحلوة دى مش من البيت لا ده من الحارة كلها .... فكرى بقي وابقي ردى عليا بلاش متتاخريش يامزة .

رهف خافت من كلامه وطريقته وقفلت الباب بسرعه فى وشه .

منصور ضحك واتكلم بصوت سمعته رهف : هستنى رايك ياعروسه .

منصور نزل وخرج من البيت بنفس الطريقه محدش انتبه عليه وراح على محله .

عند رهف كانت خايفه جدا من كلامه وعيطت ولارا كانت خايفه وخافت اكتر لما شافت رهف بتعيط وحضنتها .

رهف مسحت دموعها:هشش اهدى يالولى ... يلا عشان نرسم .

لارا قامت معاها ودخلو المرسم ورهف كانت بتحاول تنسي لارا خوفها .

بقلم الكاتبه جنات

ــــــــــــــــــ★ــــــــــــــــ

المغرب 

حنين خلصت دروس ونزلت من على السطح كانت هدى بتجهز الغدا .

حنين:يا روايحك ياهدهد .... اوبا بقي محشي ده انا واقعه من الجوع  .

هدى:خلصت ياحبيبه قلبي ؟

حنين:اه يادودو انا من الصبح وانا شغاله لما جبت اخرى .

هدى:ربنا يعينك ياحبيبه قلبي ويجعله فى ميزان حسناتك يارب .

حنين بصت حوليها ماشافتش اولفت وعزة 

حنين:ماما هى مرات خالى وعزة فين ؟!

هدى:معرفش خرجو الاتنين من بعد الضهر ولسه مرجعوش !

حنين بهمس:وياريت ميرجعوش اصلا .

هدى ضحكت:مسمعتكيش انا كدا يعنى ؟

حنين:بصراحه يادودو هما اللى تقال اوى وطولو عندنا ايه الناس دى !

هدى:يعنى هطردهم يابنتى وبعدين بيت ابوكى مفتوح للغريب قبل القريب .

هدى :قوليلى ياحنين مش انتى شوفتى الدكتورة ؟

حنين:قصدك رغد ؟!

هدى:ايوا حفيده الشهاوى .

حنين:اه يامامتى حته قمرايه كدا جمال وادب ورقه يالهوى على الحلاوة ... مش متخيله بجد ان دى نفس الدكتورة اللى حمزة حكالنا عنها .

هدى:ربنا يحميها ويحميكى يابنتى .

حنين حضنتها من ضهرها:يارب يادودو وحسن ابنك يتحرك ويخطبها البت قمرايه من الاخر .

هدى:والله ده يوم المنى يابنتى انى افرح بيكو كلكو ياولادى .

حنين:نفرح بابو على الاول يادودو .

هدى:يارب ... يلا روحى غيرى يكون اخواتكو وصلو وناكل سوا .

حنين:حاضر 

بقلم الكاتبه جنات

ــــــــــــــــــ★ــــــــــــــــ

اولفت وعزة كانو داخلين الحارة ونادت عليها محروسه واولفت راحت تسلم عليها .

اولفت:ازيك ياام جابر عاش من شافك ياختى .

محروسه:بخير ياام عزت انتى عامله ايه ؟!

اولفت:اهو الحمدلله .

محروسه:ازيك يابت ياعزة كبرتى وبقيتى عروسه هنفرح بيكى امته ؟!

عزة:بخير ياخالتى محروسه .... وبعدين لسه بدرى مش بفكر فى الجواز .

محروسه ضحكت:صدقتك انا يابت مانا عارفه

انك هتموتى على حسن البطل وهو اللى منفضلك .

عزة اضايقت منها .

اولفت:كله شئ قسمه ونصيب يامحروسه ... ابنك هيخرج امته من الحبس ؟

محروسه:قريب اوى يااولفت .

اولفت:يخرج بسلامه يامحروسه .

فى الوقت ده وصل التاكسي ونزلت منه رغد ووقفت مع ام فرح وفرح يتكلمو .

اولفت:اومال مين الوجه الجديد ده يامحروسه ؟!

محروسه:حفيده الشهاوى ياختى .

عزة:هى دى الدكتورة .

محروسه:بت لسانها طويل ... انا عارفه شايفه نفسها على ايه دى .

اولفت:بس زى القمر يامحروسه وكمان دكتورة لازم تشوف نفسها .

عزة كانت بتبصلها بغل .

محروسه بهمس:شكلهم بنات من اياهم  .

اولفت:قصدك ايه ؟!

محروسه:فى شاب طالع نازل عندهم من وقت ماعاشو هنا ... وامبارح كان بايت عندهم وشوفته وهو حاضنها فى البلكونه .

اولفت:مش يمكن جوزها ولا خطيبها ؟؟

محروسه:علمى علمك بس مش لو كانت متجوزة ولا مخطوبه كانت هتلبس دبله على الاقل .

اولفت:على رايك صح .... ملناش دعوة ياختى كل واحد ينام على الجنب اللى يريحه .

محروسه:ازى يعنى الحارة طول عمرها سمعتها كويسه يجو بنات زى دول يشبهوها .

اولفت:استر ياللى بتستر .... يلا هنمشي احنا بقي وابقي خلينا نشوفك يامحروسه .

محروسه:ان شاء الله ياختى .

اولفت وعزة مشو وعينهم على رغد اللى بتضحك مع فرح وامها .

عزة بغل:بقي هى دى الدكتورة !

اولفت:شكلها بت مدلعه يعنى مش بتاعه عيشه فى الحوارى ياعزة .

عزة:ونبي ياما لو فكر يخطبها بس هقتلها .

اولفت:انتى هبله يابت انتى ! ... امشي يلا ندخل البيت .

بقلم الكاتبه جنات

ــــــــــــــــــ★ــــــــــــــــ

رغد طلعت البيت .

كانت رهف فى المطبخ بتجهز الاكل .

رغد:مساء الروقان ياجميل .

رهف:مساء الخير يارغد .. غيرى هدوم وانا هحضر الاكل .

رغد:اومال لولى فين ؟

رهف:فى المرسم .

رغد:هروح انادى عليها تتفرج على الهدوم والحاجه اللى اشتريتها ليها .

رهف:حاضر .

رغد راحت المرسم كانت لارا قاعده بترسم ورغد قربت منهم براحه وخضيتها ولارا خافت جداا .

رغد:اهدى يالولى ده انا ياحبيبتى مالك ؟!

لارا:اتخضيت يادودو .

رغد:وانا اسفه ياروح قلب دودو .... قوليلى بقي كنتى بترسمى ايه؟

لارا:برسم ده .

رغد بصت على الورقه وكانت رسمه غريبه حد تخين وبشنب كبير وشعره اقرع من النص .

رغد:ايه ده يا لارا انتى بترسمى ايه مش فاهمه ؟!

لارا بهمس:ده عمو الوحش اللى خوف رهف وخلاها تعيط كتير .

رغد باستغراب:عمو مين ده اللى خوف رهف وامته؟!

لارا:لما انتى خرجتى الصبح هو رن الجرس علينا ورهف مرديتش تدخله وهو قال كلام كتير ورهف خافت وقفلت الباب فى وشه وعيطت كتير اوى يادودو .

رغد بصت على الرسمه تانى:وهو ده اللى خوف رهف .

لارا:ايوا كان عملاق وبطنه كبير ومالوش شعر فى راسه من هنا ( لارا كانت بتشاور على نص راسها )

رغد فكرت شويا:منصور معقول ..... لولى تعالى معايا كدا .

رغد راحت عند الشباك وفتحته وشاورت على منصور اللى قاعد قدام المحل بتاعه:هو ده اللى خوف رهف ؟

لارا بخوف:ايوا هو يادودو .

رغد قفلت الشباك:اهدى ياحبيبتى وارمى الرسمه دى وروحى يلا اتفرجى على الحاجات اللى انا جبتها ليكى .

لارا فرحت ونست خوفها وخرجت تتفرج على الحاجات .

رغد راحت لرهف وبصتلها اوى:ازاى متقوليش ان الراجل ده طلع البيت بعد مانا ماخرجت .

رهف بصتلها:راجل مين يارغد ؟

رغد بحده:رهف ... انتى بجد كنتى هتخبي عليا ... يعنى لو لارا مش قالتلى كنتى هتخبي و انا زى الهبله معرفش اللى بيحصل من ورايا .

رهف:رغد اهدى لو سمحتى الراجل ده شكله مش سهل .

رغد:على نفسه مش عليا فاهمه .... قالك ايه ؟!

رهف:هتعملى ايه لما تعرفى يعنى ؟!

رغد:قالك ايه يارهف اخلصى .

رهف حكتلها اللى حصل .

رغد بعصبيه:بقي جاى يهددك بيا مااااشي يامنصور .

رغد مشت ولسه هتخرج من الشقه رهف مسكت ايدها:راحه فين يارغد ... بلاش مشاكل ابوس ايدك .

رغد بعدت ايدها وفتحت الباب ونزلت ورهف لبست الاسدال وقالت لـ لارا تفضل هنا  متنزلش ونزلت بسرعه ورا رغد .

بقلم الكاتبه جنات

ــــــــــــــــــ★ــــــــــــــــ

فى الحارة كان منصور قاعد قدام محل الجزارة بتاعه وبيشرب شيشه ورجالته حوليه ومراته محروسه قاعده جوا المحل .

رغد نزلت وكانت متعصبه جداا وقربت من منصور ووقفت قدامه واتكلمت بهدوء:انت ازاى تطلع البيت وانت عارف ومتاكد ان مافيش غير اختى فوق ؟!

رهف نزلت ووقفت على باب البيت وكانت خايفه على رغد من منصور والرجاله اللى حوليه .

منصور اتفاجأ بيها قدامه واتوتر:وانا هطلع البيت ليه مش فاهم !

رغد:لا والله ... يعنى خيالك اللى طلع وهدد اختى مش كدا !

محروسه قربت منهم:فى ايه منصور لتكون الدكتورة غيرت رايها وهتبيع البيت .

رغد بصتلها بطرف عينها ورجعت بصت لمنصور تانى:مرديتش عليا يعنى طلعت بيتى ليه ؟!

محروسه:طلع فين ياعينيا ؟!

منصور قام وقف:ارد على ايه يابت انتى ... انتى شكل عقلك مش تمام وجايه تعمليهم عليا .

رغد علت صوتها:اعمل ايه ياراجل يامهزق انت .

منصور بص على الناس اللى فى الحارة اللى وقفو لما رغد علت صوتها.

وحسن وحمزة خرجو من الورشه وشافو رغد وقفه فى وش منصور ورهف واقفه على باب وبتعيط.

حسن قرب من رغد:فى حاجه يادكتورة ؟!

رغد بصتله ولسه هتتكلم قاطعها منصور بتوتر:لا يابطل مافيش حاجه .

رغد بصت لحسن:لا فيه طبعاا ... البيه طلع البيت عندنا بعد ماخرجت وقال ايه بيطلب ايد رهف اختى لجواز هددها لو رفضت  انها تقول عليا يارحمن يارحيم .

رغد بصت لمنصور:وهيطردها مش من البيت بس لا ده هيطردها من الحارة واسكندريه كلها ..... ليه كان بيت ابوك ولا بلدك وانا معرفش .

محروسه شهقت:الكلام ده بجد يامنصور ... انت طلبت اختها لجواز .

منصور:دى بنت كذابه يامحروسه محدش يصدقها ... ده هى واختها اللى بنات شمال وشباب طالعه وشباب نازله من عندهم .

رغد بعصبيه وصوت عالى:قسمااا بربي كلمه زياده يامنصور وهقطعلك لسانك ... معاش ولا كان اللى يغلط فيا انا واختى او يمس كرامتنا بكلمه .

منصور لسه هيرد قاطعه حسن:منصــــــــور .

منصور خاف بس حاول يبان اقوى:ماهى اللى جايه ترمى بلاها عليا ياحسن .

حمزة:ماهى اكيد مش هترمى بلاها عليك من فراغ يامعلم .

محروسه:الله الله وانتو بدافعو عنها ليه بقا .... وقعتى شباب عيله البطل فى دباديبك ياحلوة .

رغد:لا بقولك ايه مايغوركيش اللبس الشيك وعيون الملونه ورحمه ابويا امسح بكرامتك انت وجوزك ارض الحارة ولا يهمنى اى حد .

حسن:اهدى يادكتورة ولو ليكى حق اكيد هنجيبه ليكى .

منصور:حق ليه ياحسن انا اصلا معرفش البت دى عايزه ايه بظبط .

رغد:يعنى انتى مطلعتش البيت وطلبت ايد رهف لجواز .

منصور:لا مطعلتش ولو عايزانى احلف على المصحف .

رغد:قالو لحرامى احلف .

حمزة همس لحسن:حسن عشان نتاكد من كلام منصور والدكتورة تعالى نشوف كاميرات الورشه .

حسن:يلا

حسن وحمزة مشو ورغد استغربت هما مشو ليه .

محروسه ضحكت:بقيتى لوحدك ياحلوة .

رغد:تصدقى بالله انتى وليه واطيه .

ام فرح قربت من رغد:اهدى يابنتى الناس اللى زى دول متعرفيش تاخدى منهم لا حق ولا باطل .

حسن وحمزة رجعو وحسن كان معاه لاب توب .

محروسه:ماهما بنات اليومين دول لما يلاقو واحد غنى بيلفو عليه زى الحيه .

رغد:حيه لما تلف على رقبتك انتى وهو ياشيخه .... والف عليه ليه ياعينيا من قله الرجاله ولا تكونى مفكره جوزك توم كروز وانا معرفش ....  وبعدين اركنى انتى على جمب كدا لسه وقتك مجاش .

كل اللى وقفين يتفرجو فى الحارة والستات اللى واقفين فى الشبابيك ضحكو بصوت عالى  وده ضايق محروسه .

حسن:انت طلعت بيت الشهاوى ليه يامنصور ؟؟!

منصور:حتى انت يابطل .

حسن لف اللاب عشان منصور يشوفه ومنصور اتصدم مفكرش فى موضوع الكاميرات ده ابدا  ومحروسه بصتله بغضب .

رغد ضحكت:القط اكل لسانكو يعنى. 

محروسه:يعنى كلامها بجد يامنصور وانت طلبت اختها لجواز .

منصور:ده شرع ربنا انا معملتش حاجه غلط .

رغد بعصبيه:شرع ربنا ياراجل يامهزق قالك تطلب بنت فى دور عيالك لجواز وكمان تهددها عشان توافق غصبن عنها .

منصور:مانتى اللى رافضه تبيعى البيت .

رغد:هو بيت ابوك وانت مالك ابيعه ...  اولع فيه حاجه متخصكش كمان .... مرة تانيه هقولك مش هبيع هو بالعافيه .

حسن:اهدى يادكتورة ومنصور اكيد مش هيقرب منكو ولا من البيت مرة تانيه .

رغد بصت لمنصور:لا ماهو لو فكر يعملها مرة تانيه رجليه توحشه .

منصور حب يضايق رغد وقعد وحط رجل على رجل :لا هطلع وهنزل وبراحتى يادكتورة .

رغد عينها جت على الفحم اللى والع فى الشيشه ومسكتها ووقعت الفحم كله على رجل منصور اللى صرخ بكل صوته ورجالته جرو عليه ومحروسه مراته.

رغد:الكلام ده ليك وحطه حلقه فى ودنك .... متفكرش عشان احنا بنتين لوحدنا هتقدر تدوس علينا ... دانا ادوس على عشره زيك ولا تفرق معايا فاااااااهم .

محروسه:صدقينى فدفعك التمن وقريب اوى .

رغد بسخريه:وانا فى الانتظار ياطنط .....  مش انا دكتورة والمفروض اعالجك بس للاسف مش بعالج حمير  ..... ونبي ياطنط وديه المستشفى بسرعه احسن هتلتهب .

رغد ضحكت بقوة وكل اللى واقفين فى الحارة يتفرجو ضحكو ومنصور ومحروسه اضايقو .... ورجاله منصور سندوه لحد العربيه ومشو .

ام فرح:تسلم ايدك ويسلم لسانك يابنتى .... اخيرا حد قدر يقف فى وش منصور ومراته.

رغد ضحكت:ده انا رغد وأجر عالله ياام فرح .

ام فرح ضحكت .

رغد بصت على رهف اللى واقفه تعيط على باب البيت:جبتلى حقك يامزتى ولا تزعلى نفسك ياقمرى .

رهف ضحكت من وسط دموعها ورغد قربت منها وطلعو هما الاتنين البيت .

حمزة كل ده عينه كانت على رهف اللى كانت واقفه تعيط وخايفه على اختها واد ايه جميله ورقيقه فوق الوصف غير اختها .

حسن قرب منه وشايفه بيبص على البنات وهما طالعين البيت:مالك يابنى؟!

حمزة فاق:هاااا ولا حاجه ... يلا نكمل شغلنا .

حسن:يلا .......