مبدأياً كدة قبل ما نبدأ بارتنا انا حابة أشكركم على التفاعل الجميل بتاعكوا اللي كان على البارت اللي فات.. حقيقي اتبسطت جداً وحسيت ان لقيت التقدير المستحق لتفكيري وكتابتي وشكراً لكل اللي كتب كومنت لطيف زيه حقيقي كلامكوا كله في قلبي ، واتمنى اتمنى اتمنى ان التفاعل دة يفضل كدة وميقلش واوعدكوا لو التفاعل فضل كدة هعملكوا هدايا وحاجات تحفة ♥♥

♡♡♡♡♡♡♡♡♡♡♡

فجأة، موبايله يرن، يبص للشاشة بسرعة، ملامحه تتغير بشكل بسيط لكنه يخفيه بإبتسامة. يرد بهمس، ويومئ براسه كأنه بيأكد ميعاد. بعدها يخرج من القاعة بخطوات هادئة لكن سريعة.

عائشة من بعيد تلاحظ حركته، ترفع حاجبها باستغراب، تحس في قلبها قلق صغير مش فاهمة سببه.

تلتفت لصاحبتها اللي كانت واقفة جنبها : كمّلي مع الضيوف دقيقة… أنا راجعة.

تمشي وراه بخطوات مترددة، تخرج من القاعة للممر الخارجي، تلمحه واقف قدام باب جانبي للمبنى. عائشة تقترب بحذر، لكن قبل ما توصل، تتجمد مكانها من اللي شافته

أدهم بيحـ،،ـضن واحدة شابة أنيقة، شعرها منسدل، ويطبع قبلة سريعة على خدها بابتسامة. 

عائشة اتجمدت مكانها، قلبها دق بسرعة، والدموع تتملى في عينها. 

عائشة حطت ايدها على بقها تمنع شهقاتها من الخروج والدموع تسيل على خدها ودخلت مبنى المشروع وهي بتجري ومنهارة من البكاء ودخلت الحمام.... 

عائشة بعياط شديد وشهقات : انت يا أدهم... تعمل فيا كدة.. بعد سنين حب وفي الآخر تخـ،،ـوني... انا اللي مفكراك عارف ربنا ومحترم تطلع زبا،،لة كدة.. متوقعتش انك كدة بجد... 

انت مش بس خونتـ،،ـني انت خو،،نت صاحبك يونس كمان 

وكملت بإنهيار وهي بتفك الطرحة : كل دة بتضحك عليا.. وألاقيك في حضن واحدة تانية...  

وكملت عائشة بكاء بحرقة وبعدين غسلت وشها وظبطت طرحتها والميكاب بتاعها وهي بتتلاشى دموعها

استغفر الله العظيم واتوب اليه🦋

♡♡♡♡♡♡♡♡♡♡

بقلمي جنى احمد🤍

أدهم وهو حاضن رقية : ياااه يا رقية وحشتيني اوي.. وحشني حضنك وهزارك وكل حاجة فيكي 

رقية بحب واضح : وانت كمان يا أدهم وحشتني اوي... بس احنا بردوا مكناش سايبين بعض على طول كنا بنتكلم فيديو كول... ورغم انشغالنا بس كنا على تواصل كل يوم

أدهم وهو بيطلعها من حضنه : الفيديو كول مش كفاية.. اللي انا اشوفك في الحقيقية دة بالدنيا بالنسبالي... والحضن دة كفيل يمحي وجع الدنيا

رقية بإبتسامة : ربنا يحفظك ليا يارب ونفضل لبعض طول العمر كدة... 

♡♡♡♡♡♡♡♡♡♡♡

بقلمي جنى احمد🤍

غادة(صاحبتها) بإستغراب وقلق : عائشة اتأخرت اوي والناس بدأوا يلاحظوا عدم وجودها... هي فين كل دة قالتلي ثانية وجاية بقالي حوالي نص ساعة واكتر مجتش

احد الضيوف : هي فين آنسة عائشة... محتاجينها توضحلنا رسوم الإشتراك والكورسات وكل دة

غادة بإبتسامة مزيفة : آنسة عائشة بتشرف على حاجة في الطابق العلوي في خلال دقايق هتكون موجودة هنا و أي استفسار هترد على حضراتكم جميعاً. 

عائشة وهي جاية من بعيد واضح عليها انها معيطة لكن بتخفي مشاعرها بإبتسامة ممزوجة بدموع : انا هنا موجودة هتكلم حالاً عن كل حاجة دلوقتي واي سؤال هجاوب عليه...

ولفت وشها عشان تنادي على عامل ينزل عصاير وحلويات اخرى لكن اتصدمت لما لقت ادهم داخل عليها هو ورقية 

اتصدمت عائشة من وجود رقية وازاي وامتى جت وليه مقلهاش ، كانت دماغها مليانة اسألة كتيرة وتناقضات اكتر

ادهم بإبتسامة : ايه رأيك في المفاجأة دي .... اظن عجبتك اكيد ، رقية بقالها شهرين كاملين بتخلص شغلها هي وجوزها وبتقدم اجازات وتخلص اوراق عشان تنزلك مصر وتحضر الافتتاح بتاع مشروعك

عائشة بفرحة ودموع وهي بتحضنها : رقية وحشتيني اوي... كدة متسأليش عليا طول الفترة دي كلخا واسأل ادهم يقولي بخير وكويسة

رقية وهي حضناها بحب : معلش والله الظروف وانتي عارفة بقى الشغل والتعب وقد ايه بيشغلنا عن حبايبنا.. بس اهوا نزلالك اجازة نقضيها مع بعض ونعمل فيها كل اللي عايزينه والحمدلله ادهم واخد اجازة يعني ان شاء الله هتكون اجازة حلوة. 

عائشة بصت لأدهم نظرة مطولة وزعلت جامد من نفسها انها ظلمته وصدقت فعلاً انه ممكن يخو،،نها ويطلع شخصية وحشة 

ادهم لاحظ ان عينها محمرة وكإنها معيطة : عائشة هو انتي كنتي معيطة.... مالها عينك حمرا كدة ليه ومناخيرك محمرة وشايفك من بعيد زعلانة

عائشة بتوتر : هااا لا مافيش انت عارف ان عندي حساسية من التراب فكان في نسمة هوا بتراب وانا برا فقعدت اعطس وكدة... المهم بلاش رغي وتعالي يا رقية اوريكي المكان

رقية وهي بتبص للمكان بدهشة : ما شاء الله بجد يا عائشة المكان تحفة.. بجد احييكي على العظمة دي

عائشة بإبتسامة وفخر: المكان دة مش انا بس اللي عملاه.....يونس اخويا ساعدني فيه كتير بفضل مهنته خلصلي الورق والتراخيص وكل حاجة في يومين بس واشتريت المكان دة بسرعة جداً بفضل ادهم واتفاقه مع الراجل... المبنى دة اصلا زمان كان مشروع لغات وكدة بس اتقفل لاسباب مجهولة وفضل مدة مقفول.. انا اشتريته وظبطه وبقى بالمنظر دة

رقية بحب وابتسامة : بجد اللي عملتيه دة روعة كفاية التفكير والتعب وكل دة... بس سؤال بردوا يا عائشة الديكور ، النقاشة ، التصاميم ، الموظفين ، العمال كل دول حتى ادارة المكان ذات نفسه كل دة صعب مش سهل عملتي كل دة ازاي 

عائشة وهي بتبصلها بضحك : حيلك حيلك عليا كدة... 

بصراحة انا صاحبتي اعرفها كانت بتدرس معايا ألسن عارفة متخرجين موثوقين في التركي وبيدوروا على شغل وواخدين جوايز من الجمهورية كمان في مسابقات وكدة وفي كمان اللي متخرج من منح دراسية ودرس في امريكا وفرنسا والدول دي فموثوقين  جداً يعني وعملتلهم اختبار وقعدت معاهم وفعلاً لقيتهم يستحقوا الدعم ، 

اما بقى عن الديكور والتصاميم وكدة بردوا ليا صاحبة متخرجة من كلية فنون جميلة قسم ديكور هي اللي ساعدتني في اختيار الألوان المكان والدراجات المناسبة وكمان ساعدتني في الديكور والحمدلله في اقل من شهرين كنا صممنا الديكور. 

اما العمال ساهلين نزلت بوست بعرض في عن وجود شغل في مكان الفلاني واسعار الرواتب وكل حاجة ولقيت ناس كتيرة قدمت وواتوظفوا. 

اما ادارة المكان وانا بدرس كنت باخد وانا بدرس دورات اونلاين وكورسات من منصات عن ادارة الاعمال والحمدلله اخدت خبرات من رجال اعمال كبيرة خلال تجاربهم وربنا يوفقني

رقية بصتلها بفخر : حقيقي مش عارفة اوصف جمال المكان ولا جمال عقل صاحبة المكان حرفياً 

ابتسمت لها عائشة وفرجتها باقي المكان والطابق العلوي وأقسام الكورسات والأجهزة اللي هيشتغلوا عليها... 

♡♡♡♡♡♡♡♡♡

بقلمي جنى احمد 

جت لحظة تعريف عائشة تفاصيل المكان وتقديم الكورسات وكدة

عائشة طلعت على الاستيدج كان جواها توتر بس غلبته بإصراها واتكلمت بإبتسامة ودون تردد : مساء الخير على حضراتكم جميعاً ، اتمنى تكونوا قضيتوا وقت سعيد وعجبكم المكان. 

نبدأ دلوقتي نعرف حضراتكم تفاصيل حجز الكورسات او تعلم اللغة ذات نفسها من الصفر، 

اول حاجة الكورسات على حسب المستوى واللي بيتحدد بناءً عن امتحان بيتعمل الشخص قبل ما يبدأ الكورس وكل قسم على حسب المستوى... يعني قسم مبتديء.. قسم متوسط وهكذا، 

اما عن تعليم اللغة من الصفر والكلام دة هينطبق بردوا على الكورسات هيبقى برعاية خريجين كليات اجنبية من امريكا وفرنسا ودول اجنبية اخرى و مدرسين عاملين ماجيستير ودكتوراه في قسم التركي... يعني كل شيء موثوق تماماً 

الحجز هيبقى اونلاين او الحضور شخصياً... 

لو في حد عنده استفسار يقدر يقوله وانا هجاوب على كل استفسار حضراتكم... وشكراً

وفعلاً الكل كان بيسألها وهي تجاوب بإبتسامة وثقة ولحد ما الجميع انتهى من اسألته وكملوا باقي حفلة الافتتاح

ادهم سحب عائشة من ايدها وقال بهدوء : تعالي بس عايز اقولك كلمتين.. 

عائشة وهي بتجري معاه : في ايه يا ادهم واخدني على فين

ادهم بهدوء : تعالي بس هقولك على حاجة

♡♡♡♡♡♡♡♡♡♡

بقلمي جنى احمد🤍

ادهم بهدوء : على فكرة انا عارف انتِ كنتي بتعيطي ليه... 

عائشة بتوتر: ا انا معيطتش.... انا زي ما قولتلك عندي حسـ.... 

قاطعها ادهم بهدوء : لا مش عشان كدة.... عشان شوفتيني بحضن رقية اختي وانتي كنتي شايفانا من الاول فمكانش ظاهر غير ضهرها... وانا شوفتك على فكرة... صح؟ 

عائشة بدموع: بصراحة اه انا مش عارفة ايه اللي حصلي... بس متوقعتش خالص انها رقية لإن رقية اصلا هي وجوزها في ايطاليا... وكمان لما جتلك الماسدج اتوترت كإن في حاجة. 

ادهم بزعل مصطنع : يعني انتِ مش واثقة فيا؟... ممكن تتخيلي مجرد تخيل اني ممكن اعمل حاجه من اللي جت في دماغك

عائشة وطت راسها في الأرض واتكلمت بدموع : لا طبعاً انا واثقة فيك... آسفة يا ادهم والله... بس انا اتصدمت والله لما لقيتك حاضنها.... وبعدين ثانية هو فين جوزها؟ 

ادهم بإبتسامة : وصلها وانا سلمت عليه ومشى ومعرفش ييجي يشوف الافتتاح لإنه كان عنده حاجات في مصر عايز يخلصها وكدة.. 

عائشة بإستغراب : اومال انا مشوفتهوش ليه... انا شفتك انت ورقية بس

ادهم بضحك: ما انتي اول ما شوفتيني دخلتي جوا على طول تعيطي لو كنتي استنيتي ثانية كنتي هتلاقيه نازل من العربية. 

وكمل ادهم بإبتسامة وهو بيرفع وشها بإيده : مش عايز دموع انهاردة... وانتِ فعلاً معذورة... عايزك تبقي فرحانة واهوا جبتلك رقية تحضر يوم مهم زي دة... مش عايزك تكوني زعلانة

رفعت عائشة وشها وابتسمت له وقالت : بحبك

ادهم بهيام : وانا بعشقك... يلا بقى احضري باقي حفلة الافتتاح... عشان اخوكي يونس لو شافنا ممكن يقـ،،ـتلنا. 

ضحكت عائشة وقالت : ماشي... يلا انت كمان تعالى معايا... 

♡♡♡♡♡♡♡♡♡♡

بقلمي جنى احمد🤍

عند يونس وسلسبيل... كانوا قاعدين في مطبخ صغير موجود في المكان وبيشربوا عصير

يونس بضحك : دة انا دخل جسمي كمية سكر ايه عناب... يعني لو طولنا اكتر من كدة هطلع من هنا مش وزن ظابط خالص

سلسبيل بجدية : يونس هو انت ايه اللي خلاك تخطبني وعايز تتجوزني؟ 

يونس استغرب سؤالها وتعابير وشه اتغيرت واتكلم بهدوء : ايه السؤال الغريب دة... وليه بتسأليه دلوقتي يعني... ما كنا بنضحك ونهزر وزي الفل... 

سلسبيل بنفس الجدية وملامح جد : يونس سألتك سؤال وتجاوب عليه... ايه اللي خلاك تخطبني وعايز تتجوزني؟ 

يونس اتنهد واتكلم بإبتسامة : والله يا سلسبيل انتِ فيكي مميزات كتيرة... محترمة... لبسك واسع ومحترم.... حجابك مظبوط مش بتبيني رقبتك ولا شعرك... طيبة اوي وممكن طيبتك توديكي في دا،،هية... بتحبي تساعدي الكل ودة شوفته فيكي... طبعاً بعيداً عن طريقتك بس ماشي يعني هعديها

سلسبيل رفعت حاجبها واتكلمت : ليه ياخويا مالها طريقتي مش عجباك ولا ايه؟ 

يونس بضحك : لا والله مقدرش اقولك كدة... زي العسل... مقولتليش بردوا سألتيني السؤال دة ليه... 

سلسبيل اتنهدت واتكلمت بهدوء: يعني واحد زيك ما شاء الله يعني مرتاح مادياً وعايش في فيلا وظابط الله اكبر عليه يعني... ايه اللي يخليه يتجوز واحدة بسيطة عادية... ودة فعلاً اللي سمعته من الناس.. 

يونس كان بيسمعها بهدوء لحد ما قالت جملتها الآخيرة اتكلم بعصبية مكتومة : انهي ناس... تقصدي مين.. مين اللي قالك كدة

سلسبيل بإبتسامة : على فكرة والله مزعلتش بس فعلاً عندهم حق... يونس لا انت من مستوايا ولا انا من مستواك.. 

يونس بصلها بحب وابتسامة : سلسبيل احنا لما بنختار حد بنختاره بقلبه... بطبعه... بمميزاته... وانتِ فيكي مميزات نادرة ومش كل بنات اليومين دول زيك... 

عشان كدة اخترتك... اخترت البنت اللي قلبي مرتاح بوجودها... واحنا ربنا خالقنا طبقات... وكل الطبقات عشان تكمل بعضها.. ليه متقدملكيش.. محترمة واهلها محترمين.. متعلمة وما شاء متخرجة من كلية حقوق ودلوقتي محامية وشاطرة كمان في شغلك.. وان شاء الله بعد تدريب بتاعك هتبقي محامية وتشرفينا... بس 

سلسبيل بحب وابتسامة : يعني انت بجد بتحبني.؟ 

يونس بضحك : يادي النيلة تاااني؟... ما انا عمال اقطع في قلبي على ايه

سلسبيل بإبتسامة : سلامة قلبك! 

يونس كان لسة هيرد...

 دخل عليه ادهم وهو بيقول بضحك : ايه ياعم دة واقع من الدور العشرين...

يونس غمض عينه بعصبية : هو الواحد ميعرفش يتكلم مع خطيبته لوحدهم 

ادهم بضحك : معلش بقى قطعت اللحظة... بس في ضيوف هيمشوا دلوقتي ولازم نسلم عليهم يعني من الأدب

قام يونس وابتسم لسلسبيل وراح مع ادهم يسلموا على الضيوف اللي كانوا مبهورين فعلاً بالمكان والتنظيم اللي فيه والكل بدأ يمشي واحد ورا التاني وكان عائشة بتدي تعليمات للأمن وكدة... 

ويونس وصل نهاد وضحى البيت بالعربية وخلى حراسة مع عائشة وايمن وانتهى اليوم بسعادة للجميع.... 

♡♡♡♡♡♡♡♡♡♡

بقلمي جنى احمد🤍

تاني يوم الكل صحى وفطروا مع بعض في سفرة واحدة وسط الضحك والهزار 

عائشة وهي بتقوم من على السفرة : انا همشي دلوقتي يا جدو عشان عندي شغل ولازم يخلص

يونس بإبتسامة وفخر : اوعى يا شوشو بقيتي آنسة ملزومة بشغل وروابط..

ابتسمت له عائشة وراحت قبلت راس جدها 

ايمن بإبتسامة وحب : ربنا يوفقك كدة يا عائشة 

وراحت على يونس وقالت بإبتسامة : هات حضن كبير كدة عشان يبقى عندي طاقة للشغل

يونس بضحك وهو بيحضنها : يا بكاشة.. 

عائشة قبلت خده وقالت وهي بتتجه للباب : سلام يا احلى اخ

ابتسم يونس على اخته وانها كبرت في لحظة قدامه بقت بتشتغل في مشروع تعبت عليه واتشهر.... 

ايمن قام من على السفرة وطلب قهوة ويونس طلع الجنينة يقعد فيها شوية.. وكلم ادهم عشان يحكيله عن سالم 

♡♡♡♡♡♡♡♡♡♡

بقلمي جنى احمد🤍

يونس قاعد في الجنينة، سايب القهوة تبرد في على الترابيزة الصغيرة الللي قدامه، وعينه سرحانة في السما.. وبيكلم ادهم

أدهم بنبرة خفيفة : إيه يا عم؟ مفيش هزار ولا تنكيت النهارده؟ شكلك غرقان في حاجة تقيلة.

يونس ببطء وهو مش شايل عينه من السما : فاكر الراجل اللي عربيتي كانت بايظة عنده؟ اللي صلّحها؟

أدهم وهو بيعمل حاجة وبيكلمه : أيوه، الميكانيكي الطيب ده... مالُه؟

يونس بيتنهد وبيبص له : اتصل بيا من كام يوم، تعبان... رحتله، لقيته حالته صعبة..... بس مش دي الحكاية.

أدهم بإهتمام : أمال إيه الحكاية؟

يونس بصوت منخفض ومليان قلق : فيه شبه... شبه غريب من أبويا..... نظرة عينه، طريقة كلامه، حتى نبرة صوته فيها حاجة... بتحرك حاجة جوايا كل مرة بشوفه.

أدهم سكت لحظة، وبعدين كلم يونس بتركيز

أدهم بتركيز : إنت عمرك شوفت صورة لأبوك وهو كبير؟

يونس وهو بيهز راسه : لا... أنا حتى كنت صغير وقت الحادث، وكل اللي أعرفه عنه كلام...بس الإحساس ده... مش طبيعي. بحس إني مألوف عنده، وهو كمان لما بيبصلي كأنه بيحاول يفتكر حاجة.

أدهم سكت شوية واتكلم بنبرة حادة

أدهم: طيب ما نشتغلها صح؟

مش إحنا شغالين في المباحث؟ نعمل تحريات عن الراجل ده... نفتح ملفه، نعرف كان عايش فين، كان متجوز ولا لأ، عنده ولاد، اختفى من إمتى... كل حاجة.

يونس بتردد : تحريات عن ميكانيكي؟ الناس هتضحك علينا...وبعدين جدي د،،فن ابويا بإيده من زمان... بس للأسف معرفش يودعه بسبب ان ملامحه مكانتش باينة

أدهم بحزم : الناس اللي تضحك مش هي اللي قلبها بيتشدّ كل ما تبص في عينين حد.... لو في واحد في المية إن ده أبوك... تستنى ليه؟

يونس يسكت شوية، وبعدين يبتسم ابتسامة حزينة ويمسح على وشه بإيده

يونس: أنا خايف...خايف أصدق وألاقي نفسي غلطان، وخايف كمان أكون صح.... بس ازاي جدو دفـ،،ـنه بإيده. 

أدهم بنبرة دافية : بس هتفضل خايف طول عمرك لو مبدأتش.

خلينا نعرف هو مين... يمكن فعلاً تلاقي إجابة كنت بتدور عليها طول السنين دي.

يونس يهز راسه ببطء، كأنه أخد القرار

يونس : ماشي يا صاحبي... نبدأ.

♡♡♡♡♡♡♡♡♡♡

بقلمي جنى احمد🤍

كانت عائشة في طريقها للأكاديمية بتاعتها والسواق هو اللي بيسوق... كانت بتتكلم مع صاحبتها على الموبايل بتعرفها انها قربت توصل خلاص وقفلت معاها 

وفجأة لقوا عربية ظهرت مرة واحدة في وشهم في الإتجاه اللي ماشيين فيه

عائشة بصدمة وصراخ للسواق : خلي بااااالككككك

يتبع........