هارون قرب منها ببطئ و خيال نبض قلبها زاد مكنتش قادرة تنزل عيونها الملونة عن عيونه السودة  

 

هارون وقف قدامها و حط ايده علي جبهتها : احسن دلوقتي يا بابا  

 

بلعت ريقها بصعوبة و حاولت تبتسم بس شفايفها اترعشت و كان شكلها مهلك للاعصاب : اه  

 

هارون هنا هو اللي تااه بص علي شفايفها و رجع بص في عيونها و رجع لورا بتوتر : احم طبعا جعانه  

 

خيال هزت دماغها : امم جعانه اوي مش بعرف اعمل حاجه في المطبخ  

 

هارون خد رشفة من فنجان القهوة و ركنه علي الرخامة : اعملك ايه تاكليه  

 

خيال برفض : لا متتعبش نفسك انا هاخد تفاحة او كاسة عصير مش مهم  

 

هارون بص لها بهدوء شاور بعنيه علي الكرسي : اقعدي يا بابا لحد معملك عشا خفيف مينفعش العصير  

 

خيال قعدت من غير كلام و عنيها متابعه طلع بطاطس جاهزة حطها في الاير فرير وقف عملها اومليت و قطع  

لها خيار و طلع جبن و زيتون و حط الاكل قدامها علي الترابيزة  

 

هارون بابتسامه حنون لما بدأت تاكل بجوع : تحبي اجيبلك كاتشب جمب الفرايز  

 

خيال ابتسمت : اممم  

 

فتح التلاجه وخد قزازة الكاتشب و فضاه في طبق صغير و حاطه قدامها بقت تغمس البطاطس في الكاتشب و تاكل بتلذذ  

 

: الاومليت يجنن تسلم ايدك  

 

هارون كان قاعد قدامها يكمل فنجان القهوة بتاعه : هتنزلي الجامعة امتى  

 

خيال ابتسامتها اختفت : مش عارفه خايفه مقدرش اتأقلم هنا انا اصلا مكنتش عايزة اسيب لبنان  

 

: لا طبعا متخافيش مفيش حاجه تقلق طول ما انتي بتحبي مجالك و التخصص اللي اختارتيه خلاص هتعرفي تتعاملي في اي مكان و انا معاكي و الياس و لوسيندا  

و بعدين كان لازم هيجي يوم و تنزلي بلدك يا بابا  

 

خيال ابتسمت بامتنان : شكرا عشان بتحاول تطمني ...سهران ليه لحد دلوقتي  

 

: متعود اخر اليوم اعمل فنجان قهوة و اقعد في المشغل بتاعي ساعه و لا ساعتين و ارجع انام  

 

: سوري عطلتك عن روتينك  

 

: متعتذريش يا بابا عادي انا رايح دلوقتي  

 

خيال بنظرات بريئة : طب ممكن اجي معاك اتفرج من غير صوت بليز مش عندي نوم  

 

هارون متعود يكون لوحده مفيش حد اهتم ابدا يشوف هوايتة و لا بيحب يعمل ايه مفيش حد غيرة بيدخل الاوضة دي حتي مراته الراحلة كانت مديرة مدرسة جادة تصحى بمعاد و تنام بمعاد كانت من النادر لما تضحك  

او تتكلم مكنتش بتشاركه اهتماماته اتجوزوا في سن  

صغير كان ابوها و ابوه اصدقاء و جوزهم و هما عندهم  

عشرين سنه كل واحد كان ملهي في حياته و تعليمة و شغله و اهتماماته جابت الياس و بعدها بتلت سنين 

لوسيندا بعد كده اتوفت بسبب حمي الضنك  

 

خيال بزعل من صمته : خلاص اسفه لو ضايقتك هروح اوضتي  

 

هارون فاق من شروده و مسك ايدها : لا تعالي يلا  

 

خيال ابتسمت و جسمها اترعش من كفة الخشن علي ايدها الناعمه و بصت له بفرحه طفولية : يلا يا دادي تسمح لي اقولك دادي  

 

هارون بص علي ايدهم بعد كده بص لها و مردش 

 

خيال بخفوت : بلييييز بقالي كتير مفتقدة الاحساس ده  

 

هارون مسح علي شعرها و ابتسم لها بحنان و حس بيها لانه متخيل لوسيندا لو كانت مكانها هيبقى حالها ازاي  

: اوكي  

 

خيال مسكت دراعه بأيديها الاتنين و هي بتتنطط و بتهز راسها يمين و شمال بضحكة لذيذة : ميرسي دادي  

 

هارون ضحك علي طفولتها اللذيذة و مشي بيها للمشغل في هدوء الليل فتح الباب : اتفضلي  

 

خيال دخلت بحماس وشهقت من جمال المنظر الإضاءة الديكور اللوحات المنحوتات المشغولات الخزفية و الفخارية  

 

و بصت له بصدمة : ده بجد انت اللي عامل كل ده  

 

هارون بهدوء : اه دي هوايتي و تعليمي انا كنت في كلية تربية فنية و طالع الاربع سنين بامتياز و كان قدامي اني اكون معيد بس سيبت ده كله بقى و مسكت الشركة مع باباكي الله يرحمه هو كان ادارة اعمال و شدني معاه و قالي سيبك من الشخبطه الحمل كان زاد عليه بعد وفاة عمي و بابا كان تعب و سلمني مكانه سيبت الفنون و اشتغلت في الادارة بس زي ما انتي شايفة لسه شغفها جوايا  

 

خيال عنيها كانت بتلمع بتأثر : خليك ورا حلمك و كمل سيب الشركة لالياس و حنين صدقني روبوت و حاول تكون معيد زي ما كنت بتتمنى 

 

هارون ابتسم بخفة : مش هينفع خلاص انا كبرت علي الاجواء دي نسيتها خليني في الشركة افضل  

 

: بلاش اليأس ده بليز انت لسه قدامك العمر طويل و مش كبير اووي يعني بالعكس انا مستغربة الياس  

ابنك ازاي بجد فكرتك اخوه الكبير اول ما وصلت  

 

هارون ابتسم و نكش شعرها : يا راجل بلاش كدب  

 

خيال ضحكت : و الله صدقني انت بتعئد  

 

: اومال عايزة تقوليلي دادي ليه يا بكاشة  

 

خيال بخفوت : مش عارفه بابا وحشني اوي حسيتك شبهه عيونك و نظراتك فيك حاجه منه حنانك علي لوسيندا و اهتمامك بيها جميل اوي و انا مفتقداه