رغد وصلت الحارة ونزلت وبدا السواق يطلع الشنط والحاجات اللى فى العربيه الشقه

رغد عجبها البيت لما اتنضف وشالو الكراكيب اللى على الباب وكمان الزرع الميت  وجابو زرع كتير وحطوه فى مدخل البيت وكان شكله حلو اوى 

رغد بصت للعامل اللى بيحط الزرع:ماشاء الله شكل البيت بقي حلو اوى .

رغد بصت على اصيص الزرع كانو محطوطين برا:دول محطوطين هنا ليه؟!

العامل:زياده .. فاهنرجعهم تانى .

رغد:لا ماترجعهمش ... فى بلكونه فوق حطهم فيها او على السطح بردو .

العامل:حاضر .

رغد طلعت وبقت تتفرج على البيت اللى اتغير ١٨٠ درجه لما اتنضف .

رغد بصت للبنات:بجد تسلم ايدكو البيت اتغير وبقي حلو اوى ... عايزاكو بقي ترتبو الحاجات اللى انا اشتريتهم دول .

بنت منهم:حاضر يادكتورة .

البنات بداو يفتحو الصناديق ويطلعو الحاجات ويرتبوها مكانها .

رغد كانت بتتفرج على البيت اللى كان عبارة عن  اوضتين نوم واحده سرير كبير وتسريحه ودولاب وبلكونه

وتانيه فيها سريرين ومكتب ودولاب .

واوضه  فيها سفرة ونيش  .

وصاله كبيرة فيها صالون وفى بلكونه بطل على شارع الرئيسي للحارة .

ومطبخ بسيط وحمام وجت فكرة فى راسها انها تخرج السفره فى الصاله وتعمل اوضه السفره دى مرسم لرهف لانها مش هتقدر تعيش من غير ماترسم وقررت تنفذ الفكرة دى لانها اكيد هتعجب رهف جداا .

رغد خرجت من الشقه ونزلت كان السواق طلع كل الحاجات .

السواق:انا خلصت يادكتورة ... هترجعى معايا ؟

رغد:بجد شكراا تعبت معاياا .

رغد طلعت فلوس وعطيتهم لسواق:امشي انت بقي وانا هخلص وهطلب تاكسي .

السواق:حاضر يادكتورة .

السواق مشي ورغد فونها رن وكان مؤمن بيطمن عملت ايه .

فى الوقت ده الحاج محمود كان خارج من الورشه وشاف بنت واقفه على باب بيت الشهاوى ونادى على حمزة .

حمزة:خير ياحاج انت كويس؟!

محمود:اه يابنى كويس ... هى مين اللى واقفه عند بيت الشهاوى دى ؟!

حمزة بص عليها وشاف رغد:ماهى دى حفيده صالح الشهاوى ياحاج .

محمود:بسم الله ماشاء الله ... سبحان الله نسخه من منى بنت الحاج صالح ... معقول تكون بنتها ؟!

حمزة:علمى علمك ياحاج .

محمود:طب روح قولها انى عايزة اتكلم معاها .. خليها تيجى المكتب .

حمزة:ليه فى حاجه ياحاج ؟!

محمود:روح بس قولها .

محمود دخل وحمزة واقف يبص على رغد:دى احتمال تفكرنى بعاكسها وتفتحلى راسي .

حمزة قرب منها وهى كانت خلصت مكالمتها مع مؤمن وبتلف لاقيته قدامها:خير ؟!

حمزة:لا كل حاجه ياانسه ... هو بس الحاج محمود كان عايز يشوفك .

رغد:مين الحاج محمود ده وعايز يشوفنى ليه !!

حمزة:ده الحاج محمود البطل وهو كان يعرف جدك الحاج صالح متقلقيش من حاجه يعنى .. هو موجود فى الورشه دى ورشه البطل اتفضلى .

رغد:حاضر .

رغد مشت معاه ودخلت الورشه ودخلو المكتب كان الحاج محمود قاعد على كرسي جمب المكتب ولما شافها قام وقف .

رغد:السلام عليكم .

محمود:وعليكم السلام يابنتى .

رغد مدت ايدها وسلمت عليه .

محمود:وروح هات حاجه للانسه تشربها ياحمزة.

رغد:لا مالوش لزوم شكرا .

محمود:لا لازم تشربي .. تحبي تشربي ايه يابنتى ؟

رغد بصت لحمزة:ممكن قهوة مظبوطه .

محمود:وانا كمان قهوة يابنى .

حمزة:حاضر ياحاج .

حمزة خرج من المكتب ومحمود بص  لرغد:جدك صالح كان غالى عليا اوى يابنتى عشان كدا لما عرفت انك هنا حبيت اشوفك .

رغد:جدو صالح الله يرحمه كان بيحب البيت ده اوى وكان دايما يحكيلى وانا صغيرة عليه وانه ماكنش حابب يسيب البيت ولا المنطقه لا هو ولا تيتا الله يرحمها .

صالح:الله يرحمهم يابنتى .... وهما كانو ونعمه الجيران وزعلنا على فراقهم والله .

فى الوقت ده دخل حسن واتفاجأ برغد وبصلها اوى وهى بصتله ورجعت بصت لمحمود تانى  .

محمود:تعالى ياحسن يابنى ... خلصت الشغل ؟؟

حسن:ايوا ياحاج اتفقت على شحنه الخشب وهتوصل بكرة باذن الله .

محمود:الله يصلح حالك يابنى .

محمود بص لرغد:ده بقي سندى وضهرى ابنى حسن .

رغد بصت لحسن:اهلا وسهلا .

حسن:اهلا بيكى .

محمود:وحمزة اللى راح يجيب القهوة ده ابن اخويا بس بعتبره زى حسن بظبط .

رغد:ربنا يخليهم ليك ياعمو ويبارك فى عمر حضرتك .

محمود:تسلمى يابنتى .

محمود بص لحسن:اقعد ياحسن واقف ليه !!

حسن قعد على كرسي وعينه على رغد .

محمود:صح يابنتى انتى اسمك ايه نسيت اسالك ؟!

رغد ضحكت:انا اسمى رغد ياعمو .

محمود:انتى بقي بنت مريم ولا منى ؟

رغد:انا بنت مريم .

محمود:انا فكرتك بنت منى لانك شبهها اوى .

رغد:ماما كانت بتقولى كدا بردو ... وانا اصلا كنت متعلقه جدا بخالتو منى وانا يعتبر بنتها فى الرضاعه .

محمود:سبحان الله يابنتى ..... واخبارهم ايه طمنينى عليهم هما هيجو يعيشو هنا معاكى ؟؟

رغد لسه هترد دخل حمزة بالقهوة:اتفضلو ياحاج .

حمزة عطى لكل واحد فيهم القهوة بتاعته وقعد جمب حسن .

محمود:هيجو يابنتى هنا ؟؟

رغد بلعت ريقها وبتحاول تدارى حزنها:لا هما الله يرحمهم ياعمو.

محمود:لا حول ولا قوة الا بالله يارب .. امته الكلام ده يابنتى ؟!

رغد:خالتو منى من ٣ سنين تقريبا ... وماما السنه اللى فاتت فى رمضان كانت راجعه من العمرة هى وبابا وعملو حادثه والعربيه اتقلبت بيهم واتوفو .

حسن عينه عليها وشايف ايدها اللى بتفركها بتوتر .

محمود:لا حول ولا قوة الا بالله العلى العظيم ربنا يرحمهم يابنتى ويصبرك .... وانتى عايشه لوحدك ؟

رغد:انا عايشه مع اختى التؤام رهف .

محمود:ربنا يخليكو لبعض يابنتى يارب .

رغد:تسلم ياعمو . 

محمود:وايه اللى فكركو بالبيت ده بقي ؟!

رغد:ماما دايما كانت بتحكيلى عنه وعن الايام اللى قضوها هنا ... بعد وفاه بابا وماما رهف اتاثرت جدا وانا حبيبت نغير جو واجيبها هنا عشان تبعد عن الذكريات اللى فى الڤيلا .

محمود:ربنا يصبركو يابنتى يارب .... وانتى لسه لابسه اسود عشانهم بس الحزن مالوش علاقه ياللبس يابنتى .

رغد:انا عارفه وانا ناويه اغيره عشان خاطر رهف عشان هى كمان تغيره .

محمد دخل:حاج محمود المعلم منصور عايزك برا .

محمود عارف هو عايزه ليه:حاضر يابنى .

محمود قام وخرج ومعاه حمزة والمعلم منصور قرب منهم:ازيك ياحاج محمود ؟

محمود:بخير يامعلم خير ؟!

منصور:انا عرفت ان حفيده الشهاوى عندك فقولت اقولك تكلمها فى موضوع البيت ونبي  .

محمود:ماهى قالتلك انها مش هتبيع وانا عرفت منها انها هتيجى تعيش هنا هى واختها .

منصور:بس كدا بيتى هيتخرب ياحاج حاول معاها ونبي .

حمزة:هى قفلت الموضوع ده معلم وزى مانت شايف جابت كل حاجه عشان هيعيشو هنا .

منصور:يعنى ايه كدا مافيش عمارة هتتبنى ؟!

محمود:الله اعلم يامعلم محدش عارف الخير فين .

منصور مشي وكان هيتجنن من كتر التفكير .

بقلم الكاتبه جنات

ـــــــــــــــ★ـــــــــــــ

رغد كانت بتتفرج على الشغل اللى عجبها كدااا وحسن عينه عليها .

فون رغد رن وكانت الدكتورة مها:الو يامها.

مها:دكتور فؤاد مجاش والمفروض لسه نص ساعه على معاد العمليه .

رغد:هو طلب اجازة ولا؟

مها:لا متكلمش واحنا بنتصل بيه مش بيرد .

رغد:تمام يامها خلى محمد يجهز ولو مجاش خلال نص ساعه خلى محمد هو اللى يعمل العمليه .

مها:وانتى هتعملى ايه ؟!

رغد:اقفلى انتى وقولى لمحمد زى ماقولتلك .

مها:تمام .

رغد قفلت مع مها ورنت على فؤاد بس مش بيرد ورنت تانى وتالت ورابع لحد مارد .

رغد:ممكن افهم حضرتك ماروحتش المستشفى ليه ؟!

فؤاد:كنت تعبان .

رغد:ولما حضرتك تعبان ليه مطلبتش تأجيل العمليه او طلبت اجازة !!

فؤاد ببرود:نسيت .

رغد اتعصبت بس بتحاول تتمالك نفسها عشان حسن اللى قاعد والناس اللى فى الورشه:تمام يافؤاد اسمع بقي منى الكلمتين دول ... خلال ربع ساعه لو ماروحتش المستشفى دكتور محمد هيبدأ بالعمليه ولو ده حصل ..... عايزة اجى الاقى ورقه استقالتك مع دكتورة مها وكلام خلص .

فؤاد:خلص ازاى يعنى مش فاهم بقولك تعبان .

رغد:لا مانت مش شغال فى وكاله بلح حضرتك .... لما تكون تعبان تطلب اجازة او تطلب تأجيل العمليه ....... وبدام حضرتك تعبان ممكن تقدم استقالتك وتقعد ترتاح فى بيتك .... انا قولت اللى عندى و خلاص سلام  .

رغد قفلت قبل ماتسمع رده واتصلت على مها :مها لو فؤاد موصلش المستشفى خلال ربع ساعه خلى محمد يعمل العمليه ولما يجى فؤاد تاخدى استقالته سمعانى .

مها:حاضر يارغد .

رغد:سلام.

رغد قفلت وبتتمنى من جواها ان فؤاد ميروحش المستشفى عشان تبقي فرصه وتخلص منه بس فاقت من تفكيرها على رنه فونها وكانت مها.

رغد:ايه يامها ؟

مها ضحكت:وصل ودخل اوضه العمليه جرى .

رغد ضحكت:ده مأخدش ١٠ دقايق ... ناس ماتجيش غير بالعين الحمرا ... يلا روحى وعايزة تقرير عن العمليه .

مها:حاضر .

رغد قفلت ورجعت تتفرج تانى على الشغل  وبصت لحسن اللى كان ماسك ورق وباصص فيه بس هو مركز فى كلمه رغد بتقولها .

رغد:شغلكو حلو اوى ماشاء الله .

حسن بصلها:تسلمى .

رغد وهى بتتفرج على الشغل:الوقت انتو شغالين فى اوض النوم والصالونات وكدا بس ولا اى حاجه بتعملوها ؟!

حسن:لا لو حابه تنفذى حاجه معينه بتجبلنا صور واحنا بنشتغل على اساسها .

رغد بصتله:لو انا حابه اعمل مرسم وعايزاك تعملى ارفف واستاندات اللى بيتحط عليها اللوح وكمان الدولاب اللى بيكون كله ادراج صغيرة عشان الالوان والفرش وكدا تقدر تعملى ؟!

حسن:اه طبعا هاتيلى صور للحاجه اللى حابه تعمليها .

رغد فتحت فونها وجابت فيديو كانت مصوراه فى مرسم رهف ورهف اللى كانت قاعده بترسم وبتضحك على لارا ورغد اللى بيلعبو بالالوان وقربت الفون من حسن: شوف ده المرسم اللى حابه اعمل زيه .

حسن كان شايفها وهى بتحط الوان على وش لارا ولارا نفس الكلام ومش عارف مين البنت الصغيرة دى وفاق على صوت رغد .

رغد:تمام ؟

حسن:اه دى حاجه سهلا جداا .

رغد:تخلص على امته كدا ؟!

حسن:شوفى عايزاهم امته؟

رغد:احنا ممكن ننقل على الاسبوع الجاى يكونو خلصو؟

حسن:ايوا اكيد .

رغد ابتسمت:تمام .

محمود وحمزة دخلو وكانت معاهم ام فرح 

محمود:رغد يابنتى ام فرح كانت عايزة تسالك على حاجه .

رغد:اكيد اتفضلى .

ام فرح:هو يعنى يابنتى انتى هتخلينى اسيب المكان اللى فارشه فيه فرشه الخضار ؟

رغد باستغراب:انا هخليكى تسيبه ليه مش فاهمه؟!

محمود:اصل الحته اللى ام فرح بتبيع فيها الخضار تبع بيتكو يابنتى وهى بتسال لو هضايقك تمشي منها يعنى .

رغد:لا طبعا مش هتضايقنى ولا حاجه ياطنط المكان مكانك اكيد .

ام فرح بفرحه:تسلمى من كل شر يابنتى تسلمى .

رغد:الله يخليكى ..... انا لازم امشي بقي ومبسوطه انى اتعرفت عليك ياعمو وبجد فكرتنى بجدو صالح جداا .

محمود:تسلمى يابنتى واحنا اللى لينا الشرف اننا اتعرفنا عليكى واكيد هتنورى الحارة انتى واختك .

رغد:شكرا ياعمو عن اذنكوو .

رغد خرجت وطلعت بصت مرة اخيرة على البيت اللى كانو البنات بيرتبوه وشافت الحاجات الناقصه اللى لسه هتجيبها وكلمت تاكسي اللى وصل بعد شويا ونزلت ركبت ومشت .

بقلم الكاتبه جنات

ـــــــــــــــ★ـــــــــــــ

الشباب رجعو البيت وكانت هدى وحنين بيجهزو الاكل على السفره واولفت وعزة فى اوضتهم .

حسن:عامله ايه ياست الكل ؟!

هدى بصوت حزين:بخير يابنى غيرو عشان تاكلو لقمه .

حمزة:مالك ياهدهد انتى كويسه ؟!

حنين:لا مش كويسه وكله بسبب مرات خالك .

هدى:بس ياحنين ويلا جيبى باقى الاكل .

حسن:استنى ياحنين ... ايه اللى حصل ؟؟ ... والحاج كان جاى مضايق وضغطه ماكنش مظبط بردو فهمونى ايه اللى حصل؟!

هدى بصت لحنين عشان ماتتكلمش وحسن ملاحظ نظراتهم .

هدى:انت عارف مرات خالك ياحسن مش بتسكت وابوك اضايق من كلامها مش اكتر ... روح يابنى غير عشان تاكلو لقمه انتو من الصبح على لحم بطنكو .

حسن:الحاج فين الوقت ؟

هدى:اجا من برا وطلع على اوضته وقال مش عايز ياكل .... يلا ياحنين حضرى الاكل لاخواتك وانا هطلع ارتاح شويا .

حنين:حاضر ياماما .

هدى طلعت وحسن بص لحنين:هاتى الاكل وتعالى هناكل فى شقتى فوق ... يلا ياحمزة .

حسن وحمزة وحنين طلعو شقه حسن واكلو سوا .

حسن:قولى ايه اللى حصل ياحنين ؟

حنين:بص انا هحكيلك الموضوع من البدايه .. انا اصلا كنت عايزة احكيلك بس ماما هى اللى منعتنى عشان مش عايزاك تعمل مشاكل مع عزت .

حسن:وايه دخل عزت بالموضوع ... اخلصى ياحنين قولى. 

حنين:انا كنت بعطى الدرس للولاد على السطح وعزت طلع وقال ايه عايز يتكلم معايا .

حمزة:يتكلم معاكى بتاع ايه مش فاهم وليه فوق يعنى !!

حنين بتوتر:بيقولى يعنى .. انه معجب بيا وعايز يعرف رايي عشان يتقدملى وانا قولتله انه زى اخويا وانى مش بفكر فى الموضوع ده الوقت .

حسن بعصبيه:وهو يكلمك انتى ليه البيت مافهوش رجاله يعنى .

حمزة:اهدى ياحسن ... وبعدين كملى ايه اللى حصل ياحنين .

حنين:وقتها هو سابنى ومشي ومبقتيش اشوفه وقولت لماما وكنت عايزة اعرفك انت وبابا بس ماما رفضت عشان ميحصلش مشاكل بينكو ...ومرات خالى فتحت الموضوع تانى مع ماما وهى بردو رفضت ... بس النهارده فتحت الموضوع مع بابا وانا فهمت من كلام ماما انها كانت قاصده تعرفه ان انا وماما خيبنا عليه الموضوع وهو اضايق وساب البيت وخرج ومن وقتها مش بيكلمنى ولا بيكلم ماما .

حمزة:انا قولتلك ياحسن الست دى داخله البيت ومش ناويه على خير ابداا .

حسن:تبقي تفكر تعمل حاجه ولا تتذاكى عليا وتشوف انا هعمل فيها ايه هى وولادها ... وحساب عزت بيه معايا بس بعدين ... لما اتكلم مع الحاج .

حنين:عشان خاطرى ياحسن متزعلش منى انت كمان  انا كنت هقولك والله بس انت عارف ماما ... كفايه بابا مش راضي يكلمنى وده مزعلنى اوى ياابو على .

حسن حضنها وحنين عيطت:خلاص اهدى متعطيش يانونه وانا هتكلم مع الحاج وهفهمه انه مش ذنبك ياحبيبتى .

حمزة قرب منهم وطبطب على حنين:بلاش تعيطى يانونه ... احنا مابنحبش نشوفك زعلانه كدا .

حنين مسحت دموعها:ربنا يخليكو ليا .

حسن:انزلى يلا ارتاحى وبلاش تتكلمى مع مرات خالك وولادها خالص .

حنين:انا اصلا طول اليوم على السطح بدرس للولاد ومش بنزل غير عشان اساعد ماما .

حمزة:احسن بردو .

حمزة حب يغير الموضوع:صح يانونه مش الدكتورة النهارده كانت عندنا فى الورشه .

حنين برقت:قول والله ليه بقي ؟

حسن بص لحمزة بنرفزة:انت متعرفش تسكت ابدا .

حمزة:لا ... وبعدين انا مش بخبي حاجه على نونه مش كدا .

حنين:حبيبي انت يازومه قولى بقي ايه اللى حصل ؟!

حمزة حكالها على اللى حصل .

حنين قربت من حسن:قولتو ايه وانتو لوحدكو ياابو على ؟

حسن:هنقول ايه يعنى محدش فينا اتكلم .

حمزة:كذاب .. اخوكى ده كذاب .. انا داخل عليك انا وعمى وكنتو بتتكلمو .

حسن:كانت عايزانى اعملها حاجه عشان عايزة تعمل مرسم لاختها .

حنين بغمزة:وهتعملها ياابو على ؟!

حسن:تصدقى بالله لو منزلتى انتى وهو الوقت هعمل احلى خريطه فى وشكو يلا .

حنين وحمزة ضحكوو.

حنين:تصبحو على خير .

حسن وحمزة:تلاقى الخير .

حنين اخدت صنيه الاكل ونزلت وحمزة بص لحسن:ناوى على ايه فى موضوع مرات خالك؟

حسن:مش عارف ... لانى لو اتكلمت معاها اكيد امى هتزعل .

حمزة:انا من رايي اكتفى بتحذير لابنها وبس .

حسن:اكيد هيحصل .

حمزة:يلا هنزل انام بقي .

حسن:تمام .

حمزة نزل وحسن كالعاده اخد شاور وقعد قعدته المفضله فى البلكونه وعينه جت على بيت الشهاوى وابتسم لما افتكر رغد وكلامها معاه وافتكرها لما كانت بتتكلم مع ابوه بكل هدوء ورقه كأنها قطه مطيعه وفجاه اتحولت لنمرة شرسه لما كلمت الدكتور ومسك فونه وفتح الاكونت بتاعها وفضل يقلب فيه  ولاحظ اكونت اسمه مؤمن وده اللى كان بيعملها كومنت على كل بوستات بتاعتها وافتكر لما سمعها وهى بتقول "مؤمن ياحبيبي ..ياقلبي"

حسن:ومين سي مؤمن ده كمان ... معقول خطيبها ... بس مش لابسه حاجه فى ايدها ...بيحبو بعض معقول ؟!!

حسن كان بيتفرج على الاكونت بتاعها وشاف اكونت تانى اسمه مازن الصاوى وكان عاملها قلوب كتير على صوره ليها هى منزلاها.

حسن:ومين ده كمان؟ .... وبعدين ايه كميه الرجاله اللى عندها دول ... اكيد دكاترة زيها ويمكن قرايبها !!

حسن زهق من كتر التفكير وقرر يدخل ينام عشان يصحى من بدرى يجهزلها الحاجات اللى هى طلبتها منه ......

بقلم الكاتبه جنات